¿Kimputatsekgnikan limaxtuyaw Jehová?
«Kintikukan Dios, nakalakgmaxtuni xlistaknikan ixtasakua; wakg ti talipawan y tamakgskin kakamatsankgenanilh ni ama kamaxokgoni ixtalakgalhinkan» (SAL. 34:22, Salmos Ixtatlincan Ti Talipawan Dios, SXP).
TAKILHTLIN: 49, 32
1. ¿La makgkatsikgo lhuwa xlakskujnin Jehová xlakata talakgalhin?
AKGTUM kilhtamaku, apóstol Pablo lu xtaxlajwaninit chu wa: «¡Kgoxota chixku akit!» (Rom. 7:24). La uku kilhtamaku, lhuwa xlakskujnin Dios chuna makgkatsikgo la Pablo. Maski akinin kstalaninanin Cristo liskujaw xlakata namakgapaxuwayaw Jehová, kimputumkan tlawayaw talakgalhin xlakata kinkamatitaxtinikanitan talakgalhin. Chu makgapitsi tiku tlawakgonit lanka talakgalhin lakpuwankgo pi Jehová nikxni katikatapatilh.
2. 1) Chuna la wan Salmo 34:22, ¿tuku xlakata nitlan komo nalakpuwankgo xlakskujnin Dios pi ni katikatapatika? 2) ¿Tuku nalichuwinanaw kʼuma artículo? (Kaʼakxilhti recuadro « ¿Tuku kinkamasiyaniyan o tuku kilhchanima tuku xwankanit pi xʼama la?»).
2 Biblia kinkawaniyan pi tiku litatsekgkgo Jehová, nitlan komo nalakpuwankgo pi Jehová ni katikatapatilh (kalikgalhtawakga Salmo 34:22). ¿Tuku kilhchanima litatsekgkan Jehová? ¿Tuku kilitlawatkan xlakata Jehová nakinkalakgalhamanan chu nakinkatapatiyan? Nakgalhtiyaw umakgolh takgalhskinin akxni nalichuwinanaw tuku xlitaxtu chu tuku xlimaklakaskinkan kachikinin niku tlan xtatsekgkan nema xlichuwinan Limapakgsin kxamakgan Israel. Xlikana pi uma talakkaxlan xla Limapakgsin atanu xlakgxokgo tawi kpaskua xla Pentecostés kata 33. Pero kalakapastakwi pi wa Jehová tiku mastalh Limapakgsin. Wa xlakata tuku xlichuwinan kachikinin niku tlan xtatsekgkan kinkamasiyaniyan tuku lakpuwan Jehová xlakata talakgalhin, tiku tlawanit talakgalhin chu tiku nitlan limakgkatsi tuku tlawanit. Pulana kalichuwinaw tuku xlakata xwilakgolh uma kachikinin chu la xkamaklakaskinkan.
«KAMASTATIT KACHIKININ NIKU TLAN TATSEKGKAN»
3. ¿Tuku xkatlawanikan kʼIsrael tiku xmakgninankgo?
3 Jehová lu nitlan xʼakxilha pi chatum israelita namakgni chatum lataman. Komo chuna xla, chatum xalak xfamilia tiku makgnika tiku xlilakgapaskan «malakgaxokgena» wa tiku tlan namakgni tiku makgninalh (Núm. 35:19). Tiku makgninalh chuna xlilakgaxokgo xlatamat xlakata makgnilh tiku nitu xtlawanit tuku nitlan. Malakgaxokgena lakapala wi tuku xlitlawat xwanit xlakata ni kxkajwalh Tiyat nema xkamalaknunikanit, xlakata Jehová xlichuwinanit pi namakgniya chatum lataman «maxkajwi katiyatni». Chu xlimapakgsinanit: «Ni namaxkajwiyatit katiyatni niku wixinan lapatit» (Núm. 35:33, 34).
4. ¿Tuku xla akxni chatum israelita wi tiku xmakgni pero ni chuna xtlawaputun?
4 ¿Tuku xla akxni chatum israelita wi tiku xmakgni pero ni chuna xtlawaputun? Maski chuna, tiku xmakgninan xlin kuenta xlakata makgnilh tiku nitu xtlawanit tuku nitlan (Gén. 9:5). Pero xlakata nichuna xtlawaputun, Jehová xmasta talakaskin pi nalimasiyanikan talakgalhaman. Makgnina tlan xtsala kʼakgtum kachikin niku tlan xtatsekgkan, niku tlan xtatsekgnilh malakgaxokgena. Pero nila xtaxtuyacha kʼama kachikin asta akxni xnilh xapuxku sacerdote (Núm. 35:15, 28).
5. ¿La kinkamakgtayayan uma kachikinin niku tlan tatsekgkan tlakg liwana naʼakgatekgsniyaw Jehová?
5 Jehová wanilh Josué pi xlaksakli ama kachikinin chu wanilh: «Kamastatit kachikinin niku tlan tatsekgkan». Wa Dios tiku limapakgsinalh pi umakgolh kachikinin putatsekgni xlimaxtuka, wamputun pi xasanto xlitaxtulh (Jos. 20:1, 2, 7, 8). Wa xlakata tlan natakgalhskinaw: «¿La kinkamakgtayayan uma kachikinin niku tlan tatsekgkan tlakg liwana naʼakgatekgsaw xtalakgalhaman Dios? ¿Chu la kinkamakgtayayan la uku nalitatsekgaw Jehová?».
TIKU MAKGNINAN XTALAKASKIN «NAKATACHUWINAN LAKGKGOLOTSIN»
6, 7. 1) ¿Tuku xlitlawatkan xwanit lakgkgolotsin akxni xmakgninan chatum tiku nichuna xtlawaputun? (Kaʼakxilhti xapulana dibujo). 2) ¿Tuku xlakata makgnina tlan xkitaxtunilh komo xkatachuwinalh lakgkgolotsin?
6 Akxni chatum israelita wi tiku xmakgni pero nichuna xtlawaputun, xtalakaskin pi xʼalh kʼakgtum kachikin niku tlan tatsekgkan chu xlichuwinalh tuku xtitaxtuma anta xmalakgacha kachikin xlakata «nakatachuwinan lakgkgolotsin». Xtalakaskin pi tlan xmakgamakglhtinankgolh (Jos. 20:4). Alistalh xtalakaskin pi xmaspitparaka niku xmakgninanit xlakata nalakputsananikgo lakgkgolotsin xalak ama kachikin (kalikgalhtawakga Números 35:24, 25). Komo xlakan xʼakxilhkgo pi uma tiku xmakgninanit nichuna xtlawaputun, xmaxkikgo talakaskin nataspitpara kkachikin niku tlan tatsekgkan.
7 ¿Tuku xlakata xtalakaskin pi tiku makgninalh nakatachuwinan lakgkgolotsin? Xlakata skulunku xtawilalh congregación xalak Israel chu xlakata tiku xmakgninanit xlitamakgtayalh xtalakgalhaman Jehová. Chatum tiku lu likgalhtawakga Biblia lichuwinalh pi tlan xmakgnika tiku makgninalh komo ni xkatachuwinalh lakgkgolotsin. Chu alistalh wampa: «Wa xlin kuenta xlakata xmakgnika, xlakata ni litamakgtayalh tuku Dios xlakkaxwilinit xlakata ni namakgnikan». Uma makgnina tiku ni xlakpuwanit pi namakgninan, xkgalhi tamakgtay xlakata nitu natlawanikan, pero xtalakaskin xputsalh chu xmakgamakglhtinalh. Komo ni xtatsekgli kʼuma
kachikinin, max tiku xmalakgaxokgenan tlan xmakgnilh.8, 9. ¿Tuku xlakata kstalanina Cristo tiku tlawanit talakgalhin xliskinit tamakgtay lakgkgolotsin?
8 La uku kstalanina Cristo tiku tlawanit lanka talakgalhin talakaskin naputsa xtamakgtay lakgkgolotsin. ¿Tuku xlakata lu xlakaskinka chuna natlawa? Pulana, xlakata wa Jehová tiku chuna wan kxTachuwin pi lakgkgolotsin nalakkaxtlawakgo laklanka talakgalhin (Sant. 5:14-16). Xlipulaktiy, xlakata lakgkgolotsin wilakgolh xlakata nakamakgtayakgo tiku tlawakgonit talakgalhin xlakata tlan natalalimparakgo Dios chu nialh natlawakgo talakgalhin (Gál. 6:1; Heb. 12:11). Chu xlipulaktutu, xlakata lakgkgolotsin kalaksakkan chu kawanikan la nakamakgtayakgo chu tlan nakamamakgkatsinikgo tiku tlawakgonit talakgalhin. Jehová tamalakxtumi lakgkgolotsin la akgtum «litatsekgni akxni lipekua senan» (Is. 32:1, 2). ¿Ni xlikana pi putum uma limasiya xtalakgalhaman Dios?
9 Lhuwa xlakskujnin Dios tlan makgkatsikgonit akxni katachuwinankgonit lakgkgolotsin chu kamakgtayakanit. Akgtum liʼakxilhtit, chatum tala wanikan Daniel tlawalh akgtum lanka talakgalhin, pero akglhuwa papaʼ titaxtulh chu ni xkawaniputun lakgkgolotsin. Xla lichuwinan: «Xlakata lhuwata kilhtamaku xtitaxtunit xaklakpuwan pi xlakan nialh la tuku xtlawakgolh kimpalakata». Daniel ankgalhin xpekuan komo wi tiku xkatsilh tuku nitlan xtlawanit. Chu akxni xtlawa oración, xmakgkatsi pi pulana kskinilh Jehová pi xtapatilh. Pero alistalh putsalh xtamakgtay lakgkgolotsin. Akxni lakapastaka tuku lanit, lichuwinan: «Xakpekuan akxni xaklakpuwan la nakkatachuwinan lakgkgolotsin. Pero akxni kkatachuwinalh tlan kmakgkatsilh. La uku kmakgkatsi pi tlan ktlawani oración Jehová». La uku Daniel nitu lilakgaputsa kxtalakapastakni chu nina makgas ministerial litaxtulh.
«TLAN NATSALA KʼUMA KACHIKIN CHU ANTA NATAMAKGXTAKGA»
10. ¿Tuku xlitlawat xwanit tiku makgninalh komo xlakaskin pi xlimasiyanika talakgalhaman?
10 Komo tiku makgninalh xlakaskin pi xlimasiyanika talakgalhaman, xtalakaskin lakapala tuku xtlawalh chu xtsalalh kʼakgtum kachikin xla putatsekgni nema tlakg lakatsu xwi (kalikgalhtawakga Josué 20:4). Komo xlakgmaxtuputun xlatamat xtalakaskin pi lakapala xchalh kʼama kachikin chu anta xtamakgxtakgli asta akxni xnilh xapuxku sacerdote. Xlakata tlan chuna xtlawalh xtalakaskin pi xmakgxtakgli tuku xkgalhi, la xtaskujut, nialh xlipaxuwalh tuku tlan xkgalhi chu nialh la niku xatapaxuwan xʼalh paxialhnan (Núm. 35:25). * Pero tlan xkitaxtu komo chuna xtlawalh. Komo makgnina xtaxtu kʼama kachikin niku wi putatsekgni xlitasiya pi ni lu xlilakgaputsa xlakata xmakgninit ama chatum lataman chu katuwa xwili xlatamat.
11. ¿Tuku tlan natlawa kstalanina Cristo tiku nitlan limakgkatsi xtalakgalhin xlakata nalimasiya pi lakaskin xtalakgalhaman Dios?
11 La uku kilhtamaku, tiku tlawa lanka talakgalhin talakaskin pi wi tuku xlitlawat xlakata Dios nalimasiyani talakgalhaman. Talakaskin pi putum namakgxtakga talakgalhin nema tlawama, nachuna nalakgmakgan putum tuku max namatlawi talakgalhin. Pablo kawanilh kstalaninanin Cristo xalak Corinto tiku xmakgxtakgkgonit tuku nitlan xtlawamakgolh. Lichuwinan: «Ntalipuwan ntu nkgalhitit; chu lantla lakgtaxtuputuntit; chu lantla likgalhinitantit ntasitsin, chu ntapekua, chu lantla nkiukxilhputuntit tunkun, chu lantla ntu xatlan ntlawaputunatit, chu lantla malakapalitit» (2 Cor. 7:10, 11). Komo akinin nachuna naliskujaw namakgxtakgaw lanka talakgalhin, nalimasiyaniyaw Jehová pi lilakgaputsayaw tuku titaxtumaw chu nalimasiyayaw pi lakaskinaw xtalakgalhaman.
12. ¿Tuku max nalakgmakgan kstalanina Cristo xlakata Dios chuntiya nalimasiyani xtalakgalhaman?
12 ¿Tuku nalakgmakgan kstalanina Cristo xlakata Dios nalimasiyani talakgalhaman? Talakaskin namakgxtakga tuku lu lakgati komo max namatlawi tuku nitlan (Mat. 18:8, 9). Akgtum liʼakxilhtit, komo kiʼamigoskan nitlan tuku nakinkamatlawikgoyan, ¿nakamakgxtakgaw chu nialh katikatalaliw? Komo tuwa makgkatsiyaw ni nawayaw kuchu, ¿liwana lakpuwanitaw namakgxtakgaw tuku natlawa pi lhuwa kuchu nawayaw? Komo liskujmaw xlakata ni natlawayaw talakgxtumit xalimaxana, ¿lakgmakganaw putum talakgastan, páginas xla Internet o atanu tuku natlawa pi nakinkamalakpuwaniyan tuku nitlan? Kalakapastakwi pi putum tuku naliskujaw xlakata ni namakgxtakgaw Jehová tlan kitaxtu. Ni anan tuku tlakg tuwa namakgkatsiyaw pi Jehová nakinkamakgxtakgan. Pero ni anan tuku atanu nema kinkamakgapaxuwayan pi namakgkatsiyaw pi kgalhiyaw xtapaxkit nema ni makgxtakgnan putum kilhtamaku (Is. 54:7, 8).
«KACHIKININ NIKU TLAN TATSEKGKAN»
13. ¿Tuku xlakata makgnina nitu xlilakgaputsa chu xpaxuwa anta kachikin niku tlan xtatsekgkan?
13 Akxni makgnina anta xwi kachikin niku tlan tatsekgkan, nitu xlilakgaputsa. Jehová lichuwinalh xlakata uma kachikinin: «Chu nalimaklakaskinatit la minputatsekgnikan» (Jos. 20:2, 3). Xla ni xwan pi amakgtum nalakputsananiparakan makgnina xlakata tuku xtlawanit. Chu malakgaxokgena ni xmaxkikan talakaskin natanu kʼama kachikin xlakata namakgni. Xlakata makgnina anta xtamakgxtakga kʼama kachikin, nitu xlipekuan xlakata wa Dios xkuentajtlawama. Ni kpulachin xwi, wa xlakata tlan kskuja, xkamakgtaya amakgapitsin chu tlan kskujnani Dios chu nitu xlilakgaputsa. Tlan xlin xlatamat chu tapaxuwan xtawila.
Liwana kakatsi pi Jehová tapatinitan (Kaʼakxilhti párrafos 14 asta 16).
14. ¿Tuku liwana xlikatsit kstalanina Cristo tiku makgxtakgnit lanka xtalakgalhin?
14 Wilakgolh xlakskujnin Dios tiku nialhtu tlawamakgolh lanka talakgalhin pero chuntiyaku nitlan limakgkatsikgo. Makgapitsi lakpuwankgo pi Jehová chuntiyaku nitlan akxilha tuku tlawakgonit. Komo wix chuna makgkatsiya, kakatsi pi Jehová tapatinitan chu masiyaninitan xtalakgalhaman. Wa xlakata nitu nalipekuana. Daniel Salmo 103:8-12).
tiku lichuwinaw kpárrafo 9, katsilh pi uma xlikana. Alistalh akxni lakgkgolotsin maxkikgolh tastakyaw chu makgtayakgolh xlakata nakgalhi tlan talakapastakni, lu tlan makgkatsilh. Wa: «Akxni lakkaxtlawaka kintaʼakglhuwit, xtalakaskin pi nialh xaklilipuwa. Akxni tlawakan talakgalhin, kaj makgtum titaxtu. Chuna la Jehová lichuwinan, xla lin kintaʼakglhuwitkan chu makgat kinkawiliniyan. Nialh talakaskin nalakapastakparayaw». Pulana lichuwinaw pi tiku makgninan anta xwi kachikin niku tlan xtatsekgkan, nialh xtalakaskin napekuani malakgaxokgena. Nachuna akxni Jehová kinkatapatiyan, nialh talakaskin nalakpuwanaw pi xla amakgtum nakinkaliwaniyan (kalikgalhtawakga15, 16. ¿La kinkamakgtayayan nakatsiyaw pi Jesús mastalh xlatamat kimpalakatakan chu xla litaxtu la xaPuxku Sacerdote?
15 Akinin tlakg kgalhiyaw tuku nalipawanaw pi kgalhiyaw xtalakgalhaman Jehová nixawa israelitas. Chuna la akxilhwi kxapulana párrafo, Pablo lichuwinalh pi nitlan xmakgkatsi chu xlilipuwan xlakata nila liwana xkgalhakgaxmata Jehová. Pero maski makgxtakgli tuku nitlan xtlawama lichuwinalh: «¡Kpaxtikatsini Dios xlakata kililakgmaxtulh kiMalanakan Jesucristo!» (Rom. 7:25). Xlakata xmakgxtakgnit xtalakgalhin liwana xkatsi pi Jehová xtapatinit kxpalakata Jesús. Cristo mastalh xlatamat kimpalakatakan chu chuna tlan talakapastakni kgalhiyaw chu kgalhiyaw takaksni (Heb. 9:13, 14). Chu komo xla litaxtu xaPuxku Sacerdote, «tlan nalimakgaputaxtikgoy nkaxani liwayaj xtiway, wa nti xpalakata nCristo lilakgtalakatsuwikgoy Dios, sampi lama xla, chu mpalakachuwinamakgo nkaxani liwayaj xtiwaj» (Heb. 7:24, 25). Makgasa kilhtamaku, wa tuku taskujut xtlawakgo sacerdotes xtlawa pi israelitas liwana xkatsikgolh pi Jehová xkatapatilh xtalakgalhinkan. La uku kilhtamaku, xtaskujut xaPuxku Sacerdote tlakg lhuwa kinkamaxkiyan xlakata nalipawanaw pi namakgamakglhtinanaw xtalakgalhaman «chu nakinkamaxkiyan xlipaxkatsinit akxni luwa maklakaskinaw» (Heb. 4:15, 16).
16 Wa xlakata komo litatsekgputuna Jehová talakaskin nakgalhiniya takanajla xtamakamastan Jesús. Ni nalakpuwanaw pi talakgmaxtut wa litamakgtayakgo putum latamanin. Liwana kakatsi pi talakgmaxtut wix nalitamakgtayaya (Gál. 2:20, 21). Chu kakgalhini takanajla talakgmaxtut xlakata namaxkiyan akgtum takgalhkgalhitin xlakata tlan putum kilhtamaku nalatapaya. Xtamakamastan Jesús wa akgtum tamaskiwin nema Jehová wix maxkinitan.
17. ¿Tuku xlakata wix litatsekgputuna Jehová?
17 Kachikinin niku tlan xtatsekgkan anta xlimasiya xtalakgalhaman Jehová. Anta limasiyalh pi latamat xasanto litaxtu. Pero na limasilh la kinkamakgtayakgoyan lakgkgolotsin, tuku kilhchanima xlikana namakgxtakgaw tuku nitlan chu tuku xlakata liwana katsiyaw pi Jehová kinkatapatiyan. ¿Kimputatsekgnikan limaxtuyaw Jehová? Xla wa tlakg xalanka kimputatsekgnikan nema anan (Sal. 91:1, 2). Kʼatanu artículo nalichuwinanaw la uma kachikinin niku tlan xtatsekgkan kinkamakgtayayan nalikatsiyaw la Jehová, tiku tlawa tuku xaʼakgstitum chu xalakgalhamana.
^ párr. 10 Makgapitsi likgalhtawakga xla judíos lichuwinankgo pi xfamilia tiku xmakgninan nachuna anta xʼankgo latamakgo kkachikin xla putatsekgni.