Tuku katsiputunkgo tiku likgalhtawakgakgo
¿La kili’akgatekgsatkan tuku lichuwinan Salmo 12:7?
Putuminika tuku lichuwinan uma salmo limasiya pi wa kakilhchanima latamanin.
Anta kSalmo 12:1-4 David lichuwinalh pi “nialh x’anankgo tiku ni xmakgxtakgnankgo”. Chu alistalh, kSalmo 12:5-7, wa:
«“Xlakata la kamapatinimaka latamanin,
xlakata la jalhpanimakgo tiku nitu kgalhikgo,
naktaya chu wi tuku naktlawa”, wan Jehová.
“Nakkalakgmaxtu kxmakankan tiku katlawanikgo tuku nitlan”.
Xtachuwin Jehová xaskulunku;
xtachuna la plata nema mastalankikanit k’horno xatiyat, nema makgtujun maskulunkikanit.
Wix nakakuentajtlawaya, oh, Jehová;
wix nakamakgtakgalha xchatunukan lata ama kilhtamaku chu putum kilhtamaku».
Versículo 5 lichuwinan tuku Dios natlawa xpalakatakan tiku «kamapatinimaka»: nakalakgmaxtu.
Versículo 6 wan pi «xtachuwin Jehová xaskulunku; xtachuna la plata nema mastalankikanit». Chu putum kstalaninanin Cristo liwana kanajlakgo pi uma xlikana (Sal. 18:30; 119:140).
Chuna la matitaxtikanit Salmo 12:7 kmakgapitsi Biblias, maʼakgatekgsninan pi Jehová nakuentajtlawa xtachuwin chu ni wa xkachikin. Chu xlakata versículo 6 lichuwinan «xtachuwin Jehová», makgapitsi lakpuwankgo pi tuku wan versículo 7 kilhchanima pi Dios kuentajtlawa xtachuwin. Chu katsiyaw pi Dios kuentajtlawanit Biblia xlakata nila masputukanit maski lhuwa tiku chuna tlawaputunkgonit (Is. 40:8; 1 Ped. 1:25).
Pero Jehová na kakuentajtlawa latamanin tiku kalichuwinankan kversículo 5. Kamakgtayanit chu chuntiya nakamakgtaya chu nakalakgmaxtu tiku «kamakgapatinamaka» (Job 36:15; Sal. 6:4; 31:1, 2; 54:7; 145:20).
Wa xlakata, ¿la kiliʼakgatekgsatkan tuku lichuwinankan kversículo 7?
Komo liwana nalilakpuwanaw putuminika tuku lichuwinana uma salmo, naʼakxilhaw pi wa kakilhchanima latamanin.
Niku tsuku Salmo 12, David kalichuwinan xlakskujnin Dios tiku xpatinamakgo xlakata tiku lixkajni xlikatsikgo xkaʼakgskgawikgonit. Alistalh, versículo 3 lichuwinan pi Jehová nakamasputu tiku nitlan limaklakaskinkgo ksimakgatkan. Salmo liwana kinkawaniyan pi tlan nalipawanaw pi Jehová nakamakgtaya xkachikin xlakata xtachuwin xaskulunku.
Wa xlakata, tuku lichuwinan versículo 7, wa kakilhchanima latamanin tiku Jehová kakuentajtlawa, tiku patinamakgo kaj xlakata xkuentajkan tiku lixkajni likatsikgo.
Pero ¿tuku xlakata makgapitsi Biblia maʼakgatekgsninan pi uma versículo kilhchanima pi Jehová nakuentajtlawa xtachuwin chu ni wa xkachikin? Uma traducción kilhtikanit tuku wan Tatsokgni xa’Hebreo. Pero Septuaginta griega maklakaskin umakgolh tachuwin: «Xla nakinkakuentajtlawayan» chu «Xla nakinkamakgtakgalhan». Wa xlakata, umakgolh tachuwin limasiya pi wa kakilhchanima «tiku ni makgxtakgnankgo» chu «kamakgapatinamaka». Dios nakakuentajtlawa xlakata latamanin xalak uma kakilhtamaku, tiku «masiyakgo tuku lu lixkajnit», nialhtu nakatlawanikgo (Sal. 12:7, 8). Maktum traducción nema kilhtiyaka kTatsokgni xa’Hebreo chu matitaxtika ktachuwin xaʼarameo, chuna wilika uma versículo: «Wix, MALANA, nakakuentajtlawaya tiku xa’akgstitum, nakamakgtakgalha xlakata latamanin xalak uma kilhtamaku, tiku lu nitlan likatsikgo, nitu nakatlawanikgo». Uma tatsokgni na limasiya pi tuku lichuwinan Salmo 12:7 ni wa kilhchanima xtachuwin Dios.
Wa xlakata, uma versículo wa kakilhchanima «tiku ni makgxtakgnankgo» chu kgalhkgalhimakgo xlakata Dios nakalakgmaxtu.
