1, 2. 1) ¿Tuku xlakata tiku aku tamakgaxtokgkgonit xlilat nalipawankgo Jehová? (Salmo 37:3, 4). 2) ¿Tuku naʼakxilhaw kʼuma artículo?

¿AKU tamakgaxtokgti o aku pimpat tamakgaxtokga? Komo chuna, xlikana pi xatapaxuwan talatapaputuna tiku lu paxkiya. Xlikana, ktamakgaxtokgat naʼanan taʼakglhuwit chu akxni aku tamakgaxtokgkanit xlitalaksakat tuku lu xlakaskinka. Tuku wixin nalaksakatit natlawa pi napaxuwayatit lhuwa kata o ni. Komo lipawanatit Jehová, tlan tuku nalaksakatit, mintamakgaxtokgatkan tlakg tliwakga nawan chu tlakg napaxuwayatit. Pero, komo ni nastalaniyatit xtastakyaw Jehová, max nakgalhiyatit taʼakglhuwit nema nalaktlawa mintamakgaxtokgatkan chu ni katipaxuwatit (kalikgalhtawakga Salmo 37:3, 4).

² Maski kʼuma artículo katachuwinamaka tiku aku tamakgaxtokgkgonit, na nalichuwinankan tuku max natitaxtukgo putum tamakgaxtokgat. Nalichuwinan xliʼakxilhtitkan lakchixkuwin chu lakpuskatin tiku ni makgxtakgkgolh Dios chu kalichuwinankan kBiblia chu tuku kinkamasiyanikgoyan xlakata latamat chu tamakgaxtokgat. Na naʼakxilhaw tuku kinkamasiyanikgoyan makgapitsi tamakgaxtokgat xalak kkinkilhtamakujkan.

3, 4. ¿Tuku max tuwa natitaxtukgo tiku aku tamakgaxtokgkgonit?

³ Kmakgapitsi kachikinin, max latamanin nakawanikgo tiku aku tamakgaxtokgkgonit pi kalinkgolh xlatamatkan chuna la putum latamanin. Akgtum liʼakxilhtit, max xnatlatnikan o amakgapitsi tiku xalak xfamilia lu kawanikgo pi tunkun katsukukgolh kgalhikgo xkamanankan. O, xlakata lakaskinkgo  pi tlan kakakitaxtunilh, makgapitsi xʼamigoskan chu xfamiliaskan nakawanikgo tiku aku tamakgaxtokgkgonit pi xlilat natamawakgo akgtum chiki chu lhuwa tuku lu lakstlan.

⁴ Komo tamakgaxtokgat ni kuentajnatlawa, max nalaksaka tuku natlawa pi nalaklin lhuwa tumin. Chu, xlakata naxokgonankgo, max natalakaskin pi xchatiykan naskujkgo lhuwa horas. Chu nialh katikgalhikgolh lhuwa kilhtamaku xlakata xʼakstukan nalikgalhtawakgakgo Biblia, nakakninanikgo Dios kfamilia chu nalichuwinankgo Dios. Max nialh katiʼankgolh kmakgapitsi tamakxtumit xlakata tlakg lhuwa horas naskujkgo chu chuna tlakg lhuwa tumin natlajakgo, o xlakata ni namakgatsankgakgo xtaskujutkan. Putum uma natlawa pi ni katilipaxuwakgolh chuna la tlan kskujnanikgolh Jehová.

5. ¿Tuku masiyaniyan xliʼakxilhtit Klaus chu Marisa?

⁵ Anan lhuwa liʼakxilhtit nema limasiya pi limaklakaskinkan latamat xlakata lhuwa tuku nakgalhikan ni limin tapaxuwan. Wa uma tuku katsinikgolh Klaus chu Marisa. * Akxni tamakgaxtokgkgolh, xchatiykan tsukukgolh skujkgo putum kilhtamaku xlakata nitu xkatsankganilh. Pero ni xpaxuwakgo. Klaus wan: «Tlakg lhuwa xakkgalhiyaw nixawa tuku xakmaklakaskinaw, pero xlakata kintakanajlakan nitu xaklakkaxwilinitaw xlakata wi tuku naklakgchanaw. Xlikana pi latamat nema xaklinaw lu tuwa xwanit chu lu xaktlakgwanaw». Max wix na akxilhnita pi akxni liskujnita xlakata tlakg nakgalhiya tumin ni makgapaxuwanitan. Pero ni kataxlajwani. Xatlan xliʼakxilhtitkan amakgapitsin tlan namakgtayayan. Pulana, kaʼakxilhwi la xalakchixkuwin tlan nakatsinikgo xlakata mapakgsina Jehosafat.

6. Chuna la wan xtastakyaw Proverbios 3:5, 6, ¿tuku tlawalh mapakgsina Jehosafat akxni lu tuwa tuku titaxtulh?

⁶ Xalakchixkuwin, ¿min kilhtamaku lilakgaputsayatit xlakata tuku lakgayatit? Komo chuna, xliʼakxilhtit Jehosafat tlan nakamakgtayayan. Xlakata mapakgsina xlitaxtu, wa xlakgchan nakuentajtlawa putum kachikin. Xlakata tlan xmakgantaxtilh uma tuku xlakgaya, tlawalh putum tuku xmatlani xlakata xkuentajtlawalh kachikin. Katlawalh laklanka patsaps kxkachikinin Judá chu mastokgli liwaka 1,160,000 soldados (2 Crón. 17:12-19). Titaxtulh kilhtamaku lu tuwa tuku titaxtulh. Ksoldados Ammón, Moab chu tiku xwilakgolh kkasipijni xla Seír minkgolh katalalakatawakakgo mapakgsina, xfamilia chu kachikin (2 Crón. 20:1, 2). ¿Tuku tlawalh Jehosafat? Skinilh Jehová tamakgtay chu litliwakga, chuna la wan xatlan xtastakyaw Proverbios 3:5, 6 (kalikgalhtawakga). Xʼoración nema tatekgsa k2 Crónicas 20:5-12, masiya la xlilhuwa xlipawan xapaxkina xTlat xalak akgapun. ¿La kgalhtilh Jehová?

7. ¿La kgalhtilh Jehová xʼoración Jehosafat?

⁷ Jehová maklakaskilh chatum levita tiku xwanikan Jahaziel, xlakata xkgalhtilh  Jehosafat. Wanilh: «Katayatit niku kalakgchanan, kaks katayatit chu kaʼakxilhtit la Jehová nakalakgmaxtuyan» (2 Crón. 20:13-17). ¡Kaks malakawaninan uma tuku lalh! Pero uma tuku kawanika ni kawanilh chatum chixku; kawanilh Jehová. Jehosafat lu lipawa Dios wa xlakata kgalhakgaxmatli. Akxni mapakgsina chu kachikin ankgolh talalakatawakakgo xtalatlawanakan, xla ni pulana kayawalh ksoldados, wata pulana kayawalh lakchixkuwin tiku kaj xkilhtlimakgo chu ni xlinkgo tuku nalitalatlawanankgo. Chuna la Jehová xmalaknuninit Jehosafat, katlajalh xtalamakgasitsin (2 Crón. 20:18-23).

8. ¿Tuku tlan nakatsinikgo xalakchixkuwin xlakata xliʼakxilhtit Jehosafat?

⁸ Xalakchixkuwin, ¿tuku tlan nakatsiniyatit xlakata xliʼakxilhtit Jehosafat? Wixin kalakgchanan nakuentajtlawayatit mifamiliajkan, wa xlakata liskujatit nakakuentajtlawayatit chu nakamaxkiyatit tuku maklakaskinkgo. Wa xlakata, akxni chin taʼakglhuwit max lakpuwanatit pi tlan miʼakstukan nalakkaxtlawayatit. Pero ni kamastatit talakaskin nalipawanatit militliwakgakan. Wata katlawanitit oración Jehová chu kaskinitit xtamakgtay. Nachuna, xliputum minakujkan kakatatlawatit oración milakpuskatinkan. Kaputsatit xtapulalit Jehová akxni likgalhtawakgayatit xTachuwin chu likgalhtawakga nema kinkamaxkiyan xkachikin, chu kalilatapatit tastakyaw nema natekgsatit. Max makgapitsi latamanin nitlan katiʼakxilhkgolh pi akxni wi tuku nalaksakatit anta kBiblia nakilhtiyayatit chu asta max nakawanikgoyan pi komo chuna natlawayatit kaj nalimasiyayatit pi ni lakgskgalalan wixin. Max nawankgo pi tuku tlakg nalitamakgtayakgo mifamiliajkan wa tumin chu lhuwa tuku kgalhikan. Pero kalakapastaktit xliʼakxilhtit Jehosafat, tiku limasiyalh pi xlipawan Jehová xlakata tuku tlawalh. Jehová ni makgxtakgli uma chixku tiku ni makgatsankgananilh chu na ni katikamakgxtakgni (Sal. 37:28; Heb. 13:5). ¿Chu tiku tamakgaxtokgkgonit? ¿Tuku tlan natlawakgo xlakata xatapaxuwan latamat nakgalhikgo?

9. ¿Tuku tlan nawanaw xpalakata palakachuwina Isaías chu xpuskat?

⁹ Isaías chu xpuskat limaklakaskinkgolh xlatamatkan xlakata naskujnanikgo Jehová. Xla palakachuwina xwanit chu xpuskat max na tlawalh uma taskujut, xlakata Biblia limapakuwi «palakachuwina» (Is. 8:1-4). Uma tamakgaxtokgat tlakg xlakaskinka xʼakxilhkgo nakakninanikgo Jehová. Xlikana pi Isaías chu xpuskat lu tlan liʼakxilhtit kalitaxtunikgo tamakgaxtokgat xala uku.

10. Xlakata namatliwakglhkgo chuna la skujnaniputunkgo Jehová, ¿tuku xlakata tiku makgaxtokgkgo xlikgalhtawakgatkan tuku lichuwinanit Biblia pi ama kgantaxtu?

¹⁰ ¿La tlan nastalanikgo xliʼakxilhtit Isaías chu xpuskat putum tiku tamakgaxtokgkgonit? Natlawakgo putum tuku matlanikgo xlakata la naskujnanikgo Jehová. Xlakata tlan namatliwakglhkgo la kanajlanikgo Dios tlan akxtum nalikgalhtawakgakgo tuku lichuwinanit Biblia pi xʼama kgantaxtu chu naʼakxilhkgo la uma ankgalhin kgantaxtu (Tito 1:2). * Tlan nalilakpuwankgo la tlan namakgtayanankgo xlakata nakgantaxtu makgapitsi tuku lichuwinanit Biblia. Akgtum liʼakxilhtit, tuku wa Jesús xlakata xʼamaka lichuwinankan xalaktlan tamakatsinin kxlikalanka katiyatni akxni nina min lisputni (Mat. 24:14). Akxni akgtum tamakgaxtokgat tlakg liwana nakanajla pi tuku lichuwinanit Biblia kgantaxtuma, tlakg  naskujnaniputunkgo Jehová chuna la matlanikgo.

11. ¿Tuku tlawakgolh Priscila chu Áquila, chu tuku xlakata?

¹¹ Tamakgaxtokgat tiku lakgkgawasanku tlan nalitamakgtayakgo xliʼakxilhtit Priscila chu Áquila, akgtum tamakgaxtokgat tiku judíos xwankgonit chu xlamakgo kRoma. Kgaxmatkgolh xalaktlan tamakatsinin xlakata Jesús chu kstalaninanin litaxtukgolh. Max lu tlan xlimakgkatsikgo xlatamatkan nema xkgalhikgo. Pero kaj xalan wi tuku talakgpalilh akxni emperador Claudio limapakgsinalh pi judíos xtaxtukgolh kRoma. Kalilakpuwaw tuku kitaxtulh xpalakata Áquila chu Priscila. Makgxtakgkgolh tuku xlakgapaskgo, xlitekgsatkan xwanit niku tlan xlatamakgolh chu xmatsukiparakgolh kʼatanu kachikin xnegociojkan chuna la xtlawakgo laktsu chiki. Uma tuku talakgpalilh kxlatamatkan, ¿tlawalh pi nialh pulana xwilikgolh xTamapakgsin Dios? Max katsiyaw xatakgalhtin. Anta kCorinto Priscila chu Áquila makgtayanankgolh kcongregación chu akxtum taskujkgolh apóstol Pablo xlakata xkamatliwakglhkgolh natalan. Titaxtulh kilhtamaku, ankgolh latamakgo kʼalakatanu kachikinin niku tlakg xtalakaskin nalichuwinankan Dios (Hech. 18:18-21; Rom. 16:3-5). ¡Lu lhuwa taskujut chu tapaxuwan xkgalhikgo!

12. ¿Tuku xlakata xlilat nalakkaxwilikgo tuku nalakgchankgo chuna la skujnanikgo Dios tiku makgaxtokgkgo?

¹² Tamakgaxtokgat xala uku tlan nastalanikgo xliʼakxilhtit Priscila chu Áquila komo pulana nawilikgo xTamapakgsin Dios. Kilhtamaku akxni xlilat nalichuwinankgo tuku lakgchamputunkgo wa akxni nina tamakgaxtokgkgo. Akxni tiku natamakgaxtokgkgo liwana katsikgo tuku lakgchamputunkgo chuna la skujnanikgo Jehová chu liskujkgo xlakata namakgantaxtikgo, tlakg ni tuwa akxilhkgo la skuja espíritu santo (Ecl. 4:9, 12). Kaʼakxilhwi tuku titaxtukgolh Russell chu Elizabeth. Russell wan: «Akxni nina xaktamakgaxtokgaw, xaklalitachuwinanaw tuku xaklakgchamputunaw chuna la kskujnaniyaw Dios». Elizabeth na wan: «Xaklichuwinanaw uma xlakata akxni  xchalh kilhtamaku wi tuku xaklaksakwi, uma ni xlaktlawalh tuku xaklakgchamputunaw». Chuna la xtatekgskgo kamaxkilh talakaskin naʼankgo latamakgo kMicronesia xlakata tlan xmakgtayanankgolh niku tlakg xtalakaskin tiku xlichuwinankgolh Dios.

13. Chuna la wan Salmo 28:7, ¿tuku nakitaxtu komo nalipawanaw Jehová?

¹³ Chuna la Russell chu Elizabeth, lhuwa tamakgaxtokgat laksakkgonit ni lhuwa tuku nakgalhikgo kxlatamatkan xlakata tlakg lhuwa nalichuwinankgo Dios chu namasiyakgo. Komo akgtum tamakgaxtokgat nalakkaxwili xlakata tlakg naskujnaniputun Jehová xliputum xnaku chu alistalh naliskuja xlakata nalakgchan, lhuwa tasikulunalin namakglhtinan. Naʼakxilhkgo la Jehová kakuentajtlawa, uma natlawa pi tlakg nalipawankgo chu xlikana napaxuwakgo (kalikgalhtawakga Salmo 28:7).

14. ¿La limasiyakgolh apóstol Pedro chu xpuskat pi xlipawankgo tamalaknun nema lichuwinan Mateo 6:25, 31-34?

¹⁴ Atanu tlan liʼakxilhtit xpalakata tiku tamakgaxtokgkgonit wa apóstol Pedro chu xpuskat. Max akgchaxan papaʼ o akgtum kata lata xlakgapasnita Jesús, apóstol Pedro wi tuku xlakaskinka laksakli natlawa. Xlakata skitina xlitaxtu, akxni Jesús skinilh pi kstalanina xlitaxtulh putum kilhtamaku, Pedro lilakpuwa la xtatekgsa xfamilia (Luc. 5:1-11). Laksakli nastalani Jesús xlakata nalichuwinan Dios. ¡Uma lu tlan tuku laksakli! Chu tlan nawanaw pi xpuskat makgtayalh. Biblia wan pi, akxni Jesús xlakastakwananita, xmin kilhtamaku Pedro xtaʼan xpuskat xlakata naʼankgo lichuwinankgo Dios (1 Cor. 9:5). Xlikana pi xatlan xliʼakxilhtit xpuskat makgtayalh Pedro xlakata tlan xkamaxkilh tastakyaw lakchixkuwin chu lakpuskatin (1 Ped. 3:1-7). Liwana tasiya pi Pedro chu xpuskat xlipawankgo xtamalaknun Jehová pi komo pulana xwilikgolh xTamapakgsin Dios xla xʼama kamaxki tuku xmaklakaskinkgolh (kalikgalhtawakga Mateo 6:25, 31-34).

15. ¿Tuku katsiniyaw xlakata tuku titaxtukgolh Tiago chu Esther?

¹⁵ Chu komo wixin lhuwata kata lipinatit la makgaxtokgatit, ¿tuku tlan natlawayatit xlakata tlakg naskujnaniputunatit Jehová? Naʼakxilhatit tuku tlawakgonit amakgapitsi tamakgaxtokgat. Akgtum liʼakxilhtit, tlan nalikgalhtawakgayatit serie de artículos «Xatapaxuwan ankgolh skujkgo». Wa uma tuku tlawakgolh Tiago chu Esther, akgtum tamakgaxtokgat xalak Brasil. Umakgolh artículos kamakgtayalh naskujputunkgo niku tlakg xtalakaskin tamakgtay. Tiago wan: «Akxni klikgalhtawakgaw la Jehová kamakgtayanit xlakskujnin xala uku tlawalh pi xakakxilhputuw la xmakan Jehová xkinkapulalin chu xkinkakuentajtlawan». Titaxtulh kilhtamaku, uma tamakgaxtokgat alh latama kParaguay, niku skujnanimakgo Dios ktachuwin portugués lata kkata 2014. Esther wan: «Akgtum texto nema lu klakgatiyaw kinchatiykan wa Efesios 3:20. Chuna la kskujnanimaw Jehová, makglhuwa kakxilhnitaw la kgantaxtunit umakgolh tachuwin». Kcarta nema Pablo katsokgnilh efesios, liwana wa pi Jehová tlakg lhuwa nakinkamaxkiyan nixawa tuku skiniyaw. Chu uma tamalaknun ankgalhin kgantaxtunit.

16. ¿Tiku tlan nakamakgtayakgo tamakgaxtokgat tiku lakgkgawasanku xlakata nalilakpuwankgo tuku lakgchamputunkgo kxlatamatkan?

¹⁶ Tamakgaxtokgat tiku lakgkgawasanku, wixin tlan nalitamakgtayayatit tuku titaxtukgonit tiku katsinikgonit nalipawankgo  Jehová. Makgapitsi tamakgaxtokgat akglhuwata kata skujnanikgonit Jehová putum kilhtamaku. ¿Tuku xlakata ni kaskiniyatit tastakyaw xlakata nakamakgtayayan nalilakpuwanatit tuku lakgchipimputunatit? Uma atanu la tlan nalimasiyayatit pi lipawanatit Jehová (Prov. 22:17, 19). Lakgkgolotsin na tlan nakamakgtayakgoyan xlakata wi tuku nalakkaxwiliyatit nalakgchipinatit chuna la skujnaniyatit Dios chu tlan namakgantaxtiyatit.

17. ¿Tuku kaʼakgspulalh Klaus chu Marisa, chu tuku kinkamasiyaniyan xliʼakxilhtitkan?

¹⁷ Namin kilhtamaku, tuku nalaksakaw xlakata tlakg naskujnaniyaw Jehová max ni katikgantaxtulh chuna la xkgalhkgalhimaw. Kalilakpuwamparaw xliʼakxilhtit Klaus chu Marisa, tiku kalichuwinaw xapulana. Akgtutu kata alistalh lata xtamakgaxtokgkgonit, makgxtakgkgolh xchikkan chu xatapaxuwan talaknukgolh xlakata xmakgtayanankgolh ktaskujut nema xtlawamaka ksucursal xalak Finlandia. Pero alistalh katsikgolh pi nila xtamakgxtakgkgolh liwaka akgchaxan papaʼ. Xapulana lu nitlan limakgkatsikgolh. Pero titaxtulh kilhtamaku kawanika pi xʼankgolh kʼakgtum curso ktachuwin árabe, chu la uku xatapaxuwan skujmakgo kʼatanu kachikin niku chuwinankan árabe. Akxni lilakpuwan tuku titaxtunit, Marisa wan: «Kpekuan naktlawa tuku nikxni ktlawanit kkilatamat chu xlikana naklipawan Jehová. Pero kakxilhnit pi xla ankgalhin kinkamakgtayanitan chuna la nikxni xaklakpuwanitaw. Xlakata ktitaxtunit uma, chuna la klipawan Jehová tlakg tatliwakglhnit». Chuna la akxilhaw, tlan liwana nakatsiyaw pi Jehová ankgalhin nakinkasikulunatlawayan xlakata lipawanaw xliputum kinakujkan.

18. ¿Tuku tlan natlawakgo tamakgaxtokgat xlakata chuntiya nalipawankgo Jehová?

¹⁸ Tamakgaxtokgat akgtum xtamaskiwin Jehová, chu xla lakaskin pi tiku makgaxtokgkgo kalipaxuwakgolh (Prov. 5:18; Mat. 19:5, 6). Tamakgaxtokgat tiku lakgkgawasanku, ¿tuku xlakata ni lilakpuwanatit tuku tlawapatit kmilatamatkan? ¿Tlawapatit putum tuku matlaniyatit xlakata nalimasiyaniyatit Jehová pi paxtikatsiniyatit putum tamaskiwin nema xla kamaxkinitan? Katachuwinantit Jehová, kaputsatit kxTachuwin tastakyaw nema tlan nakamakgtayayan chu kamakgantaxtitit tastakyaw nema xla kamaxkiyan. Liwana kakatsitit pi komo pulana nawiliyatit kmilatamatkan chuna la skujnaniyatit Jehová, nakgalhiyatit akgtum xatapaxuwan tamakgaxtokgat.