1. ¿Tuku lichuwinalh Jesús xlakata tuku lhuwa xtapalh xalak akgapun?

¿ANAN tuku lhuwa xtapalh nema ni tasiya? Chuna, asta tuku ni tasiyakgo tlakg kgalhi xtapalh. KxTaʼakgchuwin Jesús nema mastalh ksipi, lichuwinalh pi tuku xalak akgapun tlakg kgalhi xtapalh nixawa tuku anan kkakilhtamaku. Chu wampa: «Niku wi tuku lanka xtapalh liʼakxilha, na anta natawila minaku» (Mat. 6:19-21). Kinakujkan tlawa pi naputsayaw tuku lakpuwanaw pi tlakg kgalhi xtapalh. Maʼakgstokgwiliyaw «tuku lhuwa xtapalh kʼakgapun» akxni liskujaw pi Jehová tlan nakinkaʼakxilhan. Chuna la lichuwinalh Jesús, nitila chu nitu tuku natlawa pi namakgatsankgayaw uma tuku lanka xtapalh.

2. 1) Chuna la wan 2 Corintios 4:17, 18, ¿tuku kinkamakgpuwantiniyan apóstol Pablo natlawayaw? 2) ¿Tuku nalichuwinanaw k’uma artículo?

² Apóstol Pablo kinkamakgpuwantiniyan pi «wa kaʼakxilhwi tuku ni tasiya» (kalikgalhtawakga 2 Corintios 4:17, 18). Umakgolh tuku lhuwa xtapalh makgtanuma tasikulunalin nema namakglhtinanaw kxasasti kakilhtamaku nema Jehová kinkamalaknuninitan. Kʼuma artículo nalichuwinanaw pulaktati tuku lhuwa xtapalh tuku ni tasiya nema kgalhiyawa la uku: chuna la talalinaw Dios, oración, xtamakgtay espíritu santo chu tamakgtay nema kinkamaxkikgoyan Jehová, Jesús chu ángeles akxni lichuwinanaw xtachuwin Dios. Nachuna, na’akxilhaw la tlan napaxtikatsiniyaw Jehová xlakata umakgolh tamaskiwin nema ni tasiyakgo.

3. ¿Tuku kgalhiyaw nema tlakg lanka xtapalh, chu tuku tlawa pi tlan nakgalhiyaw?

³ Chuna la talalinaw Jehová wa tuku tlakg kgalhi xtapalh nema kgalhiyaw (Sal. 25:14). Pero ¿la tlan x’amigo Dios nalitaxtukgo latamanin tiku makglakgalhinanin chu xla chuntiya  xasanto nalitaxtu? Xlakata xtamakamastan Jesús «mapanu xtalakgalhinkan latamanin» (Juan 1:29). Asta maski akxni nina xniy Jesús, Jehová xkatsi pi xKgawasa nikxni xʼama makgxtakga chu chuna latamanin tlan xlakgtaxtukgolh. Wa xlakata Jehová tlan katalalilh latamanin tiku latamakgolh akxni nina xniy Cristo (Rom. 3:25).

4. Kalichuwinanti makgapitsin xʼamigos Dios tiku latamakgolh akxni nina xniy Jesús.

⁴ Kakalichuwinaw makgapitsi xʼamigos Dios tiku latamakgolh akxni nina xniy Jesús. Abrahán xkgalhi lanka takanajla. Akxni xtitaxtunita liwaka akgtum milh kata, Jehová limapakuwilh «kiʼamigo» (Is. 41:8). Akxilhaw pi nipara linin tlan natlawa pi nialh xʼamigos Jehová nawanaw. Asta la uku, Abrahán chuntiya wi kxtalakapastakni Jehová (Luc. 20:37, 38). Atanu lu xatlan liʼakxilhtit wa Job. Akgtum kilhtamaku akxni ángeles xtamakxtumikgonit kʼakgapun, Jehová limasiyalh pi lu xlipawan Job. Xla lichuwinalh xlakata Job: «Chatum chixku tiku xaʼakgstitum chu xaskulunku xlakata pekuani Dios chu ni tlawa tuku nixatlan» (Job 1:6-8). ¿Chu la xʼakxilha Daniel, tiku xaʼakgstitum skujnanilh liwaka 80 kata kʼakgtum kachikin niku latamanin xkakninanikgo atanu dioses? Akxni Daniel kgolota xwanit, ángeles makgtutu liwana wanikgolh pi Dios «lu lanka xtapalh» xliʼakxilha (Dan. 9:23; 10:11, 19). Liwana katsiyaw pi Jehová lu kgalhkgalhima kilhtamaku akxni nakamalakastakwanipara xʼamigos tiku lu kapaxki (Job 14:15).

5. ¿Tuku kilitlawatkan xlakata tlan natalalinaw Jehová?

⁵ La uku, lhuwa millón latamanin tiku makglakgalhinanin tlan talalinkgo Jehová. Lhuwa lakchixkuwin, lakpuskatin chu lakkamanan xlikalanka kakilhtamaku limasiyakgo pi xʼamigos Jehová litaxtuputunkgo. Biblia wan pi Jehová «tlan katalalin» latamanin tiku xaʼakgstitum (Prov. 3:32). Tlan talalinkgo xlakata kgalhinikgo lanka takanajla xtamakamastan Jesús. Xlakata xtamakamastan Jesús, Jehová kinkamaxkiyan talakaskin tlan natamakamastaniyaw chu natamunuyaw. Akxni chuna tlawayaw, makgtapakgsiyaw kxkachikin Jehová, niku wilakgolh lhuwa millón natalan tiku tamakamastanikgonit chu tamunukgonit, tiku lipaxuwamakgolha la tlan talalinkgo Jehová.

6. ¿La tlan napaxtikatsiniyaw Jehová xlakata tlan talalinaw?

⁶ ¿La tlan napaxtikatsiniyaw Jehová xlakata tlan talalinaw? Nastalaniyaw xliʼakxilhtitkan Abrahán chu Job. Xlakan ni makgxtakgkgolh Dios liwaka akgtum ciento kata. Akinin nachuna kilitlawatkan, maski lhuwata kata la skujnanimaw Jehová kʼuma kakilhtamaku. Nachuna tlan nastalaniyaw xliʼakxilhtit Daniel chu lanka xtapalh naliʼakxilhaw chuna la talalinaw Jehová nixawa kilatamatkan (Dan. 6:7, 10, 16, 22). Jehová nakinkamakgtayayan natayaniyaw tuku tuwa natitaxtuyaw chu ankgalhin tlan natalalinaw (Filip. 4:13).

7. 1) Chuna la wan Proverbios 15:8, ¿la akxilha Jehová kiʼoracioneskan? 2) ¿La kgalhti Jehová kiʼoracioneskan?

⁷ Atanu tuku lhuwa xtapalh nema ni tasiya wa oración. Tiku amigos litaxtukgo lakgatikgo ankgalhin latachuwinankgo chu lawanikgo tuku makgkatsikgo. Nachuna kilitlawatkan xlakata tlan natalalinaw Jehová. Xla maklakaskin xTachuwin xlakata nakinkatachuwinanan, chu anta kinkawaniyan xtalakapastakni chu tuku makgkatsi. Chu akinin tlan tachuwinanaw akxni tlawaniyaw oración. Akxni tlawayaw oración, tlan nawaniyaw tuku lakapastakaw chu putum tuku makgkatsiyaw. Jehová lu kgaxmatputun kiʼoracioneskan (kalikgalhtawakga Proverbios 15:8). Xla chatum amigo tiku lu kinkapaxkiyan, chu wa xlakata, ni kajwatiya kgaxmata kiʼoracioneskan wata nachuna kinkakgalhtiyan. Min kilhtamaku  lakapala kinkakgalhtiyan. Pero lakgachunin talakaskin chuntiya natlawayaw oración. Maski chuna, liwana katsiyaw pi xla nakinkakgalhtiyan akxni tlakg tlan naʼakxilha. Xlikana, max nichuna nakinkakgalhtiyan la xlakpuwanitaw. Kawiliw akgtum kiʼakxilhtit, max ni katimapanulh akgtum taʼakglhuwit nema kgalhiyaw, wata nakinkamaxkiyan litliwakga chu liskgalala xlakata tlan natayaniyaw (1 Cor. 10:13).

8. ¿La tlan napaxtikatsiniyaw Jehová xlakata oración?

⁸ ¿La tlan napaxtikatsiniyaw Jehová xlakata oración? Akgtum liʼakxilhtit, namakgantaxtiyaw uma tastakyaw: «Ankgalhin katlawatit oración» (1 Tes. 5:17). Jehová ni fuerza kinkawaniyan pi katlawaniw oración. Wata masta talakaskin akinin nalaksakaw tuku natlawayaw chu kinkawaniyan: «Chuntiya katlawatit oración» (Rom. 12:12). Wa xlakata tlan nalimasiyaniyaw pi paxtikatsiniyaw akxni ankgalhin natlawaniyaw oración. Xlikana, akxni natlawayaw oración, nalakapastakaw pi napaxtikatsiniyaw xlakata tuku kinkamaxkiyan chu namaxkiyaw kakni (Sal. 145:2, 3).

9. 1) ¿La akxilha oración chatum tala tiku wanikan Chris? 2) ¿La akxilha wix oración?

⁹ Akxni tlakg linaw kilhtamaku chuna la skujnimaw Jehová chu akxilhaw la kgalhti kiʼoracioneskan tlakg lanka xtapalh naliʼakxilhaw oración. Kaʼakxilhwi tuku wa chatum tala tiku wanikan Chris, tiku liwakaya 47 kata la skujnanima Jehová xliputum kilhtamaku, xla wan: «Lu klakgati sokg ktaki chu ktlawani oración Jehová. Lu tlan kmakgkatsi ktachuwinan akxni kakxilha la xkgakganat tsuku malakgskgo monkgana. Akxni chuna ktlawa, tlawa pi nakpaxtikatsini Jehová putum tuku kimaxkinit, chuna la oración. Chu akxni sputa kilhtamaku, akxni ktlawa oración, kpaxuwa kan lhtata xlakata kintalakapastakni tlan wi».

10. ¿Tuku xlakata lanka xtapalh naliʼakxilhaw xʼespíritu santo Dios?

¹⁰ Atanu tuku lu lhuwa xtapalh nema ni tasiya wa xlitliwakga Dios. Jesús kinkamakgpuwantinin ankgalhin naskinaw espíritu santo (Luc. 11:9, 13). Jehová maklakaskin espíritu  santo xlakata nakinkamaxkiyan «litliwakga nema lakatsala kilitliwakgakan» (2 Cor. 4:7; Hech. 1:8). Espíritu santo tlan nakinkamakgtayayan natayaniyaw tuku tuwa natitaxtuyaw.

11. ¿La tlan nakinkamakgtayayan espíritu santo?

¹¹ Espíritu santo kinkamakgtayayan tlan namakgantaxtiyaw tuku kinkalakgayawakanitan kxkachikin Dios. Tlan natlawa pi tlakg tlan namakgantaxtiyaw kintaskujutkan. Xlikana, liwana katsiyaw pi tuku tlan kitaxtu chuna la skujnanimaw Jehová ni wa xlakata tuku tlan tlawayaw wata wa xlakata xtamakgtay espíritu santo.

12. Chuna la wan Salmo 139:23, 24, ¿tuku tlan naskinaw kkiʼoracioneskan?

¹² Atanu la tlan nalimasiyayaw pi lanka xtapalh liʼakxilhaw espíritu santo wa pi naskiniyaw Jehová pi kakinkamakgtayan nalakgmakganaw putum nixatlan talakapastakni nema max wi kkinakujkan (kalikgalhtawakga Salmo 139:23, 24). Jehová nalimaklakaskin xʼespíritu santo xlakata tlan naʼakxilhaw komo wi tuku kililakgpalitkan kkilatamatkan. Chu komo wi tuku kililakgpalitkan, kaskiniw xʼespíritu santo xlakata nakgalhiyaw litliwakga chu chuna nalakgmakganaw uma nixatlan tapuwan. Chuna nalimasiyayaw pi ni tlawaputunaw tuku max natlawa pi Jehová nialh nakinkalimakgtayayan xʼespíritu santo (Efes. 4:30).

13. ¿La tlakg lanka xtapalh naliʼakxilhaw espíritu santo?

¹³ Komo nalilakpuwanaw tuku tlawama xʼespíritu santo Jehová la uku, tlakg lanka xtapalh naliʼakxilhaw. Akxni Jesús nina xʼan kʼakgapun, kawanilh kstalaninanin: «Namakglhtinanatit litliwakga akxni [nakamaxkikanatit] espíritu santo [...], na nalichuwinanatit kJerusalén nkimpalakata, [...] asta awatiya kxtankgana tiyat» (Hech. 1:8). Lu kaks malakawaninan la kgantaxtunit umakgolh tachuwin. Xlakata xtamakgtay espíritu santo, liwaka 8 millones aitat latamanin kxlikalanka katiyatni xlakskujnin Jehová litaxtukgonit. Nachuna, lamaw kʼakgtum kachikin xaʼespiritual, xlakata espíritu santo kinkamakgtayayan nakgalhiyaw lakwan tayat nema wa «xtawakat espíritu», chuna la tapaxkit, tapaxuwan, takaksni, lu kgalhkgalhinankan, tlawakan tuku tlan,  tlan likatsikan, takanajla, ni lakapala sitsikan chu machokgokan tuku nitlan tlawaputunkan (Gál. 5:22, 23). Xlikana, espíritu santo akgtum tamaskiwin nema kgalhi lanka xtapalh.

14. ¿La kinkamakgtayakgoyan Jehová, Jesús chu ángeles akxni lichuwinan xalakwan tamakatsinin?

¹⁴ Kgalhiyaw atanu tuku lu lanka xtapalh: akxtum nakataskujaw Jehová, Jesús chu ángeles (2 Cor. 6:1). Kinkamakgtayakgoyan akxni kaputsayaw latamanin tiku kstalaninanin Cristo nalitaxtukgo. Pablo lichuwinalh: «Akinin xtaskujnin Dios» (1 Cor. 3:9). Akxni lichuwinanaw Dios nachuna xtaskujnin Jesús litaxtuyaw. Kalakapastakwi pi akxni Jesús kawanilh kstalaninanin pi xkamasiyanikgolh putum latamanin xlikalanka katiyatni, lichuwinalh: «Ankgalhin nakkatatawilayan» (Mat. 28:19, 20). ¿Chu la kataskujaw ángeles? Lu paxtikatsiniyaw Jehová pi ángeles kinkapulalinkgoyan akxni anaw kalitachuwinanaw «lakwan tamakatsinin [...] tiku lamakgolh kkatiyatni» (Apoc. 14:6).

15. ¿Tuku lichuwinan Biblia nema limasiya la kinkamakgtayayan Jehová akxni lichuwinanaw xtachuwin?

¹⁵ ¿Tuku kitaxtunit xlakata uma tamakgtay? Akxni chanaw xatalhtsi Tamapakgsin, makgapitsi umakgolh talhtsi anta chankgo kxnakujkan latamanin tiku makgamakglhtinankgo tamakatsinin chu uma talhtsi tsuku pun (Mat. 13:18, 23). ¿Tiku tlawa pi umakgolh talhtsi napunkgo chu namasta xtawakat? Jesús lichuwinalh pi nitila kstalanina nalitaxtu komo ni wa Jehová natlawa pi nalakgminkgo (Juan 6:44). Anta kBiblia tekgsaw akgtum liʼakxilhtit nema limasiya uma. Akgtum kilhtamaku, Pablo kalitachuwinalh xtachuwin Dios lakpuskatin tiku xlayakgolh kxkilhtin kachikin Filipos. Kaʼakxilhwi tuku lichuwinan Biblia xlakata chatum puskat tiku na anta xlaya tiku xwanikan Lidia: «Jehová makgtayalh nakgaxmata chu liwana nakuentajtlawa tuku xlichuwinama Pablo» (Hech. 16:13-15). Chuna la tlawalh kxpalakata Lidia, Jehová kaliminit kxkachikin lhuwa millones latamanin.

16. ¿Tiku lakgchan namalankikan akxni tlan kinkakitaxtuniyan la lichuwinanaw Dios?

¹⁶ ¿Tiku lakgchan namalankikan akxni tlan kinkakitaxtuniyan la lichuwinanaw Dios? Pablo kgalhtilh uma takgalhskinin akxni katsokgnanilh umakgolh tachuwin congregación xalak Corinto: «Akit kchalh, Apolos munulh, pero wa Dios wanti mastakanit, wa xlakata nitu litaxtu tiku chan chu tiku munu, wata wa Dios, tiku mastaka» (1 Cor. 3:6, 7). Akxni tlan nakinkakitaxtuniyan la lichuwinanaw Dios, wa lakgchan namalankiyaw Jehová, chuna la tlawalh Pablo.

17. ¿La tlan nalimasiyayaw pi lanka xtapalh liʼakxilhaw pi akxtum kataskujaw Jehová, Jesús chu ángeles?

¹⁷ ¿La tlan nalimasiyayaw pi lanka xtapalh liʼakxilhaw pi akxtum kataskujaw Jehová, Jesús chu ángeles? Nakalitachuwinanaw xtamakatsinin putum lataman tiku nakatekgsaw. Chu pulaklhuwa la tlan natlawayaw uma, akgtum liʼakxilhtit, nalichuwinanaw Dios «niku lhuwa anankan chu kʼakgatunu chiki» (Hech. 20:20). Lhuwa natalan lu lakgatikgo kalitachuwinankgo xtachuwin Dios latamanin xanikuta niku katekgskgo. Akxni katekgskgo tiku ni kalakgapaskgo, xatapaxuwan kaxakgatlikgo chu lakputsakgo la nakalitachuwinankgo xtachuwin Dios. Komo latamanin kgaxmatputunkgo, liwana kgaxmatkgo tuku kalitachuwinankan.

18, 19. 1) ¿La chanaw talhtsi xla Tamapakgsin? 2) ¿La makgtayalh Jehová chatum chixku tiku wanikan Raphalalani?

¹⁸ Xlakata akinin «xtaskujnin Dios», ni kajwatiya talakaskin nachanaw talhtsi xla Tamapakgsin, wata nachuna talakaskin namunuyaw.  Akxni chatum lataman katsiputun, lu liskujaw xlakata tlakg nakatsini xlakata Biblia o nawaniyaw chatum tala pi namaxki akgtum takgalhtawakga xalak Biblia. Akxni chatum lataman tlakg tsuku staka xtakanajla, lu lipaxuwayaw akxni akxilhaw la makgtaya Jehová xlakata nakgalhi tlan naku chu xatlan talakapastakni.

¹⁹ Kaʼakxilhwi tuku titaxtulh Raphalalani, chatum chixku xalak Sudáfrica tiku skgoyona xwanit. Lu xlakgati putum tuku xkatsinima akxni xlimakgalhtawakgekan Biblia. Pero lu tuwa makgkatsilh akxni likgalhtawakgalh tuku masiya xTachuwin Dios xlakata taskuwan (Deut. 18:10-12). Tsinu tsinu, mastalh talakaskin pi Dios xmakgtayalh nalakgpali xtalakapastakni. Chu alistalh, makgxtakgli tuku xtlawa maski wa xtaskujut xwanit. La uku, Raphalalani kgalhi 60 kata chu wan: «Lu kkapaxtikatsini xTatayananin Jehová xlakata lu kimakgtayakgonit, la komo akxni kimakgtayakgolh naktekgsa akgtum taskujut. Chu lu kpaxtikatsini Jehová xlakata kimakgtayanit naklakgpali kilatamat, chu la uku tlan klichuwinan xtachuwin».

20. ¿Tuku liwana lakpuwanitaw natlawayaw?

²⁰ Kʼuma artículo lichuwinanitaw pulaktati tuku lanka xtapalh nema ni tasiyakgo. Tuku tlakg kgalhi xtapalh wa la talalinaw Jehová. Xlakata uma lanka tamaskiwin, tlan lipaxuwayaw atanu tamaskiwin nema kgalhikgo lanka xtapalh: natlawaniyaw oración, nakgalhiyaw xtamakgtay espíritu santo, chu tlan akxtum nakataskujaw Jehová, Jesús chu xʼángeles. Liwana lakkaxwilinitaw tlakg lanka nakaliʼakxilhaw umakgolh tamaskiwin nema ni tasiyakgo. Chu ankgalhin napaxtikatsiniyaw Jehová xlakata xla kiʼamigojkan.