1, 2. 1) ¿Tuku tamakatsin lakgmaxtunit xlatamatkan lhuwa latamanin? (Kaʼakxilhti xapulana dibujo). 2) ¿Tuku lhuwa xtapalh makgamakglhtinamakgolh kskujnin Dios?

LATA liwaka 100 kata, kmakgapitsi países kawilikan letreros niku xtitaxtukgo putlaw chu tren. Kletreros tatsokgnit: «KATACHOKGO, KAʼAKXILHTI, KAKGAXPATTI». Kawilika xlakata tiku matlawanikgo putlaw ni nakalakxkiti tren nema lu lakapala mima. Umakgolh letreros kalakgmaxtunit lhuwa latamanin.

² Xlakata ni katuwa natawilayaw chu nalakgmaxtu kilatamatkan, Jehová tlawa tuku tlakg tlan nixawa letreros. Kinkawaniyan tuku natlawayaw chu tuku kinkapulalinan nema linan klatamat putum kilhtamaku. Jehová xtachuna xmapuchwayanina borrego tiku kapulalin xborregos niku nitu nakaʼakgspula (kalikgalhtawakga Isaías 30:20, 21).

3. ¿Tuku xlakata nikgo latamanin?

³ Lata akxni kamalakatsukilh latamanin, Jehová liwana kawaninit kskujnin tuku xlitlawatkan. Akgtum liʼakxilhtit, kjardín xla Edén liwana wa tuku xlitlawatkan xwanit xlakata latamanin xatapaxuwan xlatamakgolh chu ni xnikgolh (Gén. 2:15-17). Pero Adán chu Eva lakgmakgankgolh  chuna la xkapulalimaka. Eva kgalhakgaxmatnilh luwa, chu Adán kgalhakgaxmatnilh Eva. Xlakata uma, patinankgolh chu nikgolh, chu ni katilakastakwanankgolh. Xlakata ni kgalhakgaxmatnankgolh, kimputumkan niyaw.

4. 1) ¿Tuku xlakata xtalakaskin xalaksasti limapakgsin akxni titaxtulh munkaklat? 2) ¿Tuku kinkamakgtayayan naʼakgatekgsaw umakgolh limapakgsin?

⁴ Alistalh, Jehová wanilh Noé tuku xlitlawat xwanit xlakata xlakgtaxtukgolh. Akxni titaxtulh munkaklat, Dios limapakgsinalh pi ni nawakgo o nalikgotnankgo kgalhni. ¿Tuku xlakata? Xlakata xʼama kamaxki talakaskin pi tlan nawakgo liway. Xlakata xtalakgpalima, xtalakaskin xalaksasti limapakgsin. Wa xlakata wa: «Liway nema kgalhijku xkgalhni ni miliwatkan, xlakata kgalhni, latamat» (Gén. 9:1-4). Wa xlakata uma limapakgsin kinkamakgtayayan nakatsiniyaw tuku lakpuwan Jehová xlakata latamat. Xlakata wa Dios tiku kinkamaxkin latamat, wa tapakgsini. Wa xlakata lakgchan nakinkawaniyan la nalimaklakaskinaw latamat. Akgtum liʼakxilhtit, limapakgsinalh pi ni nalamakgnikan. Dios liʼakxilha latamat chu kgalhni xasanto, chu xla namalakgaxokge putum tiku ni namaxkikgo kakni (Gén. 9:5, 6).

5. 1) ¿Tuku nalikgalhtawakgayaw? 2) ¿La nakinkamakgtayayan uma takgalhtawakga?

⁵ Akxni titaxtulh xkilhtamaku Noé, Dios chuntiya pulalilh xkachikin. Kʼuma artículo nalikgalhtawakgayaw la tlawalh. Nachuna, uma takgalhtawakga nakinkamakgtayayan nastalaniyaw xlimapakgsin Jehová chu natlawanaw ktiji nema linan kxasasti katiyatni.

6. 1) ¿Tuku xlakata xlikgalhakgaxmatatkan israelitas limapakgsin nema Jehová maxkilh Moisés? 2) ¿Tuku xlitlawatkan xwanit xlakata tlan xkasikulunatlawalh Dios?

⁶ Kxkilhtamaku Moisés, Jehová kawanilh kskujnin la xkakninanikgolh chu la xlikatsikgolh. ¿Tuku xlakata? Xlakata xtalakgpaliparanit chuna la xwilakgolh. Israelitas latamakgolh kʼEgipto liwaka 200 kata. Egipcios lhuwa tuku xtlawakgo nema xlimasiyakgo pi ni xlakgachixkuwilikgo Dios, xkakninanikgo tiku nikgonita chu ídolos. Akxni israelitas taxtukgolh kʼEgipto, xtalakaskin xkawanika xasasti tuku xlitlawatkan. La uku xlitaxtukgolh akgtum kachikin nema kajwatiya xkgalhakgaxmatkgolh xlimapakgsin Moisés. Makgapitsi tiku lu kgalhtawakgakgonit, wankgo pi tachuwin xahebreo nema kilhchanima «limapakgsin» minacha kʼakgtum tachuwin nema kilhchanima «pulalinankan», o «wankan tuku xlitatlawat». Xlimapakgsin Moisés xkamakgtayalh xlakata israelitas ni xtlawakgolh talakgalhin xlakata talakgxtumit chu ni xmakgtanukgolh tuku xtlawakgo nixaxlikana takanajla nema lakatsu xwilakgo. Komo israelitas xlakaskinkgo pi Dios xkasikulunatlawalh, xtalakaskin xkgalhakgaxmatkgolh. Komo ni xkgalhakgaxmatnikgolh, lu nitlan xʼama kakitaxtuni (kalikgalhtawakga Deuteronomio 28:1, 2, 15).

7. 1) ¿Tuku xlakata kamaxkilh tastakyaw Jehová israelitas? 2) ¿Tuku xlakata wanaw pi limapakgsin litaxtulh tiku ni makgas kuentajtlawanalh?

⁷ Pero israelitas xlakaskinkgo xasasti tastakyaw. Xlimapakgsin Moisés kamakgtayalh skgalalh natawilakgo akxni xchilh Mesías, Jesucristo. Uma lu xlakaskinka xwani xlakata xtalakaskin Jehová. Limapakgsin kamalakapastakalh pi makglakgalhinanin xwankgonit. Chu kamakgtayalh naʼakgatekgskgo pi xmaklakaskinkgo talakgmaxtut, uma kilhchanima, akgtum tamakamastan nema ni xkgalhilh talakgalhin xlakata xmasputulh talakgalhin (Gál. 3:19; Heb. 10:1-10). Nachuna, limapakgsin makgtayanalh tlan xtawilalh familia niku xʼama taxtuyacha Mesías. Chu akxni chilh Mesías, limapakgsin kamakgtayalh israelitas nalakgapaskgo. Wa xlakata, Biblia wan pi limapakgsin litaxtulh tiku ni makgas  kakuentajtlawalh asta akxni chilh Cristo (Gál. 3:23, 24).

8. ¿Tuku xlakata natlawayaw tastakyaw nema kgalhi xlimapakgsin Moisés?

⁸ Kstalaninanin Cristo tlan nalitamakgtayayaw tuku Jehová wa kxlimapakgsin Moisés. ¿La nalitamakgtayayaw? Chuna la liʼakxilhtit kxapulana párrafo, talakaskin natachokgoyaw chu skgalalh kiliʼakxilhatkan tastakyaw niku takilhtinit uma limapakgsin. Maski ni lu fuerza kinkaskinikanan nakgalhakgaxmataw, tlan namastayaw talakaskin nakinkapulalinan lhuwa tuku nakinkamasiyaniyan. ¿Tuku xlakata? Xlakata uma nakinkamakgtayayan xtastakyaw kkilatamatkan chu akxni kakninaniyaw Jehová. Dios tlawalh pi xlimapakgsin Moisés xtsokgwilika kBiblia xlakata nakinkamasiyaniyan chu nakgalhakgaxmataw xtastakyaw. Lu paxtikatsiniyaw pi Jesús kinkamasiyanin tuku tlakg tlan nixawa xlimapakgsin Moisés. Akgtum liʼakxilhtit, tlan nakgaxmataw uma xtastakyaw Jesús: «Kgaxpattit pi tiwanka: “Ni militlawat talakgxtumit nema ni xlitatlawat”. Pero akit kkawaniyan pi putum tiku chuntiya akxilha chatum puskat xlakata tatlawaputun talakgxtumit nema ni xlitatlawat, litaxtu la komo tatlawalha talakgxtumit nema ni xlitatlawat kxnaku». Xlimapakgsin Moisés xwan pi ni xlitatlawat talakgxtumit xalimaxana. Pero Jesús masiyalh pi na kililakgmakganatkan tuku nitlan tlawaputunaw chu nixatlan tapuwan (Mat. 5:27, 28, TNM).

9. ¿Tuku xlakata talakaskilh pi Jehová tlakg xmastalh tastakyaw?

⁹ Akxni Jesús Mesías xlitaxtunita, Jehová mastalh xasasti limapakgsin chu tlakg wa tuku ni xtakatsi xlakata tuku lakapastaknit natlawa. ¿Tuku xlakata chuna talakaskilh? Xlakata amakgtum xtalakgpaliparanit chuna la xwilakgolh xkachikin Dios. Kkata 33, Dios lakgmakgalh kachikin Israel chu laksakli xlakata xkachikin xwa congregación xla kstalaninanin Cristo.

10. 1) ¿Tuku xlakata xlakaskinkgo xasasti limapakgsin kstalaninanin Cristo? 2) ¿Tuku litalakgpali xlimapakgsin Moisés chu xlimapakgsin Cristo?

¹⁰ Chuna la akxilhwi, Jehová maxkilh Moisés limapakgsin xlakata israelitas xkatsikgolh la xlatamakgolh chu la xkakninanikgolh. Akxni Jesús xminita kKatiyatni, Jehová tlakga mastalh xasasti tastakyaw chu limapakgsin. ¿Tuku xlakata? Xlakata kskujnin nialh xʼama minkgoyacha kaj kʼakgtum kachikin, wata xala lhuwa kachikinin chu tanu tanu talismanin. La uku kxkachikin xʼama tapakgsikgo israelitas xaʼespirituales. Xlakan xʼamakgo makgtapakgsikgo kcongregación xla kstalaninanin Cristo chu xʼamakgo makgantaxtikgo xasasti talakkaxlan. Chuna Dios limasiyalh pi ni laksakpaxkinan, wata makgamakglhtinan putum tiku kgalhakgaxmatni chu tlawa tuku tlan, maski tanu tanu xkachikinkan (Hech. 10:34, 35). Xasasti congregación xkgalhakgaxmata «xlimapakgsin nCristo». Uma limapakgsin tanu xwankgonit ni xtachuna xlimapakgsin Moisés. ¿Tuku xlakata? Xlakata uma ni xtatsokgnit kchiwix, wata kxnaku chatunu kstalanina Cristo. Uma limapakgsin xkapulalilh chu xkamakgtayalh putum kskujnin Dios maski tanu tanu niku wilakgolh (Gál. 6:2).

11. ¿Tuku pulaktiy limapakgsin kgalhi «xlimapakgsin nCristo»?

¹¹ Israelitas xaʼespiritual lu litamakgtayakgolh «xlimapakgsin nCristo». Akxni xʼamaka malakatsukikan xasasti talakkaxlan, Jesús mastalh akgtiy lu xlakaskinka limapakgsin. ¿Tuku uma pulaktiy? Pulaktum wa nalichuwinankan Dios. Chu xlipulaktiy wa la nalalikatsinikgo kstalaninanin Cristo. Xlakata umakgolh limapakgsin kamaxkika putum kstalaninanin Cristo, la uku akinin na kilikgalhakgaxmatatkan, maski kgalhkgalhimaw nalatamayaw kʼakgapun o kKatiyatni.

12. ¿Tuku xlakata tlan nawanaw pi natalichuwinan Dios aku xtsukuma?

 ¹² Makgasa, komo wi tiku kskujnaniputun Jehová pero ni israelita xwanit, xliputsat xwanit kachikin Israel (1 Rey. 8:41-43). Pero Jesús kawanilh xtamakgalhtawakgen pi la uku xlakan xliʼanatkan chu xliputsatkan latamanin (kalikgalhtawakga Mateo 28:19, 20). Akxni xtlawamaka paskua xla Pentecostés kata 33, Jehová liwana limasiyalh pi lakaskin pi kskujnin xlichuwinankgolh xalakwan tamakatsin kxlikalanka katiyatni. Amacha kilhtamaku, max 120 tiku xmakgtapakgsikgo xasasti congregación, makglhtinankgolh espíritu santo chu tsukukgolh katachuwinankgo ktipalhuwa tachuwin tiku judíos chu tiku ni xala anta pero judíos xlitaxtukgonit (Hech. 2:4-11). Alistalh tsukukgolh kalitachuwinankgo samaritanos xlakata Dios. Chu kkata 36 tsukulh kalitachuwinankan Dios tiku ni judíos. Liwana xtasiya pi kstalaninanin Cristo xʼamakgo lichuwinankgo Dios putum kkatiyatni.

13, 14. 1) ¿Tuku kilitlawatkan xlakata namakgantaxtiyaw «limapakgsin xasasti» nema mastalh Jesús? 2) ¿Tuku kinkamasiyanin Jesús xlakata xliʼakxilhtit?

¹³ Jesús na mastalh akgtum «limapakgsin xasasti» xlakata la nalalikatsiniyaw (kalikgalhtawakga Juan 13:34, 35). Xlikana, xlilat chali chali nakalimasiyaniyaw kinatalankan pi kapaxkiyaw. Pero na xlilat namastaputunaw kilatamatkan xpalakatakan. Uma limapakgsin ni xmin kxlimapakgsin Moisés (Mat. 22:39; 1 Juan 3:16).

¹⁴ Jesús wa tlakg xatlan liʼakxilhtit tiku tlakg kapaxkilh amakgapitsin chu ni xakstu paxkika. Lu xkapaxki kstalaninanin asta mastalh xlatamat xpalakatakan. Chu lakaskin pi akinin nachuna natlawaputunaw. Xla kgalhkgalhi pi akinin xatapaxuwan napatiputunaw o asta namastayaw kilatamatkan xpalakata kinatalankan (1 Tes. 2:8).

15, 16. 1) ¿La pulalima Dios xkachikin la uku? 2) ¿La wi kakilhtamaku la uku?

¹⁵ La uku, Jesús kalakgayawanit «skujni xalipaw chu xaskgalala» «xlakata nakamaxki [...] kxkilhtamaku» taway xaʼespiritual kstalaninanin (Mat. 24:45-47). Kʼuma taway na makgtanu tuku lu xlakaskinka wani Jehová xkachikin akxni talakgpali chuna la wilakgolh. ¿La wi kakilhtamaku la uku?

¹⁶ La uku wilaw «kxaʼawatiya kilhtamaku». Chu nialh makgas «naʼanan ntakatsanajwat, wa ntu ni ukxni alay xtachuna» (2 Tim. 3:1; Mar. 13:19). Nachuna, Satanás chu xdemonios kamaxtukancha kʼakgapun chu kamapatinimakgolh latamanin (Apocalipsis [Revelación] 12:9, 12). Nachuna, akinin kgalhakgaxmatmaw tuku Jesús kinkalimapakgsin, pi nalichuwinanaw Dios xlikalanka katiyatni. Tlakg lhuwa latamanin kalitachuwinanaw Dios chu ktlakg lhuwa tachuwin nixawa makgasa.

17, 18. ¿Tuku kilitlawatkan akxni nakinkawanikanan tuku natlawayaw?

¹⁷ Xkachikin Dios lhuwa tuku kinkalimakgtayayan xlakata nalichuwinanaw Dios. ¿Liwana limaklakaskimaw? Ktamakxtumit kinkawanikanan la tlakg liwana namaklakaskinaw tuku kinkamaxkikanan. ¿Makgamakglhtinanaw xlakata wa Jehová kinkawaniman?

¹⁸ Komo lakaskinaw pi Dios kakinkasikulunatlawan, talakaskin liwana nakgaxmataw tastakyaw nema kinkawanikanan kcongregación. Komo la uku kgalhakgaxmatnanaw, tlakg ni tuwa nakgalhakgaxmatnanaw akxni natawila «ntlanka takatsanajwat», akxni namalakgsputukan xkakilhtamaku Satanás (Mat. 24:21). Alistalh, amakgtum natalakaskimpara nakinkawanikanan tuku xasasti kilitlawatkan xlakata  nalatamayaw kxasasti katiyatni, niku Satanás nialh nakinkamatlawiyan tuku nitlan.

19, 20. 1) ¿Tuku rollos natamalakgaki? 2) ¿Tuku nala akxni natamalakgaki amakgolh rollos?

¹⁹ Kxkilhtamaku Moisés, Jehová kamaxkilh israelitas xlimapakgsin Moisés. Alistalh, maxkilh congregación «xlimapakgsin nCristo». Chu kxasasti katiyatni, Jehová nakinkamaxkiyan xalaksasti rollos niku namin tuku xasasti kilitlawatkan (kalikgalhtawakga Apocalipsis 20:12). Umakgolh rollos max naliminkgo xasasti limapakgsin nema Jehová lakaskin namakgantaxtiyaw ama kilhtamaku. ¿Tuku nala akxni namalakgakikan xalaksasti rollos? Akxni akinin chu tiku nalakastakwanankgo, nalikgalhtawakgayaw nakatsiyaw tuku lakaskin Dios natlawayaw. Putum tlakg liwana naʼakgatekgsaw la lakpuwan Jehová. Chu xlakata tlakg tlan naʼakgatekgsaw Biblia, nalalimasiyaniyaw tapaxkit, nalamaxkiyaw kakni chu nalalakgachixkuwiliyaw (Is. 26:9). ¿Tlan lilakpuwanaw putum tuku nakatsiniyaw chu nakamasiyaniyaw amakgapitsin kParaíso, akxni nakinkapulalinan kiMapakgsinakan, Jesucristo?

²⁰ Komo nakgalhakgaxmataw tuku tatsokgonit kxalaksasti rollos chu ni namakgatsankgananiyaw Jehová akxni xaʼawatiya nakinkaliʼakxilhkanan, natsokga kintukuwanikan “krollo xla latamat”. Uma kilhchanima pi tlan nakgalhiyaw latamat nema ni nasputa. Xlakata nakgalhiyaw, talakaskin NATACHOKGOYAW xlakata nalikgalhtawakgayaw tuku wan Biblia, liwana NAʼAKXILHAW xlakata naʼakgatekgsaw tuku kilhchanima chu NAKGAXMATAW tuku Jehová nakinkawaniyan chu natlawayaw. Komo natlawayaw uma, tlan nalakgtaxtuniyaw lanka takatsanajwat chu putum kilhtamaku nakatsiniyaw xlakata kiDioskan tiku lu paxkinan (Ecl. 3:11; Rom. 11:33).