1, 2. ¿Tuku militlawat akxni nina tamunuya?

 AKGKITSIS kata nema titaxtunit, liwaka akgtum millón latamanin tamunukgonit chu xtatayananin Jehová litaxtukgonit. Lhuwa umakgolh latamanin lakgapaskgolh xaxlikana lata akxni aktsujku xwankgonit, chuna la Timoteo (2 Tim. 3:​14, 15). Amakgapitsin lakgapaskgolh Jehová akxni laklankata xwankgonit o asta akxni lu xlinkgoya kata. Nina makgas, chatum puskat tiku xlimakgalhtawakgemaka Biblia tamunulh akxni xkgalhi 97 kata.

² ¿Limakgalhtawakgepaka Biblia? ¿O minatlatni xtatayananin Jehová litaxtukgo chu masiyanimakgon xaxlikana? Komo chuna, max lilakpuwampat natamunuya. ¡Chu uma lu tlan! Pero akxni nina tamunuya wi tuku militlawat: natamakamastaniya Jehová. K’uma artículo nalichuwinanaw tuku kilhchanima tamakamastanikan Jehová. Na nalichuwinanaw tuku xlakata ni milipekuanat natamakamastaniya Jehová chu natamunuya komo makgatsiyata tuku talakaskin.

¿TUKU KILHCHANIMA TAMAKAMASTANIKAN JEHOVÁ?

3. Kakalichuwinanti makgapitsi latamanin tiku xtamakamastanikgonit Dios makgasa.

³ Anta kBiblia, akxni limaklakaskinkan tachuwin tamakamastakan, kilhchanima wi tuku tanu nawilikan xlakata xasanto nalitaxtu o xlakata naskujnani Dios. Israel akgtum kachikin nema xtamakamastaninit Jehová. Pero makgapitsi israelitas xtamakamastanikgonit Jehová xlakata natlawakgo lu xlakaskinka taskujut. Akgtum li’akxilhtit, Jehová laksakli Aarón xlakata sacerdote tiku tlakg kgalhi limapakgsin xlitaxtulh. Wa xlakata, kxmuxtin tuku xlitaʼakgchi xkgalhi placa xaʼoro «nema xlimasiya pi xtamakamastaninit Dios» (Lev. 8:9). Nazareos na xtamakamastanikgonit Jehová. Tachuwin nazareo minacha ktachuwin xaʼhebreo nazír, nema kilhchanima «tanu wilikanit» o  «makamastakanit». Xlimapakgsin Moisés xwan pi nazareos xlimakgantaxtitkan xwanit makgapitsi limapakgsin nema amakgapitsin israelitas ni xlitlawatkan xwanit (Núm. 6:​2-8).

4. 1) ¿Tuku kilhchanima natamakamastaniyaw Jehová? 2) ¿Tuku militlawat xlakata nalimasiyaya pi miʼakstu lakgmakgankana? (Na kaʼakxilhti dibujo).

⁴ Tamakamastanikan Jehová kilhchanima pi nalaksakaw kstalaninanin Jesús nalitaxtuyaw chu pulana nawiliyaw kkilatamatkan xtalakaskin Dios. ¿Chu tuku kilhchanima pulana nawiliyaw xtalakaskin Dios? Jesús wa: «Komo wi tiku kistalaniputun, akstu kalakgmakganka» (Mat. 16:24). Akxni wix natamakamastaniya Jehová, natalakaskin nalakgmakgana putum tuku Dios ni lakgati (2 Cor. 5:​14, 15). Uma na kilhchanima pi nalakgmakgana «xtatlaw xamakglakgalhina makni», chuna la talakgxtumit nema ni xlitatlawat (Gál. 5:​19-21; 1 Cor. 6:18). ¿Akgtum takuka nakitaxtuniyan natlawaya uma? Ni akgtum takuka katiliʼakxilhti komo paxkiya Jehová chu liwana kanajlaya pi komo nakgalhakgaxpata xlimapakgsin lu tlan nakitaxtuniyan (Sal. 119:97; Is. 48:​17, 18). Chatum tala tiku wanikan Nicholas, wan: «Tlan nali’akxilha xlimapakgsin Jehová chuna la tuku lilakgatalawilikan akgtum pulachin, nema ni maxkiyan talakaskin natlawaya tuku tlawaputuna, o tlan naliʼakxilha la tuku kalilakgatalawilikanit leones xlakata nitu natlawanikgoyan».

5. 1) ¿La tamakamastanikan Jehová? 2) ¿Tuku litalakgpali tamakamastanikan Dios chu tamunukan? (Na kaʼakxilhti dibujos).

⁵ ¿La natamakamastaniya Jehová? Natlawaniya akgtum oración niku namalaknuniya pi kajwatiya xla nakakninaniya chu pi tuku tlakg xlakaskinka nawan kmilatamat wa pi natlawaya xtalakaskin. Uma kilhchanima pi namalaknuniya Jehová pi napaxkiya «xliputum minaku chu xliputum milatamat chu xliputum mintalakapastakni chu xliputum militliwakga» (Mar. 12:30). Akxni natamakamastaniya Jehová kaj  miʼakstu chuna natlawaya, kajwatiya wix chu Jehová nakatsiyatit uma. Pero akxni natamunuya, amakgapitsin na’akxilhkgo; chuna xlakan nakatsikgo pi wix tamakamastaninitata Jehová. Tamalaknun nema natlawaniya Jehová akxni natamakamastaniya ni kaj akgtum takgaman. Xla lakaskin namakgantaxtiya chu talakaskin naliskuja chuna natlawaya (Ecl. 5:​4, 5).

¿TUKU NAMAKGPUWANTINIYAN NATAMAKAMASTANIYA JEHOVÁ?

6. ¿Tuku makgpuwantini chatum lataman natamakamastani Jehová?

⁶ Tuku namakgpuwantiniyan natamakamastaniputuna Jehová wa pi paxkiya. Uma tapaxkit ni kajwatiya puntsu makgapala, wata staktilhanit chuna la wix lakgapastilhanita Jehová chu chuna la kgalhitilhanita «xatakgatsin takatsin» chu «taʼakgatekgsni nema masta xʼespíritu Dios» (Col. 1:9). Chuna la likgalhtawakgatilhanita Biblia, liwana kanajlanita pi Jehová xlikana lama, pi limaklakaskilh xʼespíritu santo xlakata xmatsokgninalh Biblia chu pi lakkaxwilinit xkachikin chu maklakaskin xlakata namakgantaxti xtalakaskin.

7. ¿Tuku xlitlawat tiku tamakamastaniputun Jehová?

⁷ Tiku tamakamastaniputun Jehová, liwana xlilakgapasat tuku xapulana masiya Biblia, xlikgalhakgaxmatat xlimapakgsin Dios chu talakaskin nakalitachuwinan amakgapitsin tuku kanajla (Mat. 28:​19, 20). Nachuna, lu xlipaxkit Jehová chu xliputum xnaku kajwatiya xla nakakninaniputun. ¿Chuna tlawapat wix? Komo paxkiya Jehová xliputum militliwakga, ni katitamakamastani chu ni katitamunu kaj xlakata namakgapaxuwaya tiku limakgalhtawakgeman Biblia. Chu komo minatlatni xtatayananin Jehová, ni katitamunu  kaj xlakata nakamakgapaxuwaya o kaj xlakata miʼamigos nachuna tlawamakgo.

8. ¿Tuku namakgpuwantiniyan natlawaya komo paxtikatsiniya Jehová xlakata putum tuku tlawanit mimpalakata? (Salmo 116:​12-14).

⁸ Komo nalilakpuwana putum tuku Jehová tlawanit mimpalakata, namakgpuwantiniyan natamakamastaniya xlakata paxtikatsiniya (kalikgalhtawakga Salmo 116:​12-14). Biblia wan pi «putum xatlan chu nema xalaktlan tamaskiwin» wa Jehová masta (Sant. 1:17). Akgtum lu xlakaskinka tamaskiwin nema kinkamaxkinitan wa xtamakamastan xKgawasa, Jesús. Xlakata uma lu xastlan tamaskiwin, wix tlan xʼamigo Dios nawana chu tlan nalatapaya putum kilhtamaku (1 Juan 4:​9, 10, 19). Pulaktum la nalimasiyaniya pi paxtikatsiniya tapaxkit nema limasiyaniyan chu putum tuku tlawanit mimpalakata wa pi namakamaxkiya milatamat (Deut. 16:17; 2 Cor. 5:15). Wa uma tuku lichuwinan libro Kalipaxuwa latamat, ktakgalhtawakga 46, punto 4, niku na min akgtum video nema akgtutu minuto makgapala chu wanikan Tamaskiwin nema tlan namaxkiyaw Dios.

¿TLANTIYA NATAMAKAMASTANIYA DIOS CHU NATAMUNUYA?

9. ¿Tuku xlakata ni mililakpuwanat pi na militamakamastanit Jehová kaj xlakata amakgapitsin chuna tlawamakgo?

⁹ Max wix makgkatsiya pi ninala natamakamastaniya Jehová chu natamunuya. Max talakaskinku wi tuku nalakgpaliya xlakata nakgalhakgaxpata Jehová, o max talakaskin tlakg namatliwakglha mintakanajla (Col. 2:​6, 7). Kalakapastakti pi ni putum tiku kalimakgalhtawakgemaka Biblia lakxtum chuna la staka xtakanajlakan. Chu ni putum kamanan lakxtum tliwakga kgalhikgo xtakanajlakan maski watiya xkatakan. Wa xlakata kalilakpuwanti tuku wix tlan tlawaya, chu ni katamalakxtupi tuku tlawakgo amakgapitsin chu tuku wix tlawaya (Gál. 6:​4, 5).

10. ¿Tuku tlan natlawaya komo akxilha pi ninala natamakamastaniya Dios chu natamunuya? (Na kaʼakxilhti recuadro « Komo minatlatni xtatayananin Jehová litaxtukgo»).

¹⁰ Komo akxilha pi ninala tamakamastaniya Jehová, chuntiya kaliskujti xlakata chuna natlawaya alistalh. Kaskini Jehová pi kamakgtayan nalakgpaliya tuku talakaskin (Filip. 2:13; 3:16). Liwana kakatsi pi xla nakgaxmata miʼoraciones chu namakgtayayan (1 Juan 5:14).

¿TUKU XLAKATA MAKGAPITSI NI TAMAKAMASTANIKGO JEHOVÁ?

11. ¿Tuku natlawa Jehová xlakata nakinkamakgtayayan ni namakgxtakgaw?

¹¹ Makgapitsi latamanin tlantiya xtamakamastanikgolh Jehová chu xtamunukgolh, pero nichuna tlawakgo. Max pekuankgo akxni lilakpuwankgo pi natlawakgo akgtum lanka talakgalhin chu nakatamakxtukan kcongregación. Pero Biblia wan pi Jehová nakamaxki kskujnin putum tuku maklakaskinkgo “xlakata nalatamakgo chuna la xla lakaskin” chu namakgapaxuwakgo (Col. 1:10). Wa xlakata, tlan nalipawana pi Jehová namaxkiyan litliwakga nema namaklakaskina xlakata natlawaya tuku tlan. Xla kamakgtayanita lhuwa kskujnin chuna natlawakgo (1 Cor. 10:13). Wa xlakata tlakg lhuwa anan tiku chuntiya skujnanimakgo Jehová nixawa tiku katamakxtukanit kcongregación. Jehová namakgtayayan xlakata ni namakgxtakga.

12. ¿Tuku nakinkamakgtayayan ni natlawayaw akgtum lanka talakgalhin?

¹² Xlakata putum akinin makglakgalhinanin, min kilhtamaku tlawaputunaw tuku nitlan (Sant. 1:14). Pero tlan namakgatlajayaw tuku nitlan tlawaputunaw. Wix lakgchanan nalaksaka tuku natlawaya chu tuku ni natlawaya. Maski makgapitsin latamanin wankgo pi  nila malakgachokgokan tuku nitlan tlawaputunkan, uma ni xlikana. Tlan nakatsiniyaw namalakgachokgoyaw tuku makgkatsiyaw chu tuku tlawaputunaw. Tipalhuwa tuku tlan nakinkamakgtayayan: chali chali natlawaniyaw oración Jehová, nalakkaxwiliyaw tuku kiʼakstukan nalikgalhtawakgayaw, naʼanaw ktamakxtumit chu nalichuwinanaw Dios. Komo natlawayaw putum uma, nakgalhiyaw litliwakga xlakata namakgantaxtiyaw tuku malaknuniw Jehová akxni tamakamastaniw. Kalakapastakwi pi ni kiʼakstukan wilaw, Jehová kinkamakgtayaman (Gál. 5:16).

13. ¿Tuku liʼakxilhtit kinkawilinin José?

¹³ Tlakg ni tuwa katimakgkatsi ni namakgxtakga Jehová komo alisokg nalilakpuwana tuku natlawaya komo namatlawiputunkana tuku nitlan. Anta kBiblia tekgsaw xliʼakxilhtitkan tiku chuna tlawakgolh, chu xlakan na makglakgalhinanin xwankgonit chuna la akinin. Kalilakpuwaw José. Xpuskat Potifar makglhuwa wanilh pi xtatalakgxtumilh. Pero José liwana xkatsi la nakgalhtinan. Biblia wan pi «xla ni xlakaskin» chu xwani: «Akit ni ktitlawalh tuku lu nitlan chu naklakgalhinan kxlakatin Dios» (Gén. 39:​8-10). Putum uma limasiya pi José alisokg xlilakpuwanit tuku xʼama tlawa akxni xpuskat Potifar xmatlawiputulh tuku nitlan. Wa xlakata, akxni xmatlawiputunkan tuku nitlan, tlakg ni tuwa makgkatsilh nawan pi ni xʼama tlawa.

14. ¿Tuku tlan natlawayaw xlakata nalakgmakganaw putum tuku Jehová xkajni?

¹⁴ ¿La tlan nastalaniyaw xliʼakxilhtit José chu ni namakgatsankgananiyaw Jehová? Nalilakpuwanaw la uku tuku natlawayaw akxni nakinkamatlawiputunkanan tuku nitlan. Talakaskin lakapala nalakgmakganaw tuku Jehová xkajni. Ni makgtiy nalilakpuwanaw tuku natlawayaw (Sal. 97:10; 119:165). Uma nakinkamakgtayayan ni natlawayaw akgtum lanka talakgalhin. Chuna akxni nakinkamatlawiputunkanan tuku nitlan, liwana katsiyawa nawan tuku natlawayaw.

15. ¿La tlan nalimasiyaya pi “xatapaxuwan tlawaputuna xtalakaskin” Jehová? (Hebreos 11:6).

¹⁵ Max wix katsiya pi tekgsnita xaxlikana chu skujnaniputuna Jehová xliputum minaku. Pero ¿wi tuku malakgachokgoman xlakata nina natamakamastaniya chu natamunuya? Komo chuna, tlan natlawaya tuku tlawalh mapakgsina David chu natasaskiniya Jehová: «Liwana kakilakputsanani, oh, Dios, chu kalakgapasti kinaku. Kaʼakxilhti tuku wi kkinaku chu kakatsi  tuku klilakgaputsa. Kaʼakxilhti komo kinaku wi tuku nitlan tlawaputun, chu kakilipi ktiji nema linan klatamat nema nikxni sputa» (Sal. 139:​23, 24). Komo naliskuja xlakata natamakamastaniya Jehová chu natamunuya, nalimasiyaya pi putsapat Jehová o xatapaxuwan tlawaputuna xtalakaskin. Chu Biblia liwana wan pi xla kasikulunatlawa tiku chuna tlawakgo (kalikgalhtawakga Hebreos 11:6).

CHUNTIYA KATALAKATSUWINI JEHOVÁ

16, 17. ¿La kalimin Jehová xkamanan kskujnin anta kcongregación? (Juan 6:44).

¹⁶ Jesús wa pi wa Jehová tiku kalimin latamanin kxkachikin (kalikgalhtawakga Juan 6:44). ¡Uma lu tlan kinkamamakgkatsiniyan! ¿Xlilakpuwanita uma? Jehová wi tuku tlan akxilha kxnakujkan chatunu latamanin tiku kalimin kxkachikin. Xla kalaksaknit chatunu kskujnin chu lu xtapalh kaliʼakxilha (Deut. 7:6; nota). Chu wix na wa Jehová tiku liminitan.

¹⁷ Kgawasa, komo minatlatni masiyanimakgon xaxlikana, max lakpuwana pi wila kcongregación kaj xlakata minatlatni linkgoyan chu ni wa Jehová tiku liminitan. Pero kaʼakxilhti tuku wan Biblia: «Katalakatsuwinitit Dios, chu xla nakatalakatsuwiniyan» (Sant. 4:8; 1 Crón. 28:9). Uma wamputun pi komo wix pulana natalakatsuwiniya Jehová, xla na natalakatsuwiniyan. Jehová ni lakpuwan pi wix kaj achatum kskujni. Putum tiku wilakgo kcongregación anta wilakgo xlakata Jehová kalimilh chatunu chatunu. Chu na wa kaliminit xkamanan kskujnin. Akxni wi tiku talakatsuwini Jehová, xla na talakatsuwini, chuna la wan Santiago 4:8 (katamalakxtupi uma tuku wan 2 Tesalonicenses 2:13).

18. ¿Tuku naʼakxilhaw kʼatanu artículo? (Salmo 40:8).

¹⁸ Akxni Jesús tamunulh limasiyalh pi xatapaxuwan xtlawaputun tuku xTlat kskinilh (kalikgalhtawakga Salmo 40:8; Heb. 10:7). Akxni wix natamakamastaniya Jehová chu natamunuya, stalanipat nawan xliʼakxilhtit Jesús. Kʼatanu artículo naʼakxilhaw tuku namakgtayayan chuntiya naskujnaniya Jehová akxni tamununitata nawan.