1. ¿La tlan skgalala nawanaw chu la kinkamakgtayayan uma?

JEHOVÁ wa tiku kinkamaxkiyan liskgalala chu xla xatapaxuwan kinkamaxkiyan. Santiago 1:5 lichuwinan: «Komo wi tiku tsankgani liskgalala, chuntiya kaskinilh Dios, xlakata xla putum lhuwa kamaxki chu ni liwan tuku masta». Pulaktum la tlan skgalala nawanaw wa akxni makgamakglhtinanaw xtastakyaw Jehová. Liskgalala kinkamakgtayayan xlakata ni natlawayaw tuku nixatlan, nachuna kinkamakgtayayan tlakg tlan natalalinaw (Prov. 2:10-12). Uma lu tlan, xlakata tamakgxtakgaw kxtapaxkit Dios chu alistalh «nkitaxtuniy latamat wantu xlipan» (Jud. 21).

2. ¿Tuku nakinkamakgtayayan lanka xtapalh naʼakxilhaw xtastakyaw Dios?

² Xlakata makglakgalhinanin akinin, la kinkamakgastakkan chu atanu tuku xlakata, max natlawa pi tuwa namakgkatsiyaw namakglhtinanaw tastakyaw chu ni katiʼakxilhwi chuna la xlilat. Pero, akxni akxilhaw pi tlan kinkakitaxtuniyan kkilatamatkan lhuwa xtapalh liʼakxilhaw chu chuna katsiyaw pi Dios kinkalimasiyaniyan xtapaxkit. Proverbios 3:11, 12 kinkawaniyan: «Kinkgawasa, ni kalakgmakganti xtastakyaw Jehová, chu ni lixkajni kaʼakxilhti komo nastakyawayan». Chu wampara: «Xlakata tiku Jehová kapaxki kastakyawa». Kalakapastakwi pi Jehová lakaskin pi putum kilhtamaku tlan kakinkakitaxtunin (kalikgalhtawakga Hebreos 12:5-11). Xlakata Jehová liwana kinkalakgapasan  ankgalhin kinkastakyawayan chuna la xlilat. Kʼuma artículo naʼakxilhaw pulaktati tuku kinkamasiyaniyan tastakyaw: 1) akstu nakinkastakyawakanan, 2) xtastakyaw natlatni, 3) tastakyaw xalak congregación chu 4) tuku kitaxtu komo nalakgmakganaw tastakyaw.

3. ¿La nakamakgtayakgo natlatni xkamanankan xlakata tlan xakstu nakastakyawakan? Kawili akgtum liʼakxilhtit.

³ Akstu nakinkastakyawakanan na kilhchanima tlan nalikatsiyaw chu nakgalhiyaw tlan talakapastakni. Pero akxni lakachinaw ni katsiyaw tuku uma, wa xlakata talakaskin naliskujaw xlakata tlan nakatsiniyaw. Uma tlan natamalakxtumiyaw chatum aktsu kgawasa tiku katsinima matlawani bicicleta. Pulana, xtlat aktsu kgawasa chipa bicicleta xlakata kgawasa ni natamakgwasa. Pero akxni kgawasa tsuku katsinitilha la matlawanikan, xtlat tsinu tsinu makgxtakga bicicleta. Akxni akxilha pi xkgawasa nialh katitamakgwasli, maxki talakaskin xakstu namatlawani. Nachuna, akxni natlatni ni katasitsikgo xkamanankan chu ankgalhin kastakyawakgo «kxtastakyaw chu kxtalakapastakni Jehová», nakamakgtayakgo skgalala nawankgo chu tlan xakstu nakastakyawakan (Efes. 6:4).

4, 5. 1) ¿Tuku xlakata akstu nakinkastakyawakanan na lu xlakaskinka akxni lilhakgananaw «xasasti tayat»? 2) ¿Tuku xlakata ni nataxlajwaniyaw akxni tlawayaw tuku nitlan?

⁴ Nachuna kaʼakgspula tiku lakgapaskgo Jehová akxni laklankata. Maski max katsinikgo la akstu nakastakyawakan, pero nina xaʼakchan kgalhikgo xtalakapastaknikan xlakata xtakanajlakan. Pero, akxni tsukukgo lilhakganankgo «xasasti tayat» chu liskujkgo xlakata nastalanikgo xliʼakxilhtit Cristo, tlakg xaʼakchan kgalhikgo xtalakapastaknikan (Efes. 4:23, 24). Lu xlakaskinka akstu nakinkastakyawakanan xlakata nakinkamakgtayayan «namakgaxtakgaw wa ntu ni maxkiy kakni Dios, chu wa ntu xtatlawaputu ntu xala katuxawat, wa ntu ntlan talakapastakna nkalilatamaw yunu nkatuxawat, chu wa ntu akgstitum, chu wa ntu nalimaxkiyaw nkakni Dios» (Tito 2:12).

⁵ Xlikana, putum makglakgalhinanin akinin (Ecl. 7:20). Wa xlakata, max namin kilhtamaku natlawayaw tuku nitlan pero ni wamputun pi ni katsiyaw la akstu nakinkastakyawakanan. Proverbios 24:16 lichuwinan: «Tiku xaʼakgstitum max asta makgtujun nalhtuja, pero xlikana natakipara». ¿La natlawa? Ni kaj xakstu xlitliwakga litamakgtaya, wata xtamakgtay xʼespíritu santo Dios chuna litlawa (kalikgalhtawakga Filipenses 4:13). Pulaktum tayat nema masta espíritu wa machokgokan tuku nitlan tlawaputunkan nema lu tatalakxtumi la akstu nakinkastakyawakanan.

6. ¿Tuku natlawayaw xlakata tlan xlikgalhtawakgananin Biblia nawanaw? (Kaʼakxilhti xapulana dibujo).

⁶ Xlakata nakatsiyaw la kiʼakstukan nakinkastakyawakanan, talakaskin natlawayaw oración, nalikgalhtawakgayaw Biblia chu nalilakpuwanaw. Pero ¿tuku natlawaya komo tuwa makgkatsiya nalikgalhtawakgaya Biblia o kaj ni lakgatiya kgalhtawakgaya? Ni kataxlajwani. Komo wix namaxkiya talakaskin, Jehová namakgtayayan lu nalakgatiya nalikgalhtawakgaya xTachuwin (1 Ped. 2:2). Pulana, kaskini Jehová pi kamakgtayan tlan akstu nastakyawakana xlakata tlan nalikgalhtawakgaya xTachuwin. Alistalh, kaliskujti natlawaya tuku skiniya Jehová. Max pulana tlan kaj tsinu kilhtamaku nakgalhtawakgaya. Takgalhtawakga tsinu tsinu tlakg ni tuwa katimakgkatsi chu nalipaxuwaya akxni nalimaxtuya kilhtamaku xlakata nalilakpuwana laktlan xtalakapastakni Jehová (1 Tim. 4:15).

7. Kalichuwinanti akgtum liʼakxilhtit la kinkamakgtayayan tlakg naskujnaniyaw Jehová akxni akstu kinkastakyawakanan.

⁷ Akxni akstu kinkastakyawakanan nakinkamakgtayayan tlakg naskujnaniyaw Jehová. Kaʼakxilhwi xliʼakxilhtit chatum xatlat tiku nialh xlipaxuwa akxni xlichuwinan Dios. Xlakata xlilakgaputsama, lakpuwa pi xliskujli la precursor regular. Xlakata tlan chuna natlawa, tsukulh  likgalhtawakga revistas nema xlichuwinan la tlan precursor nawana chu tlawanilh oración Jehová. Uma makgpuwantinilh chu matliwakglhi la xtalalin Jehová. Nachuna ankgalhin liskujli la precursor auxiliar akxni xmatlani. Kajwatiya xlilakpuwan tuku xtlawaputun chu ni mastalh talakaskin pi wi tuku xmalaktlawilh tuku xtlawaputun. ¿Tuku kitaxtulh? Alistalh precursor regular litaxtulh.

8-10. 1) ¿Tuku nakamakgtaya natlatni nakamakgastakkgo xkamanankan kxtastakyaw Jehová? 2) ¿Tuku tlan nakatsinikgo natlatni xlakata xliʼakxilhtit Noé?

⁸ Natlatni tiku kstalaninanin Cristo kalakgayawakanit nakamakgastakkgo xkamanankan «kxtastakyaw chu kxtalakapastakni Jehová» (Efes. 6:4). Uma akgtum lanka taskujut xlakata kʼuma xaʼawatiya kilhtamaku niku lamaw (2 Tim. 3:1-5). Akxni lakachinkgo kamanan ni katsikgo tuku tlan chu tuku nitlan, xlakata xtalakapastaknikan nina listakyawakgo tuku wan Biblia (Rom. 2:14, 15). Chatum tiku lakputsanani Biblia lichuwinan pi tachuwin «tastakyaw» kxagriego na kilhchanima kamakgastakkan kamanan xlakata akxni laklankata nawankgo liwana nalaksakkgo tuku natlawakgo.

⁹ Kamanan nitu lipekuankgo akxni xnatlatni kalimasiyanikgo tapaxkit akxni kastakyawakgo. Katsinikgo pi nila putum tlawakgo tuku lakaskinkgo chu putum tuku natlawakgo max tlan o nitlan nakitaxtu. Wa xlakata natlatni xlakaskinka naputsakgo xtastakyaw Jehová xlakata nakamakgastakkgo xkamanankan. Kalakapastakwi pi chuna la titaxtutilha kilhtamaku chu xlakata talismanin, talakgpali la kamakgastakkan kamanan. Pero akxni natlatni kgalhakgaxmatkgo Dios, ni talakaskin ankgalhin nakakgalhskinkan la nakamakgastakkgo xkamanankan chu na ni talakaskin nalipawankgo liskgalala xalak kakilhtamaku.

¹⁰ Kalichuwinaw xliʼakxilhtit Noé. Akxni Jehová wanilh pi natlawa arca, Noé ni la xlipawan tuku kaj xakstu xkatsini, xlakata nikxni xtlawanit akgtum arca. Wa xlakata xtalakaskin nalipawan Jehová chu «tlawalh chuna la xwanikanit», wamputun pi tlawalh putum tuku xwaninit Jehová (Gén. 6:22). ¿Tuku kitaxtulh? Xlakata tlawalh arca, Noé chu xfamilia lakgtaxtukgolh. Nachuna, xlakata lipawa Jehová makgtayalh xatlan tlat nalitaxtu. Liwana kastakyawalh xkamanan chu kawilinilh tlan liʼakxilhtit, uma lu tuwa xwanit ama kilhtamaku la nina xmin Munkaklat (Gén. 6:5).

11. ¿Tuku nakitaxtu komo natlatni nakgaxmatnikgo Jehová akxni nakamakgastakkgo xkamanankan?

¹¹ Komo wix xatlat, ¿la natlawaya putum tuku waniyan Jehová? Kakgaxpatni Jehová. Kamaxki talakaskin namakgtayayan nakalimakgastaka minkamanan xtastakyaw Biblia chu xkachikin. Max akxni natitaxtu kilhtamaku minkamanan napaxtikatsinikgoyan. Chatum tala lichuwinan: «Lu kkapaxtikatsini kinatlatni la kimakgastakkgolh. Lu liskujkgolh xlakata nachan kkinaku tuku kimasiyanikgolh. Lu kkapaxtikatsini xlakata  kmatliwakglhnit kintakanajla chu tlakg nakskujnani Jehová». Xlikana, maski natlatni lu liskujkgo, makgapitsi kamanan makgxtakgkgo Jehová. Pero xanatlatni tlan natawila xtalakapastaknikan komo liskujkgonit nakalakgchan kxnakujkan tuku xaxlikana xkamanankan. Nachuna, tlan nakgalhkgalhikgo pi namin kilhtamaku xkamanankan nalakgtaspitparakgo Jehová.

12, 13. 1) ¿La limasiyakgo natlatni pi kgalhakgaxmatkgo Jehová akxni katamakxtukan xkamanan kcongregación? 2) ¿La litamakgtayakgolh akgtum familia xlakata xanatlatni kgalhakgaxmatkgolh Jehová?

¹² Pulaktum nema tlakg tuwa xlakata la nakgalhakgaxmatkgo Jehová natlatni wa akxni tamakxtukan xkamanankan kcongregación. Kaʼakxilhwi tuku titaxtulh chatum tala puskat akxni xtsumat tamakxtuka kcongregación chu taxtulh kxchik. Xla wan: «Wi tuku xakputsa kkilikgalhtawakgakan nema xkimaxkilh talakaskin xakkatatawilalh kintsumat chu kintanat». Xchixku liwana chu lakatsuku wanilh pi nialh xlilakgaputsalh xlakata nialh wa xlinkgo kuenta chu xtalakaskin pi ni xmakgxtakgkgolh Jehová chu ni xlakatitayakgolh tastakyaw nema xmaxkikanit xtsumat.

¹³ Titaxtulh makgapitsi kata, xtsumat taspitpa kcongregación. Xtse lichuwinan: «La uku chali chali kintachuwinan chu kimalakgachani mensajes. Chu kinkamaxkiyan kakni xlakata katsi pi nikmakgxtakgwi Jehová. Lu tlan klatalalinaw». Komo wix kgalhiya chatum kgawasa tiku tamakxtukanit kcongregación, ¿nalipawana Jehová xliputum mi naku chu ni miʼakstu nalipawankana? (Prov. 3:5, 6). Kalakapastakti pi xtastakyaw Jehová kinkalimasiyaniyan pi xla lu skgalala chu lu kinkapaxkiyan. Ankgalhin kalakapastakti pi Jehová mastalh xKgawasa xlakata putum nakinkalakgmaxtuyan, nachuna xlakata minkgawasa, chu ni lakaskin pi wi tiku namasputukan (kalikgalhtawakga 2 Pedro 3: 9). Wa xlakata, natlatni chuntiya kalipawantit xtastakyaw chu xtapulalit Jehová asta maski akxni tuwa namakgkatsiyatit nakgalhakgaxpatatit. Katatayatit xtastakyaw Jehová.

14. ¿La kinkamakgtayayan xtapulalit Jehová nema masta xpalakata «skujni xatalipaw»?

¹⁴ Jehová kamalaknuninit xlakskujnin pi nakamakgtaya, nakakuentajtlawa chu nakamasiyani chu pulaklhuwa la tlawa. Akgtum liʼakxilhtit, liyawalh xKgawasa xlakata nakuentajtlawa congregación. Nachuna, Jesús liyawalh «skujni xatalipaw» xlakata namasta taway xla takanajla akxni natamaklakaskin (Luc. 12:42). Uma «skujni xatalipaw» kinkapulalinan chu pulaklhuwa la kinkastakyawayan. ¿Kgaxpatnitata akgtum taʼakgchuwin o likgalhtawakganita maktum revista nema makgtayanitan nalakgpaliya la xlakpuwana o la xlikatsiya? Komo chuna, tlan napaxuwaya xlakata mastapat talakaskin pi Jehová nastakyawayan (Prov. 2:1-5).

15, 16. 1) ¿Tuku natlawayaw xlakata nalitamakgtayayaw taskujut nema tlawakgo lakgkgolotsin? 2) ¿Tuku tlan natlawayaw xlakata lakgkgolotsin nalipaxuwakgo xtaskujutkan?

¹⁵ Jesús na kalakgayawanit lakgkgolotsin xlakata nakuentajtlawakgo congregación. Biblia wan pi xtachuna la akgtum tamaskiwin nema kinkamaxkiyan (Efes. 4:8, 11-13). ¿Tuku natlawayaw xlakata nalitamakgtayayaw xtaskujutkan? Kamakglhkatiw xtakanajlakan, xatlan xli’akxilhtitkan chu kakgalhakgaxmatwi tastakyaw xalak Biblia nema kinkamaxkikgoyan (kalikgalhtawakga Hebreos 13:7, 17). Kalakapastakwi pi lakgkgolotsin kinkapaxkikgoyan chu lakaskinkgo pi tlan katalaliw Jehová. Akgtum li’akxilhtit, komo akxilhkgo pi nialh lu anaw ktamakxtumit o taxlajwanimaw, lakapala nakinkamaxkikgoyan tamakgtay. Liwana nakinkakgaxmatnikgoyan, nakinkamakgpuwantinikgoyan chu nakinkamaxkikgoyan lakwan tastakyaw nema takilhtinit kBiblia. ¿Ka’akxilha wix lakgkgolotsin pulaktum nema Jehová limaklakaskin xlakata nakinkalimasiyaniyan tapaxkit?

¹⁶ Min kilhtamaku lakgkgolotsin tuwa makgkatsikgo akxni kinkamaxkikgoyan tastakyaw. Akgtum li’akxilhtit, kalakapastakwi la xlituwa  makgkatsilh palakachuwina Natán akxni tachuwinalh David xlakata xmatsekgputun lanka talakgalhin nema xtlawanit (2 Sam. 12:1-14). Nachuna titaxtulh apóstol Pablo, ni pekualh akxni stakyawalh apóstol Pedro xlakata xlimasiya pi tlakg xkapaxki tiku judíos xwankgonit (Gál. 2:11-14). Wa xlakata, ¿tuku natlawaya wix xlakata lakgkgolotsin ni tuwa namakgkatsikgo xtaskujutkan? Kataktuju, kakgaxpatti tuku nawanikgoyan chu kakapaxtikatsini. Tamakgtay nema maxkikgoyan limasiya pi Dios paxkiyan. Chuna, wix nalitamakgtayaya chu lakgkgolotsin nalipaxuwakgo taskujut nema tlawakgo.

17. ¿La makgtayakgolh lakgkgolotsin chatum tala?

¹⁷ Chatum tala lichuwinan pi, kaj xlakata tuku nitlan titaxtulh makgasa kilhtamaku lu tuwa xmakgkatsi napaxki Jehová chu lu xlipuwan. Xla lichuwinan: «Xakkatsi pi xtalakaskin nakkatachuwinan lakgkgolotsin. Ni kinkilhnikgolh chu ni lixkajni kilichuwinankgolh. Wata kimakgpuwantinikgolh chu kimatliwakglhkgolh. Akxni ksputa akgatunu tamakxtumit, maski wi tuku xtlawakgo, ankgalhin xkinkgalhskinkgo la xakwi. Xlakata tuku xaktitaxtunit, lu tuwa xakmakgkatsi nakkanajla pi xkilakgchan xtapaxkit Dios. Pero Jehová ankgalhin maklakaskinit xcongregación chu lakgkgolotsin xlakata nakilimasiyani xtapaxkit. Ktlawani oración xlakata nikxni nakimakgxtakga».

18, 19. ¿Tuku tlakg tuwa tamakgkatsi nixawa namakglhtinanaw tastakyaw? Kawili akgtum li’akxilhtit.

¹⁸ Xlikana pi akxni namaxkikana tastakyaw tuwa tamakgkatsi, pero komo nalakgmakganaw tlakg tuwa nakitaxtu (Heb. 12:11). Kaʼakxilhwi akgtiy li’akxilhtit: xlakata Caín chu mapakgsina Sedequías. Akxni Dios akxilhli pi Caín ksitsini xtala chu xmakgniputun, wanilh: «¿Tuku xlakata lu sitsipat chu tuku xlakata litasiya kmilakan? Komo tlawaya tuku tlan, ¿ni tlan nalikatsinikana? Pero komo ni tlawaya tuku tlan, talakgalhin wi anta niku laktanukan, chu xla matlawiputunan tuku nitlan; chu wix, ¿namakgatlajaya?» (Gén. 4:6, 7). Pero lu nitlan xlakata Caín ni kgalhakgaxmatnilh Jehová. Makgnilh xtala chu lu nitlan kitaxtunilh putum kxlatamat (Gén. 4:11, 12). Komo Caín xmakglhtinalh xtastakyaw Jehová, ni xpatinalh.

¹⁹ Sedequías nitlan mapakgsina litaxtulh chu xapekua xwanit. Mapakgsinalh akxni lu katuwa xwanit kJerusalén. Palakachuwina Jeremías makglhuwa wanilh Sedequías pi nialh xtlawalh tuku nitlan, pero mapakgsina ni makgamakglhtinalh tastakyaw chu lu nitlan tuku kitaxtunilh (Jer. 52:8-11). Chuna la akxilhaw, Jehová ni lakaskin pi napatinanaw kaj xlakata nalakgmakganaw tastakyaw (kalikgalhtawakga Isaías 48:17, 18).

20. ¿Tuku na ka’akgspula tiku lakgmakgankgo xtastakyaw Dios chu tiku makgamakglhtinankgo?

²⁰ La uku, lhuwa latamanin lakgmakgankgo xtastakyaw Dios. Pero kaj nialh makgas tiku kgalhikgo uma tayat lu tuwa nakakitaxtunikgo (Prov. 1:24-31). Wa xlakata kakgaxmatwi tastakyaw chu skgalala kalitaxtuw. Proverbios 4:13 kinkawaniyan tuku natatlawayaw akxni namakglhtinanaw tastakyaw: «Ni kamakgxtakgti. Kamaki, xlakata wa milatamat».