ARTÍCULO NEMA NATALIKGALHTAWAKGA 18
TAKILHTLIN 1 Laktlan xtayat Jehová
Kalipawaw xalakgalhamana «Juez xlikalanka katiyatni»
«¿Juez xlikalanka katiyatni ni katitlawalh tuku xaʼakgstitum?» (GÉN. 18:25).
TUKU NAʼAKXILHAW
Naʼakxilhaw pi Jehová nakalimasiyani talakgalhaman chu xaʼakgstitum nakalikatsini akxni nakamalakastakwani tiku ni xaʼakgstitum litaxtukgo.
1. ¿Tuku lu xlakaskinka masiyanilh Jehová Abrahán?
ABRAHÁN nikxni xʼama patsankga tuku xlitachuwinanit Jehová. Jehová limaklakaskilh chatum ángel xlakata nawani pi xʼama kamalakgsputu Sodoma chu Gomorra. Maski Abrahán lu xkanajlani Dios, tuwa makgkatsilh naʼakgatekgsa tuku xlakata chuna xʼama tlawa, chu wa xlakata kgalhskilh: «¿Xlikana na nakamasputuya tiku xaʼakgstitum akxni nakamasputuya tiku nitlan likatsikgo? […] ¿Juez xlikalanka katiyatni ni katitlawalh tuku xaʼakgstitum?». Jehová ni tasitsilh xʼamigo, wata masiyanilh pulaktum tuku lu xlakaskinka: xla nikxni katikamalakgsputulh latamanin tiku xaʼakgstitum likatsikgo. ¡Uma lu tlan kinkamamakgkatsiniyan! (Gén. 18:23-33).
2. ¿Tuku xlakata liwana katsiyaw pi akxni Jehová lakputsanan limasiya pi xaʼakgstitum likatsi chu lakgalhamanan?
2 ¿Tuku xlakata liwana katsiyaw pi akxni Jehová lakputsanan limasiya pi xaʼakgstitum likatsi chu lakgalhamanan? Chuna wanaw xlakata Jehová «akxilha tuku wi knaku» (1 Sam. 16:7). Xla lakgapasa «xnaku chatunu lataman» (1 Rey. 8:39; 1 Crón. 28:9). ¡Uma lu kaks malakawaninan! Jehová lu skgalala, wa xlakata min kilhtamaku nila akgatekgsaw chuna la lakputsanan. Wa xlakata apóstol Pablo wa: «¡Nila tekgsaw anta niku kilhtsukuyacha xtalakapastakni!» (Rom. 11:33).
3, 4. ¿Tuku takgalhskinin max nalilakpuwanaw, chu tuku nalichuwinanaw kʼuma artículo? (Juan 5:28, 29).
3 Max min kilhtamaku kgalhiyaw makgapitsi takgalhskinin chuna la xkgalhi Abrahán. Max asta lilakpuwanaw: «¿Nakamalakastakwani Jehová makgapitsi latamanin tiku xla kamalakgsputulh, chuna la latamanin xalak Sodoma chu Gomorra? ¿Nakamalakastakwanikan akxni nalakastakwanankgo “tiku ni xaʼakgstitum”?» (Hech. 24:15).
4 Kalichuwinaw tuku akgatekgsaw xlakata talakastakwanat. Nina makgas, lichuwinaw tuku xasasti akgatekgswi xlakata tuku kilhchanima pi wi tiku «nakamalakastakwanikan xlakata nakgalhikgo latamat» chu wi tiku «nakamalakastakwanikan xlakata nakalakputsananikan» (kalikgalhtawakga Juan 5:28, 29). a Uma xasasti tuku akgatekgswi tlawanit pi wi tuku nalakgpaliyaw, nema nalichuwinanaw kʼuma chu kʼatanu artículo. Pulana nalichuwinanaw tuku ni katsiyaw xlakata la lakputsanan Jehová chu alistalh nalichuwinanaw tuku katsiyaw.
TUKU NI KATSIYAW
5. ¿Tuku lichuwinankgonit kilikgalhtawakgakan makgasa xlakata tiku xlamakgo kSodoma chu k’Gomorra?
5 ¿Tuku nakaʼakgspula tiku Jehová kamalakgsputulh xlakata ni xaʼakgstitum xlitaxtukgo, chuna la tiku xlamakgo kSodoma chu kʼGomorra? Makgasa, xwanaw pi umakgolh latamanin ni xʼamaka kamalakastakwanikan. Pero xlakata skujni xatalipaw chu xaskgalala lu lakputsananinit uma chu tlawaninit oración Jehová, akxilhnit pi nila nawanaw pi ni katilakastakwanankgolh. Kaʼakxilhwi tuku xlakata nila chuna nawanaw.
6. 1) Kalichuwinanti makgapitsi liʼakxilhtit akxni Jehová kamalakgsputulh tiku ni xaʼakgstitum xwankgonit. 2) ¿Tuku ni kililakpuwanatkan xpalakata umakgolh latamanin?
6 Biblia kalichuwinan lhuwa latamanin tiku Jehová kamalakgsputulh xlakata akxilhli pi ni xaʼakgstitum xlikatsikgo. Akgtum liʼakxilhtit, akxni milh Munkaklat kajwatiya Noé chu xfamilia lakgtaxtukgolh. Alh kilhtamaku, Jehová kalimapakgsilh israelitas pi xkamalakgsputukgolh tiku xlamakgo kʼakgtujun kachikinin nema xwilakgo ktiyat nema xkamalaknuninit. Chu atanu kilhtamaku, Jehová limaklakaskilh chatum ángel xlakata xkamakgnilh 185,000 soldados asirios kaj akgtum katsisni (Gén. 7:23; Deut. 7:1-3; Is. 37:36, 37). Kʼumakgolh liʼakxilhtit, Biblia ni lhuwa tuku kinkalitachuwinanan nema xtlawalh pi nalakpuwanaw pi Jehová kamalakgsputulh umakgolh latamanin xliputuminika kilhtamaku chu pi nialh katilakastakwanankgolh. Tlakg kalichuwinaw umakgolh liʼakxilhtit.
7. ¿Tuku ni katsiyaw xpalakata tiku nikgolh kMunkaklat chu tiku kamakgnika akxni akgchipaka Canaán? (Kaʼakxilhti dibujo).
7 Maski Jehová makxtum kamasputulh umakgolh latamanin, ni katsiyaw tuku xlakpuwan xpalakata chatunu chatunu umakgolh latamanin, chu ni katsiyaw komo tiku nikgolh kalitachuwinanka xlakata Jehová chu kamaxkika talakaskin pi namakgxtakgkgo tuku nitlan xtlawamakgo. Akxni Biblia lichuwinan xkilhtamaku Noé, wan pi Noé «xlichuwinan tuku xaʼakgstitum» (2 Ped. 2:5). Pero ni wan pi akxni xtlawamaja arca, kalitachuwinalh putum latamanin tiku xlamakgo kKatiyatni ama kilhtamaku. Nachuna, ni katsiyaw komo tiku xlamakgo kCanaán kalitachuwinanka xlakata Jehová chu kamaxkika talakaskin nalakgpalikgo xtayatkan.
Noé chu xfamilia tlawamakgo arca. Ni katsiyaw komo akxni xtlawamakgo arca na lakkaxwilikgolh pi nakalitachuwinankgo Dios putum latamanin tiku xlamakgo kKatiyatni akxni nina xmin Munkaklat (Kaʼakxilhti párrafo 7).
8. ¿Tuku ni katsiyaw xpalakata tiku xlamakgo kSodoma chu kʼGomorra?
8 ¿Chu tuku tlan nawanaw xlakata tiku xlamakgo kSodoma chu k’Gomorra? Katsiyaw pi anta kSodoma xlama Lot, chatum chixku tiku xaʼakgstitum xlikatsi. Pero ni katsiyaw komo kalitachuwinalh xlakata Dios putum umakgolh latamanin. Xlikana pi nitlan xlikatsikgo, pero ¿xputumkan xkatsikgo tuku tlan chu tuku nitlan? Max ni, xlakata Biblia wan pi lhuwa lakchixkuwin xalak Sodoma xkatatalakgxtumiputunkgo lakchixkuwin tiku xlakgapaxialhnamakgo Lot. Na anta xmakgtanumakgo lhuwa lakgkgawasan tiku max ni liwana x’akgatekgskgo pi lu nitlan tuku xtlawamakgo (Gén. 19:4; 2 Ped. 2:7). ¿Tlan nawanaw pi Jehová, tiku xalakgalhamana, lakkaxwilinit pi ni katikamalakastakwanilh nipara chatum umakgolh latamanin? Xlikana pi Jehová wanilh Abrahán pi kSodoma ni xʼanan nipara kaj kgalhakaw tiku xaʼakgstitum xwankgonit (Gén. 18:32). Wa xlakata Jehová tlan tuku tlawalh akxni kamasputulh. Pero nila wanaw pi nipara chatum umakgolh latamanin katikamalakastakwanika akxni Jehová nakamalakastakwani «tiku ni xaʼakgstitum» litaxtukgo.
9. ¿Tuku ni liwana katsiyaw xpalakata Salomón?
9 Nachuna, Biblia kalichuwinan tiku xaʼakgstitum xlikatsikgo pero alistalh ni xaʼakgstitum litaxtukgolh, chuna la mapakgsina Salomón. Xla liwana xlakgapasa Jehová chu xkatsi tuku xlitlawat xwanit xlakata nakakninani, chu lhuwa tasikulunalin makglhtinalh. Pero alh kilhtamaku tsukulh kakninani ni xaxlikana dioses. Uma lu makgasitsilh Jehová chu kachikin akglhuwa ciento kata lipatinalh tuku nitlan xtlawanit (1 Rey. 11:5-9, 43; 2 Rey. 23:13). Xlikana pi Biblia wan pi akxni Salomón nilh «katamaʼaknuka xtalilakgapasni», chuna la mapakgsina David, tiku nikxni makgxtakgli Dios. Pero ¿wamputun uma pi Salomón namalakastakwanikan kaj xlakata «katamaʼaknuka xtalilakgapasni»? Biblia ni kinkawaniyan. Pero makgapitsi max lakpuwankgo pi Salomón namalakastakwanikan xlakata Romanos 6:7 wan pi «tiku ninita, [...] nialhtu laklin xtalakgalhin». Pero uma texto ni kilhchanima pi putum tiku nikgonita nakamalakastakwanikan kaj xlakata nikgolh chu talakastakwanat wa xtatlajakan. Talakastakwanat akgtum tamaskiwin nema Jehová kamaxki latamanin xlakata kapaxki chu lakaskin pi kaskujnanikgolh putum kilhtamaku (Job 14:13, 14; Juan 6:44). ¿Namakglhtinan Salomón uma tamaskiwin? Jehová wa tiku katsi uma; akinin ni. Tuku liwana katsiyaw wa pi Jehová natlawa tuku xaʼakgstitum.
TUKU KATSIYAW
10. ¿La makgkatsi Jehová akxni kamalakgsputu tiku nitlan likatsikgo? (Ezequiel 33:11; na kaʼakxilhti dibujo).
10 (Kalikgalhtawakga Ezequiel 33:11). Jehová kinkawaniyan la makgkatsi akxni malakgsputu chatum lataman. Malakpuwanilh apóstol Pedro xlakata xtsokgwililh tuku xtachuna lichuwinalh palakachuwina Ezequiel. Pedro wa: «Jehová […] ni lakaskin pi wi tiku namalakgsputukan» (2 Ped. 3:9). Umakgolh tachuwin lu tlan kinkamamakgkatsiniyan. Liwana katsiyaw pi Jehová ni katimalakgsputulh chatum lataman putum kilhtamaku komo ni anan tuku xpalakata chuna natlawa. Xla lu xalakgalhamana chu limasiya uma talakgalhaman akxni chuna xlilat.
Akxni nakamalakastakwanikan tiku ni xaʼakgstitum, nakamaxkikan talakaskin nalakgapaskgo Jehová (Kaʼakxilhti párrafo 10).
11. ¿Tiku ni katilakastakwanankgolh, chu tuku likatsiyaw?
11 ¿Katsiyaw tiku ni katilakastakwanankgolh? Biblia kalichuwinan makgapitsi. b Akgtum liʼakxilhtit, Jesús wa pi Judas Iscariote ni xʼama lakastakwanan (Mar. 14:21; na kaʼakxilhti Juan 17:12 chu nota de estudio xa’español). Judas liwana xkatsi tuku xtlawama akxni talalakatawakalh Jehová chu xKgawasa, Jesús (kaʼakxilhti Marcos 3:29 chu notas de estudio xa’español). Jesús na wa pi makgapitsi xpulalinanin takanajla tiku xtalalakatawakakgonit ni xʼamakgo lakastakwanankgo (Mat. 23:33; na kaʼakxilhti Juan 19:11 chu nota de estudio xa’español niku wan «del hombre»). Chu apóstol Pablo lichuwinalh pi apóstatas tiku ni makgxtakgkgo tuku nitlan tlawamakgo ni katilakastakwanankgolh (Heb. 6:4-8; 10:29).
12. Kalichuwinanti makgapitsi liʼakxilhtit nema limasiya pi Jehová lakgalhamanan.
12 Pero chuna la akxilhwi, Jehová lu xalakgalhamana chu «ni lakaskin pi wi tiku namalakgsputukan». ¿La kalimasiyanilh talakgalhaman makgapitsi latamanin tiku tlawakgolh laklanka talakgalhin? Mapakgsina David tatalakgxtumilh tiku ni xtamakgaxtokga chu mamakgnininalh chatum chixku. Umakgolh lu laklanka talakgalhin, pero xlakata nitlan limakgkatsilh xtalakgalhin chu nialh tlawapa, Jehová lakgalhamalh chu tapatilh (2 Sam. 12:1-13). Mapakgsina Manasés na lhuwa tuku lu nitlan tlawalh kxlatamat. Maski chuna, Jehová limasiyanilh talakgalhaman xlakata nitlan limakgkatsilh xtalakgalhin chu nialh tlawapa (2 Crón. 33:9-16). Umakgolh liʼakxilhtit kinkamalakapastakayan pi Jehová limasiya talakgalhaman akxni talakaskin chuna natlawa. Nakamalakastakwani David chu Manasés xlakata nitlan limakgkatsikgolh xtalakgalhinkan, makgxtakgkgolh tuku nitlan xtlawamakgo chu nialh tlawaparakgolh.
13. 1) ¿Tuku xlakata Jehová kalimasiyanilh talakgalhaman latamanin xalak Nínive? 2) ¿Tuku wa Jesús xpalakatakan latamanin xalak Nínive?
13 Na katsiyaw pi Jehová kalakgalhamalh latamanin xalak Nínive. Dios wanilh Jonás: «Kakxilhnit tuku nitlan tlawamakgolh». Pero akxni makgxtakgkgolh xtalakgalhinkan, Jehová tlan kalikatsinilh chu katapatilh. Tlakg limasiyalh talakgalhaman nixawa Jonás. Akxni palakachuwina lu sitsilh, Dios malakapastakalh pi umakgolh latamanin nipara tsinu xkatsikgo «tuku tlan chu tuku nitlan» (Jon. 1:1, 2; 3:10; 4:9-11). Titaxtulh kilhtamaku, Jesús kalichuwinalh latamanin xalak Nínive tiku xmakgxtakgkgonit xtalakgalhinkan xlakata nalichuwinan pi Jehová lu lakgalhamanan chu xaʼakgstitum likatsi. Jesús wa pi xaʼamaka kamalakastakwanikan «akxni nalakputsanankan» (Mat. 12:41).
14. ¿Tuku nakamaxkikan talakaskin nalaksakkgo ninivitas?
14 ¿Tuku kilhtamaku xkilhchanima Jesús akxni wa pi ninivitas xʼamaka kamalakastakwanikan «akxni nalakputsanankan»? Jesús xlichuwinama akxni nakamalakastakwanikan tiku tlawakgolh tuku nitlan «xlakata nakalakputsananikan» (Juan 5:29). Uma chuna nala akxni Jesús namapakgsinan Akgtum Mil Kata, akxni nakamalakastakwanikan «tiku xaʼakgstitum chu tiku ni xaʼakgstitum» (Hech. 24:15). Tiku ni xaʼakgstitum «nakamalakastakwanikan xlakata nakalakputsananikan», Jehová chu Jesús naʼakxilhkgo komo nakgalhakgaxmatnankgo chu nalilatamakgo tuku nakatsinikgo. Komo chatum ninivita tiku namalakastakwanikan ni nakakninaniputun Jehová, namalakgsputukan (Is. 65:20). Pero komo nalaksaka naskujnani Jehová chu ni namakgxtakga, tlan nalatama putum kilhtamaku (Dan. 12:2).
15. 1) ¿Tuku xlakata nila wanaw pi nipara chatum tiku xalak Sodoma chu Gomorra katimalakastakwanika? 2) ¿Tuku kilhchanima tuku lichuwinan Judas 7? (Kaʼakxilhti recuadro « ¿Tuku xwamputun Judas?»).
15 Jesús wa pi «Kilhtamaku akxni Nalakputsanankan» tlakg nitlan xʼama kakitaxtuni tiku xlakgmakgankgolh xla chu xtamasiy «nixawa Sodoma chu Gomorra» (Mat. 10:14, 15; 11:23, 24; Luc. 10:12). ¿Tuku xwamputun Jesús? Max tlan xlakpuwaw pi Jesús kaj xmalakatsalima, pero nichuna. Akxni wa pi ninivitas nakamalakastakwanikan akxni nalakputsanankan ni kaj wi tuku xkilhchanima. Chu akxni kalichuwinalh tiku xalak Sodoma chu Gomorra na ni kaj wi tuku xkilhchanima. «Kilhtamaku akxni Nalakputsanankan» xpalakata Sodoma chu Gomorra watiya kilhtamaku akxni nakamalakastakwanikan ninivitas xlakata nakalakputsananikan. Ninivitas chu tiku xalak Sodoma chu Gomorra tlawakgolh tuku nitlan. Pero tiku xalak Nínive kamaxkika talakaskin nalimasiyakgo komo nitlan xlimakgkatsikgo xtalakgalhinkan chu xmakgxtakgkgolh. Nachuna, kalakapastakwi pi Jesús wa pi nakamalakastakwanikan «tiku tlawakgolh tuku nitlan» xlakata «nakalakputsananikan» (Juan 5:29). Wa xlakata, tlan nawanaw pi tiku xalak Sodoma chu Gomorra na max tlan nalakastakwanankgo. Max makgapitsin nakamalakastakwanikan chu tlan nakamakgtayayaw nalakgapaskgo Jehová chu Jesús.
16. ¿Tuku kuenta natlawa Jehová xlakata nalaksaka tiku nakamalakastakwani? (Jeremías 17:10).
16 (Kalikgalhtawakga Jeremías 17:10). Uma texto lu liwana kinkamasiyaniyan tuku katsiyawa: Jehová ankgalhin lakputsanani naku chu akxilha «putum tuku wi knaku». Akxni Jehová nalaksaka tiku namalakastakwani o tiku ni, kuenta natlawa «chuna la likatsikgonit» chatunu latamanin. Jehová ni katimalakastakwanilh chatum lataman komo ni xlilat chuna natlawa, pero nakalimasiyani talakgalhaman tiku xlilat nakalimasiyanikan talakgalhaman. Wa xlakata nikxni kililakpuwanatkan pi chatum lataman ni katilakastakwanalh komo ni liwana katsiyaw o komo Biblia ni wan pi chuna nala.
«JUEZ XLIKALANKA KATIYATNI» ANKGALHIN NATLAWA «TUKU XAʼAKGSTITUM»
17. ¿Tuku nakaʼakgspula tiku nikgonita?
17 Lata akxni Adán chu Eva tatayakgolh Satanás chu talalakatawakakgolh Jehová, lhuwa latamanin nikgonit. «Kintalamakgasitsinkan», linin, kamakgninit lhuwa latamanin (1 Cor. 15:26). ¿Tuku nakaʼakgspula umakgolh latamanin? Tiku xatalaksakni, 144,000, nalakastakwanankgo kʼakgapun chu nikxni katinikgolh (Apoc. 14:1). Amakgapitsi lakchixkuwin chu lakpuskatin tiku xpaxkikgo Jehová, nalatamaparakgo akxni nakamalakastakwanikan «tiku xaʼakgstitum» chu nalatamakgo putum kilhtamaku kKatiyatni komo ni namakgxtakgkgo Dios kxTamapakgsin Cristo xa’Akgtum Mil Kata chu akxni xa’awatiya nakalakputsananikan latamanin (Dan. 12:13; Heb. 12:1). Nachuna, kxTamapakgsin Cristo xa’Akgtum Mil Kata, «tiku ni xaʼakgstitum», chuna la tiku nikxni skujnanikgolh Jehová o asta «tiku tlawakgolh tuku nitlan», nakamaxkikan talakaskin nalakgpalikgo xtayatkan chu nakakninanikgo Dios (Luc. 23:42, 43). Pero makgapitsi latamanin lu lixkajnit likatsikgolh chu nikxni talakgpaliputunkgolh, wa xlakata Jehová lakkaxwilinit pi ni katikamalakastakwanilh (Luc. 12:4, 5).
18, 19. 1) ¿Tuku xlakata tlan nalipawanaw Jehová chu tuku lakkaxwilinit natlawa xpalakata tiku nikgonita? (Isaías 55:8, 9). 2) ¿Tuku nalichuwinanaw kʼatanu artículo?
18 ¡Tlan nalipawanaw pi akxni Jehová kalakputsanani latamanin, ankgalhin tlawa tuku xaʼakgstitum! Xtachuna la Abrahán, akinin liwana katsiyaw pi «Juez xlikalanka katiyatni» ni kgalhi talakgalhin, xalakgalhamana chu lu skgalala. Jehová lakgayawanit xKgawasa nakalakputsanani latamanin chu xla masiyaninit la natlawa (Juan 5:22). Jehová chu Jesús tlan akxilhkgo tuku wi knaku (Mat. 9:4). Wa xlakata ankgalhin natlawakgo «tuku xaʼakgstitum» akxni nakalakputsananikgo latamanin.
19 Ankgalhin kalipawaw Jehová chu tuku xla lakkaxwili natlawa. Xla ni likatsi chuna la akinin, xla tlan liwana kalakputsanani latamanin (kalikgalhtawakga Isaías 55:8, 9). Katsiyaw pi akxni Jehová chu Jesús nakalakputsananikgo latamanin, ankgalhin natlawakgo tuku xaʼakgstitum chu wa xlakata tlan nakalipawanaw. Na katsiyaw pi Jesús, kiMapakgsinakan, xaʼakgstitum likatsi chuna la xTlat chu xalakgalhamana (Is. 11:3, 4). Kʼatanu artículo nalichuwinanaw tuku ni katsiyaw chu tuku katsiyaw xlakata la Jehová chu Jesús nakalakputsananikgo latamanin akxni lama nawan lhuwa tapatin.
TAKILHTLIN 57 Putum latamanin kalitachuwinanaw Dios
a Kaʼakxilhti revista Makatsinina xla septiembre kata 2022, páginas 14 asta 19.
b Tlakg kalichuwinankan Adán, Eva chu Caín krevista Makatsinina 1 xla enero kata 2013, página 12, nota.