1, 2. ¿Tuku xlakata wanaw pi tlakg tlan kitaxtuni kxlatamat chatum lataman akxni tamunu?

 AKXNI wi tiku tamunu, makgtapakgsi kxfamilia Jehová. ¡Uma lu lipaxuwayaw! Tiku lu tlan talalinkgo Jehová makgkatsikgo chuna la wa salmista David: «Paxuwa chixku tiku wix laksaka chu litana kmimpaxtun xlakata nalatama kminchik» (Sal. 65:4).

² Pero Jehová ni kaxatikawa tiku maxki talakaskin natanu kxchik o namakgtapakgsi kxkachikin. Chuna la akxilhwi kxapulana artículo, xla katalakatsuwini tiku limasiyanikgo pi xlikana xʼamigos litaxtuputunkgo (Sant. 4:8). Akxni tamakamastanikgo Jehová chu tamunukgo, lu tlan tsukukgo talalinkgo. Chu Jehová kamalaknuni: «Na’akxilhatit pi [...] nakkapuxtakgamakaniyachan tasikulunalin asta akxni nialhtu nakatsankganiyan» (Mal. 3:10; Jer. 17:​7, 8).

3. ¿Tuku kilimakgantaxtitkan putum kstalaninanin Cristo tiku tamakamastaninitawa Jehová chu tamununitawa? (Eclesiastés 5:​4, 5).

³ Xlikana, akxni tamunuyaw aku matsukimaw chuna la naskujnaniyaw Jehová. Putum kstalaninanin Cristo makgantaxtiputunaw tuku malaknuw akxni tamakamastaniw Jehová, maski natitaxtuyaw taputsan o nakinkamatlawiputunkanan tuku nitlan (kalikgalhtawakga Eclesiastés 5:​4, 5). Na stalaniputunaw xliʼakxilhtit Jesús chu makgantaxtiputunaw xlimapakgsin (Mat. 28:​19, 20; 1 Ped. 2:21). Uma artículo nakinkamakgtayayan chuna natlawayaw.

“CHUNTIYA KASTALANI” JESÚS MASKI NATITAXTUYA TUKU TUWA CHU NAMATLAWIPUTUNKANA TUKU NITLAN

4. ¿Tuku wamputun pi chatunu kstalaninanin Jesús lin «xkiwi nema makgapatinan»? (Lucas 9:23).

⁴ Ni kalakpuwanti pi akxni tamununitata nawan, putum tlan nakitaxtuniyan. Jesús wa pi chatunu kstalaninanin xtalakaskin xlilh kiwi «nema makgapatinan chali chali» (kalikgalhtawakga  Lucas 9:23). ¿Xwamputun Jesús pi kstalaninanin ankgalhin xʼamakgo patinankgo? Nichuna. Xwamputun pi maski xlikana xʼamakgo kgalhikgo tasikulunalin, na xʼamakgo titaxtukgo tuku tuwa, asta makgapitsi umakgolh lu xʼama kamakgapatinan (2 Tim. 3:12).

5. ¿Tuku tasikulunalin kamalaknuni Jesús tiku wi tuku limakgxtakgkgo xlakata naskujnanikgo Dios?

⁵ Max wix titaxtupat tuku tuwa xlakata mifamilia ni lakaskin pi naskujnaniya Jehová, o max talakaskinit wi tuku xtapalh nalimakgxtakga xlakata wa pulana nawiliya kmilatamat xTamapakgsin Dios (Mat. 6:33). Komo chuna titaxtupat, liwana kakatsi pi Jehová katsi putum tuku tlawanita xlakata naskujnaniya (Heb. 6:10). Max akxilhnita kmilatamat pi lu xlikana tuku wa Jesús: «Niti makgxtakgnit chiki, o xnatalan lakgkgawasan, o xnatalan laktsuman, o xtse, o xtlat, o xkamanan, o kapukuxtun, kimpalakata chu xpalakata xatlan tamakatsinin, tiku kʼuma kilhtamaku ni namakglhtinan akgtum ciento liwaka, chiki, natalan lakgkgawasan, natalan laktsuman, natsetni, kamanan, chu kapukuxtun, maski nakgalhi taputsastalanit, chu kkakilhtamaku nema aku mima namakglhtinan latamat nema ni kgalhi xlisputni» (Mar. 10:​29, 30). Tasikulunalin nema makglhtinanita tlakg lhuwa nixawa tuku talakaskinit nalimakgxtakga (Sal. 37:4).

6. ¿Tuku xlakata natalakaskin chuntiya nalakgmakganaw «tuku lu nitlan nema lu lakgati makni» maski tamununitawa nawan?

⁶ Akxni tamununitata nawan, natalakaskin chuntiya naliskuja xlakata nalakgmakgana tuku tlawaputuna nema «lu nitlan nema lu lakgati makni» (1 Juan 2:16). Akxni natamunuya ni kilhchanima pi nialh katikgalhi talakgalhin. Max namin kilhtamaku namakgkatsiya chuna la apóstol Pablo, tiku wa: «Xlikana, kkinaku klipaxuwa xlimapakgsin Dios, pero kakxilha pi kkimakni wi atanu limapakgsin nema talalakatawaka xlimapakgsin kintalakapastakni. Ama limapakgsin wa talakgalhin nema wi kkimakni chu kimakgatlaja» (Rom. 7:​22, 23). Max namin kilhtamaku lu tuwa namakgkatsiya nalakgmakgana tuku nitlan tlawaputuna. Pero komo wa nalilakpuwana tamalaknun nema tlawani Jehová akxni makamaxki milatamat namakgtayayan nalakgmakgana tuku nitlan. ¿Tuku xlakata wanaw pi akxni lilakpuwanaw tamalaknun nema tlawaniw Jehová akxni tamakamastaniw nakinkamakgtayayan nalakgmakganaw tuku nitlan?

7. Komo nalilakpuwanaw tuku malaknuniw Jehová akxni tamakamastaniw, ¿la nakinkamakgtayayan ni namakgatsankgananiyaw?

⁷ Akxni chatum lataman makamaxki xlatamat Jehová, akstu lakgmakgankan. Uma kilhchanima pi nialh katitlawalh tuku lakgati o nialh wa katiliskujli nakgalhi tuku kgalhiputun nema ni makgapaxuwa Jehová (Mat. 16:24). Wa xlakata, akxni natitaxtuyaw akgtum taputsan ni aku katililakpuwaw tuku natlawayaw. Liwana katsiyawa nawan pi kaj pulaktum tuku kilitlawatkan: ni namakgatsankgananiyaw Jehová. Liwana lakkaxwilinitawa nawan kajwatiya namakgapaxuwayaw. Akxni makamaxkiw kilatamatkan Jehová, litayaw pi xʼamaw lakgmakganaw tuku tlawaputunaw. Wa xlakata, nalitaxtuyaw chuna la Job, tiku maski lhuwa tuku lu nitlan titaxtulh, wa: «Nikxni ktimakgatsankgananilh Dios» (Job 27:5).

8. Komo nalilakpuwanaw tuku malaknuniw Jehová akxni tamakamastaniw, ¿la nakinkamakgtayayan ni natlawayaw tuku nitlan?

⁸ Akxni lilakpuwanaw pi malaknuniw Jehová natlawayaw xtalakaskin, kinkamakgtayayan nalakgmakganaw tuku nitlan. Akgtum liʼakxilhtit, ¿natsukuyaw lakgatiyaw chatum tala tiku makgaxtokga? ¡Nichuna! Akxni makamaxkiw kilatamatkan Jehová, litayaw nalakgmakganaw uma tapuwan. Komo nipara tsinu namastayaw talakaskin nastaka kkinakujkan  tuku nitlan, alistalh ni wa lilakgaputsamaw nawan la namakgxtakgaw tuku nitlan nakinkasmanipasayan. Makgtuminika natamakgatliniyaw “xtijikan tiku nitlan likatsikgo” (Prov. 4:​14, 15).

9. Komo nalilakpuwanaw tuku malaknuniw Jehová akxni tamakamastaniw, ¿la nakinkamakgtayayan wa pulana nawiliyaw tuku xla kintakanajlakan?

⁹ ¿Chu komo nakinkamalaknunikanan akgtum taskujut nema ni kintikamaxkin talakaskin naʼanaw ktamakxtumit? Liwana katsiyaw tuku kilitlawatkan. Akxni nina xkinkamalaknunikanan uma taskujut liwana xlakkaxwilinitawa pi ni xʼamaw makglhtinanaw. Wa xlakata, ni pulana katimakglhtinaw uma taskujut chu alistalh lakputsamaw nawan tuku natlawayaw xlakata pulana nawiliyaw xtalakaskin Jehová kkilatamatkan. Xliʼakxilhtit Jesús tlan nakinkamakgtayayan. Xla liwana xlakkaxwilinit namakgapaxuwa xTlat, chu akinin na tlan tunkun nalakgmakganaw putum tuku katsiyaw pi ni makgapaxuwa Dios tiku tamakamastaninitaw (Mat. 4:10; Juan 8:29).

10. ¿La nakinkamakgtayayan Jehová chuntiya nastalaniyaw Jesús akxni tamununitawa nawan?

¹⁰ Akxni kgalhiyaw taʼakglhuwit chu titaxtuyaw taputsan, kinkamaxkiyan talakaskin nalimasiyayaw pi liwana lakkaxwilinitaw pi chuntiya nastalaniyaw Jesús. Chu katsiyaw pi Jehová nakinkamakgtayayan chuna natlawayaw, xlakata Biblia wan: «Dios ni makgxtakgnan, chu ni katimastalh talakaskin pi nala tuku nialhla natayaniyatit. Wata akxni natitaxtuyatit tuku tuwa, xla natlawa pi wixin nalakgtaxtuniyatit chu nakamakgtayayan natayaniyatit» (1 Cor. 10:13).

¿TUKU TLAN NATLAWAYA XLAKATA CHUNTIYA NASTALANIYA JESÚS?

11. ¿Tuku nakinkamakgtayayan chuntiya nastalaniyaw Jesús? (Na kaʼakxilhti dibujos).

¹¹ Jesús skujnanilh Jehová xliputum xnaku, chu tlakg tlan talalilh xlakata xtlawani oración  (Luc. 6:12). Pulaktum tuku tlan natlawayaw xlakata chuntiya nastalaniyaw Jesús akxni tamununitawa nawan wa pi ankgalhin naliskujaw natlawayaw tuku nakinkamakgtayayan tlakg tlan natalalinaw Jehová. Biblia wan: «Chuna la tatliwakglhnita kintakanajlakan, chuntiya kaʼaw ktiji niku amaw» (Filip. 3:16). Namin kilhtamaku nakgaxpata tuku tlawakgonit makgapitsi natalan xlakata tlakg naskujnanikgo Jehová. Max makgapitsin kilakgolh kʼEscuela xla Tiku lichuwinankgo xTamapakgsin Dios o amakgapitsin ankgolh latamakgo niku tlakg xtalakaskin tamakgtay. ¿Na tlan chuna natlawaya? Komo chuna, ¡nitu kamalakgachokgon! Kskujnin Jehová ankgalhin lakputsakgo la tlakg naskujnanikgo (Hech. 16:9). Pero ¿chu komo la uku wix nila chuna tlawaya? Ni kalakpuwanti pi wix ni xtapalh litaxtuya nixawa tiku tlan chuna tlawakgo. Tuku tlakg xlakaskinka wa pi natayaniyaw (Mat. 10:22). Ankgalhin kalakapastakti pi Jehová lu paxuwa komo wix tlawapat putum tuku matlaniya xlakata tlakg naskujnaniya. Komo chuna natlawaya, chuntiya nastalaniya Jesús (Sal. 26:1).

12, 13. ¿Tuku tlan natlawaya komo makgkatsiya pi nialh lu lipaxuwaya chuna la skujnaniya Jehová? (1 Corintios 9:​16, 17; na kaʼakxilhti recuadro « ¿Tuku tlan natlawaya xlakata chuntiya naskujnaniya Jehová?»).

¹² ¿Chu tuku militlawat komo akxilha pi nialh tlawaniya oraciones Jehová xliputum minaku o komo makgkatsiya pi skujnanipat kaj xlakata chuna militlawat? ¿Tuku natlawaya komo nialh lu lipaxuwaya akxni lichuwinana Dios chu akxni likgalhtawakgaya Biblia? Komo chuna naʼakgspulayan akxni tamununitata nawan, ni kalakpuwanti pi nialh kgalhiya xʼespíritu santo Jehová. Xlakata makglakgalhinanin akinin, min kilhtamaku taxlajwaniyaw. Komo naʼakxilha pi wix nialh lu lipaxuwaya chuna la skujnanipat Jehová, kalilakpuwanti xliʼakxilhtit apóstol Pablo. Maski xla lu xliskuja  nastalani xliʼakxilhtit Jesús, liwana xkatsi pi xʼama min kilhtamaku max nialh lu xʼama lipaxuwa natlawa tuku xlilat (kalikgalhtawakga 1 Corintios 9:​16, 17). Xla wa: «Maski nichuna ktlawaputun, chuntiya kilitlawat xlakata chuna kilakgayawakanit». Uma kinkamasiyaniyan pi Pablo liwana xlakkaxwilinit chuntiya naskujnani Jehová maski xʼama min kilhtamaku nichuna xtlawaputulh.

¹³ Ni kamasta talakaskin pi tuku nitlan makgkatsiya namatlawiyan tuku ni xlilat, wata liwana kalakkaxwili natlawaya tuku tlan asta maski nichuna tlawaputuna. Uma namakgtayayan nalipaxuwaya tuku tlawaya chuna la natitaxtu kilhtamaku. Komo lu naliskuja tuku xla mintakanajla, namakgtayayan chuntiya nastalaniya Jesús. Nachuna, akxni natalan naʼakxilhkgo pi wix lu liskujpat, lu nakamakgpuwantini (1 Tes. 5:11).

«CHUNTIYA KAKALAKPUTSANANIKANTIT»

14. ¿Tuku tlan xlilakpuwanti, chu tuku xlakata? (2 Corintios 13:5).

¹⁴ Akxni tamununitata nawan, lu xlakaskinka nalilakpuwana tuku tlawapat kmilatamat chu talismanin nema kgalhiya (kalikgalhtawakga 2 Corintios 13:5). Akgtum liʼakxilhtit, kalilakpuwanti komo tlawapat oración chali chali, komo likgalhtawakgaya chu lilakpuwana Biblia, komo pina ktamakxtumit chu lichuwinana Dios. Kalakputsa la tlakg nalitamakgtayaya putum uma chu tlakg nalipaxuwaya. Kalilakpuwanti: «¿Tuku tlakg tlan xaktlawalh xlakata tlakg naklipaxuwa chuna la klichuwinan Dios? ¿Klimasiya kki’oraciones pi klipawan Jehová chu kwani putum tuku kmakgkatsi? ¿Lu kliskuja xlakata nakkan ktamakxtumit? ¿La tlakg tlan kuenta xaktlawalh tuku wankan ktamakxtumit chu tlakg tlan xakmastalh kintakgalhtin?».

15, 16. ¿Tuku masiyaniyan xliʼakxilhtit Robert?

¹⁵ Na lu xlakaskinka pi akstu nakinkalakputsananikanan xlakata naʼakxilhaw tuku nitlan tlawaputunaw. Kalilakpuwaw akgtum li’akxilhtit nema kinkamasiyaniyan pi lu xlakaskinka chuna natlawayaw. Chatum tala tiku wanikan Robert, kinkawaniyan: «Akxni xakkgalhi 20 kata, xakskuja makgapitsi kilhtamaku. Akgtum kilhtamaku akxni ktaxtulh kkintaskujut, chatum tsumat tiku akxtum xaktaskuja kiwanilh pi xaktaʼalh kxchik. Kiwanilh pi xlakata kiʼakstukan xakkamaw tawilayaw “tlan xaktalakgtunkuwilh”. Xapulana lhuwa tuku klikilhalh, pero alistalh kwanilh pi ni xakkama an chu kwanilh tuku xlakata». Robert ni tlawalh tuku nitlan, chu uma lu tlan. Pero xla akxilhli pi wi tuku tlakg tlan xtitlawalh. Xla  wan: «Ni ktlawalh chuna la José, tiku lakapala lakgmakgalh tuku xwanima xpuskat Potifar, akit ni tunkun kwa pi ni (Gén. 39:​7-9). Nikxni xaklilakpuwanit pi lu tuwa xakkama makgkatsi naklakgmakgan uma. Tuku ktitaxtulh kimakgtayalh nakakxilha pi xtalakaskin tlakg nakmatliwakglha chuna la ktalalin Jehová».

¹⁶ Kalilakpuwaw pi wix matlawiputunkana tuku ni xlilat chu lakgmakgana. Maski lakgmakganti tuku nitlan xmatlawiputunkana, ¿tlan xtlawa chuna la Robert? Kalilakpuwanti: «¿Tuwa kmakgkatsilh tunkun nakwan pi ni?». Komo akxilha pi wi tuku mililakgpalit, ni kataxlajwani. Wata kalilakpuwanti pi lu tlan xlakata katsiyata tuku mililakgpalit. Kalitachuwinanti Jehová chu wi tuku katlawa xlakata liwana nalakkaxwiliya nakgalhakgaxpata (Sal. 139:​23, 24).

17. Chuna la masiya xliʼakxilhtit Robert, ¿tuku kitaxtu akxni ni tlawayaw tuku nitlan kinkamatlawiputunkanan?

¹⁷ Pero ni kajwatiya uma tuku kinkalitachuwinanan Robert. Xla wampara: «Akxni kwanilh uma tsumat pi ni xakkama taʼan, xla kiwanilh “Tayaninita taputsan”. Kkgalhskilh tuku xlakata chuna xwan. Chu xla kiwanilh pi chatum xʼamigo, tiku nialh xtatayana Jehová xwanit, wanilh pi putum lakgkgawasan tiku xtatayananin Jehová litaxtukgo lakgaputiy linkgo xlatamatkan, chu pi komo nakawanikan katlawakgolh tuku nitlan, ni makgtiy katililakpuwankgolh, tunkun chuna natlawakgo. Wa xlakata xla wanilh xʼamigo pi xʼama kiliʼakxilha komo xlikana xwanit uma. ¡Lu tlan klimakgkatsilh pi ni kmaxkajwanilh xtukuwani Jehová!».

18. ¿Tuku liwana lakkaxwilinita natlawaya akxni tamununitata nawan? (Na kaʼakxilhti recuadro « Akgtiy artículos nema lu makgtayanan»).

¹⁸ Akxni makamaxkiya milatamat Jehová chu tamunuya limasiyaya pi masantujliputuna xtukuwani maski natitaxtuya lhuwa tuku tuwa. Chu liwana kakatsi pi Jehová akxilha taʼakglhuwit nema wix titaxtuya chu akxni lakgmakgana tuku nitlan matlawiputunkana. Xla akxilha pi lu liskuja ni namakgatsankgananiya chu nasikulunatlawayan xlakata chuna tlawaya. Ankgalhin kalakapastakti: Jehová nalimakgtayayan xʼespíritu santo xlakata tlan natlawaya tuku xlilat (Luc. 11:​11-13). Wix tlan chuntiya nastalaniya Jesús akxni tamununitata nawan xlakata Jehová namakgtayayan.