1. ¿Tuku xlitlawat chatum lataman akxni nina tamunu?

KALILAKPUWANTI pi chatum chixku tlawaputun akgtum chiki chu liwana lakpuwanit la lakaskin. Wa xlakata, ¿tunkun naʼan tamawa tuku namaklakaskin chu natsuku tlawa? Ni. Akxni nina matsuki, wi tuku lu xlakaskinka xlitlawat: naʼakxilha komo naʼakchani xtumin. ¿Tuku xlakata? Xlakata nakatsi komo tlan namakgalhsputu xchik. Komo pulana nalakkaxwili la natlawa, max tlan namakgalhsputu.

2. Chuna la wan Lucas 14:27-30, ¿tuku xlakaskinka nalilakpuwana akxni nina tamunuya?

² ¿Lu paxkiya Jehová chu wa xlakata tamunuputuna? Komo chuna, max wi tuku talakaskin nalaksaka xtachuna la chixku tiku tlawaputun xchik. ¿Tuku xlakata chuna wanaw? Kalilakpuwanti xtachuwin Jesús nema tekgsaw kLucas 14:27-30 (kalikgalhtawakga). Xla xlichuwinama tuku kilhchanima kstalanina nalitaxtuyaw: talakaskin liwana nalilakpuwanaw pi max natitaxtuyaw tuku tuwa chu max wi tuku nalimakgxtakgaw (Luc. 9:23-26; 12:51-53). Wa xlakata, akxni nina tamunuya, talakaskin liwana nalilakpuwana tuku kilhchanima kstalanina Cristo nalitaxtuya. Uma namakgtayayan chuntiya naskujnaniya Dios akxni tamununitata nawan.

3. ¿Tuku naʼakxilhaw kʼuma artículo?

³ Chuna la akxilhmaw, xlakata putum tuku talakaskin natlawaya, ¿tlan nakitaxtu komo natamunuya? ¡Xlikana pi tlan nakitaxtu! Komo natamunuya nakgalhiya lhuwa tasikulunalin la uku chu kkilhtamaku nema aku mima. Kʼuma artículo, naʼakxilhaw makgapitsi takgalhskinin nema lu xlakaskinka xlakata tamunut. Uma namakgtayayan na’akxilha komo tlantiya natamunuya.

4. 1) ¿Tuku kilhchanima tamakamastakan? 2) ¿Tuku kilhchanima mi’akstu nalakgmakgankana, chuna la lichuwinan Mateo 16:24?

⁴ ¿Tuku kilhchanima tamakamastakan? Wa tuku talakaskin natlawaya akxni nina tamunuya. Natamakamastaniya Jehová  kilhchanima natlawaniya akgtum oración xliputum minaku niku nawaniya pi namakamaxkiya milatamat xlakata naskujnaniya putum kilhtamaku. Akxni wi tiku tamakamastani Jehová, xʼakstu lakgmakgankan (kalikgalhtawakga Mateo 16:24). Lata uma kilhtamaku, kgalhi lanka talakgalhaman xlakata natapakgsini Jehová (Rom. 14:8). Akxni natamakamastaniya Jehová, waniya pi lata ama kilhtamaku ankgalhin naskujnaniya chu ni miʼakstu katimakgapaxuwaka. Akxni tamakamastaniya Jehová tlawaya akgtum talakkaxlan, uma kilhchanima pi tlawaniya Dios akgtum tamalaknun. Jehová ni fuerza kinkawaniyan pi natlawaniyaw uma talakkaxlan. Pero akxni natlawayaw uma tamalaknun, lakaskin pi kamakgantaxtiw (Sal. 116:12, 14).

5. ¿Tuku kilhchanima tamakamastakan chu tuku kilhchanima tamunukan?

⁵ ¿Tuku kilhchanima tamakamastakan chu tuku kilhchanima tamunukan? Tamakamastanikan Jehová kilhchanima akxni natlawaya oración niku nawaniya pi kaj xman wa naskujnaniya. Pero akxni tamunuyaw lhuwa latamanin kinkaʼakxilhkgoyan, la komo kʼakgtum xalanka tamakxtumit. Akxni natamunuya, limasiyaya kxlakatin amakgapitsin pi tamakamastaninitata Jehová. * Uma kilhchanima pi limasiyapat pi paxkiya Jehová xliputum minaku, milatamat, mintalakapastakni chu militliwakga, chu pi laksaknita naskujnaniya xliputum kilhtamaku (Mar. 12:30).

6, 7. Chuna la wan 1 Pedro 3:18-22, ¿tuku xlakata kilitamunutkan?

⁶ ¿Lu xlakaskinka natamunuyaw? Kalilakpuwanti tuku lichuwinan 1 Pedro 3:18-22 (kalikgalhtawakga). Xtachuna la arca nema tlawalh Noé limasiyalh pi xkgalhi takanajla, akxni natamunuya nalimasiya pi tamakamastaninita Jehová. Pero ¿lu xlakaskinka natamunuya? Chuna, chu Pedro lichuwinalh tuku xlakata. Pulana lichuwinalh: «Tamunut, [...] kalakgmaxtuman». Tlan nakinkalakgmaxtuyan komo nalimasiyayaw pi kanajlaniyaw Jesús chu nakanajlayaw pi nilh kimpalakatakan, pi lakastakwanalh chu alh kʼakgapun, chu la uku «wi kxpakgastakat Dios».

⁷ Xlipulaktiy, tamunut tlawa pi «xaskulunku natawila» kintalakapastaknikan. Akxni tamakamastaniyaw Dios chu tamunuyaw, tlakg tlan tsukuyaw talalinaw. Xlakata xliputum kinakujkan lakgmakganitaw tuku nitlan xtlawayaw chu kanajlaniyaw xtamakamastan Jesús, Dios tlan kinkatapatiyan kintalakgalhinkan. Chuna, tlan xaskulunku natawila kintalakapastaknikan kxlakatin.

8. ¿Tuku namakgpuwantiniyan natamunuya?

⁸ ¿Tuku namakgpuwantiniyan natamunuya? Xlakata likgalhtawakgapat Biblia, makgtayanitan lhuwa tuku nakatsiniya xlakata Jehová, chu tuku tlawa. Putum uma lakgchanit minaku chu tlawanit pi napaxkiya. Talakaskin pi wa tapaxkit namakgpuwantiniyan nalaksaka pi natamunuya.

9. ¿Tuku kilhchanima tamunukan kxtukuwani xaTlat, xaKgawasa chu kxtukuwani espíritu santo, chuna la lichuwinan Mateo 28:19, 20?

⁹ Putum tuku katsininita kBiblia namakgpuwantiniyan nalaksaka natamunuya. Kalilakpuwanti tuku wa Jesús akxni mastalh limapakgsin xlakata nakamakgtayayaw latamanin kstalaninanin nalitaxtukgo (kalikgalhtawakga Mateo 28:19, 20). Chuna la lichuwinalh Jesús, tiku tamunukgo xlitamunutkan «kxtukuwani xaTlat chu xaKgawasa chu kxtukuwani espíritu santo». Uma kilhchanima pi xliputum kinakujkan nakanajlaniyaw tuku masiya Biblia xlakata Jehová, xlakata Jesús chu xlakata espíritu santo. Umakgolh tamasiy lu kinkamakgtayayan chu tlan nalakgchan kinakujkan  (Heb. 4:12). Kalakapastakwi makgapitsi tuku katsininitaw.

10, 11. ¿Tuku xaxlikana katsininita xlakata xaTlat chu makgamakglhtinanita?

¹⁰ Kalakapastakti akxni katsini pi xaTlat wanikan «Jehová», pi wa «Tiku tlakg Lanka xlikalanka katiyatni» chu wa «xaxlikana Dios» (Sal. 83:18; Is. 37:16). Nachuna, wa kimalakatsukinakan chu «lanka lakgmaxtuna» (Sal. 3:8; 36:9). Nachuna, tlawanit tuku xtalakaskin xlakata tlan xlakgtaxtuw ktalakgalhin chu klinin, chu kinkamaxkinitan akgtum takgalhkgalhin xlakata kilhtamaku nema aku mima (Juan 17:3). Akxni natamakamastaniya chu natamunuya, nalimasiyaya kxlakatin lhuwa latamanin pi xtatayana Jehová litaxtuya (Is. 43:10-12). Namakgtapakgsiya kʼakgtum familia niku kajwatiya Jehová kakninanikan, linkgo xtukuwani Dios chu kalitachuwinankgo amakgapitsin (Sal. 86:12).

¹¹ Akgtum lanka talakgalhaman naʼakgatekgsniyaw tuku masiya Biblia xlakata xaTlat. Akxni wix namakgamakglhtinana umakgolh lu xlakaskinka tamasiy, minaku namakgpuwantiniyan natamakamastaniya Jehová chu natamunuya.

12, 13. ¿Tuku tamasiy katsininita xlakata xaKgawasa chu makgamakglhtinanita?

¹² ¿La makgkatsi akxni katsini umakgolh xaxlikana tamasiy xlakata xaKgawasa? Jesús wa xlichatiy tiku tlakg xlakaskinka anan kxlikalanka kakilhtamaku. Wa kilakgmaxtunakan, xlakata mastalh xlatamat kimpalakatakan. Akxni limasiyayaw kkilatamatkan pi kanajlaniyaw talakgmaxtut, tlan kinkatapatikanan kintalakgalhinkan, tlan natalalinaw Dios chu tlan nakgalhiyaw latamat nema ni kgalhi xlisputni (Juan 3:16). Nachuna, Jesús wa xaPuxku Sacerdote, xlakata kinkamakgtayaputunan nalitamakgtayayaw lakgtaxtut chu tlan natalalinaw Jehová (Heb. 4:15; 7:24, 25). Xlakata wa Mapakgsina kxTamapakgsin Dios, Jehová namaklakaskin xlakata namasantujli xtukuwani, namasputu tuku nitlan anan kkakilhtamaku chu nakinkasikulunatlawayan xliputum kilhtamaku anta kParaíso (Mat. 6:9, 10; Apoc. 11:15). Nachuna, Jesús wa kiliʼakxilhtitkan (1 Ped. 2:21). Putum kilhtamaku liskujli xlakata natlawa xtalakaskin Dios chu chuna kinkawilinin lu xatlan liʼakxilhtit xlakata nachuna natlawayaw (Juan 4:34).

¹³ Akxni namakgamakglhtinana tuku xaxlikana masiya Biblia xlakata Jesús, natsukuya paxkiya. Uma tapaxkit namakgpuwantiniyan namaklakaskina milatamat xlakata natlawaya xtalakaskin Dios chuna la Jesús. Chu alistalh, natamakamastaniputuna Jehová chu natamunuya.

14, 15. ¿Tuku tamasiy katsininita xlakata espíritu santo chu makgamakglhtinanita?

¹⁴ ¿Tuku lakpuwanti akxni katsini umakgolh xaxlikana tamasiy xlakata espíritu santo? Wa xlimakgatliwakga Dios chu ni kaj chatum lataman. Jehová limaklakaskilh xlakata nakapulalin lakchixkuwin tiku tsokgwilikgolh Biblia, chu uma espíritu kinkamakgtayayan naʼakgatekgsniyaw chu nalilatamayaw tuku anta likgalhtawakgayaw (Juan 14:26; 2 Ped. 1:21). Jehová limaklakaskin uma espíritu xlakata nakinkamaxkiyan «litliwakga nema lakatsala kilitliwakgakan» (2 Cor. 4:7). Espíritu santo kinkamaxkiyan litliwakga xlakata naʼanaw lichuwinanaw xalakwan tamakatsinin, xlakata ni natlawayaw tuku nitlan tlawaputunaw, xlakata ni nataxlajwaniyaw chu tlan natayaniyaw taputsastalanit. Nachuna, kinkamakgtayayan tlan nalimasiyayaw lakwan tayat nema litakgatsi «xtatlaw espíritu» (Gál. 5:22). Dios kamaxki xʼespíritu putum tiku lipawankgo chu tiku skinikgo (Luc. 11:13).

¹⁵ Lu tlan limakgkatsiyaw pi tiku kakninanikgo Jehová nakgalhikgo xtamakgtay espíritu santo nema nakamakgtaya tlan naskujnanikgo  Dios. Akxni namakgamakglhtinana xaxlikana tamasiy xlakata espíritu santo, namakgpuwantiniyan natamakamastaniya Dios chu natamunuya.

16. ¿Tuku akxilhnitaw asta la uku?

¹⁶ Ni kaj takgaman natamakamastaniya Dios chu natamunuya. Chuna la akxilhnitaw, talakaskin liwana nalilakpuwanaw pi max natitaxtuyaw tuku tuwa chu max wi tuku nalimakgxtakgaw kkilatamatkan. Pero tlakg lhuwa tasikulunalin namakglhtinanaw nixawa tuku max namakgxtakgaw o tuku tuwa natitaxtuyaw. Tamunut nalakgmaxtuyan chu namaxkiyan talakaskin skulunku natawila mintalakapastakni kxlakatin Dios. Tapaxkit nema kgalhiniya Jehová wa tuku namakgpuwantiniyan nalaksaka natamunuya. Nachuna xlakaskinka pi xliputum minaku nakanajlaya tuku katsinipat xlakata xaTlat, xaKgawasa chu xlakata espíritu santo. Xlakata putum tuku akxilhnitaw, ¿lakpuwana pi tlantiya natamunuya?

17. ¿Tuku namakgtayayan xlakata tlan natamunuya?

¹⁷ Komo lakpuwana pi tlantiya natamunuya, xlikana pi max tlawanita tuku talakaskin xlakata tlan natsukuya talalipina Jehová. * Mintakgalhtawakga xalak Biblia makgtayanitan lhuwa tuku nakatsiniya xlakata Jehová chu Jesús, chu matliwakglhnita mintakanajla (Heb. 11:6). Lipawana xtamalaknun Jehová nema kinkamaxkiyan kxTachuwin, chu liwana katsiya pi xlakata kanajlaniya xtamakamastan Jesús tlan nalakgmaxtuyan ktalakgalhin chu klinin. Makgxtakgnita mintalakgalhin, o nitlan limakgkatsiya tuku xtlawanita chu skininita Jehová pi katapatin. Lakgpalinita milatamat o lakgmakganita la xlipina milatamat xapulana chu la uku tlawaya xtalakaskin Dios (Hech. 3:19). Lu kalitachuwinamputuna latamanin tuku katsininita xlakata Biblia. Makgatsinitata tuku talakaskin xlakata tlan napina lichuwinana Dios (Mat. 24:14). Jehová lu lipaxuwa chu lanka xtapalh akxilha putum tuku tlawanita xlakata tlan namakgantaxtiya tuku talakaskin (Prov. 27:11).

18. ¿Tuku atanu talakaskin natlawaya akxni nina tamunuya?

¹⁸ Akxni nina tamunuya, wi atanu tuku talakaskin natlawaya. Chuna la akxilhwi, talakaskin natamakamastaniya Dios, uma wamputun pi natlawaniya akgtum oración xliputum minaku niku nawaniya pi namakamaxkiya milatamat xlakata natlawaya xtalakaskin (1 Ped. 4:2). Alistalh, katachuwinanti tiku kapulalin lakgkgolotsin xalak mincongregación pi tamunuputuna. Xla nakawani amakgapitsin lakgkgolotsin pi natachuwinankgoyan. Pero, ni kapekuanti, xlakata umakgolh natalan lakgapaskgoyan chu paxkikgoyan. Xlakan namalakapastakakgoyan tuku katsininita kBiblia xlakata liwana naʼakxilhkgo komo liwana akgatekgsnita chu komo katsiya pi ni kaj takgaman tamakamastanikan Dios chu tamunukan. Komo lakpuwankgo pi tlantiya natamunuya,  nawanikgoyan pi tlan natamunuya kxalanka tamakxtumit.

19, 20. ¿Tuku militlawat akxni tamununitata nawan, chu tuku namakgtayayan?

¹⁹ Akxni tamununitata nawan, ¿tuku talakaskin natlawaya? * Kalakapastakti pi tamakamastan akgtum tamalaknun nema tlawaniya Jehová chu xla lakaskin pi namakgantaxtiya. Wa xlakata, akxni tamununitata nawan, talakaskin pi nalipina milatamat chuna la malaknunita. ¿Tuku namakgtayayan?

²⁰ Ni katamakgatlini congregación. Akxni natamunuya namakgtapakgsiya kʼakgtum familia nema wi «xlikalanka katiyatni» (1 Ped. 2:17, nota). Natalan xalak congregación mifamilia nalitaxtu. Komo ankgalhin napina ktamakxtumit, tlakg natatliwakglha la nakatalalipina natalan. Chali chali kalikgalhtawakga Biblia chu kalimaxtu kilhtamaku xlakata nalilakpuwana tuku likgalhtawakgapat (Sal. 1:1, 2). Uma wamputun pi akxni nalikgalhtawakgaya akgtum texto talakaskin pi nalilakpuwana. Chuna nalakgchan minaku. Nachuna talakaskin natlawaya tuku lichuwinalh Jesús: «Ankgalhin katlawatit oración» (Mat. 26:41). Akxni xliputum minaku tlawaniya oración Jehová makgtayayan tlakg natalakatsuwiniya. Chu chuntiya wa «pulana kaputsa[...] xTamapakgsin Dios» (Mat. 6:33). ¿La natlawaya? Wa tlakg xlakaskinka kaliʼakxilhti kmilatamat. Komo ankgalhin nalichuwinana Dios, tliwakga nawan mintakanajla chu asta max nakamakgtayaya amakgapitsin nakgalhikgo latamat nema ni kgalhi xlisputni (1 Tim. 4:16).

21. ¿Tuku nakitaxtuniyan komo natamunuya?

²¹ Natamakamastaniya Jehová chu natamunuya wa tuku tlakg xlakaskinka nalaksaka kmilatamat. Xlikana pi max wi tuku nalimakgxtakga o wi tuku tuwa natitaxtuya. Pero liwana katsiyaw pi wa uma tuku tlakg tlan natlawayaw kkilatamatkan. Tuku tuwa natitaxtuya kʼuma kakilhtamaku «kaj lakapala natitaxtu chu ni katimakgapalalh» (2 Cor. 4:17). Pero, xlakata natamunuya namakgtayayan nakgalhiya tapaxuwan kmilatamat la uku chu kkilhtamaku nema aku mima nakgalhiya «latamat nema xlikana latamat» (1 Tim. 6:19). Wa xlakata, liwana kalilakpuwanti tuku natlawaya, katlawani oración Jehová chu kalilakpuwanti uma takgalhskinin: «¿Tlantiya naktamunu?».