1. ¿Tuku max lakpuwankgo makgapitsi xlakskujnin Jehová?

 ¡LU TLAN limakgkatsiyaw pi «Jehová lu makgapaxuwa» tuku tlawa xkachikin! (Sal. 149:4). Pero max min kilhtamaku makgapitsi xlakskujnin taxlajwanikgo chu lakpuwankgo: «Jehová makgapaxuwa tuku tlawa putuminika xkachikin, pero ¿makgapaxuwa tuku akit ktlawama?». Lhuwa xlakskujnin Jehová xalamakgasa na tuwa makgkatsikgolh nakanajlakgo pi xmakgapaxuwa tuku xtlawamakgo (1 Sam. 1:​6-10; Job 29:​2, 4; Sal. 51:11).

2. ¿Tuku kilitlawatkan xlakata namakgapaxuwayaw Jehová?

² Biblia wan pi maski makglakgalhinanin akinin tlan namakgapaxuwayaw Jehová. ¿Tuku kilitlawatkan? Kilimasiyatkan pi kanajlaniyaw Jesucristo chu kilitamunutkan (Juan 3:16). Chuna limasiyayaw kxlakatinkan amakgapitsin pi makgxtakgnitaw kintalakgalhinkan chu malaknuninitaw Dios pi natlawayaw xtalakaskin (Hech. 2:38; 3:19). Jehová lu paxuwa akxni tlawayaw uma xlakata x’amigos nalitaxtuyaw. Komo lu naliskujaw xlakata namakgantaxtiyaw tuku malaknuniw Jehová akxni tamakamastaniw, namakgapaxuwa tuku tlawayaw chu tlan nakinkatalalinan (Sal. 25:14).

3. ¿Tuku takgalhskinin nakgalhtiyaw kʼuma artículo?

³ ¿Tuku xlakata makgapitsi lakpuwankgo pi Jehová ni makgapaxuwa tuku tlawakgo? ¿La kinkalimasiyaniyan Jehová pi makgapaxuwa tuku tlawayaw? ¿Chu tuku nakinkamakgtayayan nakanajlayaw pi xlikana makgapaxuwamaw Jehová?

¿TUKU XLAKATA MAKGAPITSI LAKPUWANKGO PI JEHOVÁ NI MAKGAPAXUWA TUKU TLAWAKGO?

4, 5. Akxni makgkatsiyaw pi nitu litaxtuyaw, ¿tuku kililakapastakatkan?

⁴ Lhuwa akinin, lata aktsujku xwanitaw makgkatsiyaw pi nitu litaxtuyaw (Sal. 88:15). Chatum tala tiku wanikan Adrián, wan: «Ankgalhin klakpuwanit pi nitu klitaxtu. Klakapastaka pi akxni  aktsujku xakwanit, xakskini Jehová pi kifamilia xlatamakgolh kParaíso, pero xakmakgkatsi pi akit ni xkilakgchan naklatama anta». Tony, tiku stakli k’akgtum familia tiku ni xtatayananin Jehová litaxtukgo, lichuwinan la makgastakka: «Kinatlatni nikxni kiwanikgolh pi xlipaxuwakgo tuku xaktlawa chu nipara xkiwanikgo pi xkimpaxkikgo. Xkimamakgkatsinikgo pi nikxni xakkama kamakgapaxuwa».

⁵ Komo min kilhtamaku makgkatsiyaw pi nitu litaxtuyaw, kalakapastakwi pi wa Jehová tiku kinkalimin kxkachikin (Juan 6:44). Xla akxilha xalaktlan tayat nema kgalhiyaw, maski akinin ni akxilhaw, chu xlikana kinkalakgapasan (1 Sam. 16:7; 2 Crón. 6:30). Wa xlakata, akxni xla kinkawaniyan pi xtapalh litaxtuyaw, tlan nakanajlaniyaw (1 Juan 3:​19, 20).

6. ¿La xmakgkatsi Pablo akxni xlilakpuwan xtalakgalhin?

⁶ Makgapitsi akinin max chuntiya nitlan limakgkatsiyaw tuku nitlan tlawaw makgasa akxni nina xlakgapasaw xaxlikana (1 Ped. 4:3). Amakgapitsin max lhuwata kata skujnanimakgolh Jehová, pero chuntiya xlilakgmakganatkan nixatlan talismanin. ¿Min kilhtamaku wix nachuna makgkatsiya? ¿Nitlan mamakgkatsiniyan minaku? Komo chuna, lu namakgtayayan nalilakpuwana pi makgapitsin xlakskujnin Jehová nachuna makgkatsikgonit. Akgtum li’akxilhtit, apóstol Pablo lu nitlan xlimakgkatsi akxni xlilakpuwan tuku nitlan xtlawa (Rom. 7:24). Maski xmakgxtakgnit xtalakgalhin chu xtamununita, xla wa: «Xliputum apóstoles akit tlakg ni xlakaskinka klitaxtu». Chu wa pi xla wa tiku “tlakg xkgalhi talakgalhin” nixawa amakgapitsin makglakgalhinanin (1 Cor. 15:9; 1 Tim. 1:15).

7. Komo nitlan nalimakgkatsiyaw kintalakgalhinkan chu namakgxtakgaw, ¿tuku kinkamalaknuniyan Jehová pi natlawa?

⁷ KinTlatkan xalak akgapun kinkamalaknuniyan pi nakinkatapatiyan komo nitlan nalimakgkatsiyaw kintalakgalhinkan chu namakgxtakgaw (Sal. 86:5). Wa xlakata, komo xliputum kinakujkan nitlan limakgkatsiyaw kintalakgalhinkan, liwana kakatsiw pi xla namakgantaxti tuku kinkawaniyan: nakinkatapatiyan (Col. 2:13).

8, 9. ¿Tuku nakinkamakgtayayan xlakata nialh nalakpuwanaw pi tuku tlawayaw nitu litaxtu kxlakatin Jehová?

⁸ Kimputumkan maxkiputunaw Jehová tuku tlakg tlan kgalhiyaw. Pero max makgapitsi makgkatsikgo pi maski lu naliskujkgo nikxni katimakgapaxuwakgolh Dios. Chatum tala tiku wanikan Amanda, wan: «Min kilhtamaku klakpuwan pi xlakata tlan nakmakgapaxuwa Jehová, talakaskin pi ankgalhin nakmaliwaka chuna la kskujnanima. Wa xlakata min kilhtamaku klakpuwan pi tlakg kilimaxkit Jehová asta maski nialh kmatlani. Chu akxni nila kmaxki tuku klakaskin, ktsuku makgkatsi pi ni makgapaxuwa tuku ktlawama».

⁹ ¿Tuku nakinkamakgtayayan xlakata nialh nalakpuwanaw pi tuku tlawayaw nitu litaxtu kxlakatin Jehová? Kalakapastakwi pi xla kinka’akgatekgsniyan chu nikxni kinkaskiniyan tuku ni matlaniyaw. Komo tuku tlawamaw xpalakata Jehová wa tuku tlakg tlan tlawayaw, maski lhuwa o ni lhuwa, liwana kakatsiw pi xla lu xtapalh akxilha. Na kakalilakpuwaw tiku kalichuwinankan kBiblia tiku skujnanikgolh Jehová xliputum xnakujkan. Akgtum li’akxilhtit, Pablo akglhuwa kata skujnanilh Jehová, akglhuwa mil kilómetros tlawalh chu kamalakatsukilh lhuwa congregaciones. Pero milh kilhtamaku talakgpalilh xlatamat chu nialhla skujnanilh Jehová chuna la xapulana. ¿Nialh makgapaxuwalh Jehová? Nichuna. Pablo chuntiya tlawalh tuku xmatlani, chu Jehová chuntiya sikulunatlawalh (Hech. 28:​30, 31). Chuna la Pablo, ni putum kilhtamaku tlan katiskujnaniw Jehová chuna la xapulana, pero tuku xla lu xlakaskinka akxilha  wa tuku xlakata skujnaniyaw. La uku na’akxilhaw la kinkalimasiyaniyan Jehová pi makgapaxuwayaw.

¿LA KINKALIMASIYANIYAN JEHOVÁ PI MAKGAPAXUWAYAW?

10. ¿Tuku limaklakaskin Jehová xlakata “nakinkawaniyan” pi lipaxuwa tuku tlawamaw? (Juan 16:27).

¹⁰ Limaklakaskin Biblia. Jehová lu lakgati kalimasiyani xlakskujnin pi kapaxki chu pi makgapaxuwakgo. Anta kBiblia makgtiy talichuwinan pi Jehová wanilh Jesús pi wa xKgawasa tiku tlakg xpaxki chu tlan xmamakgkatsini (Mat. 3:17; 17:5). ¿Na lakaskina pi Jehová chuna xwanin? Xlikana pi xla ni kinkatachuwinanan lata k’akgapun, pero maklakaskin xTachuwin. Akxni likgalhtawakgayaw tuku Jesús kawanilh xtamakgalhtawakgen, makgkatsiyaw pi Jehová nachuna kinkawaniman (kalikgalhtawakga Juan 16:27). Jesús liwana limasiyalh la likatsi xTlat. Wa xlakata, akxni likgalhtawakgayaw tuku Jesús kawanilh xtamakgalhtawakgen tiku ni xmakgxtakgkgo maski makglakgalhinanin xwankgonit, kinkamakgtayayan nalilakpuwanaw pi Jehová nachuna kinkawaniman (Juan 15:​9, 15).

11. Akxni natitaxtuyaw tuku tuwa, ¿tuku ni kililakpuwanatkan? (Santiago 1:12).

¹¹ Tuku tlawa. Jehová lu kinkamakgtayaputunan, xla kinkamaxkiyan tuku maklakaskinaw kkilatamatkan. Pero min kilhtamaku masta talakaskin natitaxtuyaw tuku tuwa, chuna la akgspulalh Job (Job 1:​8-11). Pero akxni natitaxtuyaw tuku tuwa, ni kalakpuwaw pi Jehová nialh makgapaxuwa tuku tlawayaw, wata tuku natitaxtuyaw kakinkamakgtayan nalimasiyaniyaw pi lu paxkiyaw chu lipawanaw (kalikgalhtawakga Santiago 1:12). Chu akxni natitaxtuyaw tuku tuwa, na’akxilhaw la xla kinkamakgtayayan chu kinkalimasiyaniyan xtapaxkit xlakata tlan natayaniyaw.

12. ¿Tuku kinkamasiyaniyan xliʼakxilhtit Dimitri?

¹² Kalichuwinaw tuku titaxtulh chatum tala chixku xalak Asia tiku wanikan Dimitri. Xla makgatsankgalh xtaskujut. Xlakata akglhuwa papa’ titaxtulh chu ni xtekgsa atanu taskujut, lakkaxwililh tlakg nalichuwinan Dios xlakata xlimasiyalh pi lipawan. Pero chuntiya titaxtulh papa’ chu ni xtekgsa taskujut. Alistalh, tatatlalh chu xtajatat tlawalh pi nialhla xtaxtulh. Dimitri tsukulh lakpuwan pi nitlan tlat xwanit chu nitlan chixku xlitaxtu, chu pi Jehová nialh xlipaxuwa tuku xtlawama. Pero akgtum  katsisni, aktsu xtsumat imprimirlilh maktum kapsnat niku xtatsokgtawilanit tuku wan Isaías 30:15: «Lakgtliwakgan nawanatit komo kaks natayayatit chu nakilipawanatit». Alistalh, aktsu tsumat maxkilh xtlat uma kapsnat chu wanilh: «Pa, akxni nalipuwana, kalakapastakti uma texto». Dimitri akxilhli pi xlakata Jehová xkamakgtayama, xfamilia chuntiya xkgalhikgo tuku nalilhakganankgo, tuku nawakgo chu niku natawilakgo. Dimitri wan: «Tuku xtalakaskin xaktlawalh wa pi kaks xaktayalh chu xaklipawa kiDios». Komo wix nachuna titaxtupat, liwana kakatsi pi Jehová lilakgaputsayan chu namaxkiyan litliwakga xlakata natayaniya.

13. ¿Tuku atanu limaklakaskin Jehová xlakata nakinkalimasiyaniyan pi makgapaxuwamaw?

¹³ Kalimaklakaskin natalan. Jehová tlan kamakgpuwantini natalan xlakata nakinkawanikgoyan xalaktlan tachuwin akxni tlakg maklakaskinaw. Chuna akgspulalh chatum tala puskat xalak Asia. Xla makgatsankgalh xtaskujut chu lu tatatlalh. Alistalh, xchixku tlawalh akgtum lanka talakgalhin chu nialh kgolotsin xalak congregación litaxtulh. Xlakata lu nitlan xlimakgkatsi tuku xtitaxtuma, tala wa: «Ni xakʼakgatekgsa tuku xlakata chuna xkiʼakgspulama. Xaklakpuwan pi xaktlawanit tuku nitlan chu pi nialh xakmakgapaxuwa Jehová». Wa xlakata, tasaskinilh Jehová pi xlimasiyanilh pi chuntiya xpaxki, chu xla kgalhtilh. ¿La kgalhtilh? Xla wan: «Lakgkgolotsin kintachuwinankgolh chu kimakgtayakgolh nakʼakgatekgsa pi Jehová chuntiya xkimpaxki». Titaxtulh kilhtamaku, wanilh Jehová pi xʼakxilhputumpara xtamakgtay. ¿Tuku lalh? Xla wampara: «Uma kilhtamaku kmakglhtinalh maktum carta nema natalan xalak congregación kimalakgachanikgolh. Akxni klikgalhtawakgalh, kmakgkatsilh pi Jehová xkinkgaxmatninit». Chuna la akxilhaw, xalaktlan tachuwin nema  kinkawanikgoyan amakgapitsin limasiya pi makgapaxuwamaw Jehová (Sal. 10:17).

14. ¿La kamaklakaskin Jehová natalan xlakata nakinkalimasiyaniyan pi makgapaxuwayaw?

¹⁴ Jehová na kinkalimasiyaniyan pi makgapaxuwayaw akxni kamaklakaskin natalan xlakata nakinkastakyawakgoyan. Akgtum liʼakxilhtit, kxapulana siglo, maklakaskilh apóstol Pablo xlakata xkatsokgnanilh makkutati cartas kstalaninanin Cristo xala uma kilhtamaku, chu kʼumakgolh cartas na xkastakyawa. ¿Tuku xlakata Jehová tlawalh pi Pablo xkamaxkilh umakgolh tastakyaw? Xlakata Jehová tlan likatsi chu xapaxkina, chu stakyawanan «chuna la tlawa chatum tlat xpalakata xkgawasa tiku lu paxki» (Prov. 3:​11, 12). Wa xlakata, komo wi tiku nakinkalistakyawayan tuku wan Biblia, ni kalakpuwaw pi Dios nialh kinkapaxkiyan. Wata uma limasiya pi xla chuntiya kinkapaxkiyan (Heb. 12:6). ¿Tuku atanu limasiya pi makgapaxuwa Jehová tuku tlawamaw?

ATANU TUKU LIMASIYA PI MAKGAPAXUWAYAW JEHOVÁ

15. ¿Tiku kamaxki Jehová xʼespíritu santo, chu tuku kinkalimasiyaniyan uma?

¹⁵ Jehová kamaxki xʼespíritu santo tiku makgapaxuwakgo (Mat. 12:18). Tlan xlilakpuwaw: «¿Klimasiya kkilatamat tayat nema espíritu santo tlawa pi nakgalhiyaw?». Akgtum liʼakxilhtit, ¿la uku tlakg kgalhkgalhinana nixawa akxni nina xlakgapasa Jehová? Akxni na’akxilha pi tlakg limasiyapat tayat nema espíritu santo tlawa pi nakgalhiyaw, liwana limasiya pi makgapaxuwapat Jehová. (Kaʼakxilhti recuadro « Tayat nema espíritu tlawa pi latamanin nakgalhikgo wa umakgolh...»).

16. Chuna la wan 1 Tesalonicenses 2:​4, ¿tiku kamaklakaskin Jehová xlakata nalichuwinankgo xalaktlan tamakatsinin? ¿Chu la limakgkatsiya uma?

¹⁶ Jehová kalakgayawa nalichuwinankgo xalaktlan tamakatsinin latamanin tiku makgapaxuwakgo (kalikgalhtawakga 1 Tesalonicenses 2:4). Xliʼakxilhtit chatum tala tiku wanikan Jocelyn limasiya pi xlikana. Akgtum kilhtamaku, lata takilh tsisa lu nitlan xmakgkatsi. Xla wan: «Xakmakgkatsi pi ni xakkgalhi litliwakga chu nitu xaktlawaputun. Pero uma kilhtamaku precursora xakwanit chu xkilakgchan nakkan lichuwinan Dios. Wa xlakata ktlawanilh oración Jehová chu kkalh». Uma tsisa, Jocelyn tachuwinalh Mary, chatum puskat tiku xatapaxuwan makgamakglhtinalh akgtum takgalhtawakga xalak Biblia. Titaxtulh makgapitsi papaʼ, Mary litachuwinalh Jocelyn pi ama tsisa  akxni xla lakgatlakgli malakcha, xtlawanima oración Dios chu kskinima xtamakgtay. ¿Tuku masiyanilh Jocelyn tuku titaxtulh? Xla wan: «Kmakgkatsilh pi Jehová xkiwanima: “Kimakgapaxuwaya”». Xlikana pi ni putum latamanin katikgaxmatkgolh tamakatsinin nema kalitachuwinanaw, pero tlan nalipawanaw pi Jehová lu paxuwa akxni akxilha pi lu liskujaw xlakata nakalitachuwinanaw amakgapitsin xatlan tamakatsinin.

17. ¿Tuku masiyaniyan xlakata talakgmaxtut tuku wan Vicky? (Salmo 5:12).

¹⁷ Jehová tlawa pi nalitamakgtayakgo talakgmaxtut tiku makgapaxuwamakgo (1 Tim. 2:​5, 6). Pero ¿chu komo tuwa makgkatsiyaw nakanajlayaw pi makgapaxuwamaw Jehová maski kanajlaniyaw talakgmaxtut chu tamununitawa? Kalakapastakwi pi ni putum kilhtamaku tlan nalipawanaw tuku kinkawaniyan kinakujkan, wata ankgalhin kalipawaw Jehová. Xla xaʼakgstitum kaliʼakxilha tiku kanajlanikgo talakgmaxtut, chu malaknunit pi nakasikulunatlawa (kalikgalhtawakga Salmo 5:12; Rom. 3:26). Chatum tala puskat tiku wanikan Vicky lu makgtayalh nalilakpuwan talakgmaxtut. Akxni xlilakpuwanita talakgmaxtut, xla wa: «Jehová makglhuwa xkilimasiyaninit pi lu xakgalhkgalhina [...]. Pero maski chuna, xtachuna la akit xakwanima: “Wix nila paxkiya chatum lataman la akit. Xtamakamastan minKgawasa nila xapa kintalakgalhin”». Akxni lilakpuwa talakgmaxtut makgkatsilh pi Jehová xlikana xpaxki. Xtachuna la Vicky, komo nalilakpuwanaw talakgmaxtut, namakgkatsiyaw pi Jehová kinkapaxkiyan chu namakanajliyaw kinakujkan pi makgapaxuwa tuku tlawayaw.

18. ¿Tuku tlan nalipawanaw komo chuntiya napaxkiyaw kinTlatkan xalak akgapun?

¹⁸ Maski lu naliskujaw xlakata nalilatamayaw tuku katsininitaw kʼuma artículo, max namin kilhtamaku nataxlajwaniyaw tsinu chu max nalilakpuwanaw komo makgapaxuwamaw Jehová. Komo chuna naʼakgspulayan, kalakapastakti pi xla makgapaxuwa tuku tlawakgo «tiku chuntiya paxkikgo» (Sant. 1:12). Wa xlakata, chuntiya katalakatsuwini Jehová chu kaliskujti naʼakxilha putum tuku xla tlawa xlakata nalimasiyaniyan pi makgapaxuwaya. Chu ankgalhin kalakapastakti pi Dios «ni lu makgat kinkawilanin kinchatunukan» (Hech. 17:27).