ARTÍCULO NEMA NATALIKGALHTAWAKGA 20
TAKILHTLIN 67 «Kalichuwinanti Dios»
Tapaxkit chuntiya kakinkamakgpuwantinin nalichuwinanaw Dios
«Klakgatum laklanka kachikinin pulana natalichuwinan xatlan tamakatsinin» (MAR. 13:10).
TUKU NA’AKXILHAW
Na’akxilhaw la kinkamakgpuwantiniyan tapaxkit xlakata xatapaxuwan nalichuwinanaw Dios chu xliputum kinakujkan chuna natlawayaw.
1. ¿Tuku tamakatsinin mastaka ktamakxtumit xla kata 2023?
¡LHUWA tuku katsiniw ktamakxtumit nema tlawaka kkata 2023, nema tlawakan akgatunu kata! a Anta lichuwinanka tuku xasasti akgatekgska xlakata tuku xkanajlayaw chu mastaka makgapitsi tamakatsinin xlakata la nalichuwinanaw Dios. Akgtum li’akxilhtit, lichuwinanka pi akxni masputukanita nawan xaLanka Babilonia, makgapitsi latamanin max tlanku natatayakgo Jehová. Na kinkawanikan pi lata papa’ noviembre kata 2023, nialh talakaskin namakatsininanaw la xlilhuwa kilhtamaku lichuwinanaw Dios. Xlakata tlawakanit putum umakgolh talakgpalit, ¿kilhchanima pi nialh lu xlakaskinka li’akxilhaw nalichuwinanaw Dios chu nialh talakaskin lu namalakapaliyaw? ¡Nichuna!
2. Chuna la titaxtuma kilhtamaku, ¿tuku xlakata tlakg xlakaskinka namalakapaliyaw nalichuwinanaw Dios? (Marcos 13:10).
2 Chuna la titaxtutilhama kilhtamaku, lu xlakaskinka pi tlakg namalakapaliyaw la lichuwinanaw Dios. ¿Tuku xlakata? Xlakata sputma kilhtamaku. Kalilakpuwaw tuku wa Jesús xlakata la x’amaka lichuwinankan Dios kxaʼawatiya kilhtamaku (kalikgalhtawakga Marcos 13:10). Mateo na tsokgwililh tuku lichuwinalh Jesús akxni wa pi xalaktlan tamakatsinin x’amaka lichuwinankan kxlikalanka Katiyatni akxni nina xchilh «lisputni» (Mat. 24:14). Uma tachuwin kilhchanima xlisputni xkakilhtamaku Satanás. Jehová lakkaxwilinita tukuya «kilhtamaku chu tukuya hora» namakgantaxti putum tuku lichuwinanit (Mat. 24:36; 25:13; Hech. 1:7). Chu akgatunu kilhtamaku nema titaxtu, tlakg talakatsuwima uma kilhtamaku (Rom. 13:11). Xlakata nina chin lisputni, talakaskin chuntiya nalichuwinanaw Dios.
3. ¿Tuku xlakata lichuwinanaw Dios?
3 Wi akgtum lu xlakaskinka takgalhskinin nema kimputumkan kililakpuwanatkan: ¿tuku xlakata lichuwinanaw xalaktlan tamakatsinin? Xlakata tapaxkit kinkamakgpuwantiniyan. Akxni lichuwinanaw Dios, limasiyayaw pi paxkiyaw xalaktlan tamakatsinin, pi kapaxkiyaw latamanin chu paxkiyaw Jehová chu xtukuwani. Kalichuwinaw pulakatunu uma.
LICHUWINANAW DIOS XLAKATA PAXKIYAW XALAKTLAN TAMAKATSININ
4. ¿Tuku tlawayaw akxni kinkamaxkikanan akgtum lu tlan tamakatsinin?
4 ¿Lakapastaka akxni wi tiku maxkin lu xatlan tamakatsinin? Max wi tiku wanin pi lakachilh kskgata chatum mintalilakgapasni o max malaknunikanti akgtum taskujut nema wix lu xmaklakaskimpat. ¿La makgkatsi? Max lu paxuwa chu asta xkawaniputuna putum mintalilakgapasni chu miʼamigos. ¿Ni xlikana pi nachuna makgkatsi akxni kgaxpatti tlakg xatlan tamakatsinin nema anan: tamakatsinin xla xTamapakgsin Dios?
5. ¿Tuku makgkatsi akxni katsini tuku masiya Biblia? (Na kaʼakxilhti dibujos).
5 Na kalilakpuwanti akxni xlimakgalhtawakgepaka Biblia. Lhuwa tuku katsini, katsini pi Jehová lu paxkiyan, pi xla lakaskin pi kamakgtapakgsi kxfamilia, pi xla malaknunit pi namasputu takatsanajwat chu tapatin, chu pi kxasasti kakilhtamaku nakamalakastakwani mintalilakgapasni tiku nikgonita (Mar. 10:29, 30; Juan 5:28, 29; Rom. 8:38, 39; Apoc. 21:3, 4). Putum uma tuku katsi lakgchalh minaku (Luc. 24:32). Lu paxki tuku xkatsinipat, chu wa xlakata xkalitachuwinamputuna putum latamanin (katamalakxtupi Jeremías 20:9).
Akxni katsiniw tuku xaxlikana masiya Biblia lu paxuwaw chu lu xkalitachuwinamputunaw putum latamanin (Kaʼakxilhti párrafo 5).
6. ¿Tuku masiyaniyan tuku titaxtukgolh Ernest chu Rose?
6 Kalichuwinaw tuku titaxtulh chatum tala tiku wanikan Ernest. b Xla kinkawaniyan pi akxni xkgalhi 10 kata, xtlat nilh. Ernest wan: «Xaklakpuwan: “¿Alh kʼakgapun, o lakgsputli chu nialh amakgtum kaktiʼakxilhpa?”. Lu nitlan xakmakgkatsi akxni xakkaʼakxilha kamanan tiku xkgalhikgojku xnatlatnikan». Ernest chali chali xʼan niku xmaknukanit xtlat, xtatsokgosta chu xtlawa akgtum oración, xwan: «Katlawa litlan Dios, kkatsiputun niku wi kintlat». Akxni Ernest xkgalhi 27 kata, malaknunika akgtum ta kgalhtawakga xalak Biblia, chu xla tunkun makgamakglhtinalh. Lu paxuwalh akxni katsilh pi putum tiku nikgonita nitu makgkatsikgo, xtachuna la lhtatamakgo, chu pi Biblia malaknu pi nakamalakastakwanikan (Ecl. 9:5, 10; Hech. 24:15). Uma kilhtamaku tekgsli xatakgalhtin takgalhskinin nema lhuwa kilhtamaku xlilakpuwanit. Lu xpaxuwa xlakata putum tuku xkatsinima kBiblia. Xpuskat, Rose, na tsukulh takgalhtawakga chu na lu xlipaxuwa putum tuku xkatsinima. Titaxtulh kilhtamaku, kkata 1978, xchatiykan tamunukgolh. Xatapaxuwan kalitachuwinankgolh tuku xkatsinikgonit kBiblia xtalilakgapasnikan, xʼamigoskan chu putum tiku xkakgaxmatniputunkgo. Ernest chu Rose kamakgtayakgonit liwaka 70 latamanin nalakgapaskgo Jehová chu natamunukgo.
7. ¿Tuku nakitaxtu komo lu napaxkiyaw tamasiy xalak Biblia? (Lucas 6:45).
7 Komo lu napaxkiyaw tamasiy xalak Biblia, lu nalichuwinamputunaw tuku katsininitaw (kalikgalhtawakga Lucas 6:45). Makgkatsiyaw chuna la kstalaninanin Cristo xalak pulana siglo, tiku wankgolh: «Nila nialh naklichuwinanaw tuku kakxilhnitaw chu kkgaxmatnitaw» (Hech. 4:20). Lu paxkiyaw tuku masiya Biblia chu wa xlakata kalitachuwinamputunaw putum latamanin tiku katachuwinanaw.
LICHUWINANAW DIOS XLAKATA KAPAXKIYAW LATAMANIN
8. ¿Tuku kinkamakgpuwantiniyan nakalitachuwinanaw xalaktlan tamakatsinin latamanin? (Kaʼakxilhti recuadro « Kakapaxki latamanin: Kakamakgalhtawakge»; na kaʼakxilhti dibujo).
8 Chuna la Jehová chu Jesús, akinin na kapaxkiyaw latamanin (Prov. 8:31; Juan 3:16). Lu kalakgalhamanaw tiku ni kgalhikgo takgalhkgalhin chu “ni lakgapaskgo Dios” (Efes. 2:12). Latamanin kgalhikgo lhuwa taʼakglhuwit chu akinin kgalhiyaw tuku tlan nakamakgtaya: xalaktlan tamakatsinin xla xTamapakgsin Dios. Tapaxkit chu talakgalhaman nema kakgalhiniyaw kinkamakgpuwantiniyan natlawayaw putum tuku matlaniyaw xlakata xlakan nakgaxmatkgo uma tamakatsinin. Tuku nakalitachuwinanaw tlan nakamaxki takgalhkgalhin, nakamakgtaya napaxuwakgo la uku chu tlan nakgalhikgo «xaxlikana latamat» kxasasti kakilhtamaku (1 Tim. 6:19).
Xlakata lu kapaxkiyaw chu lu kalakgalhamanaw latamanin lu kalitachuwinamputunaw xalaktlan tamakatsinin (Kaʼakxilhti párrafo 8).
9. ¿Tuku kamakatsiniyaw latamanin, chu tuku xlakata? (Ezequiel 33:7, 8).
9 Tapaxkit na kinkamakgpuwantiniyan nakawaniyaw latamanin pi talakatsuwima xlisputni uma xalixkajni kakilhtamaku (kalikgalhtawakga Ezequiel 33:7, 8). Lu lilipuwanaw pi latamanin xalak kinkachikinkan chu kintalilakgapasnikan tiku ni xtatayananin Jehová nipara tsinu lilakpuwankgo tuku talakatsuwima. Mateo 24:21 wan pi «naʼanan lhuwa tapatin chuna la ni makgstum chuna lanit lata kxkilhtsukut kakilhtamaku asta uku, chu nikxni chuna katilapa». Lakaskinaw pi kakatsikgolh tuku nala uma kilhtamaku akxni nakalakputsananikan latamanin: pulana nakamasputukan putum ni xaxlikana takanajla chu alistalh, akxni lama nawan Armagedón, putum tuku anan kʼuma xalixkajni kakilhtamaku namalakgsputukan (Apoc. 16:14, 16; 17:16, 17; 19:11, 19, 20). Skiniyaw Jehová pi lhuwa latamanin kakinkakgaxmatnikgon chu kamakgtapakgsikgolh kxkachikin xlakata akxtum nakakninaniyaw. Pero ¿tuku nakaʼakgspula latamanin tiku ni kgaxmatputunkgo tamakatsinin nema lichuwinanaw, chuna la tiku xalak kifamiliajkan?
10. ¿Tuku xlakata lu xlakaskinka namalakapaliyaw taskujut nema kgalhiyaw?
10 Chuna la akxilhwi kxliʼakgtiy artículo xla uma revista, Jehová max nakalakgmaxtu tiku naskujnaniputunkgo akxni naʼakxilhkgo pi namasputukan xaLanka Babilonia. Uma kinkamakgtayayan naʼakgatekgsaw pi lu xlakaskinka nakalitachuwinanaw latamanin xlakata Dios. ¿Tuku xlakata? Kalilakpuwaw uma: tuku kawaniyaw la uku max wa tuku nalakapastakkgo kkilhtamaku nema aku mima (katamalakxtupi Ezequiel 33:33). Max nalakapastakkgo tuku kamakatsinimaw chu nalaksakkgo naskujnanikgo Jehová akxni nina min nawan lisputni. Xtachuna la xkuentajtlawana pulachin xalak Filipos tiku makgamakglhtinalh xaxlikana akxni «lu tliwakga tachikilh tiyat», lhuwa latamanin tiku la uku ni makgamakglhtinankgo xaxlikana, max namakgamakglhtinankgo akxni naʼakxilhkgo pi namasputukan xaLanka Babilonia (Hech. 16:25-34).
LICHUWINANAW JEHOVÁ XLAKATA PAXKIYAW CHU PAXKIYAW XTUKUWANI
11. ¿La maxkiyaw Jehová kakni, la malankiyaw chu la maxkiyaw litliwakga? (Apocalipsis 4:11; na kaʼakxilhti dibujo).
11 Lichuwinanaw xalaktlan tamakatsinin xlakata paxkiyaw Jehová chu paxkiyaw xasanto xtukuwani, wa uma tuku tlakg kinkamakgpuwantiniyan. Akxni lichuwinanaw Dios kgalhiyaw talakgalhaman namalankiyaw. Liwana katsiyaw pi Jehová lakgchan namakglhtinan “kakni, namalankikan chu namakglhtinan litliwakga” (kalikgalhtawakga Apocalipsis 4:11). ¿La maxkiyaw kakni Jehová chu la malankiyaw? Akxni kawaniyaw latamanin pi anan lhuwa tuku limasiya pi Jehová wa tiku malakatsukilh putum tuku anan chu wa tiku kinkamaxkiyan latamat. ¿Chu la maxkiyaw litliwakga? Maxkiyaw litliwakga akxni limaklakaskinaw kinkilhtamakujkan, kilitliwakgakan chu putum tuku kgalhiyaw xlakata lu naliskujaw nalichuwinanaw xtachuwin (Mat. 6:33; Luc. 13:24; Col. 3:23). Tlan nawanaw pi lu lakgatiyaw lichuwinanaw Dios tiku lu paxkiyaw. Pero na lichuwinamputunaw xtukuwani chu tuku kilhchanima. ¿Tuku xlakata?
Maxkiyaw litliwakga Jehová akxni maklakaskinaw kinkilhtamakujkan, kilitliwakgakan chu putum tuku kgalhiyaw xlakata nalichuwinanaw xtachuwin chuna la matlaniyaw (Kaʼakxilhti párrafo 11).
12. ¿La masantujliyaw xtukuwani Jehová akxni katachuwinanaw latamanin?
12 Xlakata paxkiyaw Jehová, masantujliputunaw xtukuwani (Mat. 6:9). Uma wamputun pi limasiyaputunaw pi putum tuku Satanás limawakanit Jehová kaj taʼakgsanin (Gén. 3:1-5; Job 2:4; Juan 8:44). Wa xlakata, akxni anaw lichuwinanaw Dios lu kgalhmakgtayaputunaw Jehová chu kawaniputunaw putum latamanin tiku nakinkakgaxmatniputunkgoyan tuku xaxlikana xpalakata. Kawaniputunaw putum latamanin pi Jehová chatum Dios tiku lu xapaxkina, xaʼakgstitum mapakgsina chu pi xTamapakgsin nialh makgas namasputu tapatin chu nakalimini takaksni chu tapaxuwan latamanin (Sal. 37:10, 11, 29; 1 Juan 4:8). Akxni tlawayaw putum uma, masantujliyaw xtukuwani Jehová. Nachuna, akxni tlawayaw uma taskujut tlan limakgkatsiyaw xlakata makgantaxtimaw tuku kinkalakgayawanitan akinin tiku xtatayananin litaxtuyaw. ¿Tuku xlakata chuna wanaw?
13. ¿Tuku xlakata lanka talakgalhaman liʼakxilhaw pi kinkalilakgapaskanan xtatayananin Jehová? (Isaías 43:10-12).
13 Jehová kinkalaksaknitan xlakata xtatayananin nalitaxtuyaw (kalikgalhtawakga Isaías 43:10-12). Nina lhuwa kata titaxtunit, Lakgkgolotsin tiku Pulalinankgo tsokgwilikgolh maktum carta niku xwan: «Ni anan tlakg lanka talakgalhaman nixawa nakinkalilakgapaskanan xtatayananin Jehová». c Kalichuwinaw akgtum liʼakxilhtit. Kalilakpuwaw pi kinkalinkan kxlakatin chatum juez xlakata wi tiku kinkalimawakan pi tlawanitaw tuku nitlan, chu lakaskinaw pi wi tiku nakinkakgalhmakgtayayan xlakata nalimasiya pi ni xlikana tuku kilhwamaka. Max nalaksakaw chatum lataman tiku liwana lakgapasaw, tiku akinin lipawanaw chu tiku amakgapitsin latamanin na lipawankgo xlakata nakanajlanikan tuku nawan. Xtachuna la uma, xlakata Jehová liwana kinkalakgapasan chu kinkalipawanan, kinkalaksaknitan xlakata nalichuwinanaw pi kajwatiya xla xaxlikana Dios. Akinin akgtum lanka talakgalhaman li’akxilhaw pi xtatayananin litaxtuyaw chu wa xlakata putum kilhtamaku lichuwinamputunaw xtukuwani chu lichuwinamputunaw pi kaj taʼakgsanin tuku wankanit xpalakata. Chuna makgantaxtimaw nawan tuku kinkalakgayawanitan Jehová: xtatayananin litaxtumaw nawan (Sal. 83:18; Rom. 10:13-15).
CHUNTIYA NALICHUWINANAW DIOS
14. ¿Tuku kgalhkgalhimaw pi nakgantaxtu nema kaks nakinkamalakawaniyan?
14 ¡Lhuwaku tuku nala nema kaks nakinkamalakawaniyan! Ananku lhuwa latamanin tiku tlan namakgamakglhtinankgo xaxlikana chu lakaskinaw pi Jehová nakamaxki talakaskin namakgtapakgsikgo kxfamilia akxni nina tsuku nawan lhuwa tapatin. Pero nachuna, lu kinkamakgapaxuwayan pi akxni lama nawan lhuwa tapatin, tlakg xatuwa kilhtamaku nema nikxni ananit, makgapitsi latamanin namakgxtakgkgo xkakilhtamaku Satanás chu akxtum nakinkatakakninanikgoyan Jehová (Hech. 13:48).
15, 16. ¿Tuku liwana lakkaxwilinitaw natlawayaw, chu asta tukuya kilhtamaku?
15 Xlakata nina chin uma kilhtamaku, kgalhiyaw akgtum taskujut nema ni anan xtachuna: nalichuwinanaw xalaktlan tamakatsinin xla xTamapakgsin Dios kxlikalanka Katiyatni. Chu nachuna, talakaskin chuntiya nakawaniyaw latamanin pi xlisputni uma kakilhtamaku lu talakatsuwima. Akxni nachin kilhtamaku akxni nakalakputsananikan latamanin, na’akxilhkgo pi wa Jehová tiku xkamaxkima tamakatsinin nema kaliniyaw la uku (Ezeq. 38:23).
16 Wa xlakata, ¿tuku liwana lakkaxwilinitaw natlawayaw? Xlakata lu paxkiyaw xalaktlan tamakatsinin, kapaxkiyaw latamanin chu xlakata lu paxkiyaw Jehová chu xtukuwani, chuntiya lu namalakapaliyaw nalichuwinanaw xtachuwin chu xatapaxuwan chuna natlawayaw asta akxni xla nawan pi nialh katlawaw uma taskujut.
TAKILHTLIN 54 «Wa uma tiji»
a Uma tamakxtumit tlawaka 7 xla octubre kata 2023 kSalón de Asambleas xla xtatayananin Jehová xalak Newburgh, anta kNueva York (Estados Unidos). Alistalh, uma tamakxtumit matitaxtika kJW Broadcasting®. Xapulana taxtulh kprograma xla noviembre kata 2023 chu xlipulaktiy taxtulh kprograma xla enero kata 2024.
b Ka’akxilhti artículo «Biblia kalakgpalinilh xlatamatkan: Lu kaks kimalakawanilh la lu tlan takgalhtin masta Biblia», nema taxtulh krevista Makatsinina 1 xla febrero kata 2015.
c Kaʼakxilhti Anuario de los testigos de Jehová 2007, página 3.