Chatum tala tiku wanikan Sara * lichuwinan: «Akit lu kpekuan chu kmaxanan akxni kchuwinan. Wa xlakata ni klakgati akxtum kkatatawila tiku lu tliwakga chuwinankgo chu sitsikgo. Pero akxni kkatawi tiku ni lakapala sitsikgo chu taktujukgo, tlan kmakgkatsi. Akxni kkatawi tiku chuna likatsikgo, tlan kkawani tuku kmakgkatsi chu tlan kkalitachuwinan kintaʼakglhuwit. Kiʼamigos, chuna likatsikgo».

Tuku wan Sara limasiya pi ni lakapala sitsikan akgtum lilakgatit tayat. Nachuna, Jehová kapaxki latamanin tiku ni lakapala sitsikgo. Anta kxTachuwin, kinkaskiniyan: «Ni lakapala kasitsitit» (Col. 3:12). ¿Tuku wamputun ni lakapala sitsikan? ¿La limasiyalh Jesús uma tayat? ¿La nakinkamakgtayayan tlakg napaxuwayaw?

Ni lakapala sitsikan, akgtum tayat nema tlawa pi latamanin nakgalhikgo takaksni. Tiku ni lakapala sitsikgo, tlan kalikatsinikgo amakgapitsin, lakgalhamanankgo, chu akxni titaxtukgo tuku tuwa, ni lakapala sitsikgo chu machokgokgo tuku nitlan tlawaputunkgo.

Tiku ni lakapala sitsi putum tayani. Tachuwin xagriego nema matitaxtikan «ni lakapala sitsikan» xlimaklakaskinkan akxni xlichuwinankan tantum xaluku kawayu nema xmansojlikanit. Tantum kawayu nema mansojlikanit chuntiya kgalhi putum xlitliwakga, pero liwana masiyanikanit la namaklakaskin xlitliwakga. Nachuna kitaxtu akxni akinin ni lakapala sitsiyaw: machokgoyaw nixatlan kintayatkan chu tlan kalikatsiniyaw amakgapitsin.

Max nalakpuwanaw pi ni kgalhiyaw uma tayat akxni lakachinaw. Nachuna, xlakata lamaw niku latamanin nitlan likatsikgo chu lakapala sitsikgo, tuwa makgkatsiyaw nakgalhiyaw uma tayat (Rom. 7:19). Xlakata nakgalhiyaw uma tayat talakaskin lu naliskujaw, pero x’espíritu santo Jehová nakinkamakgtayayan nakgalhiyaw uma tayat (Gál. 5:22, 23). ¿Tuku xlakata talakaskin naliskujaw ni lakapala nasitsiyaw?

Ni lakapala sitsikan akgtum tayat nema amakgapitsin lakgatikgo. Chuna la wan Sara, tiku lichuwinawa, tlan makgkatsiyaw akxni katatawilayaw latamanin tiku ni lakapala sitsikgo. Jesús xlilakgapaskan xlakata ni lakapala ksitsi chu tlan xlikatsi (2 Cor. 10:1). Asta laktsu kamanan tiku ni liwana xlakgapaskgo akxtum xtatawilaputunkgo (Mar. 10:13-16).

 Ni lakapala sitsikan kinkamakgtayayan chu na kamakgtaya amakgapitsin. Komo kgalhiyaw uma tayat nakinkamakgtayayan nitu nalisitsiyaw (Prov. 16:32). Komo ni nakatlawaniyaw tuku nitlan amakgapitsin, liwaka tiku kapaxkiyaw, tlan namakgkatsiyaw. Chu atanu tuku tlan kitaxtu xlakata ni lakapala sitsikan, wa pi amakgapitsin nitu kamakgalipuwan.

Jesús ni lakapala ksitsi maski lhuwa tuku xlakgaya chu lhuwa taskujut xkgalhi. Lhuwa latamanin tuwa tuku xtitaxtumakgo chu xkgalhikgo lhuwa taʼakglhuwit. Xmaklakaskinkgo pi tlan xkamamakgkatsinika. Umakgolh xtachuwin Jesús lu kamakgtayalh: «Kakilakgtantit [...] xlakata akit ni lakapala ksitsi chu ktaktuju» (Mat. 11:28, 29).

¿La tlan nalimasiyayaw uma tayat chuna la limasiyalh Jesús? Pulana, nalikgalhtawakgayaw xTachuwin Dios xlakata nakatsiyaw la xkalikatsini Jesús latamanin chu tuku xtlawa akxni xtitaxtu tuku tuwa. Alistalh, akxni natitaxtuyaw tuku tuwa nema max nalisitsiputunaw, nachuna katlawaw la Jesús (1 Ped. 2:21). Kaʼakxilhwi pulaktutu tuku makgtayalh Jesús xlakata ni lakapala nasitsi.

Jesús lu xtaktuju. Xla wa: «Ni lakapala ksitsi chu ktaktuju» (Mat. 11:29). Biblia lichuwinan pi ni lakapala sitsikan chu taktujukan, akgtiy tayat nema lu xlakaskinka akxtum namasiyakan (Efes. 4:1-3). ¿Tuku xlakata chuna wanaw?

Taktujukan kinkamakgtayayan ni xlakaskinka namakgkatsiyaw chu ni lakapala nasitsiyaw. ¿Tuku tlawalh Jesús akxni liyawaka pi lu xwayan chu lu xwa vino? Xla ni lakapala sitsilh, xtayat kalimakaksalh latamanin chu kawanilh pi «tuku xa’akgstitum tlawa chatum lataman limasiya pi skgalala» (Mat. 11:19).

Ni xatasitsi kakakgalhtiw tiku nitlan nakinkalichuwinankgoyan kaj xlakata la tasiyayaw, komo puskat o chixku akinin o xlakata niku lakachinitaw. Peter, chatum kgolotsin xalak Sudáfrica, wan: «Akxni wi tiku wan tuku nitlan kimamakgkatsini, klilakpuwan tuku xtlawalh Jesús». Chu wampara: «Kkatsininit pi ni xlakaskinka nakmakgkatsikan».

Jesús xkatsi pi latamanin makglakgalhinanin xwankgonit. Xtamakgalhtawakgen Jesús xtlawaputunkgo tuku tlan, pero lakgachunin xtlawakgo tuku nitlan xlakata makglakgalhinanin xwankgonit. Akgtum li’akxilhtit, katsisni akxni Jesús x’amakaja makgnikan, Pedro, Santiago chu Juan ni makgpuwantinikgolh chuna la xla xkaskininit. Jesús xkatsi pi latamanin xtlawaputunkgo «tuku xa’akgstitum pero makni taxlajwani» (Mat. 26:40, 41). Xlakata xla xkatsi pi apóstoles makglakgalhinanin xwankgonit, ni kasitsinilh.

Kaʼakxilhwi xliʼakxilhtit chatum tala tiku wanikan Mandy. Xapulana, xla xlakaskin pi amakgapitsin xtlawakgolh tuku xla xlakaskin, pero la uku stalani xliʼakxilhtit Jesús. Mandy wan: «Klakapastaka pi putum latamanin makglakgalhinanin chu kliskuja nakakxilha tuku tlan tlawakgo chatunu chatunu, chuna la tlawa Jehová». Mandy na lakpuwa chuna la Jesús, tiku kalakgalhamalh latamanin xlakata xkatsi pi makglakgalhinanin xwankgonit. Komo akinin nachuna nalakapastaknanaw ni tuwa katimakgkatsiw tlan nakalikatsiniyaw amakgapitsin.

Jesús xlipawan Jehová. Akxni Jesús xlama kKatiyatni, tayanilh tuku nitlan tlawanika. Ni kanajlanika, lakgmakganka chu mapatinika. Maski chuna, nikxni sitsilh, xlakata lipawa «Juez tiku xa’akgstitum lakputsanan» (1 Ped. 2:23). Jesús xkatsi pi xTlat xalak akgapun x’ama kuentajtlawa chu xmilh kilhtamaku akxni Jehová xkamalakgaxokgelh latamanin tiku nitlan likatsinikgolh.

Komo wi tiku nakinkatlawaniyan tuku nitlan chu nasitsiyaw, max natlawayaw tuku nitlan chu tlakg nitlan nakinkakitaxtuniyan. Wa xlakata Biblia kinkamalakapastakayan: «Xtasitsi chixku ni makgantaxti xa’akgstitum tuku Dios skin» (Sant. 1:20). Asta akxni wi tuku tlan xlisitsiw, max xtlawaw tuku nitlan xlakata makglakgalhinanin akinin.

Chatum tala xalak Alemania tiku wanikan Cathy xlakpuwan: «Komo natamastaya natlawanikana o nawanikana tuku nitlan, niti katikgalhmakgtayan». Pero lakgpalilh xtapuwan akxni tsukulh lipawan Jehová. Xla wan: «La uku nialh talakaskin nakkatalakgalhti amakgapitsin. La uku nialh tuwa kmakgkatsi nakmachokgo kintasitsi, xlakata kkatsi pi Jehová putum  nalakkaxtlawa taʼakglhuwit». Komo namin kilhtamaku nitlan nakinkalikatsinikanan, lipawankan Dios chuna la tlawalh Jesús, nakinkamakgtayayan ni lakapala nasitsiyaw.

Jesús masiyalh pi xlakata napaxuwayaw talakaskin ni lakapala nasitsiyaw. Xla wa: «Paxuwakgo tiku ni lakapala sitsikgo» (Mat. 5:5). Kaʼakxilhwi la kinkamakgtayayan uma tayat.

Tlawa pi ni naʼanan taʼakglhuwit ktamakgaxtokgat. Chatum tala xalak Australia tiku wanikan Robert wan: «Lhuwa tuku kwaninit kimpuskat nema makgalipuwanit maski nichuna xaktlawaputun. Pero akxni nawana umakgolh tachuwin nialhla tuku natlawaya. Lu nitlan xakmakgkatsi akxni xakakxilha pi xakmakgalipuwanit».

Akxni chuwinanaw, «kimputumkan makglhuwa akgchakgxaw». Tachuwin nema wanaw akxni sitsimaw limin lhuwa taʼakglhuwit ktamakgaxtokgat (Sant. 3:2). Akxni chuna natitaxtuyaw, komo ni lakapala nasitsiyaw nakinkamakgtayayan ni nawanaw laklixkajnit tachuwin (Prov. 17:27).

Robert lu liskujli xlakata xakakswa nawan chu xlakata xmachokgolh tuku nitlan xwamputun. ¿La kitaxtunilh? Xla wan: «La uku, akxni ktakgalhi akgtum taʼakglhuwit kimpuskat, lu kliskuja xlakata nakkgaxmata tuku kiwanima, ni xatasitsi nakchuwinan chu ni nakmasta talakaskin pi tasitsi nakimakgatlaja. La uku tlakg tlan ktalalin».

Kinkamakgtayayan tlakg tlan nakatalalinaw amakgapitsin. Tiku lakapala sitsikgo ni lhuwa amigos kgalhikgo. Pero tiku ni lakapala sitsikgo “makxtum katatawilakgo amakgapitsin” (Efes. 4:2, 3). Cathy, tiku lichuwinawa, wan: «Xlakata lu kliskuja ni lakapala naksitsi, kpaxuwa akxni kkatawi amakgapitsin, maski makgapitsin tuwa katalalinkan».

Kinkamaxkiyan takaksni. Anta kBiblia «liskgalala xala talhman» tamalakxtumikan ni lakapala sitsikan chu kgalhikan takaksni (Sant. 3:13, 17). Chatum lataman tiku ni lakapala sitsi kgalhi akgtum “xakakswa naku” (Prov. 14:30). Martin, tiku na lu liskujnit xlakata ni lakapala nasitsi, wan: «La uku, tlakg kkaʼakgatekgsni amakgapitsin chu nialh lu ksitsi, kkgalhi takaksni chu tlakg kpaxuwa».

Xlikana, putum kiliskujatkan xlakata ni lakapala nasitsiyaw. Chatum tala wan: «Nakkawaniyan xaxlikana, min kilhtamaku, lu ksitsi». Pero Jehová, tiku kinkamakgpuwantiniyan xlakata ni lakapala nasitsiyaw, nakinkamakgtayayan nakgalhiyaw uma tayat (Is. 41:10; 1 Tim. 6:11). Xla namasputu la kinkamalakgtawakgeman chu nakinkamatliwakglhan (1 Ped. 5:10). Chu chuna la natitaxtu kilhtamaku, natlawayaw la apóstol Pablo, tiku stalanilh xliʼakxilhtit Cristo, tiku ni lakapala sitsi chu tlan likatsi (2 Cor. 10:1).