1. Chuna la wan libro xla Apocalipsis, ¿tuku katlawani Satanás xlakskujnin Dios?

 LIBRO xla Apocalipsis masiya pi xTamapakgsin Dios mapakgsinamaja kʼakgapun chu pi Satanás makaminka kKatiyatni (Apoc. 12:1-9). Uma lu tlan kamamakgkatsinilh tiku lamakgolh kʼakgapun, pero akinin kinkalimininitan lhuwa taʼakglhuwit. ¿Tuku xlakata? Xlakata Satanás kinkasitsiniyan akinin xlakskujnin Jehová tiku lamaw kKatiyatni (Apoc. 12:12, 15, 17).

2. ¿La natayaniyaw maski Satanás nakinkatlawaniputunan tuku nitlan?

² ¿La tlan natayaniyaw maski Satanás nakinkatlawaniputunan tuku nitlan? (Apoc. 13:10). Tuku nakinkamakgtayayan wa nakatsiyaw tuku nala kkilhtamaku nema aku mima. Akgtum liʼakxilhtit, kʼApocalipsis, apóstol Juan lichuwinan makgapitsi tasikulunalin nema nialh makgas namakglhtinanaw. Pulaktum wa pi nakamasputukan xtalamakgasitsin Dios. Kaʼakxilhwi tuku lichuwinan libro xla Apocalipsis xpalakatakan chu tuku kakgalhkgalhima.

3. ¿Tuku makgapitsi símbolos nema kamaklakaskinkan klibro xla Apocalipsis?

³ Xapulana versículo xla Apocalipsis liwana masiya pi tuku tatsokgnit kʼuma libro kaj símbolos o kaj wi «tuku kilhchanima» (Apoc. 1:1). Xtalamakgasitsin Dios kalimasiyakan la xalakluku lapanit. Akgtum liʼakxilhtit, lichuwinankan pi «tantum xaluku lapanit nema xtaxtumachi kpupunu» chu «xkgalhi akgkaw akgalokgot chu akgtujun akgxakga» (Apoc. 13:1). Kstalanipara «atanu xaluku lapanit nema xtaxtumacha kkatiyatni». Chuwinan la tantum lanka luwa chu «asta tlawa pi kʼakgapun nataktayachi lhkuyat»  (Apoc. 13:11-13). Chu lichuwinankan «tantum xaluku lapanit nema lu spinini» chu kgewi chatum puskat tiku sta xmakni. Umakgolh tantutu xalakluku lapanit kakilhchanima xtalamakgasitsin Jehová tiku akglhuwata kata la talalakatawakakgonit Dios chu xTamapakgsin. Wa xlakata lu xlakaskinka nakatsiyaw tiku litaxtukgo (Apoc. 17:1, 3).

4, 5. ¿La kinkamakgtayayan Daniel 7:15-17 naʼakgatekgsaw tuku kakilhchanima símbolos nema kalichuwinan libro xla Apocalipsis?

⁴ Xlakata nina katsiyaw tiku umakgolh talamakgasitsin, talakaskin naʼakgatekgsaw tiku kakilhchanima umakgolh símbolos. Xlakata nakatsiyaw, kamastaw talakaskin pi Biblia nakinkawaniyan. Lhuwa símbolos nema kalichuwinankan klibro xla Apocalipsis kalichuwinankanita kmakgapitsi libros xalak Biblia. Akgtum liʼakxilhtit, palakachuwina Daniel kgalhilh akgtum tamanixnat niku akxilhli «tantati laklanka lapanit xtakutmakgolh kpupunu» (Dan. 7:1-3). Chu Daniel kinkawaniyan pi umakgolh laklanka lapanit kakilhchanima kgalhtati «mapakgsinanin» o gobiernos (kalikgalhtawakga Daniel 7:15-17). Uma tuku lichuwinankan kinkamakgtayayan naʼakgatekgsaw pi umakgolh lapanit nema kalichuwinankan kʼApocalipsis na kakilhchanima mapakgsinanin.

⁵ Kaʼakxilhwi makgapitsi símbolos nema kalichuwinankan klibro xla Apocalipsis. Uma tuku naʼakxilhaw, Biblia nakinkamakgtayayan naʼakgatekgsaw tuku kakilhchanima. Nakalichuwinanaw xalakluku lapanit. Pulana naʼakxilhaw tiku kakilhchanima. Alistalh naʼakxilhaw tuku nakaʼakgspula umakgolh lapanit. Chu xaʼawatiya nalichuwinanaw makgapitsi tuku tlan nakatsiniyaw kimpalakatakan.

6. ¿Tuku kilhchanima xaluku lapanit nema kgalhi akgtujun xʼakgxakga nema lichuwinan Apocalipsis 13:1-4?

⁶ ¿Tuku kilhchanima xaluku lapanit nema kgalhi akgtujun xʼakgxakga? (Kalikgalhtawakga Apocalipsis 13:1-4). Biblia wan pi uma lapanit xtachuna la leopardo, pero xtantun xtachuna la tantum oso chu xkilhni la xla tantum león, chu kgalhi akgkaw xʼakgalokgot. Tantati lapanit nema lichuwinan capítulo 7 xla Daniel na xtachuna tasiya, pero tanatunu lapanit. Pero libro xla Apocalipsis kaj tantum lapanit lichuwinan. Wa xlakata, uma xaluku lapanit ni kaj chatum mapakgsina kilhchanima o akgtum lanka tamapakgsin. Apocalipsis wan pi kgalhi «talakaskin nakamapakgsi putum laklanka familias, kachikinin, tiku chuwinankgo tipalhuwa tachuwin chu laklanka kachikinin». Xlimakgatliwakga tlakg lanka nixawa la xla chatum mapakgsina xla akgtum país (Apoc. 13:7). Wa xlakata, uma xaluku lapanit kakilhchanima putum mapakgsinanin tiku kamapakgsinit latamanin chuna la titaxtunit kilhtamaku (Ecl. 8:9). *

7. ¿Tuku kakilhchanima akgtujun akgxakga xla xaluku lapanit?

⁷ ¿Tuku kakilhchanima akgtujun akgxakga? Kcapítulo 17 xla Apocalipsis, tekgsaw tuku nakinkamakgtayayan nakatsiyaw. Anta niku talichuwinan xtatlawamakgxtu tantum xaluku lapanit nema talichuwinan kcapítulo 13. Apocalipsis 17:10 wan: «Kgalhtujun mapakgsinanin: Kgalhkitsis lakgsputkgonita, chatum mapakgsinamaja chu achatum nina mapakgsinama; pero akxni namapakgsinan kaj ni makgas kilhtamaku natawila». Xliputum mapakgsinanin nema Satanás kamaklakaskinit, anankgo kgalhtujun tiku tlan katamalakxtumikan «akgxakga» xlakata makgantaxtikgonit tuku lu xlakaskinka. Umakgolh litaxtukgo laklanka mapakgsinanin tiku katlawanikgonit tuku nitlan xkachikin Dios. Kxkilhtamaku apóstol Juan, akgkitsis umakgolh laklanka mapakgsinanin  xmapakgsinankgonita chu xlakgsputkgonita: Egipto, Asiria, Babilonia, Medopersia chu Grecia. Roma, xliʼakgchaxan xwanit, chu xmapakgsinama akxni Juan maʼakxilhnika uma. ¿Tiku xʼama litaxtu xliʼakgtujun chu xaʼawatiya lanka mapakgsina?

8. ¿Tiku kilhchanima xliʼakgtujun akgxakga nema kgalhi xaluku lapanit?

⁸ Chuna la naʼakxilhaw, tuku lichuwinan libro xla Daniel nakinkamakgtayayan nakatsiyaw tiku kilhchanima xliʼakgtujun chu xaʼawatiya xʼakgxakga xaluku lapanit. ¿Tiku xalanka mapakgsina mapakgsinama kʼuma kxaʼawatiya kilhtamaku, «kxkilhtamaku Malana»? (Apoc. 1:10). Wa lanka tamapakgsin nema makgtanuma Reino Unido chu Estados Unidos. Wa xlakata tlan nawanaw pi uma wa xliʼakgtujun akgxakga xla xaluku lapanit nema lichuwinan Apocalipsis 13:1-4.

9. ¿Tiku kilhchanima xaluku lapanit nema kgalhi «akgtiy xʼakgalokgot xtachuna la tantum borrego»?

⁹ Capítulo 13 xla Apocalipsis kinkawaniyan tuku tlawama lanka tamapakgsin nema kilhchanima xliʼakgtujun akgxakga, uma wamputun, Reino Unido chu Estados Unidos. Chu limasiya la atanu lapanit chu wan xpalakata: «Xkgalhi akgtiy xʼakgalokgot xtachuna la tantum borrego, pero tsukulh chuwinan chuna la tantum lanka luwa nema makgapekuanan». Uma xaluku lapanit «tlawa laklanka milagros; asta tlawa pi kʼakgapun nataktayachi lhkuyat xlakata latamanin naʼakxilhkgo» (Apoc. 13:11-15). Chu capítulos 16 chu 19 xla Apocalipsis limapakuwi «ni xaxlikana palakachuwina» (Apoc. 16:13; 19:20). Akxni Daniel lichuwinan lanka tamapakgsin niku makgtanuma Reino Unido chu Estados Unidos, na wa pi xʼama «masputunan» (Dan. 8:19, 23, 24, nota). Chu wa uma tuku lalh akxni xlama xliʼAkgtiy Guerra xLikalanka Katiyatni. Akgtiy bombas atómicas nema makxtum tlawakgolh científicos británicos chu xalak Estados Unidos wa tuku tlawalh pi xʼanalh taʼakglhuwit. Chuna uma lanka tamapakgsin niku makgtanuma Reino Unido chu Estados Unidos tlawakgolh “pi kʼakgapun xtaktachi lhkuyat”.

10. ¿Tuku kilhchanima «tatlawamakgxtu nema tasiya chuna la xapulana xaluku lapanit»? (Apocalipsis 13:14, 15; 17:3, 8, 11).

¹⁰ Akxilhparayaw atanu lapanit. Xtachuna tasiya xaluku lapanit nema kgalhi akgtujun xʼakgxakga, pero uma xaspinini. Apocalipsis limapakuwi «tatlawamakgxtu nema tasiya chuna la xapulana xaluku lapanit» chu wan pi uma «xlikgalhtsayan mapakgsina» (kalikgalhtawakga Apocalipsis 13:14, 15; 17:3, 8, 11). * Xlakata uma «mapakgsina» wankan pi tasiyalh, alistalh nialh tawi, pero titaxtulh kilhtamaku tasiyapa. Uma tatalakxtumi tuku akgspulalh Organización de las Naciones Unidas, nema tatayakgo tuku tlawakgo mapakgsinanin xalak kakilhtamaku. Xapulana xwanikan Sociedad de Naciones. Alistalh akxni xlama xliʼAkgtiy Guerra xLikalanka Katiyatni nialh tawi. Chu titaxtulh kilhtamaku tasiyapa chuna la lilakgapaskan la uku.

11. ¿Tuku natlawakgo laklanka lapanit nema kakilhchanima mapakgsinanin, chu tuku xlakata ni napekuanaw?

¹¹ Xlakata tuku malakgatumikgo, laklanka lapanit o mapakgsinanin nakamakgpuwantinikgo latamanin natalalakatawakakgo Jehová chu xkachikin. Tlan nawanaw pi nakamamakxtumikgo «mapakgsinanin kxliputum katiyatni» xlakata Armagedón, «kʼguerra nema natlawakan klanka xkilhtamaku Dios, Tiku kgalhi putum litliwakga» (Apoc. 16:13, 14, 16). Pero ni kilipekuanatkan. KiDioskan, Jehová, lakapala wi tuku natlawa xlakata nakinkalakgmaxtuyan putum tiku tatayayaw xtamapakgsin (Ezeq. 38:21-23).

12. ¿Tuku nakaʼakgspula putum lapanit?

 ¹² ¿Tuku nakaʼakgspula putum lapanit? Apocalipsis 19:20 lichuwinan: «Tiku kgewi kawayu chipalh xaluku lapanit chu nachuna ni xaxlikana palakachuwina. Tiku tlawalh milagros kxlakatin xaluku lapanit nema kaliʼakgskgawilh ama tiku makglhtinankgolh xlilhka xaluku lapanit chu tiku kakninanikgo xtatlawamakgxtu. Kstaknamakgolhku lhkgen kamakanka niku lakatum wi lanka lhkuyat chu lilakgpasawi azufre». Wa xlakata, akxni mapakgsinamakgojku nawan, xtalamakgasitsin Dios nakamalakgsputukan putum kilhtamaku.

13. ¿Tuku tuwa titaxtuyaw xlakskujnin Jehová xlakata mapakgsinanin?

¹³ Tuku kinkamasiyaniyan. Kstalaninanin Cristo talakaskin ni namakgxtakgaw Dios chu xTamapakgsin (Juan 18:36). Xlakata tlan namakgantaxtiyaw talakaskin ni namakgtanuyaw kkakilhtamaku chu kpolítica. Pero uma tuwa nakitaxtu, xlakata mapakgsinanin lakaskinkgo pi kakatatayaw chu kakalimasiyaniw kkintachuwinkan chu tuku tlawayaw. Tiku tatayakgo makglhtinankgo lilhka xla xaluku lapanit (Apoc. 13:16, 17). Chu tiku kgalhikgo lilhka, Jehová nialh tlan kaʼakxilha chu nialh kgalhikgo talakaskin nalatamakgo putum kilhtamaku (Apoc. 14:9, 10; 20:4). Lu xlakaskinka pi ni namakgtanuyaw kkakilhtamaku, maski mapakgsinanin xafuerza nakinkawanikgoyan pi kakatatayaw.

14. ¿Tuku akxilha apóstol Juan nema lu kaks malakawani? (Apocalipsis 17:3-5).

¹⁴ Apóstol Juan wan pi wi tuku atanu akxilhli nema “lu kaks lilakawa”. ¿Tuku uma? Chatum puskat tiku xkgewi tantum uma xaluku lapanit (Apoc. 17:1, 2, 6). Limasiyakan chatum «puskat tiku sta xmakni», chu xtukuwani wa «xaLanka Babilonia». Xla katatlawa «talakgxtumit nema ni xlitatlawat» «mapakgsinanin xalak katiyatni» (kalikgalhtawakga Apocalipsis 17:3-5).

15, 16. ¿Tuku kilhchanima «xaLanka Babilonia, chu la katsiyaw?

¹⁵ ¿Tuku kilhchanima «xaLanka Babilonia»? Uma puskat nila kilhchani akgtum tamapakgsin xlakata Apocalipsis wan pi katatlawa talakgxtumit nema ni xlitatlawat mapakgsinanin xalak katiyatni (Apoc. 18:9). Xlakata uma puskat kgewi xaluku lapanit masiya pi kamapakgsiputun. Chu na nila kakilhchani laklanka stananin tiku kajwatiya lhuwa tuku kgalhiputunkgo nema anankgo kxkakilhtamaku Satanás, xlakata Apocalipsis alistalh kalichuwinan chu kalimapakuwi «stananin xalak katiyatni» (Apoc. 18:11, 15, 16).

¹⁶ Makglhuwa, anta kBiblia, kaj wi tuku kilhchanima akxni lichuwinankan pi wi tiku sta xmakni o tlawa talakgxtumit nema ni xlitatlawat. Tlan kilhchani tiku wan pi skujnani Dios pero kakakninani ídolos o xʼamigo litaxtu kakilhtamaku (1 Crón. 5:25; Sant. 4:4). Pero, akxni lichuwinankan chatum lataman tiku ni makgxtakga Dios, limaklakaskinkan tachuwin pi nitu lixkajwanit o niti tatalakgxtuminit (2 Cor. 11:2; Apoc. 14:4). Kxamakgan Babilonia lu xʼanan ni xaxlikana takanajla. Wa xlakata xaLanka Babilonia kilhchanima ni xaxlikana takanajla. Chu wa putum ni xaxlikana takanajla nema anan kkakilhtamaku (Apoc. 17:5, 18; kaʼakxilhti artículo xla jw.org «¿Qué es Babilonia la Grande?»).

17. ¿Tuku naʼakgspula xaLanka Babilonia?

¹⁷ ¿Tuku naʼakgspula xaLanka Babilonia? Apocalipsis 17:16, 17 wan: «Chu akgkaw akgalokgot nema akxilhti chu xaluku lapanit, xlakan nialh naʼakxilhputunkgo puskat tiku sta xmakni chu namakglhtikgo putum tuku kgalhi chu xalhtantala namakgxtakgkgo, chu nawakgo xliwa chu putuminika nalhkuyukgo. Xlakata Dios wililh anta kxnakujkan namakgantaxtikgo  xtapuwan». Chuna, Jehová natlawa pi kachikinin namaklakaskinkgo xaspinini xaluku lapanit, uma wamputun, Naciones Unidas, xlakata nakatalatlawa ni xaxlikana takanajla xala uma kakilhtamaku chu namasputukgo (Apoc. 18:21-24).

18. ¿Tuku kilitlawatkan xlakata ni namakgtanuyaw kxaLanka Babilonia?

¹⁸ Tuku kinkamasiyaniyan. Lu xlakaskinka pi ni namakgxtakgaw «takaknin» nema Dios wan pi «skulunku chu ni taxkajwaninit» (Sant. 1:27). Nikxni kamastaw talakaskin pi xaLanka Babilonia nakinkamapasiyan ni xaxlikana xtamasiy, xfiestas, tuku mastakgo talakaskin natlawakan klatamat chu tuku xla taskuwan. Chu chuntiya kakawaniw latamanin: «Kamakgxtakgtit chu kataxtutit». Komo chuna natlawakgo, Dios ni katiwa pi makgtlawakgolh xtalakgalhin xaLanka Babilonia (Apoc. 18:4).

19. ¿Tiku «xatsutsokgo lanka luwa nema makgapekuanan»?

¹⁹ Libro xla Apocalipsis na lichuwinan «xatsutsokgo lanka luwa nema makgapekuanan» (Apoc. 12:3). Uma lanka luwa talatlawa Jesús chu xʼángeles (Apoc. 12:7-9). Nachuna, talatlawa xkachikin Dios chu kamaxki litliwakga mapakgsinanin (Apoc. 12:17; 13:4). ¿Tiku uma lanka luwa? Wa «xapulana luwa nema wanikan Akgskgawini chu Satanás» (Apoc. 12:9; 20:2). Wa tiku kapulalin putum xtalamakgasitsin Jehová.

20. ¿Tuku naʼakgspula lanka luwa?

²⁰ ¿Tuku naʼakgspula lanka luwa? Apocalipsis 20:1-3 wan pi chatum ángel namakan Satanás kkapulhman, uma xtachuna la komo xtamaknuka kpulachin. Satanás nalakgachinukan 1,000 kata chu nialh katikaʼakgskgawilh «kachikinin» asta akxni nasputa uma kilhtamaku. Chu, xaʼawatiya, Satanás chu xdemonios nakamakankan «klanka lhkuyat» nema «lilakgpasawi azufre». Uma wamputun pi makgtuminika nakamasputukan (Apoc. 20:10). ¿Lilakpuwana la nawan latamat akxni nialh katitawi Satanás chu demonios? ¡Lu tlan nawan!

21. ¿Tuku xlakata lu kinkamakgapaxuwayan tuku likgalhtawakganitaw klibro xla Apocalipsis?

²¹ ¿Ni xlikana pi lu kinkamakgpuwantiniyan akxni akgatekgsaw tuku kilhchanima limasiy o símbolos nema lichuwinan libro xla Apocalipsis? Ni kajwatiya katsinitaw tiku xtalamakgasitsin Jehová, na akxilhwi tuku nakaʼakgspula. Chuna, «paxuwa tiku pixlanka likgalhtawakga tuku talichuwinanit pi nala chu paxuwakgo tiku nakgaxmatkgo […] tuku anta tatsokgnit» (Apoc. 1:3). Pero, ¿tuku tasikulunalin nalipaxuwakgo latamanin tiku ni makgxtakgkgo Dios akxni xtalamakgasitsin Dios kamasputukanita nawan? Uma naʼakxilhaw kxaʼawatiya artículo xla uma serie.