ARTÍCULO NEMA NATALIKGALHTAWAKGA 21
TAKILHTLIN 107 Dios kinkamasiyaniyan nalapaxkiyaw
¿Tuku namakgtayayan nakatsiya tiku tlan natatamakgaxtokga?
«Chatum puskat tiku kgalhi lakwan tayat, ¿tiku tlan natekgsa? Tlakg lhuwa xtapalh nixawa corales» (PROV. 31:10).
TUKU NAʼAKXILHAW
Kʼuma artículo naʼakxilhaw makgapitsi tastakyaw xalak Biblia nema nakamakgtaya tiku tamakgaxtokgputunkgo xlakata natekgskgo tiku tlan natatamakgaxtokgkgo. Chu naʼakxilhaw makgpitsi tastakyaw nema nakamakgtaya amakgapitsin natalan xlakata nakamakgtayakgo tiku tamakgaxtokgputunkgo.
1, 2. 1) Komo chatum tala tamakgaxtokgputun, ¿tuku pulana xliʼakxilhat? 2) ¿Tuku kilhchanima akxni wanaw pi chatiy natalan lalakgapasmakgo? (Kaʼakxilhti nota «Tuku lu xlakaskinka»).
¿TAMAKGAXTOKGPUTUNA? Maski ni talakaskin natamakgaxtokga xlakata napaxuwaya, lhuwa natalan tiku tanu tanu xkatakan tamakgaxtokgputunkgo. Komo wix tamakgaxtokgputuna, pulana miliʼakxilhat komo tliwakga wi mintakanajla, komo miʼakstu lakgapaskana chu komo tlan namaxkiya tuku maklakaskin tiku natatamakgaxtokga (1 Cor. 7:36). a Komo chuna natlawaya, mintamakgaxtokgat tapaxuwan natawila.
2 Pero natekgsa tiku tlan natatamakgaxtokga, tsinu tuwa (Prov. 31:10). Asta akxni lakpuwana pi tekgsnitata tiku tlakg lakgapasputuna, tuwa kitaxtu natsukuyatit lalakgapasatit. b Kʼuma artículo na’akxilhaw tuku tlan namakgtaya chatum tala xlakata natekgsa tiku tlan natsuku talalakgapasa. Na nalichuwinanaw tuku tlan natlawakgo amakgapitsin natalan xlakata tlan nakamakgtayakgo tiku tamakgaxtokgputunkgo.
¿TUKU KUENTA MILITLAWAT AKXNI NAPUTSAYA TIKU TLAN NATATAMAKGAXTOKGA?
3. ¿Tuku pulana kuenta militlawat komo tamakgaxtokgputuna?
3 Komo wix tamakgaxtokgputuna, lu xlakaskinka pi pulana nalilakpuwana tuku tayat lakaskina pi xkgalhilh tiku tatamakgaxtokgputuna. Komo nichuna xtlawa, max ni kuenta xtlawani chatum tala tiku kgalhi laktlan tayat nema wix putsapat o max wa xtsuku talalakgapasa tiku ni kgalhi tayat nema wix maklakaskina. Pulaktum tuku lu xlakaskinka wa pi xtatayana Jehová xliwanat (1 Cor. 7:39). Pero uma ni wamputun pi putum tiku tamununita tlan natsukuya talalakgapasa xlakata natatamakgaxtokga. Pulana mililakpuwanat: «¿Tuku kmakgantaxtiputun kkilatamat? ¿Tuku tayat xlikgalhit tiku ktatamakgaxtokgputun? ¿Kmalakatsali chuna la klakaskin pi xlikatsilh?».
4. ¿Tuku wankgo kxʼoracioneskan makgapitsi natalan tiku nina tamakgaxtokgkgo?
4 Komo tamakgaxtokgputuna, max tlawaninitata oración Jehová chu waninita tuku makgkatsiya (Filip. 4:6). Kalakapastakti pi Jehová ni malaknunit pi namaxkiyan tiku natatamakgaxtokga. Pero xla lilakgaputsa tuku makgkatsiya chu tuku maklakaskina, chu tlan namakgtayayan natekgsa tiku tlan natatamakgaxtokga. Wa xlakata, chuntiya kawani tuku lakaskina chu tuku makgkatsiya (Sal. 62:8). Kaskini pi kamaxkin liskgalala chu kamakgtayan nakgalhkgalhinana (Sant. 1:5). John, c chatum tala xalak Estados Unidos tiku nina makgaxtokga kinkawaniyan tuku wani Jehová akxni tlawani oración: «Klitachuwinan Jehová tuku tayat klakaskin pi xkgalhilh tiku ktatamakgaxtokgputun. Kskini pi kakimakgtayalh naklakgapasa chatum tala. Chu na kskini pi kakimakgtayalh nakkgalhi laktlan tayat xlakata tlan chixku naklitaxtu». Chatum tala tsumat xalak Sri Lanka tiku wanikan Tanya, kinkawaniyan: «Xlakata nina ktekgsa tiku tlan naktatamakgaxtokga, kskini Jehová pi kakimakgtayalh ni nakmakgatsankganani chu chuntiya nakpaxuwa». ¿Chu komo titaxtulha kilhtamaku chu nina tekgsa tiku tlan natatamakgaxtokga? Maski chuna nala, Jehová malaknuniyan pi namaxkiyan putum tuku maklakaskina chu namakgtayayan napaxuwaya (Sal. 55:22).
5. ¿Tuku namakgtayayan nakalakgapasa natalan tiku paxkikgo Jehová? (1 Corintios 15:58; na kaʼakxilhti dibujo).
5 Biblia kinkamakgpuwantiniyan pi lu kaliskujwi natlawayaw “xtaskujut Malana” (kalikgalhtawakga 1 Corintios 15:58). Komo chuna natlawaya, tlakg lhuwa kilhtamaku akxtum nakatatawilaya natalan laktsuman chu natalan lakgkgawasan. Chuna ni kajwatiya tlan katikatekgsti laktlan amigos, wata na nakalakgapasa natalan tiku nina makgaxtokgkgo tiku na lu palha skujnanimakgo Jehová. Nachuna, komo wa lu liskujpat nawan namakgapaxuwaya Jehová, lu napaxuwaya.
Komo lu naskujnaniya Jehová nakalakgapasa lhuwa natalan, chu makgapitsi tiku nakalakgapasa max na tamakgaxtokgputunkgo (Kaʼakxilhti párrafo 5).
6. ¿Tuku mililakapastakat komo putsapat tiku natatamakgaxtokga?
6 Pero kalakapastakti, ni wa tlakg xlakaskinka kaliʼakxilhti naputsaya tiku natatamakgaxtokga (Filip. 1:10). Tuku xlikana kinkamakgapaxuwayan wa pi xʼamigos Jehová litaxtuyaw chu ni wa komo tamakgaxtokgnitaw o ni (Mat. 5:3). Nachuna, xlakata nina makgaxtokga, tlakg kgalhiya kilhtamaku xlakata tlakg naskujnaniya Jehová (1 Cor. 7:32, 33). Wa xlakata, liwana kamaklakaskinti uma kilhtamaku akxni nina makgaxtokga. Jessica, tiku xalak Estados Unidos chu tamakgaxtokgli akxni atsinu xtsankga namakgatsi 40 kata, wan: «Maski xaktamakgaxtokgputun, tuku kimakgtayalh ankgalhin nakpaxuwa wa pi lu xakliskuja naklichuwinan Dios».
PULANA KAʼAKXILHTI LA LIKATSI
7. ¿Tuku xlakata lu xlakaskinka pi pulana naʼakxilha la likatsi tiku tlakg lakgapasputuna? (Proverbios 13:16).
7 ¿Chu komo tekgsnitata chatum tala tiku lakpuwana pi tlan xtatamakgaxtokgti? ¿Tunkun miliwanit tuku makgkatsiya? Biblia masiya pi tiku xaskgalala ni lakapala tuku tlawa, wata pulana akxilha (kalikgalhtawakga Proverbios 13:16). Wa xlakata, pulana mili’akxilhat la likatsi akxni nina waniya tuku makgkatsiya, pero kuenta katlawa ni nalimasiyaya pi akxilhpat xtayat. Chatum tala xalak Países Bajos tiku wanikan Albert, wan: «Tuku makgkatsiyaw tlan kaj lakapala nalakgsputa. Wa xlakata tlakg tlan komo nalimaxtuya kilhtamaku xlakata naʼakxilha la likatsi tiku lakgapasputuna chu ni tunkun nawaniya tuku makgkatsiya». Nachuna, akxni pulana naʼakxilha la likatsi, max naʼakxilha pi ni wa tiku tatamakgaxtokgputuna.
8. Komo tekgsnitata chatum tala tiku lakpuwana pi tlan xtatamakgaxtokgti, ¿tuku tlan natlawaya xlakata naʼakxilha la likatsi? (Na kaʼakxilhti dibujo).
8 Max lakpuwampat: «¿Chu la naktlawa xlakata nakakxilha xtayat pero ni naklimasiya pi klakgati?». Akgtum liʼakxilhtit, anta kPukgalhtawakga o akxni akxtum katawilatit amakgapitsin natalan max tlan naʼakxilha la likatsi, tuku tlawa o asta la wi xtakanajla. Kalilakpuwanti: «¿Tiku xʼamigos litaxtukgo? ¿Tuku lakgati lichuwinan? (Luc. 6:45). ¿Lakgchamputun tuku akit na klakgchamputun?». Max tlan nakatachuwinana lakgkgolotsin xalak xcongregación o atanu natalan tiku liwana lakgapaskgo xlakata nawanikgoyan la likatsi (Prov. 20:18). Tlan nakakgalhskina tuku wankgo amakgapitsin xpalakata chu tuku tayat kgalhi (Rut 2:11). Pero akxni akxilhpat nawan uma tala, kuenta katlawa xlakata nitu natlawaya tuku nitlan namamakgkatsini. Kalilakpuwanti tuku makgkatsi, ni kamakgtanuputu putum tuku xla tlawa chu ni lu kamakgtanuputu kxlatamat.
Akxni nina waniya chatum tala tuku makgkatsiya, pulana kalimaxtu kilhtamaku xlakata naʼakxilha la likatsi (Kaʼakxilhti párrafos 7 chu 8).
9. Komo waniputuna chatum tala pi tlakg lakgapasputuna, ¿tuku pulana liwana milikatsit?
9 ¿Pero la xlilhuwa kilhtamaku natitaxtu xlakata tlan nawaniya pi tlakg lakgapasputuna? Komo tunkun nawaniya tuku makgkatsiya, max nalakpuwan pi ni pulana lilakpuwana tuku tlawaya (Prov. 29:20). Pero komo tala naʼakxilha pi lakgatiya pero titaxtu lhuwa kilhtamaku chu wix nitu waniya, max nalakpuwan pi ni liwana katsiya tuku lakaskina (Ecl. 11:4). Kalakapastakti pi ni talakaskin liwana nakatsiya pi wa natatamakgaxtokga xlakata tlan nawaniya pi tlakg lakgapasputuna. Pero liwana milikatsit komo tlantiya natamakgaxtokga chu pi tala tiku tlakg lakgapasputuna wa tiku max tlan xtatamakgaxtokgti.
10. ¿Tuku militlawat komo naʼakxilha pi wi tiku tlakg lakgapasputunan pero wix nichuna lakpuwaniya?
10 ¿Chu tuku militlawat komo naʼakxilha pi wi tiku tlakg lakgapasputunan? Komo wix nichuna lakpuwaniya, kalimasiyani pi wix ni lakgatiya. Ni xlilat namalakpuwaniya pi na lakgapasputuna komo nichuna makgkatsiya (1 Cor. 10:24; Efes. 4:25).
11. ¿Tuku kuenta xlitlawatkan tiku lamakgo kʼakgtum kachikin niku anan talismanin nema lichuwinankan kpárrafo?
11 Kmakgapitsi kachikinin lismanikan pi xnatlatni o atanu xtalilakgapasni kgawasa o tsumat naputsanikgo tiku natatamakgaxtokga. Kʼamakgapitsi kachikinin, xfamilia o xʼamigos chatum kgawasa o tsumat, wa tiku putsanikgo tiku natatamakgaxtokga chu alistalh lakkaxwilikgo pi tlakg nalalakgapaskgo chu naʼakxilhkgo komo tlan natamakgaxtokgkgo. Komo chatum tala nakinkaskiniyan pi kamakgtayaw, kalilakpuwaw tuku lakgati chu tuku maklakaskin uma tala chu tiku tlan xtatamakgaxtokgli. Komo lakpuwanaw pi tekgsnitaw chatum tala tiku tlan natatamakgaxtokga kiʼamigojkan o kintalilakgapasnikan, kaliskujwi xlakata nalakgapasaw la likatsi uma tala, tuku tayat kgalhi chu, tuku tlakg xlakaskinka, kaʼakxilhwi la wi xtakanajla. Xtakanajla wa tuku tlakg xlakaskinka nixawa tumin chu la xlilhuwa kgalhtawakganit. Pero kalakapastakwi pi tiku nalaksaka komo natamakgaxtokga o ni, wa tala tiku makgtayamaw (Gál. 6:5).
¿LA TLAN NAWANIYA TUKU MAKGKATSIYA?
12. Komo wi tiku tlakg lakgapasputuna, ¿la tlan nawaniya tuku makgkatsiya?
12 Komo wix tlakg lakgapasputuna chatum tala, ¿la tlan nawaniya tuku makgkatsiya? d Max tlan pulana natachuwinana, max kteléfono, kvideollamada o niku wilakgo amakgapitsin. Liwana kawani tuku makgkatsiya chu pi tlakg lakgapasputuna (1 Cor. 14:9). Komo nawaniyan pi talakaskin nalilakpuwan, kamaxki kilhtamaku (Prov. 15:28). Chu komo nawaniyan pi xla ni lakpuwan chuna la wix, ni kalisitsi chu ni fuerza kawani pi kalakgpalilh tuku lakpuwan.
13. ¿Tuku tlan natlawaya komo wi tiku nawaniyan pi tlakg lakgapasputunan? (Colosenses 4:6).
13 ¿Chu tuku tlan natlawaya komo wi tiku nawaniyan pi tlakg lakgapasputunan? Tlan kalikatsini chu kamaxki kakni, xlakata talakaskilh ni xpekualh xlakata xwanin tuku makgkatsi (kalikgalhtawakga Colosenses 4:6). Komo maklakaskina kilhtamaku xlakata nalilakpuwana tuku nakgalhtiya, kawani. Pero ni lu kamakgapala (Prov. 13:12). Komo wix nichuna lakpuwaniya, liwana kawani pero kamaklakaskinti laktsatata tachuwin. Chatum tala kgawasa xalak Austria tiku wanikan Hans, kinkawaniyan tuku tlawalh akxni chatum tala tsumat wanilh pi tlakg xlakgapasputun: «Liwana kwanilh pi akit ni chuna xaklakpuwani. Tunkun chuna kwanilh xlakata ni xlakpuwa pi na xaklakgapasputun. Chu wa xlakata na kuenta ktlawalh la xaklikatsini». Pero komo wix na tlakg lakgapasputuna tala tiku tachuwinaman, kawani tuku makgkatsiya chu tuku natlawayatit xlakata tlan liwana nalalakgapasatit. Kalakapastaktit pi xlakata tanu tanu la kamakgastakkantit chu tanu tanu mintalismaninkan, ni watiya tuku kgalhkgalhiyatit pi natlawa achatum.
¿LA TLAN NAKAMAKGTAYAYAW TIKU TAMAKGAXTOKGPUTUNKGO?
14. Komo kamakgtayaputunaw tiku nina makgaxtokgkgo, ¿tuku tlan natlawayaw?
14 ¿Tuku tlan natlawayaw kimputumkan xlakata tlan nakamakgtayayaw natalan tiku nina makgaxtokgkgo? Pulana, kuenta kilitlawatkan tuku wanaw (Efes. 4:29). Kalilakpuwaw: «¿Min kilhtamaku kkalikgalhkgamanan tiku nina tamakgaxtokgkgo? Akxni kakxilha pi chatum tala kgawasa chu chatum tsumat kgalhchuwinamakgo, ¿tunkun klakpuwan pi lalakgatikgo?» (1 Tim. 5:13). Nachuna, nikxni kamalakpuwaniw chatum tala pi wi tuku tsankgani kaj xlakata nina makgaxtokga. Hans, tiku lichuwinaw kpárrafo 13, wan: «Makgapitsi natalan wankgo: “¿Tuku xlakata nina tamakgaxtokga? Kgalhiyata minkata, nialh katitekgsti tiku tlan natatamakgaxtokga”. Umakgolh tachuwin kinkamamakgkatsiniyan pi ni xtapalh klitaxtuyaw tiku nina ktamakgaxtokgaw chu kinkamafuerzajliniyan xlakata naktamakgaxtokgputunaw». Tlakg tlan nawan pi nakawaniyaw tuku nakamakgpuwantini (1 Tes. 5:11).
15. 1) Chuna la wan Romanos 15:2, ¿tuku kilitlawatkan komo wi tiku makgtayaputunaw xlakata natekgsa tiku natatamakgaxtokga? (Na kaʼakxilhti dibujo). 2) ¿Tuku akxilhti kvideo nema lu namakgtayayan? (Kaʼakxilhti nota).
15 ¿Chu komo xlakpuwaw pi chatum kgawasa chu chatum tsumat tlan xtamakgaxtokgkgolh? Biblia kinkawaniyan pi kuenta kilitlawatkan tuku makgkatsikgo amakgapitsin (kalikgalhtawakga Romanos 15:2). Lhuwa natalan ni lakgatikgo pi nakawanikan tiku tlan xtatamakgaxtokgkgolh, chu talakaskin namaxkiyaw kakni tuku lakpuwankgo (2 Tes. 3:11). Amakgapitsin lakaskinkgo pi nakamakgtayayaw, pero kajwatiya chuna natlawayaw komo xlakan nakinkaskinikgoyan (Prov. 3:27). e Chu amakgapitsin lakaskinkgo pi kaj tsinu nakamakgtayayaw. Chatum tala tsumat xalak Alemania tiku wanikan Lydia, wan: «Akxni wi tuku nakatatlawaya natalan, na kaka’invitarli uma kgawasa chu uma tsumat, chu xlakan naʼakxilhkgo komo tlakg nalalakgapasputunkgo».
Akxni anan akgtum paskua o taway, tiku nina tamakgaxtokgkgo tlan nakalakgapaskgo chu nakatachuwinankgo amakgapitsin natalan (Kaʼakxilhti párrafo 15).
16. ¿Tuku xlilakapastakatkan tiku nina tamakgaxtokgkgo?
16 Komo tamakgaxtokgnitawa o nina, kimputumkan tlan napaxuwayaw (Sal. 128:1). Wa xlakata, komo tamakgaxtokgputuna pero nina tekgsa chatum tala tiku tlan xtatamakgaxtokgti, chuntiya lu kaskujnani Jehová. Chatum tala tsumat xalak Macao tiku wanikan Sin Yi, wan: «Kilhtamaku akxni nina tamakgaxtokgaw ni lhuwa nixawa kilhtamaku akxni akxtum natatawilayaw anta kParaíso tiku natatamakgaxtokgaw. Wa xlakata la uku, komo nina tamakgaxtokga, kalipaxuwa uma kilhtamaku chu lhuwa tuku katlawa». Pero ¿chu komo tekgsnitata chatum tala chu lalakgapaspatita? Kʼatanu artículo nalichuwinanaw tuku tlan natlawakgo tiku lalakgapasmakgo xlakata tlan tuku nalaksakkgo.
TAKILHTLIN 137 ¡Lakpuskatin tiku ni makgxtakgnankgo!
a Lu nalitamakgatayaya komo nalikgalhtawakgaya artículo «Ser novios. Parte 1: ¿Estoy listo para salir con alguien?» nema min kjw.org.
b TUKU LU XLAKASKINKA: Kʼuma artículo chu kʼatanu artículo, akxni nalichuwinanaw pi chatiy natalan lalakgapasmakgo, lichuwinamaw akxni chatum tala kgawasa chu chatum tala tsumat tlakg lalakgapasmakgo xlakata na’akxilhkgo komo tlan natamakgaxtokgkgo. Uma tsuku akxni chatum tala kgawasa chu chatum tala tsumat liwana lawanikgo chu liwana lalimasiyanikgo pi lalakgati chu tlakg lalakgapasputunkgo, chu kgalhsputa asta akxni laksakkgo komo natamakgaxtokgkgo o ni. Kʼalakatunu kachikinin na wankan kgalhikan litatawilat o liʼit, laxakgatlikan, kgalhikan taskin o kgalhikan skinina.
c Makgapitsi tukuwani kalakgpalikanit.
d Kmakgapitsi kachikinin, talismani pi wa kgawasa tiku tachuwinan tsumat xlakata nawani pi tlakg lakgapasputun. Pero nitu wamputun komo wa tala tsumat nawani kgawasa tuku makgkatsi (Rut 3:1-13). Natekgsa tuku tlakg namakgtayayan kʼartículo «Los jóvenes preguntan... ¿Cómo le digo lo que siento por él?», nema taxtulh krevista ¡Despertad! 22 xla octubre kata 2004.
e Kaʼakxilhti video Lu kuentajtlawakgo xtakanajlakan… Tiku nina makgaxtokgkgo kjw.org.