1. ¿Tuku takgalhskinin max tlan nalilakpuwanaw?

¿PEKUANA tsinu akxni lilakpuwana tuku lu nitlan nala nialh makgas kilhtamaku, la akxni namalakgsputunkan nixaxlikana takanajla, akxni nakinkatlawaniputunkgoyan tuku nitlan Gog xalak Magog chu akxni nala guerra xla Armagedón? ¿Min kilhtamaku lilakpuwana komo ni namakgatsankgananiya Dios akxni nakgantaxtu putum uma? Komo chuna, lu namakgtayayan naʼakxilha tuku wa Jesús ktexto nema takilhtinit uma artículo. Jesús kawanilh kstalaninanin: «Ni kalipuwantit. Kalimasiyatit pi kanajlaniyatit Dios» (Juan 14:1). Komo tliwakga kgalhiyaw kintakanajlakan, ni katipekuaniw tuku nala kkilhtamaku nema aku mima.

2. ¿La tlan namatliwakglhaw kintakanajlakan chu tuku naʼakxilhaw kʼuma artículo?

² Pulaktum la tlan namatliwakglhaw kintakanajlakan xlakata natayaniyaw tuku nala kkilhtamaku nema aku mima wa naʼakxilhaw la tayaniyaw taputsan nema kgalhiyaw la uku. Chuna nakatsiyaw niku talakaskin namatliwakglhaw kintakanajlakan. Makgatunu akxni tayaniyaw taputsan tlakg tatliwakglha kintakanajlakan. Chu uma nakinkamakgtayayan natayaniyaw tuku aku mima. Kʼuma artículo nalichuwinanaw pulaktati tuku titaxtukgolh kstalaninanin Cristo nema limasiya pi tlakg xkatsankgani takanajla. Na naʼakxilhaw tuku natlawayaw la uku xlakata natayaniyaw taʼakglhuwit chuna la xlakan titaxtukgolh chu la umakgolh nakinkamakgtayayan natayaniyaw kkilhtamaku nema aku mima.

3. Chuna la wan Mateo 6:30, 33, ¿tuku liwana lichuwinalh Jesús xlakata takanajla?

³ Xlilat pi tiku pulalin familia nakamaxkiputun liwat, lhakgat chu niku natawilakgo xpuskat chu xkamanan. Kkinkilhtamakujkan  uma tuwa kitaxtu. Wilakgolh natalan tiku makgatsankgakgonit xtaskujutkan chu maski lu liskujkgo, ni tekgskgo atanu. Amakgapitsin lakgmakgankgonit taskujut nema ni xlimakgamakglhtinat chatum kstalanina Cristo. Akxni titaxtuyaw chuna la uma, lu kilikanajlatkan pi Jehová nakinkamaxkiyan tuku maklakaskinaw. Jesús liwana kalitachuwinalh uma kstalaninanin kTaʼakgchuwin xalak Sipi (kalikgalhtawakga Mateo 6:30, 33). Komo liwana katsiyaw pi Jehová ni kintikamakgxtakgni, tlan pulana nawiliyaw chuna la skujnaniyaw. Chu akxni naʼakxilhaw la Jehová kinkamaxkiyan tuku maklakaskinaw, namakgkatsiyaw pi tlakg lakatsu wilaniw chu kintakanajlakan tlakg tliwakga nawan.

4, 5. ¿Tuku kamakgtayanit akgtum familia ni lu nalilakgaputsakgo xlakata tuku maklakaskinkgo?

⁴ Kaʼakxilhwi tuku titaxtulh familia Castro xalak Venezuela. Xlakan makgkatsikgonit la Jehová kamakgtayanit ni lu nalilakgaputsakgo tuku maklakaskinkgo. Uma familia kskujkgo kʼakgtum titsu tiyat nema xkgalhikgo, chu chuna xkgalhikgo tuku xmaklakaskinkgo. Pero akgtum kilhtamaku, makgapitsi kgalhananin tiku xliminkgo tuku xlimakgninankgo kamakglhtikgolh xtiyatkan chu katlakgaxtukgolh. Xatlat, wan: «La uku, xlakata nakkgalhiyaw tuku kmaklakaskinaw kchanananaw ktitsu tiyat nema kinkamasakuanikanitan. Tuku pulana ktlawa chali chali wa kskini Jehová pi kakinkamaxkin tuku kmaklakaskinaw ama kilhtamaku». Tuwa tuku titaxtumakgo familia Castro, pero xlakan kanajlakgo pi xapaxkina xTlatkan tlan nakamaxki tuku maklakaskinkgo chali chali. Wa xlakata, chuntiya ankgo ktamakxtumit chu chuntiya lichuwinankgo Dios. Pulana wilikgo kxlatamatkan xTamapakgsin Dios, chu Jehová kakuentajtlawa.

⁵ Putum uma kilhtamaku, Miguel chu xpuskat, Yurai, lilakpuwankgonit la Jehová kakuentajtlawanit. Minit kilhtamaku, Jehová kalimaklakaskinit natalan xlakata nakamaxkikgo makgapitsi tuku xmaklakaskinkgo o xlakata namakgtaya Miguel natekgsa taskujut. Atanu kilhtamaku, limaklakaskinit tamakgtay nema masta sucursal xlakata nakamaxki tuku maklakaskinkgo. Xla nikxni kamakgxtakgnit chu wa xlakata xtakanajla uma familia tlakg tatliwakglhnit. Akxni xlichuwinanita pulaktum la Jehová xkamakgtayanit, tlakg xalankata xtsumatkan, Yoselin, wan: «Lu tlan kimamakgkatsini akxni liwana kakxilha xtamakgtay Jehová. Kliʼakxilha chuna la chatum kiʼamigo, tiku ankgalhin tlan naklipawan». Chu wampara: «Taʼakglhuwit nema ktitaxtunitaw nakinkamakgtayayan xlakata tlan naktayaniyaw tlakg laktuwa taputsan kkilhtamaku nema aku mima».

6. Komo wix titaxtupat taʼakglhuwit xlakata tumin, ¿la tlan namatliwakglha mintakanajla?

⁶ ¿Titaxtupat taʼakglhuwit xlakata tumin? Komo chuna, lu tuwa tuku titaxtupat. Maski titaxtupat tuku lu tuwa, tlan nalimaklakaskina uma kilhtamaku xlakata namatliwakglha mintakanajla. Katlawani oración Jehová, kalikgalhtawakga xtachuwin Jesús nema min kMateo 6:25-34 chu kalilakpuwanti. Kalilakpuwanti  liʼakxilhtit xala uku nema limasiyakgo pi Jehová kakuentajtlawa tiku lu skujnanikgo (1 Cor. 15:58). Komo chuna natlawaya, tlakg nakanajlaya pi Jehová na namakgtayayan chuna la kamakgtayalh tiku xkgalhikgo taʼakglhuwit chuna la tuku wix titaxtupat. Xla katsi tuku maklakaskina chu katsi la namaxkiyan. Akxni naʼakxilha xtamakgtay Jehová kmilatamat, mintakanajla natatliwakglha chu tlan natayaniya tlakg laktuwa taputsan kkilhtamaku nema aku mima (Hab. 3:17, 18).

7. Chuna la wan Mateo 8:23-26, ¿la kaliʼakxilhnika xtakanajlakan kstalaninanin Jesús akxni milh tliwakga un?

⁷ Akgtum kilhtamaku akxni Jesús chu kstalaninanin akxtum xʼankgo kʼakgtum barco, tsukulh tliwakga un anta kpupunu. Jesús limaklakaskilh uma tuku lalh xlakata xkamakgtayalh naʼakxilhkgo pi xkatsankgani takanajla (kalikgalhtawakga Mateo 8:23-26). Lu xtaʼakgayawama pupunu chu asta xmaʼakgtsiputun barco, pero Jesús lu tlan klhtatama. Xlakata lu xpekuamakgolh, kstalaninanin ankgolh mastakwanikgo chu skinikgolh pi xkalakgmaxtulh. Wa xlakata, Malana kawanilh: «¿Tuku xlakata lu pekuampatit? ¡Lu ni lhuwa mintakanajlakan!». Kstalaninanin Jesús liwana xlikatsitkan xwanit pi Jehová tlan xkuentajtlawa Jesús chu tiku anta xtawilakgo. ¿Tuku kinkamasiyaniyan? Pi akgtum tliwakga takanajla tlan nakinkamakgtayayan natayaniyaw tuku lu tuwa nema tlan natamalakxtumiyaw akgtum tliwakga un.

8, 9. ¿La liʼakxilhka xtakanajla Anel, chu tuku makgtayalh?

⁸ Kaʼakxilhwi la tatliwakglhli xtakanajla chatum tala tsumat tiku wanikan Anel xalak Puerto Rico akxni titaxtulh tuku tuwa. Xla xlikana lakgmilh akgtum lanka un. Xlakata huracán María, titaxtulh kPuerto Rico kkata 2017, Anel lakxlalh xchik chu makgatsankgalh xtaskujut. Xla wan: «Amakgolh lu tuwa kilhtamaku, lu xakpekuama. Pero ktlawalh oración xlakata nakputsa xtamakgtay Jehová chu ni kmastalh talakaskin pi talakgaputsit nakimakgatlaja».

⁹ Anel wan pi wi atanu tuku tlakg makgtayalh akxni xtitaxtuma tuku lu tuwa: kgalhakgaxmatnankan. Xla wan: «Akxni ktlawalh tuku wan xkachikin Jehová kimakgtayalh ni lu naklakgaputsa. Jehová kimakgtayalh chu kamaklakaskilh natalan xlakata xkimakgpuwantinikgolh chu xkimaxkikgolh tuku xakmaklakaskin». Chu wampara: «Jehová tlakg kimaxkilh nixawa tuku xaklakpuwanit chu kintakanajla lu tatliwakglhli».

10. ¿Tuku tlan natlawaya komo titaxtupat tuku lu tuwa?

¹⁰ ¿Titaxtupat tuku lu tuwa kmilatamat? Max patinampat xlakata milh tuku masputunan. O max makgapatinaman akgtum lu tuwa tajatat nema lu makgatlakgwanitan chu ni katsiya tuku natlawaya. Max min kilhtamaku lu lakgaputsaya, pero ni kamasta talakaskin pi uma natlawa pi nialh nalipawana Jehová. Kawani putum tuku wi kminaku chu kawani tuku makgkatsiya. Kamatliwakglhti mintakanajla akxni lilakpuwana la Jehová makgtayanitan makgasa (Sal. 77:11, 12). Liwana kakatsi pi Jehová nikxni katimakgxtakgni,  la uku chu kkilhtamaku nema aku mima.

11. ¿Tuku xlakata xlilat nakakgalhakgaxmataw tiku kinkapulalinkgoyan?

¹¹ ¿Tuku atanu tlan namakgtayayan natayaniya taputsan? Chuna la wa Anel, komo nakgalhakgaxpatnana. Kakatsini nakalipawana tiku kalipawan Jehová chu Jesús. Max namin kilhtamaku, tiku kalaksakkanit xlakata nakinkapulalinkgoyan nakinkawanikgoyan pi katlawaw tuku max ni lu liwana akgatekgsaw. Pero kalakapastaktit pi Jehová kasikulunatlawa tiku kgalhakgaxmatkgo. Anta kxTachuwin chu tuku titaxtukgonit xlakskujnin tiku ni makgxtakgkgo kinkamasiyaniyan pi kgalhakgaxmatnankan lakgmaxtunan (Éx. 14:1-4; 2 Crón. 20:17). Kalilakpuwanti umakgolh liʼakxilhtit chu chuna tlakg ni tuwa katimakgkatsi nakgalhakgaxpata tuku nalimapakgsinan xkachikin Jehová la uku chu kkilhtamaku nema aku mima (Heb. 13:17). Chu ni katipekuaniw lanka tapatin nema talakatsuwima (Prov. 3:25).

12. Chuna la wan Lucas 18:1-8, ¿la tatalakxtumi kgalhikan takanajla chu tayanikan tuku ni xaʼakgstitum?

¹² Jesús xkatsi pi tuku ni xaʼakgstitum xʼama liʼakxilha xtakanajlakan kstalaninanin. Xlakata xkamakgtayalh natayanikgo lichuwinalh akgtum liʼakxilhtit nema tatekgsa klibro xla Lucas. Xla lichuwinalh chatum puskat tiku xninita xchixku tiku lu xtasaskini chatum mapakgsina tiku ni xaʼakgstitum xlikatsi pi xlakkaxtlawanilh xtaʼakglhuwit. Liwana xkatsi pi komo chuntiya xtasaskinilh xla xʼama makgtaya chu chuna lalh. ¿Tuku kinkamasiyaniyan uma? Jehová ankgalhin tlawa tuku xaʼakgstitum. Wa xlakata Jesús wa: «¿Pi ni katitlawalh Dios tuku xaʼakgstitum xpalakata tiku kalaksaknit, tiku tasaskinikgo tantaku chu tantaskaka?» (kalikgalhtawakga Lucas 18:1-8). Alistalh Jesús wampa: «Akxni xKgawasa chixku nachin, ¿xlikana natekgsa uma takanajla kkatiyatni?». Akxni patiyaw tuku ni xaʼakgstitum, komo ni lakapala natlakgwanaw chu nakatsiyaw kgalhkgalhinanaw namasiyayaw pi kgalhiyaw tliwakga takanajla chuna la puskat tiku xninita xchixku. Uma takanajla tlawa liwana nakatsiyaw pi Jehová nakinkamakgtayayan. Na kilikanajlatkan pi tlawakan oración lu makgtayanan. Namin kilhtamaku, kioracioneskan nakgalhtikan chuna la ni xlakpuwanitaw.

13. ¿La kamakgtayalh oración akgtum familia tiku titaxtukgolh tuku ni xaʼakgstitum?

¹³ Kaʼakxilhwi tuku titaxtulh chatum tala tiku wanikan Vero. Xla, xtsumat, tiku kgalhi 15 kata chu xchixku, tiku ni xtatayana Jehová, lamakgo kRepública Democrática del Congo. Xkgalhtutukan tsalataxtukgolh kxkachikinkan akxni makgapitsi soldados tanukgocha kkachikin. Ktiji, katekgskgolh soldados, anta kamachokgoka chu kawanika pi xʼamaka kamakgnikan. Tala Vero tsukulh tasa, pero xtsumat xmakaksaputun, akglhman tsukulh tlawa xʼoración chu makglhuwa tsukulh mapakuwi Jehová. Akxni tlawakgolh xʼoración, tiku xkapulalin soldados  kgalhskilh: «Tsumat, ¿tiku masiyanin natlawaya oración?». Xla kgalhtinalh: «Kintse, chu akxni kimasiyanilh stalanilh liʼakxilhtit nema tatekgsa kMateo 6:9-13». Uma chixku wanilh: «Tlan kakatapi minatlatni, chu Jehová miDios kakakuentajtlawan».

14. ¿Tuku max naliʼakxilha kintakanajlakan, chu tuku nakinkamakgtayayan natayaniyaw?

¹⁴ Uma liʼakxilhtit kinkamasiyaniyan pi xlakaskinka ankgalhin natlawayaw oración. Pero ¿komo mioración ni lakapala kgalhtikan chuna la wix lakaskina? Chuna la puskat tiku xninita xchixku nema lichuwinalh Jesús, chuntiya katlawa oración chu kalipawanti pi kiDioskan ni katimakgxtakgni chu pi xla nakgalhtiyan akxni xlilat. Chuntiya katasaskini Jehová pi kamaxkin xʼespíritu santo (Filip. 4:13). Kalakapastakti pi nialh makgas xla namaxkiyan lhuwa tasikulunalin chu natlawa pi nialh nalakapastaka putum tuku patinita makgasa. Akxni tayaniya taputsan xlakata Jehová makgtayayan, tlakg tatliwakglha chu tlan natayaniya tuku aku namin (1 Ped. 1:6, 7).

15. Chuna la wan Mateo 17:19, 20, ¿tuku taʼakglhuwit xkgalhikgo kstalaninanin Jesús?

¹⁵ Jesús kamasiyanilh kstalaninanin pi takanajla xʼama kamakgtaya natayanikgo taʼakglhuwit (kalikgalhtawakga Mateo 17:19, 20). Maski makglhuwa xtamakxtukgonit demonios, akgtum kilhtamaku nila chuna tlawakgolh. ¿Tuku xlakata? Jesús kawanilh pi tlakg xkatsankgani takanajla. Kawanilh, pi komo xkgalhikgolh akgtum tliwakga takanajla, tlan xmalakxijkgolh xtaʼakglhuwitkan nema xtachuna la laklanka sipi. La uku, akinin na tlan natayaniyaw taʼakglhuwit nema tasiya pi nila katitayaniw.

16. ¿La makgtayanit xtakanajla Geydi natayani lanka takatsanajwat nema titaxtulh?

¹⁶ Kaʼakxilhwi xliʼakxilhtit Geydi, chatum tala xalak Guatemala. Edi, xchixku, makgnika akxni kilakgolh ktamakxtumit chu xtaspitmakgo kxchikkan. Xla lichuwinan la xtakanajla makgtayanit natayani lanka xtakatsanajwat: «Kmaklakaskin oración xlakata nakmakamaxki Jehová kintakuka, chu uma kimaxki takaksni. Kakxilha la limaklakaskin kifamilia chu natalan xalak congregación xlakata nakinkuentajtlawa. Chuna la kskujnani Jehová, kimakgtaya ni lu naklipuwan chu ni lu naklilakgaputsa tuku xala chali. Tuku ktitaxtunit kimasiyaninit, pi kaxatuwaka taputsan nema namin kkilhtamaku nema aku mima, tlan naktayani xlakata Jehová, Jesús chu xkachikin nakimakgtayakgo».

17. ¿Tuku tlan natlawayaw akxni natitaxtuyaw akgtum taʼakglhuwit nema xtachuna la akgtum lanka sipi?

¹⁷ ¿Nilh chatum tiku lu xpaxkiya? Kalimaxtu kilhtamaku xlakata namatliwakglha chuna la kanajlaniya talakastakwanat akxni nakalikgalhtawakgaya tiku kalichuwinan Biblia pi kamalakastakwanika. ¿Lakglipuwana chatum xalak mifamilia tiku tamakxtukanit kcongregación? Kakgalhtawakga xlakata nakanajlaya pi akxni Dios stakyawanan tlakg tlan kitaxtu. Kaxatukawa taʼakglhuwit natitaxtuya kkilhtamaku nema  aku mima, kaliʼakxilhti chuna la kilhtamaku akxni tlan namatliwakglha mintakanajla. Kawani Jehová tuku wi kminaku. Ni katamakgatli, wata lakatsu kakatawilani natalan (Prov. 18:1). Maski lu lipuwana, chuntiya kamakgtlawa taskujut nema namakgtayayan natayaniya (Sal. 126:5, 6). Ni kamakgxtakgti tamakxtumit, chuna la lichuwinana Dios chu la likgalhtawakgaya Biblia. Chu chuntiya kalilakpuwanti lakstlan tasikulunalin nema Jehová malaknunit. Akxni naʼakxilha la Jehová makgtayaman, mintakanajla nema kgalhiniya tlakg natatliwakglha.

18. Komo akxilha pi taxlajwanima mintakanajla, ¿tuku tlan natlawaya?

¹⁸ Ni kataxlajwani komo tuku titaxtupat o titaxtunita limasiya pi tsankganiyan takanajla. Kamaklakaskinti uma kilhtamaku xlakata tlakg namatliwakglha mintakanajla. Na kaskinti tuku skinkgolh xʼapóstoles Jesús: «Tlakg kakinkamaxki takanajla» (Luc. 17:5). Na kalilakpuwanti liʼakxilhtit nema kalichuwinanitaw kʼuma artículo. Chuna la Miguel chu Yurai, kalakapastakti putum kilhtamaku akxni Jehová makgtayanitan. Xtachuna la Anel, xtsumat Vero, katlawani oración Jehová xliputum minaku, liwaka akxni titaxtupat tuku lu tuwa. Chu chuna la Geydi, kamakgamakglhtinanti xtamakgtay Jehová akxni kalimaklakaskin mifamilia o natalan. Komo namaxkiya talakaskin Jehová namakgtayayan akxni titaxtupat tuku lu tuwa la uku, tlakg nalipawana pi xla namakgtayayan akxni kaxatukawa taʼakglhuwit natitaxtuya kkilhtamaku nema aku mima.

19. ¿Tuku liwana xkatsi Jesús, chu wix tuku liwana milikatsit?

¹⁹ Jesús lichuwinalh makgapitsi niku xtalakaskin pi kstalaninanin xmatliwakglhkgolh xtakanajlakan, pero nikxni lakpuwa pi Jehová ni xʼama kamakgtaya ktaʼakglhuwit nema xʼamakgo titaxtukgo (Juan 14:1; 16:33). Nachuna, liwana xkatsi pi xʼama anan lhuwa latamanin tiku xʼamakgo lakgtaxtunikgo klanka tapatin xlakata kgalhikgo akgtum lanka takanajla (Apoc. 7:9, 14). ¿Na makgtanupat wix anta? Xlakata xtalakgalhaman Jehová nema ni anan xtachuna, chuna nawan komo la uku naliskuja xlakata namatliwakglha mintakanajla (Heb. 10:39).