LHUWA natalan tiku akglhuwata kata xʼankgonit latamakgo alakatanu país taspitparakgonit kxpaíseskan. Xlakata tapaxkit nema kgalhinikgo Jehová chu latamanin, ankgonit latamakgo niku tlakg talakaskin tiku nalichuwinankgo Dios (Mat. 22:37-39). ¿Tuku makgxtakgkgonit, chu la kasikulunatlawanit Jehová? Akgtum liʼakxilhtit wa Camerún, akgtum país xalak África occidental.

Kkata 1998, chatum tala tiku wanikan Onésime taxtulh kCamerún chu akgkutati kata latamalh kʼalakatanu país. Akgtum kilhtamaku, anta kPukgalhtawakga, chatum tala lichuwinalh uma liʼakxilhtit xlakata natamalakxtumi la lichuwinankan Dios: «Kalilakpuwaw pi chatiy tiku amigos litaxtukgo ni antiya niku skitinamakgo chu chatum tlakg chipama skiti ni xawa achatum. ¿Nixlikana pi tiku ni lhuwa skitit chipama naʼan niku skitinama xʼamigo?».

Akxni kgaxmatli uma liʼakxilhtit, Onésime lilakpuwa pi tlan xtaspitli kCamerún, niku natalan lakaskinkgo tamakgtay xlakata nakamasiyanikgo tiku likgalhtawakgaputunkgo Biblia. Pero xlilakgaputsa pi nila xlismanilh la latamakan kxpaís xlakata akglhuwata kata ni anta xlama. Wa xlakata, xlakata nalitsakgsa, alh latama akgchaxan papaʼ kCamerún, chu kkata 2012 lakkaxwililh anta naʼan latama.

Onésime lichuwinan: «Xtalakaskin naklismani la klhkaknan chu la latamakan anta. Anta kPukgalhtawakga, talakaskilh naklismani naktawila kxalakpalha laktawilh». Chu xatapaxuwan wan: «Pero, akxni tlakg skgalalh xakkgaxmata, ni xaklakapastaka xalaktsatata laktawilh».

Kkata 2013, Onésime tatamakgaxtokgli Géraldine, tiku akgnajatsa kata xlama kFrancia chu taspitli kCamerún. ¿La kasikulunatlawalh Jehová xlakata wa pulana wilikgolh kxlatamatkan taskujut xla xtakanajlakan? Onésime lichuwinan: «Akxtum kkilaw kʼEscuela xla Tiku lichuwinankgo xTamapakgsin Dios chu kskujwi kBetel. Kata nema titaxtulh, tamunukgolh 20 tiku xkalimakgalhtawakgakan Biblia xalak kkincongregacionkan. Kmakgkatsi pi la uku kwi niku lu tlan “skitinankan”» (Mar. 1:17, 18). Géraldine na wan: «Nikxni klakpuwa pi xakkama makglhtinan lhuwa tasikulunalin».

Judith, tiku xʼanit latama kʼEstados Unidos, tlakg xlichuwinamputun Dios. Xla wan: «Akxni makgatunu xakan kalakgapaxialhnan kifamilia kCamerún, lu xaktasa akxni xaktaspita xlakata xakkamakgxtakga tiku xaktsukunit kkalimakgalhtawakga Biblia». Maski chuna, ni liwana xlakkaxwili naʼan latama kxpaís. Xkgalhi akgtum lu tlan taskujut, chu chuna tlan kxokgoni tiku xmakuchi xtlat, kCamerún. Pero lipawa Jehová chu alh kCamerún.  Lichuwinan pi xlakapastakaku tuku xkgalhi kʼEstados Unidos. Skinilh Jehová pi xmakgtayalh nalismani, chu chatum superintendente de circuito chu xpuskat, lu makgpuwantinikgolh.

¿Chu la kitaxtunilh? Judith wan: «Lata akgtutu kata, kgalhtati tiku xakkamakgalhtawakge tamunukgolh chu uma lu kimakgapaxuwalh». Chu nachuna, precursora especial litaxtulh. La uku, xla chu xchixku, Sam-Castel, liskujmakgolh la superintendente de circuito. ¿Chu tuku kitaxtunilh xtlat Judith? Xla chu xfamilia tekgskgolh akgtum hospital xalak alakatanu país tiku xokgolh operación nema tlawanika xtlat. Chu lu tlan kitaxtulh uma operación.

Chatum tala tiku wanikan Víctor alh latama kCanadá. Akxni likgalhtawakgalh akgtum artículo xla Makatsinina xlakata kgalhtawakgan kʼuniversidad, tsukulh lilakpuwan xlakata xtakgalhtawakga, chu laksakli nialh nakgalhtawakga kʼuniversidad chu tsukulh katsini pulaktum tuku tlan xliskujli. Xla wan: «Xlakata uma, tlakg lakapala ktekgsli akgtum taskujut chu tlan kmakgantaxtilh tuku ankgalhin xaktlawaputun: precursor naklitaxtu». Alistalh, tatamakgaxtokgli Caroline chu ankgolh kCamerún. Akxni xlamakgolh anta, kilakgolh ksucursal, niku kamakgpuwantinika komo tlan xmakgtayanankgolh kCamerún. Víctor wan: «Ni xʼanan tuku xtlawalh pi nakwanaw pi ni. Chu, xlakata ni lhuwa tuku xakkgalhiyaw, kmakgamakglhtinaw uma invitación». Maski Caroline tsinu xtatatla, laksakkgolh namakgantaxtikgo tuku xlakkaxwilikgonit.

Víctor chu Caroline akxtum tsukukgolh skujkgo la precursores regulares xlakata nakamakgtayakgo latamanin tiku xkatsiniputunkgo xlakata Biblia. Wa maklakaskinkgolh tumin nema xmakikgonit, pero alistalh makgapitsi papaʼ ankgolh skujkgo kCanadá xlakata tlan xtaspitparakgolh kCamerún chu chuntiya precursores xlitaxtukgolh. ¿La kasikulunatlawalh Jehová? Kilakgolh kʼEscuela xla Tiku lichuwinankgo xTamapakgsin Dios, skujkgolh la precursores especiales chu siervos de construcción litaxtukgolh. Víctor wan: «Akxni kmakgxtakgwi tuku lhuwa xakkgalhiyaw tlawalh pi xakmakgkatsiw xtamakgtay Jehová».

Kkata 2002, chatum tala tiku wanikan Alain, tiku xkgalhtawakgama kʼuniversidad anta kʼAlemania, likgalhtawakgalh tratado Joven, ¿qué harás con tu vida?, nema makgtayalh nalakkaxwili tuku xʼama tlawa kxlatamat. Kkata 2006, kilalh Niku Kamasiyanikan Lakgkgolotsin chu Ministeriales chu malakgachaka kCamerún, kpaís niku xla xlakachinit.

Anta tekgsli akgtum taskujut niku kskuja itat kilhtamaku. Alistalh, tekgsli atanu taskujut niku tlakg kxokgonikan, pero xlilakgaputsa pi uma nialh xmaxkilh talakaskin tlakg nalichuwinan Dios. Wa xlakata, akxni wanika pi kskujli la precursor especial, xatapaxuwan makgamakglhtinalh. Xmalana Alain malaknunilh pi tlakg xʼama xokgoni xlakata ni xʼalh, pero xla ni makgamakglhtinalh. Alh kilhtamaku, tatamakgaxtokgli Stéphanie, tiku akglhuwata kata la xlama kFrancia. ¿Tuku tuwa kitaxtunilh Stéphanie xlakata alh latama kCamerún?

Stéphanie lichuwinan: «Tsinu ktsukulh tatatla chu wi tuku xtlawa pi lakapala xaktatatlalh, pero kimaxkika tuku xkimakgtayalh xlakata tlakg tlan nakmakgkatsi». Jehová lu kasikulunatlawalh uma tamakgaxtokgat xlakata tayanikgolh. Alain lichuwinan: «Akxni kkaw lichuwinanaw Dios kKaté, akgtum aktsu kachikin, kkatekgswi lhuwa latamanin tiku xlakaskinkgo pi xakkalimakgalhtawakgew  Biblia. Klimaklakaskiw teléfono xlakata nakkamakgalhtawakgeyaw. Chatiy tiku xakkamakgalhtawakgeyaw tamunukgolh chu lakkaxwilika akgtum grupo xla tiku xlichuwinankgo Dios». Stéphanie lichuwinampara: «Ni anan atanu tuku tlakg makgapaxuwanan nixawa nakamakgtayaya latamanin nalakgapaskgo Jehová chu namakamaxkikgo xlatamatkan. Unu kCamerún makglhuwa kmakgkatsinitaw uma tapaxuwan». La uku Alain chu Stéphanie skujmakgolh la superintendente de circuito.

Gisèle tamunulh akxni xkgalhtawakgamajku kʼItalia xlakata makuchina xlitaxtulh. Lu kaks xlilakawan la xlinkgo xlatamatkan tamakgaxtokgat tiku precursores xlitaxtukgo tiku makgalhtawakgekgolh, chu xla na tlakg xlichuwinamputun Dios. Wa xlakata precursora regular litaxtulh maski xkgalhtawakgamajku.

Gisèle xtaspitputun kCamerún xlakata tlakg kskujnanilh Jehová, pero wi tuku xlilakgaputsa. Xla wan: «Xʼamaka kimakglhtikan permiso nema xakkgali xlakata xaklama kʼItalia chu xakkama kamakgxtakga kiʼamikgos chu kifamilia tiku xwilakgo kʼItalia». Maski xtitaxtuma putum uma, mayo kkata 2016, taspitli kCamerún. Alh kilhtamaku tatamakgaxtokgli Léonce, chu sucursal kawanilh pi xʼankgolh kkachikin Ayos, niku tlakg xtalakaskin tiku xlichuwinankgolh Dios.

¿Chu la xwanit latamat kʼuma kachikin? Gisèle lichuwinan: «Makglhuwa ni xakkgalhiyaw luz akglhuwa kilhtamaku chu nila xakcargarliyaw kinteléfonoskan. Wa xlakata, putum kilhtamaku xmixkgonit. Kkatsinilh naklimalhkuyu kiwi, chu katsisni xakkanaw putsayaw chuchut xlakata akxni ni xʼanan lhuwa latamanin, xaklimaklakaskinaw carretillas chu tuku xaklimakgskgoʼanaw». Gisèle lichuwinan tuku kamakgtayalh natayanikgo: «Ktayaniw putum uma xlakata xtamakgtay xʼespíritu Jehová, xlakata xaklamakgtayayaw kinchatunukan chu xlakata kiʼamigoskan chu kifamiliajkan kinkamakgpuwantinikgon, chu tumin nema lakgachunin xkinkamaxkikanan».

¿Lipaxuwa Gisèle xlakata taspitli kpaís niku lakachilh? Xla wan: «Chuna, lu klipaxuwa. Xapulana, kkgalhiw makgapitsi taʼakglhuwit chu ktaxlajwaniw. Pero, akxni ni wa lu kuenta ktlawaw, kinchixku chu akit kkatsiw pi ktlawaw tuku kilitlawatkan xwanit. Klipawanaw Jehová chu kmakgkatsiyaw pi tlakg lakatsu kwilaniw». Léonce chu Gisèle kilakgolh kʼEscuela xla Tiku lichuwinankgo xTamapakgsin Dios chu la uku precursores especiales temporales litaxtukgo.

Xtachuna la sikitinanin tiku titaxtukgo tuku tuwa xlakata nachipakgo xalaktlan skiti, natalan tiku taspitkgo xpaískan niku lakachinkgonit lhuwa tuku limakgxtakgkgo xlakata nakamakgtayakgo tiku xliputum xnakujkan makgamakglhtinankgo tamakatsin xla Tamapakgsin. Xlikana, Jehová nalakapastaka chu nakasikulunatlawa umakgolh natalan xlakata tapaxkit nema kgalhinikgonit xtukuwani (Neh. 5:19; Heb. 6:10). Komo wix lapat kʼalakatanu país chu katsiya pi kpaís niku lakachita tlakg talakaskin tiku nalichuwinankgo Dios, ¿lakpuwana pi tlan xtaspitti? Komo chuna natlawaya, liwana kakatsi pi Jehová lu nasikulunatlawayan (Prov. 10:22).