1, 2. 1) ¿Niku pulana kgantaxtulh tachuwin nema wi kMateo 24:12? 2) ¿La limasiya libro xla Hechos pi lhuwa kstalaninanin Cristo xalak pulana siglo tliwakga xkgalhinikgo tapaxkit Jehová? (Kaʼakxilhti xapulana dibujo).

AKXNI Jesús xlama unu kKatiyatni, lichuwinalh tuku x’ama la «akxni talakatsuwinita xlisputni kakilhtamaku». Akgtum li’akxilhtit, lichuwinalh pi x’ama lakgmixa tapaxkit chu «tlakg lhuwa tiku nialh katilapaxkikgolh» (Mat. 24:3, 12) (kaʼakxilhti recuadro «¿Tuku kilhchanima?»). Umakgolh tachuwin pulana kgantaxtulh kxkilhtamakujkan judíos kxapulana siglo. Xlakan liwana xkatsikgo pi xkachikin Dios xwanit, pero xmastakgonit talakaskin pi xtapaxkitkan xlakata Dios xlakgmixli o kxlajwanalh.

² Pero, lhuwa kstalaninanin Cristo xalak ama kilhtamaku lu tanu la xlikatsikgo. Xlakan xatapaxuwan «xlichuwinankgo Jesús» chu xlimasiyakgo pi xpaxkikgo Dios, xnatalankan chu asta tiku nina xlakgapaskgo tuku xaxlikana. Umakgolh kstalaninanin Cristo tliwakga xkgalhinikgo tapaxkit Dios (Hech. 2: 44-47; 5:42). Pero tuku nitlan, makgapitsi kstalaninanin Cristo mastakgolh talakaskin pi xtapaxkitkan la xkgalhinikgo Dios xtaxlajwanilh. ¿Tuku xlakata likatsiyaw?

3. ¿Tuku tlawalh pi xtaxlajwanilh xtapaxkitkan makgapitsin kstalaninanin Cristo?

³ Kstalaninanin Cristo tiku xwilakgolh k’Éfeso, Jesús kama’akxilhnilh pi xmakgxtakgkgonit xtapaxkitkan nema xkgalhikgo xapulana (Rev. 2:4). Max umakgolh kstalaninanin Cristo tsukulh kalakgchuwa xtayatkan latamanin, xlakpuwankgo pi xakstukan nakamakgapaxuwakan (Efes. 2:2, 3). Éfeso akgtum kachikin nema lhuwa tuku xkgalhikgo, chu latamanin tlakg xlakaskinka x’akxilhkgo tlan xtawilakgolh chu lhuwa tuku xtapalh xkgalhikgolh. Nachuna, lhuwa tiku nitlan la xlinkgo xlatamatkan chu ni xmaxkikgo kakni xlimapakgsin Dios. Tlakg xlakaskinka x’akxilhkgo nalipaxuwakgo latamat ni xawa nalimasiyanikgo tapaxkit Dios chu latamanin.

4. 1) ¿Tuku xlakata lakgmixnit tapaxkit la uku? 2) ¿Tuku na’akxilhaw?

⁴ Xtachuwin Jesús xlakata tuku x’ama akgspula tapaxkit, kgantaxtuma la uku. Latamanin tlakg nialh kgalhinikgo tapaxkit Dios. Nialh putsakgo Dios xlakata nalakkaxtlawakgo xtakglhuwitkan, millones latamanin putsakgo xtamakgtaykan mapakgsinanin nema lakkaxwilikgonit latamanin. Uma tlawa pi xtapaxkitkan latamanin chuntiya nalakgmixa. Asta xtapaxkitkan kskujnin Jehová nalakgmixa, chuna la ka’akgspulalh kstalaninanin Cristo xala makgasa kkachikin Éfeso. Wa xlakata, ka’akxilhwi la tlan tliwakga nakgalhiniyaw tapaxkit Jehová, tapaxkit nema kgalhiniyaw xaxlikana tuku xalak Biblia chu tapaxkit nema kgalhiniyaw kinatalankan.

5. ¿Tuku xlakata napaxkiyaw Dios?

⁵ ¿Tiku tlakg napaxkiyaw? Jesús wa: «“Milipaxkit Jehová miDios xliputum minaku chu xliputum milatamat chu xliputum mintalakapastakni”. Wa uma tlakg xalanka chu xapulana limapakgsin» (Mat. 22:37, 38). Xtapaxkit Jehová kinkamakgtayayan nakgalhakgaxmataw xlimapakgsin, natayaniyaw ta’akglhuwit chu naxkajniyaw tuku nitlan (kalikgalhtawakga Salmo 97:10). Pero Satanás chu xkakilhtamaku maxlajwaniputunkgo chu lakxtlawaputunkgo tapaxkit nema kgalhiniyaw Dios.

6. ¿Tuku la akxni latamanin nialh paxkikgo Dios?

⁶ Kakilhtamaku tanu la lakpuwan xlakata tapaxkit. Lhuwa ni paxkikgo Dios, wata «xakstukan nakapaxkikan» (2 Tim. 3:2). Lilakgaputsakgo tuku “tlawaputun xmaknikan chu tuku akxilhputun xlakgastapukan, lhuwa masiyaputun tuku kgalhi kxlatamat” (1 Juan 2:16). Apóstol Pablo wa tuku nitlan nakitaxtu komo kaj watiya nalilakgaputsayaw kimpalakatakan. Xla wa: «Lakapastakaw wa ntu xtatlawaputu nkiliwakan, linin nkitaxtuniy». ¿Tuku xlakata linin kilhchani? Xlakata tiku kaj xakstukan kamakgapaxuwaputunkan xtalamakgasitsinkan Dios litaxtukgo (Rom. 8:6, 7). Latamanin tiku kaj watiya tlajaputunkgo tumin, o kaj lipaxuwaputunkgo talakgxtumit xalimaxana nitlan kakitaxtuni (1 Cor. 6:18; 1 Tim. 6:9, 10).

7. ¿Tuku talakapastakni o tayat ni xatlan max nakinkalaktlawayan akinin kstalaninanin Cristo?

⁷ Lhuwa ateos, agnósticos chu evolucionistas tlawaputunkgo pi makgapitsi latamanin nialh napaxkikgo Dios o nialh nakanajlakgo pi xla lama. Tlawakgo pi kaj xman wa kanajlanikgo Dios tiku ni kgalhtawakgakgonit.  Nachuna lhuwa maxkikgo kakni científicos chu ni wa Jehová tiku tlawanit putum tuku anan (Rom. 1:25). Komo namastayaw talakaskin pi uma tamasiy nakinkalaktanuyan, tapaxkit nema kgalhiniyaw Jehová max nataxlajwani (Heb. 3:12).

8. 1) ¿Tuku xlakata max nataxlajwanikgo kskujnin Jehová? 2) ¿Tuku kinkamakgpuwantiniyan Salmo 136?

⁸ Xlakata uma kakilhtamaku wa kaʼakgchipanit Satanás, max namin kilhtamaku namakgkatsiyaw pi taxlajwanimaw (1 Juan 5:19). Pero komo namastayaw talakaskin pi nakinkatlajayan taxlajwanit, max na nataxlajwani kintakanajlakan chu tapaxkit nema kgalhiniyaw Dios. Max nakgalhiyaw taʼakglhuwit xlakata tumin, tajatat o linawa kata. O max lilipuwanaw xlakata nila liwana tlawayaw tuku akinin lakaskinaw. O nakinkamakgalipuwanan kkilatamatkan tuku nitlan tlawaw nema ni chuna xlakpuwanitaw natlawayaw. Maski lhuwa taʼakglhuwit nakgalhiyaw, ni nalakpuwanaw pi Jehová nakinkamakgxtakgan. Kalakapastakwi lu laktlan tachuwin xla Salmo 136:23. Anta lichuwinan xlakata Jehová: «Wa kinkamakgtayan akxni [xaktaxlajwanimaw], porque kanikxniwa masi ixtalakgalhaman». Xlikana pi Jehová nakinkakgaxmatniyan chu nakinkakgalhtiyan akxni naskiniyaw xtamakgtay (Sal. 116:1; 136:24-26).

9. ¿Tuku makgtayalh Pablo chuntiya tliwakga na kgalhini tapaxkit Dios?

⁹ Apóstol Pablo lu xlilakpuwan la Jehová xmakgtaya chu uma maxkilh litliwakga. Xla tsokgli: «Wa nkimPuchinakan nkimakgtayana; ni kaktimakpuwa wa ntu nakintlawani nchixku» (Heb. 13:6). Pablo xlipawan Jehová wa xlakata makgtayalh natayani taʼakglhuwit. Maski tuwa tuku titaxtulh, nikxni makgatsankgalh chuna la xlipawan Jehová. Asta akxni xtanuma kpulachin kamakgtayalh xnatalan, xkatsokgnani cartas nema xkalimakgpuwantini (Efes. 4:1; Filip. 1:7; Filem. 1). Maski lhuwa taʼakglhuwit kgalhilh chuntiya paxkilh Jehová xliputum xnaku. Lipawa Dios tiku «xmastana xlipaks ntakgtsiyajni, wa nti nkinkamakgtsiyajan lantla xlipaks kintalakgaputsitkan» (2 Cor. 1:3, 4). ¿La tlan nastalaniyaw xliʼakxilhtit?

10. ¿Tuku tlan natlawayaw xlakata chuntiya tliwakga nakgalhiniyaw tapaxkit Jehová?

 ¹⁰ Pablo lichuwinalh tuku tlan natlawayaw xlakata chuntiya tliwakga nakgalhiniyaw tapaxkit Dios. Xla wa: «Ankgalhin naxakgatlilakapinatit Dios». Chu alistalh na tsokgli: «Ni anan xtajaxni nkatlawatit mioraciónkan» (1 Tes. 5:17; Rom. 12:12). ¿Tuku xlakata oración matliwakglha la talalinaw Dios? Xlakata akxni tlawayaw oración, wa Jehová tiku tachuwinanaw (Sal. 86:3). Akxni litachuwinanaw Jehová tuku lakpuwanaw chu tuku makgkatsiyaw, tlakg talakatsuwiniyaw (Sal. 65:2). Nachuna tapaxkit nema kgalhiniyaw tlakg tatliwakglha akxni akxilhaw la kgalhti kiʼoraciónkan. Akxilhaw pi «Jehová lakatsu katawi putum tiku putsakgo» (Sal. 145:18). Lipawankan pi Jehová kinkapaxkiyan nakinkamakgtayayan akxni nakgalhiyaw taʼakglhuwit la uku chu kilhtamaku nema aku mima.

11, 12. ¿Tuku tlan natlawayaw xlakata tlakg napaxkiyaw xaxlikana xalak Biblia?

¹¹ Kstalaninanin Cristo paxkiyaw tuku xaxlikana. Chu tuku xaxlikana, tatakgsa kxTachuwin Dios. Jesús wanilh xTlat: «Mintachuwin xaxlikana» (Juan 17:17). Wa xlakata komo napaxkiyaw xaxlikana xalak Biblia, kilikatsitkan tuku anta masiya (Col. 1:10). Pero wi atanu tuku kilitlawatkan. Tiku tsokgli Salmo 119 kinkamakgtayayan naʼakgatekgsaw tuku tlakg kilitlawatkan (kalikgalhtawakga Salmo 119:97-100). Chuna la titaxtu kilhtamaku tlan nalilakpuwanaw tuku likgalhtawakgayaw kBiblia. Komo nalilakpuwanaw la tlan nalilatamayaw tuku xaxlikana xalak Biblia, tlakg napaxkiyaw.

¹² Tiku tsokgli Salmo 119 na lichuwinalh: «Mintachiwin snun sakgsi kkgalhwanan, liwaka [tax]tuni taxkat» (Sal. 119:103, SXP). Likgalhtawakga nema tlawa xkachikin Dios xtachuna akgtum liwat nema lu kgama. Akxni wayaw tuku lu lakgatiyaw, lakatsuku wayaw xlakata nalipaxuwayaw. Nachuna, ni lakapala nakgalhtawakgayaw. Chuna, nalipaxuwayaw «lakstlan tachuwin» xaxlikana chu tlan nalakapastakaw tuku nalikgalhtawakgayaw chu tlan nakalimakgpuwantinikgoyaw amakgapitsin (Ecl. 12:10).

13. ¿Tuku makgtayalh Jeremías napaxki tuku Dios xmasiyanima, chu la kitaxtunilh?

¹³ Palakachuwina Jeremías xpaxki tuku Dios xmasiyani. Xla wa: «Xlakata tatekgsli mintachuwin, chu kwalh, chu mintachuwin lipaxuw kinkitaxtunilh chu makgapaxuwalh kinaku; xlakata mintukuwani kilitasanikanit kimpalakata, oh Jehová Dios tiku pulalin putum soldados» (Jer. 15:16). Jeremías lu xpaxki xtachuwin Dios chu ankgalhin xlilakpuwan. Wa xlakata lanka xtapalh xliʼakxilha na palakachuwinan Jehová. Komo akinin napaxkiyaw tuku xaxlikana xalak Biblia na lhuwa xtapalh naliʼakxilhaw pi akinin xtatayananin Jehová litaxtuyaw, chu nalichuwinanaw tamakatsinin xla Tamapakgsin kʼuma xaʼawatiya kakilhtamaku.

14. ¿Tuku atanu tlan natlawaya xlakata namatliwakglhaw tapaxkit nema kgalhiyaw xaxlikana xalak Biblia?

¹⁴ ¿Tuku natlawayaw xlakata namatliwakglhaw tapaxkit nema kgalhiniyaw xaxlikana xalak Biblia? Ankgalhin naʼanaw ktamakxtumit kcongregación nema Jehová limaklakaskin xlakata nakinkamasiyaniyan. Pulaktum nema Jehová limaklakaskin xlakata nakinkamasiyaniyan wa takgalhtawakga akgatunu semana xalak Biblia nema limaklakaskinkan revista Makatsinina. Komo litamakgtayaputunaw  uma tamakxtumit pulana talakaskin liwana nalakkaxwiliyaw tuku natalichuwinan. Akgtum liʼakxilhtit tlan nalikgalhtawakgayaw putum textos nema limin likgalhtawakga. La uku lhuwa natalan tlan likgalhtawakgakgo o maktikgo likgalhtawakga kcelularkan o atanu. Uma revista tipalhuwa tachuwin anan kjw.org chu kʼaplicación JW Library. Makgapitsi celulares o atanu lakapala litekgskan textos nema limin revista. Maski tanu tanu tuku nalimaklakaskinaw xlakata nalikgalhtawakgayaw uma revista, talakaskin pi liwana nalilakpuwanaw textos nema anta limin. Komo chuna natlawayaw, tlakg napaxkiyaw tuku xaxlikana xalak Biblia (kalikgalhtawakga Salmo 1:2).

15, 16. 1) ¿Tuku xlimapakgsin Jesús tekgsaw kJuan 13:34, 35? 2) ¿Tuku xlakata tatalakxtumi tapaxkit nema kgalhiniyaw Jehová chu Biblia chu xpalakata kinatalankan?

¹⁵ Akxni Jesús xaʼawatiya tsisni xkatawi xʼapóstoles kawanilh: «Akgtum limapakgsin xasasti kkamakgaxtakgniyan: Kalapaxkitit nchatunu chatunu; lantla nkit kkapaxkinitan, mpi na chuna nkalapaxkitit nchatunu chatunu. Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit nchatunu chatunu» (Juan 13:34, 35).

¹⁶ Tapaxkit nema kakgalhiniyaw kinatalankan tatalakxtumi tapaxkit nema kgalhiniyaw Jehová. Komo ni paxkiyaw Dios, nila kapaxkiyaw kinatalankan. Chu komo ni kapaxkiyaw kinatalankan, nila paxkiyaw Dios. Apóstol Juan tsokgli: «Sampi wa nti ni paxkiy xtala wa nti ukxilha, ¿lantla napaxkiy Dios wa nti ni ukxni a ukxilha?» (1 Juan 4:20). Nachuna, tapaxkit nema kgalhiniyaw Jehová chu kinatalankan tatalakxtumi tapaxkit nema kgalhiniyaw Biblia. ¿Tuku xlakata? Komo napaxkiyaw tuku katsiniyaw kBiblia, nakgalhakgaxmataw limapakgsin nema kinkamaxkiyan, xlakata napaxkiyaw Dios chu kinatalankan (1 Ped. 1:22; 1 Juan 4:21).

17. ¿La nakalimasiyaniyaw pi kapaxkiyaw natalan?

¹⁷ (Kalikgalhtawakga 1 Tesalonicenses  4:9, 10). ¿La tlan nakalimasiyaniyaw tapaxkit kinatalankan? Max tiku lina kata lakaskin tamakgtay xlakata naʼan ktamakxtumit. O max chatum tala puskat tiku ninita xchixku lakaskin pi wi tuku nakaxtlawaniyaw kxchik (Sant. 1:27). Natalan tiku taxlajwanikgonit o lipuwamakgolh o kgalhikgo atanu taʼakglhuwit lakaskinkgo nakakuentajtlawayaw, nakamakgpuwantiniyaw chu nakamakgtsiyajaw (Prov. 12:25; Col. 4:11). Kintachuwinkan chu tuku natlawayaw nalimasiyayaw pi kapaxkiyaw «wa nti makxtum tawanitaw ktakanajla» (Gál. 6:10).

18. ¿Tuku nakinkamakgtayayan nalakkaxtlawayaw taʼakglhuwit nema nakatakgalhiyaw kinatalankan?

¹⁸ Biblia lichuwinalh pi «kxaʼawatiya kilhtamaku» lhuwa latamanin xakstukan xʼamakgo kapaxkikan chu lhuwa tuku xkgalhiputunkgolh (2 Tim. 3:1, 2). Wa xlakata kstalaninanin Cristo naliskujaw xlakata tlakg napaxkiyaw Jehová chu xtachuwin, chu nalapaxkiyaw kinchatunukan. Komo makglakgalhinanin akinin namin kilhtamaku max nakatakgalhiyaw taʼakglhuwit kinatalankan. Pero tapaxkit nema makxtum kinkatlawayan, natlawa pi tunkun chu xatapaxuwan nalakkaxtlawayaw kintaʼakglhuwitkan (Efes. 4:32; Col. 3:14). Ni kamastaw talakaskin pi kintapaxkitkan nalakgmixa o nataxlajwani. Wata chuntiya, xliputum kinakujkan kapaxkiw Jehová, xtachuwin chu kinatalankan.