1. ¿Tuku makgtanu chuna la likatsiyaw?

 MASKI makgasa o nina makgas la tamununitaw, putum akinin kgalhiputunaw tayat nema namakgapaxuwa Jehová. Xlakata namakgantaxtiyaw, talakaskin namachokgoyaw tuku lakpuwanaw. ¿Tuku xlakata? Xlakata tuku lakpuwanaw makgtanu la likatsiyaw. Komo ankgalhin nalilakpuwanaw tuku lipaxuwaputun kimaknikan, nawanaw chu natlawayaw tuku nitlan (Efes. 4:17-19). Pero komo nalimatsamayaw kintalakapastaknikan tuku tlan, nachuwinanaw chu nalikatsiyaw chuna la lakgati kinTlatkan Jehová (Gál. 5:16).

2. ¿Tuku takgalhskinin nakgalhtiyaw kʼuma artículo?

² Chuna la akxilhwi kxapulana artículo, min kilhtamaku lakpuwanaw tuku nitlan. Pero tlan nalaksakaw ni natlawayaw tuku nitlan. Akxni nina tamunuyaw, talakaskin pi nialh nachuwinanaw chu nialh natlawayaw tuku Jehová xkajni. Wa uma tuku xapulana chu tlakg xlakaskinka nema kilitlawatkan xlakata nalakgmakganaw xamakgan tayat. Pero komo xlikana makgapaxuwaputunaw Jehová, na talakaskin pi nakgalhakgaxmataw uma limapakgsin: «Kakgalhitit xasasti tayat» (Col. 3:10). Kʼuma artículo, nakgalhtiyaw umakgolh takgalhskinin: ¿tuku kilhchanima «xasasti tayat»? chu ¿la nakgalhiyaw chu nikxni namakgxtakgaw?

3. ¿Tuku kilhchanima «xasasti tayat», chu la lilhakgananaw? (Gálatas 5:22, 23).

³ «Xasasti tayat» kilhchani lakpuwankan chu likatsikan chuna la Jehová. ¿Chu la nakgalhiyaw uma tayat? Namastayaw talakaskin pi tayat nema masta espíritu santo nalakgpali kintalakapastaknikan,  tuku makgkatsiyaw chu la likatsiyaw (kalikgalhtawakga Gálatas 5:22, 23). Akgtum liʼakxilhtit, lataman tiku kgalhi «xasasti tayat» paxki Jehová chu xlakskujnin (Mat. 22:36-39). Chuntiya paxuwa maski titaxtu tuku tuwa (Sant. 1:2-4). Makgtayanan xlakata naʼanan takaksni (Mat. 5:9). Kgalhkgalhinan chu tlan kalikatsini amakgapitsin (Col. 3:13). Paxki chu tlawa tuku tlan (Luc. 6:35). Tuku tlawa limasiya pi kgalhini akgtum tliwakga takanajla xTlat xalak akgapun (Sant. 2:18). Maski amakgapitsin makgasitsiputunkgo machokgo xtasitsi (Tito 3:2). Chu ni tlawa tuku nitlan matlawiputunkan (1 Cor. 9:25, 27).

4. ¿Tuku xlakata kilikgalhitkan putum tayat nema lichuwinan Gálatas 5:22, 23?

⁴ Xlakata nakgalhiyaw xasasti tayat, kilikgalhitkan tayat nema talichuwinan kʼGálatas 5:22, 23 chu nema talichuwinan kmakgapitsi textos xalak Biblia. * Umakgolh tayat ni xtachuna tanu tanu lhakgat nema lhakgayaw, wata wi tuku lakxtum katlawa. Akgtum liʼakxilhtit, komo xlikana kapaxkiyaw amakgapitsin, nakakgalhkgalhiyaw chu tlan nakalikatsiniyaw. Chu xlakata xlikana tlan nalikatsiyaw, ni lakapala kilisitsitkan chu namachokgoyaw tuku nitlan tlawaputunaw.

5. ¿Tuku kilhchanima kgalhikan «xtalakapastakni Cristo», chu tuku xlakata kilikatsinitkan xlakata xlatamat Jesús? (1 Corintios 2:16).

⁵ (Kalikgalhtawakga 1 Corintios 2:16). Xlakata nakgalhiyaw xasasti tayat, talakaskin nakgalhiyaw «xtalakapastakni Cristo», uma wamputun, pi kilikatsinitkan la lakapastaknan Jesús chu chuna tlan nastalaniyaw xliʼakxilhtit. Jesús liwana limasiya tayat nema masta espíritu santo. Chuna la akgtum espejo xla liwana limasiya xtayat Jehová (Heb. 1:3). Komo nalakpuwanaw chuna la Jesús, tlan nalikatsiyaw la xla chu nakgalhiyaw tayat nema kgalhi (Filip. 2:5).

6. ¿Tuku kililakapastakatkan akxni liskujaw xlakata nakgalhiyaw xasasti tayat?

⁶ ¿Xlikana tlan nastalaniyaw xliʼakxilhtit Jesús? Max wix nalakpuwana: «Jesús ni kgalhi talakgalhin. ¡Nikxni la ktimakgalakgchalh!». Komo chuna lakpuwana, kalakapastakti umakgolh pulaktutu. Pulana, wix malakatsukikanita xlakata nalikatsiya chuna la Jehová chu Jesús. Wa xlakata tlan nalaksaka  komo nastalaniya xliʼakxilhtitkan chu namakgantaxtiya chuna la matlaniya (Gén. 1:26). Xlipulaktiy, xʼespíritu santo Dios wa litliwakga nema ni anan xtachuna. Xlakata xtamakgtay, wix tlan natlawaya tuku miʼakstu nila xtlawa. Xlipulaktutu, Jehová ni kgalhkgalhi pi kalimasiyaw tayat nema masta espíritu santo chuna la tiku ni kgalhi talakgalhin. Kalilakpuwanti pi xapaxkina kintlatkan nakamaxki 1,000 kata tiku kgalhkgalhimakgo nalatamakgo kKatiyatni xlakata nialh nakgalhikgo talakgalhin (Apoc. 20:1-3). Tuku Jehová kgalhkgalhi la uku wa pi lu kaliskujwi chu kalipawaw pi xla nakinkamakgtayayan.

7. ¿Tuku naʼakxilhaw la uku?

⁷ ¿La liwana nastalaniyaw xliʼakxilhtit Jesús? Nalichuwinanaw pulaktati tayat nema masta xʼespíritu santo Dios. Naʼakxilhaw pulakatunu la Jesús limasiyalh umakgolh tayat chu tuku tlan nakatsiniyaw. Na naʼakxilhaw makgapitsi takgalhskinin nema nakinkamakgtayakgoyan nakatsiyaw komo talakaskin wi tuku nalakgpaliyaw xlakata tlakg tlan nalimasiyayaw xasasti tayat.

8. ¿La limasiyalh Jesús xtapaxkit?

⁸ Xlakata Jesús lu paxki Jehová makgpuwantinilh wi tuku natlawa xpalakata chu kimpalakatakan (Juan 14:31; 15:13). Chu chuna la lilh xlatamat akxni latamalh kKatiyatni limasiyalh tapaxkit nema xkakgalhini latamanin. Ankgalhin limasiyalh tapaxkit chu talakgalhaman, na kalimasiyanilh uma tayat tiku ni xʼakxilhputunkgo. Limasiyalh uma tapaxkit akxni kalitachuwinalh latamanin xlakata xTamapakgsin Dios (Luc. 4:43, 44). Na limasiyalh pi lu xpaxki Dios chu xkapaxki latamanin akxni mastalh talakaskin pi namapatinikan chu namakgnikan. Chuna kinkamaxkin takgalhkgalhin xlakata nalatamayaw putum kilhtamaku.

9. ¿La tlan nalimasiyayaw tapaxkit chuna la tlawalh Jesús?

⁹ Xlakata paxkiyaw Jehová, kinTlatkan xalak akgapun, tamakamastaniw chu tamunuw. Wa xlakata, chuna la Jesús, nalimasiyayaw pi paxkiyaw Jehová chuna la kalikatsiniyaw latamanin. Apóstol Juan tsokgli: «Tiku ni paxki xtala, tiku akxilha, nila paxki Dios, tiku nila akxilha» (1 Juan 4:20). Kalilakpuwaw: «¿Xlikana kkapaxki amakgapitsin? ¿Kkalimasiyani talakgalhaman amakgapitsin maski nitlan kilikatsinikgo? ¿Wa tapaxkit tuku kimakgpuwantini naklimaklakaskin kinkilhtamaku chu tuku kkgalhi xlakata nakkamakgtaya amakgapitsin nalakgapaskgo Jehová? ¿Chuna ktlawa maski lhuwa latamanin ni xtapalh akxilhkgo o asta akxni kilakatakikgo? ¿Tlan tlakg xaklimaxtulh kilhtamaku xlakata xaklichuwinalh Dios?» (Efes. 5:15, 16).

10. ¿Tuku xtlawa Jesús xlakata xʼanalh takaksni?

¹⁰ Jesús ni xmalakatsuki taʼakglhuwit. Ni xmakgapuspitnan. Pero wi tuku atanu xtlawa. Xla xlipula xlakata ni nakatakgalhi taʼakglhuwit latamanin chu xkamakgpuwantini amakgapitsin xlakkaxtlawakgolh xtaʼakglhuwitkan. Akgtum liʼakxilhtit, kamasiyanilh pi xlilakkaxtlawatkan xwanit taʼakglhuwit nema xtakgalhikgo xtalakan komo xlakaskinkgo pi Jehová xmakgamakglhtinalh xtakakninkan (Mat. 5:9, 23, 24). Chu makglhuwa kawanilh xʼapóstoles pi nialh xlalitalatlawakgolh xlakata tiku xapuxku xlitaxtu (Luc. 9:46-48; 22:24-27).

11. ¿La namakgtayananaw xlakata naʼanan takaksni?

¹¹ Xlakata naʼanan takaksni, ni kajwatiya talakaskin ni namakgtanuyaw ktaʼakglhuwit. Talakaskin nalipulayaw xlakata nakatalakkaxtlawayaw taʼakglhuwit amakgapitsin chu nakamakgpuwantiniyaw kinatalankan nalakkaxtlawakgo xtaʼakglhuwitkan (Filip. 4:2, 3; Sant. 3: 17, 18). Tlan nalilakpuwanaw: «¿Tuku klakpuwanit naklimakgxtakga xlakata nakkatalakkaxtlawa taʼakglhuwit amakgapitsin? Komo chatum tala nitlan kimamakgkatsini, ¿chuntiya ksitsini? ¿Klakpuwan pi tiku ktakgalhi taʼakglhuwit wa nalipula xlakata naklakkaxtlawayaw taʼakglhuwit? ¿O akit klipula maski xla lin kuenta? Komo lakgchan, ¿kkamakgpuwantini amakgapitsin xlakata nalakkaxtlawakgo xtaʼakglhuwitkan?».

12. ¿La limasiyalh Jesús pi tlan xlikatsi?

¹² Jesús tlan xlikatsi (Mat. 11:28-30). Xkapaxki latamanin chu xkaʼakgatekgsni maski tuwa tuku xtitaxtuma. Akgtum liʼakxilhtit, akxni chatum puskat xalak Fenicia tasaskinilh pi xmapaksalh xtsumat, xapulana Jesús ni tlawalh tuku skinika. Pero tlan likatsinilh chu mapaksalh xtsumat akxni akxilhli lanka xtakanajla (Mat. 15:22-28). Pero xla ni putum kilhtamaku chuna likatsilh. Lakgachunin, maski tlan xlikatsi kastakyawalh tiku xkapaxki. Akgtum liʼakxilhtit, akxni Pedro maxlajwaniputulh Jesús xlakata ni xmakgantaxtilh xtalakaskin Jehová, xla stakyawalh kxlakatin amakgapitsi kstalaninanin (Mar. 8:32, 33). Ni chuna tlawalh xlakata namaktuju Pedro, wata wi tuku xmasiyaniputun chu xkalistakyawaputun amakgapitsin kstalaninanin xlakata xmakgtayakgolh chu ni xmalaktlawikgolh namakgantaxti xtalakaskin Dios. Xlikana pi Pedro maxanalh tsinu, pero tlan kitaxtunilh.

13. Xlakata xlikana tlan nalikatsiyaw, ¿tuku natalakaskin natlawayaw lakgachunin?

¹³ Xlakata xlikana tlan nakalikatsiniyaw tiku kapaxkiyaw, namin kilhtamaku nakastakyawayaw. Akxni chuna natlawayaw kastalaniw xliʼakxilhtit Jesús chu kakilhtiyaw tastakyaw kxTachuwin Dios. Kakapaxkiw amakgapitsin. Kalakpuwaw pi tlawaputunkgo tuku tlan chu kalipawaw pi tiku paxkikgo Jehová chu kinkapaxkikgoyan namakgamakglhtinankgo tastakyaw nema kamaxkiyaw. Kalilakpuwaw: «¿Kchuwinan akxni kakxilha pi tiku kpaxki tlawama tuku nitlan? Chu ¿la ktachuwinan? ¿Tlan klikatsini, o kkilhni? ¿Chu tuku xlakata kstakyawa? ¿Xlakata ksitsinima o xlakata klakaskin pi tlan kakitaxtunilh?».

14. ¿La limasiyalh Jesús pi xtlawa tuku tlan?

¹⁴ Jesús ni kajwatiya katsi tuku tlan; wata na tlawa. Paxki xTlat, wa xlakata ankgalhin tlawa tuku tlan chu tapaxkit makgpuwantini chuna natlawa. Lataman tiku tlawa tuku tlan ankgalhin lakputsa la nakamakgtaya amakgapitsin chu wi tuku tlawa xpalakatakan. Ni kajwatiya talakaskin nakatsiyaw tuku tlan; kilitlawatkan chu tapaxkit nakinkamakgpuwantiniyan chuna natlawayaw. Max wi tiku nalakpuwan: «¿Tlan tlawakan tuku tlan maski ni wa tapaxkit nakinkamakgpuwantiniyan?». Chuna. Akgtum liʼakxilhtit, Jesús lichuwinalh tiku xkamaxkikgo tumin lakglimaxkgenin, pero xkamakatsinikgo amakgapitsin tuku xtlawakgo. Maski tuku xtlawakgo tlan xwanit, Jehová ni lakgatilh (Mat. 6:1-4).

15. ¿La tlan xlikana tlan nalikatsiyaw?

¹⁵ Komo akxni natlawayaw tuku tlan nakalilakpuwanaw amakgapitsin chu ni kiʼakstukan nakinkalilakpuwankanan nalimasiyayaw pi xlikana tlan likatsiyaw. Tlan xlilakpuwaw: «¿Tlan xakwa pi ni kajwatiya kkatsi tuku tlan, wata na ktlawa? ¿Tuku xlakata ktlawa tuku tlan?».

16. ¿Tuku kilitlawatkan chali chali, chu tuku xlakata?

¹⁶ Ni kalakpuwaw pi akxni tamunuw lilhakganaw putum xasasti tayat, chu nialh tu kilitlawatkan. Xasasti tayat xtachuna la maktum lhakgat nema kuenta kilitlawatkan.  Wa xlakata, chali chali kililakputsatkan la nalimasiyayaw tayat nema masta xʼespíritu santo Dios. ¿Tuku xlakata? Xlakata Jehová chatum Dios tiku ankgalhin wi tuku tlawa, chu xʼespíritu santo wa xlimakgatliwakga (Gén. 1:2). Uma wamputun pi akgatunu tayat nema masta espíritu santo tlan nakinkamakgpuwantiniyan xlakata wi tuku natlawayaw. Akgtum liʼakxilhtit, kstalanina Cristo Santiago wa xlakata takanajla: «Komo ni kgalhi laktlan tatlaw xtachuna la xanin» (Sant. 2:26). Na tlan chuna wankan xlakata amakgapitsi tayat nema masta xʼespíritu Dios. Makgatunu akxni limasiyayaw umakgolh tayat, limasiyayaw pi wa xʼespíritu santo Dios kinkamakgtayaman.

17. ¿Tuku tlan natlawayaw akxni ni limasiyayaw tayat nema masta espíritu santo chuna la xlilat?

¹⁷ Asta kstalaninanin Cristo tiku makgasa la tamunukgonit ni limasiyakgo tayat nema masta xʼespíritu santo Dios chuna la xlilat. Pero lu xlakaskinka naliskujaw xlakata nalimasiyayaw umakgolh tayat. Kawiliw akgtum liʼakxilhtit. Komo nataxtita maktum kilhakgatkan nema lu lakgatiyaw, ¿ni xlikana pi ni tunkun katimakgaw? Komo tlanku nakaxla, tlan nalakgtsapayaw. Chu uma kilhtamaku tlakg kuenta natlawayaw. Xtachuna la uma, komo namin kilhtamaku wi tiku nitlan nalikatsiniyaw, lakapala nasitsiniyaw o ni nalimasiyaniyaw tapaxkit chuna la xlilat, ni kataxlajwaniw. Komo naskiniyaw pi kakinkatapatin, uma namakgtayanan xlakata tlan natalalimparayaw uma lataman. Chu kaliskujwi xlakata nialh chuna nalikatsiyaw.

18. ¿Tuku liwana katsiyaw?

¹⁸ ¡Lu paxtikatsiniyaw xlakata kgalhiyaw xliʼakxilhtit Jesús! Akxni tlakg nalakapastaknanaw chuna la xla, tlakg ni tuwa namakgkatsiyaw nalikatsiyaw chuna la likatsi. Chu chuna tlakg tlan nalimasiyayaw xasasti tayat. Kʼuma artículo kaj pulaktati lichuwinaw tayat nema masta xʼespíritu santo Dios. Pero tlan xwa komo xlimaxtuw kilhtamaku nakalilakpuwanaw amakgapitsi tayat xlakata naʼakxilhaw la tlakg tlan nalimasiyayaw kkilatamatkan. Anta kLiputsan xla xtatayananin Jehová tlan natekgsaw artículos nema tlan nakinkamakgtayayan, anta niku wan «Xlatamat kstalanina Cristo» chu alistalh «Xtatlaw espíritu santo». Tlan liwana nakatsiyaw pi komo naliskujaw xlakata nakgalhiyaw xasasti tayat chu ankgalhin nalimasiyayaw, Jehová nakinkamakgtayayan.