1, 2. 1) ¿Tuku tuwa titaxtukgonit makgapitsi kinatalankan? 2) ¿Tuku takgalhskinin natakgalhti la uku?

CHATUM tala wanikan Lije wan pi akxni tsukulh talachipat anta kBurundi, xla chu xfamilia xwilakgolh kxalanka tamakxtumit. X’akxilhkgo pi latamanin xtsalamakgolh chu xlatalamakgolh. Xnatlatni, xnatalan chu xla tsalakgolh. Lije wan: «Makgapitsi kifamilia chankgolh niku xwilakgolh tiku xkaputsastalanimaka xalak Malaui, 1,600 kilómetros xlimakgat xwi. Amakgapitsin alakatanu niku ktawilaw».

² Liwaka 65 millones wilakgolh tiku kaputsastalanimaka. Makgxtakgkgonit xchikkan xlakata anan guerra o kaputsastalanimaka. Chuna la tatsokgtawilanit, nikxni ananit lhuwa tiku kaputsastalanikan * (kaʼakxilhti nota). Lhuwa tiku kaputsastalanimaka xtatayananin Jehová. Xlakan makgatsankgakgonit  tiku lu xpaxkikgo chu tuku xkgalhikgo. ¿Tuku atanu ta’akglhuwit titaxtukgo? ¿La tlan nakamakgtayayaw kinatalankan xlakata xatapaxuwan naskujnanikgo Jehová? (Sal. 100:2). ¿La tlakg tlan nakalixakgatlikgoyaw Dios tiku kaputsastalanimaka?

3. ¿Tuku lalh xlakata Jesús chu kstalaninanin xkaputsastalanika?

³ Akxni Jesús chu xnatlatni xkaputsastalanimaka ankgolh k’Egipto, akxni ángel kamakatsinilh José pi mapakgsina Herodes xmakgniputun Jesús. Tamakgxtakgkgolh k’Egipto asta akxni nilh Herodes (Mat. 2:13, 14, 19-21). Titaxtulh akglhuwa kata, kstalaninanin Jesús «paks titakgawanikgolh kxlikatlanka xtiyat Judea chu Samaria» xlakata xkaputsastalanimaka (Hech. 8:1). Jesús xkatsi pi lhuwa kstalaninanin x’amakgolh makgxtakgkgo xchikkan. Xla wa: «Akxni wixin nakaputsastalakanatit k’akgtum kachikin wata xatlan katsalatit» (Mat. 10:23, TXS [1999]). Max tuwa tamakgkatsi akxni tsalakan.

4, 5. 1) ¿Tuku tuwa titaxtukgo tiku kaputsastalanimaka akxni tsalakgo? 2) ¿Tuku nitlan anan niku wilakgolh tiku kaputsastalanimaka?

⁴ Tiku tsalakgo tuwa tuku titaxtukgo ktiji chu niku wilakgolh tiku kaputsastalanimaka. Xtala Lije wanikan Gad wan: «Akit xakkgalhi akgkutiy kata. Akglhuwa semanas ktlawaw chu k’akxilhwi lhuwa ninin. Xaktantukunit chu kwanilh kifamilia pi anta xkimakgxtakgkgolh. Pero kintlat ni kimakgxtakgli wa xlakata kimakgtayalh. Xmin kilhtamaku kaj watiya xakwayaw mangos nema xaktekgsaw. Klipawaw Jehová chu xaktlawaniyaw oración, wa kinkamakgtayan chali chali» (Filip. 4:12, 13).

⁵ Lije akglhuwa kata xwilakgolh niku kawilikan tiku kaputsastalanimaka. Pero anta na lu tuwa xwanit. Lije tiku superintendente la uku lakapastaka: «Ni lhuwa tiku xkgalhikgo taskujut, wa xlakata kaj watiya xlichuwinankgo taʼakgsanin, xkgotkgo, takgaman xlakata natlajakan tumin, xkgalhanankgo chu xtlawakgo talakgxtumit xalimaxana». Xlakata ni xtlawakgolh tuku nitlan, xtatayananin Jehová lhuwa tuku xliskujkgo kcongregación (Heb. 6:11, 12; 10:24, 25). Xlakata lu xtalalinkgo Jehová, liwana xlimaklakaskinkgo xkilhtamakujkan. Wa xlakata lhuwa precursores litaxtukgolh. Xlakpuwankgo pi xmilh kilhtamaku akxni xmakgxtakgkgolh niku xkawilikanit, chuna la israelitas makgxtakgkgolh xakaskakni tiyat. Uma kamakgtayalh xlakata ni nataxlajwanikgo (2 Cor. 4:18).

6, 7. 1) ¿Tuku nakinkamatlawiyan xtapaxkit Dios? 2) Kalichuwinanti tuku tlawakgonit makgapitsi natalan.

⁶ «Xtapaxkit Dios» kinkamakgpuwantiniyan nakalimasiyaniyaw tapaxkit kinatalankan, liwaka akxni katuwa titaxtukgo (kalikgalhtawakga 1 Juan 3:17, 18). Akgtum li’akxilhtit, kxapulana siglo analh tatsinkstat, chu kstalaninanin Cristo xalak Judea nixkgalhikgo tuku nawakgo. Wa xlakata natalan malakgachanikgolh tuku nawakgo (Hech. 11:28, 29). Apóstol Pablo chu Pedro kamakgpuwantinikgolh kstalaninanin Cristo pi tlan xkamakgamakglhtinankgolh (Rom. 12:13; 1 Ped. 4:9). Komo xatapaxuwan nakamakgamakglhtinanaw kinatalankan akxni kinkalakgapaxialhnankgoyan,  tlakg kilimasiyanitkan tapaxkit tiku tuwa tuku titaxtumakgolh o kaliputsastalanimaka xtakanajlakan * (ka’akxilhti nota) (kalikgalhtawakga Proverbios 3:27).

⁷ Nina makgas, xtatayananin Jehová xalak Ucrania makgxtakgkgolh xchikkan xlakata guerra chu taputsastalanit. Lu nitlan pero makgapitsi kamakgnika. Lhuwa natalan ankgolh kxchikkan xtatayananin Jehová xalak Ucrania chu Rusia. Natalan xalak uma kachikinin ni makgtanukgolh kʼguerra, chuna limasiyakgolh pi «ni xala katuxawat». Wata chuntiyaku xatapaxuwan lichuwinankgolh «ntachuwin xla xatlan tamakatsinin» (Juan 15:19; Hech. 8:4).

8, 9. 1) ¿Tuku tuwa titaxtukgo tiku kaputsastalanimaka akxni chankgo k’atanu país? 2) ¿Tuku xlakata talakaskin pi ni lakapala nasitsiyaw akxni nakamakgtayayaw?

⁸ Makgapitsi tiku kaputsastalanimaka ankgo latamakgo alakatanu. Pero lhuwa tiku ankgo atanu país niku ni lakgapasnankgo. Max mapakgsinanin kamaxkikgo tuku nawakgo, lhakgat chu niku natawilakgo. Maski chuna, tuwa tuku titaxtukgo. Akgtum li’akxilhtit, max nalismanikgo nawakgo liwat nema ni lakgapaskgo. Makgapitsi max lu lhkaknan xkachikinkan chu ni katsikgo tuku natlawakgo akxni lonkgnan. Amakgapitsi max nakatsinikgo la limaklakaskinkan tuku xalaksasti taxtumakgolh.

⁹ Makgapitsi mapakgsinanin kgalhikgo tuku kalimakgtayakgo tiku kaputsastalanimaka xlakata nasmanikgo kxasasti país. Pero talakaskin pi ni makgas kilhtamaku tiku kaputsastalanimaka xakstukan naputsakgo tuku nalitamakgtayakgo. Uma tuwa, xlakata lhuwa tuku nakatsinikgo. Akgtum li’akxilhtit nakatsinikgo xasasti tachuwin chu talismanin. Nachuna nakatsinikgo xasasti limapakgsin xlakata impuestos, nachuna xlakaskinka na’ankgo k’escuela xkamanankan chu asta la nakastakyawakgo. Komo kinatalankan chuna titaxtumakgolh, ¿la tlan ni lakapala nakasitsiniyaw chu nakalimasiyaniyaw kakni akxni nakamakgtayayaw? (Filip. 2:3, 4).

10. ¿La namatliwakglhaw xtakanajlakan tiku kaputsastalanimaka akxni chinkgo kimpaískan? (Kaʼakxilhti xapulana dibujo).

¹⁰ Min kilhtamaku mapakgsinanin ni kamaxkikgo talakaskin natalan natachuwinankgo congregación xalak ama kachikin. Makgapitsi mapakgsinanin kawanikgo pi nialh katikamakgtayakgolh. Max kawanikan pi komo ni namakglhtinankgo akgtum taskujut nema ni kamaxki talakaskin na’ankgo ktamakxtumit, nialh la anta nalatamakgo k’ama país. Makgapitsi natalan makglhtinankgo taskujut xlakata pekuankgo chu nialh katsikgo tuku natlawakgo. Xlakan xlikatsitkan pi kamakgtayaputunaw xlakata namatliwakglhkgo xtakanajlakan (Prov. 12:25; 17:17).

11. 1) Pulana, ¿tuku maklakaskinkgo tiku kaputsastalanimaka? 2) ¿La tlan nalimasiyakgo pi paxtikatsininankgo tiku kaputsastalanimaka?

¹¹ Xapulana, talakaskin pi kinatalankan nakamaxkiyaw liwat, lhakgat chu atanu *  (kaʼakxilhti nota). Kaj ni lhuwa tuku nakamaxkiyaw, la akgtum corbata lanka xtapalh na li’akxilhkgo. Xlikana, tiku kaputsastalanimaka ni lhuwa tuku naskinkgo. Xlimasiyatkan pi paxtikatsininankgo pi kamakgtayamaka. Chu chuna natalan xatapaxuwan nakamakgtayakgo. Akxni natitaxtu kilhtamaku, xlakaskinka xakstukan naputsakgo tuku maklakaskinkgo. Komo chuna natlawakgo, chuntiya tlan natalalinkgo xnatalankan (2 Tes. 3:7-10). Maski chuna tiku kaputsastalanimaka lakaskinkgo tamakgtay.

12, 13. 1) ¿Tuku tlan nakalimakgtayayaw tiku kaputsastalanimaka? 2) Kalichuwinanti tuku tlawakgolh makgapitsi natalan.

¹² Ni nakgalhiyaw lhuwa tumin xlakata nakamakgtayayaw tiku kaputsastalanimaka. Tuku xlakan lakaskinkgo, wa kinkilhtamakujkan chu tapaxkit. Akgtum li’akxilhtit, nakamasiyaniyaw la maklakaskinkan putlaw o la natamawakgo liwat nema ni tapalaxla chu xalakwan. Tlan nakamasiyaniyaw la natekgskgo tuku tamaklakaskin nema nakamakgtaya nakgalhikgo taskujut, la akgtum maquina nema litsapanankan o tuku liskujkan kjardinería. Pero tuku tlakg xlakaskinka wa nakamakgtayayaw tlan namakgkatsikgo kxasasti kxcongregacionkan. Komo matlaniyaw tlan nakalinaw ktamakxtumit. Nachuna, tlan akxtum nakata’anaw chu nakamasiyaniyaw la tlakg tlan nakalitachuwinankgo Dios latamanin.

 ¹³ Ka’akxilhwi xli’akxilhtitkan kgalhtati lakgkgawasan tiku xkaputsastalanimaka. Akxni chankgolh k’akgtum congregación, lakgkgolotsin kamakgtayakgolh. Kamasiyanika la namatlawanikgo putlaw, la natsokgkgo cartas kcomputadoras chu la natekgskgo taskujut. Nachuna kamasiyanika la nalakkaxwilikgo xkilhtamakujkan xlakata pulana nawilikgo Jehová (Gál. 6:10). Umakgolh kgalhtati lakgkgawasan precursores litaxtukgolh. Xlakata lu liskujkgolh tuku xlakgchamputunkgo, lhuwa tuku lakgatayakgolh kcongregación chu ni makgtanukgolh kxkakilhtamaku Satanás.

14. 1) ¿Tuku natlawakgo tiku kaputsastalanimaka xlakata ni namakgatsankgakgo la talalinkgo Jehová? 2) Kalichuwinanti akgtum li’akxilhtit tiku limasiyalh takanajla.

¹⁴ Kstalaninanin Cristo, tiku kaputsastalanimaka xlitayanitkan chu kuenta natlawakgo pi ni lhuwa tuku nakgalhikgo, tuku tlakg xlakaskinka na’akxilhkgo wa la talalinkgo Dios * (kaʼakxilhti nota). Lije chu xnatalan lakapastakkgo pi xtlatkan kamasiyanilh tuku xlakaskinka xlakata xtakanajlakan akxni xtsalamakgo. Lichuwinankgo pi xmakgantilha tuku ni xlakaskinka, asta kinkamasiyanin bolsa niku nitu xtajuma chu xatapaxuwan wa: «¿Akxilhatit? Ni maklakaskinaw umakgolh» (kalikgalhtawakga 1 Timoteo 6:8).

15, 16. 1) ¿La tlan namatliwakglhaw xtakanajlakan kinatalankan? 2) ¿La tlan nakamakgtayayaw xlakata tuku makgkatsikgo?

¹⁵ Tiku kaputsastalanimaka wi atanu tuku maklakaskinkgo ni xawa lhakgat chu liwat. Xlakan maklakaskinkgo tamakgtay xlakata tuku makgkatsikgo chu xlakata xtakanajlakan (Mat. 4:4). Lakgkgolotsin tlan nakamakgtayakgo xlakata natekgskgo likgalhtawakga kxtachuwinkan, nachuna tlan nakamalakgapasnikgo natalan tiku watiya tachuwin chuwinankgo. Uma xlakaskinka xlakata tiku kaputsastalanimaka putum makgxtakgkgonit tuku xkgalhikgo. Lakapastakkgo xfamiliajkan, niku xwilakgolh chu xcongregacionkan. Talakaskin pi natalan kakalimasiyanikgolh tapaxkit chu xtalakgalhaman Jehová nema kakgalhini. Komo ni chuna, max naputsakgo xtamakgtaykan latamanin tiku ni skujnikgo Jehová (1 Cor. 15:33). Akxni kamamakgkatsiniyaw pi tapakgsikgo kcongregación, makgtayayaw Jehová nakamakgtakgalha tiku «xala nak tunu pulataman» tiku kaputsastalanimaka (Sal. 146:9, SXP).

¹⁶ Jesús nila taspitkgolh kxpaískan akxni xmapakgsinamakgolh tiku xkaputsastalanima. Wa xlakata, tiku kaputsastalanimaka nila taspitkgo kxpaískan. Pero max makgapitsin nipara taspitputunkgo. Lije wan pi lhuwa natlatni akxilhkgolh la xkalikgamanankan o xkamakgnikan tiku xparienteskan. Wa xlakata ni tataspitputunkgo xkamanankan kxkachikinkan. Komo kamakgtayaputunaw, talakaskin «watiya kamakgkatsitit, kalapaxkitit la linatalan, lu kalalakgalhamantit chu ni lankajwa kalakapastaktit» (1 Ped. 3:8). Taputsastalanit tlawanit pi tiku kaputsastalanikan tuwa namakgkatsikgo nakatalalinkgo amakgapitsin. Max maxanankgo akxni lichuwinankgo tuku titaxtukgonit liwaka akxni wilakgolh kxlakatinkan xkamanankan.  Katakgalhskiw: «¿La xaklakaskilh xkilikatsinika komo chuna xaktitaxtulh?» (Mat. 7:12).

17. ¿La litamakgtayakgo akxni kalitachuwinanaw Dios tiku kaputsastalanimaka?

¹⁷ Lhuwa tiku kaputsastalanimaka minkgo kpaíses niku xtatayananin Jehová nila lichuwinankgo Dios. Xlakata lhuwa xtatayananin Jehová, lichuwinamakgolh Dios, lhuwa tiku kaputsastalanimaka katsinimakgolh «ntachuwin xla tapakgsin» (Mat. 13:19, 23). Pero max lu lilipuwankgo, pero kgalhikgo takgoxamixat akxni ankgo ktamakxtumit. Xlakan katsikgo pi: “Xlikana Dios katalama” (Mat. 11:28-30; 1 Cor. 14:25).

18, 19. Komo akinin lakgskgalalan, ¿tuku natlawayaw akxni nakalitachuwinanaw Dios tiku kaputsastalanimaka?

¹⁸ Talakaskin skgalala nawanaw akxni kalitachuwinanaw Dios tiku kaputsastalanimaka (Prov. 22:3; Mat. 10:16). Nachuna, ni nakatasitsiyaw akxni nakakgaxmatniyaw. Pero ni nakalitachuwinanaw xlakata política. Wa katlawaw tuku wan sucursal o mapakgsinanin. Chuna niti kati’akgspulalh tuku nitlan. Xlakata tiku kaputsastalanimaka tanu tanu xkachikinkan chu xtalismaninkan, talakaskin nakatsiyaw tuku lakpuwankgo, tuku makgkatsikgo chu nakamaxkiyaw kakni. Akgtum li’akxilhtit, tiku xalak tanu país tanu lakpuwankgo xlakata xtalhakgankan lakpuskatin. Wa xlakata akxni nakalitachuwinanaw Dios umakgolh latamanin, xlakaskinka liwana nalhakgananaw.

¹⁹ Akinin kamakgtayayaw tiku patinamakgolh maski xtatayananin Jehová o ni, stalaniyaw xatlan xli’akxilhtit samaritano nema lichuwinalh Jesús (Luc. 10:33-37). Pulaktum la nakamakgtayayaw wa akxni kalitachuwinanaw xatlan tamakatsinin xla Tamapakgsin. Chatum kgolotsin tiku kamakgtayanit tiku kaputsastalanimaka wa pi xlakaskinka tunkun nakawaniyaw pi akinin xtatayananin Jehová. Tlan nakawaniyaw pi kalakganitaw xlakata kalitachuwinanputunaw takgalhkgalhin nema lichuwinan Biblia, chu ni kaj tumin maxkiputunaw.

20, 21. 1) ¿Tuku kitaxtu xlakata kamasiyaniyaw xaxlikana tapaxkit tiku kaputsastalanimaka? 2) ¿Tuku nakatsiniyaw k’artículo nema aku mima?

²⁰ Kalimasiyanikan tapaxkit tiku «xala nak tunu pulataman» tlan kitaxtu. Chatum tala xalak Eritrea kstalanina Cristo lichuwinalh xlakata xfamilia. Akxni xchixku nilh, xla katatsalalh kgalhatati xkamanan xlakata taputsastalanit. Akgtsayan kilhtamaku tlawankgolh anta kxakaskakni tiyat. Alistalh chankgolh kSudán chu xtlakgwankgonit. Xla wan: «Natalan tlan kinkalikatsinikgon xtachuna la komo xalak xfamilia, kinkamaxkikgon liwat, lhakgat, niku xaktawilaw chu kinkamaxkikgon tumin xlakata putlaw. ¿Tiku atanu makgamakglhtinankgo kxchikkan tiku ni lakgapaskgo kaj xlakata watiya kakninanikgo Dios? Kaj xman wa xtatayananin Jehová» (kalikgalhtawakga Juan 13:35).

²¹ ¿Tuku tlan natlawayaw xlakata nakamakgtayayaw xkamanankan tiku kaputsastalanimaka? K’atanu artículo, nakatsiniyaw la nakamakgtayayaw umakgolh familias xlakata xatapaxuwan naskujnanikgo Jehová.