1, 2. ¿Tuku talakaskin xlakata Dios namakgamakglhtinan kintakakninkan?

 ¿TUKU lakpuwana akxni kgaxpata tachuwin takaknin? Max lilakpuwana chatum tala tiku tsokgosta niku wi xputama chu tlawani oración Jehová xliputum xnaku. O max lilakpuwana akgtum familia tiku makxtum likgalhtawakgakgo Biblia.

² Kʼuma pulaktiy liʼakxilhtit natalan kakninanimakgo Jehová. ¿Makgamakglhtinan Jehová xtakakninkan? Chuna, komo chuna la tlawakgo tatalakxtumi xtalakaskin, komo limasiyakgo tapaxkit chu takaknin. Xlakata lu paxkiyaw Jehová chu katsiyaw pi lakgchan nakakninaniyaw, makamaxkiputunaw tlakg xatlan takaknin.

3. ¿Tuku naʼakxilhaw kʼuma artículo?

³ Kʼuma artículo, nalichuwinanaw takaknin nema Jehová xmakgamakglhtinan makgasa chu nalichuwinanaw pulaktsayan tuku makgtanuma kkintakakninkan nema Jehová makgamakglhtinan la uku. Chuna la nakaʼakxilhtilhayaw, kalilakpuwaw la tlakg xatlan takaknin namakamaxkiyaw Jehová. Na naʼakxilhaw tuku xlakata xaxlikana takaknin tlawa pi napaxuwayaw.

4. Akxni nina xmin Jesús, ¿la limasiyakgolh xlakskujnin Jehová pi xpaxkikgo chu xmaxkikgo kakni?

⁴ Akxni nina xmin Jesús, lakchixkuwin tiku ni xmakgxtakgkgo Dios chuna la Abel, Noé, Abrahán chu Job limasiyakgolh pi xmaxkikgo kakni Jehová chu xpaxkikgo. ¿La tlawakgolh? Kgalhakgaxmatkgolh Dios, limasiyakgolh takanajla chu wi tuku limakgxtakgkgolh. Biblia ni putum kinkawaniyan tuku xtlawakgo akxni xkakninanikgo Jehová. Pero liwana tasiya pi  tlawakgolh putum tuku xtalakaskin xlakata xmalankikgolh, chu Dios makgamakglhtinalh xtakakninkan. Alistalh Jehová maklakaskilh Moisés xlakata nakamaxki israelitas xLimapakgsin. Kʼuma Limapakgsin liwana kawanilh la xlakaskin pi xkakninanikgolh.

5. Akxni xninita chu xlakastakwananita Jesús, ¿la xlakaskin Jehová pi kstalaninanin Cristo xkakninanikgolh?

⁵ Akxni xninita chu xlakastakwananita Jesús, Jehová nialh kaskinilh xkachikin nakgalhakgaxmatkgo Limapakgsin nema xmaxkinit Moisés (Rom. 10:4). Wata kstalaninanin Cristo, xlistalanitkan xwanit xasasti limapakgsin, «xlimapakgsin Cristo» (Gál. 6:2). Xlakata tlan xmakgantaxtikgolh uma limapakgsin, ni xtalakaskin pi xkatsinikgolh akgtum limapakgsin nema wan tuku xlitatlawat chu tuku ni xlitatlawat, wata xlistalanitkan xwanit xliʼakxilhtit Jesús chu tuku xla masiyalh. La uku, kstalaninanin Cristo tlawakgo putum tuku talakaskin xlakata nastalanikgo xliʼakxilhtit Cristo, chu chuna tlan namakgapaxuwakgo Jehová chu tlan namakgkatsikgo (Mat. 11:29).

6. ¿La tlan nakinkamakgtayayan uma artículo?

⁶ Akxni nalilakpuwana pulakatunu la kakninaniya Jehová, kakgalhskinkanti: «¿La xlilhuwa staknit kintakanajla? ¿Wi tuku tlan xaktlawalh xlakata tlakg tlan xakkakninanilh Jehová?». Lu tlan komo lipaxuwaya tuku makgantaxtinitata, pero na tlan naskiniya Jehová pi kamakgtayan naʼakxilha tuku tlakg tlan xtlawa.

7. ¿La akxilha Jehová oraciones nema tlawaniyaw xliputum kinakujkan?

⁷ Kakninaniyaw Jehová akxni tlawaniyaw oración. Tatsokgni tamalakxtumi oración incienso nema liwana xlakkaxtlawakan chu xmakamastakan ktabernáculo, chu alistalh na tsukuka makamastakan ktemplo (Sal. 141:2). Uma incienso lu tlan xmuksun chu lu xmakgapaxuwa Dios. Xtachuna la uma, kioracioneskan nema xliputum kinakujkan tlawayaw «lu makgapaxuwa» Dios maski ni laktuwa tachuwin maklakaskinaw (Prov. 15:8; Deut. 33:10). Liwana katsiyaw pi Jehová makgapaxuwa akxni waniyaw pi paxkiyaw chu paxtikatsiniyaw. Chu xla lakaskin pi kalitachuwinaw tuku lakaskinaw, tuku lilakgaputsayaw chu tuku kgalhkgalhimaw. Wa xlakata, akxni nina tlawaniya akgtum oración, ¿tlan liwana xlilakpuwanti tuku nawaniya? Chuna namakamaxkiya minTlat xalak akgapun tlakg xatlan «incienso».

8. ¿Tuku talakgalhaman kgalhiyaw xlakata namalankiyaw Dios?

⁸ Kakninaniyaw Jehová akxni malankiyaw (Sal. 34:1). Chu ¿la malankiyaw Jehová? Akxni xatapaxuwan kalitachuwinanaw amakgapitsin xalaktlan xtayat chu tuku tlawanit. Pulaklhuwa tuku tlan nalichuwinanaw xlakata Jehová komo paxtikatsiniyaw. Komo nalimaxtuyaw kilhtamaku xlakata nalilakpuwanaw xtalakgalhaman Jehová, putum tuku tlan tlawanit kimpalakatakan, ankgalhin nakgalhiyaw laktlan tachuwin xlakata namalankiyaw. Akxni lichuwinanaw Dios kgalhiyaw akgtum lanka talakgalhaman xlakata namalankiyaw, uma wamputun la akgtum tamakamastan maxkiyaw Dios, akxni limaklakaskinaw kinkilhnikan xlakata namalankiyaw (Heb. 13:15). Chuna la akxni pulana lakapastakaw tuku nawaniyaw Jehová akxni tlawaniyaw oración, na tlan nakitaxtu liwana nalilakpuwanaw tuku nakawaniyaw latamanin akxni nakatachuwinanaw. Lakaskinaw pi kintamakamastankan tlakg xatlan nawan. Wa xlakata, xatapaxuwan lichuwinanaw Dios.

9. ¿La litamakgtaya xkachikin Jehová akxni an ktamakxtumit, chu la litamakgtayanita wix?

 ⁹ Malankiyaw Jehová akxni anaw ktamakxtumit. Israelitas xalamakgasa kawanika: «Makgtutu akgatunu kata, putum lakchixkuwin xliʼanatkan kxlakatin Jehová miDios anta niku xla nalaksaka» (Deut. 16:16). Xlimakgxtakgatkan xwanit xchikkan chu xkakiwinkan. Pero Jehová kamalaknunilh: «Niti katiʼakgchipaputulh mintiyat akxni […] napina kxlakatin miDios» (Éx. 34:24). Xlakata israelitas xlipawankgo Jehová, xlakan xʼankgo kfiestas nema xtlawakan akgatunu kata. Chuna xmakgamakglhtinankgo laklanka tasikulunalin: tlakg liwana xʼakgatekgskgo xLimapakgsin Dios, xlilakpuwankgo xtalakgalhaman chu xlipaxuwakgo la akxtum xkatatawilakgo amakgapitsi xlakskujnin Jehová (Deut. 16:15). Akinin na makgamakglhtinanaw tasikulunalin akxni wi tuku limakgxtakgaw xlakata naʼanaw ktamakxtumit. Chu lu makgapaxuwa Jehová akxni liwana lakkaxwiliyaw tuku nakgalhtinanaw ktamakxtumit.

10. ¿Tuku xlakata kilhtlinikan Jehová na makgtanuma ktakaknin nema maxkiyaw?

¹⁰ Kakninaniyaw Jehová akxni makxtum katakilhtliyaw kinatalankan (Sal. 28:7). Xpalakatakan israelitas, takilhtlin xmakgtanuma ktakaknin nema xmaxkikgo Jehová. Akgtum liʼakxilhtit, mapakgsina David kalakgayawalh 288 levitas xlakata xkilhtlikgolh ktemplo (1 Crón. 25:1, 6-8). La uku, kgalhiyaw talakgalhaman nalimasiyaniyaw la xlilhuwa paxkiyaw Dios akxni kilhtliniyaw tuku limalanki. Ni talakaskin pi lu liwana nakatsiniyaw nakilhtliyaw xlakata natlawayaw uma. Kalilakpuwanti uma: akxni chuwinanaw, kimputumkan «makglhuwa akgchakgxaw», pero uma ni tlawa pi nialh namastayaw kintakgalhtinkan ktamakxtumit chu nalichuwinanaw Dios (Sant. 3:2). Xtachuna la uma, maski ni lakgatiyaw la kilhtliyaw ni xlitlawat pi nialh nakilhtliniyaw Jehová.

11. Chuna la wan Salmo 48:13, ¿tuku xlakata nalimaxtuyaw kilhtamaku nalikgalhtawakgayaw Biblia kfamilia?

¹¹ Kakninaniyaw Jehová akxni likgalhtawakgayaw xTachuwin chu kalitachuwinanaw kinkamanankan xpalakata. Akgatunu sábado israelitas ni kskujkgo, xlimaklakaskinkgo uma kilhtamaku xlakata namatliwakglhkgo la xtalalinkgo Jehová (Éx. 31:16, 17). Israelitas tiku ni xmakgxtakgkgo Dios xkamasiyanikgo xkamanankan xlakata Jehová chu xtalakgalhaman. Kimpalakatakan, kilimaxtutkan kilhtamaku xlakata nalikgalhtawakgayaw chu nalakputsananiyaw xTachuwin Dios. Uma makgtanuma ktakaknin nema maxkiyaw Jehová chu kinkamakgtayayan tlakg natalakatsuwiniyaw (Sal. 73:28). Nachuna, akxni makxtum kgalhtawakgayaw kfamilia, tlan nakamakgtayayaw kinkamanankan tlan natalalinkgo xapaxkina kinTlatkan xalak akgapun (kalikgalhtawakga Salmo 48:13).

12. ¿La xʼakxilha Jehová xtaskujutkan tiku makgtlawakgolh tuku xtamaklakaskin ktabernáculo, chu tuku kinkamasiyaniyan uma?

¹² Maxkiyaw kakni Jehová akxni makgtlawayaw chu makgkaxtlawayaw Pukgalhtawakga. Biblia wan pi taskujut nema tlawaka ktabernáculo chu putum tuku xʼanan anta litaxtulh akgtum «xasanto taskujut» (Éx. 36:1, 4). La uku, Jehová na xasanto liʼakxilha chuna la katlawakan kimPukgalhtawakgakan chu amakgapitsi chiki nema kamaklakaskinkan xlakata nakakninaniyaw. Makgapitsi kinatalankan limaxtukgo lhuwa kilhtamaku xlakata namakgtlawakgo uma taskujut. Xlikana pi lu paxtikatsiniyaw taskujut nema tlawamakgo xpalakata Tamapakgsin. Umakgolh natalan na limaxtukgo kilhtamaku xlakata nalichuwinankgo Dios. Makgapitsi asta max precursores  litaxtuputunkgo. Lakgkgolotsin limasiyakgo pi makgtayanankgo chuna la katlawakan Pukgalhtawakga akxni mastakgo talakaskin pi umakgolh natalan, tiku lu palha skujkgo, precursores nalitaxtukgo komo makgatsikgo tuku talakaskin. Maski katsiniyaw o ni, chuna la katlawakan kimPukgalhtawakgakan, kimputumkan tlan namakgtayananaw xlakata xaskulunku natawila chu tlan natasiya.

13. ¿La kiliʼakxilhatkan tumin nema mastayaw xlakata namakgtayananaw ktaskujut xla Tamapakgsin?

¹³ Kakninaniyaw Jehová akxni limakgtayananaw kintuminkan xlakata natatlawa taskujut xla Tamapakgsin kxlikalanka katiyatni. Israelitas xlimakamaxkitkan xwanit Jehová akgtum tamaskiwin akxni xʼankgo kfiestas (Deut. 16:16). Tlan xmakamastakgo tuku xmatlanikgo. Chuna tlan xlimasiyakgo pi xpaxtikatsininankgo putum tuku xmakglhtinankgo xlakata xtakanajlakan. Chu akinin, ¿la tlan nalimasiyaniyaw tapaxkit chu tapaxtikatsinit Jehová xlakata putum tuku tlawa xpalakata kintakanajlakan? Pulaktum wa akxni xatapaxuwan namastayaw kintuminkan kcongregación chu xpalakata taskujut nema tatlawama kxlikalanka katiyatni chuna la matlaniyaw. Apóstol Pablo chuna wa: «Akgtum tamaskiwin nema mastakan xliputum naku, wa tuku Dios tlakg tlan akxilha, xlakata Dios lakaskin pi chatum lataman namasta tuku matlani, ni wa namastaputun tuku ni kgalhi» (2 Cor. 8:4, 12). Jehová xtapalh akxilha tuku xatapaxuwan mastayaw maski ni lhuwa (Mar. 12:42-44; 2 Cor. 9:7).

14. Chuna la wan Proverbios 19:17, ¿la akxilha Jehová akxni kamakgtayayaw natalan tiku wi tuku maklakaskinkgo?

¹⁴ Kakninaniyaw Jehová akxni kamakgtayayaw kinatalankan tiku wi tuku maklakaskinkgo. Jehová kamalaknunilh israelitas pi xʼama kasikulunatlawa tiku xkamakgtayakgo lakglimaxkgenin (Deut. 15:7, 10). Makgatunu akxni makgtayayaw chatum tala tiku wi tuku maklakaskima, Jehová liʼakxilha xtachuna komo wa maxkimaw akgtum tamaskiwin (kalikgalhtawakga Proverbios 19:17). Akgtum liʼakxilhtit, kstalaninanin Cristo xalak Filipos malakgachanikgolh Pablo akgtum tamaskiwin akxni xla tachin xwi, chu xla wa pi uma tamaskiwin xmakgamakglhtinan Dios chuna la akgtum tamakamastan nema xmakgapaxuwa (Filip. 4:18). Kakalilakpuwaw natalan xalak kincongregacionkan chu kalilakpuwaw uma takgalhskinin: «¿Wi tiku tlan xakmakgtayalh?». Jehová lakgati akxni akxilha pi maklakaskinaw kinkilhtamakujkan, kilitliwakgakan, tuku katsiniyaw tlawayaw chu tuku kgalhiyaw xlakata nakamakgtayayaw tiku wi tuku maklakaskinkgo. Jehová liʼakxilha pi uma makgtanuma kkintakakninkan (Sant. 1:27).

15. ¿Tuku xlakata ni akgtum takuka liʼakxilhaw akxni limaxtuyaw kilhtamaku chu litliwakga xlakata nakakninaniyaw Jehová?

¹⁵ Xlakata nakakninaniyaw Jehová chuna la xla lakaskin, talakaskin nalimaxtuyaw kilhtamaku chu litliwakga. Pero uma ni akgtum takuka (1 Juan 5:3). ¿Tuku xlakata? Xlakata paxkiyaw. Kalilakpuwaw chatum aktsu kgawasa tiku maxkiputun akgtum tamaskiwin xtlat. Max lhuwa horas nalimaxtu xlakata natlawa akgtum dibujo, pero ni tuwa makgkatsi xlakata paxki xtlat chu makgapaxuwa xlakata namaxki uma tamaskiwin. Xtachuna la uma, xlakata paxkiyaw Jehová, kinkamakgapaxuwayan akxni limaklakaskinaw kinkilhtamakujkan chu kilitliwakgakan xlakata nakakninaniyaw.

16. Chuna la wan Hebreos 6:10, ¿la akxilha Jehová putum tuku tlawaya xlakata namakgapaxuwaya?

¹⁶ Natlatni tiku kapaxkikgo xkamankan  ni kgalhkgalhikgo pi chatunu chatunu nakamaxkikgo watiya tamaskiwin. Katsikgo pi chatunu kamanan ni lakxtum chu tanu tanu tuku titaxtukgo. Xtachuna la uma, kinTlatkan xalak akgapun akgatekgsa pi tanu tanu tuku titaxtuyaw. Max wix tlakg lhuwa tuku tlawaya nixawa miʼamigos. O, max ni lu lhuwa tuku tlawaya, nixawa amakgapitsin, max xlakata minkata, xlakata tatatlaya o xlakata taskujut nema kgalhiya kfamilia. Pero uma ni kamaxlajwanin (Gál. 6:4). Jehová ni katipatsankgalh tuku wix tlawaya. Komo namaxkiya putum tuku matlaniya chu tapaxkit wa tuku makgpuwantiniyan, xla lu napaxuwa (kalikgalhtawakga Hebreos 6:10). Jehová akxilha tuku wi kminaku. Lakaskin pi kalipaxuwa chu tlan kalimakgkatsi takaknin nema namaxkiya.

17. 1) ¿Tuku tlan natlawayaw komo tuwa makgkatsiyaw namakgantaxtiyaw makgapitsi tuku makgtanuma kkintakakninkan? 2) ¿Makgtayanitan makgapitsi tuku min krecuadro « La tlakg napaxuwayaw»?

¹⁷ ¿Chu komo wi tuku tuwa makgkatsiyaw namakgantaxtiyaw chuna la kakninaniyaw Jehová, la komo akxni kiʼakstukan kgalhtawakgayaw o chuna la lichuwinanaw Dios? Max naʼakxilhaw pi akxni tlakg lhuwa kilhtamaku kalimaxtuniyaw tlakg lipaxuwayaw chu tlakg litamakgtayayaw. Tlan natamalakxtumiyaw kintakakninkan xtachuna la akxni tlakgkan akgtum litlakgni. Komo kaj makgapitsi kilhtamaku nalitsakgsayaw, ni liwana katikatsiniw. Pero, komo chali chali nalitsakgsayaw, max pulana kaj ni lhuwa kilhtamaku chu alistalh tlakg namaliwakayaw, uma nakinkamakgtayayan xlakata tlakg tlan natlakgaw. Alistalh max lu nalakaskinaw pi lu kachilha uma kilhtamaku xlakata nalipaxuwayaw la natlakgnanaw. ¿Na tlan chuna xtlawaw xlakata takaknin nema maxkiyaw Jehová?

18. ¿La kgantaxtu tuku xlakata kinkamalakatsukikan, chu tuku kitaxtu?

¹⁸ Akxni kakninaniyaw Jehová xliputum kinakujkan, kgantaxtu tuku xlakata kinkamalakatsukikan. Uma tlawa pi napaxuwayaw chu nakgalhiyaw takgalhkgalhin xlakata nakakninaniyaw Jehová putum kilhtamaku (Prov. 10:22). Kgalhiyaw takaksni xlakata katsiyaw pi Jehová kinkamakgtayayan akxni titaxtuyaw taʼakglhuwit (Is. 41:9, 10). Lu kinkamakgapaxuwayan akxni kakninaniyaw xapaxkina kinTlatkan, tiku lakgchan pi putum tamalakatsukin namalanki chu namaxki kakni (Apoc. 4:11).