1, 2. 1) ¿Tuku ta’akglhuwit kgalhikgo kamanan tiku xalak atanu país? 2) ¿Tuku takgalhskinin na’akxilhaw k’uma artículo?

CHATUM xtatayana Jehová wanikan Joshua wan: «Kinatlatni xalak atanu país, chu lata aktsujku xakwanit akit xakchuwinan xtachuwinkan kchiki chu kcongregación». Pero akxni Joshua tsukulh an k’escuela, tsukulh lakgati tachuwin nema xchuwinankan anta. Xla wan: «Titaxtulh kata, tlakg talakgpalilh: ni xak’akgatekgsni ktamakxtumit chu xakmakgkatsi pi ni xakmakgtapakgsi xtalismanin kinatlatni». Tuku titaxtulh Joshua chuna la.

² La uku, liwaka 240 millones tiku ni anta wilakgolh kxpaískan. Komo wix chatum tlat tiku xalak atanu país, ¿la tlan nakamakgtayaya minkamanan xlakata napaxkikgo Jehová chu chuntiya nastalanikgo «ntalulokgtat»? (3 Juan 4). ¿Chu la tlan namakgtayanankgo tiku makgtapakgsikgo congregación?

3, 4. 1) ¿La tlan natlatni nakawilinikgo tlan li’akxilhtit xkamanankan? 2) ¿Tuku ni xlitlawatkan natlatni xlakata xkamanan?

³ Natlatni, komo lakaskinatit pi minkamanankan tlan natalalinkgo Jehová chu putum kilhtamaku kalatamakgolh, xlakaskinka  nakalimasiyaniyatit tlan li’akxilhtit. Komo minkamanankan na’akxilhkgo “pi pulana putsayatit xTamapakgsin Dios”, nakatsinikgo nalipawankgo Jehová pi nakamaxki tuku maklakaskinkgo chali chali (Mat. 6:33, 34). Ni tlakg naputsayatit tuku kaj mimpalakatakan, wata pulana kawilitit tuku xla Jehová. Ni lhuwa tuku nakgalhiyatit kmilatamatkan, chu ni nalaklipinatit tumin. Ni kaputsatit lhuwa tumin chu ni natatlankiyatit «klakatinkan nchixkuwin», wata kaliskujtit xlakata nakgalhiyatit «ntamakin nkakgapun», uma wamputun pi tlan nakinka’akxilhan Jehová (Juan 12:43; kalikgalhtawakga Marcos 10:21, 22).

⁴ Ankgalhin kalimaxtu kilhtamaku xlakata tlan akxtum nakatatawilaya minkamanan. Kakawanitit pi lu tlan makgkatsiyatit xlakata pulana wilikgo Jehová chu ni wa lilakgaputsakgo xlakata lhuwa tumin nakgalhikgo xpalakatakan o mimpalakatakan. Nikxni kalakpuwanti pi kamanan xliskujatkan xlakata nakamaxkikgo xnatlatni putum tuku lakaskinkgo. Kalakapastakti pi «pus ni wa nkaman nkatimakinikgolh xtlatkan wa ntu litlajakgoy, wampi wata wa xtlatkan namakinikgoy xkaman» (2 Cor. 12:14).

5. ¿Tuku xlakata natlatni ankgalhin nakalitachuwinankgo xkamanan xlakata Jehová?

⁵ Chuna la wan Biblia, latamanin «xalak tipalhuwa kachikinin chu tipalhuwa xtachuwinkan» tanumakgolh kxkachikin Jehová (Zac. 8:23). Natlatni komo minkamanan ni liwana akgatekgsnikgo tachuwin chuwinanatit tlakg tuwa namakgkatsiyatit namasiyaniyatit tuku xaxlikana. Minkamanankan wa tlakg xlakaskinka nakalimakgalhtawakgeyatit Biblia, chu xlakata nakgalhikgo latamat nema ni kgalhi lisputni talakaskin liwana nalakgapaskgo Jehová (Juan 17:3). Wa xlakata nakalitachuwinanatit tuku masiya Jehová (kalikgalhtawakga Deuteronomio 6:6, 7).

6. ¿Tuku tlan kitaxtu xlakata kamanan nakatsinikgo xtachuwinkan xnatlatnikan? (Kaʼakxilhti xapulana dibujo).

⁶ Max kamanan nakatsikgo tachuwin nema chuwinankan k’escuela o akxni katawilakgo amakgapitsin latamanin. Pero tlan nakatsinikgo tachuwin nema chuwinanatit komo nakamasiyaniyatit. Komo nakatsinikgo, tlakg ni tuwa namakgkatsikgo nakatachuwinankgoyan chu nawankgo tuku makgkatsikgo. Pero wi atanu tuku tlakg tlan. Lhuwa tachuwin chuwinankan nakamakgtaya xlakata tlakg liwana nalakapastakkgo, chu nakamakgtaya tuku lakpuwankgo amakgapitsin. Nachuna, nakamaxki talakaskin tlakg nalichuwinankgo xtachuwin Dios. Carolina tiku xnatlatni xalak atanu kachikin wan: «Makgtayanankan kcongregación kʼatanu tachuwin makgapaxuwanan. Chu klakgati kmakgtayanan niku tlakg talakaskin».

7. ¿Tuku tlan natlawakgo natlatni komo xkamankan tanu tachuwin chuwinankgo?

⁷ Xkamanankan tiku xalak atanu kachikinin tsinu tsinu lismanitilhakgo tachuwin chu talismanin nema anan ama kkachikin. Max makgapitsin nialh nakatsiputunkgo xtachuwinkan xnatlatnikan chu max nialh katitachuwinamputunkgolh. Komo  chuna, ¿tlan xkatsinitit maski kaj tsinu tachuwin nema anta chuwinankan? Tlakg ni tuwa nawan nakamakgtayaya kstalaninanin Cristo nawankgo, akxni katsiya tuku kalitachuwinankgo amakgapitsin, tuku lilakgastanankgo chu la kakitaxtunima k’escuela. Nachuna tlan nakamakgtayayatit komo nakatachuwinanatit xmakgalhtawakganakan. Xlikana, nakatsiniya atanu tachuwin lhuwa kilhtamaku talakaskin, litliwakga chu tataktujut. Pero tlan kitaxtu chuna tlawakan. Kalilakpuwanti uma. Komo akgatapa xwa mi nkgawasa, ¿ni xlikana pi xkatsini tachuwin xla señas xlakata tlan xtachuwinanti? Komo chuwinan atanu tachuwin ¿ni xlikana pi lakgchan nachuna natlawaya? * (kaʼakxilhti nota).

8. ¿La tlan nakamakgtayakgo natlatni xkamanankan maski ni liwana katsinikgo tachuwin nema chuwinankgo xkamanan?

⁸ Lhuwa natlatni tuwa makgkatsikgo nakatachuwinankgo kxasasti xtachuwinkan xkamanan. Max wa xlakata tuwa makgkatsikgo nakamakgtayakgo xkamanankan xlakata na’akgatekgskgo «xasanto tatsokgni» (2 Tim. 3:15). Komo chuna titaxtupat, tlan nakamakgtayaya minkamanan nalakgapaskgo chu napaxkikgo Jehová. Chatum kgolotsin wanikan Shan wan: «Kintse tiku x’akstu kinkamakgastakni, ni liwana xkatsi tachuwin nema xak’akgatekgsaw akit chu kinatalan, chu akinin ni liwana xakkatsiyaw xtachuwin. Pero akxni xakakxilhaw la xkgalhtawakga, xtlawa oración chu xliskuja napulalin akgatunu semana takaknin Dios kfamilia uma kinkamakgtayan nakkatsiyaw pi lu xlakaskinka lakgapaskan Jehová».

9. ¿Tuku tlan natlawakgo natlatni xlakata nakamakgtayakgo xkamanan tiku lakaskinkgo nakalimakgalhtawakgekan kpulaktiy tachuwin?

⁹ Makgapitsi kamanan max lakaskinkgo nakatsikgo xlakata Jehová k’akgtiy tachuwin. ¿Tuku xlakata? Xlakata chuwinankgo tanu tachuwin k’escuela chu tanu tachuwin kxchikkan. Makgapitsi natlatni maklakaskinkgo likgalhtawakga, grabaciones chu videos kpulaktiy tachuwin. Xlikana, natlatni tiku xalak atanu país xlimaxtutkan kilhtamaku chu litliwakga xlakata nakamakgtayakgo xkamanankan x’amigo Jehová nawankgo.

10. 1) ¿Tiku xlilaksakat tukuya congregación xliʼanat familia? 2) ¿Tuku namakgtaya xatlat xlakata liwana nalaksaka tuku natlawa xfamilia?

¹⁰ Komo tiku «xala [a]tunu pulataman» ni lakatsu wilakgolh tiku xtatayananin Jehová tiku na watiya tachuwin chuwinankgo, wa xlakata xliʼanatkan k’akgtum congregación ktachuwin nema anta chuwinankan (Sal. 146:9). Pero komo lakatsu wi akgtum congregación kxtachuwinkan, xatlat xlilaksakat tuku congregación tlakg kaminini. Pero akxni nina laksaka tuku natlawakgo, liwana xlilakputsanat chu naskini Jehová pi kapulalilh. Nachuna natachuwinan xpuskat chu xkamanan (1 Cor. 11:3). ¿Tuku kuenta xlitlawat? ¿Tuku tastakyaw xalak Biblia tlan namakgtaya tuku nalaksaka?

11, 12. 1) ¿La xlilhuwa makgtaya tachuwin aktsu kgawasa tuku katsini ktamakxtumit? 2) ¿Tuku xlakata makgapitsi kamanan ni katsiniputunkgo xtachuwinkan xnatlatnikan?

 ¹¹ Xanatlatni kuenta xlitlawatkan tuku maklakaskinkgo xkamanan. Xlakata liwana na’akgatekgskgo tuku xaxlikana xalak Biblia, nika xman wa talakaskin na’ankgo ktamakxtumit akgatunu semana. Pero komo na’ankgo ktamakxtumit ktachuwin nema akgatekgsnikgo, max tlakg nakatsinikgo maski kaj xman wa nakgaxmatkgo. Max tlakg nakatsinikgo ni xawa la lakapastakkgo xnatlatnikan. Tuwa nakatsinikgo laktsu kamanan komo ni akgatekgsnikgo tuku lichuwinankan anta ktamakxtumit (kalikgalhtawakga 1 Corintios 14:9, 11). Tachuwin nema chuwinan aktsu kgawasa ni watiya tachuwin xlimaklakaskinat akxni nawan tuku makgkatsi chu tuku lakpuwan. Makgapitsi laktsu kamanan katsinikgo mastakgo xta’akgchuwinkan ktamakxtumit, xtakgalhtinkan, kxtachuwinkan xnatlatni, pero ni wa wankgo tuku xlikana makgkatsikgo chu lakpuwankgo.

¹² Tachuwin ni kaj watiya limasiyakgo la xtayatkan chu la lakapastakkgo laktsu kamanan. Chuna akgspulalh Joshua, tiku lichuwinawa. Xtala Esther wan: «Xlakata laktsu kamanan, tachuwin, talismanin, chu xtakanajlakan xnatlatnikan ni kamapapitsi». Komo laktsu kamanan ni tatalakxtumi la lakapastakkgo xnatlatnikan, max nani katikatsiputunkgolh xtachuwinkan chu xtakanajlakan. ¿Tuku tlan natlawakgo natlatni komo chuna natitaxtukgo?

13, 14. 1) ¿Tuku xlakata akgtum familia tiku xalak atanu país laksakkgolh natalakgpalikgo k’atanu tachuwin nema anta xtachuwinan? 2) ¿Tuku tlawagolh uma natlatni xlakata chuntiya tliwakga xkgalhikgolh xtakanajlakan?

¹³ Natlatni tiku kstalaninanin Cristo pulana xliwilitkan tuku lakaskinkgo xkamankan (1 Cor. 10:24). Samuel xtlat Joshua chu Esther, wan pi xla chu xpuskat katsikgolh tachuwin nema xkamanan xkgaxmatkgo. Nachuna skinikgolh Jehová pi xkamaxkilh liskgalala. Takgalhtin nema kamaxkika ni wa xlakaskinkgo. Samuel lichuwinan xkamanan: «Akxni k’akxilhwi pi ni lu xlitamakgtayakgo tamakxtumit kkintachuwinkan, klakkaxwiliw pi nakanaw k’atanu congregación. Lakxtum xakkata’anaw ktamakxtumit chu akxtum xakanaw lichuwinanaw Dios. Nachuna, xakkawaniyaw natalan pi lakxtum nakkatawayanaw chu xa kaw paxialhnanaw. Putum uma tlawalh pi kinkamanankan liwana nalakgapaskgo natalan chu x’akxilhkgolh Jehová ni kaj xman xDioskan litaxtu, wata la komo xTlatkan chu la x’Amigojkan. Xakakxilha pi uma tlakg xlakaskinka nixawa nakatsinikgo kintachuwinkan».

¹⁴ Samuel lichuwinan pi xlakata tliwakga nakgalhikgo xtakanajlakan xla chu xpuskat x’ankgo ktamakxtumit kxtachuwinkan. Xla wampara: «Lhuwa tuku xaktlawayaw chu lu xaktlakgwanaw. Pero Jehová sikulunatlawalh kintaskujutkan, wa xlakata kpaxtikatsiniyaw. Xkgalhtutukan kinkamanankan skujnanimakgolh Dios putum kilhtamaku».

15. ¿Tuku xlakata chatum tala lakpuwa pi tlakg tlan xmakgtayanalh kcongregación nema wa chuwinankan tachuwin xala ama kachikin?

¹⁵ Akxni kamanan stakkgo, max nalakpuwankgo pi tlakg tlan naskujnanikgo Jehová k’akgtum congregación niku wa chuwinankan tachuwin nema akgatekgsnikgo. Komo chuna nala, ni nalakpuwankgo natlatni pi xkamanankan kalakgmakgamakgo. Chatum tala wanikan Kristina lakapastaka:  «Tsinu xak’akgatekgsni xtachuwinkan kinatlatni, pero lu tuwa xakmakgkatsi nak’akgatekgsa tuku xtalichuwinan ktamakxtumit. Akxni xakkgalhi akgkutiy kata, kkilalh k’akgtum xalanka tamakxtumit nema wa xchuwinankan tachuwin xalak escuela. Akxni pulana kkatsilh pi tuku xakkgaxmata wa xaxlikana. Tuku na xlakaskinka wa akxni ktsukulh tlawa ki’oración ktachuwin nema kkatsinilh k’escuela. ¡Lu tlan xlakata akxni xlipulana xaktachuwinama Jehová xliputum kinaku!» (Hech. 2:11, 41). Akxni Kristina makgatsilh akgkutsayan kata, katachuwinalh xnatlatni chu laksakli natalakgpali atanu kcongregación kxtachuwin nema xkatsini. Xla wan: «Katsinikan xla Jehová ktachuwin nema kkatsinilh k’escuela kimakgtayalh xlakata wi tuku naktlawa». Titaxtulh kilhtamaku, Kristina precursora regular litaxtulh, chu uma lu makgapaxuwa.

16. ¿Tuku xlakata lipaxuwa Nadia pi antiya tamakgxtakgli kcongregación niku xwi?

¹⁶ Kamanan, ¿xlakgatitit xtawilatit k’akgtum congregación niku chuwinankan tachuwin nema katsiniyatit? Komo chuna katakgalhskinti tuku xlakata. ¿Xlakgati xtalakgpali ama kcongregación xlakata namakgtayayan chu namatliwakglhan la talalipina Jehová? (Sant. 4:8). O ¿lakgatiya xtalakgpali kaj xlakata ni nakatsikgo mi natlatni tuku tlawaya o kaj xlakata nitu tlawaputuna kcongregación? Ka’akxilhti tuku wan Nadia, tiku skujma kBetel: «Akxni kinatalan chu akit kajku xakstakmaw, klaksakwi naktalakgpaliyaw kcongregación ktachuwin nema anta chuwinankan». Pero xnatlatni xkatsikgo pi uma ni xʼama kamakgtaya xkamanan la xtalalinkgo Jehová. Nadia lakapastaka: «La uku kpaxtikatsiniyaw pi liskujkgolh xlakata kinkamasiyanikgon xtachuwinkan chu tlawakgolh pi anta xaktamakgxtakgwi kcongregación kkachikin niku xa kwilaw. Uma klipaxuwaw xlakata tlakg kinkamaxkin talakaskin nakkamakgtayayaw latamanin nalakgapaskgo Jehová».

17. 1) ¿Tiku kamaxkinit limapakgsin Jehová xlakata nakastakyawakan kamanan? 2) ¿Tuku tlan natlawakgo natlatni komo lakaskinkgo tamakgtay xlakata nakamasiyani xaxlikana xkamanan?

¹⁷ Jehová kamaxkinit natlatni limapakgsin nakamasiyanikgo xkamanan tuku xaxlikana. Nitu kamaxkinit uma limapakgsin xalak tatajna o tsiyuna chu nipara atanu latamanin (kalikgalhtawakga Proverbios 1:8 chu 31:10, 27, 28). Pero max natlatni ni lakgapaskgo tachuwin nema anta chuwinankan, lakaskinkgo tamakgtay xlakata nakalakgchan kxnakujkan xkamanan. Akxni natlatni skinkgo tamakgtay, ni wa litlawakgo xlakata ni kuentajtlawaputunkgo xkamanankan. Wata skinkgo tamakgtay xlakata kakuentajtlawaputunkgo, chu kalimakgastakputunkgo «kxtastakyaw chu kxtalakapastakni Jehová» (Efes. 6:4). Akgtum liʼakxilhtit, tlan naskinikgo tamakgtay lakgkgolotsin xalak congregación akxni kakninanikgo Dios kfamilia. Nachuna tlan nakaskinikgo tamakgtay xlakata xkamanankan natekgskgo tlan amigos.

18, 19. 1) ¿La tlan nakamakgtayakgo amakgapitsi natalan xpalakatakan kamanan? 2) ¿Tuku chuntiya xlitlawatkan natlatni?

¹⁸ Xlakata nakamakgtayaya kamanan, natlatni nakawanikgo amakgapitsi familias pi tlan naʼankgo akxni kakninanikgo Dios kfamilia. Lhuwa kamanan katsinikgo tuku tlan akxni kataʼankgo amakgapitsi natalan akxni lichuwinankgo Dios o akxni wi tuku akxtum tlawakgo (Prov. 27:17). Shan,  tiku lichuwinawa, wan: «Klakapastaka natalan tiku xkililakgaputsakgo. Ankgalhin xkimakgtayakgo xlakata naklakkaxwili tuku xkilakgchan ktamakxtumit, tlakg lhuwa tuku xakkatsini. Chu lu xaklakgati tuku akxtum xaktlawayaw xlakata xaklipaxuwayaw».

¹⁹ Natalan tiku kamakgtayakgo natlatni ankgalhin nakamakgpuwantinikgo kamanan namaxkikgo kakni xnatlatnikan. ¿La tlan natlawakgo? Tlan nakalichuwinankgo chu namaxkikgo kakni limapakgsin nema kgalhikgo natlatni xlakata nakastakyawakgo xkamanan. Nachuna, natalan tiku kamakgtaya xkamanan umakgolh familias xlilakgmakganatkan tayat nema natlawa pi nakamakgchakgxni tiku xalak congregación chu tiku ni (1 Ped. 2:12). Maski natlatni nakaskinikgo tamakgtay amakgapitsin, wa kalakgchan nakamasiyanikgo tuku xaxlikana xkamanan. Tlan nakuentajtlawakgo tamakgtay nema kamaxkikgo amakgapitsi familia.

20. ¿La tlan nakamakgtaya natlatni xkamanan xlakata naskujnanikgo Jehová?

²⁰ Natlatni, kaskinitit tamakgtay Jehová chu katlawatit putum tuku matlaniyatit (kalikgalhtawakga 2 Crónicas 15:7). Xlakaskinka kaʼakxilhtit la talalinkgo Jehová minkamanan nixawa tuku wixin lakaskinatit. Katlawatit pi xtachuwin Dios nakalakgchan kxnakujkan minkamanan. Kalipawantit pi minkamanan tlan xlakskujnin Jehová nawankgo. Akxni natlawakgo tuku wan Biblia chu nastalanikgo mi liʼakxilhtitkan, wixin namakgkatsiyatit la apóstol Juan. Xla kalichuwinalh kamanan: «Nitu ntu ntlakg klimakgapaxuwakan, lapi ni wa yuma: lantla kkgaxmata mpi wa nkilakgskgatan stalanimakgo ntalulokgtat» (3 Juan 4).