Pulaktum tuku kilitlawatkan xlakata namakgapaxuwayaw Jehová, wa pi nakgalhiyaw takanajla. Pero Biblia wan pi «ni putum latamanin kgalhikgo takanajla» (2 Tes. 3:2). Akxni apóstol Pablo tsokgwililh umakgolh tachuwin wa xkalichuwinama tiku xputsastalanimakgo, “lakchixkuwin tiku lixkajni xlikatsikgo chu xtlawakgo tuku nitlan”. Pero umakgolh tachuwin na tlan namaklakaskinkan akxni kalichuwinankan amakgapitsin latamanin. Akgtum liʼakxilhtit, wilakgo tiku ni makgamakglhtinankgo tuku liwana masiya pi wi chatum Dios tiku malakatsukilh putum tuku anan (Rom. 1:20). Amakgapitsin max kanajlakgo pi wi akgtum limakgatliwakga nema latamanin nila malakgchanikgo. Pero uma takanajla ni wa tuku Jehová lakaskin pi nakgalhiyaw.

Xlakata namapakgapaxuwayaw Dios kilikanajlatkan pi lama chu pi «nakasikulunatlawa» tiku tliwakga kgalhikgo xtakanajlakan (Heb. 11:6). Chu espíritu santo wa tuku kinkamakgtayayan nakgalhiyaw takanajla. Komo makglhtinamputunaw uma espíritu, talakaskin naskiniyaw Jehová (Luc. 11:​9, 10, 13). Na lu xlakaskinka pi nalikgalhtawakgayaw Biblia, xTachuwin nema xla matsokgninalh, chu nalilakpuwanaw tuku likgalhtawakganitaw chu naliskujaw namakgantaxtiyaw. Komo chuna natlawayaw, espíritu santo nakinkamakgtayayan nakgalhiyaw takanajla nema namakgapaxuwa Jehová.