La tlan nasmaniyaw kxasasti congregación
ALLEN * lichuwinan: «Akxni ktalakgpalilh kʼatanu congregación, lu xakpekuama. Ni xakkatsi komo tlan xakkatalalilh natalan». Allen makgtayanama kʼakgtum congregación nema 1,400 kilómetros (900 millas) xlilakgamakgat lata wi xchik.
Komo wix talakgpali kʼatanu congregación max makgkatsiya pi na pekuana. ¿Tuku namakgtayayan xlakata tlan nalismaniya? ¿Tuku natlawaya komo tuwa makgkatsiya nalismaniya? Pero maski wix nitu talakgpalipat kcongregación ¿la tlan nakamakgtayaya tiku chinkgo kmincongregación?
¿LA TLAN NALISMANIYA?
Akxni kgantum kiwi pulhukan chu alakatanu niku chankan makgatsankga xlitliwakga. Xlakata tlakg tlan namalakxijkan talakaskin nachukunikan makgapitsi xtankgaxekg. Alistalh, uma kiwi nataxtunipara atanu xtankgaxekg. Nachuna napina atanu kcongregación max lu nalilakgaputsaya. Xlakata wix xkgalhiyata amigos chu xlakkaxwilinitata minkilhtamaku xlakata la naskujnaniya Jehová. Pero la uku talakaskin amakgtum naputsaparaya tiku nakatalalipina. ¿Tuku namakgtayayan? Nalilatapaya tastakyaw xalak Biblia. Kaʼakxilhwi makgapitsi.
Tiku likgalhtawakga Biblia chali chali xtachuna «la kgantum kiwi nalitaxtu nema chankanit kxkilhtun kgalhtuchokgo, nema masta xtawakat akxni lakgchan chu ni xnekga, chu putum tuku natlawa tlan nakitaxtuni» (Sal. 1:1-3).
Xtachuna la kgantum kiwi ankgalhin lakaskin chuchut xlakata nina xnekga, chatum kstalanina Cristo lakaskin ankgalhin nalikgalhtawakga Biblia xlakata tliwakga natawila xtakanajla. Wa xlakata kalikgalhtawakga Biblia, kapit ktamakxtumit chu kakakninani Dios kfamilia chu mi akstu kakgalhtawakga. Kalakapastakti pi la uku talakaskin chuntiya natlawaya tuku xtlawaya xapulana xlakata chuntiya tlan natalalipina Jehová.
«Tiku kamakgtaya amakgapitsin, nachuna namakgtayakan» (Prov. 11:25).
Tlakg lakapala nalismaniya komo ankgalhin napina lichuwinana Dios. Kevin tiku liskujma la kgolotsin kcongregación wan: «Tuku tlakg kinkamakgtayan akit chu kimpuskat wa nakliskujaw precursorado auxiliar akxni nina makgas la xakwilaw kxasasti congregación». Chu wampara: «Lakapala kkalakgapaswi natalan, precursores chu niku xaklichuwinanaw Dios». Roger, tiku alh tawila liwaka 1,600 kilómetros (1.000 millas) xlilakgamakgat niku xwi, lichuwinan: «Xlakata tlakg lakapala nalismaniya kxasasti congregación wa ankgalhin nalichuwinana Dios. Nachuna tlan nakawaniya lakgkgolotsin pi tlan nakamakgtayaya niku tlakg talakaskin, max tlan nakaxakaya kPukgalhtawakga, tlan namatitaxtiya akgtum taʼakgchuwin komo tiku xlakgchan nila katimatitaxtilh o tlan nalipina chatum tala tiku nila xakstu an ktamakxtumit. Komo natalan naʼakxilhkgo pi lakgatiya makgtayanana, tlan lakapala natalalinkgoyan».
«Chalhuwa kakapaxkitit» (2 Cor. 6:13).
Lu xlakaskinka nakalimasiyaniyaw tapaxkit natalan. Akxni Melissa chu xfamilia ankgolh kxasasti congregación, liskujkgolh xlakata naputsakgo xalaksasti amigos. Melissa wan: «Akxni nina xtsuku chu akxni ksputa tamakxtumit ankgalhin lakxtum xakkatalayaw natalan. Chuna tlan xakkatachuwinanaw natalan chu ni kaj watiya xakkawaniyaw tlen
chu asta chali». Uma kamakgtayalh xlakata lakapala nakatsikgo xtukuwanikan natalan. Nachuna lu tlan xkamakgamakglhtinankgo, uma tlawalh pi tlan xkatalalilh. Melissa lichuwinampara: «Klamaxkiw números xla kintelefonojkan. Chuna tlan xaklamakatsiniyaw akxni wi tuku xaktlawayaw xlakata naklimalankiyaw Dios o akxni xakanaw katapaxuwayaw natalan».Komo tuwa makgkatsiya nakalakgapasa atanu natalan, maski kaj ni lhuwa tuku natlawaya. Akgtum liʼakxilhtit, tlan nakatalitsina maski pulana ni litsimputuna. Komo nakatalitsina, natalan nalakgtalakatsuwikgoyan. Chuna la wan Biblia «akxni lakalitsinkan makgapaxuwa naku» (Prov. 15:30). Rachel makgat kachikin niku alh tawila, chu wan: «Akit lu xamaxana». Chu wampara: «Min kilhtamaku fuerza kkatachuwinan natalan xalak congregación. Tuku ktlawa wa ktachuwinan chatum tala tiku kaj wi chu niti tachuwinama. Max uma tala na lu xamaxana chuna la akit». ¿Tuku xlakata ni lakkaxwiliya pi tanu tanu natalan nakatachuwinana akxni nina tsuku tamakxtumit chu akxni sputa?
Max xapulana semanas paxuwaya xlakata tlakg nakalakgapasa natalan. Pero max tapaxuwan nema xapulana xmakgkatsiya natitaxtu. Komo chuna titaxtupat, chuntiya kaliskujti xlakata nakgalhiya amigos.
Akxni kgantum kiwi pulhukan chu alakatanu niku chankan makgatsankga xlitliwakga pero alistalh taxtunipara xatanu xtankgaxekg.
LIN KILHTAMAKU XLAKATA NASMANIYA
Makgapitsi kiwi makgapalakgo xlakata namakan xtankgaxekg anta niku aku chanka. Xtachuna la uma, wi tiku ni lakapala smanikgo kʼakgtum xasasti congregación. Umakgolh makgapitsi tastakyaw xalak Biblia nakinkamakgtayayan komo linawa kilhtamaku lata talakgpalinitaw kcongregación chu nina smaniyaw:
«Ni anu titlakgwanaw natlawayaw wa ntu ntlan; sampi kxkilhtamaku, namakgalayaw, wa lapi ni natalaktuwajaw» (Gál. 6:9).
Komo nina lismaniya, tlakg kalimaxtu kilhtamaku. Akgtum liʼakxilhtit, lhuwa misioneros tiku kilakgonit kʼEscuela de Galaad chu kamalakgachakanit kʼatanu país chu lhuwa kata tawilakgo niku kawanikanit chu alistalh ankgo kxpaískan. Uma tlawa pi nakatalalinkgo amakgapitsi natalan chu chuna katsinikgo atanu talismanin.
Alejandro makglhuwa la talakgpalinit chu katsi pi tuwa kitaxtu nalismaniya. Xla lichuwinan: «Akxni awatiya ktalakgpaliw kimpuskat kiwanilh: “¡Putum kiʼamigos anta wilakgolh kʼatanu congregación!”». Wa xlakata malakapastakalh pi akgtiy kata lata xtitaxtunit nachuna tiwa akxni titalakgpalikgolh kʼatanu congregación. Pero lata ama akgtiy kata xpuskat lu kalilakgaputsalh amakgapitsin chu tiku pulana ni xkalakgapasa lu tlan tsukulh katalalin.
«Ni kawanti: “¿Tuku xlakata xapulana kilhtamaku tlakg tlan xwanit ni xawa la uku?” xlakata ni limasiyaya liskgalala pi kgalhskininampat uma» (Ecl. 7:10).
Ni katamalakxtupi xapulana mincongregación niku la uku wila. Max natalan tiku wilakgolh kxasasti congregación max ni lu chuwinankgo o max tunkun nawanikgoyan tuku nitlan tlawaya. Maski tanu la likatsikgo, wix kaʼakxilhti xatlan xtayatkan, chuna la wix lakgatiya tlan xlikatsinika. Makgapitsi natalan tiku talakgpalikgo kʼatanu congregación max takgalhskinkgo: «¿Xlikana kkapaxki “putum natalan”?» (1 Ped. 2:17).
«Kaskintit, na nakamaxkikanatit» (Luc. 11:9).
Chuntiya kaskini tamakgtay Jehová. Chatum
kgolotsin tiku wanikan David wan: «Nikaj miʼakstu chuna katlawa». Chu wampara: «Lhuwa tuku tlan natlawayaw kaj xlakata xtamakgtay Jehová. Wa xlakata katlawani oración Jehová xlakata uma». Rachel, tiku lichuwinawa nachuna lakpuwan. Xla lichuwinan: «Komo kinchixku chu akit kmakgkatsiyaw pi ni lu ksmaniyaw kcongregación, ktlawaniyaw oración Jehová chu kwaniyaw pi kakinkamaxkin talakaskin nakakxilhaw komo wi tuku nitlan ktlawamaw nema tlawa pi nakinkatamakgatlinikgoyan natalan. Wa xlakata kliskujaw xlakata tlakg lhuwa kilhtamaku akxtum nakkatatawilayaw».Natlatni, komo minkamanankan tuwa makgkatsikgo nasmanikgo, kalimaxtutit kilhtamaku xlakata akxtum natlawayatit oración xlakata uma. Kakamakgtayatit natekgskgo xalaksasti xʼamigoskan akxni akxtum nakatatawilakgoyatit natalan, tiku nachuna tliwakga xtakanajlakan.
KAKAMAKGTAYA NASMANIKGO TIKU AKU CHINKGOLH KKINCONGREGACIONKAN
¿Tuku tlan natlawaya xlakata tiku aku chinkgolh kmincongregación? Kaliskujti xlakata tunkun tlan nakatalalipina natalan. Kalilakpuwanti tuku xlakgati xtlawaka mimpalakata nema lu xpaxtikatsininanti akxni xtawila kʼakgtum xasasti congregación, chu chuna katlawa (Mat. 7:12). ¿Tlan nakawaniya tiku aku chinkgolh kcongregación pi kaʼankgolh kminchik akxni kakninaniya Dios kfamilia o akxni akxilha JW Broadcasting? ¿Tlan xlakkaxwili xlakata akxtum napina kalitachuwinana Dios? Max lu nalakapastakkgo komo tlan kamakgamakglhtinana akxni katawayana kminchik. ¿Wi atanu tuku tlan nakalimakgtayaya?
Carlos wan: «Akxni kchaw xasasti congregación chatum tala puskat kinkamaxkin akgtum lista niku ni tapalaxla listanankan. Uma lu kinkamakgtayan». Tiku lakatanu niku minkgoyacha max tlakg lhkaknan o tlakg lonkgnan, tlan nakawaniyaw la nalhakganankgo niku lhkaknan, niku lonkgnan o niku tlakg senan. Komo nakawaniyaw tuku talismanin o tuku takanajla kgalhikgo latamanin nakamakgtaya tlakg tlan nalichuwinankgo Dios.
KOMO CHUNA NATLAWAYAW TLAN NAKITAXTU
Allen tiku lichuwinaw xapulana, liwakaya akgtum kata wi anta kxasasti kxcongregación chu la uku lichuwinan: «Xapulana lu kliskujli xlakata nakkalakgapasa natalan. Pero la uku xtachuna litaxtukgo la komo kifamilia chu lu kpaxuwa». Allen katsi pi maski lakgpalilh xcongregación uma ni tlawanit pi namakgatsankga xapulana xʼamigos. Wata tlakg lhuwa amigos kgalhi chu max putum kilhtamaku xʼamigos nalitaxtukgo.
^ párr. 2 Makgapitsi tukuwani kalakgpalikanit.