La uku niti katsi la xtasiya Pablo. Dibujos nema wilakgo kkilikgalhtawakgakan xla Pablo kaj akgtum limasiy, ni tu tekgskanit nema limasiya la liwana xtasiya.

Pero, wi tuku kinkamakgtayayan nakatsiyaw la max xtasiya Pablo. Akgtum liʼakxilhtit, krevista La Atalaya 1 xla marzo kata 1902, lichuwinalh pi klibro xla Hechos de Pablo y Tecla, nema tsokgka kkata 150 lichuwinan la max xtasiya Pablo: «Aktsu chixku, nitu xkgalhi xchixit, tanchakgala xtlawan, tliwakga xwanit, lhuwa xkgalhi xlakgpichixit chu tsinu lanka xkankan».

Maktum diccionario lichuwinan pi tuku wanit klibro xla Hechos de Pablo y Tecla max xlikana chuna xtasiya (The Oxford Dictionary of the Christian Church [tlawakanit kkata 1997]). Kxapulana siglos akxni xminita Jesús, uma libro lu xmaxkikan kakni chu litasiya xlakata la uku wijku 80 tatsokgni kxagriego chu kʼatanu tachuwin. Wa xlakata, chuna la tasiya kkilikgalhtawakgakan tatalakxtumi makgapitsi tuku lichuwinankgo tatsokgni xalamakgasa xlakata Pablo.

Pero, kililakapastakatkan pi wi tuku tlakg xlakaskinka kilikatsitkan nixawa la xtasiya Pablo. Akxni xlichuwinan Dios, makgapitsi nitlan xlichuwinankgo chu xwanikgo: «Wampi wa nalakgatayanan xachatuminika, nitu xlakgasi chi nchu wa [...] xtaʼakgchuwin, kaj xachunata» (2 Cor. 10:10). Nachuna kililakapastakatkan pi kstalanina Cristo litaxtulh xlakata Jesús tasiyanilh. Na tlan nalilakpuwanaw tuku tlawalh xlakata litaxtulh la «xatalaksakni» chu «[...] kalitachuwinalh Dios xaʼakgmakgat chixkuwin» (Hech. 9:3-5, 15; 22:6-8). Chu nalilakpuwanaw la kinkamakgtayayan tuku tsokgli anta kBiblia.

Pablo nikxni lichuwinalh la xtasiya, nachuna ni litlankajwanalh xlakata tuku xtlawanit akxni nina kstalanina Cristo xwanit (Hech. 26:4, 5; Filip. 3:4-6). Xla wa: «Akit tiku tlakg xaʼaktuju apóstol, chu nikilakgchan naklitapakuwiy apóstol» (1 Cor. 15:9). Chu alistalh tsokgli: «Kit nti ntlakg xaʼaktuju lantla xlipaks amakgapitsin ksantujlanin Dios, na kit nti nkimaxkika yuma lipaxkatsinit lantla nakliʼakgchuwinaniy xaʼakgmakgat chixkuwin wa lantla asta ni lay takgatakgsa lantla mininiy xlitlanka xlakatsukut ntu nkgalhi nCristo» (Efes. 3:8). Wa xlakata, uma tuku lichuwinalh tlakg xlakaskinka nixawa la xtasiya.