1. Chuna la wan Mateo 7:13, 14, ¿tuku xlakata wanaw pi xlatamatkan kstalaninanin Cristo xtachuna la akxni wi niku ankan?

XLATAMATKAN kstalaninanin Cristo xtachuna la akxni wi niku ankan. Champutunaw kxasasti kakilhtamaku niku namapakgsinan xapaxkina kiDioskan, Jehová. Chali chali tlawamputunaw ktiji nema linan klatamat. Pero, chuna la wa Jesús, tiji lu titsu chu lakgachunin tuwa tamakgkatsi naʼanaw anta (kalikgalhtawakga Mateo 7:13, 14). Xlakata makglakgalhinanin akinin, pataxtutayayaw ktiji (Gál. 6:1).

2. ¿Tuku naʼakxilha kʼuma artículo? (Na kaʼakxilhti recuadro « Tataktujut kinkamakgtayayan nalakgpaliyaw kintayatkan»).

² Xlakata chuntiya natlawanaw ktiji nema linan klatamat, talakaskin pi nalakgpaliyaw kintayatkan chu tuku tlawayaw, chu chuna la likatsiyaw. Wa uma tuku xwamputun apóstol Pablo akxni kamakgpuwantinilh kstalaninanin Cristo xalak Corinto pi “chuntiya xlakkaxwilikgolh xtapuwankan” (2 Cor. 13:11). Uma tastakyaw chuntiya lu xlakaskinka kkinkilhtamakujkan. Kʼuma artículo naʼakxilhaw la tlan nakinkamakgtayayan Biblia nalakgpaliyaw kintayatkan chu la tlan nakinkamakgtayakgoyan kiʼamigoskan tiku tliwakga kgalhikgo xtakanajlakan xlakata chuntiya natlawanaw ktiji nema linan klatamat. Nachuna naʼakxilhaw tuku max natlawa pi tuwa namakgkatsiyaw nakgalhakgaxmataw xtastakyaw xkachikin Jehová. Chu naʼakxilhaw tuku xlakata lu xlakaskinka nataktujuyaw komo tlawaputunaw talakgpalit kkintayatkan chu chuntiya lipaxuw naskujnaniyaw Jehová.

3. ¿La kinkamakgtayayan xTachuwin Dios?

³ Tuwa tamakgkatsi liwana naʼakxilhaw tuku lakpuwanaw chu tuku makgkatsiyaw. ¿Tuku xlakata? Xlakata kinakujkan kinkaʼakgskgawiyan, chu tuwa nakatsiyaw niku nakinkalinan (Jer. 17:9).  Ankgalhin akstu litaʼakgskgawiyaw «ni xaxlikana talakapastakni» (Sant. 1:22). Wa xlakata lu xlakaskinka pi nalimaklakaskinaw xTachuwin Dios xlakata naʼakxilhaw la likatsiyaw. Biblia kinkamakgtayayan naʼakxilhaw tuku wi kkinakujkan, «tuku lakpuwan chu tuku tlawaputun» kinakujkan (Heb. 4:12, 13). Xtachuna la tuku malakgxkgakgenan, nema kinkamakgtayayan naʼakxilhaw kintayatkan. Pero, komo litamakgtayaputunaw tastakyaw nema tekgsaw kBiblia chu xtastakyawkan xlakskujnin Dios, kilitaktujutkan.

4. ¿Tuku likatsiyaw pi mapakgsina Saúl tlankajwa wa?

⁴ Tuku akgspulalh mapakgsina Saúl limasiya tuku nakinkakitaxtuniyan komo kinkatsankganiyan tataktujut. Lu lanka makgkatsika chu nikxni litayalh pi xtalakaskin nalakgpali xtapuwan chu tuku xtlawa (Sal. 36:1, 2; Hab. 2:4). Uma liwana litasiyalh akxni Saúl kgalhakgaxmatmakgalh Jehová akxni wanilh tuku xlitlawat xwanit xlakata xkamakgatlajalh amalequitas. Akxni palakachuwina Samuel stakyawalh xlakata uma, Saúl ni litayalh tuku nitlan xtlawanit. Wata atanu tuku likilhalh chu chuna limasiyalh pi ni lu xlakaskinka xliʼakxilha tuku nitlan kitaxtu komo ni kgalhakgaxmatnankan, chu nachuna kalimawakalh amakgapitsin tuku xla xtlawanit (1 Sam. 15:13-24). Chu ni xlimakgtumku chuna xtlawanit (1 Sam. 13:10-14). Lu nitlan pero mastalh talakaskin pi xnaku tlankajwa xwa. Xlakata ni lakgpalilh xtapuwan, Jehová palha stakyawalh chu lakgmakgalh.

5. ¿Tuku kinkamasiyaniyan tuku titaxtulh Saúl?

⁵ Xlakata nalitamakgtayayaw tuku titaxtulh Saúl, tlan nalilakpuwanaw umakgolh takgalhskinin: «¿Wi tuku klikilhan xlakata ni naklilatama tastakyaw nema klikgalhtawakga kBiblia? ¿Ni xlakaskinka kliʼakxilha tuku nitlan kitaxtu akxni ni kgalhakgaxmatnankan? ¿Kkalimawaka amakgapitsin tuku akit ktlawa?». Komo chuna, talakaskin nalakgpaliyaw kintapuwankan chu la likatsiyaw. Komo nichuna natlawayaw, kinakujkan tlankajwa namakgkatsikan chu uma natlawa pi Jehová ni kiʼamigojkan nalitaxtuputun (Sant. 4:6).

6. ¿Tuku xlitalakgpalikgo Saúl chu David?

⁶ Kaʼakxilhwi tuku litalakgpalikgolh mapakgsina Saúl chu mapakgsina David, chatum chixku tiku xpaxki «xlimapakgsin Jehová» (Sal. 1:1-3). David xkatsi pi Jehová kalakgmaxtu tiku taʼaktujukgo pero kalakgmakgan tiku tlankajwa likatsikgo (2 Sam. 22:28). Wa xlakata mastalh talakaskin pi xlimapakgsin Jehová nalakgpalini xtalakapastakni. Xla tsokgli: «Nakmalanki Jehová, tiku kimaxkinit tastakyaw. Asta kkatsisni kintalakapastakni kistakyawakgo» (Sal. 16:7).  

7. Komo taktujuyaw, ¿tuku natlawayaw?

⁷ Komo taktujuyaw, namastayaw talakaskin pi Biblia nalakgpali nixatlan kintalakapastaknikan akxni nina kinkamatlawiyan tuku nitlan. Wa xTachuwin Dios nalitaxtu xtachuna la akgtum tachuwin nema nakinkawaniyan: «Wa uma tiji. Anta katlawanti». Nakinkamakatsiniyan komo kkimpakgastakatkan o kkimpakgxwikikan amaw, chu ni anta tlawamaw ktiji niku kiliʼanatkan (Is. 30:21). Komo nakgalhakgaxmataw Jehová lu tlan nakinkakitaxtuniyan (Is. 48:17). Akgtum liʼakxilhtit, limaxana kitaxtu akxni kinkastakyawakanan, pero komo nakgalhakgaxmataw ni katitalakaskilh pi chuna natitaxtuyaw. Chu namakgkatsiyaw pi tlakg lakatsu wilaniw Jehová xlakata naʼakxilhaw pi kinkalikatsiniyan xtachuna la xkamanan tiku kapaxki (Heb. 12:7).

8. Chuna la wan Santiago 1:22-25, ¿la tlan xtachuna la akgtum espejo nalitaxtu xTachuwin Dios?

⁸ Wa xTachuwin Dios tlan nalitaxtu xtachuna la akgtum espejo (kalikgalhtawakga Santiago 1:22-25). Chali chali, putum latamanin kalakaʼakxilhkan kʼakgtum espejo akxni nina taxtukgo kxchikkan. Chuna tlan akxilhaw komo wi tuku nakaxtlawayaw akxni amakgapitsin nina kinkaʼakxilhkgoyan. Xtachuna, akxni likgalhtawakgayaw Biblia chali chali, akxilhaw komo talakaskin wi tuku «nakaxtlawayaw» kkintalakapastaknikan  o la likatsiyaw. Lhuwa natalan likgalhtawakgakgo texto nema talikgalhtawakga chali chali akxni nina taxtukgo kxchikkan, chu chuna mastakgo talakaskin pi tuku likgalhtawakgakgo nastakyawa xtalakapastaknikan. Chu tantaku, lakputsakgo la tlan nalilatamakgo xtastakyaw xTachuwin Dios. Nachuna, talakaskin nalikgalhtawakgayaw Biblia chali chali chu nalilakpuwanaw. Uma wa pulaktum tuku lu xlakaskinka xlakata chuntiya natlawanaw kxatitsu tiji nema linan klatamat.

9. ¿Tuku kilhtamaku namaklakaskinaw pi nakinkastakyawayan chatum amigo?

⁹ ¿Xtsukunitaw tlawanaw kʼakgtum tiji nema xkinkamamakgatliniman Jehová? (Sal. 73:2, 3). Komo chatum kiʼamigojkan tiku tliwakga kgalhi xtakanajla kinkastakyawan, ¿kgaxmatniw chu tlawaw tuku kinkawanin? Lu tlan komo chuna tlawaw, chu xlikana lu paxtikatsiniyaw kiʼamigojkan pi kinkatachuwinan (Prov. 1:5).

10. ¿Tuku kilitlawatkan komo chatum kiʼamigojkan nakinkastakyawayan?

¹⁰ Wa xTachuwin Dios kinkamalakapastakayan pi “chatum amigo tiku ni makgxtakgnan max nitlan nakinkamamakgkatsiniyan” (Prov. 27:6). ¿Tuku wamputun uma? Kalilakpuwaw pi kgalhkgalhimaw xlakata natitaxtuyaw niku anan lhuwa putlaw chu ni kuentajtlawayaw xlakata kaj wa kinteléfonojkan akxilhmaw. Tsukuyaw tlawanaw pero ni akxilhaw kintijikan. Chu chatum kiʼamigojkan kinkapakgachipayan chu kinkalhtanktiyayan. Lu tliwakglh kinkapakgachipayan chu asta kinkakatsaniyan. Pero xlakata lakapala wi tuku tlawalh, kinkalakgmaxtun xlakata ni nakinkatitiyayan putlaw. Max akglhuwa kilhtamaku napakgakatsanaw, ¿pero nixlikana pi ni katisitsiniw kiʼamigojkan? Wata napaxtikatsiniyaw xlakata kinkamakgtayan. Xtachuna la uma, komo chatum kiʼamigojkan nakinkawaniyan pi chuna la chuwinanaw o la likatsiyaw lakatsala xlimapakgsin Dios, max xapulana nitlan katilimakgkatsiw, pero komo nalisitsiyaw o nasitsiniyaw xatontos nalitaxtuyaw (Ecl. 7:9). Wata kilipaxtikatsinitkan pi ni pekualh xlakata kinkatachuwinan.

11. ¿Tuku max natlawa pi wi tiku nalakgmakgan xtastakyaw chatum amigo?

¹¹ ¿Tuku max natlawa pi wi tiku nalakgmakgan xtastakyaw chatum amigo tiku lu xapaxkina? Wa tatlankit. Tiku tlankajwa kamakgkatsikan lakaskinkgo pi kajwatiya nakawanikan «tuku xlakan kgaxmatputunkgo. Xlakan nialh [kgaxmatkgo] tuku xaxlikana» (2 Tim. 4:3, 4). Niti kakgaxmatniputunkgo xlakata lakpuwankgo pi tlakg lakgskgalalan chu tlakg xlakaskinka litaxtukgo ni xawa amakgapitsin. Pero apóstol Pablo wa: «Komo wi tiku lakpuwan pi xlakaskinka litaxtu pero nichuna, xʼakstu taʼakgskgawima» (Gál. 6:3). Mapakgsina Salomón chuna lichuwinalh: «Tlakg tlan chatum aktsu kgawasa tiku xaskgalala maski limaxkgen nixawa chatum mapakgsina tiku kgolota pero ni kgalhi liskgalala, tiku nialh kgalhi liskgalala xlakata namakglhtinan tastakyaw» (Ecl. 4:13).

12. Akxni likgalhtawakgayaw Gálatas 2:11-14, ¿tuku kinkamasiyaniyan xliʼakxilhtit apóstol Pedro?

¹² Apóstol Pedro kinkawilinin akgtum lu tlan liʼakxilhtit akxni apóstol Pablo stakyawalh kxlakatin amakgapitsin (kalikgalhtawakga Gálatas 2:11-14). Max tlan xtisitsinilh Pablo xlakata la tachuwinalh chu niku stakyawalh. Pero xlakata Pedro xaskgalala xwanit, makgamakglhtinalh xtastakyaw Pablo chu ni sitsinilh. Wata titaxtulh kilhtamaku limapakuwilh «kintalakan [...] tiku lu paxkiyaw» (2 Ped. 3:15).

13. ¿Tuku kuentajkilitlawatkan akxni wi tiku nastakyawayaw?

¹³ Komo namin kilhtamaku akxni nalakpuwanaw pi chatum kiʼamigojkan maklakaskin akgtum tastakyaw, ¿tuku kuentajkilitlawatkan? Akxni nina tachuwinanaw, akstu kakinkakgalhskinkan: «¿Klakpuwan pi nikxni ktlawa tuku nitlan?» (Ecl. 7:16). Lataman tiku lakpuwan pi nikxni tlawa tuku nitlan kalakputsanani amakgapitsin chuna la xla lakpuwan pi xlilat, chu ni wa tuku lakpuwan  Jehová, chu ni kalimasiyani talakgalhaman amakgapitsin. Komo lilakpuwaw uma chu chuntiya lakpuwanaw pi talakaskin nastakyawayan kiʼamigojkan, lakatitum katachuwinaw chu katlawaniw takgalhskinin xlakata nakatsi tuku nitlan tlawama. Putum tuku nawaniyaw anta kakilhtiyaw kBiblia, chu kalakapastakwi pi wa Jehová tiku nalakputsanani kiʼamigojkan chu ni akinin (Rom. 14:10). Wa kalitamakgtayaw xliskgalala xTachuwin Dios chu, akxni wi tiku nastakyawayaw, kalakgalhamaninaw chuna la Jesús (Prov. 3:5; Mat. 12:20). Kalakapastakwi pi Jehová nakinkalikatsiniyan chuna la akinin kalikatsiniyaw amakgapitsin (Sant. 2:13).

14. ¿Tuku lakkaxwili xkachikin Dios kimpalakatakan?

¹⁴ Jehová limaklakaskin xkachikin nema wi kkatiyatni xlakata nakinkapulalinan ktiji nema linan klatamat. Xkachikin Dios lakkaxwili videos, likgalhtawakga chu tamakxtumit nema kinkamakgtayayan nalilatamayaw xtastakyaw Biblia. Tuku talichuwinankgo anta, takilhtinit kBiblia. Lakgkgolotsin tiku pulalinkgo xtatayananin Jehová putsakgo xtapulalit xʼespíritu santo Jehová xlakata nalaksakkgo la tlakg tlan nalichuwinankan Dios. Maski chuna, ni xmakgasni, akxilhparakgo tuku laksakkgonit xlakata uma, xlakata tuku «lama kkakilhtamaku talakgpalima» chu xkachikin Dios tanu tanu tuku lakkaxwili xlakata uma (1 Cor. 7:31).

15. ¿Tuku max tuwa titaxtukgonit tiku lichuwinankgo Dios?

¹⁵ Xlikana, akxni xkachikin Dios lichuwinan xasasti taʼakgatekgsni xlakata tuku masiya Biblia o kinkawaniyan la nalinaw kilatamatkan, tunkun makgamakglhtinanaw. Pero ¿tuku tlawayaw akxni wi tuku laksakkgo nema tuwa namakgkatsiyaw namakgantaxtiyaw? Akgtum liʼakxilhtit, kata nema titaxtukgonit lu tapalaxlanit la katlawakan chu la kakuentajtlawakan niku kakninaniyaw Dios. Wa xlakata Lakgkgolotsin tiku Pulalinankgo laksakkgonit pi xlitatsamat Pukgalhtawakga. Chu wa xlakata, lhuwa congregaciones lakgxtum katlawaka chu kastakanit makgapitsi Pukgalhtawakga. Tumin limaklakaskinkanit xlakata nakatlawakan pukgalhtawakga niku tlakg talakaskin. Komo lamaw niku kastamaka pukgalhtawakga chu lakgxtum katlawamaka congregaciones, max tuwa namakgkatsiyaw nalismaniyaw. Chu la uku, lhuwa tiku lichuwinankgo Dios makgat kakitaxtuni naʼankgo ktamakxtumit. Chu amakgapitsin tiku lu palha skujkgolh xlakata natlawakan o nakaxtlawakan akgtum Pukgalhtawakga max akstu nakakgalhskinkan tuku xlakata stamaka.  Max makgkatsikgo pi nitu litaxtulh kilhtamaku chu litliwakga nema limaklakaskinkgolh. Maski chuna, xatapaxuwan makgtayanamakgolh xlakata tuku lakkaxwilikanit, chu lu kapaxtikatsiniyaw xlakata chuna tlawakgo.

16. ¿La kinkamakgtayayan Colosenses 3:23, 24 chuntiya napaxuwayaw?

¹⁶ Pulaktum tuku nakinkamakgtayayan xlakata chuntiya napaxuwayaw wa pi nalakapastakaw pi wa skujnanimaw Jehová chu xla pulalima xkachikin (kalikgalhtawakga Colosenses 3:23, 24). Mapakgsina David kinkawilinin akgtum lu xatlan liʼakxilhtit xlakata la limakgtayanalh tumin xlakata natlawakan templo. Xla wa: «¿Tiku akit chu tiku kinkachikin, xlakata ni nakmastayaw tamakamastan nema xatapaxuwan mastakan? Xlakata putum wix kilamaxkiyaw chu kaj kkamaxkiyan tuku kilamaxkinitaw» (1 Crón. 29:14). Akxni xatapaxuwan mastayaw kintuminkan, akinin nachuna maxkimaw Jehová tuku xla kinkamaxkiyan. Maski chuna, Jehová paxtikatsini kilhtamaku, litliwakga chu tuku kgalhiyaw nema limakgtayananaw ktaskujut nema xla lakaskin pi natlawayaw (2 Cor. 9:7).

17. ¿Tuku xlakata ni kilitaxlajwanitkan komo talakaskin pi nalakgpaliyaw kintayatkan?

¹⁷ Xlakata ni napataxtuyaw kxatitsu tiji nema linan klatamat, kimputumkan kilistalanitkan xliʼakxilhtit Jesús (1 Ped. 2:21). Komo akxilhaw pi talakaskin nalakgpaliyaw kintayatkan, ni kataxlajwaniw. Wata uma limasiya pi stalaniputunaw xtapulalit Jehová. Xla liwana katsi pi akinin makglakgalhinanin, chu wa xlakata ni kgalhkgalhi pi putum tlan natlawayaw.

18. ¿Tuku kilitlawatkan xlakata tlan nachanaw niku champutunaw?

¹⁸ Wa kaʼakxilhlakachaw kilhtamaku nema aku mima, chu xatapaxuwan kalakgpaliw kintalakapastaknikan chu la likatsiyaw, chu kintayatkan (Prov. 4:25; Luc. 9:62). Chuntiya kataktujuw chu katlawaw tuku wan 2 Corintios 13:11: «Chuntiya kapaxuwatit, chuntiya kalakkaxwiliparatit mintapuwankan». Komo chuna natlawayaw «Dios tiku paxkinan chu masta takaksni» akxtum nakinkatatawilayan. Chu ni kajwatiya katichaw niku champutunaw, wata na nalipaxuwayaw chuna la tlawamaw ktiji nema linan klatamat.