1. ¿Tuku xlakata Jesús skinilh Jehová pi xkakuentajtlawalh kstalaninanin?

XAʼAWATIYA katsisni akxni latamalh kKatiyatni, Jesús lilakpuwa tuku tuwa xʼamakgo titaxtukgo kstalaninanin. Xlakata xkapaxki, Jesús skinilh xTlat pi xkakuentajtlawalh xlakata nitu xkatlawanilh Satanás (Juan 17:14, 15). Xla xkatsi pi akxni xtaspitli kʼakgapun, Satanás chuntiya xʼama lakputsa la xkatlawanilh tuku nitlan tiku lakskujnaniputunkgo Jehová. Uma limasiya pi xkachikin Jehová xʼama maklakaskin tamakgtay.

2. ¿Tuku likatsiyaw pi Jehová nakgalhti kioracioneskan?

² Jehová kgalhtilh xʼoración xKgawasa xlakata lu paxki. Komo akinin lu naliskujaw xlakata namakgapaxuwayaw Jehová, xla na nakinkapaxkiyan chu nakinkakgalhtiyan akxni naskiniyaw pi kakinkamakgtayan chu kakinkakuentajtlawan. Xlakata xla xapaxkina Tlat, putum kilhtamaku kakuentajtlawa xkamanan. Komo nichuna xtlawalh, ni xmalankilh chu xmaxkajwilh xtukuwani.

3. ¿Tuku xlakata maklakaskinaw pi Jehová nakinkakuentajtlawayan?

³ La uku, tlakg maklakaskinaw pi Jehová nakinkakuentajtlawayan. Satanás tamakxtukanit kʼakgapun chu «lu sitsinit» (Apoc. 12:12). Tlawanit pi makgapitsi latamanin nalakpuwankgo pi akxni kinkaputsastalanikgoyan “makamaxkimakgolh Dios xasanto taskujut” (Juan 16:2). Amakgapitsin, tiku ni kanajlanikgo Dios, kinkaputsastalanikgoyan xlakata akinin nichuna likatsiyaw la latamanin xalak kakilhtamaku. Maski chuna, ni pekuanaw, xlakata Biblia wan: «Malana ni makgxtakgnan chu nakamatliwakglhan chu nakamakgtayayan xlakata nitu nakatlawaniyan Tiku lixkajni likatsi» (2 Tes. 3:3). Kaʼakxilhwi pulaktiy la kinkakuentajtlawayan Jehová.

4. Chuna la wan Efesios 6:13-17, ¿tuku kinkamaxkiyan Jehová xlakata nalitamakgtayayaw?

⁴ Jehová kinkamaxkiyan litamakgtay xaʼespiritual nema tlan nakinkamakgtayayan xlakata nitu nakinkatlawaniyan Satanás (kalikgalhtawakga Efesios 6:13-17). Uma litamakgtay lu tliwakga, pero kajwatiya tlan nakinkamakgtayayan komo xatakgatsin nalinaw. Kalichuwinaw tuku kilhchanima pulakatunu uma.

5. ¿Tuku kilhchanima litatampulakgchikan xaxlikana, chu tuku xlakata nalitatampulakgchiyaw?

⁵ Litatampulakgchin xaxlikana kilhchanima xaxlikana nema tatekgsa kxTachuwin Dios, kBiblia. ¿Tuku xlakata nalitatampulakgchiyaw xaxlikana? Xlakata Satanás wa «xtlat taʼakgsanin» (Juan 8:44). Akglhuwata mil kata la kaʼakgskgawima «putum tiku lamakgolh kkatiyatni» (Apoc. 12:9). Pero xaxlikana nema tatekgsa kBiblia kinkamakgtayayan xlakata ni nakinkaʼakgskgawiyan. ¿La nalitatampulakgchiyaw xaxlikana? Nakatsiniyaw xaxlikana xlakata Jehová, nakakninaniyaw chu nakanajlayaw pi lama, chu “akgstitum nalatamayaw putum kilhtamaku” (Juan 4:24; Efes. 4:25; Heb. 13:18).

6. ¿Tuku kilhchanima litakuxmumakgtayakan tuku xaʼakgstitum, chu tuku xlakata namaklakaskinaw?

⁶ Litakuxmumakgtay xaʼakgstitum kilhchanima xaʼakgstitum xlimapakgsin Jehová. ¿Tuku xlakata namaklakaskinaw? Xlakata, xtachuna la litamakgtaya chatum soldado xlitakuxmumakgtay, litakuxmumakgtayakan tuku xaʼakgstitum kinkamakgtayayan xlakata xtalakapastakni uma kakilhtamaku ni nalaktlawa kinakujkan, nema kilhchanima chuna la likatsiyaw (Prov. 4:23). Jehová kinkalimapakgsiyan pi kapaxkiw chu pi kalakskujnaniw xliputum kinakujkan (Mat. 22:36, 37). Wa xlakata, Satanás mapapitsiputun kinakujkan, tlawaputun pi kapaxkiw tuku malaknu kakilhtamaku nema Jehová xkajni (Sant. 4:4; 1 Juan 2:15, 16). Chu komo nila katitlawalh pi kakgalhakgaxmatmakgaw xlimapakgsin Jehová, fuerza nakinkamatlawiputunan.

7. ¿La litakuxmumakgtayayaw tuku xaʼakgstitum?

⁷ Litakuxmumakgtayayaw xaʼakgstitum akxni lilatamayaw tuku Jehová wan pi tlan chu tuku nitlan (Sal. 97:10). Max wi tiku nalakpuwankgo pi lilatamakan xlimapakgsin Jehová ni kinkamaxkiyan talakaskin natlawayaw tuku tlawaputunaw. Pero, komo nialh nalilatamayaw xtastakyaw Biblia, nalitaxtuyaw xtachuna la chatum soldado tiku nialh maklakaskin tuku litakuxmumakgtaya akxni anit kʼguerra xlakata lakpuwan pi lu tsinka. ¿Nixlikana pi ni xlimasiyalh liskgalala? Tiku paxkiyaw Jehová, ni akgtum takuka liʼakxilhaw xlimapakgsin, wata liʼakxilhaw pi kinkalakgmaxtuyan (1 Juan 5:3).

8. ¿Tuku kilhchanima nalitatununanaw xalaktlan tamakatsinin xpalakata takaksni?

⁸ Pablo na lichuwinalh pi lu xlakaskinka natatununanaw xlakata tunkun nalichuwinanaw xalaktlan tamakatsinin xpalakata takaksni. Uma wamputun pi putum kilhtamaku nalichuwinanaw xlakata Tamapakgsin. Akxni kalitachuwinanaw amakgapitsin xlakata tamakatsinin xalak Biblia, kintakanajlakan tatliwakglha. Lu kinkamakgpuwantiniyan akxni akxilhaw pi xlakskujnin Jehová tiku wilakgolh kxlikalanka katiyatni maklakaskinkgo kaxatukawa kilhtamaku xlakata nalichuwinankgo xalaktlan tamakatsinin. Akgtum liʼakxilhtit, lichuwinankgo kxputaskujutkan, kʼescuela, niku stanankan, kʼakgatunu chiki, akxni ankgo tamawanankgo, akxni kalakgapaxialhnankgo xtalilakgapasnikan tiku ni xtatayananin Jehová o akxni katachuwinankgo tiku kalakgapaskgo, chu asta akxni nila taxtukgo kxchikkan. Komo nialh xlichuwinaw Dios xlakata pekuanaw, lu nitlan xkitaxtulh. Xlitaxtuw chuna la chatum soldado tiku tatuxtu xtatunu akxni anit kʼguerra: lakapala xmakgawika, tuwa xmakgkatsilh nalakgapaxtokga tuku nitlan xtlawaniputulh xtalatlawana chu nila xtlawalh tuku limapakgsi tiku pulalin.

9. ¿Tuku xlakata xlakaskinka namaklakaskinaw lanka escudo xla takanajla?

 ⁹ Lanka escudo xla takanajla kilhchanima takanajla nema kgalhiniyaw Jehová. Lipawanaw pi xla namakgantaxti putum tuku malaknunit. Uma takanajla tlan nalimamixiyaw «xalakgpasani xflechas Satanás». Talakaskin namaklakaskinaw uma escudo xlakata nakinkamakgtayayan ni nakinkaliʼakgskgawikgoyan xtamasiykan apóstatas chu ni nataxlajwaniyaw akxni amakgapitsin nakinkalikgalhkgamanankgoyan xlakata tuku kanajlayaw. Komo ni xkgalhiw takanajla, ni xkgalhiw litliwakga xlakata nakgalhakgaxmataw Jehová akxni amakgapitsin nakinkamatlawiputunkgoyan tuku lakatsala xlimapakgsin. Pero akxni kgalhmakgtayayaw tuku kanajlayaw kkimputaskujtkan o kʼescuela, escudo xla takanajla kinkamakgtayaman (1 Ped. 3:15). Akxni ni makglhtinanaw akgtum taskujut niku tlakg xkinkaxokgonikan pero ni xkinkamaxkin talakaskin tlakg naskujnaniya Jehová, escudo xla takanajla kinkamakgtayaman (Heb. 13:5, 6). Chu akxni ni makgxtakgaw Dios maski kinkaputsastalanikanan, escudo xla takanajla kinkamakgtayaman (1 Tes. 2:2).

10. ¿Tuku kilhchanima takgalhkgalhin xlakata lakgtaxtut nema xtachuna la akgtum takgnu xalikan, chu tuku xlakata nakgalhiyaw?

¹⁰ Takgalhkgalhin xlakata lakgtaxtut nema xtachuna la akgtum takgnu xalikan wa takgalhkgalhin  nema kinkamaxkiyan Jehová, takgalhkgalhin xlakata nakinkalakgmaxtuyan kkalinin chu nakamaxki xtatlajakan tiku tlawakgo xtalakaskin (1 Tes. 5:8; 1 Tim. 4:10; Tito 1:1, 2). Chuna la akgtum takgnu xalikan makgtaya xʼakgxakga chatum soldado, takgalhkgalhin xla lakgtaxtut makgtaya kintalakapastaknikan. ¿La tlawa? Kinkamakgtayayan kajwatiya nalilakpuwanaw xtamalaknun Dios chu naʼakxilhaw tuku tuwa titaxtuyaw chuna la xlilat. ¿La limasiyayaw pi kgalhiyaw uma takgalhkgalhin xlakata lakgtaxtut nema xtachuna la akgtum takgnu xalikan? Akxni liskujaw xlakata nalakapastaknanaw chuna la Jehová. Akgtum liʼakxilhtit, ni lipawanaw «tuku lhuwa xtapalh nema nalakgsputkgo, wata wa Dios» lipawanaw (Sal. 26:2; 104:34; 1 Tim. 6:17).

11. ¿Tuku kilhchanima espada xla espíritu, chu tuku xlakata namaklakaskinaw?

¹¹ Espada xla espíritu wa xTachuwin Dios, Biblia. Uma espada kgalhi litliwakga xlakata nakinkamakgtayayan naʼakxilhaw tuku taʼakgsanin litaxtu chu xlakata nakalakgmaxtu latamanin knixaxlikana tamasiy chu nixatlan talismanin (2 Cor. 10:4, 5; 2 Tim. 3:16, 17; Heb. 4:12). Katsiniyaw liwana maklakaskinaw akxni kiʼakstukan kgalhtawakgayaw chu akxni litamakgtayayaw tuku kinkamasiyaniyan xkachikin Dios (2 Tim. 2:15). Pero litamakgtay xaʼespiritual ni kajwatiya tamakgtay nema kinkamaxkiyan Jehová. Kaʼakxilhwi atanu tuku kinkalimakgtayayan.

12. ¿Tuku atanu maklakaskinaw, chu tuku xlakata?

¹² Chatum soldado tiku lu katsini talatlawanan kʼguerra katsi pi nila xʼakstu katitlajanalh, maklakaskin xtamakgtaykan xcompañeros. Nachuna, nila kiʼakstukan katitlajaw Satanás chu tiku tatayakgo; maklakaskinaw xtamakgtaykan kinatalankan. Jehová kamaklakaskin kinatalankan tiku wilakgolh kxlikalanka katiyatni xlakata nakinkamakgtayayan (1 Ped. 2:17).

13. Chuna la wan Hebreos 10:24, 25, ¿la kinkamakgtayayan tamakxtumit?

¹³ Makglhtinanaw xtamakgtaykan kinatalankan akxni anaw ktamakxtumit (kalikgalhtawakga Hebreos 10:24, 25). Kimputumkan min kilhtamaku taxlajwaniyaw. Pero ¿nixlikana pi akxni anaw ktamakxtumit tlakg tlan makgkatsiyaw? Xtakgalhtinkan nema mastakgo kinatalankan lu kinkamakgpuwantiniyan, chu liʼakxilhtit chu taʼakgchuwin nema tamatitaxti anta kinkamatliwakglhan xlakata chuntiya naskujnaniyaw Jehová. Nachuna, akxni katakgalhchuwinanaw kinatalankan akxni nina tsuku chu akxni sputa tamakxtumit lu kinkamatliwakglhan (1 Tes. 5:14). Tamakxtumit nachuna kinkamaxkiyan talakaskin nakamakgtayayaw amakgapitsin, chu uma lu kinkamakgapaxuwayan (Hech. 20:35; Rom. 1:11, 12). Pero ni kajwatiya uma. Anta katsiniyaw la nalichuwinanaw Dios chu la tlakg tlan namasiyayaw. Akgtum liʼakxilhtit, kinkamasiyanikanan la tlan nakamaklakaskinaw kilikgalhtawakgakan chu videos nema makgtanuma kkit de enseñanza. Wa xlakata, liwana kalakkaxwiliw tuku naʼakxilhkan ktamakxtumit, kuentajkatlawaw tuku lichuwinankan anta chu kalilatamaw tuku katsiniyaw. Komo natlawayaw putum uma, liwana nakatsiyaw tuku natlawayaw chu xatlan “ksoldados Cristo” nalitaxtuyaw (2 Tim. 2:3).

14. ¿Tuku atanu tamakgtay kgalhiyaw?

¹⁴ Na kgalhiyaw xtamakgtaykan lhuwa millones ángeles tiku lu lakgtliwakgan. Katsiyawa tuku tlan tlawa kaj chatum ángel, ¿tlan lilakpuwanaw tuku max natlawakgo lhuwa ángeles? (Is. 37:36). Ni anan nipara chatum chixku chu nipara chatum demonio tiku tlan nakamakgatlaja ksoldados Jehová. Akgtum kilhtamaku lichuwinanka pi, maski kiʼakstukan wilaw, komo Jehová kinkatawilan, niti kintikatlajan; tlakg lhuwa litaxtuyaw nixawa kintalatlawanakan, maski xlakan lu lhuwa tasiyakgo (Juec. 6:16). ¡Uma lu xlikana! Putum kilhtamaku kalakapastakwi uma akxni makgkatsiyaw pi nialh kgalhiyaw litliwakga xlakata tuku  tlawakgo o tuku wankgo tiku akxtum kataskujaw, tiku akxtum kataʼanaw kʼescuela, o chatum kintalilakgapasnikan tiku ni xtatayana Jehová. Kalakapastakwi pi ni kiʼakstukan talatlawanamaw; Jehová kinkamakgtayaman.

15. Chuna la wan Isaías 54:15, 17, ¿tuku xlakata nila tiku tlawa pi xlakskujnin Dios nialh nalichuwinankgo xTachuwin?

¹⁵ Pulaklhuwa tuku xlakata xkakilhtamaku Satanás kinkasitsiniyan. Ni makgtanuyaw kpolítica chu ni makgtlawayaw guerra. Masiyayaw xtukuwani Dios, lichuwinanaw pi kajwatiya xTamapakgsin Dios nalimin takaksni chu kgalhakgaxmataw xaʼakgstitum xlimapakgsin. Masiyayaw pi xmapakgsina uma kakilhtamaku xaʼakgsanina chu nitlan likatsi (Juan 8:44). Chu na lichuwinanaw pi uma kakilhtamaku nialh makgas namalakgsputukan. Pero Satanás chu tiku tatayakgo nila katitlawakgolh pi nialh nalichuwinanaw Dios. Wata chuntiya namalankiyaw Jehová chuna la matlaniyaw. Maski Satanás lu tliwakga, nila tlawanit pi putum latamanin tiku wilakgo kxlikalanka katiyatni ni nakgaxmatkgo tamakatsinin xla Tamapakgsin. Uma masiya pi Jehová kinkakuentajtlawaman (kalikgalhtawakga Isaías 54:15, 17).

16. ¿La nalakgmaxtu Jehová xkachikin akxni lama nawan lhuwa tapatin?

¹⁶ ¿Tuku nala kkilhtamaku nema aku mima? Akxni lama nawan lhuwa tapatin, Jehová pulaktiy la nakinkalakgmaxtuyan. Pulana, nakalakgmaxtu xlakskujnin tiku ni makgxtakgkgo akxni «mapakgsinanin xalak katiyatni» namalakgsputukgo xaLanka Babilonia, putum nixaxlikana takanajla xalak kakilhtamaku (Apoc. 17:16-18; 18:2, 4). Chu xlipulaktiy, nalakgmaxtu xkachikin akxni namalakgsputu xkakilhtamaku Satanás anta kʼArmagedón (Apoc. 7:9, 10; 16:14, 16).

17. ¿Tuku xlakata tlan nakitaxtu komo lakatsu natawilaniyaw Jehová?

¹⁷ Komo lakatsu wilaniw Jehová, Satanás nila tuku kintikatlawanin. Wata xla putum kilhtamaku namalakgsputukan (Rom. 16:20). Wa xlakata kalilhakganaw tuku litakgatsi litamakgtay xaʼespiritual chu nikxni katamakgxtuw. Ni kiʼakstukan katalatlawanaw, kakamakgtayaw kinatalankan chu katlawaw tuku kinkalimapakgsiyan Jehová. Komo chuna natlawayaw, liwana kakatsiw pi kinTlatkan xalak akgapun nakinkamatliwakglhan chu nakinkakuentajtlawayan (Is. 41:10).