ARTÍCULO NEMA NATALIKGALHTAWAKGA 19
TAKILHTLIN 22 ¡Kamilh xTamapakgsin Dios!
¿Tuku katsiyaw xlakata la nalakputsanan Jehová?
«Jehová […] ni lakaskin pi wi tiku namalakgsputukan» (2 PED. 3:9).
TUKU NAʼAKXILHAW
Naʼakxilhaw tuku xlakata liwana katsiyaw pi Jehová nalimasiya pi xaʼakgstitum likatsi akxni nakalakputsanani latamanin kkilhtamaku nema aku mima.
1. ¿Tuku xlakata wanaw pi lamaw kkilhtamaku niku lama tuku kaks malakawaninan?
¡LAMAW kkilhtamaku niku lama tuku kaks malakawaninan! Chali chali akxilhmaw la kgantaxtuma tuku xlichuwinanit Biblia pi xʼama la. Akgtum liʼakxilhtit, akxilhmaw pi «mapakgsina xalak norte» chu «mapakgsina xalak sur» latalatlawamakgo xlakata naʼakgchipakgo kakilhtamaku (Dan. 11:40, nota). Nachuna, tlakg talichuwinama xalaktlan tamakatsinin xla xTamapakgsin Dios chu lhuwa millón latamanin laksakmakgo naskujnanikgo Jehová (Is. 60:22; Mat. 24:14). Chu na makglhtinamaw lhuwa liwat xaʼespiritual «akxni xlilat» (Mat. 24:45-47).
2. ¿Tuku liwana katsiyaw, chu tuku ni katsiyaw?
2 Jehová chuntiya kinkamakgtayaman xlakata liwana naʼakgatekgsaw tuku nala nialh makgas (Prov. 4:18; Dan. 2:28). Liwana katsiyaw pi akxni natsuku lhuwa tapatin katsiyawa nawan putum tuku natalakaskin xlakata ni namakgxtakgaw Jehová chu la makxtum natawilayaw kʼuma xatuwa kilhtamaku. Pero na wi tuku ni katsiyaw nema nala kkilhtamaku nema aku mima. Kʼuma artículo, pulana nalichuwinanaw tuku xlakata lakgpaliw chuna la xʼakgatekgsaw makgapitsi tuku nala. Chu alistalh nalichuwinanaw makgapitsi tuku katsiyawa xlakata kilhtamaku nema aku mima chu tuku natlawa kinTlatkan xalak akgapun.
TUKU NI KATSIYAW
3. ¿Tuku xlakpuwanaw xapulana pi xʼama kaʼakgspula latamanin akxni xtsukulh lhuwa tapatin, chu tuku xlakata chuna xwanaw?
3 Makgasa xwanaw pi akxni xtsukulh lhuwa tapatin, Jehová nialh xʼama kamaxki talakaskin latamanin pi tlan xkanajlanikgolh chu xlakgtaxtukgolh kʼArmagedón. Chuna xwanaw xlakata xlakpuwanaw pi putum tuku lalh akxni milh Munkaklat xlimasiya tuku nala kkilhtamaku nema aku mima. Akgtum liʼakxilhtit, xwanaw pi chuna la Jehová malakchuwalh xmalakcha arca akxni nina xtsuku Munkaklat, nachuna xʼama tlawa akxni xtsukulh lhuwa tapatin; xlakpuwanaw pi Jehová nialhti xʼama maxki talakaskin pi tlan xlakgtaxtulh (Mat. 24:37-39).
4. ¿Tuku xlakata nialh lakpuwanaw pi putum tuku lalh kxkilhtamaku Noé ama kgantaxtu kkinkilhtamakujkan?
4 ¿Kililakpuwanatkan pi putum tuku kgantaxtulh akxni milh Munkaklat wi tuku xkilhchanima nema nakgantaxtu kkilhtamaku nema aku mima? a Nichuna, xlakata Biblia ni lichuwinan. Xlikana pi Jesús tamalakxtumilh kilhtamaku akxni xkinkatatawilan xtachuna la “xkilhtamaku Noé”. Pero ni xwamputun pi putum tuku lalh akxni milh Munkaklat, chuna la akxni Jehová malakchuwalh xmalakcha arca, wi tuku xkilhchanima nema xʼama kgantaxtu alistalh. Maski chuna, lhuwa tuku kinkamasiyaniyan tuku lalh akxni milh Munkaklat.
5. 1) ¿Tuku tlawalh Noé akxni nina xmin Munkaklat? (Hebreos 11:7; 1 Pedro 3:20). 2) Chuna la Noé, maski lu naliskujaw xlakata nakalitachuwinanaw Dios putum latamanin, ¿tuku nila katitlawaw?
5 Akxni Jehová makatsinilh Noé pi xʼama min Munkaklat, xla limasiyalh pi xkanajlani chu tsukulh tlawa arca (kalikgalhtawakga Hebreos 11:7; 1 Pedro 3:20). Xtachuna la Noé, latamanin tiku kgaxmatkgo xalaktlan tamakatsinin xla xTamapakgsin Dios xlimasiyatkan kxlatamatkan pi kgalhikgo takanajla (Hech. 3:17-20). Pedro wa pi Noé «xlichuwinan tuku xaʼakgstitum» (2 Ped. 2:5). Pero chuna la lichuwinaw kxapulana artículo xla uma revista, ni katsiyaw komo Noé kamakatsinilh putum latamanin tiku xlamakgo kxlikalanka Katiyatni pi xʼama min Munkaklat. La uku, akinin lu liskujaw nakalitachuwinanaw Dios putum latamanin tiku lamakgo kxlikalanka Katiyatni. Pero maski lu naliskujaw, nila katikalitachuwinankgow Dios putum tiku lamakgo kxlikalanka Katiyatni akxni nina min nawan lisputni. ¿Tuku xlakata chuna wanaw?
6, 7. ¿Tuku xlakata nila katikalitachuwinaw xtamakatsinin Dios putum latamanin akxni nina chin nawan lisputni?
6 Kalakapastakwi tuku wa Jesús xlakata asta niku xʼamaka lichuwinankan Dios. Wa pi xalaktlan tamakatsinin xʼamaka lichuwinankan «kxlilakgatum katiyatni» xlakata xmakatsininanka «kputum laklanka kachikinin» (Mat. 24:14). Chu umakgolh tachuwin tlakg kgantaxtuma la uku. Lichuwinanaw xTamapakgsin Dios kliwaka 1,000 tanu tanu tachuwin, chu xlakata kgalhiyaw kisitiojkan xla internet, jw.org, lhuwa latamanin tlan nalakgapaskgo xalaktlan tamakatsinin.
7 Pero Jesús na kawanilh kstalaninanin: «Xkgawasa chixku nachin, akxni nina lakgatsalakgoyatit nawan putum xkachikinin Israel». Uma wamputun pi nila xʼamakgo kalitachuwinankgo xatlan tamakatsinin putum latamanin akxni nina chin xwa Jesús (Mat. 10:23; 25:31-33). La uku, lhuwa millón latamanin lamakgolh niku ni mastakan talakaskin nalichuwinankan Dios. Nachuna, akgatunu minuto lakachinkgo lhuwa lakgskgatan. Wa xlakata, maski lu naliskujaw, nila katikalitachuwinankgow xalaktlan tamakatsinin putum latamanin kxliputum «laklanka kachikinin, laklanka familias, tiku chuwinankgo tipalhuwa tachuwin chu kachikinin» akxni nina chin nawan xlisputni uma kakilhtamaku (Apoc. 14:6).
8. ¿Tuku takgalhskinin max nalilakpuwanaw? (Na kaʼakxilhti dibujos).
8 Xlakata tuku lichuwinawa, max tlan xlakpuwaw: «¿Tuku nakaʼakgspula latamanin tiku ni katikgaxmatkgolh xalaktlan tamakatsinin akxni nina chin nawan lhuwa tapatin? ¿La nakalakputsananikgo Jehová chu Jesús?» (Juan 5:19, 22, 27; Hech. 17:31). Texto niku takilhtiya uma artículo kinkamalakapastakayan pi Jehová «ni lakaskin pi wi tiku namalakgsputukan, wata lakaskin pi putum latamanin kamakgxtakgkgolh tuku nitlan tlawamakgolh» (2 Ped. 3:9; 1 Tim. 2:4). Pero katsiyaw pi Jehová nina kinkawaninitan tuku nakatlawani umakgolh latamanin. Nachuna, ni lakgchan xafuerza nakinkawaniyan tuku natlawa.
¿Tuku nakaʼakgspula tiku nila nakalitachuwinankan xalaktlan tamakatsinin akxni nina tsuku nawan lhuwa tapatin? (Kaʼakxilhti párrafo 8). c
9. ¿Tuku kinkamasiyaninitan Jehová kxTachuwin?
9 Anta kxTachuwin, Jehová kinkamasiyaninitan makgapitsi tuku natlawa. Akgtum liʼakxilhtit, kinkawaniyan pi nakamalakastakwani tiku ni xaʼakgstitum, uma kakilhchanima tiku ni katsinikgolh xalaktlan tamakatsinin chu wa xlakata nila lakgpalikgolh xtayatkan (Hech. 24:15; Luc. 23:42, 43). Chu uma tlawa pi nalilakpuwanaw amakgapitsi xlakaskinka takgalhskinin.
10. ¿Tuku atanu takgalhskinin max xlilakpuwaw?
10 ¿Tuku nakaʼakgspula tiku nanikgo akxni lama nawan lhuwa tapatin? ¿Nialh katikamalakastakwanika? Biblia liwana wan pi tiku ni katilakastakwanankgolh wa tiku Jehová chu xʼángeles nakamalakgsputukgo kʼArmagedón xlakata talalakatawakakgolh (2 Tes. 1:6-10). ¿Chu tuku nawanaw xlakata tiku nanikgo akxni lama nawan lhuwa tapatin xlakata xtatatlakgo, wi tuku nitlan nakaʼakgspula o wi tiku nakamakgni? (Ecl. 9:11; Zac. 14:13). ¿Tlan nawanaw pi nalitaxtukgo tiku Biblia kalimapakuwi pi «ni xaʼakgstitum» chu nalakastakwanankgo kxasasti kakilhtamaku? Ni katsiyaw.
TUKU KATSIYAW
11. ¿Tuku naʼakxilha Jehová akxni nakalakputsanani chatunu latamanin kʼArmagedón?
11 Anan pulaklhuwa tuku katsiyaw xlakata tuku nala kkilhtamaku nema aku mima. Akgtum liʼakxilhtit, katsiyaw pi kʼArmagedón tuku naʼakxilhkan xlakata la nakalakputsananikan latamanin wa la kalikatsinikgolh xnatalan Cristo (Mat. 25:40). Tiku limasiyakgonita nawan pi kamakgtayakgo tiku xatalaksakni chu Cristo, nakaliʼakxilhkan la borregos. Na katsiyaw pi akxni natsuku lhuwa tapatin, makgapitsi xnatalan Cristo lamakgolhku nawan kKatiyatni chu nakalinkan kʼakgapun akxni atsinu tsankga natsuku Armagedón. Wa xlakata, akxni lamakgolhku nawan xatalaksakni unu kKatiyatni, max makgapitsi latamanin tiku tlan likatsikgo namakgtayanamputunkgo ktaskujut nema tlawamakgo tiku xatalaksakni (Mat. 25:31, 32; Apoc. 12:17). ¿Tuku xlakata lu xlakaskinka putum uma?
12, 13. ¿Tuku max natlawakgo makgapitsi latamanin akxni naʼakxilhkgo pi namalakgsputukan «xaLanka Babilonia»? (Na kaʼakxilhti dibujos).
12 Akxni tsukunita nawan lhuwa tapatin, max makgapitsi tiku naʼakxilhkgo la namalakgsputukan «xaLanka Babilonia» nalakapastakkgo pi xtatayananin Jehová akglhuwata kata makatsininankgonit pi chuna xʼama la. ¿Naʼanankgo latamanin tiku natatayaputunkgo Jehová? (Apoc. 17:5; Ezeq. 33:33).
13 Kalilakpuwaw tuku lalh kxkilhtamaku Moisés. Akxni israelitas taxtukgolh kʼEgipto, «lhuwa latamanin tiku tanu tanu xkilhtsukutkan» xwankgonit na katataxtukgolh (Éx. 12:38). Max makgapitsi tsukukgolh kanajlanikgo Jehová akxni akxilhkgolh pi pulakkaw plagas xkalakgchima chuna la xlichuwinanit Moisés. Komo chuna nala akxni masputukanita nawan xaLanka Babilonia, ¿nalisitsiyaw komo makgapitsi latamanin na nakakninaniputunkgo Jehová akxni nina chin nawan lisputni? ¡Nichuna! Akinin likatsiputunaw chuna la kinTlatkan xalak akgapun, «chatum Dios [tiku] xalakgalhamana chu tlan likatsi, xakgalhkgalhina chu litsama tapaxkit nema ni makgxtakgnan chu putum tuku wan xlikana» (Éx. 34:6). b
Makgapitsi tiku naʼakxilhkgo la namalakgsputukan «xaLanka Babilonia» nalakapastakkgo pi xtatayananin Jehová akglhuwata kata makatsininankgonit pi chuna xʼama la (Kaʼakxilhti párrafos 12 chu 13). d
14, 15. ¿Kuenta natlawa Jehová niku xlama chatum lataman o tuku kilhtamaku nilh xlakata nalaksaka komo namaxki latamat nema ni kgalhi xlisputni? Kalichuwinanti tuku xlakata (Salmo 33:4, 5).
14 Max kgaxmatnitaw tuku wankgo makgapitsi natalan xlakata xtalilakgapasnikan tiku ni xtatayananin Jehová litaxtukgo. Wankgo: «Tlan xwa komo xnilh akxni nina tsuku nawan lhuwa tapatin, xlakata chuna tlan xmalakastakwanika». Katsiyaw pi chuna wankgo xlakata kalilakgaputsakgo tiku xalak xfamiliajkan. Pero ni kalakpuwaw pi Jehová kuenta natlawa tuku kilhtamaku naniyaw xlakata nalaksaka komo nakinkamaxkiyan latamat nema ni kgalhi lisputni o ni. Jehová xatlan Juez, chu tuku laksaka putum kilhtamaku xaʼakgstitum (kalikgalhtawakga Salmo 33:4, 5). Liwana katsiyaw pi «Juez kxlikalanka katiyatni» natlawa tuku xaʼakgstitum (Gén. 18:25).
15 Jehová na ni kuenta katitlawalh niku lama chatum lataman xlakata nalaksaka komo namaxki latamat nema ni kgalhi lisputni o ni. Jehová ni chuna la «cabras» katikaliʼakxilhli lhuwa millón latamanin kaj xlakata lamakgo niku nikxni lichuwinanka xatlan tamakatsinin xla Tamapakgsin (Mat. 25:46). Akinin kalilakgaputsayaw umakgolh latamanin, wa xlakata katsiyaw pi «Juez kxlikalanka katiyatni» tlakg kalilakgaputsa. Ni liwana katsiyaw putum tuku natlawa Jehová akxni lama nawan lhuwa tapatin. Max makgapitsi latamanin nakamaxkikan talakaskin nalakgapaskgo Jehová chu nakanajlanikgo akxni natasantujtlawa xtukuwani kxlikalanka Katiyatni (Ezeq. 38:16).
Akxni tsukunita nawan lhuwa tapatin, ¿naʼanankgo latamanin tiku natatayaputunkgo Jehová?
16. ¿Tuku katsiyaw xlakata Jehová? (Na kaʼakxilhti dibujo).
16 Biblia kinkamasiyaninitan pi Jehová lanka xtapalh liʼakxilha latamat. Makamastalh xKgawasa kimpalakatakan xlakata tlan xmakglhtinaw latamat nema ni kgalhi xlisputni (Juan 3:16). Kimputumkan akxilhnitaw kkilatamatkan la Jehová kinkalimasiyaniyan talakgalhaman chu tapaxkit (Is. 49:15). Liwana kinkalakgapasan chu asta lakgapasa kintukuwanikan. Wa xlakata, maski naniyaw, tlan nakinkatlawaparayan chuna la xtasiyayaw chu la xlikatsiyaw (Mat. 10:29-31). Anan pulaklhuwa tuku xlakata lipawanaw pi kinTlatkan xalak akgapun, tiku lu xaskgalala, xaʼakgstitum chu xalakgalhamana, nakalakputsanani latamanin chuna la xlilat (Sant. 2:13).
Liwana katsiyaw pi Jehová liwana nakalakputsanani chatunu latamanin xlakata xla lu xaskgalala, xaʼakgstitum chu lu xalakgalhamanina (Kaʼakxilhti párrafo 16).
17. ¿Tuku nalichuwinanaw kʼatanu artículo?
17 Xlakata tuku katsininitaw kʼuma artículo, akgatekgsaw pi tlakg xlakaskinka nalichuwinanaw xtachuwin Dios. ¿Tuku xlakata chuna wanaw? Chu ¿tuku nakinkamakgpuwantiniyan chuntiya nalichuwinanaw xalaktlan tamakatsinin? Atanu artículo nalichuwinan xtakgalhtin umakgolh takgalhskinin.
TAKILHTLIN 76 Kakiwani tuku makgkatsiya
a Anta kʼartículo «Jehová lakgati masiya chuna la ni tuwa akgatekgskan», nema min krevista Makatsinina 15 xla marzo kata 2015 páginas 3 asta 8, tlakg lichuwinankan tuku xlakata wanaw pi makgapitsi tuku lalh makgasa ni kaj wi tuku kilhchanima nema nakgantaxtu kkinkilhtamakujkan o kkilhtamaku nema aku mima.
b Akxni masputukanita nawan xaLanka Babilonia, Gog xalak Magog nakaputsastalani xlakskujnin Dios, chu anta naliʼakxilhkan komo namakgxtakgkgo Dios o ni. Na nakaputsastalanikan putum tiku nalaksakkgo namakgtapakgsikgo kxkachikin Dios akxni malakgsputukanita nawan xaLanka Babilonia.
c TUKU TASIYA KDIBUJO: Pulaktutu niku tasiya tuku xlakata nila katikalitachuwinankgow xtachuwin Dios putum latamanin: 1) chatum puskat lama niku putum latamanin kgalhikgo xtakanajlakan chu kalipekua kitaxtu ankan lichuwinankan Dios; 2) akgtum tamakgaxtokgat lamakgo niku mapakgsinanin ni mastakgo talakaskin nalichuwinankan Dios chu kalipekua kitaxtu ankan lichuwinankan Dios; 3) chatum chixku lama niku nila kichankan chu lu lakgamakgat.
d TUKU TASIYA KDIBUJO: Chatum tsumat tiku xmakgxtakgnit xaxlikana lakapastaka pi xkatsininit pi xʼamaka malakgsputukan «xaLanka Babilonia». Laksaka natatayapara Jehová chu kalakgtaspita xnatlatni, tiku xtatayananin Jehová litaxtukgo. Komo wi tiku chuna natlawa, limasiyaniputunaw talakgalhaman chu tapatiputunaw chuna la tlawa kinTlatkan xalak akgapun chu lu nalipaxuwayaw pi chatum makglakgalhina nalakgtaspita Jehová.
