DANIEL CHU MÍRIAM tamakgaxtokgkgolh septiembre kata 2000 chu tlan xwi xlatamatkan anta kBarcelona (España). Daniel wan: «Chuna la xaktlajaya tumin xakanaw kxalakwan restaurantes, xakanaw alakatanu país chu lakwan lhakgat xakwiliyaw. Chu, ankgalhin xaklichuwinanaw Dios». Pero talakgpalilh xlatamatkan.

Kxalanka tamakxtumit kkata 2006, Daniel lakgchalh kxnaku akgtum taʼakgchuwin niku kgalhskininanka: «¿Kapulalimaw ktiji nema linan klatamat tiku knixatlan tiji wilakgolh?» (Prov. 24:11). Xlichuwinamaka tuku taskujut kgalhiyaw xlakata nalichuwinanaw tamakatsinin xalak Biblia, xlakata wa uma nakalakgmaxtu latamanin (Hech. 20:26, 27). Daniel lakapastaka: «Kmakgkatsilh pi Jehová akit xkiwanima». Na lichuwinanka pi akxni liskujaw xlakata naskujnaniyaw Jehová tlakg paxuwayaw. Daniel xkatsi pi xlikana xlakata Míriam precursora xwanit chu lu xpaxuwa.

Taʼakgchuwin kaks malakawanilh Daniel chu lakpuwa pi xchanita kilhtamaku nalakgpali xlatamat. Nialh lhuwa kilhtamaku skujli, chu precursor litaxtulh chu lilakpuwa la xlipaxuwakgolh xla chu Míriam komo xʼankgolh niku tlakg talakaskin tiku nalichuwinankgo Dios.

Mayo kata 2007, Daniel chu Míriam makgxtakgkgolh xtaskujutkan chu ankgolh kPanamá. Xlichuwinankgo Dios kxʼislas archipiélago de Bocas del Toro, anta kmar Caribe. Niku lamakgolh indígenas ngäberes. Daniel chu Míriam akgtsayan papaʼ xtawilaputunkgo kPanamá.

Akxni xʼankgo kʼislas xlinkgo barco o bicicleta. Lakapastakkgo akxni tlawankgolh 30 kilómetros (20 millas) xʼankgo kbicicleta niku lu takxtunat chu lu klhkaknan. Xla lu xtlakgwanit asta xlakgawitiputun. Pero familias ngäberes lu tlan kalikatsinikgolh, liwaka akxni Daniel chu Míriam katsinikgolh makgapitsi tachuwin kngäbere. Alh kilhtamaku puxamatutu xkgalhikgo tiku xmakgalhtawakgekgo.

¿Tuku lalh akxni sputli xtuminkan? Daniel wan: «Kilakgastapukan litatsamalh kilakgpixtajatkan akxni klakpuwaw pi xakamaw taspitaw kʼEspaña. Lu nitlan xakmakgkatsiyaw pi xakamaw makgxtakgkgoyaw tiku xakkamakgalhtawakgeyaw». Akgtum papaʼ alistalh makglhtinankgolh lu tlan tamakatsinin. Míriam wan: «Kinkawanikan pi precursores especiales xaklitaxtuw. Lu klipaxuwaw xlakata xakamaw tamakgxtakgaw».

Xlakata analh talakgpalit kxkachikin Jehová, kkata 2015 Daniel chu Míriam nialh precursores especiales litaxtukgolh. ¿Tuku xʼamakgolh tlawakgo? Lipawankgolh tamalaknun nema wan Salmo 37:5: «Kamakamaxki milatamat Kimapakgsinakan Dios, kalipawanti, kakanajla xlakata namakgtayayan». Tekgskgolh taskujut nema kamaxkilh talakaskin precursores regulares nalitaxtukgo, chu la uku makgtayanamakgolh kcongregación xla provincia xla Veraguas (Panamá).

Daniel wan: «Akxni nina xakanaw kʼEspaña ni xakkatsiyaw komo tlan xataktujun naklinaw kilatamatkan. Chu uku chuna ktlawamaw, chu nitu kinkatsankganiyan». ¿Tuku tlakg lipaxuwakgo? Xlakan wankgo: «Kamakgtayakan latamanin tiku taktujukgo xlakata nalakgapaskgo Jehová lu masta tapaxuwan».