1. ¿Tuku max lu nitlan katilimakgkatsiw akxni natsukuyaw kalitachuwinanaw amakgapitsin tuku katsinimanaw xalak Biblia?

¿LAKAPASTAKA la makgkatsi akxni katsi pi xtekgsnita tuku xaxlikana? Xlakpuwana pi lu liwana xʼakgatekgsa tuku xmasiya Biblia. Xlakpuwana pi putum latamanin na xkatsiputunkgo. Xlakpuwana pi tamakatsin nema masta Biblia xʼama kamaxki akgtum xatapaxuwan latamat la uku chu akgtum lu xatlan takgalhkgalhin kkilhtamaku nema aku mima (Sal. 119:105). Xlakata lu xpaxuwapat, tsuku kalitachuwinana tiku miʼamigos chu tiku xalak mifamilia tuku xkatsinipat. Pero lu nitlan limakgkatsi pi tiku miʼamigos chu tiku xalak mifamilia ni kgaxmatputunkgolh.

2, 3. Akxni latamalh kKatiyatni, ¿tuku xlakpuwankgo lhuwa latamanin xlakata Jesús chu xtamakatsin?

² Ni kaks kililakawanatkan pi anan latamanin tiku lakgmakgankgo tamakatsin nema lichuwinanaw. Akxni Jesús latamalh kKatiyatni tlawalh milagros nema xlimasiya pi Jehová xmakgtayama. Maski chuna, lhuwa latamanin lakgmakgankgolh. Akgtum liʼakxilhtit, akxni malakastakwanilh Lázaro, xpulalinanin takanajla ni kanajlakgolh pi Jesús Mesías xwanit, pero xtalamakgasitsin nila xwankgo pi nixlikana tuku xtlawanit Jesús. Wata lakkaxwilikgolh namakgnikgo Jesús chu Lázaro (Juan 11:47, 48, 53; 12:9-11).

³ Jesús xkatsi pi lhuwa latamanin ni xʼamakgo makgamakglhtinankgo la Mesías (Juan 5:39-44). Jesús kawanilh makgapitsi kstalaninanin Juan Tiku xmununan: «Paxuwa tiku ni liʼakgchakgxa kimpalakata» (Mat. 11:2, 3, 6). ¿Tuku xlakata lhuwa latamanin lakgmakgankgolh Jesús?

4. ¿Tuku naʼakxilhaw kʼuma artículo?

⁴ Kʼuma artículo chu tuku stala, naʼakxilhaw makgapitsi tuku xlakata kxapulana siglo lhuwa latamanin lakgmakgankgolh  Jesús. Na naʼakxilhaw tuku xlakata lhuwa latamanin ni makgamakglhtinankgo tamakatsinin nema lichuwinanaw la uku. Chu tuku tlakg xlakaskinka, naʼakxilhaw tuku nakinkamakgtayayan tlakg nakanajlaniyaw Jesús chu ni naʼakgchakgxaw.

5. ¿Tuku xlakata makgapitsi latamanin xlakpuwankgo pi Jesús ni wa Mesías nema xwankanit pi xʼama min?

⁵ Lhuwa latamanin kamaʼakgchakgxnikgolh xkilhtsukut Jesús. Xkatsikgo pi lu tlan makgalhtawakgena xlitaxtu chu pi xtlawa milagros. Pero kaj xkgawasa xwanit tiku xwakna xlitaxtu. Nachuna, xalak Nazaret xwanit, akgtum kachikin nema makgapitsi ni lu xlakaskinka xliʼakxilhkgo. Asta Natanael tiku kstalanina Jesús litaxtulh, milh kilhtamaku wa: «¿Wi tuku xatlan nataxtuyacha kNazaret?» (Juan 1:46). ¿Tuku xlakata chuna wa? Max xlakpuwan pi niku xlama Jesús ni xlakaskinka xlitaxtu. O max xlilakpuwama tuku lichuwinan Miqueas 5:2, niku wan pi Jesús xʼama lakachin kBelén chu ni anta kNazaret.

6. ¿Tuku xlitlawatkan xwanit tiku lakgmakgankgolh Jesús chuna la Mesías?

⁶ ¿Tuku wan Biblia? Palakachuwina Isaías lichuwinalh pi xtalamakgasitsin Jesús ni xʼamakgolh katsiputunkgo «xlakata xkilhtsukut», uma wamputun, xkilhtsukut Mesías (Is. 53:8). Palakachuwinanin xlichuwinankgonit xlakata xkilhtsukut Mesías. Komo xtilimaxtukgolh kilhtamaku xlakata xlakputsananikgolh tuku xlama, xkatsikgolh pi Jesús lakachilh kBelén chu xminitancha kxfamilia mapakgsina David (Luc. 2:4-7). Wa xlakata, niku lakachilh Jesús xtatalakxtumi tuku wan Miqueas 5:2. Pero ¿tuku xlakata ni kanajlanikgolh? Xlakata ni limaxtukgolh kilhtamaku nalakputsananikgo putum uma, lakpuwankgolh tuku ni xlilat. Akgchakgxkgolh chu lakgmakgankgolh Jesús.

7. ¿Tuku xlakata la uku lhuwa tiku lakgmakgankgo xkachikin Jehová?

⁷ ¿Nachuna la kkinkilhtamakujkan? Chuna. Lhuwa xlakskujnin Jehová ni lu xlakaskinka kinkilhtsukutkan. Lhuwa latamanin kinkaliʼakxilhkgoyan pi “ni kgalhtawakganitaw chu ni xlakaskinka litaxtuyaw” (Hech. 4:13). Wankgo pi nila masiyayaw tuku xalak Biblia xlakata ni kgalhtawakganitaw kʼakgtum lu xlakaskinka escuela niku masiyakan xlakata Biblia. Amakgapitsi lakpuwankgo pi xtatayananin Jehová akgtum takanajla nema kilhtsukulh kʼEstados Unidos, pero tuku xaxlikana wa pi xlikgalhtujun xtatayananin Jehová nema lamakgo kaj chatum lama kʼEstados Unidos. Amakgapitsin kawanikanit pi xtatayananin Jehová ni kanajlaniyaw Jesús. Chuna la minitancha kilhtamaku wankanit pi xtatayananin Jehová «nitlan likatsiyaw», pi «kamapapitsiyaw familias» chu pi «lakgpaliyaw tuku wan xTachuwin Dios». Tiku kgaxmatkgo putum uma chu ni lakputsananikgo tuku lanit, akgchakgxkgo chu lakgmakgankgo xkachikin Jehová.

8. Chuna la wan Hechos 17:11, ¿tuku militlawat komo xlikana katsiputuna tiku xlakskujnin Dios xala uku?

⁸ ¿Tuku namakgtayayan xlakata ni naʼakgchakgxa? Liwana kalakputsanani tuku lanit. Wa uma tuku liskujli natlawa Lucas. Akxni xʼama tsokgwili xʼEvangelio, lakkaxwililh nalakputsanani putum “chuna la xtitaxtunit lata kxkilhtsukut”. Xlakaskin pi tiku xlikgalhtawakgakgolh xʼEvangelio “liwana xkanajlakgolh pi xlikana” tuku xlichuwinankanit xlakata Jesús (Luc. 1:1-4). Nachuna xtlawakgonit judíos xalak Berea. Akxni xapulana kgaxmatkgolh xalaktlan tamakatsinin xlakata Jesús, lakputsananikgolh Tatsokgni xaHebreo xlakata xkatsikgolh pi tuku xkawanimaka xlikana xwanit (kalikgalhtawakga Hechos 17:11). Xtachuna la uma, xlakaskinka  pi wix na nalakputsananiya tuku lanit. Katamalakxtupi tuku wankgo xtatayananin Jehová chu tuku wan Biblia. Na xlakaskinka pi nalikgalhtawakgaya tuku titaxtukgonit xtatayananin Jehová xala uku. Komo liwana nalakputsananiyaw, ni wa kuenta katitlawaw tuku wankgo amakgapitsin.

9. ¿Tuku lalh akxni Jesús ni tlawaputulh milagro nema kskinimaka?

⁹ Akxni Jesús xlama kKatiyatni, makgapitsi ni kajwatiya xʼakxilhputunkgo pi xla tlan makgalhtawakgena xlitaxtu; wi tuku xʼakxilhputumparakgo. Skinikgolh pi xtlawalh «akgtum milagro» xlakata xlimasiyalh pi xla Mesías xwanit (Mat. 16:1). Max skinikgolh uma xlakata ni liwana xʼakgatekgskgonit tuku lichuwinan Daniel 7:13, 14. Pero Jehová xʼakxilhnit pi nina xkilhtamaku xwanit xlakata tuku xlichuwinanit Daniel xkgantaxtulh. Ni xtalakaskin atanu tuku xkalimasiyanika pi Jesús wa Mesías xwanit, tlantiya xwanit tuku xkamasiyaninita. Pero xlakata Jesús ni tlawalh tuku kskinimakgolh, akgchakgxkgolh chu lakgmakgankgolh (Mat. 16:4).

10. ¿La makgantaxtilh Jesús tuku xlichuwinanit Isaías xlakata Mesías?

¹⁰ ¿Tuku wan Biblia? Akxni lichuwinalh Mesías, Isaías wa: «Ni pixlanka katichuwinalh, ni katitakgaxmatli kkatijin xtachuwin» (Is. 42:1, 2). Akxni Jesús lichuwinalh Dios, ni tlawalh pi xla lu xlakaskinka xliʼakxilhka. Ni tlawalh laklanka templos, ni wililh lhakgat nema xlitasiyalh pi lu xlakaskinka xlitaxtu, ni lakaskilh nalimapakuwikan chuna la tiku lu xlakaskinka. Akxni xlakputsananimaka, ni tlawalh akgtum milagro xlakata kaks xlimalakawanilh mapakgsina Herodes maski xlatamat kalipekua xwi (Luc. 23:8-11). Xlikana pi akxni lichuwinalh Dios tlawalh makgapitsi milagros, pero tuku tlakg xlakaskinka xakxilha wa nalichuwinan xalaktlan tamakatsinin. Kawanilh kstalaninanin: «Wa uma kilimalakgachakanit» (Mar. 1:38).

11. ¿Tuku nitlan lakpuwankgo makgapitsi latamanin?

¹¹ ¿Nachuna la kkinkilhtamakujkan? Chuna.  Lhuwa latamanin kaks kamalakawani laklanka pusikulan niku anankgo tuku lhuwa xtapalh, xpulalinanin takanajla tiku kgalhikgo tukuwani nema takgaxmata pi lu xlakaskinka litaxtukgo chu makgapitsi talismanin nema maski ni lhuwa tiku katsikgo, kilhtsukukgonitancha knixaxlikana takanajla. Pero tiku ankgo kʼumakgolh pusikulan ni lhuwa katsimakgolh xlakata Dios chu tuku lakpuwanit natlawa. Pero tiku kinkatatamakxtumikgoyan katsinikgo tuku lakaskin Jehová kimpalakatakan chu la tlan natlawayaw xtalakaskin. Kkimpukgalhtawakgakan ni anankgo xpulakni tuku lhuwa xtapalh, wata kaskulunku chu ni lhuwa tuku kgalhikgo. Tiku pulalinkgo congregaciones ni lhakganankgo chuna la lu xlakaskinka nakaliʼakxilhkan, na ni maklakaskinkgo tukuwani nema nalimasiya pi xlakaskinka litaxtukgo. Tuku masiyayaw chu tuku kanajlayaw anta takilhtinit kxTachuwin Dios. Maski chuna, lhuwa latamanin akgchakgxkgo xlakata ni tlawayaw talismanin nema kaks malakawaninan chu xlakata tuku masiyayaw ni wa tuku kgaxmatputunkgo.

12. Chuna la wan Hebreos 11:1, 6, ¿niku xlitakilhtiyat kintakanajlakan?

¹² ¿Tuku namakgtayayan xlakata ni naʼakgchakgxa? Apóstol Pablo kawanilh kstalaninanin Cristo xalak Roma: «Chatum chixku kajwatiya kanajla akxni kgaxmatnita tachuwin. Chu tachuwin kgaxmatkan akxni wi tiku lichuwinan xlakata Cristo» (Rom. 10:17). Komo kgalhiputunaw akgtum tliwakga takanajla, talakaskin nalikgalhtawakgayaw Biblia, ni namakgtlawayaw talismanin nema ni tatalakxtumi tuku wan Biblia maski lu stlan tasiyakgo o lu kaks malakawaninankgo. Kintakanajlakan tliwakga xliwanat chu anta kBiblia xlitakilhtiyat xlakata «komo wi tiku ni kgalhi takanajla nila makgapaxuwa Dios» (kalikgalhtawakga Hebreos 11:1, 6). Xlakata liwana nakatsiyaw pi tekgsnitaw xaxlikana, ni talakaskin naʼakxilhaw milagros nema kaks malakawaninan. Komo nalakputsananiyaw tuku masiya Biblia, uma nakinkamakgtayayan liwana nakatsiyaw pi tuku kanajlayaw xaxlikana chu tliwakga nakgalhiyaw kintakanajlakan.

13. ¿Tuku xlakata lhuwa nitlan lichuwinankgolh Jesús?

¹³ Kxkilhtamaku Jesús, kstalaninanin Juan Tiku xmununan lu kaks lilakawankgolh pi kstalaninanin Jesús ni xkgalhxtakgnankgo. Jesús kawanilh pi xlakata xla chuntiya xlama kKatiyatni, ni xtalakaskin xkgalhxtakgnankgolh (Mat. 9:14-17). Maski chuna, fariseos chu amakgapitsi xtalamakgasitsin Jesús nitlan lichuwinankgolh xlakata ni xmakgtlawa xtalismaninkan. Lu sitsikgolh akxni akxilhkgolh pi kamapaksalh tatatlanin akxni sábado xwanit (Mar. 3:1-6; Juan 9:16). Umakgolh tiku xlakpuwankgo pi xasantos xlitaxtukgo, lanka xkamakgkatsikan xlakata xmakgantaxtikgo limapakgsin xla sábado pero kstanankgo ktemplo. Sitsikgolh akxni Jesús kawanilh pi nitlan tuku xtlawamakgolh (Mat. 21:12, 13, 15). Chu akxni Jesús lichuwinalh Dios ksinagoga xalak Nazaret, tiku xkgaxmatmakgolh lu sitsikgolh xlakata limaklakaskilh liʼakxilhtit xlakata tuku xlanit kʼIsrael xlakata xlimasiyalh pi ni xkgalhikgo takanajla chu kaj xʼakstukan xkapaxkikan (Luc. 4:16, 25-30). Lhuwa akgchakgxkgolh xlakata Jesús ni tlawalh tuku xlakan xlakaskinkgo (Mat. 11:16-19).

14. ¿Tuku xlakata Jesús nitlan kalichuwinalh xtalismaninkan lakchixkuwin?

¹⁴ ¿Tuku wan Biblia? Jehová limaklakaskilh palakachuwina Isaías xlakata xwa: «Umakgolh latamanin kilimaxkikgo kakni xtachuwinkan, pero xnakujkan lu kintamakgatlinikgonit chu takaknin nema kimaxkikgo takilhtikgonit kxlimapakgsinkan lakchixkuwin, limapakgsin nema kamasiyanikanit» (Is. 29:13). Lu tlan tuku tlawalh Jesús akxni wa pi nitlan xwanit xtalismaninkan lakchixkuwin xlakata uma xlakatsala xasanto Tatsokgni. Tiku tlakg xlakaskinka xliʼakxilhkgo xtalismaninkan chu xlimapakgsinkan lakchixkuwin nixawa xTachuwin Dios, lakgmakgankgolh Jehová chu tiku xla xmalakgachanit, Mesías.

15. ¿Tuku xlakata lhuwa latamanin kasitsinikgo xtatayananin Jehová?

¹⁵ ¿Nachuna la kkinkilhtamakujkan? Chuna. Lhuwa latamanin kasitsinikgo xtatayananin Jehová xlakata ni makgtlawayaw talismanin chuna la tamakatamitat chu talakgatankuwit, umakgolh lakatsalakgo tuku wan Biblia. Amakgapitsi sitsikgo xlakata ni makgtlawayaw fiestas xlakata kachikin chu ni makgtlawayaw talismanin nema tlawakan akxni wi tiku niy, xlakata umakgolh lakatsalakgo xTachuwin Dios. Max umakgolh latamanin tlan naku kgalhikgo chu lakpuwankgo pi Dios makgamakglhtinan tuku tlawamakgo. Pero komo laksakkgo namakgtlawakgo talismanin xalak uma kakilhtamaku chu ni wa tuku masiya Biblia, Jehová ni katikamakgamakglhtinalh (Mar. 7:7-9).

16. ¿Tuku kilitlawatkan chu tuku ni kilitlawatkan? (Salmo 119:97, 113, 163-165).

¹⁶ ¿Tuku namakgtayayan xlakata ni naʼakgchakgxa? Katlawa tuku namakgtayayan napaxkiya xlimapakgsin chu xtastakyaw Jehová (kalikgalhtawakga Salmo 119:97, 113, 163-165). Komo paxkiya Jehová, nalakgmakgana kaxatukawa talismanin nema xla ni lakgati. Ni katimasta talakaskin pi atanu tuku tlakg napaxkiya nixawa Jehová.

17. ¿Tuku xlakaskinkgo lhuwa latamanin pi xtlawalh Mesías?

¹⁷ Kxkilhtamaku Jesús, makgapitsi xlakaskinkgo pi tunkun xtalakgpalilh xmapakgsinakan. Xkgalhkgalhikgo pi Mesías xkalakgmaxtulh xlakata nialh wa romanos xkamapakgsikgolh. Pero akxni xlakan mapakgsina tlawaputunkgolh Jesús, xla ni lakaskilh (Juan 6:14, 15). Sacerdotes chu amakgapitsi xpekuankgo pi Jesús xlakgpalilh tamapakgsin chu uma xtlawalh  pi romanos ksitsikgolh chu xkamakglhtikgolh xpulalinanin takanajla limapakgsin nema xkamaxkikanit. Lhuwa judíos akgchakgxkgolh xlakata putum uma.

18. ¿Tuku ni kuenta xtlawakgo judíos xlakata tuku xtsokgwilikanit xpalakata Mesías?

¹⁸ ¿Tuku wan Biblia? Xlikana pi xtalichuwinanit pi Mesías xʼama tlawa akgtum guerra chu xʼama tlajanan, pero na xtalichuwinanit pi pulana xlinit xwanit xpalakata kintalakgalhinkan (Is. 53:9, 12). Komo chuna, ¿tuku xlakata lhuwa judíos ni xlilat tuku xlakpuwankgo? Xlakata lhuwa ni kuenta xtlawakgo tuku xlichuwinan Tatsokgni komo uma ni xwan pi tunkun xʼamaka kakaxtlawanikan xtaʼakglhuwitkan (Juan 6:26, 27).

19. ¿Tuku xlakata lhuwa latamanin akgchakgxkgo la uku?

¹⁹ ¿Nachuna la kkinkilhtamakujkan? Chuna. La uku lhuwa latamanin akgchakgxkgo xlakata ni makgtanuyaw kpolítica. Lakpuwankgo pi kilivotarlinatkan. Pero akinin katsiyaw pi komo xlaksakwi chatum mapakgsina unu kKatiyatni, Jehová xliʼakxilhli xtachuna la komo lakgmakgamaw (1 Sam. 8:4-7). Max na lakpuwankgo pi kilitlawatkan hospitales, escuelas chu amakgapitsi taskujut nema litamakgtayakgo latamanin. Akgchakgxkgo xlakata kajwatiya lichuwinanaw Dios chu ni limaxtuyaw kilhtamaku xlakata nalakkaxtlawayaw taʼakglhuwit nema anan kkakilhtamaku.

20. Chuna la wa Jesús kMateo 7:21-23, ¿tuku tlakg xlakaskinka?

²⁰ ¿Tuku namakgtayayan xlakata ni naʼakgchakgxa? (Kalikgalhtawakga Mateo 7:21-23). Kalakapastakti pi tuku tlakg xlakaskinka wa natlawayaw taskujut nema Jesús kinkalakgayawan (Mat. 28:19, 20). Ni kamasta talakaskin pi taʼakglhuwit xalak kakilhtamaku chu política namakglhtikgoyan minkilhtamaku. Xtatayananin Jehová kapaxkiyaw latamanin chu lilakgaputsayaw xtaʼakglhuwitkan, pero katsiyaw pi tuku tlakg xatlan natlawayaw xpalakatakan wa nakamasiyaniyaw xlakata xTamapakgsin Dios chu nakamakgtayayaw xʼamigos Jehová nalitaxtukgo.

21. ¿Tuku kililakkaxwilitkan natlawayaw?

²¹ Kʼuma artículo, akxilhnitaw pulaktati tuku xlakata lhuwa akgchakgxkgolh chu lakgmakgankgolh Jesús kxapulana siglo chu nachuna tuku xlakata la uku kalakgmakgankan kstalaninanin Jesús. Pero wilakgolh amakgapitsi. Kʼartículo nema aku mima naʼakxilhaw apulaktati. Kimputumkan kalakkaxwiliw tliwakga nakgalhiyaw kintakanajlakan chu ni namastayaw talakaskin pi wi tuku nakinkamaʼakgchakgxniyan.