1. ¿Tuku lu xlakaskinka kililaksakatkan putum latamanin?

 LA UKU, putum latamanin wi tuku lu xlakaskinka xlilaksakatkan: ¿natatayakgo Jehová tiku lakgchan namapakgsinan putum kakilhtamaku, o natatayakgo Satanás, xalixkajni xtalamakgasitsin Dios? Nila chatiy tatayakan. Tuku nalaksakaw nakinkamakgtayayan nakgalhiyaw latamat nema ni kgalhi xlisputni (Mat. 25:31-33, 46). Akxni lama nawan «lhuwa tapatin», xlakskujnin Jehová tiku ni namakgxtakgkgo nakawilinikan akgtum lilhka xlakata nalakgtaxtukgo (Apoc. 7:14; Ezeq. 9:4, 6). Chu latamanin tiku nakgalhikgo xlilhka xaluku lapanit nakamasputukan (Apoc. 14:9-11).

2. 1) ¿Tuku kinkamakgpuwantiniyan natlawayaw Hebreos 10:35-39? 2) ¿La kinkamakgtayayan libro xla Apocalipsis?

² (Kalikgalhtawakga Hebreos 10:35-39). Komo wix tatayanitata xtamapakgsin Jehová, lu tlan tuku laksaknita. Max na kamakgtayaputuna amakgapitsin nachuna natlawakgo. Tuku lichuwinan libro xla Apocalipsis lu namakgtayayan. Uma libro kinkawaniyan tuku nakaʼakgspula tiku talalakatawakakgo Jehová. Pero na lichuwinan, tasikulunalin nema namakglhtinankgo tiku ni makgxtakgkgo chu tatayakgo xtamapakgsin. Lu tlan kitaxtu akxni kalichuwinanaw uma lu xlakaskinka tamasiy, xlakata uma kinkamakgtayayan chuntiya naskujnaniyaw Jehová. Nachuna, tlan namaklakaskinaw tuku katsininitawa xlakata nakamakgpuwantiniyaw amakgapitsin tlan tuku nalaksakkgo chu ni nalakgpalikgo tuku laksakkgonit.

3. ¿Tuku takgalhskinin nakgalhtiyaw kʼuma artículo?

³ Kʼuma artículo nakgalhtiyaw umakgolh takgalhskinin: ¿tuku kakgalhkgalhima tiku tatayakgo xtamapakgsin Dios? chu ¿tuku naʼakgspula tiku tatayakgo xaspinini xaluku lapanit nema lichuwinan libro xla Apocalipsis?

4. ¿Tuku grupo akxilha Juan nema akxtum tayakgo Jesús kʼakgapun?

⁴ Apóstol Juan maʼakxilhnika akgtiy grupo nema tatayakgo xtamapakgsin Jehová chu pi makglhtinankgo latamat nema ni kgalhi xlisputni chu lhuwa tasikulunalin. Xapulana grupo litakgatsi 144,000 latamanin (Apoc. 7:4). Xlakan xalak Katiyatni, chu amakgolh kʼakgapun xlakata natamapakgsinankgo Jesús. Xputumkan akxtum namapakgsinankgo kKatiyatni (Apoc. 5:9, 10; 14:3, 4). Juan kaʼakxilha pi kataya Jesús ksipi Sión xalak akgapun (Apoc. 14:1).

5. ¿Tuku nakaʼakgspula nialh makgas xatalaksakni kstalaninanin Cristo tiku lamakgolhku kKatiyatni?

⁵ Lata kxkilhtamaku apóstoles asta la uku, kalaksakkanit miles latamanin xlakata namakgtapakgsikgo kʼgrupo xla 144,000 (Luc. 12:32; Rom. 8:17). Pero Juan wanika pi kxaʼawatiya kilhtamaku kaj ni lhuwa xla uma grupo xʼamakgolhku latamakgo kKatiyatni. Akxni nina tsukunita nawan lhuwa tapatin, umakgolh xatalaksakni «nema xwilakgolhku» namakglhtinankgo xaʼawatiya «sello» uma wamputun pi Jehová tlan nakaʼakxilha (Apoc. 7:2, 3; 12:17). Wa xlakata, akxni lama nawan lhuwa tapatin, tiku lamakgolhku nawan kkatiyatni nakalinkan kʼakgapun xlakata anta nakatatawilakgo amakgapitsi tiku namakgtapakgsikgo 144,000 nema nikgonita chu ni makgxtakgkgolh Dios. Natamapakgsinankgo Jesús kxTamapakgsin Dios (Mat. 24:31; Apoc. 5:9, 10).

6, 7. 1) ¿Tuku atanu grupo akxilha Juan, chu tuku katsiyaw xpalakatakan? 2) ¿Tuku xlakata xlikatsitkan tuku wan capítulo 7 xla Apocalipsis tiku xatalaksakni kstalaninanin Cristo chu «lhuwa latamanin»?

⁶ Akxni Juan xʼakxnilhnita grupo nema wi kʼakgapun, alistalh akxilha «lhuwa latamanin». Uma grupo ni xtachuna 144,000, xlakata uma xliʼakgtiy grupo nila kaputlekgekan (Apoc. 7:9, 10). ¿Tuku katsiyaw xpalakatakan? Juan wanika: «Wa tiku lakgtaxtunikgonit lhuwa tapatin; chakgakgonit laklhman klhakgatkan chu limasnapapikgonit xkgalhni Borrego» (Apoc. 7:14). Akxni lakgtaxtukgonita nawan klhuwa tapatin, umakgolh «lhuwa latamanin» nalatamakgo kKatiyatni chu nalipaxuwakgo lhuwa tasikulunalin (Sal. 37:9-11, 27-29; Prov. 2:21, 22; Apoc. 7:16, 17).

⁷ Maski kinkalaksakkanitan xlakata naʼanaw kʼakgapun o nalatamayaw kKatiyatni, kimputumkan kilitasiyatkan «kfoto» nema lichuwinankan kcapítulo 7 xla Apocalipsis, ¿ni xlikana? ¡Uma kilhtamaku lu tlan nawan xpalakatakan umakgolh akgtiy grupo tiku skujnanikgo Dios! Lu napaxuwayaw xlakata laksakwi natatayayaw xtamapakgsin Dios. ¿Tuku atanu lichuwinampara libro xla Apocalipsis xlakata lhuwa tapatin? (Mat. 24:21).

8. ¿La natsuku lhuwa tapatin, chu tuku natlawakgo lhuwa latamanin?

⁸ Chuna la akxilhwi kʼartículo nema titaxtulh, mapakgsinanin xalak uma kakilhtamaku natalatlawakgo xaLanka Babilonia, putum ni xaxlikana takanajla nema anankgo kkakilhtamaku (Apoc. 17:16, 17). Uma nalitsuku lhuwa tapatin. ¿Natlawa uma pi lhuwa latamanin nakakninanikgo Jehová? Ni, nichuna. Chuna la wan capítulo 6 xla Apocalipsis, tiku ni skujnanikgo Jehová naputsakgo xtamakgtaykan políticos chu stananin, tiku kʼuma capítulo xalak Biblia katamalakxtumi sipi. Xlakata umakgolh latamanin ni katitatayakgolh xTamapakgsin Dios, Jehová nakaliʼakxilha la xtalamakgasitsin (Luc. 11:23; Apoc. 6:15-17).

9. ¿Tuku xlakata akxni lama nawan lhuwa tapatin xlakskujnin Jehová tlakg ni tuwa nakaʼakxilhkan, chu tuku nakitaxtu?

⁹ Amacha kilhtamaku akxni titaxtuma  nawan lhuwa tapatin chu lanka takatsanajwat, xlakskujnin Jehová tiku ni makgxtakgkgo wi tuku tlawamakgo nawan tuku tlakg ni tuwa natlawa nakaʼakxilhkan. Xlakan kajwatiya tiku chuntiya naskujnanikgo Jehová kKatiyatni chu ni katitatayakgolh «xaluku lapanit» (Apoc. 13:14-17). Tiku talalakatawakakgo Jehová lu nasitsikgo akxni naʼakxilhkgo pi ni makgxtakgkgo Dios. Tuku nakitaxtu wa pi lhuwa kachikinin natalatlawakgo xkachikin Dios nema wilakgolh kxlikalanka Katiyatni. Uma tatalatlaw Biblia limapakuwi xtatalatlaw Gog xalak Magog (Ezeq. 38:14-16).

10. Chuna la wan Apocalipsis 19:19-21, ¿tuku natlawa Jehová akxni namasputuputunkan xkachikin?

¹⁰ ¿Tuku natlawa Jehová akxni natalatlawakan xkachikin? Xla kinkawaniyan: «Lu nataliwaka kintasitsi» (Ezeq. 38:18, 21-23). Capítulo 19 xla Apocalipsis kinkawaniyan tuku nala. Jehová namakamin xKgawasa xlakata nakamakgtaya xkachikin chu nakamakgatlaja xtalamakgasitsin. Chu Jesús ni xʼakstu katitlawalh uma; nataminkgo «lhuwa soldados xalak akgapun», uma wamputun, ángeles tiku ni makgxtakgkgo Dios chu 144,000 (Apoc. 17:14; 19:11-15). ¿Tuku nalisputa uma guerra? Nakamasputukan putum tiku talalakatawakakgo Jehová (kalikgalhtawakga Apocalipsis 19:19-21).

11. ¿Tuku lu tlan lichuwinan libro xla Apocalipsis?

¹¹ ¿La namakgkatsikgo xlakskujnin Dios xalak Katiyatni akxni naʼakxilhkgo pi lakgtaxtukgolh akxni kamasputukanita nawan xtalamakgasitsin Dios? ¡Lu napaxuwakgo! Chu, maski kʼakgapun napaxuwakan xlakata masputukanita nawan xaLanka Babilonia, wi atanu tuku nalipaxuwaparakan (Apoc. 19:1-3). Wa uma tuku lu tlan lichuwinan libro xla Apocalipsis: «xputamakgaxtokgni Borrego» (Apoc. 19:6-9).

12. ¿Tuku kilhtamaku natlawakan xputamakgaxtokgni Borrego? (Apocalipsis 21:1, 2).

¹² ¿Tuku kilhtamaku naʼanan tamakgaxtokgat? Maski putum tiku litakgatsi 144,000 wilakgolh nawan kʼakgapun akxni atsinu tsankga natsuku Armagedón, uma kilhtamaku ni akxni katitlawaka xputamakgaxtokgni Borrego (kalikgalhtawakga Apocalipsis 21:1, 2). Tamakgaxtokgat natlawakan akxni sputnita nawan Armagedón, akxni putum xtalamakgasitsin Dios kamasputukanita nawan (Sal. 45:3, 4, 13-17).

13. ¿Tuku kilhchanima xpalakatakan tiku namakgtlawakgo xputamakgaxtokgni Borrego?

¹³ ¿Tuku kilhchanima xpalakatakan tiku namakgtlawakgo xputamakgaxtokgni Borrego? Kʼakgtum tamakgaxtokgat tamakgaxtokgkgo chatum chixku chu chatum puskat. Kʼuma tamakgaxtokgat nema kaj wi tuku kilhchanima tamakgaxtokgkgo Mapakgsina, Jesús, chu «tsumat litatawilat», 144,000. Uma tuku lu tlan nala, Jesús chu 144,000 akxtum natsukukgo mapakgsinankgo kKatiyatni 1,000 kata (Apoc. 20:6).

14, 15. Anta kʼApocalipsis 21, ¿tuku katamalakxtumikan 144,000? (Kaʼakxilhti xmakni revista).

¹⁴ Capítulo 21 xla Apocalipsis katamalakxtumi 144,000 akgtum lu stlan kachikin nema wanikan «xaSasti Jerusalén» (Apoc. 21:2, 9). Uma kachikin makilhtsukikanit «kxkgalhni akgkutiy chiwix», chu anta tatsokgtawilanit «akgkutiy xtukuwanikan kgalhkutiy xʼapóstoles Borrego». Uma lu kaks malakawani Juan. ¿Tuku xlakata? Xlakata akxilha pi kʼakgtum chiwix na tatsokgtawilanit xtukuwani. ¡Uma akgtum talakgalhaman! (Apoc. 21:10-14; Efes. 2:20).

¹⁵ Uma kachikin nema kaj wi tuku kilhchanima, ni anan tuku tatalakxtumi. Xtiji  litatlawanit lu xatlan oro, akgkutiy malakcha litatlawanit akgkutiy perlas, xpatsaps chu xkilhtsukut nema makgstiliwili kachikin likaxtlawakanit tipalhuwa lakglilakgatit chiwix, chu lu tlan la tlawakanit (Apoc. 21:15-21). Pero Juan akxilha pi wi tuku tsankga. ¿Tuku uma? Xla wan: «Nipara akgtum templo kakxilhli anta, xlakata Jehová Dios, Tiku kgalhi putum litliwakga, wa xtemplo kachikin, Borrego na templo litaxtu. Kachikin ni maklakaskin kxkgakganat chichini chu kxkgakganat papaʼ, xlakata xlilanka Dios maxki kxkgakganat chu xmakgskgot wa Borrego» (Apoc. 21:22, 23). Tiku makgtapakgsikgo kxaSasti Jerusalén tlan natanukgo niku wi Jehová (Heb. 7:27; Apoc. 22:3, 4). Wa xlakata wankan pi Jehová chu Jesús wa xtemplo kachikin.

16. ¿Tuku tasikulunalin nalipaxuwakgo latamanin akxni mapakgsinama nawan xTamapakgsin Dios Akgtum Mil Kata?

¹⁶ Xatalaksakni kstalaninanin Cristo lu lipaxuwakgo akxni lilakpuwankgo uma kachikin. Pero na xlikatsitkan xlakata uma kachikin tiku kgalhikgo takgalhkgalhin nalatamakgo kKatiyatni. Akxni mapakgsinama nawan xTamapakgsin Dios Akgtum Mil Kata, xaSasti Jerusalén nalimin lhuwa tasikulunalin kKatiyatni. Juan akxilha pi umakgolh tasikulunalin xtachuna la «akgtum kgalhtuchokgo xla chuchut nema masta latamat» chu pi kʼakgtiy xkilhtunin anankgo kiwi nema mastakgo xtuwan «kiwi nema mastakgo latamat» xlakata nakalimapaksakan laklanka kachikinin (Apoc. 22:1, 2). Putum umakgolh latamanin tiku nalatamakgo kʼuma kilhtamaku nakgalhikgo talakgalhaman xlakata nalipaxuwakgo putum umakgolh tasikulunalin. Chu tiku kgalhakgaxmatnankgo tsinu tsinu nialh katikgalhikgolh talakgalhin. Nialh katiʼanalh tajatat, takatsanajwat nipara tatasa (Apoc. 21:3-5).

17. ¿Tiku nalipaxuwakgo tasikulunalin nema naʼanan akxni namapakgsinan xTamapakgsin Dios? (Apocalipsis 20:11-13).

¹⁷ ¿Tiku nalipaxuwakgo umakgolh tasikulunalin? Xapulana, wa lhuwa latamanin tiku nalakgtaxtukgo kʼArmagedón chu tiku nalakachinkgo kxasasti kakilhtamaku. Pero ni kajwatiya uma. Capítulo 20 xla Apocalipsis malaknu pi tiku nikgonita nalakastakwanankgo (kalikgalhtawakga Apocalipsis 20:11-13). ¿Chu tiku nalakastakwanankgo kKatiyatni? «Tiku xaʼakgstitum», uma wamputun, xlakskujnin Jehová tiku makgasata nikgolh, chu tiku «ni xaʼakgstitum», uma wamputun, tiku  ni lakgapaskgolh Jehová (Hech. 24:15; Juan 5:28, 29). ¿Wamputun uma pi putum latamanin nalakastakwanankgo kKatiyatni akxni namapakgsinan xTamapakgsin Dios Akgtum Mil Kata? Nichuna. Tiku lixkajni xlikatsikgo chu lakgmakgankgolh naskujnanikgo Jehová akxni xlamakgolhku ni katilatamakgolh kParaíso. Kgalhikgolh talakaskin nalatamakgo chu limasiyakgolh pi nakalakgchan nalatamakgo kParaíso (Mat. 25:46; 2 Tes. 1:9; Apoc. 17:8; 20:15).

18. Akxni sputmaja nawan 1,000 kata, ¿la natawilakgo putum latamanin?

¹⁸ Akxni sputnita nawan 1,000 kata, putum tiku nalatamakgo kKatiyatni nialh katikgalhikgolh talakgalhin. Nialhti katilipatinalh talakgalhin nema Adán kinkamatitaxtinin (Rom. 5:12). Nialh katiʼanalh putum tuku xtlawanit xtalakgalhin Adán. Tlan nawanaw pi, akxni sputmaja nawan 1,000 kata, latamanin nalatamakgo kKatiyatni xlakata nialh kgalhikgo nawan talakgalhin (Apoc. 20:5).

19. ¿Tuku xlakata natalakaskin naʼanan xaʼawatiya taputsan?

¹⁹ Katsiyaw pi Jesús, tiku ni xkgalhi talakgalhin, ni makgxtakgli Dios maski Satanás pulaklhuwa tuku liputsananilh. Pero ¿nachuna natlawakgo putum latamanin tiku nialh katikgalhikgolh talakgalhin akxni Satanás nakaputsanani? Akxni nasputa 1,000 kata chu naxkutkan Satanás niku chiwilikanit chatunu chatunu namastakgo xatakgalhtin uma takgalhskinin (Apoc. 20:7). Tiku ni namakgatsankgananikgo Dios akxni natawila xaʼawatiya taputsan namakglhtinankgo latamat nema ni kgalhi xlisputni chu nalipaxuwakgo xaxlikana lakgtaxtut (Rom. 8:21). Pero tiku ni nakgalhakgaxmatnankgo nakamalakgsputukan, chuna la Satanás chu xdemonios (Apoc. 20:8-10).

20. ¿La makgkatsiya wix xlakata tuku akxilhwi nema lichuwinan Apocalipsis?

²⁰ ¿La makgkatsiya wix xlakata tuku tsinu akxilhwi nema lichuwinan libro xla Apocalipsis? ¿Lipaxuwaya pi taxtunita «kfoto», chu akxilha la kgantaxtu tuku xlichuwinankanit pi nala? ¿Kawaniputuna amakgapitsin xlakata akxtum nakinkatakakninaniyan Jehová? (Apoc. 22:17). Xlakata tuku akxilhwi nema nala kkilhtamaku nema aku mima, max lu paxuwamaw chu na wamputunaw tuku wa apóstol Juan: «¡Chuna kalalh! Katat, kiMalana Jesús» (Apoc. 22:20).