XPALAKATA hebreos tiku xlamakgolh kTiyat nema xkamalaknunikanit pi nakamaxkikan, kata xtsuku akxni xtsukukan lakgwaxkan tiyat chu xchananankan, uma xtlawakan papaʼ nema la uku septiembre chu octubre.

Xlakata xkatsika la xmakgapala akgatunu papaʼ, xʼakxilhkan la xlimakgas Papaʼ xmakgstiliwili Katiyatni, nema makgapala 29 o 30 kilhtamaku. Chu xʼakxilhkan Chichini xlakata xkatsika la xlilhuwa kilhtamaku xmakgapalalh akgtum kata. Pero 12 papaʼ nema makgapala Papaʼ xlakata la makgstiliwili Katiyatni tlakg ni lhuwa nixawa la akxni Katiyatni makgstiliwilikgo Chichini. Wa xlakata, wi tuku xtalakaskin xtlawakgolh xlakata ni xtsankganilh kilhtamaku. Xmaliwakanikan makgapitsi kilhtamaku o xlaktamaknutilhakan makgapitsi papaʼ, max akxni nina xtsuku atanu kata. Chuna, calendario xtatalakxtumi kilhtamaku akxni xchananankan o akxni xmakikan tachanan.

Kxkilhtamaku Moisés, Jehová wanilh xkachikin pi xasanto kata xlitsukut xwanit papaʼ abib (o nisán), nema la uku lakgchan marzo chu abril (Éx. 12:2; 13:4). Uma papaʼ, israelitas xtlawakgo akgtum fiesta niku xlimakamaxkitkan xwanit Jehová xapulana tawakat xla cebada nema xmakgalakgo (Éx. 23:15, 16).

Historiador Emil Schürer wan: «Wa uma tuku xkamakgtaya nalaksakkgo la xʼamakgo lakkaxwilikgo: fiesta xla Pascua, xlitatalakxtumit xwanit papaʼ Nisán akxni xkatlan papaʼ (14 xla Nisán) ankgalhin xlilakgchanat xwanit akxni xtitaxtunita equinoccio xla primavera […]. Komo Pascua xkilakgchan akxni ksputmaja kata chu nina xchin equinoccio xla primavera, xlaktamaknukan akgtum xasasti papaʼ akxni nina xchan papaʼ xla Nisán» (Historia del pueblo judío en tiempos de Jesús 175 a.n.J. - 135 a.x.J., tamatitaxtilh J. Cosgaya chu A. Piñero).

Xtatayananin Jehová chuntiya maklakaskinaw uma xlakata nakatsiyaw tuku kilhtamaku lakgchan xTaway kiMalanakan, nema lakgchan marzo chu abril, chu lakgchan 14 xla nisán kcalendario hebreo. Kilhtamaku akxni lakgchan natalakapastaka akxni tinilh Jesús alisokg kamakatsinikan congregaciones nema anankgo kxlikalanka katiyatni. *

Pero ¿la xkatsikgo hebreos akxni ksputa akgtum papaʼ chu xtsuku atanu? La uku, kajwatiya akxilhaw maktum calendario o akxilhaw kʼakgtum aplicación kkidispositivokan electrónico xlakata nakatsiyaw uma. Pero, kkilhtamaku akxni xtsokgmaka Biblia, uma lu tuwa xwanit nakatsikan.

Kxkilhtamaku Noé, akgatunu papaʼ xkgalhi 30 kilhtamaku (Gén. 7:11, 24; 8:3, 4). Alistalh, akxni lakkaxwilika calendario hebreo, ni putum papaʼ xkgalhi 30 kilhtamaku. Akxni xʼakxilhkan pi xtsukuma katlan papaʼ uma kilhtamaku xtsuku akgtum Papaʼ, uma wamputun, 29 o 30 kilhtamaku alistalh akxni xtsukunita papaʼ nema titaxtulh.

Akgtum kilhtamaku, David chu Jonatán xlichuwinamakgo akgtum papaʼ akxni wankgolh: «Chali skgata papaʼ» (1 Sam. 20:5, 18). Wa xlakata, ksiglo once akxni nina xmin Jesús xkatsikana tuku kilhtamaku xkilakgchan akgatunu papaʼ. ¿Chu la xkatsikgo israelitas akxni xtsuku xasasti papaʼ? Tekgsaw xatakgalhtin kMisná, maktum libro niku makxtum tsokgwilikanit xtalismaninkan chu limapakgsin nema xtlawakgonit judíos. Wan pi akxni judíos xkachilinkanita kBabilonia, Sanedrín, tlakg xlakaskinka tribunal judío, xtamakxtumikgo kilhtamaku 30 xla akgtujun papaʼ xla kata xlakata nalichuwinankgo tuku kilhtamaku xʼama tsuku atanu papaʼ. ¿Niku xkilhtiyakgo xlakata nakatsikgo tuku nalaksakkgo?

Kxlimakgstilili Jerusalén xkamalakgachakan makgapitsi lakchixkuwin niku tlan liwana xʼakxilhkan akgapun. Akxni umakgolh lakchixkuwin xʼakxilhkgo pi xtsukuma katlan Papaʼ, tunkun xmakatsinikgo Sanedrín. Akxni Sanedrín liwana xkatsikgoya pi xtsukunita katlan papaʼ, xmakatsininankgo pi tsukunita xasasti papaʼ. ¿Chu komo  nila xʼakxilhkan Papaʼ xlakata xʼanan puklhni? Xwankan pi papaʼ nema xlama xkgalhi 30 kilhtamaku chu xasasti papaʼ xtsuku lichali.

Misná lichuwinan pi Sanedrín xmapasikgo lhkuyat ksipi xla Olivos, lakatsu kJerusalén xlakata xmakatsininankgolh tuku xlaksakkgonit, chu alakatanu niku katalhman kʼIsrael. Titaxtulh kilhtamaku, nialh tsukuka maklakaskinkan lhkuyat, wata xkamalakgachakan makatsininanin. Chuna, putum judíos, tiku xlamakgolh kJerusalén o alakatanu, xkatsikgo tuku kilhtamaku xtsuku xasasti papaʼ chu tlan xtlawakgo fiestas watiya kilhtamaku.

Dibujo nema limin uma artículo kinkamakgtayayan naʼakgatekgsaw la calendario hebreo xtatalakxtumi papaʼ, fiestas chu estaciones.