ARTÍCULO NEMA NATALIKGALHTAWAKGA 21
¿La kgalhti Jehová kiʼoracioneskan?
«Katsiyaw pi namakglhtinanaw tuku skinaw xlakata wa skininitaw» (1 JUAN 5:15).
TAKILHTLIN 41 KinTlat, kakgaxpatti kioración
TUKU NATALICHUWINAN a
1, 2. ¿Tuku max nalilakpuwanaw?
¿MINIT kilhtamaku lilakpuwanita komo Jehová kgalhti miʼoraciones? Komo chuna, ni miʼakstu chuna makgkatsinita. Lhuwa natalan chuna makgkatsikgonit, liwaka akxni titaxtukgonit tuku tuwa. Max na tuwa namakgkatsiyaw naʼakxilhaw la Jehová kgalhti kiʼoracioneskan komo patinamaw.
2 Kʼuma artículo nalichuwinanaw tuku xlakata tlan nalipawanaw pi Jehová kgalhti xʼoracioneskan xlakskujnin (1 Juan 5:15). Na naʼakxilhaw tuku xlakata max namin kilhtamaku nalakpuwanaw pi Jehová nitu kgalhtima kiʼoracioneskan. Chu alistalh naʼakxilhaw la kinkakgalhtiyan Jehová.
MAX JEHOVÁ NI KINTIKAKGALHTIN CHUNA LA LAKASKINAW
3. ¿Tuku xlakata Jehová lakaskin pi katlawaniw oración?
3 Biblia liwana kinkawaniyan pi Jehová lu kinkapaxkiyan chu lu xtapalh kinkaliʼakxilhan (Ageo 2:7; 1 Juan 4:10). Wa xlakata kinkawaniyan pi ankgalhin katlawaniw oración chu kaskiniw xtamakgtay (1 Ped. 5:6, 7). Xla lu kinkamakgtayaputunan xlakata ni natamakgatliniyaw chu natayaniyaw putum tuku nitlan natitaxtuyaw.
Jehová kgalhtilh xʼoraciones David akxni lakgmaxtulh kxmakan xtalamakgasitsin (Kaʼakxilhti párrafo 4).
4. ¿Tuku likatsiyaw pi Jehová kakgalhti xʼoracioneskan kskujnin? (Na kaʼakxilhti dibujo).
4 Biblia kalichuwinan lhuwa xlakskujnin Jehová tiku skinikgolh xtamakgtay chu lichuwinan la Jehová kakgalhtilh. Max lilakpuwanaw xliʼakxilhtit mapakgsina David. Xla xkgalhi lhuwa xtalamakgasitsin tiku xmakgniputunkgo, chu makglhuwa tlawanilh oración Jehová xlakata naskini xtamakgtay. Makgtum, xla tasaskinilh: «Oh Jehová, kakgaxpatti kiʼoración; kakgaxpatti akxni ktasaskiniyan tamakgtay. Kakinkgalhti, xlakata wix ni makgxtakgnana chu lu xaʼakgstitum» (Sal. 143:1). Jehová kgalhtilh xʼoraciones chu lakgmaxtulh (1 Sam. 19:10, 18-20; 2 Sam. 5:17-25). Wa xlakata David wa: «Jehová lakatsu katawi putum tiku putsakgo». Chu akinin na tlan chuna nawanaw (Sal. 145:18).
Jehová kgalhtilh xʼoraciones Pablo akxni maxkilh litliwakga xlakata natayani (Kaʼakxilhti párrafo 5).
5. ¿Ankgalhin kgalhtilh Jehová xʼoracioneskan xlakskujnin chuna la xlakan xlakaskinkgo? Kawili akgtum liʼakxilhtit. (Na kaʼakxilhti dibujo).
5 Max Jehová ni katikgalhtilh kiʼoracioneskan chuna la akinin lakaskinaw. Wa uma tuku titaxtulh apóstol Pablo. Xla xkgalhi tuku «xtachuna la lhtukun» kxmakni, pulaktum tuku lu tuwa, chu makgtutu tasaskinilh Dios pi xmapanunilh. ¿Kgalhtilh Jehová xʼoraciones? Chuna, pero nichuna la Pablo xlakaskin. Jehová ni mapanunilh uma tuku tuwa xtitaxtuma, wata maxkilh litliwakga xlakata chuntiya kskujnanilh chu ni xmakgxtakgli (2 Cor. 12:7-10).
6. ¿Tuku xlakata max namin kilhtamaku nalakpuwanaw pi Jehová ni kgalhti kiʼoracioneskan?
6 Jehová max na nakinkakgalhtiyan chuna la nikxni xlakpuwanitaw. Pero tlan nalipawanaw pi Jehová katsi tuku tlakg tlan kimpalakatakan. Asta tlan tlakg lhuwa tuku natlawa «nixawa tuku skinaw chu nixawa tuku lakpuwanaw» (Efes. 3:20). Wa xlakata, xla max nakinkakgalhtiyan akxni ni kgalhkgalhimaw chu chuna la nikxni xlakpuwanitaw.
7. ¿Tuku xlakata namin kilhtamaku natalakaskin nalakgpaliyaw tuku skiniyaw Jehová? Kawili akgtum liʼakxilhtit.
7 Max namin kilhtamaku natalakaskin nalakgpaliyaw tuku skiniyaw Jehová akxni akgatekgsaw tuku xtalakaskin. Kalichuwinaw tuku titaxtulh tala Martin Poetzinger. Akxni xla aku xtamakgaxtokgnit, tamaknuka kʼakgtum campo de concentración nazi. Xapulana, kskini Jehová pi xtamakxtulh niku xtamaknukanit xlakata akxtum xtatawilapa xpuskat chu tlan xlichuwinampa xtachuwin. Pero titaxtulh akgtiy semanas chu xtasiya pi ni xʼamaka tamakxtukan. Wa xlakata tala Poetzinger skinilh Jehová : «Katlawa litlan, kakimakgtaya nakakxilha tuku lakaskina naktlawa». Chu tsukulh lilakpuwan tuku xtitaxtumakgo amakgapitsin natalan tiku na xtanumakgo kcampo de concentración. Lhuwa umakgolh natalan, xkalilakgaputsamakgo xfamiliajkan. Wa xlakata tala Poetzinger wanilh Jehová: «Lu kpaxtikatsiniyan xlakata xasasti kintaskujut. Kakimakgtaya nakkamatliwakglha kinatalan». Chu wa uma tuku tlawalh akgnajatsa kata lata tanulh kcampo de concentración.
8. ¿Tuku xlakaskinka nalakapastakaw akxni tlawayaw oración?
8 Talakaskin nalakapastakaw pi Jehová namakgantaxti tuku lakpuwanit natlawa kilhtamaku akxni xla laklhkawilinit. Pulaktum tuku xla lakpuwanit natlawa wa pi namasputu tuku kinkamakgapatinanan, chuna la akxni wi tuku masputunan, tajatat chu linin. Jehová namaklakaskin xTamapakgsin xlakata namakgantaxti tuku malaknunit (Dan. 2:44; Apoc. 21:3, 4). Pero xlakata nina chin uma kilhtamaku, masta talakaskin pi Satanás kamapakgsinalh kkakilhtamaku (Juan 12:31; Apoc. 12:9). b Komo Jehová xmapanulh la uku putum tuku kamakgapatinan latamanin, xtasiyalh pi Satanás tlan chuna la mapakgsinan. Wa xlakata, maski talakaskin chuntiya nakgalhkgalhiyaw asta akxni Jehová namakgantaxti tuku malaknunit, ni wamputun pi ni kintikamakgtayan. Kaʼakxilhwi makgapitsi tuku Jehová tlawa xlakata nakinkamakgtayayan.
¿LA KGALHTI JEHOVÁ KIʼORACIONESKAN?
9. ¿La kinkamakgtayayan Jehová akxni talakaskin wi tuku nalaksakaw? Kawili akgtum liʼakxilhtit.
9 Kinkamaxkiyan liskgalala. Jehová kinkamalaknuniyan pi nakinkamaxkiyan liskgalala nema maklakaskinaw xlakata tlan tuku nalaksakaw. Chu tlakg maklakaskinaw liskgalala akxni nalaksakaw tuku nalakgpali kilatamatkan, chuna la komo natamakgaxtokgaw o ni (Sant. 1:5). Kaʼakxilhwi tuku titaxtulh chatum tala tiku wanikan María. c Xla xatapaxuwan kskujnima Jehová chuna la precursora regular akxni lakgapasli chatum tala kgawasa. Xla wan: «Alh kilhtamaku lu tlan amigos klitaxtuw chu ktsukuw lalakgatiyaw. Xakkatsi pi xtalakaskin wi tuku xaktlawalh. Wa xlakata lhuwa oración ktlawanilh Jehová. Xakmaklakaskin pi Jehová xkimpulalilh, pero xakkatsi pi akit xkilakgchan naklaksaka tuku naktlawa». María liwana katsi pi Jehová kgalhtilh xʼoraciones chu maxkilh liskgalala nema xmaklakaskin. ¿La makgtayalh Jehová? María lakputsananilh kilikgalhtawakgakan chu tekgsli makgapitsi artículos niku xtakgalhti takgalhskinin nema xla xkgalhi. Nachuna, xtse, tiku xtatayana Jehová, maxkilh lu laktlan tastakyaw nema makgtayalh nalilakpuwan tuku xmakgkatsi. Alistalh María lu tlan tuku laksakli.
¿La kinkamaxkiyan Jehová litliwakga xlakata natayaniyaw? (Kaʼakxilhti párrafo 10).
10. Chuna la wan Filipenses 4:13, ¿la nakamakgtaya Jehová xlakskujnin? Kawili akgtum liʼakxilhtit. (Na kaʼakxilhti dibujo).
10 Kinkamaxkiyan litliwakga xlakata natayaniyaw. Chuna la makgtayalh apóstol Pablo, Jehová nakinkamaxkiyan litliwakga nema maklakaskinaw xlakata natayaniyaw tuku tuwa titaxtuyaw (kalikgalhtawakga Filipenses 4:13). Kaʼakxilhwi la makgtayalh chatum tala tiku wanikan Benjamin. Lata akxni kgawasaku xwanit, akxtum katatawi xfamilia kcampos de refugiados anta kʼÁfrica. Xla wan: «Ankgalhin xaktlawani oración Jehová chu xakskini pi xkimaxkilh litliwakga xlakata naktlawa tuku tlan. Xla kgalhtilh kiʼoraciones. Kimaxkilh takaksni nema xakmaklakaskin, kimakgtayalh ni nakpekuan xlakata chuntiya naklichuwinan xtachuwin chu ankgalhin xakkgalhi likgalhtawakga xlakata xakmatliwakglhli kintakanajla». Xla wampara: «Akxni xaklikgalhtawakga tuku xtitaxtukgonit amakgapitsin kskujnin Jehová chu la xkamakgtayanit natayanikgo, lu kimatliwakglhli chu kimakgtayalh ni nakmakgxtakga Jehová».
¿Akxilhnita la Jehová kamaklakaskin kinatalankan xlakata namakgtayakgoyan? (Kaʼakxilhti párrafos 11 chu 12). d
11, 12. ¿La tlan nakamaklakaskin Jehová kinatalankan xlakata nakgalhti kiʼoracioneskan? (Na kaʼakxilhti dibujo).
11 Kamaklakaskin kinatalankan. Katsisni akxni nina xmakgnikan, Jesús lu lhuwa tlawanilh oración Jehová. Tasaskinilh pi xlakgmaxtulh xlakata ni xlakaskin pi xlimawakaka pi xmaxkajwinit xtukuwani xTlat. Pero Jehová ni lakgmaxtulh, wata malakgachalh chatum ángel, chatum xtala Jesús, xlakata xmatliwakglhli (Luc. 22:42, 43). Nachuna, Jehová max nakamaklakaskin kinatalankan xlakata nakinkatachuwinankgoyan kteléfono o nakinkalakgapaxialhnankgoyan xlakata nakinkamatliwakglhkgoyan. Kimputumkan tlan nalakputsayaw la tlan nakawaniyaw «akgtum tlan tachuwin» kinatalankan (Prov. 12:25).
12 Kalichuwinaw tuku titaxtulh chatum tala tiku wanikan Míriam. Xtitaxtunita makgapitsi semanas lata xninit xchixku, xla xʼakstu xwi kxchik chu lu nitlan xmakgkatsi chu lu xlipuwama. Lu xtasa chu xmaklakaskin pi wi tiku xtachuwinalh. Xla wan: «Nipara xakkgalhi litliwakga xlakata wi tiku naktachuwinan kteléfono, wa xlakata ktlawanilh oración Jehová. Akxni xaktlawamajku kiʼoración chu xaktasama, makasanalh teléfono. Xkinkilhminima chatum kgolotsin, chatum tlan amigo». Uma kgolotsin chu xpuskat lu makgoxomixikgolh Míriam, chu xla liwana katsi pi wa Jehová tiku tlawalh pi uma tala xtachuwinalh kteléfono.
¿La tlan nakamaklakaskin Jehová tiku ni kakninanikgo xlakata nakinkamakgtayakgoyan? (Kaʼakxilhti párrafos 13 chu 14).
13. Kalichuwinanti akgtum liʼakxilhtit nema limasiya la Jehová tlan nakamaklakaskin tiku ni kakninanikgo xlakata nakgalhti kiʼoracioneskan.
13 Tlan nakamaklakaskin latamanin tiku ni kakninanikgo (Prov. 21:1). Min kilhtamaku, Jehová kamaklakaskin latamanin tiku ni kakninanikgo xlakata nakgalhti xʼoracioneskan xlakskujnin. Akgtum liʼakxilhtit, maklakaskilh mapakgsina Artajerjes xlakata xmaxkilh talakaskin Nehemías nataspita kJerusalén chu namakgkaxtlawa kachikin (Neh. 2:3-6). Chu la uku Jehová tlan nakamaklakaskin tiku ni xtatayananin xlakata nakinkamakgtayakgoyan akxni maklakaskinaw.
14. ¿Tuku masiyaniyan tuku titaxtulh Soo Hing? (Na kaʼakxilhti dibujo).
14 Chatum tala puskat tiku wanikan Soo Hing akxilhli pi Jehová maklakaskilh chatum makuchina xlakata xmakgtayalh. Xkgawasa, tiku kgalhi tajatat xla talipuwan chu xla talakgaputsit, wi tuku lu nitlan akgspulalh. Wa xlakata Soo Hing chu xchixku makgxtakgkgolh xtaskujutkan xlakata xkuentajtlawakgolh. Uma tlawalh pi lu nitlan xkakitaxtunilh xlakata nialh xkaʼakchani tumin. Lu nitlan tuku xtitaxtumakgo, chu Soo Hing wa pi nialh xkgalhi litliwakga xlakata xtayanilh. Wa xlakata wanilh Jehová putum tuku xmakgkatsi chu skinilh pi xmakgtayalh. Makuchina tiku xmakuchima xkgawasa, kamakgtayalh xlakata xkgalhikgolh xtamakgtaykan mapakgsinanin chu xtekgskgolh niku tlan xtawilakgolh chu niku ni lu tapalaxla kxokgokgolh. Alistalh, Soo Hing wa: «Kakxilhwi la Jehová kinkamakgtayan kʼuma xatuwa kilhtamaku. Liwana kkatsi pi xla “kgaxmata oración”» (Sal. 65:2).
TALAKASKIN TAKANAJLA XLAKATA NAʼAKXILHAW LA KINKAKGALHTIYAN JEHOVÁ
15. ¿Tuku makgtayalh chatum tala naʼakxilha pi Jehová xkgalhti xʼoraciones?
15 Jehová ni tlawa tuku kaks malakawaninan xlakata nakgalhti kiʼoracioneskan. Pero tuku kinkalikgalhtiyan wa tuku maklakaskinaw xlakata ni namakgxtakgaw. Wa xlakata skgalalh kilitawilatkan xlakata tlan naʼakxilhaw la kinkakgalhtiyan kinTlatkan xalak akgapun. Chatum tala puskat tiku wanikan Yoko xlakpuwan pi Jehová ni xkgalhti xʼoraciones. Pero tsukulh lhkawili putum tuku kskini Jehová. Alh kilhtamaku, xla akxilhli tuku klhkawilinit nema kskininit Jehová chu akxilhli pi xkgalhtinit lhuwa xʼoraciones, asta makgapitsi tuku xla nialh xlakapastaka. Lu tlan pi nalimaxtuyaw kilhtamaku xlakata nalilakpuwanaw la kgalhtinit Jehová kiʼoracioneskan (Sal. 66:19, 20).
16. ¿La kinkamakgtayayan takanajla akxni tlawayaw oración? (Hebreos 11:6).
16 Ni kajwatiya talakaskin nakgalhiyaw takanajla xlakata natlawaniyaw oración Jehová, wata na maklakaskinaw takanajla xlakata namakgamakglhtinanaw la kinkakgalhtiyan (kalikgalhtawakga Hebreos 11:6). Kalichuwinaw tuku titaxtukgolh Mike chu Chrissy, akgtum tamakgaxtokgat tiku xʼamputunkgo skujkgo kBetel. Mike wan: «Makglhuwa kmalakgachaw solicitud, chu xaktlawaniyaw oración Jehová xlakata xkinkakgalhtikan, pero nikxni kinkatasanikan kBetel». Mike chu Chrissy chuntiya lipawankgolh pi Jehová xkatsi niku tlan xmakgtayanankgolh. Chuntiya tlawakgolh putum tuku xmatlanikgo xlakata naskujnanikgo Jehová: skujkgolh chuna la precursores regulares niku tlakg xtalakaskin tamakgtay chu makgtayanankgolh niku xkatlawakan Pukgalhtawakga. Chu la uku Mike superintendente de circuito litaxtu. Xla wan: «Jehová ni kgalhtinit kiʼoracioneskan chuna la akinin xaklakaskinaw, pero kgalhtinit kiʼoracioneskan chu tlakg kinkamaxkinitan nixawa tuku akinin xaklakpuwanitaw».
17, 18. Chuna la wan Salmo 86:6, 7, ¿tuku liwana katsiyaw?
17 (Kalikgalhtawakga Salmo 86:6, 7). David liwana xkatsi pi Jehová xkgaxmata chu xkgalhti xʼoraciones. Wix na tlan nalipawana uma. Liʼakxilhtit nema kalichuwinaw kʼuma artículo kinkamasiyaniyan pi Jehová tlan nakinkamaxkiyan liskgalala chu litliwakga nema maklakaskinaw xlakata natayaniyaw. Na lichuwinanitaw pi tlan nakamaklakaskin kinatalankan chu asta latamanin tiku ni kakninanikgo xlakata nakinkamakgtayayan.
18 Maski Jehová ni ankgalhin kintikakgalhtin chuna la akinin xlakpuwanitaw, liwana katsiyaw pi nakgalhti kiʼoracioneskan. Nakinkamaxkiyan tuku namaklakaskinaw chu akxni namaklakaskinaw. Wa xlakata chuntiya katlawaniw oración Jehová, chu kalimasiyaw takanajla. Kalipawaw pi tlan nakinkakuentajtlawayan la uku chu kxasasti kakilhtamaku nakinkamaxkiyan putum tuku namaklakaskinaw (Sal. 145:16).
TAKILHTLIN 46 Paxtikatsiniyaw Jehová
a Jehová kinkamalaknuniyan pi nakgalhti kiʼoracioneskan komo ni lakatsala xtalakaskin. Akxni titaxtuyaw tuku tuwa, tlan nalipawanaw pi xla nakinkamakgtayayan ni namakgxtakgaw. Kʼuma artículo naʼakxilhaw la Jehová kgalhti kiʼoracioneskan.
b Anta kʼartículo «Ni kapatsankgaw pi wa Jehová lakgchan namapakgsinan» krevista Makatsinina xla junio kata 2017, lichuwinankan tuku xlakata Jehová mastanit talakaskin pi Satanás namapakgsinan kkakilhtamaku.
c Makgapitsi tukuwani kalakgpalikanit.
d TUKU TASIYA KDIBUJO: Chatum puskat chu xtsumat ankgo makgtawilakgo kʼalakatanu país. Natalan xatapaxuwan kamakgamakglhtinankgo chu kamakgtayakgo.
