KAKILHTAMAKU niku lhuwa anan taʼakglhuwit, tuwa kgalhikan takaksni. Chu, maski kgalhiyaw tsinu takaksni, tuwa chuntiya nakgalhiyaw. ¿Tuku tastakyaw xalak Biblia tlan nakinkamakgtayayan nakgalhiyaw xaxlikana takaksni chu ni namakgatsankgayaw? ¿Chu la tlan nakamakgtayayaw amakgapitsin nakgalhikgo takaksni?

Xlakata nalipaxuwayaw xaxlikana takaksni, talakaskin nitu nalipekuanaw chu tlan natawilayaw. Nachuna lu xlakaskinka nakgalhiyaw laktlan amigos. Pero, tuku tlakg xlakaskinka, wa pi tlan natalalinaw Dios xlakata ni namakgatsankgayaw takaksni. Ka’akxilhwi la natlawayaw.

Komo nakgalhakgaxmataw xlimapakgsin chu xtastakyaw Jehová, nalimasiyayaw pi lipawanaw chu takgalhiputunaw takaksni (Jer. 17:7, 8; Sant. 2:22, 23). Wa xlakata Dios kinkalakgtalakatsuwiyan chu kinkamaxkiyan takaksni. Isaías 32:17 lichuwinan: «Tlawakan tuku xa’akgstitum kgalhikan takaksni; chu tuku xa’akgstitum, ni limin taʼakglhuwit chu putum kilhtamaku nitu lipekuankan». Wa xlakata komo nakgalhakgaxmataw Jehová xliputum kinakujkan, nakgalhiyaw takaksni (Is. 48:18, 19).

Xlakata nalipaxuwayaw xaxlikana takaksni, Jehová kinkamaxkiyan akgtum lu tlan tamaskiwin: wa espíritu santo (Hech. 9:31).

Akxni Pablo lichuwinalh «xtatlaw espíritu», kxlipulaktutu lichuwinalh takaksni (Gál. 5:22, 23). Komo lakaskinaw xaxlikana takaksni, namastayaw talakaskin pi espíritu santo nakinkapulalinan. Ka’akxilhwi pulaktiy tuku natlawayaw xlakata x’espíritu santo Dios nakinkamakgtayayan.

 Pulana, talakaskin nakgalhiyaw talismanin nalikgalhtawakgayaw Biblia chali chali (Sal. 1:2, 3). Akxni lilakpuwanaw tuku lichuwinan Biblia, espíritu santo kinkamakgtayayan nakatsiyaw la akxilha Jehová lhuwa tuku anan. Akgtum li’akxilhtit, katsiyaw tuku tlawa xlakata ankgalhin nakgalhi takaksni chu tuku xlakata xlakaskinka kxpalakata. Komo naliskujaw tuku katsiniyaw kxTachuwin, tlakg nakgalhiyaw takaksni (Prov. 3:1, 2).

Xlipulaktiy, kilitlawanitkan oración Jehová chu naskiniyaw x’espíritu santo (Luc. 11:13). Tiku putsakgo xtamakgtay Jehová kamalaknuni: «Xtakaksni Dios nema nila akgatekgskgo latamanin nakuentajtlawa minakujkan chu mintalakapastaknikan xpalakata Cristo Jesús» (Filip. 4:6, 7). Komo naskiniyaw x’espíritu, Jehová nakinkamaxkiyan takaksni nema kajwatiya kamaxki x’amigos (Rom. 15:13).

Biblia kamakgtayanit lhuwa latamanin natlawakgo talakgpalit kxlatamatkan chu ankgalhin nalipaxuwakgo takaksni nema takgalhikgo Jehová, x’akstukan chu takaksni nema katakgalhikgo latamanin. Ka’akxilhwi makgapitsi li’akxilhtit.

Kcongregaciónes wilakgolh latamanin tiku lakapala ksitsikgo, pero la uku tlan likatsikgo, xakgalhkgalhinanin, xalakkaswa chu xapaxkinanin * (Prov. 29:22). Ka’akxilhwi xli’akxilhtitkan chatiy natalan tiku kamaxkika tamakgtay xlakata ni lakapala nasitsikgo chu katsinikgolh la tlan nakalikatsinikgo amakgapitsin.

Xtayat David xtlawa pi nitlan xchuwinan. Akxni nina xmakamaxki xlatamat Dios, xlismaninit nitlan xkalichuwinan latamanin chu ni xkamaxki kakni tiku xalak xfamilia. Akgtum kilhtamaku, akxilhli pi xtalakaskin nalakgpali xtayat. ¿Tuku makgtayalh? Xla lichuwinan: «Ktsukulh tlawa xtastakyaw Biblia. Chu alistalh kifamilia chu akit ktsukuw lamaxkiyaw kakni».

Chuna la makgastakka Rachel chuna tsukulh kgalhi xtayat. Lichuwinan: «Min kilhtamaku chuntiyaku ksitsi xlakata klakachilh k’akgtum  familia niku putum kilhtamaku xlatalatlawa». ¿La tlawanit xlakata xakakswa nawan? Xla kgalhtinan: «Ankgalhin kskini tamakgtay Jehová».

David chu Rachel kaj akgtiy li’akxilhtit nema masiya pi tlan kitaxtu tlawakan xtastakyaw Biblia chu putsakan xtamakgtay espíritu santo. Maski lamaw knixatlan kakilhtamaku, tlan nalipaxuwayaw takaksni chu tlan nalatalalinaw kfamilia chu kcongregación. Wa xlakata, Jehová kinkawaniyan pi «ni katakgalhi[w] taʼakglhuwit putum latamanin» (Rom. 12:18). ¿La tlan chuna natlawayaw? ¿Chu tuku kitaxtu akxni liskujaw xakakswa nawanaw?

Akxni lichuwinanaw Dios, kawaniyaw latamanin nakgaxmatkgo xtamakatsinin Dios xlakata xTamapakgsin (Is. 9:6, 7; Mat. 24:14). Chu lipaxuwayaw pi lhuwa latamanin makgamakglhtinankgo uma tamakatsinin xla takaksni. Paxtikatsiniyaw xlakata uma tamakatsin, nialhtu lisitsikgo xlakata tuku la kkakilhtamaku. La uku, kgalhikgo xaxlikana takgalhkgalhin xlakata kkilhtamaku nema aku mima chu kgalhakgaxmatkgo uma tastakyaw: «Kaputsa [takaksni xlakata tlan] nakatalatapaya xamakgapitsin» (Sal. 34:14).

Xlikana, pulana ni putum latamanin kgaxmatkgo akxni lichuwinanaw Dios (Juan 3:19). Maski chuna, x’espíritu Dios kinkamakgtayayan liwana nakatachuwinanaw chu nakalimasiyaniyaw kakni. Chuna, limasiyayaw pi tlawamaw tastakyaw nema mastalh Jesús xlakata akxni nalichuwinanaw Dios: «Na akxni natanuyatit kchiki, [kasikulunatlawatit] nti xala kkchiki. Nawa lapi xmininilh nti xala kkchiki, wa mintasikulunatlawan, kaʼananikgolh; chi wa lapi ni xmininilh, pus nakatapuspitnipalayan» (Mat. 10:11-13). Akxni chuna tlawayaw kinkamaxkiyan talakaskin pi ni nakatakgalhiyaw taʼakglhuwit akxni natapanuyaw kchiki chu alistalh tlan nakamakgtayayaw latamanin.

Akinin nachuna tlawayaw pi na’anan takaksni akxni katachuwinanaw tiku kgalhikgo limapakgsin, chu asta tiku lakatakikgo kintaskujutkan. Ka’akxilhwi akgtum li’akxilhtit. Tamapakgsin xalak África ni xkatalalin xtatayananin Jehová chu ni xkinkamaxkiyan talakaskin naktlawayaw Pukgalhtawakga. Xlakata nalakkaxtlawakan taʼakglhuwit, malakgachaka chatum tala tiku misionero xlitaxtunit k’ama kachikin xlakata nawani chatum tiku xkgalhi limapakgsin xalak ama kachikin xla Londres (Inglaterra) pi tuku tlawayaw ni wili taʼakglhuwit. ¿Tuku kitaxtulh?

Tala wan: «Akxni kchalh, kakxilhli la klhakgananit tiku kamakgamakglhtinan latamanin chu kkatsilh pi xmakgtapakgsi k’akgtum tribu chu xchuwinan tachuwin nema akit xakkatsininit. Wa xlakata ktachuwinalh kxtachuwin nema xchuwinan. Kaks lilakawa chu kinkgalhskilh tuku xlakata xakminit. Liwana kwanilh pi xaktachuwinamputun alto comisionado. Xla xakgatlilh kteléfono, chu alistalh taxtulh chu kintachuwinalh kxtachuwin. Alistalh, liwana kgaxmatli tuku kwanilh xlakata taskujut nema tlawakgo xtatayananin Jehová».

Xlakata uma tala liwana tachuwinalh tlawalh pi uma comisionado nialh lu xkatalatlawalh xtatayananin Jehová. Alh kilhtamaku, mastaka talakaskin pi tlan natlawakan Pukgalhtawakga. ¡Lu paxuwakgolh natalan! Xlikana, komo nakamaxkiyaw kakni amakgapitsin lu tlan kitaxtu chu kinkaliminiyan takaksni.

La uku, kskujnin Dios lamaw k’akgtum paraíso xa’espritual niku anan takaksni. Chu ankgalhin chuna nakgalhiyaw komo naliskujaw xlakata nakgalhiyaw uma xtatlaw espíritu. Pero tuku tlakg xlakaskinka wa pi Jehová nakinkamaxkiyan xtasikulunalin chu nalipaxuwayaw lhuwa takaksni kxasasti kakilhtamaku (2 Ped. 3:13, 14).