1, 2. 1) ¿La akxilhaw Biblia xtatayananin Jehová? 2) ¿Tuku tlakg lakgatiya nema lichuwinan Biblia?

XTATAYANANIN Jehová lu xlakaskinka akxilhaw Biblia. Uma libro tlan kinkamamakgkatsiniyan, kinkamaxkiyan takgalhkgalhin chu tlan lipawanaw tuku kinkawaniyan (Rom. 15:4). Ni xtalakapastakni latamanin wata xla Dios (1 Tes. 2:13).

² Atsinu ni putum akinin wi tuku tlakg lakgatiyaw nema min kBiblia. Makgapitsi lu lakgatikgo Evangelios, xlakata limasiya lu lakwan xtayat Jehová akxni lichuwinan Jesús (Juan 14:9). Amakgapitsi lakgatikgo libros nema lichuwinankgo tuku aku nala, la Apocalipsis, o Revelación, nema lichuwinan «wantu nimpala makgas kilhtamaku nakgantaxtuy» (Apoc. 1:1, Hua Xasasti Talaccaxlan, 1999). Amakgapitsi tlan kamamakgkatsini libro xla Salmos, chu atanu lu lakgatikgo xtastakyaw Proverbios. Liwana tasiya pi Biblia tlawakanit xpalakata putum latamanin.

3, 4. 1) ¿La kaʼakxilhaw kilikgalhtawakgakan? 2) ¿Tuku likgalhtawakga anan xpalakata tanu tanu latamanin?

³ Xlakata lu xlakaskinka akxilhaw Biblia, na lu xlakaskinka  akxilhaw kilikgalhtawakgakan, nema anta takilhtikgonit. Libros, folletos, revistas chu amakgapitsi likgalhtawakga litaxtu taway xaʼespiritual nema Jehová kinkamaxkiyan (kaʼakxilhti recuadro «¿Tuku kilhchanima?»). Kinkamakgtayayan tlan natalalinaw Dios chu tliwakga natawila kintakanajlakan (Tito 2:2).

⁴ Lhuwa kilikgalhtawakgakan katlawakanit xpalakata xtatayananin Jehová. Amakgapitsi ni lhuwa tiku katlawanikanit, la kamanan o natlatni. Chu atsinu ni putum artículos chu videos nema wilakgolh kkimpaginajkan kʼInternet katlawanikanit tiku ni xtatayananin Jehová. Putum uma limasiya pi Jehová makgantaxtinit tuku xwanit xlakata lhuwa taway xaʼespiritual xʼama kamaxki putum latamanin (Is. 25:6).

5. ¿Tuku liwana katsiyaw?

⁵ Kimputumkan tlakg lhuwa kilhtamaku kgalhiputunaw xlakata nalikgalhtawakgayaw Biblia chu kilikgalhtawakgakan. Max nila watiya kilhtamaku nalimaxtuyaw xlakata nalikgalhtawakgayaw akgatunu likgalhtawakga nema makglhtinanaw. Pero liwana katsiyaw pi namakgapaxuwayaw Jehová komo liwana maklakaskinaw kinkilhtamakujkan xlakata nalikgalhtawakgayaw chu nalakputsananiyaw Biblia chu kilikgalhtawakgakan (Efes. 5:15, 16). Maski chuna, anan pulaktum tuku kuentajkilitlawatkan. ¿Tuku uma?

6. ¿Tuku max natlawa pi ni liwana nalitamakgtayayaw putum tuku Jehová kinkamaxkiyan?

⁶ Komo ni kuentajtlawayaw, max nalakpuwanaw pi makgapitsi tuku min kBiblia o likgalhtawakga nila nakinkamasiyaniyan tuku xlakaskinka. Akgtum liʼakxilhtit, ¿tuku natlawayaw komo lakpuwanaw pi ni lu kinkamakgtayayan pulaktum tuku min kBiblia? ¿O tuku natlawayaw komo ni akinin kinkatsokgnikan maktum likgalhtawakga? ¿Kaj xalakapala nalikgalhtawakgayaw o ni para tsinu nalikgalhtawakgayaw? Komo ni xlikgalhtawakgaw ni xlitamakgtayaw tuku lu xlakaskinka. ¿La natlawayaw xlakata ni chuna nakinkaʼakgspulayan? Kalakapastakwi pi putum likgalhtawakga wa Jehová kinkamaxkiman. Biblia wan: «Akit, Jehová, akit miDios, Tiku masiyaniyan xlakata tlan nakitaxtuniyan» (Is. 48:17). Kʼuma artículo nalichuwinanaw pulaktutu tuku nakinkamakgtayayan liwana namaklakaskinaw putum Biblia. Na naʼakxilhaw la tlan nalitamakgtayayaw putum tuku Jehová kinkamaxkiyan.

7. ¿Tuku xlakata xatapaxuwan kilimakglhtinatkan atanu talakapastakni akxni nalikgalhtawakgayaw Biblia?

⁷ Xatapaxuwan kamakglhtinaw atanu talakapastakni akxni nakgalhtawakgayaw. Xlikana pi makgapitsi tuku min kBiblia ni lhuwa latamanin katsokgnika. Pero 2 Timoteo 3:16 liwana wan pi «xlipaks yuma ntatsokgnun, paks ntimapuwanikgolh Dios lantla natsokgkgoy wa nti ntsokgkgonit, chu na lu[...] tlan». Wa xlakata akxni nalikgalhtawakgayaw Biblia xatapaxuwan kamakglhtinaw atanu talakapastakni (kaʼakxilhti recuadro «¿Tuku kilhchanima?»). Akgtum liʼakxilhtit, chatum tala lakapastaka pi kaj pulaktum tuku xalak Biblia, lhuwa tuku namasiyani. Uma makgtaya nakatsini tuku xasasti. Wa xlakata akxni nina likgalhtawakgayaw Biblia, kaskiniw Jehová kakinkamakgtayan xatapaxuwan namakglhtinanaw  atanu talakapastakni, chu kakinkamaxkin liskgalala xlakata naʼakxilhaw tuku kinkamasiyaniputunan (Esd. 7:10; kalikgalhtawakga Santiago 1:5).

8, 9. 1) ¿Tuku nakinkakgalhskinkanan akxni nalikgalhtawakgayaw Biblia? 2) ¿Tuku kinkamasiyaniyan xlakata Jehová tuku xlimakgantaxtitkan lakgkgolotsin?

⁸ Kiakstukan kakinkakgalhskinkan. Akxni nalikgalhtawakgayaw Biblia, tlan nakinkatlawanikanan umakgolh akgtutu takgalhskinin: «¿Tuku kimasiyani xlakata Jehová? ¿La naklimaklakaskin kkilatamat? ¿La nakkalimakgtaya amakgapitsin?». Komo lilakpuwanaw umakgolh takgalhskinin, tlakg liwana nalitamakgtayayaw kintakgalhtawakgakan xalak Biblia. Kalichuwinaw akgtum liʼakxilhtit. Biblia masta akgtum lista xlakata tuku xlitlawatkan lakgkgolotsin xalak congregación (kalikgalhtawakga 1 Timoteo 3:2-7). Xlikana, ni putum lakgkgolotsin litaxtuyaw. Wa xlakata max nalakpuwanaw pi umakgolh versículos ni lu kinkamakgtayakgoyan. Pero namaklakaskinaw umakgolh takgalhskinin xalak párrafo xlakata naʼakxilhaw la kinkamakgtayayan kimputumkan.

⁹ «¿Tuku kimasiyani xlakata Jehová?». Lista xlakata tuku xlitlawatkan lakgkgolotsin kinkamasiyaniyan pi Jehová lakaskin namakgantaxtikgo lu laktlan limapakgsin. ¿Tuku xlakata? Xlakata Jehová lu xtapalh akxilha  congregación. Biblia wan pi Jehová «lilakgmaxtulh xkgalhni» xKgawasa (Hech. 20:28). Wa xlakata Dios lakaskin pi lakgkgolotsin nawilikgo tlan liʼakxilhtit. Nachuna, nakaskini kuenta xlakata la nakalikatsinikgo tiku xalak congregación. Jehová lakaskin pi tlan namakgkatsiyaw xlakata lakgkgolotsin kinkakuentajtlawaman (Is. 32:1, 2). Chuna la akxilhaw, lista xlakata tuku xlitlawatkan lakgkgolotsin kinkamasiyaniyan pi Jehová lu kinkapaxkiyan.

10, 11. 1) ¿La kinkamakgtayayan nalikgalhtawakgaparayaw lista nema xlimakgantaxtitkan lakgkgolotsin? 2) ¿La nalimaklakaskinaw uma lista xlakata nakamakgtayayaw amakgapitsin?

¹⁰ «¿La naklimaklakaskin kkilatamat?». Komo lakgkgolotsin xalak congregación litaxtuyaw, ni lhuwa kilhtamaku natitaxtu akxni nalikgalhtawakgaparayaw uma lista chu kiliskujatkan xlakata tlakg tlan namakgantaxtiyaw. Chu komo ni lakgkgolotsin akinin pero kgolotsin wamputunaw, talakaskin naliskujaw xlakata tlakg tlan namakgantaxtiyaw tuku kinkaskinikanan (1 Tim. 3:1). Pero kimputumkan tlan wi tuku kinkamasiyaniyan uma lista. Akgtum liʼakxilhtit, Jehová lakaskin pi kimputumkan ni namalakatsaliyaw akxni wi tuku naskinaw chu pulana nalakpuwanaw tuku natlawayaw (1 Ped. 4:7; Filip. 4:5). Akxni lakgkgolotsin wilikgo lu tlan liʼakxilhtit kcongregación, kinkamasiyanikgoyan tuku katsinikgo chu na tlan chuna natlawayaw (Heb. 13:7; 1 Ped. 5:3).

¹¹ «¿La nakkalimakgtaya amakgapitsin?». Lista niku min tuku xlimakgantaxtitkan lakgkgolotsin tlan nakinkamakgtayayan nakamasiyaniyaw tiku kamakgalhtawakgeyaw chu amakgapitsin pi lakgkgolotsin ni xtachuna tiku pulalinkgo atanu takanajla. Uma lista na kinkamalakapastakayan pi lakgkgolotsin lu skujkgo. Akxni nalilakpuwanaw taskujut nema tlawakgo, tlakg nakamaxkiyaw kakni (1 Tes. 5:12). Chu akxni tlakg nakamaxkiyaw kakni, tlakg xatapaxuwan naskujkgo kcongregación (Heb. 13:17).

12, 13. 1) ¿Tuku takgalhskinin tlan nalakputsananiyaw? 2) ¿Tuku tekgsaw akxni lakputsananiyaw pulaktum tuku lichuwinan Biblia? Kawili akgtum liʼakxilhtit.

¹² Tlakg kalakputsanaw. Akxni nalikgalhtawakgayaw Biblia, tlan naputsaniyaw xtakgalhtin umakgolh takgalhskinin:

• ¿Tiku tsokgli uma tuku min kBiblia?

• ¿Tuku kilhtamaku chu niku tsokgka?

• ¿Tuku xlakaskinka lalh akxni xtsokgmaka uma libro?

Komo chuna nalakputsananiyaw, nakinkamakgtayayan nakatsiniyaw tuku xasasti.

¹³ Kalichuwinaw akgtum liʼakxilhtit. Anta kʼEzequiel 14:13, 14, Jehová wa pi komo akgtum kachikin xlakgalhinalh kxlakatin, xʼama malakgsputu chu xʼama masputu xtaway chu xʼanimales. Pero alistalh wa: «Komo umakgolh kgalhtutu lakchixkuwin Noé, Daniel chu Job, anta xlatamakgolh, kajwatiya xlakan xlakgtaxtukgolh xlakata xaʼakgstitum litaxtukgo». Komo tlakg nalakputsananaw, naʼakxilhaw pi Ezequiel tsokgli umakgolh versículos max 612 kata akxni nina xmin Jesús. Maski xtitaxtunita lhuwa ciento kata lata xnikgonit Noé chu Job, Jehová chuntiya xlakapastaka pi ni xmakgatsankgananikgonit. Pero Daniel chuntiya xlama. Max 20 kata xkgalhi akxni Jehová wa pi xaʼakgstitum xlitaxtu la Noé chu Job. ¿Tuku kinkamasiyaniyan? Pi Jehová kuenta katlawani chu lu xlakaskinka kaʼakxilha kskujnin tiku ni makgxtakgkgo, maski lakgkgawasanku (Sal. 148:12-14).

14. 1) ¿La kamakgtaya kamanan tuku tsokgkanit xpalakatakan? 2) ¿La kamakgtaya amakgapitsin? (Kaʼakxilhti xapulana dibujo).

¹⁴ Tuku katsokgnikan kamanan. Lichuwinawa pi kimputumkan tlan katsiniyaw xliputuminika Biblia. Nachuna, tlan nakatsiniyaw xlakata putum kilikgalhtawakgakan. Kaʼakxilhwi makgapitsi liʼakxilhtit. Nina makgas, Jehová kinkamaxkinitan lhuwa artículos chu libros xpalakata kamanan ^[1] (kaʼakxilhti nota niku kgalhsputa artículo). Uma tuku katsokgnikanit kamakgtaya natayanikgo tuku tuwa titaxtukgo kʼescuela chu atanu taʼakglhuwit. Pero ¿la nalitamakgtayayaw kimputumkan umakgolh artículos chu libros? Komo nakalikgalhtawakgayaw, nakatsiyaw tuku taʼakglhuwit kgalhikgo kamanan chu tlan nakamakgtayayaw chu nakamakgpuwantiniyaw.

15. ¿Tuku xlakata na nalikgalhtawakgakgo tiku laklankata tuku katsokgnikanit kamanan?

¹⁵ Kstalaninanin Cristo tiku laklankata ni xlilakpuwanatkan pi ni talakaskin nalikgalhtawakgakgo tuku katsokgnikanit kamanan. Uma xlimasiyalh pi tlankajwanankgo. Tiku laklankata na titaxtukgo tuku tuwa nema lichuwinankgo umakgolh artículos. Akgtum liʼakxilhtit, kimputumkan xlilat nakgalhmakgtayayaw kintakanajlakan, namakgatlajayaw tuku makgkatsiyaw, natayaniyaw akxni amakgapitsi kinkamatlawiputunkgoyan tuku nitlan, chu nalakgmakganaw tiku ni xlilat nakatalalinaw chu tuku ni xlilat nalilakgastananaw. Tuku katsokgnikan kamanan na takilhtinit kBiblia. Wa xlakata kimputumkan tlan nalitamakgtayayaw.

16. ¿La atanu kamakgtaya kamanan kilikgalhtawakgakan?

¹⁶ Likgalhtawakga xpalakata kamanan na kinkamakgtayayan tlakg tlan natalalinaw Jehová (kalikgalhtawakga Eclesiastés 12:1, 13). Pero tiku laklankata na tlan nalitamakgtayakgo. Akgtum liʼakxilhtit, ¡Despertad! xla abril kata 2009 xlimin akgtum artículo xpalakata kamanan nema xwanikan «¿Cómo disfrutar la lectura de la Biblia?». Uma artículo xwan makgapitsi tuku tlan xtlawaka chu akgtum recuadro nema tlan xchukuxtukan chu xmakikan xlakata nalikgalhtawakgakan. ¿Kamakgtayalh tiku laklankata? Chuna. Chatum puskat tiku tamakgaxtokgnit chu kgalhi kamanan wa pi tuwa xmakgkatsi nalikgalhtawakga Biblia, wa xlakata tlawalh tuku xwan uma artículo. La uku lu lipaxuwa akxni likgalhtawakga chu akxni akxilha pi putum libros xalak Biblia watiya tuku lichuwinankgo. Uma makgtaya naʼakxilha xliputuminika tuku lichuwinan Biblia. Xla wan: «La uku tlakg klakgati akxni klikgalhtawakga».

17, 18. ¿La kinkamakgtayayan tuku katsokgnikanit putum latamanin? Kalichuwinanti akgtum liʼakxilhtit.

¹⁷ Tuku katsokgnikan putum latamanin. Kkata 2008, tsukuw tlawayaw revista Makatsinina nema natalikgalhtawakga, chu tlawaka xpalakata xtatayananin Jehová.  Pero na tlawayaw revistas xpalakata tiku ni xtatayananin Jehová. ¿La liwana nalitamakgtayayaw? Kawiliw akgtum liʼakxilhtit. Kalilakpuwaw pi wi tiku waniyaw kakinkataʼan kpukgalhtawakga chu wan pi naʼan. Xlikana pi lu nalipaxuwayaw. Chu akxni matitaxtikama taʼakgchuwin, max nalakpuwanaw la makgkatsima chu la namakgtaya kxlatamat tuku katsinima. Putum uma natlawa pi tlakg napaxtikatsininanaw xlakata tuku talichuwinama ktaʼakgchuwin.

¹⁸ Max nachuna nakinkaʼakgspulayan akxni nalikgalhtawakgayaw tuku katsokgnikanit putum latamanin. Akgtum liʼakxilhtit, kalilakpuwaw Makatsinina nema tamakgpitsi chu artículos xla jw.org. Umakgolh lichuwinan Biblia chuna la ni tuwa naʼakgatekgskgo tiku ni xtatayananin Jehová. Akxni kalikgalhtawakgayaw, tlakg liwana akgatekgsaw tuku masiya Biblia. Chu uma tlawa pi tlakg xlakaskinka nakaʼakxilhaw. Umakgolh na kinkamasiyaniyan atanu la nalichuwinanaw kintakanajlakan. Revista ¡Despertad! na kinkamakgtayayan tlakg nakanajlayaw pi wi chatum Malakatsukina. Na kinkamasiyaniyan la nakgalhmakgtayayaw tuku kanajlayaw (kalikgalhtawakga 1 Pedro 3:15).

19. ¿La nalimasiyaniyaw Jehová pi paxtikatsiniyaw putum taway xaʼespiritual?

¹⁹ Liwana tasiya pi Jehová kinkamaxkinitan lhuwa taway xaʼespiritual xlakata nalitamakgtayayaw (Mat. 5:3). Wa xlakata, chuntiya kalikgalhtawakgaw chu kalilatamaw tuku masiya chu xtastakyaw. Komo chuna natlawayaw, lu tlan nakinkakitaxtuniyan chu nalimasiyaniyaw Jehová pi paxtikatsiniyaw putum taway xaʼespiritual (Is. 48:17).