1. ¿Tuku limapakgsinalh Jesús kMateo 28:18-20?

AKXNI xlakastakwananita, Jesús katasiyanilh kstalaninanin, tiku xtamakxtumikgonit kʼGalilea. Wi tuku lu xlakaskinka xʼama kawani. ¿Tuku uma? Tlan nalikgalhtawakgayaw kMateo 28:18-20 (kalikgalhtawakga).

2. ¿Tukuya takgalhskinin naʼakxilhaw?

² Putum tiku skujnaniyaw Dios la uku na kilikgalhakgaxmatatkan xlimapakgsin Jesús xlakata nakamakgtayayaw latamanin kstalaninanin nawankgo. Wa xlakata, kaʼakxilhwi akgtutu takgalhskinin nema tatalakxtumi taskujut nema kinkalakgayawanitan Jesús. Pulana, xlakata ni kajwatiya talakaskin nakamasiyaniyaw xlimapakgsin Dios tiku xasasti kstalaninanin Cristo, ¿tuku atanu kilitlawatkan? Xlipulaktiy, ¿la tlan namakgtayanankgo putum congregación xlakata natatliwakglha xtakanajla tiku limakgalhtawakgemaka Biblia? Chu, xlipulaktutu, ¿la tlan nakamakgtayayaw natalan tiku tamakgatlinikgonit Dios xlakata namakgtlawaparakgo uma taskujut?

3. ¿Tuku nachuna kilitlawatkan nema lichuwinalh Jesús?

³ Jesús liwana masiyalh pi kinkalimasiyanitkan latamanin tuku xla limapakgsinalh. Pero, lu xlakaskinka kuentajnatlawayaw pi Jesús ni kajwatiya wa «Kakamasiyanitit putum tuku kkalimapakgsinitan». Wata xla wa «Kakamasiyanitit namakgantaxtikgo putum tuku kkalimapakgsinitan». Komo makgantaxtiputunaw  uma, kinkalimasiyanitkan tiku kamakgalhtawakgeyaw tuku xlitlawatkan, pero nachuna la natlawakgo. ¿Tuku xlakata?

4. Kalichuwinanti akgtum liʼakxilhtit xlakata la tlan namakgtayayaw chatum latamanin namakgantaxti tuku limapakgsinalh Cristo.

⁴ ¿La tlan namasiyaniyaw chatum lataman namakgantaxti tuku limapakgsinalh Cristo? Kalichuwinaw akgtum liʼakxilhtit. ¿Tuku tlawa chatum tiku mamakgatawakgenan la matlawanikan putlaw xlakata tiku kamasiyanima nakgalhakgaxmatkgo limapakgsin xlakata la matlawanikan putlaw? Max pulana kawani tuku umakgolh limapakgsin. Pero komo lakaskin nakatsinikgo la namakgantaxtikgo, wi atanu tuku xlitlawat. Talakaskin pi akxtum nakataʼan akxni namatlawanikgo putlaw kcarretera xlakata nakamakgtaya natlawakgo tuku kamasiyaninit. ¿Tuku kinkamasiyaniyan uma?

5. 1) Chuna la wan Juan 14:15 chu 1 Juan 2:3, ¿tuku kilimasiyanitkan natlawa tiku makgalhtawakgemaw? 2) Kalichuwinanti akgtum liʼakxilhtit xlakata la tlan natlawayaw.

⁵ Akxni wi tiku limakgalhtawakgeyaw Biblia, masiyaniyaw tuku lakaskin Dios pi natlawayaw. Pero ni kajwatiya uma talakaskin. Kilimasiyanitkan la tlan nalilatama tuku katsinima (kalikgalhtawakga Juan 14:15; 1 Juan 2:3). Kiliʼakxilhtitkan tlan nalimasiyaniyaw la tlan nalilatama xtastakyaw Biblia kʼescuela, kxtaskujut o la liwana nalaksaka tuku nalilakgastanan. Na tlan nalitachuwinanaw tuku titaxtunitaw nema limasiya la kinkamakgtayanitan xtastakyaw Biblia o la kinkamakgtayan tlan tuku nalaksakaw. Chu, akxni akxtum tatlawayaw oración tiku makgalhtawakgemaw, tlan naskiniyaw Jehová pi kalipulalilh xʼespíritu santo (Juan 16:13).

6. ¿Tuku atanu kilitlawatkan xlakata nakamasiyaniya amakgapitsin namakgantaxtikgo xlimapakgsin Jesús?

⁶ ¿Tuku atanu kilitlawatkan xlakata nakamasiyaniya amakgapitsin namakgantaxtikgo xlimapakgsin Jesús? Kilimakgtayatkan tiku makgalhtawakgemaw xlakata nakamakgtayaputun latamanin na kstalaninanin Cristo nawankgo. Makgapitsi tiku kalimakgalhtawakgekan Biblia lu pekuankgo maski kaj lilakpuwankgo pi nakalitachuwinankgo Dios latamanin. Wa xlakata, talakaskin nakamakgtayayaw tlakg liwana naʼakgatekgskgo xaxlikana tuku masiya Biblia xlakata tliwakga nawan xtakanajlakan, chu chuna xnakujkan nakamakgpuwantini nalichuwinankgo Dios. ¿Tuku kilitlawatkan xlakata nakamakgtayayaw nalichuwinamputunkgo xalaktlan tamakatsinin?

7. ¿La tlan namakgtayayaw tiku makgalhtawakgemaw nalichuwinamputun xalaktlan tamakatsinin?

⁷ Max tlan nakgalhskinaw tiku makgalhtawakgemaw: «¿La tlakg tlan kitaxtuninitan kmilatamat lata makgamakglhtinanti tamakatsinin xla Tamapakgsin? ¿Lakpuwana pi amakgapitsin latamanin talakaskin na nakgaxmatkgo? ¿Tuku tlan natlawaya xpalakatakan?» (Prov. 3:27; Mat. 9:37, 38). Kamasiyaniw tratados nema min kit de enseñanza chu kakgalhskiw tuku lakpuwan pi max xlakgatikgolh xtalilakgapasni, xʼamigos o tiku akxtum kataskuja. Kamaxkiw tuku nalaksaka chu akxtum katalakkaxwiliw tuku nawan xlakata nakatsini la tlan namasta. Chu akxni natsuku lichuwinan Dios, chuntiya kamakgtayaw (Ecl. 4:9, 10; Luc. 6:40).

8. ¿Tuku xlakata xlakaskinka pi tiku makgalhtawakgemaw lu napaxki Dios chu latamanin? (Na kaʼakxilhti recuadro « La namakgtayayaw tiku makgalhtawakgemaw tlakg napaxki Dios»).

⁸ Kalakapastakwi pi Jesús kinkawanin nakamasiyaniyaw amakgapitsin nakgalhakgaxmatkgo putum tuku xla limapakgsinalh. Xlikana, uma na kilhchanima pulaktiy limapakgsin nema tlakg xlakaskinka, nema wa pi napaxkiyaw Dios chu kintalatamankan  (Mat. 22:37-39). Komo namasiyaniyaw tiku makgalhtawakgemaw namakgantaxti uma, makgtayamaw nalichuwinan Dios. Xlikana pi max tiku makgalhtawakgemaw pekuan akxni lilakpuwan pi nalichuwinan Dios, pero liwana kawaniw pi Jehová namakgtaya nialh nakapekuani latamanin (Sal. 18:1-3; Prov. 29:25). Uma artículo limin akgtum recuadro niku lichuwinan la tlan namakgtayayaw tiku makgalhtawakgemaw xlakata tlakg napaxki Dios. Nachuna, putum congregación tlan nakamakgtayakgo tiku xalaksasti xlakata tlakg nalimasiyakgo tapaxkit. Kaʼakxilhwi la tlan natlawakgo.

9. ¿La tlawa chatum lataman xlakata tlakg nakatsini la namatlawani putlaw?

⁹ Kalichuwinamparaw liʼakxilhtit xlakata tiku katsinima la matlawanikan putlaw. Akxni matlawanima putlaw, ni kajwatiya katsinima tuku wanima xmamakgatawakgena, tiku akxtum taʼan, wata na katsini akxni kaʼakxilha amakgapitsin tiku matlawanikgo putlaw. Akgtum liʼakxilhtit, max xmamakgatawakgena naskini pi kaʼakxilhli akgtum putlaw nema maxki talakaskin atanu putlaw xlakata naʼakgapula. O max namasiyani akxni wi tiku ni palha mapasi xmakgskgot xputlaw xlakata ni nakamalakgachixi tiku mimakgo. Umakgolh liʼakxilhtit lu xlakaskinka tuku masiyani tiku mamakgatawakgemaka.

10. ¿Tuku namakgtaya tiku kgalhtawakgama xlakata nastaka xtakanajla?

¹⁰ Xtachuna la uma, akxni tiku kgalhtawakgama tsuku an ktiji nema linan klatamat, ni kajwatiya katsini xlakata xmakgalhtawakgena, wata nachuna xlakata xatlan xliʼakxilhtitkan amakgapitsi xlakskujnin Jehová. Wa xlakata lu xlakaskinka naʼan ktamakxtumit xlakata nastaka xtakanajla. Tuku anta nakgaxmata natlawa pi tlakg nakatsini, namatliwakglha xtakanajla chu namakgtaya tlakg napaxki Dios (Hech. 15:30-32). Chu ni kajwatiya uma, tiku makgalhtawakge tlan nakamalakgapasni natalan tiku na max titaxtukgonit tuku xla titaxtuma kxlatamat. ¿Tuku liʼakxilhtit xlakata tapaxkit naʼakxilha kcongregación tiku makgalhtawakgemaw? Kalilakpuwanti umakgolh liʼakxilhtit.

11. ¿Tuku liʼakxilhtit naʼakxilha kcongregación tiku kgalhtawakgama chu la namakgtaya?

¹¹ Chatum puskat tiku xʼakstu kakuentajtlawama xkamanan tiku kgalhtawakgama, akxilha chatum tala puskat tiku nachuna titaxtuma. Kaks lilakawan akxni akxilha la lhuwa liskuja tala puskat xlakata nakataʼan xkamanan kPukgalhtawakga. Achatum tiku kgalhtawakgama, tiku liskujma xlakata nialh naxkuli, lakgapasa chatum tala tiku nachuna max titaxtulh. Tala wani pi xlakata tapaxkit nema kgalhini Jehová tlawalh pi nakgalhakgaxmata tastakyaw xalak Biblia chu namakgxtakga tuku ksmanichipanit (2 Cor. 7:1; Filip. 4:13). Akxni wanikgolh tuku xtitaxtunit chu wanilh pi na tlan chuna natlawa, tiku kgalhtawakgama lu makgpuwantinilh. Chu chatum tsumat tiku limakgalhtawakgemaka Biblia akxilha chatum tala tiku lina kata tiku tasiya pi lu paxuwa xlakata xtatayana Jehová. Uma tlawa pi tiku kgalhtawakgama tlakg nakatsiputun tuku xlakata uma tala puskat ankgalhin paxuwa.

12. ¿Tuku xlakata wanaw pi tlan nakamakgtayayaw nastakkgo xtakanajlakan tiku kgalhtawakgamakgolh?

¹² Akxni tiku kgalhtawakgama kalakgapasa natalan tiku ni makgxtakgkgo Dios, tlan akxilha tuku kilhchanima kgalhakgaxmatkan xlimapakgsin Cristo xlakata napaxkiyaw Dios chu latamanin (Juan 13:35; 1 Tim. 4:12). Xlikana, chuna la lichuwinawa, tiku kgalhtawakgama tlan nalitamakgtaya xliʼakxilhtitkan natalan tiku nachuna titaxtumakgolh la xla. Chuna naʼakxilha pi tlan tlawakan talakgpalit klatamat xlakata tlan kstalanina Cristo litaxtukan (Deut. 30:11). Chuna la akxilhaw, putum congregación  tlan namakgtayanan xlakata nastaka xtakanajlakan tiku kalimakgalhtawakgemaka Biblia (Mat. 5:16). Wa xlakata kalilakpuwanti uma: «¿Tuku ktlawama xlakata nakkamakgpuwantini tiku kalimakgalhtawakgemaka Biblia tiku minkgo ktamakxtumit?».

13, 14. ¿La kalikatsinilh Jesús xʼapóstoles akxni xtaxlajwanikgonit?

¹³ Kamakgtayaputunaw kinatalankan tiku tamakgatlinikgonit Dios namakgtlawaparakgo taskujut xlakata nakamakgtayayaw latamanin kstalaninanin Cristo nawankgo. Xlakata nakatsiyaw la natlawayaw, kalilakpuwaw la kalikatsinilh Jesús xʼapóstoles akxni xtaxlajwanikgonit.

¹⁴ Akxni xkgalhsputmaja kilhtamaku la Jesús xlichuwinama Dios kKatiyatni, akxni xʼamaka makgnikan, xʼapóstoles makgxtakgkgolh chu tsalakgolh (Mar. 14:50; Juan 16:32). ¿La kalikatsinilh Jesús akxni taxlajwanikgolh? Kaʼakxilhwi tuku tlawalh akxni xlakastakwananita. Kawanilh makgapitsin xtamakgalhtawakgen lakpuskatin pi xkamakatsinikgolh xʼapóstoles pi xlakastakwananita. Kawanilh: «¡Ni kapekuantit! Kapitit, kakawanitit kinatalan» (Mat. 28:10a). Maski makgxtakgkgolh, kaʼakxilhwi pi Jesús ni kalakgmakgalh, wata chuntiya kalimapakuwilh «kinatalan». Jesús chuna likatsilh la Jehová, lakgalhamaninalh chu ankgalhin tapatinalh (2 Rey. 13:23).

15. ¿Tuku makgkatsiyaw xpalakatakan tiku nialh lichuwinankgo Dios?

¹⁵ Nachuna akinin lu kalilakgaputsayaw tiku nialh lichuwinankgo Dios. Chuntiya kinatalankan litaxtukgo chu kapaxkiyaw. Ni patsankgayaw putum tuku tlawakgolh xpalakata Jehová makgasa, chu asta akglhuwa kata (Heb. 6:10). Lu kalakapastakaw (Luc. 15:4-7). ¿La tlan nastalaniyaw xliʼakxilhtit Jesús chu nakalimasiyaniyaw pi kalilakgaputsayaw?

16. ¿La nakalimasiyaniyaw pi kalilakgaputsayaw kinatalankan tiku tamakgatlinikgonit Dios?

¹⁶ Xatapaxuwan nakawaniyaw pi kaʼankgolh ktamakxtumit. Pulaktum tuku tlawalh Jesús akxni xʼapóstoles xtaxlajwanikgonit wa pi kawanilh pi xtamakxtumikgolh (Mat. 28:10b; 1 Cor. 15:6). La uku akinin na tlan nakawaniyaw tiku tamakgatlinikgonit Dios pi kaʼankgolh ktamakxtumit. Xlikana, katsiyaw pi max natalakaskin pi makglhuwa nakawaniyaw asta akxni naʼankgo. Xlikana pi Jesús lu lipaxuwalh akxni xtamakgalhtawakgen tamakxtumikgolh, chu akinin nachuna namakgkatsiyaw uma tapaxuwan (Mateo 28:16; katamalakxtupi Lucas 15:6).

17. ¿Tuku kilitlawatkan komo chatum tiku tamakgatlininit Dios namin ktamakxtumit?

¹⁷ Tlan nakamakgamakglhtinanaw. Akxni katatanokglhli xtamakgalhtawakgen, Jesús katalakatsuwinilh chu katachuwinalh xlakata xmakgkatsikgolh pi tlan kamakgamakglhtinalh (Mat. 28:18). Chu akinin, ¿tuku natlawayaw komo naʼakxilhaw pi natanuyacha kPukgalhtawakga chatum tiku tamakgatlininit Dios? Nalakgtalakatsuwiyaw chu tlan namakgamakglhtinanaw. Max nalilakgaputsayaw xlakata ni nakatsiyaw tuku nawaniyaw, pero max kaj talakaskin nawaniyaw pi lu lipaxuwayaw pi akxilhmaparaw.

18. ¿La tlan nakamakgpuwantiniyaw chu tlan nakamamakgkatsiniyaw tiku tamakgatlinikgonit Dios?

¹⁸ Nakamakgpuwantiniyaw chu tlan nakamamakgkatsiniyaw. Xtamakgalhtawakgen Jesús max lu lilakgaputsakgolh akxni lilakpuwankgolh pi xʼamakgolh lichuwinankgo Dios kxlikalanka Katiyatni. Jesús tlan kamamakgkatsinilh akxni kawanilh: «Kkatawilan chali chali asta kxlisputni kakilhtamaku» (Mat. 28:20). Chu tlan kitaxtulh, xlakata ni makgas kilhtamaku nitu xkamachokgo la «xmasiyamakgolh chu xlichuwinamakgolh xatlan tamakatsinin» (Hech. 5:42). Tiku tamakgatlinikgonit  Dios na lakaskinkgo pi nakamakgpuwantiniyaw chu tlan nakamamakgkatsiniyaw. Max lu nalilakgaputsakgo akxni lilakpuwankgo pi nalichuwinamparakgo Dios. Tlan nakamamakgkatsiniyaw akxni nakawaniyaw pi ni xʼakstukan nalichuwinankgo Dios chu nakawaniyaw pi nakataʼanaw akxni namatlanikgo. Lu napaxtikatsinikgo kintamakgtaykan. Komo nakaʼakxilhaw chu nakalikatsiniyaw chuna la kinatalankan, kincongregacionkan max lu nalipaxuwakgo pi tsukumaparakgolh talakatsuwinikgo Dios.

19. ¿Tuku masputuputunaw, chu tuku xlakata?

¹⁹ ¿Asta tuku kilhtamaku chuntiya nalichuwinanaw Dios chu nakamakgtayayaw latamanin kstalaninanin Cristo nalitaxtukgo? Asta kxlisputni uma kakilhtamaku (Mat. 28:20; kaʼakxilhti glosario, «xlisputni kakilhtamaku»). ¿Tlan namakgantaxtiyaw uma tuku limapakgsinalh Jesús? ¡Liwana lakkaxwilinitaw pi chuna natlawayaw! Xatapaxuwan limaklakaskinaw kinkilhtamakujkan, kilitliwakgakan chu kintuminkan xlakata nakaputsayaw putum tiku kxnakujkan makgamakglhtinamputunkgo «xaxlikana tuku masta latamat nema ni kgalhi xlisputni» (Hech. 13:48). Chuna stalaniyaw xliʼakxilhtit Jesús, tiku wa: «Kiliwat wa nakmakgantaxti xtalakaskin tiku kimalakgachanit chu nakmasputu xtaskujut» (Juan 4:34; 17:4). Na masputuputunaw taskujut nema xla kinkalakgayawanitan (Juan 20:21). Chu lakaskinaw pi putum kinatalankan, asta tiku tamakgatlinikgonit Dios, akxtum kakinkataskujkgon asta akxni namin lisputni (Mat. 24:13).

20. Chuna la wan Filipenses 4:13, ¿tuku xlakata tlan makgantaxtiyaw taskujut nema kinkalakgayawan Jesús?

²⁰ Xlikana, taskujut nema kinkalakgayawan Jesús tuwa kitaxtu. Pero ni kiʼakstukan wilaw, xla liwana kinkawanin pi akxtum xʼama kinkatatawilayan. Kgalhakgaxmataw limapakgsin xlakata nakamakgtayayaw latamanin kstalaninanin Cristo nalitaxtukgo chuna la «xtaskujnin Dios» chu akxtum natatlawankgo Cristo (1 Cor. 3:9; 2 Cor. 2:17). Wa xlakata tlan namakgantaxtiyaw uma. Akgtum lanka talakgalhaman namakgantaxtiyaw kintaskujutkan chu nakamakgtayayaw amakgapitsin nachuna natlawakgo (kalikgalhtawakga Filipenses 4:13).