PUTUM lakaskinaw pi kakinkaʼakxilhkan pi tlan likatsiyaw chu xaʼakgstitum akinin. Pero kʼuma kakilhtamaku lu tuwa chuna nakinkaʼkxilhkanan, xlakata lhuwa latamanin ni “paxkikgo tuku tlan” (2 Tim. 3:3). Max linkgo xlatamatkan chuna la xlakan lakpuwankgo xlakata tuku tlan chu tuku nitlan. Asta «wankgo pi tuku tlan nitlan chu tuku nitlan xatlan» (Is. 5:20). Chu putum akinin tuwa makgkatsiyaw tlan nalikatsiyaw xlakata tuku max nitlan titaxtunitaw kkilatamatkan chu xlakata makglakgalhinanin akinin. Wa xlakata, max makgkatsiyaw chuna la chatum tala tiku akglhuwata kata la skujnanima Jehová, chu wan: «Nila kkanajla pi tlan klikatsi».

Pero xlikana pi putum akinin tlan nalikatsiyaw. Wa uma pulaktum tayat nema masta xʼespíritu santo Dios nema tlakg tliwakga nixawa kintalakgalhinkan o taʼakglhuwit nema titaxtuyaw kʼuma kakilhtamaku. Kalichuwinaw tuku kilhchanima tlan likatsikan chu kaʼakxilhwi la tlan nalimasiyayaw kkilatamatkan.

Tlan likatsikan kilhchanima pi chatum lataman tlan likatsi, ni tlawa tuku nitlan chu xaskulunku lin xlatamat. Tiku tlan likatsi ankgalhin putsa la nakamakgtaya amakgapitsin chu tlawa tuku tlan xpalakatakan.

Max kalakgapasaw latamanin tiku tlawakgo tuku tlan xpalakata xfamiliajkan chu xʼamigoskan. Pero tiku tlan likatsi kxlakatin Dios ni kaj xman wa uma tlawa. Xlikana pi niti la liwana makgantaxti uma tayat, xlakata Biblia wan pi «ni anan kkatiyatni chixku tiku xaʼakgstitum chu kajwatiya natlawa tuku tlan chu ni nalakgalhinan» (Ecl. 7:20). Chu apóstol Pablo lichuwinalh: «Kkatsi mpi ni tsinu ntu ntlan nkimalananiy [...] kkintiyatliwa» (Rom. 7:18). Wa xlakata komo kgalhiputunaw uma tayat, xlakaskinka naʼakxilhaw xliʼakxilhtit Jehová, xmakilhtsukina uma tayat.

Jehová wa tiku wili limapakgsin xlakata tuku tlan. Chatum tiku tsokgli salmo wanilh: «Wix tlan katsiya y snun makgtayaninana, chi kakimasini mintastakyaw» (Sal. 119:68, SXP). Kalichuwinaw pulaktiy la tlan likatsi Jehová nema lichuwinan uma versículo.

Jehová tlan likatsi. Tlan likatsikan wa pulaktum nema lu xlakaskinka xtayat Jehová. Kaʼakxilhwi tuku lalh akxni wanilh Moisés: «Naktitaxtu kmilakatin chu wix na’akxilha pi akit tlan klikatsi». Akxni xtitaxtuma xtatlankit Dios chu tlan xtalikatsit, Moisés kgaxmatli umakgolh tachuwin: «Jehová, Jehová, chatum Dios xalakgalhamana chu tlan likatsi, ni lakapala sitsi, lhuwa kgalhi tapaxkit nema ni makgxtakgnan chu xaxlikana, tiku chuntiya lhuwa mil kalimasiyani tapaxkit nema ni makgxtakgnan chu tapatinan akxni tlawakan tuku nitlan, pero namalakgaxokge tiku lakgchan» (Éx. 33:19; 34:6, 7). Wa xlakata tlan nawanaw pi akgatekgsaw pi tlan likatsi chu litasiya putum kxtayat. Akxni Jesús xlama kKatiyatni lu tlan li’akxilhtit litaxtulh xlakata tlan likatsikan. Maski chuna, wa: «Ni anan tiku tlan likatsi, kajwatiya Dios tlan likatsi» (Luc. 18:19).

Jehová tlawa tuku xatlan. Putum tuku anan litasiya pi Dios tlan likatsi. Biblia lichuwinan: «Dios wakg akxtum kalakgalhaman lakchixkuwin xala nak katiyatni, kamasiyani ixlitlan katsi [o tlan kalikatsini] wakg lata tu katlawanit» (Sal. 145:9, SXP). Jehová limasiya  pi tlan likatsi akxni ni laksakpaxkinan chu kamaxki latamat latamanin chu putum tuku maklakaskinkgo xlakata tlan nalatamakgo (Hech. 14:17). Nachuna limasiya akxni kinkatapatiyan kintalakgalhinkan. Chatum tiku tsokgli salmo wa: «Wix Jehová, tlan likatsiya chu lu tapatinamputuna» (Sal. 86:5). Liwana nakatsiyaw pi «xla kasikulunatlawa y kamaxki likaknit ti tanks talamanaj nakamaxki wakg tu lipaxaw natalilatamaj» (Sal. 84:11, SXP).

Xlakata Jehová kinkatlawan chuna la xla, tlan natlawayaw tuku tlan chu tlan nalikatsiyaw (Gén. 1:27). Maski chuna, Biblia kinkawaniyan: «Kakatsinitit natlawayatit tuku xatlan» (Is. 1:17). Ka’akxilhwi pulaktutu tuku tlan natlawayaw xlakata nakgalhiyaw uma tayat.

Pulana, natlawayaw oración xlakata naskinaw espíritu santo, nema nakinkamakgtayayan tlan nalikatsiyaw kxlakatin Dios (Gál. 5:22). Chuna, x’espíritu Dios kinkamakgtayayan napaxkiyaw tuku tlan chu nalakgmakganaw tuku nixatlan (Rom. 12:9). Nachuna, Biblia kinkawaniyan pi Jehová «na [kin]kamatliwakglhan ntu kxatlan tachuwin, chu ntatlaw» (2 Tes. 2:16, 17).

Xlipulaktiy, talakaskin nalikgalhtawakgayaw xTachuwin Dios. Akxni chuna tlawayaw, Jehová kinkamasiyaniyan «xatlan tiji xlakata naʼakgatekgsaw tuku xatlan» chu kinkamakgtayayan xlakata «natlawayaw tuku tlan» (Prov. 2:9; 2 Tim. 3:17). Akxni likgalhtawakgayaw xTachuwin chu lilakpuwanaw, tawila kkinakujkan tuku lhuwa xtapalh xlakata Dios chu xtalakaskin. Uma xtachuna litaxtu la tuku lhuwa xtapalh nema nakinkamakgtayayan akxni maklakaskinaw (Luc. 6:45; Efes. 5:9).

Xlipulaktutu, talakaskin naliskujaw xlakata nastalaniyaw li’akxilhtit «wantu ntlan» (3 Juan 11). Anta kBiblia tekgsaw xli’akxilhtitkan tiku tlan likatsikgolh nema tlan nastalaniyaw. Xlikana, tiku tlakg xatlan li’akxilhtit kgalhiyaw wa xla Jehová chu Jesús. Pero nachuna wilakgolh amakgapitsi tlan li’akxilhtit. Max tlan nalakapastakaw Tabita chu Bernabé (Hech. 9:36; 11:22-24). ¿Tlan xlikgalhtawakgaw kBiblia xpalakatakan chu na’akxilhaw tuku tlawakgolh xlakata nakamakgtayakgo amakgapitsin? Kalilakpuwaw tuku tlan natlawayaw akinin xlakata nakamakgtayayaw kifamiliajkan chu xalak congregación. Ka’akxilhwi tuku tasikulunalin makglhtinankgolh uma chatiy kstalaninanin Cristo xlakata tlawakgolh tuku tlan. Akinin max nachuna nakinka’akgspulayan.

Nachuna tlan nalilakpuwanaw tiku la uku tlawakgo tuku tlan xpalakatakan amakgapitsin. Akgtum li’akxilhtit, lakgkgolotsin xalak congregación  lu skujkgo chu paxkikgo tuku tlan. Chu nachuna ankgalhin nakalakapastakaw natalan lakpuskatin tiku ni makgxtakgkgo Dios chu «masiyakgo tuku tlan» akxni chuwinankgo chu akxni wi tuku tlawakgo (Tito 1:8; 2:3). Chatum tala wanikan Roslyn wan: «Kkgalhi chatum amiga tiku lu liskuja xlakata nakamakgtaya chu nakamakgpuwantini natalan xalak congregación. Lilakpuwan xlakata tuku titaxtumakgo chu lismaninit nakamaxki laktsu tamaskiwin chu atanu. Klakpuwan pi xla lu tlan likatsi».

Jehová kawani xlakskujnin: «Kaputsatit tuku tlan» (Amós 5:14). Komo chuna natlawayaw, ni kajwatiya katipaxkiw xlimapakgsin, wata namatliwakglhaw xlakata natlawayaw tuku tlan.

Nachuna, ni nalakpuwanaw pi xlakata tlan nalikatsiyaw natlawayaw tuku kaks nakamalakawani amakgapitsin. Kawiliw akgtum li’akxilhtit. Xlakata akgtum xanat nastaka ni talakaskin lhuwa chuchut nalimunuwiliyaw, wata talakaskin makglhuwa namunuwiliyaw pero kaj tsinu chuchut namaklakaskinaw. Nachuna, tlan nalimasiyayaw pi tlan likatsiyaw akxni makglhuwa tlawayaw tuku tlan xpalakata amakgapitsin.

Biblia lichuwinan pi kimputumkan talakaskin skgalalh natawilayaw xlakata natlawayaw tuku tlan (2 Tim. 2:21; Tito 3:1). Komo kuenta natlawayaw tuku titaxtumakgolh amakgapitsin, xlikana pi max natekgsaw la nakamakgtayayaw chu natlawayaw “tuku tlan nakalimatliwakglhaw” (Rom. 15:2). Max uma kilhchanima pi nakamaxkiyaw amakgapitsi tuku kgalhiyaw (Prov. 3:27). Max tlan akxtum nakatatawilayaw amakgapitsin o nakatawayanaw. ¿Lakgapasaw tiku tatatla? Max tlan namalakgachaniyaw maktum tarjeta, akgtum mensaje, tlan nalakgapaxialhnanaw o tlan natachuwinanaw kteléfono. Xlikana, pulaklhuwa anan la tlan nawanaw «wantu xlilat lakimpi chuna nalistakkgoy ktakanajla, chu nalimakgamakglhtinankgoy lipaxkatsinit wanti nkgaxmatkgoy mintachuwinkan» (Efes. 4:29).

Chuna la Jehová, tlawaputunaw tuku tlan xpalakata putum latamanin. Wa xlakata ni kalaksakpaxkiyaw. Pulaktum la tlakg tlan natlawayaw wa nakaliniyaw xalakwan tamakatsinin xla Tamapakgsin. Chuna la Jesús limapakgsinalh, tlawayaw tuku tlan xpalakatakan tiku ni kinka’akxilhputunkgoyan (Luc. 6:27). Ankgalhin tlan kitaxtu komo tlan nakalikatsiniyaw amakgapitsin, xlakata «ni anan limapakgsin nema talalakatawaka» (Gál. 5:22, 23). Komo natlawayaw tuku tlan maski nakinkalakatakikanan o natitaxtuyaw taʼakglhuwit, max uma natlawa pi amakgapitsi latamanin natalakatsuwinikgo tuku xaxlikana chu namalankiyaw Dios (1 Ped. 3:16, 17).

Biblia lichuwinan pi chixku tiku tlan likatsi makglhtinan tasikulunalin xlakata tuku tlan tlawa (Prov. 14:14). ¿Tuku tasikulunalin makglhtinan? Max tlan nakinkalikatsinikgoyan amakgapitsin (Prov. 14:22). Chu maski nichuna natlawakgo, komo chuntiya nalimasiyayaw pi tlan likatsiyaw max nalakgpalikgo xtapuwankan chu tlan nakinkalikatsinikgoyan (Rom. 12:20).

Lhuwa akxilhkgonit la kamakgtayanit namakgxtakgkgo tuku nitlan chu natlawakgo tuku tlan. Ka’akxilhwi tuku titaxtulh Nancy. Xla wan: «Lu nitlan tayat xakkgalhi, xaktlawa tuku xalimaxana chu ni xakkamaxki kakni amakgapitsin. Pero akxni klakgapasli xlimapakgsin Dios xlakata tuku tlan, ktsukulh lilatama, tlakg kpaxuwa chu la uku tlakg tlan kmakgkatsi».

Kilikgalhitkan uma tayat xlakata chuna makgapaxuwayaw Jehová, wa uma tuku tlakg xlakaskinka. Xla akxilha tuku tlawayaw, maski amakgapitsi ni akxilhkgo. Ankgalhin kuenta tlawa xatlan kintapuwankan chu tuku tlawayaw (Efes. 6:7, 8). ¿Tuku nakinkakitaxtuniyan? «Tiku tlan likatsi, Jehová lu tlan akxilha» (Prov. 12:2). Wa xlakata chuntiya kaliskujwi xlakata tlan nalikatsiyaw. Jehová malaknu pi «tiku tlawakgo tuku tlan, Dios nakamaxki kakni chu xlakan tlan natalalinkgo» (Rom. 2:10).