1. ¿Tuku nakinkamakgtayayan chuntiya naskujnaniyaw Jehová maski natitaxtuyaw tuku tuwa?

 BIBLIA wan pi kilhtamaku nema lamaw «lu tuwa» chu «lu kalipekua» (2 Tim. 3:1). Kʼuma kakilhtamaku putum latamanin kgalhikgo taʼakglhuwit, pero kskujnin Dios ni kajwatiya kgalhiyaw taʼakglhuwit nema kgalhikgo amakgapitsin latamanin, wata na kinkaputsastalanikanan. ¿Tuku nakinkamakgtayayan chuntiya nakakninaniyaw Jehová maski natitaxtuyaw tuku tuwa? Pulaktum tuku nakinkamakgtayayan wa pi nalakapastakaw pi Jehová wa «xastakna Dios» (Jer. 10:10; 2 Tim. 1:12).

2. ¿La limasiya Jehová pi wa xastakna Dios?

² Jehová xastakna Dios chu lakputsa la nakinkamakgtayayan xlakata natayaniyaw tuku tuwa titaxtuyaw (2 Crón. 16:9; Sal. 23:4). Akxni lakapastakaw pi Jehová xastakna Dios, kinkamaxkiyan litliwakga xlakata natayaniyaw putum tuku tuwa titaxtuyaw. Wa uma tuku makgtayalh mapakgsina David.

3. ¿Tuku xwamputun David akxni wa pi «¡Jehová lama!»?

³ David liwana xlakgapasa Jehová chu xlipawan. Skinilh tamakgtay akxni mapakgsina Saúl chu amakgapitsin xputsastalanimakgo (Sal. 18:6). Akxni akxilhli pi Jehová kgalhtilh xʼoración chu lakgmaxtulh, David wa: «¡Jehová lama!» (Sal. 18:46). Akxni wa umakgolh tachuwin, ni kajwatiya xkilhwama pi Dios lama. Maktum libro nema lichuwinan xlakata Biblia wan pi xtachuwin David xlimasiya pi xlipawan pi Jehová «chatum xastakna Dios tiku ankgalhin makgtaya xkachikin». David akxilhli la Jehová makgtayalh kxlatamat, chu uma tlakg makanajlilh pi Jehová xastakna Dios chu maxkilh litliwakga xlakata chuntiya  kskujnanilh chu xmalankilh (Sal. 18:​28, 29, 49).

4. ¿La litamakgtayayaw akxni liwana kanajlayaw pi Jehová wa xastakna Dios?

⁴ Komo liwana kanajlayaw pi Jehová xastakna Dios, nakinkamakgtayayan chuntiya xatapaxuwan naskujnaniyaw. Nakinkamaxkiyan litliwakga xlakata natayaniyaw putum tuku tuwa natitaxtuyaw chu nakinkamakgpuwantiniyan chuntiya naskujnaniyaw. Na nakinkamakgtayayan xlakata nikxni natamakgatliniyaw.

XASTAKNA DIOS NAMATLIWAKGLHAN

5. ¿Tuku xlakata liwana katsiyaw pi natayaniyaw tuku tuwa natitaxtuyaw? (Filipenses 4:13).

⁵ Komo nalakapastakaw pi Jehová xastakna Dios chu pi kinkamakgtayaputunan, tlan natayaniyaw putum tuku tuwa natitaxtuyaw, asta maski lakpuwanaw pi nila katitayaniw. Kalakapastakwi pi ni anan akgtum taʼakglhuwit nema lu lanka nema Jehová nila katilakkaxtlawalh. Xla wa Tiku kgalhi putum litliwakga chu tlan nakinkamatliwakglhan xlakata natayaniyaw (kalikgalhtawakga Filipenses 4:13). Putum uma limasiya pi tlan natayaniyaw kaxatukawa tuku tuwa natitaxtuyaw. Akxni akxilhaw pi Jehová kinkamakgtayayan natayaniyaw ni lu xalaktuwa taʼakglhuwit, kinkamakanajliyan pi na nakinkamakgtayayan akxni natitaxtuyaw tuku tlakg tuwa.

6. ¿Tuku titaxtulh David nema makgtayalh tlakg nalipawan Jehová?

⁶ Kaʼakxilhwi pulaktiy tuku titaxtulh David nema makgtayalh tlakg nalipawan Jehová. Akgtum kilhtamaku, akxni kgawasaku xwanit chu xkamapuchwayanima xborregos xtlat, milh tantum león chu lilh tantum aktsu borrego, chu atanu kilhtamaku milh tantum oso chu na lilh tantum borrego. Akxni chuna lalh, David ni pekualh, kaʼakstalalh umakgolh animales chu kakilakgmaxtulh xborregos. Liwana xkatsi pi wa Jehová tiku xmakgtayanit chuna natlawa chu wa xlakata nikxni litlankajwanalh (1 Sam. 17:​34-37). David nikxni patsankgalh tuku xtitaxtunit. Ankgalhin xlilakpuwan chu uma tlakg makanajlilh pi xastakna Dios xʼama makgtaya kkilhtamaku nema aku xmima.

7. ¿Tuku lilakpuwa David, chu la makgtayalh uma namakgatlaja Goliat?

⁷ Titaxtulh kilhtamaku, akxni David tlakg lankata xwanit, alh niku xwilakgo soldados xalak Israel. Akxilhli pi soldados lu xpekuamakgo xlakata chatum lanka filisteo tiku xwanikan Goliat “xkalikgalhkgamanama soldados xalak Israel” (1 Sam. 17:​10, 11). Soldados lu xpekuamakgo xlakata kajwatiya xlilakpuwamakgo la xlilanka xwanit Goliat chu tuku xkilhwama (1 Sam. 17:​24, 25). Pero David akxilhli putuminika tuku xlama. Lilakpuwa pi ni kajwatiya xkatalalakatawakama soldados xalak Israel, wata wa pi xkatalalakatawakama «ksoldados xastakna Dios» (1 Sam. 17:26). Xla wa xlilakpuwan Jehová. Liwana xkatsi pi Dios tiku xmakgtayanit nakalakgmaxtu laktsu xborregos na xʼama makgtaya uma kilhtamaku. Xlakata Jehová makgtayalh, talatlawalh Goliat chu ¡makgatlajalh uma filisteo! (1 Sam. 17:​45-51).

8. ¿Tuku nakinkamakgtayayan tlakg nalipawanaw Jehová akxni natitaxtuyaw tuku tuwa? (Na kaʼakxilhti dibujo).

⁸ Xtachuna la David, akinin tlan natayaniyaw putum tuku tuwa natitaxtuyaw komo nalakapastakaw pi xastakna Dios kinkamakgtayaputunan (Sal. 118:6). Tlakg nakanajlayaw pi xla nakinkamakgtayayan komo nalilakpuwanaw tuku tlawanit makgasa. Akgtum liʼakxilhtit, kalikgalhtawakga tuku wan Biblia nema namalakapastakayan la kalakgmaxtunit Jehová xlakskujnin (Is. 37:​17, 33-37). Nachuna, kalikgalhtawakga artículos kjw.org nema lichuwinan la kamakgtayanit Jehová natalan xala uku. Chu kalakapastakti la makgtayanitan Jehová  kmilatamat. Max wix ni makgninita tantum oso o tantum león. Pero pulaklhuwa tuku Jehová tlawanit mimpalakata xlakata namakgtayayan. Akgtum liʼakxilhtit, makgamakglhtinanitan chuna la xʼamigo (Juan 6:44). Chu xlakata xla makgtayaman, wix chuntiya makgtapakgsiya kxkachikin. Kaskini pi kamakgtayan nalakapastaka la kgalhtinit miʼoraciones, la makgtayanitan akxni tlakg maklakaskinita chu la matliwakglhnitan akxni titaxtunita tuku tuwa. Komo nalilakpuwana putum tuku Jehová tlawanit mimpalakata, tlakg nakanajlaya pi xla chuntiya namakgtayayan.

9. ¿La kiliʼakxilhatkan tuku tuwa titaxtuyaw? (Proverbios 27:11).

⁹ Komo nalilakpuwanaw pi Jehová xastakna Dios nakinkamakgtayayan naʼakxilhaw tuku tuwa titaxtuyaw chuna la xlilat. Tuku tuwa titaxtuyaw makgtanuma tuku limawakananit Satanás. Akgskgawini wan pi akxni natitaxtuyaw tuku tuwa, namakgxtakgaw Jehová (Job 1:​10, 11; kalikgalhtawakga Proverbios 27:11). Wa xlakata, komo ni namakgxtakgaw Jehová, nalimasiyaniyaw pi paxkiyaw chu nalimasiyayaw pi Satanás xaʼakgsanina. ¿Titaxtupat tuku tuwa xlakata putsastalanimakgon mapakgsinanin? ¿Ni kgalhiya tumin? ¿Ni kgaxpatnikana akxni pina lichuwinana Dios? ¿O titaxtupat atanu tuku tuwa? Komo chuna, kalakapastakti: tuku tuwa titaxtupat namaxkiyan talakaskin namakgapaxuwaya Jehová. Kalakapastakti pi Jehová nikxni katimastalh talakaskin natitaxtuya tuku nialhla katitayani (1 Cor. 10:13). Namaxkiyan litliwakga xlakata tlan natayaniya.

XASTAKNA DIOS NASIKULUNATLAWAYAN

10. ¿Tuku natlawa xastakna Dios xpalakatakan tiku kakninanikgo?

¹⁰ Jehová kasikulunatlawa tiku kakninanikgo (Heb. 11:6). La uku kinkamaxkiyan takaksni chu tapaxuwan, chu kkilhtamaku nema aku mima, nakinkamaxkiyan latamat nema nikxni sputa. Liwana katsiyaw pi xla lu kinkasikulunatlawaputunan chu pi kgalhi litliwakga xlakata tlan chuna natlawa. Xlakata  liwana katsiyaw uma kinkamakgpuwantiniyan tlakg naskujnaniyaw, chuna la tlawakgolh xlakskujnin xalamakgasa. Kalichuwinaw xliʼakxilhtit Timoteo (Heb. 6:​10-12).

11. ¿Tuku makgpuwantinilh Timoteo palha naskuja kcongregación? (1 Timoteo 4:10).

¹¹ (Kalikgalhtawakga 1 Timoteo 4:10). Timoteo lipawa xastakna Dios. Liwana xkatsi pi xla xʼama sikulunatlawa. Wa xlakata palha skujnanilh Jehová chu kamakgtayalh amakgapitsin. ¿Tuku tlawalh Timoteo? Apóstol Pablo makgpuwantinilh pi tlakg tlan makgalhtawakgena xlitaxtulh chu tlakg tlan xʼakgchuwinalh, chu wanilh pi xkawilinilh lu tlan liʼakxilhtit tiku lakgkgawasanku xwankgonit chu nachuna tiku xlinkgoya kata. Na lakgayawaka tuwa taskujut: nakastakyawa tiku xmaklakaskinkgo tastakyaw, pero xkalimasiyanilh tapaxkit (1 Tim. 4:​11-16; 2 Tim. 4:​1-5). Timoteo tlan xlipawan pi Jehová xʼama sikulunatlawa asta maski amakgapitsin ni xʼakxilhkgolh o ni xtapalh xliʼakxilhkgolh tuku xtlawama (Rom. 2:​6, 7).

12. ¿Tuku nakamakgpuwantini lakgkgolotsin chuntiya palha naskujnanikgo Jehová? (Na kaʼakxilhti dibujo).

¹² Xtachuna la Timoteo, lakgkgolotsin xlilakapastakatkan pi Jehová akxilha chu xtapalh liʼakxilha taskujut nema tlawakgo. Lakgkgolotsin ni kajwatiya kapulalinkgo congregaciones, ni kajwatiya masiyakgo chu lichuwinankgo Dios, lhuwa umakgolh natalan na makgtayanamakgo niku katlawakan Pukgalhtawakga chu klabores de socorro. Amakgapitsin makgtayanankgo kʼGrupos de Visita a Pacientes o kComités de Enlace con los Hospitales. Umakgolh natalan katsikgo pi congregación tapakgsini Jehová chu ni kaj chatum chixku. Wa xlakata xatapaxuwan tlawakgo xtaskujutkan chu liwana katsikgo pi Dios nakasikulunatlawa (Col. 3:​23, 24).

13. ¿La makgkatsi Jehová akxni akxilha putum tuku tlawayaw xlakata naskujnaniyaw?

¹³ Nila kimputumkan lakgkgolotsin litaxtuyaw, pero putum akinin wi tuku tlan namaxkiyaw Jehová. Xla lu xtapalh liʼakxilha putum tuku tlawayaw xlakata namaxkiyaw tuku  tlakg tlan kgalhiyaw. Akgtum liʼakxilhtit, lu xtapalh liʼakxilha tumin nema xatapaxuwan mastayaw xlakata chuntiya natlawakan xtaskujut kxlikalanka katiyatni, asta maski akinin lakpuwanaw pi ni lhuwa tuku mastayaw. Xla lu paxuwa akxni akxilha pi chaxa mimakan xlakata namastaya mintakgalhtin maski xamaxana wix. Chu lu paxuwa akxni akxilha pi tapatiya tiku nitlan mamakgkatsinin. Maski lakpuwana pi nila tlawaya putum tuku xlakaskinti xpalakata Jehová, kalakapastakti pi xla lu xtapalh liʼakxilha tuku tlan tlawaya. Xla lu paxkiyan chu lu nasikulunatlawayan (Luc. 21:​1-4).

NI KATAMAKGATLINIW XASTAKNA DIOS

14. ¿Tuku xlakata wanaw pi komo tlan natalalinaw Jehová nakinkamakgtayayan nikxni namakgxtakgaw? (Na kaʼakxilhti dibujo).

¹⁴ Komo nalakapastakaw pi Jehová xastakna Dios, tlakg ni tuwa katimakgkatsiw ni namakgxtakgaw. Wa uma tuku makgtayalh José. Xla ni tlawaputulh talakgxtumit nema ni xlitatlawat xlakata xastakna xliʼakxilha Dios chu ni xmakgalipuwamputun (Gén. 39:9). Xlakata xastakna naliʼakxilhaw Jehová, talakaskin nalimaxtuyaw kilhtamaku xlakata natlawaniyaw oración chu nalikgalhtawakgayaw xTachuwin. Komo chuna natlawayaw tlakg tlan natalalinaw. Komo tlan natalalinaw Jehová chuna la José xtalalin, nikxni katitlawaputuw tuku namakgalipuwan (Sant. 4:8).

15. ¿Tuku kinkamasiyaniyan ni xatlan xliʼakxilhtitkan israelitas? (Hebreos 3:12).

¹⁵ Tiku patsankgakgo pi Jehová wa xastakna Dios max tlakg lakapala natamakgatlinikgo. Kalilakpuwaw tuku titaxtukgolh israelitas akxni xlamakgo kdesierto. Xkatsikgo pi Jehová xlikana lama, pero nialh xlipawankgo pi xla xʼama kamaxki tuku xmaklakaskinkgo. Asta milh kilhtamaku tlawakgolh uma takgalhskinin: «¿Kinkatawilan o ni kinkatawilan Jehová?» (Éx. 17:​2, 7). Talalakatawakakgolh Dios. Akinin ni stalaniputunaw ni xatlan xliʼakxilhtitkan (kalikgalhtawakga Hebreos 3:12).

16. ¿Tuku max katuwa xwililh kintakanajlakan?

 ¹⁶ Uma kakilhtamaku tlawa pi lu tuwa namakgkatsiyaw ni natamakgatliniyaw Jehová. Lhuwa latamanin wankgo pi Dios ni xlikana lama, chu min kilhtamaku tasiya pi tlakg tlan kakitaxtuni tiku ni tlawakgo xtalakaskin. Putum uma tlawa pi katuwa natawila kintakanajlakan. Xlikana pi nikxni katilakpuwaw pi Dios ni xlikana lama, pero max natsukuyaw lakpuwanaw komo xlikana nakinkamakgtayayan. Wa uma tuku titaxtulh tiku tsokgwililh Salmo 73. Xla akxilhli pi tiku xlakatsalakgo xlimapakgsin Dios tlakg tlan xkakitaxtuni kxlatamatkan. Chu wa xlakata lilakpuwa komo xlikana tlakg tlan kitaxtu naskujnanikan Jehová (Sal. 73:​11-13).

17. ¿Tuku nakinkamakgtayayan ni natamakgatliniyaw Jehová?

¹⁷ ¿Tuku makgtayalh salmista nalakgpali tuku xlakpuwan? Xla wa lilakpuwa tuku nitlan xʼama kakitaxtuni tiku xpatsankgakgo Jehová (Sal. 73:​18, 19, 27). Nachuna, lilakpuwa tuku tasikulunalin makglhtinanaw akxni skujnaniyaw Jehová (Sal. 73:24). Akinin na tlan nalilakpuwanaw tasikulunalin nema kinkamaxkinitan Jehová chu natamalakxtumiyaw la xwa kilatamatkan komo ni kskujnaniw. Komo chuna natlawayaw, nakinkamakgtayayan nikxni namakgxtakgputunaw Jehová chu nawanaw chuna la wa salmista: «Pero akit, tlan kinkitaxtuni klakgtalakatsuwini Dios» (Sal. 73:28).

18. ¿Tuku xlakata ni kilipekuanitkan kilhtamaku nema aku mima?

¹⁸ Tlan natayaniyaw kaxatukawa tuku tuwa natitaxtuyaw kʼuma xaʼawatiya kilhtamaku xlakata akinin xlakskujnin «xastakna chu xaxlikana Dios» (1 Tes. 1:9). Xla xlikana lama chu kinkalilakgaputsayan, chu ankgalhin nakinkamakgtayayan. Kamakgtayalh xlakskujnin xalamakgasa chu chuntiya nakamakgtaya xlakskujnin xala uku. Nialh makgas natsuku lhuwa tapatin nema nikxni chuna lanit, pero ni kiʼakstukan katitawilaw (Is. 41:10). «Wa xlakata ni kapekuaw, wata tlan nawanaw: “Jehová kimakgtayana. Ni ktipekualh”» (Heb. 13:​5, 6).