1, 2. ¿Tuku xlakata kinkilhtamakujkan xtachuna la xkilhtamaku Lot?

 AKXNI akxilhaw la limakgolh xlatamatkan latamanin xala uku, makgkatsiyaw chuna la Lot, chatum xa’akgstitum chixku tiku latamalh makgasa. Xla «lu xlilakgaputsa xlakata tiku lixkajni xlikatsikgo xtlawakgo tuku ni xlilat chu ni xlilakamaxanankgo», xlakata xla xkatsi pi kinTlatkan xalak akgapun kaxkajni latamanin tiku chuna likatsikgo (2 Ped. 2:7, 8). Xlakata Lot xpaxki Jehová chu lu xmaxki kakni, na kxkajni chuna la xlikatsikgo latamanin. Kkinkilhtamakujkan nachuna. Lamaw k’akgtum kakilhtamaku niku latamanin nipara tsinu maxkikgo kakni xlimapakgsin Dios. Maski chuna, komo paxkiyaw Dios chu kgalhiniyaw tapekua, tlan nalinaw xaskulunku latamat (Prov. 14:2).

² Jehová limaklakaskin libro xla Proverbios xlakata nakinkamakgtayayan chu nakinkamakgpuwantiniyan natlawayaw tuku tlan. Putum akinin kstalaninanin Cristo, lakchixkuwin, lakpuskatin, kamanan chu tiku laklankata, lu nalitamakgtayayaw xatlan tastakyaw nema min k’uma libro.

3. Chuna la wan Proverbios 17:3, ¿tuku xlakata kuenta kilitlawatkan kinakujkan? (Na ka’akxilhti dibujos).

³ Pulaktum tuku xlakata lu xlakaskinka nakuentajtlawayaw kinakujkan, wa pi Jehová lakputsanani naku. ¿Tuku wamputun uma? Pi xla akxilha tuku latamanin nila akxilhkgo. Katsi putum tuku makgkatsiyaw chu tuku lakpuwanaw (kalikgalhtawakga Proverbios 17:3). Komo Jehová naʼakxilha pi xtapalh liʼakxilhaw xtastakyaw, nakinkapaxkiyan. Komo nalimatsamayaw kinakujkan xliskgalala Jehová, nila katitanulh xtaʼakgsanin chu nixatlan xtapuwan Satanás chu xkakilhtamaku (Juan 4:14; 1 Juan 5:18, 19). Komo tlakg natalakatsuwiniyaw Jehová, tlakg napaxkiyaw chu tlakg namaxkiyaw  kakni. Ni katitlawaw tuku nitlan nalimakgkatsi kinTlatkan, asta lixkajni nalimakgkatsiyaw maski kaj nalakpuwanaw tuku nitlan. Akxni nakgalhiyaw akgtum taputsan, nawanaw: «Ni ktitlawalh tuku nitlan katilimakgkatsilh tiku lu kimpaxki chu lhuwa tuku tlawanit kimpalakata» (1 Juan 4:9, 10).

4. ¿La makgtayalh chatum tala tapekua nema xkgalhini Jehová?

⁴ Chatum tala xalak Croacia tiku wanikan Marta b tsukulh lilakpuwan tuku nitlan, xtlawaputun talakgxtumit nema ni xlitatlawat. Xla tsokgwililh: «Nila liwana xaklakapastaknan. Lu tuwa xakmakgkatsi naklakgmakgan uma nixatlan tapuwan. Pero tapekua nema kkgalhini Jehová kimakgtayalh». ¿La makgtayalh Marta uma tapekua? Xla wan pi makgtayalh nalilakpuwan tuku nitlan x’ama kitaxtuni komo xlaksakli tuku nitlan. Akinin na tlan chuna natlawayaw akxni nakgalhiyaw nixatlan tapuwan. Kalakapastakwi pi tuku tlakg nitlan wa pi namakgalipuwanaw Jehová chu nialhla katikakninaniw putum kilhtamaku (Gén. 6:5, 6).

5. ¿Tuku masiyaniyan tuku akgspulalh Leo?

⁵ Tiku pekuani Jehová lu liskuja xlakata ni nalakpuwan pi pulaktum tayat ni lu lixkajni chu kuenta tlawa ni nakatalalin tiku lixkajni likatsikgo. Wa uma tuku katsinilh Leo, tiku lama kRepública Democrática del Congo. Akxni xtitaxtunita akgtati kata lata xtamununit, tsukulh katalalin tiku nitlan xlikatsikgo. Xlakpuwan pi komo xla ni xtlawama tuku nitlan, nitu xmakglakgalhinama kxlakatin Jehová. Pero ni makgas titaxtulh, x’amigos tsukukgolh matlawikgo tuku nitlan, tsukulh wa lhuwa kuchu chu tsukulh tlawa talakgxtumit nema ni xlitatlawat. Ama kilhtamaku Leo tsukulh lilakpuwan putum tuku xmasiyanikgonit xnatlatni, tiku xtatayananin Jehová litaxtukgo, chu la xlilhuwa xpaxuwa akxni xtatayana Jehová xlitaxtu. Wa xlakata lakgpalilh xtalakapastakni chu putsalh xtamakgtaykan  lakgkgolotsin xlakata xlakgtaspitli Jehová. La uku, Leo lu paxuwa, kgolotsin xalak congregación chu precursor especial litaxtu.

6. ¿Tiku lakpuskatin nakalichuwinanaw kʼuma artículo?

⁶ La uku nalichuwinanaw tuku kinkamasiyaniyan capítulo 9 xla Proverbios, nema kimputumkan kinkamakgtayayan. Anta kalichuwinankan chatiy lakpuskatin nema kaj wi tuku kilhchanimakgo. Chatum kilhchanima liskgalala, chu achatum kilhchanima litonto. c Chuna la nalikgalhtawakgatilhayaw párrafos nema stala, kalakapastakwi pi xkakilhtamaku Satanás kajwatiya lilakpuwan talakgxtumit chu pornografía (Efes. 4:19). Wa xlakata lu xlakaskinka pi chuntiya nakgalhiniyaw tapekua Jehová chu natamakgatliniyaw tuku nitlan (Prov. 16:6). Umakgolh chatiy lakpuskatin nema nakalichuwinanaw katasanikgo «tiku katsankgani liskgalala». Xtachuna la komo xkawanikgolh pi katanukgolh kxchikkan chu kawayankgolh (Prov. 9:1, 5, 6, 13, 16, 17). Pero tiku kalakgankgo, tanu tanu tuku kakitaxtuni. Kalichuwinaw tuku xlakata.

7. Chuna la wan Proverbios 9:13-18, ¿la kakitaxtuni tiku tanukgo kxchik «puskat tiku xatonta»? (Na kaʼakxilhti dibujo).

⁷ Pulana kalichuwinaw tuku wan «puskat tiku xatonta» (kalikgalhtawakga Proverbios 9:13-18). Nipara tsinu lakamaxanan chu pixlanka wan: «¡Putum tiku xatonto, kamilh unu!». Chuna kawani tiku xalaktonto pi kaʼankgolh wayankgo kxchik. ¿Chu tiku wilakgo anta? «Anta wilakgolh tiku nikgonita». Uma ni xlimakgtumku akxni Proverbios kinkalitachuwinanan chatum puskat tiku chuna likatsi. Xapulana capítulos kinkawaniyan tuku nitlan kitaxtu akxni stalanikan «puskat tiku pataxtutayanit kxatlan tiji» chu «puskat tiku tlawa talakgxtumit nema ni xlitatlawat». Kinkawaniyan: «Xchik linan klinin» (Prov. 2:11-19). Proverbios 5:3-10 na kinkalitachuwinanan atanu puskat tiku na «pataxtutayanit kxatlan tiji». Xpalakata uma puskat, Proverbios wan: «Xtantun ama kkalinin».

8. ¿Tuku xlilaksakatkan tiku kgaxmatkgo tuku wan «puskat tiku xatonta»?

⁸ Putum tiku kgaxmatkgo tuku wan «puskat tiku xatonta» xlilaksakatkan komo namakgamakglhtinankgo x’invitación o ni. Uma max chuna nakinkaʼakgspulayan akxni nakinkamatlawiputunkanan talakgxtumit nema ni xlitatlawat o komo akxni lakgastanamaw kaj xalan nataxtu pornografía. ¿Tuku natlawayaw akxni chuna natitaxtuyaw?

9, 10. ¿Tuku xlakata kililakgmakganatkan talakgxtumit nema ni xlitatlawat?

⁹ Pulaklhuwa tuku xlakata kililakgmakganatkan talakgxtumit nema ni xlitatlawat. Libro xla Proverbios lichuwinan pi «puskat tiku xatonta»  wan: «Chuchut nema kaj kgalhankanit lu sakgsi». ¿Tuku kilhchanima «chuchut nema kaj kgalhankanit»? Anta kBiblia tamalakxtumikan talakgxtumit nema tlawakgo tiku tamakgaxtokgkgonit xtachuna la xaskgawiwi chuchut (Prov. 5:15-18). Puskat chu chixku tiku tamakgaxtokgkgonit kxlakatinkan mapakgsinanin tlan nalipaxuwakgo talakgxtumit. Pero «chuchut nema kaj kgalhankanit» kilhchanima tuku ni xlilat. Max kilhchanima talakgxtumit nema ni xlitatlawat, nema lakatsala xlimapakgsin Dios. Latamanin tiku tlawakgo talakgxtumit nema ni xlitatlawat, kaj xatsekg tlawakgo, xtachuna la chatum tiku kgalhanan, chu lakpuwankgo pi niti katsi tuku tlawamakgo. Lakpuwankgo pi «chuchut nema kaj kgalhankanit» lu sakgsi. Pero kaj xʼakstukan taʼakgskgawimakgo. Jehová putum akxilha, chu nila akgskgawikan. Umakgolh chuchut ni sakgsi kitaxtu xlakata tlawa pi namakgatsankgayaw chuna la talalinaw Jehová, chu uma lu xun kitaxtu (1 Cor. 6:9, 10). Pero ni kajwatiya uma.

¹⁰ Tiku tlawakgo talakgxtumit nema ni xlitatlawat max alistalh nitlan limakgkatsikgo, lakpuwankgo pi ni xtapalh litaxtukgo, kgalhikgo kskgatakan maski nichuna xlakaskinkgo chu asta lakxtlawakgo xfamiliajkan. Liwana tasiya pi tuku tlakg tlan wa pi nalakgmakganaw x’invitación «puskat tiku xatonta». Lhuwa tiku tlawakgo talakgxtumit nema ni xlitatlawat ni kajwatiya lakxtlawakgo chuna la talalinkgo Jehová, wata na kachipa tajatat nema asta kamakgni (Prov. 7:23, 26). Capítulo 9 xla Proverbios, kversículo 18, liwana wan: «Tiku xla kalinit kxchik anta wilakgolh kPutaknun». Pero komo chuna kitaxtu, ¿tuku xlakata lhuwa latamanin makgamakglhtinankgo uma invitación? (Prov. 9:13-18).

11. ¿Tuku xlakata lu nitlan akxilhkan pornografía?

¹¹ Pornografía akgtum liʼakgsiyat nema talakgatuminit kxlikalanka katiyatni. Makgapitsin lakpuwankgo pi ni talakgalhin akxilhkan, pero uma ni xlikana. Tiku akxilha pornografía nialhla makgxtakga, tlawani tuku nitlan chu maxkajwi xlatamat. Nachuna nila patsankga o nila tamakxtu kxtalakapastakni tuku akxilhnit. Nachuna, pornografía tlawa pi tlakg natlawaputun talakgxtumit nema ni xlitatlawat (Col. 3:5; Sant. 1:14, 15). Lhuwa tiku akxilhkgo pornografía, alistalh kitlawakgo talakgxtumit nema ni xlitatlawat.

12. Komo kaj xalan nataxtu akgtum foto nema natlawa pi nakgalhiyaw xalixkajni talakapastakni, ¿tuku kilitlawatkan?

¹² ¿Tuku kilitlawatkan komo akxni maklakaskimaw kicelularkan nataxtu pornografía? Talakaskin nipara tsinu na’akxilhaw. Tuku nakinkamakgtayayan chuna natlawayaw wa nalakapastakaw pi tuku tlakg lhuwa xtapalh kgalhiyaw wa chuna la talalinaw Jehová. Pero wilakgolh fotos nema makgapitsin lakpuwankgo pi ni pornografía, pero tlawa pi natsukuyaw lakpuwanaw tuku ni xlilat. Na ni kiliʼakxilhatkan umakgolh fotos. ¿Tuku xlakata? Xlakata ni tlawaputunaw talakgxtumit nema ni xlitatlawat nipara kkintalakapastaknikan (Mat. 5:28, 29). Chatum kgolotsin xalak Tailandia tiku wanikan David wan: «Akit ankgalhin klilakpuwan: “¿Nalakgati Jehová pi nakakxilha umakgolh fotos maski tasiya pi ni pornografía?”. Uma tapuwan kimakgtaya naklaksaka tuku tlan».

13. ¿Tuku nakinkamakgtayayan nalaksakaw tuku tlan?

¹³ Tlakg ni tuwa katimakgkatsiw nalaksakaw tuku tlan komo kgalhiniyaw tapekua Jehová chu makgapaxuwaputunaw. Lu xlikana tuku wan Proverbios 9:10: «Pekuanikan Jehová tlawa pi nakgalhikan liskgalala». Uma tapuwan liwana litasiya niku tsuku capítulo 9 xla Proverbios, anta niku lichuwinankan chatum puskat tiku kilhchanima «xaxlikana liskgalala».

14. ¿Tuku atanu invitación lichuwinan Proverbios 9:1-6?

¹⁴ (Kalikgalhtawakga Proverbios 9:1-6). Unu tekgsaw akgtum invitación nema kinkatlawaniyan Jehová, kiMalakatsukinakan chu tiku masta liskgalala (Prov. 2:6; Rom. 16:27). Umakgolh versículos xla Proverbios kinkalitachuwinanan akgtum lanka chiki nema kgalhi kgantujun talayaw.  Uma kinkamalakpuwaniyan pi Jehová lhuwa tuku masta, chatum Dios tiku xatapaxuwan kamakgamakglhtinan tiku stalaniputunkgo xtastakyaw.

15. ¿Tuku invitación kinkatlawaniyan Dios?

¹⁵ Jehová lhuwa tuku masta chu tuku masta lu tlan. Chu uma liwana litasiya akxni lichuwinankan puskat nema kilhchanima «xaxlikana liskgalala» chu talichuwinan kProverbios capítulo 9. Xla liwana kaxtlawanit liway chu vino, chu liwana lakkaxwilinit mesa (Prov. 9:2). Nachuna, kversículos 4 chu 5, «xaxlikana liskgalala» kawani tiku xalaktontos: «Katantit, kawatit kinkaxtalanchu». ¿Tuku xlakata kilimakgamakglhtinatkan xʼinvitación uma puskat? Xlakata Jehová kinkakuentajtlawaputunan chu kinkamaxkiputunan liskgalala. Ni lakaskin pi kajwatiya kalistaktayaw tuku nitlan laksakaw chu ni lakaskin nalipatinanaw tuku nitlan tlawanitaw. Wa xlakata, kamaxkima liskgalala tiku xaʼakgstitum (Prov. 2:7). Komo kgalhiniyaw tapekua Jehová, namakgapaxuwaputunaw chu nastalaniputunaw xtastakyaw. Chu uma nakinkaliminiyan tapaxuwan (Sant. 1:25).

16. Xlakata Alain kgalhini tapekua Jehová, ¿tuku laksakli natlawa, chu la kitaxtunilh?

¹⁶ Kalichuwinaw akgtum liʼakxilhtit nema limasiya pi tapekua nema kgalhiniyaw Jehová kinkamakgtayayan nalaksakaw tuku tlan. Alain chatum kgolotsin xalak congregación tiku makgalhtawakgena litaxtu kʼakgtum escuela. Xla wan: «Lhuwa makgalhtawakgenanin tiku kkataskuja lakpuwankgo pi películas xla pornografía makgtayanan xlakata nakalimakgalhtawakgekan kamanan xlakata talakgxtumit». Pero Alain katsi pi uma ni xlikana. Xla kinkalitachuwinanan tuku tlawalh: «Xlakata kkgalhini tapekua Jehová, liwana kkawanilh makgalhtawakgenanin pi ni xakkama akxilha umakgolh películas. Chu na kkawanilh tuku xlakata». Akxni chuna tlawalh, Alain makgantaxtilh tastakyaw nema masta «xaxlikana liskgalala» nema wan: «Kapitit ktiji xla taʼakgatekgsni» (Prov. 9:6). Makgapitsi makgalhtawakgenanin tiku kataskuja Alain lu kaks lilakawankgolh tuku tlawalh. Wa xlakata makgamakglhtinankgolh akgtum takgalhtawakga xalak Biblia chu tsukukgolh ankgo ktamakxtumit.

17, 18. ¿Tuku kgalhikgo tiku makgamakglhtinankgonit xʼinvitación «xaxlikana liskgalala», chu tuku namakgamakglhtinankgo kkilhtamaku nema aku mima? (Na kaʼakxilhti dibujo).

¹⁷ Jehová limaklakaskin umakgolh chatiy lakpuskatin nema kaj wi tuku kilhchanima xlakata nakinkamasiyaniyan tuku kilitlawatkan xlakata nakgalhiyaw xatapaxuwan latamat. Tiku makgamakglhtinankgo xʼinvitación «puskat tiku xatonta» lipaxuwaputunkgo talakgxtumit nema ni xlitatlawat. Kajwatiya paxuwaputunkgo chu ni lilakpuwankgo tuku nitlan nakakitaxtuni. Ni katsikgo pi «kPutaknun» nakitayakgo (Prov. 9:13, 17, 18).

 ¹⁸ ¡Pero lu tlan kakitaxtuni tiku makgamakglhtinankgo xʼinvitación «xaxlikana liskgalala»! Xlakan paxuwakgo xlakata kamakgtayamaka chuntiya natalalinkgo Jehová. Xtachuna la kakaxtlawanikanit akgtum lanka taway niku anan lu kgama liwat (Is. 65:13). Jehová maklakaskilh palakachuwina Isaías xlakata nawan: «Liwana kakinkgaxpatnitit chu kawatit tuku tlan, chu nalipaxuwayatit tlakg xatlan liwat» (Is. 55:1, 2). Chuna, akinin katsinimaw napaxkiyaw tuku Jehová paxki chu naxkajniyaw tuku xkajni (Sal. 97:10). Chu lu kinkamakgapaxuwayan akxni kawaniyaw amakgapitsin pi na kalitamakgtayakgolh «xaxlikana liskgalala». Akinin chuna la makgskitiwinanin tiku kalichuwinankan kProverbios capítulo 9, tiku tayakgo «niku tlakg katalhman» chu wankgo: «¡Putum tiku xatonto, kamilh unu!». Tiku makgamakglhtinanaw uma invitación lu nalitamakgtayayaw la uku chu kkilhtamaku nema aku mima. Komo chuntiya naʼanaw «ktiji xla taʼakgatekgsni», tlan nalatamayaw putum kilhtamaku (Prov. 9:3, 4, 6).

19. Chuna la wan Eclesiastés 12:13, 14, ¿tuku kilitlawatkan? (Na kaʼakxilhti recuadro « ¿La kinkamakgtayayan tapekua nema kgalhiniyaw Dios?»).

¹⁹ (Kalikgalhtawakga Eclesiastés 12:13, 14). Lamaw kxaʼawatiya kilhtamaku niku anan tuku lu nitlan. Pero chuntiya kgalhiniputunaw tapekua Jehová nema nakinkamakgtayayan nakuentajtlawayaw kinakujkan, ni nalixkajwananaw talakgxtumit nema ni xlitatlawat chu chuntiya natalalinaw Jehová. Xlakata paxkiyaw chu lu maxkiyaw kakni, chuntiya nakawaniyaw latamanin pi kaputsakgolh «xaxlikana liskgalala» chu kalitamakgtayakgolh.