ARTÍCULO NEMA NATALIKGALHTAWAKGA 19
Tapaxkit chu tuku xaʼakgstitum akxni tlawakan tuku nitlan
«Ni tamakgapaxuwayan ti talakgati talakapastaka tu lixkajnit; ti laklixkajnit ixtalakapastaknikan ni tamana talatama nak milakatin» (SAL. 5:4, Salmos Ixtatlincan ti Talipawan Dios, SXP).
TAKILHTLIN sjj 142 Ni kamakgxtakgwi kintakgalhkgalhinkan
TUKU NATALICHUWINAN *
1-3. 1) Chuna la wan Salmo 5:4-6, ¿la akxilha Jehová tuku xalixkajni? 2) ¿Tuku xlakata tlan nawanaw pi kalikgamanankan laktsu kamanan lakatsala «xlimapakgsin Cristo»?
JEHOVÁ xkajni putum tuku nixatlan (kalikgalhtawakga Salmo 5:4-6). Wa xlakata, lu xkajni kalikgamanankan laktsu kamanan xlakata uma lu nitlan chu lixkajnit. Chuna la xla, akinin na xkajniyaw akxni kalikgamanankan laktsu kamanan chu ni akxilhputunaw uma anta kcongregación (Rom. 12:9; Heb. 12:15, 16).
2 Kalikgamanankan laktsu kamanan lakatsala «xlimapakgsin Cristo», uma wamputun, putum tuku lichuwinalh chu tuku tlawalh Jesús (Gál. 6:2). ¿Tuku xlakata chuna wanaw? Xlakata chuna la akxilhwi kʼartículo nema titaxtulh, xlimapakgsin Cristo, limasiya tapaxkit chu tlawa pi kaʼanalh tuku xaʼakgstitum. Xlakata akinin xaxlikana kstalaninanin Cristo lilatamayaw uma limapakgsin, tlan kalikatsiniyaw laktsu kamanan chu kalimasiyaniyaw tapaxkit. Pero kalikgamanankan laktsu kamanan lu lixkajnit chu ni limasiya tapaxkit, uma tlawa pi laktsu kamanan nalakpuwankgo pi niti kapaxki chu napekuankgo.
3 Lu nitlan, pero kalikgamanankan laktsu kamanan lu talakgatuminit xlikalanka katiyatni chu nachuna katlawakanit xkamanankan makgapitsi natalan. ¿Tuku xlakata? Xlakata kkilhtamaku niku lamaw anan lhuwa «lakchixkuwin tiku lixkajni likatsikgo chu akgskgawinankgo» chu makgapitsi max natanuputunkgo anta kcongregación (2 Tim. 3:13). Nachuna, makgapitsi tiku wankgo pi makgtapakgsikgo kcongregación mastakgonit talakaskin pi xalixkajni xtapuwankan nakamatlawi tuku nitlan chu nakalikgamanankgo laktsu kamanan. La uku naʼakxilhaw tuku xlakata kalikgamanankan laktsu kamanan akgtum lanka talakgalhin. Alistalh, naʼakxilhaw tuku tlawakgo lakgkgolotsin akxni wi tiku tlawa akgtum lanka talakgalhin, la komo kalikgamanankan laktsu kamanan, chu la tlan nakakuentajtlawakgo natlatni xkamanankan. *
AKGTUM LANKA TALAKGALHIN
4, 5. ¿Tuku xlakata akgtum lanka talakgalhin xpalakata tiku likgamananka?
4 Tiku kalikgamanankan lhuwa kata lipatinankgo. Chu ni kaj xʼakstukan patinankgo nachuna tiku kapaxkikgo: tiku xalak xfamilia chu natalan xalak congregación. Kalikgamanankan laktsu kamanan akgtum lanka talakgalhin.
5 Akgtum lanka talakgalhin xpalakata tiku likgamananka. * Katlawanikan tuku nitlan chu kamakgapatinankan amakgapitsin akgtum lanka talakgalhin. Chu chuna la naʼakxilhaw kʼatanu artículo, wa uma tuku tlawa tiku likgamanan aktsu kgawasa o tsumat xlakata lu kamakgapatinan. Tlawa pi aktsu kgawasa o tsumat nialh nalipawankan chu lu napekuan. Talakaskin nakakuentajtlawayaw laktsu kamanan xlakata uma tuku lu nixatlan. Talakaskin nakamakgoxamixiyaw chu nakamakgtayayaw tiku kalikgamananka (1 Tes. 5:14).
6, 7. ¿Tuku xlakata kalikgamanankan laktsu kamanan akgtum talakgalhin xlakatin congregación chu mapakgsinanin?
6 Akgtum lanka talakgalhin kxlakatin congregación. Chatum tala tiku kalikgamanan laktsu kamanan maxkajwi congregación (Mat. 5:16; 1 Ped. 2:12). Lu nitlan pi tuku tlawa chatum lataman natlawa pi nitlan nakalichuwinankan lhuwa natalan tiku “lu kuentajtlawakgo xtakanajlakan” (Jud. 3). Ni mastayaw talakaskin pi tiku tlawakgo tuku lixkajni chu ni makgxtakga tuku tlawama chuntiya namakgtapakgsi kcongregación chu namaxkajwi.
7 Akgtum lanka talakgalhin kxlakatin mapakgsinanin. Kstalaninanin Cristo talakaskin pi «kakgalhakgaxmatkgolh mapakgsinanin tiku tlakg kgalhikgo limapakgsin» (Rom. 13:1). Limasiyayaw pi tapakgsiyaw akxni kgalhakgaxmataw xlimapakgsin kinkachikinkan. Komo chatum tiku xalak congregación lakatsala limapakgsin, la komo kalikgamanankan laktsu kamanan, makglakgalhinan kxlakatin mapakgsinanin (katamalakxtupi Hechos 25:8). Maski lakgkgolotsin ni kgalhikgo limapakgsin nakamalakgaxokgekgo tiku tlawakgo tuku nitlan, ni makgtsekgkgo tiku likgamanalh aktsu kgawasa o tsumat xlakata namalakgaxokgekan xtalakgalhin (Rom. 13:4). Makglakgalhina nalakgaxokgo tuku nitlan tlawanit (Gál. 6:7).
8. ¿La akxilha Dios talakgalhin nema tlawanikan achatum?
8 Liwaka akgtum lanka talakgalhin kxlakatin Jehová (Sal. 51:4). Akxni chatum lataman tlawani tuku nitlan achatum, nachuna makglakgalhinan kxlakatin Dios. Kaʼakxilhwi akgtum liʼakxilhtit xlakata Limapakgsin nema Jehová xkamaxkinit israelitas. Uma Limapakgsin xwan pi tiku xkgalhanan o xʼakgskgawi achatum, xlimasiya pi «ni xaʼakgstitum taya Jehová» (Lev. 6:2-4). Wa xlakata, tala tiku kalikgamanan laktsu kamanan chu lu kamakgapekuan, makgxtakga Jehová chu maxkajwi xtukuwani. Wa xlakata, kalikgamanankan laktsu kamanan liʼakxilhaw: akgtum lixkajni talakgalhin kxlakatin Dios chu ni akxilhputunaw.
9. ¿Tuku tastakyaw xalak Biblia mastanit xkachikin Jehová chuna la titaxtutilhanit kata, chu tuku xlakata?
9 Chuna la titaxtutilhanit kata, xkachikin Jehová kinkamaxkinitan lhuwa tastakyaw nema takilhtinit kBiblia xlakata akxni kalikgamanankan laktsu kamanan. Akgtum liʼakxilhtit, revista Makatsinina chu ¡Despertad! lichuwinanit lhuwa tamakgtay xlakata tuku tlan natlawakgo tiku kalikgamanankanit, la tlan nakamakgtayakan chu nakamakgpuwantinikan chu tuku tlan natlawakgo natlatni xlakata nakakuentajtlawakgo xkamanankan. Lakgkgolotsin na kamaxkikanit lhuwa tastakyaw xlakata tuku tlan natlawakgo akxni wi tiku tlawa uma talakgalhin. Xkachikin Jehová ankgalhin liwana akxilha tuku xlitlawatkan lakgkgolotsin akxni chuna la. Chuna, kuentajtlawayaw pi ni nalakatsala xlimapakgsin Cristo chuna la lakkaxtlawakan uma taʼakglhuwit.
TUKU XLITATLAWAT AKXNI WI TIKU TLAWA AKGTUM LANKA TALAKGALHIN
10-12. 1) Akxni lakgkgolotsin lakkaxtlawakgo akgtum lanka talakgalhin, ¿tuku kuentajtlawakgo chu tuku lilakgaputsakgo? 2) Chuna la wan Santiago 5:14, 15, ¿tuku tlawaputunkgo lakgkgolotsin?
10 Akxni wi tiku tlawa akgtum lanka talakgalhin, lakgkgolotsin tiku nalakkaxtlawakgo taʼakglhuwit, liwana katsikgo pi xlakata tlan namakgantaxtikgo xlimapakgsin Cristo, talakaskin nakalimasiyanikgo tapaxkit natalan chu natlawakgo tuku xaʼakgstitum kxlakatin Dios. Wa xlakata, lhuwa tuku kuentajtlawakgo. Tuku tlakg xlakaskinka akxilhkgo wa pi natamasantujli xtukuwani Dios (Lev. 22:31, 32; Mat. 6:9). Nachuna lu kuentajtlawakgo xtakanajlakan natalan chu kamakgtayakgo tiku katlawanikanit tuku nitlan.
11 Nachuna, lakgkgolotsin makgtayakgo tiku tlawalh lanka talakgalhin xlakata tlan natalalimpara Jehová, komo matlani (kalikgalhtawakga Santiago 5:14, 15). Tala tiku masta talakaskin pi nixatlan xtapuwan namatlawi akgtum talakgalhin, nitlan wi xtakanajla. Uma kilhchanima pi nialh tlan talalin Jehová. * Lakgkgolotsin xtachuna la makuchinanin nema kuentajtlawakgo kintakanajlakan chu makuchiputunkgo tiku tlawalh talakgalhin. Xtastakyawkan nema takilhtinit kBiblia tlan namakgtaya xlakata tlan natalalimpara Dios. Pero kajwatiya chuna nala komo xlikana nitlan limakgkatsi tuku tlawanit (Hech. 3:19; 2 Cor. 2:5-10).
12 Xlikana pi lakgkgolotsin kgalhikgo akgtum lanka talakgatay. Kalilakgaputsakgo xborregos Jehová nema xla kamakamaxkinit (1 Ped. 5:1-3). Lakaskinkgo pi natalan tlan namakgkatsikgo kcongregación. Wa xlakata, wi tuku lakapala tlawakgo akxni katsikgo pi wi tiku tlawanit akgtum lanka talakgalhin, la komo kalikgamanankan laktsu kamanan. ¿Tuku tlawakgo? Kalichuwinaw takgalhskinin nema litsukukgo párrafos 13, 15 chu 17.
13, 14. ¿Lakgkgolotsin kgalhakgaxmatkgo limapakgsin xlakata nakamalakgsiyakan tiku limawakamaka pi kalikgamanalh laktsu kamanan? Kalichuwinanti.
13 ¿Lakgkgolotsin kgalhakgaxmatkgo limapakgsin xlakata namalakgsiyakan tiku limawakamaka pi kalikgamanalh laktsu kamanan? Chuna. Niku wilakgolh uma limapakgsin, lakgkgolotsin nakgalhakgaxmatkgo (Rom. 13:1). Umakgolh limapakgsin ni lakatsala xlimapakgsin Dios (Hech. 5:28, 29). Wa xlakata, akxni lakgkgolotsin katsikgo pi wi tiku tlawanit uma talakgalhin, lakapala skinkgo tamakgtay ksucursal xlakata tuku tlan natlawakan xlakata tlan namakgantaxtikan uma limapakgsin akxni namalakgsiyakan tiku likgamanalh aktsu kgawasa o tsumat.
14 Lakgkgolotsin kawanikgo tiku kalikgamananka, xnatlatnikan chu putum tiku katsikgo tuku lalh pi tlan namalakgsiyakgo tiku limawakamaka pi kalikgamanalh. Pero, ¿tuku xlitatlawat komo tiku malakgsiyamaka wa chatum tala chu uma tuku lalh lhuwa tiku katsikgo? ¿Nalakpuwan tala tiku malakgsiyanalh pi maxkajwima xtukuwani Dios? Ni. Tiku maxkajwilh xtukuwani Dios wa tiku tlawalh uma talakgalhin.
15, 16. 1) Chuna la wan 1 Timoteo 5:19, ¿tuku xlakata talakaskin chatiy latamanin xlakata lakgkgolotsin tlan namatsukikgo akgtum comité judicial? 2) ¿Tuku tlawakgo lakgkgolotsin akxni chatum tala limawakakan pi likgamanalh chatum aktsu kgawasa o tsumat?
15 Anta kcongregación, ¿tuku xlakata talakaskin chatiy latamanin xlakata lakgkgolotsin tlan namatsukikgo akgtum comité judicial? Xlakata chuna wan Biblia. Uma akgtum xalanka xlimapakgsin Jehová. Akxni tiku tlawanit talakgalhin ni wan tuku tlawanit, talakaskin nakatasanikan chatiy latamanin tiku akxilhkgolh o katsikgo tuku lalh xlakata tlan nalimasiyakgo komo xlikana tuku limawakamaka chu lakgkgolotsin tlan natlawakgo akgtum comité judicial (Deut. 19:15; Mat. 18:16; kalikgalhtawakga 1 Timoteo 5:19). ¿Wamputun uma pi talakaskin chatiy lataman xlakata tlan namalakgsiyakan kxlakatin mapakgsinanin tiku limawakamaka pi kalikgamanalh kamanan? Ni talakaskin. Lakgkgolotsin chu atanu tlan namalakgsiyakgo xlakatin mapakgsinanin komo max lakatsalalh limapakgsin.
16 Akxni chatum tala limawakakan pi kalikgamanalh laktsu kamanan, lakgkgolotsin pulaktiy tuku natlawakgo. Pulana, akxilhkgo pi liwana namakgantaxtikan limapakgsin xlakata la namalakgsiyakan tiku likgamanankgo laktsu kamanan. Alistalh, liwana lakputsananikgo tuku wan Biblia. Nachuna liwana nalakputsananikgo tuku xlikana lalh chu komo talakaskin natlawakan akgtum comité judicial. Komo uma lataman ni litaya tuku limawakamaka, lakgkgolotsin liwana kgaxmatkgo tuku nawankgo chatiy latamanin tiku max katsikgo tuku lalh. Tlawakan akgtum comité judicial komo anan chatiy latamanin nema tlan nalimasiyakgo pi xlikana tlawaka akgtum talakgalhin: chatum tiku limawakanama uma talakgalhin chu achatum lataman tiku na katsi pi tiku limawakamaka talakgalhin xlikana likgamanalh aktsu kgawasa o minit kilhtamaku wi tiku likgamananita. * Komo ni anan tiku tlan nalimasiya pi tiku malakgsiyamaka xlikana likgamanalh aktsu kgawasa, ni wamputun pi tiku limawakanama uma talakgalhin kaj akgsaninama. Asta akxni ni anan chatiy latamanin tiku nalimasiyakgo tuku lalh, lakgkgolotsin liwana katsikgo pi max tlawaka akgtum lanka talakgalhin nema lu kamakgapatinanit amakgapitsin. Wa xlakata, chuntiya kamakgtayakgo tiku katlawanika tuku nitlan chu skgalalh tawilakgo xlakata kuenta nakatlawakgo tiku xalak congregación (Hech. 20:28).
17, 18. Kalichuwinanti tuku tlawa akgtum comité judicial.
17 ¿Tuku tlawa akgtum comité judicial? Lakgkgolotsin tiku makgtapakgsikgo kʼakgtum comité judicial, liwana naʼakxilhkgo komo tiku tlawalh lanka talakgalhin chuntiya tlan namakgtapakgsi kcongregación. Tachuwin judicial ni wamputun pi lakgkgolotsin nawankgo pi mapakgsinanin namalakgaxokgekgo tiku lakatsalalh limapakgsin. Lakgkgolotsin mastakgo talakaskin pi wa mapakgsinanin nawankgo la namalakgaxokgekan tiku tlawalh tuku nitlan (Rom. 13:2-4; Tito 3:1).
18 Xtaskujutkan lakgkgolotsin tiku tlawakgo akgtum comité judicial wa xpalakata kintakanajlakan. Limaklakaskinkgo Biblia xlakata nakatsikgo komo tiku likgamanalh aktsu kgawasa xlikana nitlan limakgkatsi. Komo ni chuna, natamakxtukan kcongregación chu namakatsininankan pi nialh xtatayana Jehová (1 Cor. 5:11-13). Pero komo xlikana nitlan limakgkatsi tuku tlawalh, tlan chuntiya namakgtapakgsi kcongregación. Maski chuna, lakgkgolotsin namakatsinikgo pi max nikxni katimakglhtinalh akgtum taskujut kcongregación la komo kgolotsin o siervo ministerial. Nachuna, xlakata lu kalilakgaputsakgo laktsu kamanan, max tlan tsekg nakawanikgo xanatlatni pi nakakuentajtlawakgo laktsu xkamanankan xlakata nialh lu nalakgtalakatsuwikgo uma lataman. Akxni lakgkgolotsin nakatachuwinankgo xanatlatni, kuenta natlawakgo pi ni nakawanikgo tiku likgamanankanit.
¿LA TLAN NAKAKUENTAJTLAWAKGO NATLATNI XKAMANANKAN?
Xanatlatni kakuentajtlawakgo xkamanan akxni kawanikgo tuku xlikatsitkan xlakata talakgxtumit chuna la staktilhakgo xlakata ni nakalikgamanankan. Xlakata chuna natlawakgo maklakaskinkgo likgalhtawakga nema masta xkachikin Dios (kaʼakxilhti párrafos 19 asta 22).
19-22. ¿La tlan nakakuentajtlawakgo natlatni xkamanankan? (Kaʼakxilhti dibujo nema wi kxmakni revista).
19 Xanatlatni kalakgchan nakakuentajtlawakgo xkamanankan xlakata ni nakaʼakgspula tuku nitlan. * Natlatni, minkamanankan «akgtum xtamaskiwin Dios» (Sal. 127:3, TNM). Wixin kalakgchanan nakakuentajtlawayatit uma tamaskiwin. ¿Tuku tlan natlawayatit xlakata ni nakalikgamanankan minkamanankan?
20 Pulana, liwana kakatsini xlakata uma tuku nitlan. Kakatsini tiku lataman kalikgamanan laktsu kamanan chu la tlawakgo xlakata nakaʼakgskgawikgo. Kuentajkatlawa xlakata nitu nakatlawanikan (Prov. 22:3; 24:3). Liwana kalakapastakti pi tiku likgamanan aktsu kgawasa wa tiku xla lakgapasa chu lipawan.
21 Xlipulaktiy, ankgalhin kakatachuwinanti minkamanan (Deut. 6:6, 7). Uma wamputun pi liwana nakakgaxpatniya (Sant. 1:19). Kalakapastakti pi lakgachunin laktsu kamanan tuwa makgkatsikgo nalichuwinankgo tuku nitlan katlawanika. Max pekuankgo pi ni katikanajlanika. O max tiku likgamanalh wanilh pi natlawani tuku nitlan komo wi tiku nakawani tuku tlawanilh. Komo wixin akxilhatit pi wi tuku nitlan lama, kalimasiyanitit tapaxkit akxni nakgalhskinatit chu liwana kakgaxpatnitit tuku nakawaniyan.
22 Xlipulaktutu, kakamasiyani minkamanan. Kakawani tuku talakaskin nakatsikgo xlakata talakgxtumit chuna la staktilhakgo. Kakamasiyanikgo tuku natlawakgo chu tuku nawankgo akxni wi tiku nakaxamaputun niku ni xlilat. Kalimaklakaskinti tastakyaw nema mastanit xkachikin Dios xlakata la tlan nakakuentajtlawakan laktsu kamanan (kaʼakxilhti recuadro « Tuku nakamakgtaya natlatni chu kamanan»).
23. ¿La akxilhaw xlakata kalikgamanankan laktsu kamanan, chu tuku naʼakxilhaw kʼatanu artículo?
23 Xtatayananin Jehová akgtum lanka chu lixkajni talakgalhin liʼakxilhaw kalikgamanankan laktsu kamanan. Congregaciones makgantaxtikgo xlimapakgsin Cristo, wa xlakata ni makgtsekga tiku likgamanan laktsu kamanan xlakata ni namalakgaxokgekan xtalakgalhin. Pero, ¿la tlan nakamakgtayayaw tiku kalikgamanankanit? Uma takgalhskinin nakgalhtiyaw kʼatanu artículo.
TAKILHTLIN sjj 103 Tiku pulalinkgo congregación xtamaskiwin Dios
^ párr. 5 Kʼuma artículo naʼakxilhaw tuku tlan natlawayaw xlakata ni nakalikgamanankan laktsu kamanan. Naʼakxilhaw tuku tlan natlawakgo lakgkgolotsin xlakata nakuentajkatlawakgo tiku xalak congregación chu tuku tlan natlawakgo natlatni xlakata kuenta nakatlawakgo xkamanankan.
^ párr. 3 TUKU LU XLAKASKINKA: Kalikgamanankan laktsu kamanan kilhchanima putum tuku chatum lataman tlawani aktsu kgawasa o tsumat xlakata tlan namakgkatsi xlakata xtalakgxtumiputun. Tuku lu nitlan nema makgtanuma, wa: katatalakgxtumikan laktsu kamanan, limaklakaskinkan kilhni o tan; nakaxamanikan tuku xlichixku o xlitsumat, xtsikit o xtan. Maski tiku tlakg kalikgamanankan wa laktsuman, nachuna kalikgamanankan laktsu lakgkgawasan. Maski tiku tlakg kalikgamanankgo laktsu kamanan wa lakchixkuwin, nachuna tlawakgo makgapitsin lakpuskatin.
^ párr. 5 TUKU LU XLAKASKINKA: Kʼuma artículo chu nema aku namin, tachuwin tiku likgamananka kilhchanima tiku likgamananka akxni aktsujku xwanit. Uma tachuwin kilhchanima pi tiku likgamananka ni wa lin kuenta, wata wa tiku likgamanalh chu tlawanilh tuku nitlan.
^ párr. 11 Komo wi tiku natlawa akgtum lanka talakgalhin xlakata nitlan wi xtakanajla, ni wamputun pi ni katilakgaxokgolh tuku nitlan tlawanit. Tiku tlawalh talakgalhin lin kuenta xlakata tuku nitlan tlawalh chu talakaskin namaxki kuenta Jehová (Rom. 14:12).
^ párr. 16 Chatum xatlat o atanu tiku lipawan aktsu kgawasa tlan nakawani lakgkgolotsin xlakata tuku max tlawanika. Komo chuna natlawakgo, aktsu kgawasa nialh tlakg katipatinalh. Lakgkgolotsin nikxni naskinikgo aktsu kgawasa pi na anta natawila akxni tachuwinankgo tiku limawakamaka pi likgamanalh.
^ párr. 19 Tuku kawanikan unu natlatni nachuna kawanimaka tiku kakuentajtlawakgo laktsu kamanan.
