1, 2. 1) ¿Tuku tamaskiwin kgalhkgalhimakgo xlakskujnin Jehová? 2) ¿Tuku nakinkamakgtayayan ankgalhin nalilakpuwanaw tamaskiwin? (Kaʼakxilhti xapulana dibujo).

CHUNA la apóstol Pablo, tiku kalaksakkanit naʼankgo kʼakgapun kgalhikgo takgalhkgalhin xlakata namakglhtinankgo «[tamaskiwin] ntu xala talhman» (Filip. 3:14). Lu lakaskinkgo akxtum natatawilakgo Jesús anta kxTamapakgsin chu akxtum namakgtayakgo latamanin xlakata nialh nakgalhikgo talakgalhin (Rev. 20:6). ¡Lu tlan takgalhkgalhin nema kamaxkinit Jehová! Amakgapitsi borregos atanu tuku takgalhkgalhin nema kgalhikgo. Lu xatapaxuwan kgalhkgalhimakgo latamat nema nakamaxkikan unu kKatiyatni (2 Ped. 3:13).

² Xlakata nakamakgtaya xnatalan tiku xatalaksakni ni namakgxtakgkgo Jehová chu namakglhtinankgo latamat, Pablo kawanilh uma tachuwin: «Wa nkalakapastaktit wa ntu xala talhman» (Col. 3:2). Xtalakaskin pi ankgalhin xlilakpuwankgolh takgalhkgalhin nema nakamaxkikan kʼakgapun (Col. 1:4, 5). Komo kgalhkgalhimaw nalatamayaw kʼakgapun o kKatiyatni, talakaskin nalilakpuwanaw tasikulunalin nema kamalaknuninit xlakskujnin chu nakinkamakgtayayan ankgalhin  nalakapastakaw tamaskiwin nema nakinkamaxkikanan (1 Cor. 9:24).

3. ¿Tuku tastakyaw kamaxkilh Pablo kstalaninanin Cristo?

³ Pablo nachuna kawanilh xnatalan pi wi tuku max nitlan xkalaktlawalh, uma wamputun pi ni xkamaxkilh talakaskin namakglhtinankgo tamaskiwin. Akgtum liʼakxilhtit, katsokgnanilh congregación xalak Colosas xlakata ni xaxlikana kstalaninanin Cristo tiku xlakaskinkgo pi tlan xkaʼakxilhli Dios pero ni xkanajlanikgo Cristo (Col. 2:16-18). Nachuna kalitachuwinalh xlakata talakgxtumit xalimaxana, taʼakglhuwit nema takgalhikan chatum tala chu taʼakglhuwit nema anan kfamilia. Uma tuku lu nitlan chuntiyaku lama la uku chu tastakyaw nema mastalh Pablo chuntiyaku lhuwa xtapalh litaxtu. Kaʼakxilhwi makgapitsi tastakyaw nema kamaxkika colosenses.

4. ¿Tuku nakitaxtu komo natlawayaw talakgxtumit xalimaxana?

⁴ Akxni Pablo kamalakapastakalh xnatalan takgalhkgalhin nema kgalhikgo, katsokgnanilh: «Kamaspututit tuku lakaskin mimaknikan nema wi kkatiyatni xlakata, talakgxtumit nema ni xlitatlawat, tuku xalixkajni, akxni wi tiku lu talakgxtumiputun, putum kilhtamaku tlawaputunkan nema nitlan chu akxni wi tuku lu milakan tlawaputunatit» (Col. 3:5). Talakgxtumit xalimaxana max natlawa pi nialh kuenta natlawayaw kintakanajlakan nachuna la talalinaw Jehová chu kintakgalhkgalhinkan. Chatum tala tiku xtlawa talakgxtumit xalimaxana chu alistalh taspitli kcongregación lichuwinan pi tuku xtlawa nila xlakgmakgan asta akxni katsilh pi nitlan tuku xtlawanit.

5. ¿Tuku kilitlawatkan xlakata ni natlawayaw tuku nitlan akxni katuwa tatakgsaw?

⁵ Lu xlakaskinka skgalalh natawilayaw akxni katuwa natatakgsaw nema natlawa pi ni nakgalhakgaxmataw xlimapakgsin Jehová. Akgtum liʼakxilhtit, max tiku nalatatamakgaxtokga pulana nalichuwinankgo tuku natlawakgo akxni nalalimasiyanikgo pi lapaxkikgo la komo nalatsuka o akxni xakstukan wilakgo (Prov. 22:3). Kstalaninanin Cristo katuwa tawilakgo akxni makgat niku tatekgskgo xlakata taskujut o akxni chatum chixku taskuja chatum puskat (Prov. 2:10-12, 16). Komo namin kilhtamaku chuna natatakgsaw, kalimasiyaw pi akinin xtatayananin Jehová, tlan tayat kakgalhiw chu kalilakpuwaw pi nitlan kitaxtu akxni limasiyakan pi wi tiku lakgatiyaw. Tlakg kuenta kilitlawatkan akxni lipuwamaw chu akxni tuwa tuku titaxtumaw. Akxni chuna titaxtumaw max nalakaskinaw pi wi tiku tlan nakinkamamakgkatsiniyan. Max namakgkatsiyaw pi lu maklakaskinaw tamakgtay chu asta max namakgamakglhtinanaw xtamakgtay kaxatikuta xtiwa. Komo namin kilhtamaku chuna natitaxtuyaw, kaskiniw xtamakgtay Jehová chu natalan xlakata ni nakgalhiyaw taʼakglhuwit chu tlan namakgamakglhtinanaw tamaskiwin (kalikgalhtawakga Salmo 34:18 chu Proverbios 13:20).

6. ¿Tuku kuenta natlawayaw akxni nalaksakaw tuku nalilakgastananaw?

⁶ Xlakata nialh nalilakpuwanaw talakgxtumit xalimaxana, talakaskin pi putum nalakgmakganaw lilakgastan nema kgalhi talakgxtumit xalimaxana. Putum lilakgastan nema anan la uku kinkamalakapastakayan kachikinin Sodoma chu Gomorra (Jud. 7). Putum tiku liskujkgo uma limasiyakgo tuku lakpuwankgo xlakata talakgxtumit xalimaxana, lakpuwankgo pi nitu wamputun o ni limin taʼakglhuwit. Talakaskin ankgalhin kuenta natlawayaw chu ni namakglhtinanaw putum tuku maklakaskin uma kakilhtamaku. Komo ni kuenta natlawayaw, max ni katimakglhtinaw uma tamaskiwin xla latamat (Prov. 4:23).

7. ¿Tukuya taʼakglhuwit max naʼanan kcongregación?

⁷ Putum akinin liwana katsiyaw pi akgtum talakgalhaman makgtapakgsiyaw anta kxkachikin  Jehová. Takgalhtawakga xla xTachuwin Dios anta ktamakxtumit chu tamakgtay nema xatapaxuwan lalimasiyaniyaw chatunu akinin chu talakgalhaman kinkamakgtayayan ni namakgatsankgayaw tamaskiwin. Min kilhtamaku natalan max nitlan akgatekgsnikgo tuku tlawayaw o tuku wanaw chu uma tlawa pi kaʼanalh taʼakglhuwit. Komo ni nalakkaxtlawayaw umakgolh taʼakglhuwit max nitlan katikalakpuwaniw amakgapitsin (kalikgalhtawakga 1 Pedro 3:8, 9).

8, 9. 1) ¿Tuku tayat nakinkamakgtayayan ni namakgatsankgayaw latamat nema ni kgalhi xlisputni? 2) ¿Tuku nakinkamakgtayayan ni naʼanan taʼakglhuwit akxni chatum tala wi tuku nitlan kinkawaniyan o kinkatlawaniyan?

⁸ ¿Tuku natlawayaw xlakata tasitsin ni nalaktlawa tamaskiwin nema namakglhtinanaw? Pablo kamaxkilh uma tastakyaw colosenses: «Wixin nti xtalaksaknin Dios, xasantujlanin, chu wa nti lu[...] kapaxkiyan, wa xpalakata nkalikgalhitit wa ntu nkgayaj nalikatsanatit, lu[...] xalakgalhamananin, lu[...] tsatata mintalakapastaknikan nakgalhiyatit, chu xasmalhwan nawanatit, chu nakgalhiyatit ntapaxuwanaliyan. Kalapaxuwanalipitit, chu na nalamatsakgenaniyatit nchatunu amakgapitsin lapi wi nti lamakgasitsiyatit; xtachuna lantla nkamatsankgenanin nCristo, na chuna wixin nkatlawatit. Na wa ntu ntlakg xlakaskinka, mpi nalakgalhiniyatit ntapaxkit, sampi wa yuma ntu lakatanks makxtum tlawanan» (Col. 3:12-14).

⁹ Tapaxkit chu talakgalhaman nakinkamakgtayayan nalatapatiyaw kinchatunukan. Akgtum liʼakxilhtit, komo nitlan limakgkatsiyaw tuku kinkawanin o kinkatlawanin chatum tala, kalakapastakwi akxni akinin max nachuna tlawaw chu nitlan limamakgkatsiniw a chatum. Xlikana, paxtikatsiniyaw tapaxkit chu xtalakgalhaman kinatalankan tiku kinkatapatikgon tuku nitlan katlawaniw (kalikgalhtawakga Eclesiastés 7:21, 22). Lu paxtikatsiniyaw xtalakgalhaman Jesús nema tlawanit pi makxtum nalakgo xkakninanin Jehová (Col. 3:15). Kimputumkan watiya chatum Dios kakninaniyaw, watiya tamakatsin lichuwinanaw chu watiya taʼakglhuwit nema titaxtuyaw. Komo kapaxkiyaw natalan, kalakgalhamanaw chu katapatiyaw, na makgtayananaw xlakata makxtum natawila congregación chu kuenta natlawayaw xlakata ni namakgatsankgayaw tamaskiwin xla latamat.

10, 11. 1) ¿Tuku nakitaxtu komo lakgsitsinanaw? 2) ¿Tuku natlawayaw xlakata talakgsitsin ni nakinkamamakgatsankganiyan latamat nema ni kgalhi lisputni?

¹⁰ Talakgsitsin nachuna tlawa pi ni namakglhtinanaw latamat. Anta kBiblia limin makgapitsi liʼakxilhtit xlakata nitlan tuku lakgsitsikan. Akgtum liʼakxilhtit, Caín lakgsitsilh tuku xtlawama xtala Abel chu makgnilh. Coré, Datán chu Abiram lu lakgsitsinikgolh Moisés chu talalakatawakakgolh. Mapakgsina Saúl lakgsitsilh xlakata David lu tlan xkitaxtunima chu asta xmakgniputun. Wa xlakata Biblia wan: «Xampi anta ntani anan ntaskgawit, chu ntakgslokgon, pus na anta anan ntakglhuwatna, chu ni lakwan tatlaw» (Sant. 3:16).

¹¹ Nitu katilakgsitsiw komo nakgalhiyaw tayat la tapaxkit chu talakgalhaman anta kkinakujkan. Anta kxTachuwin Dios wan: «Tapaxkit pati chu tlan likatsi. Tapaxkit ni lakgsitsinan» (1 Cor. 13:4). Xlakata ni nalakgsitsinanaw talakaskin nachuna naʼakxilhaw tuku tlawakgo amakgapitsin chuna la akxilha Jehová. Talakaskin naʼakgatekgsaw pi kinatalankan xtachuna litaxtuyaw la akgtum makni anta kcongregación. Uma nakinkamakgtayayan nachuna namakgkatsiyaw chuna la wan umakgolh tachuwin: «Chi lapi lakatum lakni ntamaxkiy nkakni, xlipaks milakni nalipaxuway» (1 Cor. 12:16-18, 26). Wa xlakata ni nalakgsitsinanaw wata katapaxuwaw tiku makglhtinan akgtum tasikulunalin. Kalilakpuwaw xlakata Jonatán, xkgawasa mapakgsina Saúl. Ni lakgsitsilh akxni Jehová laksakli David la mapakgsina. Wata lipaxuwalh chu limasiyanilh talakgalhaman chu makgpuwantinilh (1 Sam. 23:16-18). ¿Tlan nachuna nalikatsiyaw?

12. ¿Tuku tastakyaw xalak Biblia nakamakgtaya familias xlakata namakglhtinankgo latamat?

¹² Komo nalilatamayaw tastakyaw xalak Biblia anta kkifamiliajkan nakgalhiyaw takaksni, tapaxuwan chu nakinkamakgtayayan nakgalhiyaw latamat nema ni kgalhi xlisputni. ¿Tuku tastakyaw kamaxkilh Pablo familias carta nema kamalakgachanilh colosenses? Lichuwinalh: «Wixin puchuwa lakchajan, kalakgachixkuwitit minchixkukan wa lantla mininiy kimPuchinakan nakgalhiy xkanajlanin nti nchuna. Chu wixin puchuwa chixkuwin, kapaxkikgotit minpuskatkan, na ni akglakgwa titalatlawakgoyatit. Chu wixin kaman, xlipaks kalakgachixkuwitit mintlatkan; sampi wa yuma, chuna lakgatiy kimPuchinakan. Chu wixin natlatna, ni lakgawan tiakgslokgoyatit milakgskgatankan, lakimpi ni kaj tlakaj nalakgoy» (Col. 3:18-21). Xlikana pi la uku chuntiya litamakgtayamakgo uma tastakyaw putum tiku tamakgaxtokgkgonit nachuna kamanan.

13. ¿Tuku natlawa chatum tala puskat pi xchixku namakglhtinan xaxlikana?

¹³ Kalilakpuwaw pi chatum tala puskat tiku lakpuwan pi xchixku tiku ni xtatayana Jehová chu nitlan likatsini. ¿Tlakg tlan nakitaxtu komo nakilhni xlakata la likatsi? Komo puskat wa namapakgsi xchixku, ¿natlawa uma pi xla naskujnaniputun Jehová? Max ni. Lu tanu nakitaxtu komo xla namaxki kakni xlakata xla wa pulalin familia.  Natlawa pi naʼanan takaksni kfamilia, namalanki Jehová chu max asta naskujnaniputun Dios. Komo chuna natlawakgo max xchatiykan tlan namakglhtinankgo latamat (kalikgalhtawakga 1 Pedro 3:1, 2).

14. ¿Tuku natlawa chatum tala chixku komo xpuskat ni maxki kakni?

¹⁴ Chu kalilakpuwaw chatum tala chixku tiku xpuskat ni xtatayana Jehová chu ni maxki kakni. ¿Natlawa pi namaxki kakni komo kaj nakilhni chu nalimasiyani tiku mapakgsinan anta kchiki? Xlikana pi ni. Jehová lakaskin pi kastalanilh xliʼakxilhtit Jesús chu kalimasiyanilh tapaxkit xpuskat (Efes. 5:23). Cristo pulalin congregación pero limasiya tapaxkit chu xakgalhkgalhina (Luc. 9:46-48). Kstalanina Cristo tiku stalani xliʼakxilhtit Jesús max tlan natlawa pi xpuskat nachuna naskujnani Jehová.

15. ¿La nalimasiyani chatum kstalanina Cristo pi paxki xpuskat?

¹⁵ Biblia lichuwinan xlakata lakchixkuwin tiku tamakgaxtokgkgonit: «Kapaxkikgotit mimpuskatkan, na ni akglakgwa titalatlawakgoyatit» (Col. 3:19). Kstalanina Cristo tiku paxki xpuskat maxki kakni akxni kgaxmatni tuku xla lakpuwan chu limasiyani pi lhuwa xtapalh akxilha tuku xla wan (1 Ped. 3:7). Maski xla nila putum tlan tlawa tuku skini xpuskat, akxni wi tuku kgalhskin maxki talakaskin pi xla nalaksaka tuku xatlan (Prov. 15:22). Chatum chixku tiku paxki xpuskat ni fuerza wani pi kamaxkilh kakni, wata puskat xatapaxuwan maxki kakni xchixku. Akxni chatum kstalanina Cristo paxki xpuskat chu xkamanan, uma natlawa pi nachuna naskujnanikgo Jehová chu namakglhtinankgo latamat nema ni kgalhi xlisputni.

16, 17. Komo wix kajku kgawasa, ¿tuku natlawaya xlakata ni nasitsiya chuna la stakyawakgoyan minatlatni?

¹⁶ Max wix chatum kgawasa tiku makgastakka kʼakgtum familia niku kstalaninanin Cristo litaxtukan chu lakpuwana pi mi natlatni ni akgatekgsnikgoyan chu max asta malakatsalikgo tuku wanikgoyan. Uma max natlawa pi nalakpuwana pi lu tuwa skujnanikan Jehová. Pero komo namakgxtakga tuku xaxlikana naʼakxilha pi kkakilhtamaku niti katililakgaputsan chuna la nalilakgaputsakgoyan minatlatni chu natalan xalak congregación.

¹⁷ Tastakyaw nema mastakgo natlatni lu xlakaskinka. Komo ni nastakyawakgoyan, ¿nixlikana pi nalakpuwana komo xlikana lilakgaputsakgoyan? (Heb. 12:8). Pero max tuku nitlan akxilha wa la stakyawakgoyan. Ni wa kuenta katlawa, wata kalilakpuwanti pi wi tuku xlakata chuna tlawamakgolh. Wa xlakata ni lakapala kasitsi. Biblia lichuwinan pi tiku kgalhi takatsin chu takgatekgsni katsi la natlawa xlakata ni lakapala nasitsi (Prov. 17:27). Wata skgalala kalitaxtu chu xatapaxuwan kamakglhtinanti tastakyaw chu chuna tlan nalitamakgtayaya chu ni wa kuenta katlawa la namaxkikana tastakyaw (Prov. 1:8). Lu makgtayanan kgalhikan natlatni tiku paxkikgo Jehová. Xlikana pi xlakan makgtayaputunkgoyan nakgalhiya latamat nema ni kgalhi xlisputni.

18. ¿Tuku xlakata wix liwana lakpuwanita namakglhtinana latamat nema ni kgalhi xlisputni?

¹⁸ Kimputumkan tlan namakglhtinanaw akgtum tlan tamaskiwin: latamat nema ni kgalhi xlisputni anta kʼakgapun o latamat anta unu kKatiyatni niku akgtum Paraíso nawan. Akgtum takgalhkgalhin nema xlikana nakgantaxtu, xlakata wa kiMalakatsukinakan chuna lichuwinanit. Xla lichuwinan xlakata latamat anta kParaíso: «Katiyatni nalitatsama xtamasiy Jehová» (Is. 11:9). Putum tiku nalatamakgo anta kKatiyatni wa Jehová tiku nakamasiyani. Lu tlan nakitaxtu komo naliskujaw xlakata namakglhtinanaw uma tamaskiwin. Wa xlakata chuntiya kuenta katlawaw tuku malaknunit Jehová. Nitu kakinkalaktlawan pi ni namakglhtinanaw latamat nema ni kgalhi xlisputni.