Makgapitsi kstalaninanin Cristo maklakaskinkgo celulares chu Internet xlakata nakatachuwinankgo xfamiliajkan chu amakgapitsin xtatayananin Jehová. Xlikana, natalan tiku tliwakga kgalhikgo xtakanajlakan kuenta tlawakgo uma tastakyaw: «Skgalala tiku tatsekga akxni akxilha tuku nitlan, pero tiku xalak tonto ni tachokgokgo chu alistalh lipatinankgo» (Prov. 27:12).

Katsiyaw pi Jehová kinkakuentajtlawaputunan. Wa xlakata, ni akxtum katalayaw latamanin tiku mapapitsiputunkgo congregación, tiku katamakxtukanit o tiku masiyakgo tuku nixaxlikana (Rom. 16:17; 1 Cor. 5:11; 2 Juan 10, 11). Max makgapitsin tiku kinkatatamakxtumikgoyan kcongregación ni kgalhakgaxmatkgo xtastakyaw Biblia (2 Tim. 2:20, 21). Ni tuwa makgkatsiyaw nakalaksakaw tiku kiʼamigoskan nakalimaxtuyaw akxni kaʼakxilhaw latamanin, pero tlakg tuwa kitaxtu akxni katachuwinanaw latamanin kmensajes.

Komo lakpuwamaw namakgtanuyaw kʼakgtum lanka grupo niku latachuwinankan kmensajes, kalilakpuwaw tiku latamanin nakatachuwinanaw. Makgapitsi natalanin makgtanukgonit kʼumakgolh grupos chu lu nitlan kakitaxtuninit. Pero ¿la tlan kuenta natlawayaw tiku katachuwinanaw komo kʼuma grupo anankgo lhuwa latamanin? Nila xkatsiw tiku katachuwinanaw chu la wilakgolh xtakanajlakan. Salmo 26:4 wan: «Ni kkatalalin tiku lakgatikgo akgskgawinankgo chu kkatapanuni tiku lakgaputiyunankgo». Nalimasiyayaw liskgalala komo kajwatiya nakatachuwinanaw latamanin tiku kalakgapasaw.

Asta kʼgrupos nema tlakg laktsu, kuenta kilitlawatkan kilhtamaku nema limaxtuyaw xlakata namalakgachayaw mensajes chu tuku talichuwinama anta. Ni kililakpuwanatkan pi kilikgalhtitkan putum mensajes nema kinkamalakgachanikanan, maski kaxatukawa tuku lichuwinamaka chu maski lhuwa kilhtamaku latachuwinamaka. Pablo wanilh Timoteo pi kuenta xtlawalh ni akxtum nakatala latamanin tiku “kalichuwinankgo amakgapitsi chu makgtanukgo kxlatamatkan” (1 Tim. 5:13). La uku, uma max nachuna nala kʼInternet.

Kstalaninanin Cristo tiku tliwakga kgalhikgo xtakanajlakan ni makgtanukgo ktakgalhchuwin niku kalichuwinankan amakgapitsin o lichuwinankan tuku ni xlikatsitkan amakgapitsi (Sal. 15:3; Prov. 20:19). Ni kgaxmatputunkgo chu ni lichuwinamputunkgo tamakatsinin nema nila tamakanajli o nema ni liwana katsikan komo xlikana lanit (Efes. 4:25). Makglhtinanaw liwat xaʼespiritual o lhuwa tamakatsinin nema tlan lipawankan anta kkisitiojkan xla Internet jw.org chu kprogramas nema taxtukgo akgatunu papaʼ xla JW Broadcasting^®.

Makgapitsin xtatayananin Jehová maklakaskinkgo aplicaciones xla mensajes xlakata nastanankgo, natamawanankgo chu namalaknukgo tuku stakgo, o xlakata namalaknukgo taskujut. Uma makgtanuma kxtaskujutkan chu ni xlimakgtanut kkintakakninkan. Kstalaninanin Cristo tiku lu liskujkgo xlakata “ni lu nakgalhiputunkgo tumin” ni kamaklakaskinkgo xnatalankan kaj xlakata nalitlajakgo tumin (Heb. 13:5).

¿Chu tuku tlan nawanaw xlakata nakamaklakaskinaw umakgolh aplicaciones xlakata naskinaw tumin chu nakalimakgtayakan natalan tiku maklakaskinkgo? ¿O naskinaw tumin xlakata nalimakgtayanankan niku lalh tuku masputunan? Xlakata kapaxkiyaw kinatalankan, kalilakgaputsayaw chu wa xlakata kamakgpuwantiniyaw chu kamakgtayayaw akxni maklakaskinkgo (Sant. 2:15, 16). Pero komo chuna natlawaputunaw akxni nalimaklakaskinaw akgtum lanka grupo niku malakgachakan mensajes, max uma xtlawalh pi nila liwana xmakgantaxtika taskujut nema lakkaxwilikan ksucursal o nema lakkaxwilikgo lakgkgolotsin xalak congregación (1 Tim. 5:3, 4, 9, 10, 16). Chu, xlikana, nipara chatum kstalanina Cristo tlawaputun pi amakgapitsin nalakpuwankgo pi wa lakgayawakanit nakakuentajtlawa natalan.

Lakaskinaw pi putum tuku natlawayaw namalanki Jehová (1 Cor. 10:31). Wa xlakata, akxni nalaksakaw komo namaklakaskinaw akgtum aplicación niku malakgachakan mensajes o atanu, pulana kalilakpuwaw tuku max nitlan nakitaxtu chu kalimasiyaw liskgalala.