1, 2. Chuna la wan Hechos 8:27-31, 35-38, ¿tuku xlakata tamunulh etíope?

¿WIX tamunuputuna chu kstalanina Cristo litaxtuputuna? Lhuwa latamanin tamunukgo xlakata tapaxkit nema kgalhinikgo Jehová chu xlakata lu paxtikatsinikgo. Kalakapastakti tuku titaxtulh chatum kskujni mapakgsina xalak Etiopía.

² Akxni uma chixku liwana akgatekgsli pi Biblia xmasiya pi xlitamunut xwanit, tunkun chuna tlawalh (kalikgalhtawakga Hechos 8:27-31, 35-38). ¿Tuku xlakata? Xlakata lanka xtapalh xʼakxilha xTachuwin Dios, xla xlikgalhtawakgama xlibro Isaías akxni xʼama kxputlaw. Chu, akxni Felipe wanilh tuku tlawalh Jesús xpalakata, lu paxtikatsinilh. Nachuna, katsiyaw pi xpaxki Jehová, xlakata kilalh kJerusalén xlakata nakakninani. Xmakgxtakgnit takanajla niku xmakgtapakgsi xapulana chu xlaksaknit namakgtapakgsi ktakanajla niku kajwatiya xaxlikana Dios kakninanikan. Tapaxkit nema xkgalhini Jehová makgtayalh natlawa tuku tlakg xlakaskinka, natamunu chu kstalanina Cristo nalitaxtu (Mat. 28:19).

3. ¿Tuku namalakgachokgo chatum lataman ni natamunu? (Kaʼakxilhti recuadro « ¿Tuku tiyat tatalakxtumi minaku?»).

³ Tapaxkit nema kgalhiniya Jehová natlawa pi natamunuputuna. Pero max wi atanu tuku makgkatsiya nema namalakgachokgoyan xlakata ni natamunuya. Akgtum liʼakxilhtit, wix max lu kapaxkiya mifamilia chu miʼamigos tiku ni xtatayananin Jehová chu lakpuwana pi nialh katipaxkikgon komo natamunuya (Mat. 10:37). O max wi tuku lu lismaninita tlawaya nema Dios ni tlan akxilha chu tuwa makgkatsiya namakgxtakga (Sal. 97:10). O max makgastakka kʼakgtum familia  niku xtlawakan talismanin nema kilhtsukunit knixaxlikana takanajla chu wix lu xlakgatiya, chu wa xlakata tuwa makgkatsiya nialh natlawaya umakgolh talismanin nema ni makgapaxuwa Jehová (1 Cor. 10:20, 21). Pero tuku lu xlakaskinka wa nalakpuwana: «¿Tuku o tiku tlakg kpaxki?».

4. ¿Tuku nakinkamakgpuwantiniyan natamunuyaw?

⁴ Xlikana pi anan lhuwa tuku paxkiya chu lanka xtapalh li’akxilha, chu uma lu tlan. Akgtum li’akxilhtit, max akxni nina xkatakgalhtawakgaya xtatayananin Jehová, lu lanka xtapalh xliʼakxilha Biblia. Nachuna, max xpaxkiya Jesús. Chu la uku, xlakata kalakgapasa xtatayananin Jehová, max lu tlan limakgkatsiya akxtum katatawilaya. Pero maski chuna makgkatsiya, ni wa uma tuku katitlawalh pi natamakamastaniputuna Jehová chu natamunuya. Tuku xlikana namakgpuwantiniyan natamunuya wa tapaxkit nema kgalhiniya Jehová. Akxni tlakg napaxkiya Jehová ni katimasta talakaskin pi wi tuku namalakgachokgoyan xlakata naskujnaniya. Wa xlakata tapaxkit nema kgalhiniyaw Jehová ni kajwatiya nakinkamakgpuwantiniyan natamunuyaw, nachuna kinkamakgtayayan chuntiya naskujnaniyaw.

5. ¿Tuku nalichuwinanaw kʼuma artículo?

⁵ Jesús lichuwinalh pi kilipaxkitkan Jehová xliputum kinakujkan, kilatamatkan, kintalakapastaknikan chu kilitliwakgakan (Mar. 12:30). ¿Tuku militlawat xlakata tlan chuna napaxkiya chu namaxkiya kakni? Kalilakpuwanti tapaxkit nema kinkakgalhiniyan chu uma natlawa pi na napaxkiyaw (1 Juan 4:19). Kʼuma artículo nalichuwinanaw tuku nakinkamakgtayayan chuna natlawayaw. Nachuna nakatsiyaw tuku atanu namakgkatsiyaw chu tuku nakinkamatlawiyan uma tapaxkit *.

6. Chuna la wan Romanos 1:20, ¿tuku nakinkamakgtayayan tlakg nalakgapasaw Jehová?

⁶ Kakatsini xlakata Jehová akxni nalilakpuwana xtamalakatsukin (kalikgalhtawakga Romanos 1:20; Apoc. 4:11). Kalilakpuwanti la limasiyakgo xliskgalala Jehová laktsu tuwan chu animales. Kalakputsanani tsinu la tlawakanit kimaknikan (Sal. 139:14). Chu kalilakpuwanti litliwakga nema Jehová limaklakaskilh xlakata namalakatsuki chichini, chu kalakapastakti pi chichini kaj akgtum staku nema xlilhuwa anan (Is. 40:26). * Akxni nalilakpuwana putum uma, tlakg lanka naliʼakxilha Jehová. Pulaktum tuku kinkamakgtayayan tlakg tlan natalalinaw wa akxni akgatekgsaw pi Jehová lu xaskgalala chu kgalhi litliwakga. Xlakata tlan napaxkiya xliputum minaku, talakaskin pi tlakg nalakgapasa.

7. Xlakata tlan napaxkiya Jehová xliputum minaku, ¿tuku lu xlakaskinka liwana milikatsit?

⁷ Lu xlakaskinka liwana nakatsiya pi Jehová lilakgaputsayan. ¿Tuwa makgkatsiya nakanajlaya pi xMalakatsukina akgapun chu Katiyatni katsi pi lapat chu xlakaskinka liʼakxilhan? Komo chuna, kalakapastakti pi Jehová «ni makgat kinkawilanin» (Hech. 17:26-28). Chuna la David wanilh Salomón, Dios «akxilha tuku wi knaku». Xla kinkamalaknuniyan, pi komo wix naputsaya, xla namasta talakaskin nalakgtalakatsuwiya (1 Crón. 28:9). Nachuna, xlakata wix likgalhtawakgapat Biblia wa Jehová tiku mastalh talakaskin pi natalakatsuwiniya, chuna la wan  Jeremías 31:3. Akxni tlakg nakatsiniya tuku Jehová tlawanit mimpalakata, tlakg napaxkiya.

8. ¿La nalimasiyaya pi paxtikatsiniya xtapaxkit Jehová?

⁸ Pulaktum la tlan nalimasiyaya pi paxtikatsiniya xtapaxkit Jehová wa pi ankgalhin natlawaniya oración. Tlakg napaxkiya akxni nalitachuwinana tuku lilakgaputsaya chu napaxtikatsiniya putum tuku tlawa mimpalakata. Chu tlakg natalalipina akxni na’akxilha pi kgalhti mi’oraciones (Sal. 116:1). Liwana nakatsiya pi Dios xlikana akgatekgsniyan. Nachuna, xlakata tlakg natalakatsuwiniya Jehová, talakaskin nakatsiya la lakapastaka chu tuku lakaskin natlawaya. Chu tlan nakatsiya uma komo nalikgalhtawakgaya Biblia.

9. ¿La nalimasiyaya pi lanka xtapalh li’akxilha Biblia?

⁹ Kakatsini la lanka xtapalh naliʼakxilha Biblia. Kajwatiya Biblia lichuwinan tuku xaxlikana xlakata Jehová chu tuku lakaskin mimpalakata. ¿La nalimasiyaya pi lanka xtapalh li’akxilha? Nalikgalhtawakgaya chali chali, nalakkaxwiliya tuku nalimakgalhtawakgekana chu nalilatapaya tuku katsinipat (Sal. 119:97, 99; Juan 17:17). ¿Kgalhiya mimprograma xlakata nalikgalhtawakgaya Biblia chali chali chu chuna tlawaya?

10. ¿Tuku na lichuwinan Biblia?

¹⁰ Makgapitsi tuku na lichuwinan Biblia wa tuku lichuwinankgolh latamanin tiku lakgapaskgolh o akxilhkgolh Jesús. Kaj xman wa uma libro liwana lichuwinan tuku tlawalh mimpalakata. Akxni nakatsiniya tuku tlawalh chu tuku lichuwinalh Jesús, tlakg tlan natalalipimputuna.

11. ¿Tuku namakgtayayan tlakg napaxkiya Jehová?

¹¹ Kakatsini napaxkiya Jesús, chu chuna tlakg napaxkiya Jehová. Chuna nakitaxtu xlakata Jesús watiya tayat kgalhi chuna la xTlat (Juan 14:9). Wa xlakata, akxni tlakg nakatsiniya xlakata Jesús, tlakg naʼakgatekgsa la likatsi Jehová chu tlakg napaxkiya. Kalilakpuwanti la kalakgalhamalh Jesús latamanin tiku nitu xkaliʼakxilhkan, chuna la tiku limaxkgenin, tiku xtatatlakgo chu tiku ni lakgtliwakgan xwankgonit. Nachuna  kalilakpuwanti tastakyaw nema maxkiyan chu la tlan kitaxtuniyan akxni kgalhakgaxpata (Mat. 5:1-11; 7:24-27).

12. Akxni tlakg nakatsiniya xlakata Jesús, ¿tuku namakgpuwantiniyan natlawaya?

¹² Tapaxkit nema kgalhiniya Jesús tlakg natatliwakglha akxni nalilakpuwana tamakamastan nema tlawalh xlakata natapatikana mintalakgalhin (Mat. 20:28). Akxni naʼakgatekgsa pi xla xatapaxuwan nilh mimpalakata, namakgtayayan naskiniya Jehová pi katapatin mintalakgalhin (Hech. 3:19, 20; 1 Juan 1:9). Chu akxni tlakg nakapaxkiya Jehová chu Jesús, akxtum nakatatawilaputuna tiku na paxkikgo chuna la wix.

13. ¿Tuku maxkinitan Jehová?

¹³ Kakatsini nakapaxkiya xfamilia Jehová. Max mintalilakgapasni tiku ni xtatayananin Jehová chu tiku miʼamigos xwankgonit ni akgatekgskgo tuku xlakata makamaxkiputuna Dios milatamat, chu asta max nasitsinikgoyan. Pero Jehová namakgtayayan xlakata namaxkiyan akgtum familia xaʼespiritual. Komo lakatsu natawilaniya uma familia, nakgalhiya tapaxkit chu namakgtayakgoyan akxni namaklakaskina (Mar. 10:29, 30; Heb. 10:24, 25). Chu max namin kilhtamaku tiku xalak mifamilia nachuna naskujnanikgo Jehová chu nalilatamakgo xtastakyaw (1 Ped. 2:12).

14. Chuna la wan 1 Juan 5:3, ¿tuku katsininita wix xlakata xtastakyaw Jehová?

¹⁴ Kakatsini lanka xtapalh naliʼakxilha chu nakgalhakgaxpata xtastakyaw Jehová. Akxni nina xlakgapasa Jehová xtlawaya tuku tlakg tlan xlakpuwana, pero la uku akxilhnita pi xtastakyaw Jehová wa tuku tlakg xatlan (Sal. 1:1-3; kalikgalhtawakga 1 Juan 5:3). Kalilakpuwanti tastakyaw nema kamaxki Biblia xalakchixkuwin, xalakpuskatin, xanatlatni chu xalak kamanan (Efes. 5:22–6:4). ¿Akxilhnita pi mi familia tlakg tlan kakitaxtuni akxni makgantaxtiya umakgolh tastakyaw? ¿Tlakg tlan likatsiya la uku, xlakata katsiya tiku tlan chu tiku ni natalalipina? ¿Tlakg paxuwaya? (Prov. 13:20; 1 Cor. 15:33). Max nawana pi chuna.

15. ¿Tuku tlan natlawaya komo lakaskina tamakgtay xlakata la nalilatapaya xtastakyaw Biblia?

¹⁵ Max lakgachunin ni katsiya la nalilatapaya akgtum xtastakyaw Biblia nema katsinipat. Wa xlakata Jehová limaklakaskin xkachikin xlakata nakinkamaxkikgoyan likgalhtawakga nema takilhtinit kBiblia chu nakinkamakgtayayan xlakata nakatsiyaw tuku tlan natlawayaw chu tuku ni kilitlawatkan (Heb. 5:13, 14). Akxni nalikgalhtawakgaya umakgolh tastakyaw, naʼakxilha pi lu namakgtayayan chu namakgpuwantiniyan namakgtapakgsiputuna kxkachikin Jehová.

16. ¿La lakkaxwilinit Jehová xkachikin?

¹⁶ Kakatsini napaxkiya chu natatayaya xkachikin Dios. Jehová lakkaxwilinit akgatunu congregación, chu xKgawasa, Jesús, wa xʼakgxakga congregaciones (Efes. 1:22; 5:23). Chu nachuna Jesús kalakgayawanit makgapitsin lakchixkuwin tiku xatalaksakni xlakata napulalinkgo taskujut nema kalakgayawanit. Umakgolh natalan tiku Jesús kalimapakuwilh «skujni xatalipaw chu xaskgalala», lu liskujkgo xlakata namaxkikgoyan liwat xaʼespiritual chu nakuentajtlawakgo mintakanajla (Mat. 24:45-47). Pulaktum la limasiya uma skujni pi kuentajtlawayan wa pi kalaksaka tiku napulalinankgo kcongregación (Is. 32:1, 2; Heb. 13:17; 1 Ped. 5:2, 3). Xlakan lu makgtayaputunkgoyan chu namakgoxamixikgoyan xlakata tlakg natalakatsuwiniya  Jehová. Pero pulaktum tuku lu xlakaskinka natlawakgo mimpalakata wa pi namakgtayakgoyan la nakamasiyaniya amakgapitsin nalakgapaskgo Jehová (Efes. 4:11-13).

17. Chuna la wan Romanos 10:10, 13, 14, ¿tuku xlakata kalitachuwinanaw latamanin xlakata Jehová?

¹⁷ Kakamakgtaya amakgapitsin nakatsinikgo la napaxkikgo Jehová. Jesús kawanilh kstalaninanin pi nakamasiyanikgo amakgapitsin xlakata Dios (Mat. 28:19, 20). Tlan nakgalhakgaxmataw uma limapakgsin xlakata katsiyaw pi chuna kilitlawatkan. Pero komo wix tlakg napaxkiya Jehová, chuna namakgkatsiya la apóstol Pedro chu Juan, tiku wankgolh: «Nila ktamakgxtakgniyaw pi nialh naklichiwinanaw wantu man kʼukxilhnitaw, chu wantu kkgaxmatnitaw» (Hech. 4:20). Ni anan atanu tuku tlakg makgapaxuwanan nixawa namakgtayayaw chatum lataman nalakgapasa Jehová. Kalilakpuwanti la paxuwalh Felipe akxni makgtayalh etíope xlakata nakatsini tuku xaxlikana chu natamunu. Akxni nachuna natlawaya tuku tlawalh Felipe chu nakgalhakgaxpata xlimapakgsin Jesús xlakata nalichuwinana xtachuwin Dios, nalimasiyaya pi xtatayana Jehová litaxtuputuna (kalikgalhtawakga Romanos 10:10, 13, 14). Wa xlakata max nachuna nawana tuku wa etíope: «¿Tuku kimalakgachokgo ni naktamunu?» (Hech. 8:36).

18. ¿Tuku naʼakxilhaw kʼatanu artículo?

¹⁸ Akxni natamunuya, wa tuku tlakg tlan nalaksaka kmilatamat. Xlakata uma ni kaj takgaman, talakaskin liwana nalakapastaka tuku kilhchanima tamunut. Wa xlakata, ¿tuku talakaskin nakatsiniya xlakata tamunut? ¿Chu tuku natlawaya akxni nina tamunuya chu akxni tamununitata nawan? Kʼatanu artículo naʼakxilhaw.