1. ¿Tuku tlan nawanaw xlakata natalan lakgkgawasan tiku tamunukgonita?

LAKGKGAWASAN, lhuwa tuku tlan namastayatit. Lhuwa wixin kgalhiyatit litliwakga (Prov. 20:29). Chu lhuwa la tlan namakgtayananatit kcongregación. Max siervos ministeriales litaxtuputunatit. Pero max makgapitsin lakpuwankgo pi wixin lu laktsujku o pi ninajla lhuwa taskujut nakalakgayawakanatit. ¿Chuna makgkatsiya? Maski kgawasaku wix, wi tuku tlan natlawaya xlakata amakgapitsin tlan nalipawankgoyan chu natalan xalak congregación namaxkikgoyan kakni.

2. ¿Tuku naʼakxilhaw kʼuma artículo?

² Kʼuma artículo, nalichuwinanaw xlakata mapakgsina David. Na nalichuwinanaw tuku titaxtukgolh chatiy mapakgsinanin xalak Judá: Asá chu Jehosafat. Naʼakxilhaw tuku tuwa titaxtukgolh, tuku tlawakgolh chu tuku tlan nakatsinikgo lakgkgawasan xlakata xliʼakxilhtitkan.

3. ¿La tlan nakamakgtayakgo lakgkgawasan natalan xalak congregación tiku linkgoya kata?

³ Akxni kgawasaku xwanit, David lhuwa tuku xkatsini tlawa nema tlan kalimakgtayalh amakgapitsin. Liwana xtasiya pi tliwakga xwanit xtakanajla; nachuna, liskujli xlakata tlan natlakgnan chu limaklakaskilh uma xlakata namakgtaya mapakgsina Saúl, mapakgsina tiku Jehová xlaksaknit (1 Sam. 16:16, 23). Nachuna, la uku lhuwa lakgkgawasan lhuwa tuku katsinikgo  tlawakgo nema tlan nakalimakgtayakgo natalan xalak congregación. Akgtum liʼakxilhtit, makgapitsin natalan tiku linkgoya kata lu tlan limakgkatsikgo akxni lakgkgawasan kamasiyanikgo la namaklakaskinkgo tabletas o atanu dispositivos electrónicos nema maklakaskinkgo akxni xʼakstukan kgalhtawakgakgo chu akxni ankgo ktamakxtumit. Wix na tlan nakamakgtayaya xlakata tlan namaklakaskinkgo dispositivos electrónicos.

4. Chuna la David, ¿tuku xlitlawatkan lakgkgawasan? (Kaʼakxilhti xmakni revista).

⁴ Tuku xtlawa David chali chali xlimasiya pi tlan xlipawankan chu pi xmakgantaxti tuku xlakgayawakan. Akgtum liʼakxilhtit, akxni kgawasaku xwanit, lakgayawaka nakakuentajtlawa xborregos xtlat, chu xla liskujli xlakata liwana namakgantaxti uma maski katuwa xwili xlatamat. Titaxtulh kilhtamaku, David wanilh Saúl: «KiMalana, akit xmapuchwayanina xborregos kintlat. Akgtum kilhtamaku milh tantum león, chu atanu kilhtamaku tantum oso, chu tanatunu lilh tantum borrego. Akit kkastalanilh chu kkamakgpuspitli, chu kxkilhnikan kkakilakgmaxtulh borregos» (1 Sam. 17:34, 35). David xmakgkatsi pi xtalakaskin nakakuentajtlawa borregos chu ni pekualh akxni kakilakgmaxtulh. Lakgkgawasan tlan nastalanikgo xliʼakxilhtit David akxni liwana namakgantaxtikgo tuku kalakgayawakan.

5. Chuna la wan Salmo 25:14, ¿tuku tlakg xlakaskinka xlitlawatkan lakgkgawasan?

⁵ Lata akxni aktsujku xwanit, David lu tlan xtalalin Jehová. Tlakg xlakaskinka xliʼakxilha chuna la xtalalin Jehová nixawa la xtlakga arpa chu chuna la ni xpekuan. David, ni kajwatiya xDios liʼakxilhli Jehová, wata tlakg xatlan xʼamigo liʼakxilhli (kalikgalhtawakga Salmo 25:14). Lakgkgawasan, tuku tlakg xlakaskinka militlawatkan wa namatliwakglhatit chuna la talalipinatit minTlatkan xalak akgapun. Komo chuna natlawayatit, max tlakg nakamaxkikanatit taskujut kcongregación.

6. ¿Tuku nitlan xlakpuwankgo amakgapitsin xpalakata David?

⁶ Pulaktum tuku tuwa titaxtulh David wa pi amakgapitsin xlakpuwankgo pi lu kgawasaku xwanit chu pi ni xmakgantaxti tuku xlakgayawakan. Akgtum liʼakxilhtit, akxni wa pi xʼama talatlawa Goliat, mapakgsina Saúl machokgolh chu wanilh: «Kajku aktsu kgawasa wix» (1 Sam. 17:31-33). Nina makgas kilhtamaku xtitaxtunit, xtala xwaninit pi ni xmakgantaxti  tuku xlakgayawakan (1 Sam. 17:26-30). Pero Jehová ni xʼakxilha pi David nila xmakgantaxti tuku xlakgayawakan, xla liwana xlakgapasa. Chu xlakata David xlipawan pi Jehová xʼama maxki litliwakga, tlan makgatlajalh Goliat (1 Sam. 17:45, 48-51).

7. ¿Tuku tlan nakatsiniya xlakata tuku titaxtulh David?

⁷ ¿Tuku tlan nakatsiniya xlakata tuku titaxtulh David? Pulaktum, pi talakaskin nakgalhkgalhinana. Max tiku lakgapaskgoyan lata akxni aktsujku xwanita ni lakapala katiʼakxilhkgolh pi wix staknitata. Pero liwana kakatsi pi Jehová ni wa akxilha la tasiyayaw. Xla liwana lakgapasan chu katsi tuku tlan tlawaya (1 Sam. 16:7). Xlipulaktiy, kamatliwakglhti chuna la talalipina. Wa uma tuku tlawalh David akxni xlilakpuwan tuku xmasiyani tamalakatsukin xlakata Jehová (Sal. 8:3, 4; 139:14; Rom. 1:20). Chu xlipulaktutu, kaskini Jehová pi kamaxkin litliwakga. Akgtum liʼakxilhtit, komo tiku akxtum katapina kʼescuela likgalhkgamanankgoyan xlakata xtatayana Jehová wix, kaskini Jehová kʼoración pi kamakgtayan xlakata natayaniya. Nachuna, kalilatapa laktlan tastakyaw nema tekgsaw kxTachuwin, kkilikgalhtawakgakan chu kvideos. Akxni akxilha la makgtayayan Jehová xlakata natayaniya tuku tuwa titaxtuya, tlakg nalipawana. Chu akxni amakgapitsin naʼakxilhkgo pi lipawana Jehová, xlakan na nalipawankgoyan.

8, 9. 1) ¿Tuku makgtayalh David nakgalhkgalhi asta akxni xtsukulh mapakgsinan? 2) ¿Tuku tlan nakatsinikgo lakgkgawasan xlakata tuku titaxtulh David?

⁸ Kaʼakxilhwi tuku atanu tuwa titaxtulh David. Akxni xlaksakkanita xlakata mapakgsina xlitaxtulh, xtalakaskin akglhuwa kata xkgalhkgalhilh xlakata xtsukulh mapakgsinan (1 Sam. 16:13; 2 Sam. 2:3, 4). ¿Tuku makgtayalh nakgalhkgalhi? Ni wa lilakpuwa tuku tuwa xtitaxtuma, wata lilakpuwa tuku tlan xtlawalh. Akgtum liʼakxilhtit, akxni xlama niku xlamakgo filisteos xlakata xtsalapula, limaklakaskilh uma kilhtamaku xlakata nakatalatlawa xtalamakgasitsin Israel. Chuna makgtakgalhli niku xkichan xtiyat Judá (1 Sam. 27:1-12).

⁹ ¿Tuku tlan nakatsiniya xlakata tuku titaxtulh David? Pi lu xlakaskinka nalimaxtuya kilhtamaku xlakata naskujnaniya Jehová chu nakamakgtayaya minatalan. Kalilakpuwanti tuku titaxtulh chatum tala tiku wanikan Ricardo. * Akxni kgawasaku xwanit, xla precursor regular xlitaxtuputun, pero lakgkgolotsin wanikgolh pi nina xmakgatsi tuku xtalakaskin. Maski chuna, xla ni taxlajwanilh chu ni lisitsilh, wata limaxtulh kilhtamaku xlakata tlakg nalichuwinan Dios. Xla wan: «La uku kakxilha pi lu kimakgtayalh kkintakanajla xlakata xakkgalhi kilhtamaku. Lu kliskujli xlakata nakkalakgtaspitpara tiku tlakg xkatsiniputunkgo tuku masiya Biblia chu xlakata liwana nakkamasiyani. Chu asta wi tiku ktsukulh limakgalhtawakge Biblia. Akxni tlakg xaklichuwinan Dios, ni lu xakpekuan». La uku, Ricardo siervo ministerial chu lu tlan precursor regular litaxtu.

10. ¿Tuku tlawalh David akxni wi tuku lu xlakaskinka xlilaksakat xwanit?

¹⁰ Kalichuwinaw atanu tuku tuwa titaxtulh David. Akgtum kilhtamaku, akxni xla chu ksoldados xtsalanimakgolh Saúl, makgxtakgkgolh xfamiliaskan chu ankgolh talatlawanankgo. Pero makgapitsin xtalatlawananinkan ankgolh kxchikkan chu kachilinkgolh xfamiliaskan. David tlan xtilakpuwa pi komo xla chatum soldado xwanit tiku lu xkatsi talatlawanan wi tuku tlan xlakkaxwililh xlakata xʼalh kalakgmaxtu. Pero nichuna tlawalh, wata putsalh xtapulalit Jehová. Lakgalh sacerdote Abiatar xlakata nakgalhskin Jehová: «¿Kkastalani  umakgolh talatlawananin?». Jehová wanilh pi xkastalanilh chu pi tlan xʼama kitaxtuni (1 Sam. 30:7-10). ¿Tuku tlan nakatsiniyaw xlakata uma?

11. ¿Tuku tlan natlawaya akxni wi tuku nina laksaka?

¹¹ Kaputsa tastakyaw akxni wi tuku nina laksaka. Kakatakgalhchuwinanti minatlatni o lakgkgolotsin xalak congregación xlakata xlakan namaxkikgoyan laktlan tastakyaw. Jehová kalaksaknit lakgkgolotsin chu xla kalipawan, wix na tlan nakalipawana. Jehová kawilinit kcongregación xlakata akgtum “tamaskiwin” nalitaxtukgo (Efes. 4:8). Tlan tuku nalaksaka komo na nakgalhiya takanajla chuna la xlakan chu komo nalilatapaya tastakyaw nema xlakan namaxkikgoyan. La uku kaʼakxilhwi tuku tlan nakatsiniyaw xlakata xliʼakxilhtit mapakgsina Asá.

12. ¿Tuku tayat xkgalhi mapakgsina Asá akxni tsukulh mapakgsinan?

¹² Akxni kgawasaku xwanit, mapakgsina Asá xtaktuju chu ni xpekuan. Akgtum liʼakxilhtit, akxni xtlat nilh, Abías, wa Asá tsukulh mapakgsinan, chu kamasputulh ídolos nema xʼanankgo kpaís. Nachuna, “wanilh Judá pi xputsakgolh Jehová, xDioskan xnatlatnikan xalamakgasa chu xmakgantaxtikgolh limapakgsin” (2 Crón. 14:1-7). Chu akxni Zérah, chatum etíope, limilh akgtum ciento ksoldados xlakata natalatlawa Judá, Asá limasiyalh liskgalala chu skinilh xtamakgtay Jehová. Tasaskinilh: «Oh, Jehová, wix lakxtum kamakgtayaya tiku kgalhikgo litliwakga chu maski tiku ni lakgtliwakgan. Kakilamakgtayaw, Jehová kiDioskan, xlakata xlikana kkalipawanan». Umakgolh tachuwin limasiya pi Asá lu xlipawan Jehová, xlipawan pi Jehová xʼama kalakgmaxtu xla chu xkachikin. Chuna Asá lipawa xTlat xalak akgapun, chu «Jehová kamasputulh etíopes» (2 Crón. 14:8-12).

13. ¿Tuku akgspulalh Asá, chu tuku xlakata?

¹³ Xlikana pi lu tuwa xwanit akxni akgtum millón soldados minkgolh talatlawakgo Judá. Pero xlakata Asá lipawa Jehová, tlan kitaxtunilh. Titaxtulh kilhtamaku, titaxtupa tuku tuwa. Xaluku mapakgsina xalak Israel, Baasá milh talatlawa. Maski uma ni lu tuwa kitaxtulh, Asá tlawalh tuku lu nitlan, ni skinilh xtamakgtay Jehová, wata skinilh tamakgtay mapakgsina xalak Siria. Uma lu nitlan kitaxtunilh. Jehová maklakaskilh xpalakachuwina Hananí xlakata nawani Asá: «Xlakata  lipawanti mapakgsina xalak Siria chu ni lipawanti miDios Jehová, kamakgatsala ksoldados mapakgsina xalak Siria». Lata uma kilhtamaku, putum kxtamapakgsin Asá analh guerra (2 Crón. 16:7, 9; 1 Rey. 15:32).

14. 1) ¿La tlan nalimasiyaya pi lipawana Jehová? 2) Chuna la wan 1 Timoteo 4:12, ¿tuku tlan nakitaxtuniyan komo chuna natlawaya?

¹⁴ ¿Tuku tlan nakatsiniya xlakata xliʼakxilhtit Asá? Pi putum kilhtamaku talakaskin nalimasiyaya tataktujut chu nalipawana Jehová. Akxni tamunu, limasiya pi xkanajlaniya chu xlipawana. Chu xla makgamakglhtinan xlakata xmakgtapakgsi kxfamilia. ¡Lu lanka talakgalhaman! Pero talakaskin pi chuntiya nalipawana Jehová. Akxni pimpat laksaka tuku lu xlakaskinka kmilatamat max ni tuwa katimakgkatsi chuna natlawaya, pero xlakaskinka pi chuna natlawaya xliputum tuku nalaksaka. Akxni nalaksaka tuku nalilakgastanana, tuku taskujut namakglhtinana chu tuku lakgchipimputuna kmilatamat. Ni kalipawanti miliskgalala, kaputsa xtastakyaw Biblia nema namakgtayayan tlan tuku nalaksaka chu kalilatapa (Prov. 3:5, 6). Chuna namakgapaxuwaya Jehová chu natalan namaxkikgoyan kakni (kalikgalhtawakga 1 Timoteo 4:12).

15. Chuna la wan 2 Crónicas 18:1-3 chu 19:2, ¿tuku nitlan tlawalh mapakgsina Jehosafat?

¹⁵ Xlikana, xtachuna la putum akinin, wix na makglakgalhina chu namin kilhtamaku natlawaya tuku nitlan. Pero ni xlilat pi uma namachokgoyan xlakata natlawaya putum tuku matlaniya xlakata naskujnaniya Jehová. Kalilakpuwanti tuku titaxtulh mapakgsina Jehosafat. Xla xkgalhi lhuwa laktlan tayat. Lata akxni tsukulh mapakgsinan, «putsalh xDios xtlat chu makgantaxtilh xlimapakgsin». Na kamalakgachalh príncipes kJudá xlakata xkamasiyanikgolh kachikin xlakata Jehová (2 Crón. 17:4, 7). Pero maski tlan xlikatsi, milh kilhtamaku Jehosafat laksakli tuku nitlan. Chu xlakata uma, Jehová wi tiku laksakli xlakata nastakyawa (kalikgalhtawakga 2 Crónicas 18:1-3; 19:2). Kaʼakxilhwi tuku tlan nakatsiniyaw xlakata tuku titaxtulh Jehosafat.

16. ¿Tuku masiyaniyan xlakata tuku titaxtulh Rajeev?

¹⁶ Lu xlakaskinka pi namakgamakglhtinana chu namakgantaxtiya tastakyaw nema namaxkikana. Makgapitsin tiku lakgkgawasanku lu tuwa makgkatsikgo wa tlakg xlakaskinka naliʼakxilhkgo kxlatamatkan naskujnanikgo  Jehová. Max wix nachuna makgkatsiya. Pero ni kataxlajwani. Kalilakpuwanti tuku titaxtulh chatum tala tiku wanikan Rajeev. Xla lilakpuwan akxni aktsujku xwanit chu wan: «Umakgolh kata xakmakgkatsi pi nila tuku xaktlawa. Xtachuna la amakgapitsin tiku lakgkgawasanku, wa tlakg xlakaskinka xakakxilha takgaman chu naklipaxuwa kilatamat nixawa xakkalh ktamakxtumit o xaklichuwinalh Dios». ¿Tuku makgtayalh? Xla wan pi chatum kgolotsin limasiyanilh tapaxkit akxni stakyawalh, xla wan: «Kimakgtayalh naklilakapastaknan tastakyaw nema lichuwinan 1 Timoteo 4:8». Rajeev tataktujulh chu makgamakglhtinalh uma tastakyaw, chu liwana lilakpuwa tuku tlakg xlakaskinka xwanit kxlatamat. Xla lichuwinan: «Klakpuwa pi wa pulana nakwili kkilatamat tuku xla kintakanajla». Xla kinkalitachuwinanan tuku tlan kitaxtunilh: «Makgapitsi kata lata xkimaxkikanit uma tastakyaw, kmakgatsilh tuku talakaskin xlakata siervo ministerial xaklitaxtulh».

17. ¿La kaʼakxilhkgo lakgkgawasan tiku skujnanikgo Jehová natalan tiku laklankata?

¹⁷ Kgawasa, natalan tiku laklankata xalak congregación lanka xtapalh akxilhkgo pi akxtum kataskujnaniya Jehová (Sof. 3:9). Lu lakgatikgo akxilhkgo pi xatapaxuwan makgantaxtiya taskujut nema lakgayawakana. Maxkikgoyan kakni chu lipawankgoyan (1 Juan 2:14).

18. Chuna la wan Proverbios 27:11, ¿la kaʼakxilha Jehová lakgkgawasan tiku skujnanikgo?

¹⁸ Kgawasa, nikxni kapatsankga pi Jehová paxkiyan chu lipawanan. Xla lata makgasa tiwa pi kxaʼawatiya kilhtamaku xʼamakgo tawilakgo lhuwa lakgkgawasan tiku xatapaxuwan xʼamakgo skujnanikgo (Sal. 110:1-3). Xla katsi pi paxkiya chu maxkiputuna tuku tlakg tlan kgalhiya. Wa xlakata, kakalimasiyani amakgapitsin pi kgalhkgalhinana chu ni kamalakatsali tuku natlawaputuna. Akxni natlawaya tuku nitlan, kamakgamakglhtinanti tuku nawanikgoyan amakgapitsin chu akxni nastakyawakana. Kalakapastakti pi wa Jehová tiku stakyawaman (Heb. 12:6). Liwana kamakgantaxti taskujut nema nalakgayawakana. Chu tuku tlakg xlakaskinka, kaliskujti xlakata namakgapaxuwaya minTlat xalak akgapun (kalikgalhtawakga Proverbios 27:11).