1, 2. ¿Tuku lu xlakaskinka xlilaksakatkan xwanit judíos tiku xlamakgo kBabilonia? (Esdras 1:2-4).

 MASKI judíos tachin xwilakgo kBabilonia 70 kata, la uku tlantiya xtaxtukgo chu xtaspitkgolh kxkachikinkan, kʼIsrael (kalikgalhtawakga Esdras 1:2-4). Kajwatiya Jehová tlan xtlawa pi chuna xlalh. ¿Tuku xlakata chuna wanaw? Xlakata babilonios ni xkamakgxtakgkgo tiku tachin xkalinkgo (Is. 14:4, 17). Pero Babilonia akgchipaka, chu xasasti mapakgsina makatsininalh pi judíos tlan xtaxtukgolh kpaís. Wa xlakata putum judíos, liwaka lakchixkuwin tiku xpulalinkgo familia, xlilaksakatkan xwanit tuku natlawakgo: namakgxtakgkgo Babilonia o anta natamakgxtakgkgo. Pero makgapitsi max lu tuwa makgkatsikgolh nalaksakkgo tuku natlawakgo. Kaʼakxilhwi tuku xlakata.

² Makgapitsi xlinkgoya kata chu nialhla makgat xtlawankgo. Chu lhuwa judíos anta xlakachinkgonit kBabilonia, wa xlakata xkachikinkan xliʼakxilhkgo. Xlakan xlakpuwankgo pi Israel kaj akgtum kachikin xwanit niku latamakgolh xnatlatnikan xalamakgasa. Nachuna, makgapitsi judíos xtlajakgonit lhuwa tumin kBabilonia. Wa xlakata max tuwa xmakgkatsikgo namakgxtakgkgo xchikkan chu xatlan taskujut nema xkgalhikgo chu naʼankgo latamakgo kʼakgtum kachikin nema ni xlakgapaskgo.

3. ¿Tuku tasikulunalin xʼamakgo makglhtinankgo judíos tiku xtaspitkgolh kʼIsrael?

³ Judíos tiku ni xmakgxtakgkgo Dios liwana xkatsikgo pi tlakg tlan xʼama kakitaxtuni kʼIsrael nixawa tuku xlimakgxtakgkgolh kBabilonia. Pulaktum tuku lu tlan xʼama kitaxtu wa pi tlan xkakninaniparakgolh Jehová. Anta kBabilonia xʼanan liwaka 50 templos nema xkatlawanikanit atanu dioses, pero ni xʼanan akgtum templo niku xkakninanika Jehová. Xlakata ni xʼanan akgtum pumakamastan chu nipara  sacerdotes, israelitas nila xtlawakgo tamakamastan nema kskin Limapakgsin nema xmaxkikanit Moisés. Nachuna, tlakg lhuwa xʼanankgo judíos tiku xkakninanikgo atanu dioses nixawa tiku ni xmakgxtakgkgo Jehová chu xkgalhakgaxmatkgo xlimapakgsin. Wa xlakata, lhuwa judíos tiku xmakgapaxuwaputunkgo Jehová lu xtaspitputunkgo kxkachikinkan chu xlakkaxwiliputumparakgo xaskulunku takaknin.

4. ¿Tuku kamalaknunilh Jehová judíos?

⁴ Judíos max akgtati papaʼ xʼamakgo lichankgo kʼIsrael, chu tuwa xʼama kakitaxtuni. Pero Jehová kamalaknunilh pi xʼama kamakgtaya xlakata ni tuwa xchankgolh. Isaías tsokgwililh: «¡Kakakaxtlawatit kxtiji Jehová! Kamakaxtupitit xtiji Dios kxakaskakni tiyat. […] Tiji nema talhkgotinit namatsajwanikan, chu niku kalixkajni tiji kaxtum natlawakan» (Is. 40:3, 4). ¡Kaj kalilakpuwanti! Judíos tlakg ni tuwa xʼamakgo makgkatsikgo natlawankgo kʼakgtum tiji niku xakawan chu xakaxtum, nixawa natlawankgo klaklanka sipi. Na tlakg lakapala xʼamakgo chankgo chu tlakg xlipaxuwakgolh.

5. ¿Tuku xwanikan tiji nema lichuwinalh Isaías?

⁵ Lhuwa tiji kawilinikan xtukuwani o amakgapitsin kawilinikan akgtum número. Chu tiji nema lichuwinalh Isaías, ¿xkgalhi xtukuwani? Chuna. Biblia wan: «Naʼanan akgtum tiji anta, chuna, akgtum tiji nema wanikan Tiji xaSanto. Tiku xataxkajwani ni katilaktlawalh anta» (Is. 35:8). ¿Tuku xkilhchanima umakgolh tachuwin xpalakatakan israelitas? ¿Chu tuku kilhchanima kimpalakatakan?

6. ¿Tuku xlakata uma tiji xasanto xwanit?

⁶ «Tiji xaSanto». Uma lu stlan tukuwani, ¿ni xlikana? ¿Tuku xlakata uma tiji xasanto xwanit? Xlakata kʼIsrael ni xʼamaka mastakan talakaskin pi xʼanalh tiku xalixkajni, uma wamputun pi ni xʼamaka mastakan talakaskin pi nipara chatum judío xlilh xalixkajni latamat, xkakninanilh atanu dioses o xtlawalh atanu laklanka talakgalhin. Judíos tiku xʼamakgo taspitkgo, akgtum «xasanto kachikin» xliwanatkan xwanit kxlakatin Dios (Deut. 7:6). ¿Xwamputun uma pi tiku taxtukgolh kBabilonia putum tlan tuku xtlawamakgo? Nichuna. Xtalakaskin pi xtalakgpalikgolh xlakata tlan xmakgapaxuwakgolh Jehová.

7. ¿Tuku xtalakaskin pi xlakgpalikgolh makgapitsi judíos? Kawili akgtum liʼakxilhtit.

⁷ Chuna la lichuwinaw xapulana, lhuwa judíos xlakachinkgonit kBabilonia, chu lhuwa tiku xmastakgonit talakaskin pi xkapasalh xtapuwankan babilonios chu chuna la xlinkgo xlatamatkan. Akxni xtitaxtunita akglhuwa kata lata xapulana judíos xtaspitkgonit kʼIsrael, Esdras katsilh pi makgapitsi umakgolh judíos xkatatamakgaxtokgkgonit lakpuskatin xalak alakatanu kachikinin (Éx. 34:15, 16; Esd. 9:1, 2). Chu alistalh, mapakgsina Nehemías lu kaks lilakawa akxni akxilhli pi xkamanankan umakgolh judíos ni xkatsinikgo chuwinankgo hebreo (Deut. 6:6, 7; Neh. 13:23, 24). Xlakata umakgolh kamanan ni xkatsinikgo hebreo, ¿la xʼamakgo paxkikgo Jehová chu xkakninanikgolh komo ni xʼakgatekgskgo xTachuwin? (Esd. 10:3, 44). Lhuwa tuku xlilakgpalitkan xwanit umakgolh judíos, pero ni lu tuwa xmakgkatsikgolh komo anta xlatamakgolh kʼIsrael, niku tsinu tsinu xlakkaxwilimaparaka xaskulunku takaknin (Neh. 8:8, 9).

8. ¿Tuku kilhchanima kimpalakatakan «Tiji xaSanto»? (Kaʼakxilhti xmakni revista).

⁸ Pero max makgapitsin nalakpuwankgo: «Lu tlan takgaxmata tuku kaʼakgspulalh judíos. Pero ¿tuku kilhchanima uma kimpalakatakan?». Akinin nachuna tatekgsaw la  judíos, tlawamaw “kTiji xaSanto”. Uma tiji kinkamaxkiyan talakaskin nakakninaniyaw Jehová kparaíso xaʼespiritual, kxkachikin. Nachuna, kkilhtamaku nema aku mima tlan namakglhtinanaw tasikulunalin nema nalimin xTamapakgsin Dios. Wa xlakata, lata tiku kalaksakkanit naʼankgo kʼakgapun chu «amakgapitsi borregos» talakaskin ni namakgxtakgaw uma tiji (Juan 10:16). b Lata kkata 1919, lhuwa millones lakchixkuwin, lakpuskatin chu kamanan taxtukgonit kxaLanka Babilonia, nema kilhchanima nixaxlikana takanajla, chu tsukukgonit tlawankgo “kTiji xaSanto”. Wix max na makgxtakgnita xaLanka Babilonia. Maski uma tiji max kajku 100 kata kgalhi lata talakkilh, titaxtunita akglhuwa ciento kata lata tsukuka lakkaxwilikan.

9. Chuna la wan Isaías 57:14, ¿la lakkaxwilika «Tiji xaSanto»?

⁹ Jehová kamakgtayalh judíos xlakata ni tuwa xchankgolh kxkachikinkan akxni taxtukgolh kBabilonia. Jehová mapanulh putum tuku xkamalakgachokgo (kalikgalhtawakga Isaías 57:14). ¿Chu tuku tlawanit Jehová xpalakata «Tiji xaSanto» kkinkilhtamakujkan? Akxni akglhuwa ciento kata xtsankga xlakata nachan kata 1919, Jehová kamaklakaskilh lakchixkuwin tiku ni xmakgxtakgkgo xlakata xlakkaxwilikgolh tiji (katamalakxtupi Isaías 40:3). Tlan nawanaw pi umakgolh lakchixkuwin lu liskujkgolh tuku xla takanajla xlakata lhuwa latamanin tiku tlan likatsikgo xmakgxtakgkgolh nixaxlikana takanajla chu xmakgtapakgsikgolh kparaíso xaʼespiritual, niku xlakkaxwilikanita xaskulunku takaknin. Kalichuwinaw makgapitsi taskujut nema tlawakgolh xlakata xlakkaxwilikgolh tiji.

10, 11. ¿Tuku lu tlan kitaxtulh xlakata tsukuka imprimirlinankan chu matitaxtika Biblia kʼatanu tachuwin? (Na kaʼakxilhti dibujo).

¹⁰ Tsukuka inprimirlinankan. Makgasa, Biblia amakan xtsokgxtukan chu chuna tlawaka asta kxitat siglo akgkukitsis. Xtalakaskin lhuwa kilhtamaku xlakata xtlawaka uma taskujut, wa xlakata ni xʼanan maklhuwa copias xla Biblia chu lu tapalaxla xkalistakan. Pero akxni taxtulh imprenta tlakg ni tuwa tsukuka tlawakan Biblia chu tsukuka malakgatumikan.

¹¹ Matitaxtikan kʼatanu tachuwin. Akglhuwa ciento kata, Biblia kajwatiya xʼanan ktachuwin latín, akgtum tachuwin nema kajwatiya xʼakgatekgskgo tiku tlakg xkgalhtawakgakgonit. Pero xlakata tlakg lakapala tsukuka imprimirlinankan, lakchixkuwin tiku kskujnanikgo Dios lu liskujkgolh namatitaxtikgo Biblia ktachuwin nema xʼakgatekgskgo putum latamanin. Chuna akxni xlikgalhtawakgakgolh xTachuwin Dios tlan xtamalakxtumikgolh tuku xkgaxmatkgo kpusikulan chu tuku masiya Biblia.

12, 13. Kalichuwinanti akgtum liʼakxilhtit nema limasiya la makgapitsin lakchixkuwin limasiyakgolh pi nixlikana tuku xmasiyakgo pusikulan ksiglo akgkunajatsa.

¹² Tuku makgtayanan naʼakgatekgskan Biblia. Lhuwa latamanin tsukukgolh likgalhtawakgakgo Biblia chu lhuwa tuku tsukukgolh katsinikgo. Ni xʼakstukan tatamakgxtakgkgolh tuku xkatsinikgonit, chu uma lu lisitsikgolh xpulalinanin takanajla. Akgtum liʼakxilhtit, ksiglo akgkunajatsa, lakchixkuwin tiku tlan xlikatsikgo tsukukgolh maxtukgo tratados chu folletos nema xlichuwinankgo tuku nixaxlikana xmasiyama pusikulan.

¹³ Kkata 1835, chatum chixku tiku xkakninani Dios chu xwanikan Henry Grew maxtulh maktum folleto niku xlichuwinan komo tiku nikgonita ankgo latamakgo alakatanu. Ama kilhtamaku, lhuwa pusikulan xmasiyakgo pi putum akinin kgalhiyaw tuku nila niy, pero  uma folleto xlichuwinan pi Biblia masiya pi Dios kamaxkinit uma tamaskiwin kaj makgapitsi latamanin. Kkata 1837, chatum xpulalina takanajla tiku xwanikan George Storrs tekgsli uma folleto akxni xwaka ktren. Akxni likgalhtawakgalh, akxilhli pi xkatsininit tuku lu xlakaskinka, wa xlakata tsukulh kalitachuwinan amakgapitsin. Kkata 1842, mastalh makgapitsi taʼakgchuwin nema xwanikan «¿Nila nikgo tiku lixkajni likatsikgo?». Tuku tsokgwililh George Storrs lakgpalinilh xlatamat chatum kgawasa tiku xwanikan Charles Taze Russell.

14. ¿La limaklakaskinkgolh tala Russell chu xcompañeros tuku xtlawakgonita makgapitsin? (Na kaʼakxilhti dibujo).

¹⁴ ¿La limaklakaskinkgolh tala Russell chu xcompañeros tuku xtlawakgonita makgapitsin? Uma kilhtamaku xwilakgolha diccionarios, concordancias xalak Biblia chu Biblias nema xkamatitaxtikanit kʼatanu tachuwin. Wa xlakata tlan xmaklakaskinkgo putum uma akxni xkgalhtawakgakgo. Na litamakgtayakgolh tuku xlakputsananikgonit Henry Grew, George Storrs chu amakgapitsin. Russell chu xcompañeros na lhuwa tuku limakgtayanankgolh “kTiji xaSanto”, xlakata maxtukgolh lhuwa libros chu tratados nema xlichuwinankgo tuku masiya Biblia.

15. ¿Tuku lu xlakaskinka lalh kkata 1919?

¹⁵ Kkata 1919, xaLanka Babilonia, nema kilhchanima nixaxlikana takanajla, nialhla akgchipalh xkachikin Dios. Uma kata lakkaxwilika «skujni xatalipaw chu xaskgalala», chu lu tlan kitaxtulh xlakata latamanin tiku tlan likatsikgo tlan xtsukukgolh tlawankgo “kTiji xaSanto” (Mat. 24:45-47). Xlakata amakgapitsin lu xliskujkgonit nalakkaxwilikgo uma tiji, tiku tsukukgolh tlawankgo anta, tlan lhuwa tuku tsukukgolh katsinikgo xlakata Jehová chu tuku lakpuwanit natlawa (Prov. 4:18). Na tlan lakgpalikgolh tuku xtalakaskin xlakata xmakgapaxuwakgolh Dios. Pero Dios ni xkgalhkgalhi pi makgtuminika xtalakgpalikgolh, wata tsinu tsinu kamakgtayanit xkachikin nataskulunki (kaʼakxilhti recuadro « Jehová tsinu tsinu maskulunki xkachikin»). Kalilakpuwanti la  napaxuwayaw akxni nachin kilhtamaku akxni putum tuku natlawayaw namakgapaxuwa Dios (Col. 1:10).

16. ¿Tuku taskujut tlawakanit “kTiji xaSanto” lata kkata 1919? (Isaías 48:17; 60:17).

¹⁶ Xlakata kgantum tiji tlan natawila talakaskin nakuentajtlawakan. Lata kkata 1919 chuntiya lakkaxtlawamaka «Tiji xaSanto» xlakata tlakg lhuwa latamanin nataxtukgo kxaLanka Babilonia. Skujni xatalipaw chu xaskgalala lu lhuwa skujnit. Kkata 1921 maxtulh libro El Arpa de Dios, uma libro tlawaka xlakata nakamakgtayakan latamanin nalakgapaskgo xaxlikana. Matitaxtika kliwaka 36 tanu tanu tachuwin chu malakgatumika liwaka 6 millones, nema kamakgtayalh lhuwa latamanin nalakgapaskgo xaxlikana. Chu nina makgas, taxtulh libro Kalipaxuwa latamat, nema lu makgtayanama xlakata nakamakgalhtawakgekan latamanin. Kʼuma xaʼawatiya kilhtamaku, Jehová maklakaskinit xkachikin xlakata chuntiya nakinkamaxkiyan tuku maklakaskinaw kkintakanajlakan, chu uma kinkamakgtayayan chuntiya naʼanaw “kTiji xaSanto” (kalikgalhtawakga Isaías 48:17; 60:17).

17, 18. ¿Niku linan «Tiji xaSanto»?

¹⁷ Tlan nawanaw pi akxni chatum lataman tsuku likgalhtawakga Biblia, tsuku tlawan “kTiji xaSanto”. Makgapitsin kaj ni lhuwa tlawankgo chu makgxtakgkgo uma tiji. Pero amakgapitsin liwana lakpuwankgonit chuntiya natlawankgo kʼuma tiji asta nachankgo niku linan. Pero ¿niku linan uma tiji?

¹⁸ Xpalakatakan tiku kgalhkgalhimakgo nalatamakgo kʼakgapun, «Tiji xaSanto» kalin «kxparaíso Dios» anta kʼakgapun (Apoc. 2:7). Chu xpalakatakan tiku kgalhkgalhimakgo nalatamakgo kKatiyatni, uma tiji kalin akxni naʼakgasputa xTamapakgsin Cristo nema namakgapala Akgtum Mil Kata, akxni putum latamanin nialh nakgalhikgo talakgalhin. Komo wix tlawampat kʼuma tiji, ni katalakgaspittaya, chuntiya katlawanti asta nachipina kxasasti kakilhtamaku. ¡Klakaskinaw pi tlan kachipi!