Klakachilh kPaíses Bajos kkata 1948. Akgtum kata alistalh kifamilia ankgolh latamakgo kSão Paulo (Brasil). Kinatlatni ankgalhin xʼankgo kpusikulan, chu xaklismaninitaw xaklikgalhtawakgayaw Biblia la akgtum familia akxni xakwayankgoyaw katsisni. Kkata 1959, kkaw latamayaw kMassachusetts, Estados Unidos.

Kkifamilia kgalhtsayan xakwanitaw, chu kintlat lu kskuja xlakata xkinkamaxkin tuku xakmaklakaskinaw. Umakgolh kata pulaklhuwa tuku liskujli: kstanan ktiji, xmakgkaxtlawa carreteras chu xmakgsta tuku ksta akgtum compañía aérea internacional. Putum kifamilia lu xakpaxuwayaw pi ksjuka kʼakgtum compañía aérea xlakata uma xkinkamaxkiyan talakaskin lakalhuwa niku nakanaw.

Akxni kgawasaku xakwanit makglhuwa xaklilakpuwan tuku xaklitaxtuputun akxni lankata xakwa. Makgapitsi kiʼamigos laksakkgolh naʼankgo kʼuniversidad chu amakgapitsi tanukgolh k’ejército. Pero akit ni xaklakgati soldado naklitaxtu xlakata nikxni klakgatilh wi tiku naktalakilhni chu naktalatlawanan. Wa xlakata klaksakli nakkan kʼuniversidad chu chuna ni soldado xakama litaxtu. Pero akit xakkamakgtayaputun latamanin xlakata xaklakpuwan pi uma xʼama kimakgapaxuwa.

Anta kʼuniversidad lu xaklakgati antropología, xlakata xakkatsiputun la lakatsukulh latamat. Makgalhtawakgenanin xmasiyakgo evolución chu xlakaskinkgo pi xakkanajlaniw. Pero makgapitsi tuku xmasiyakgo ni liwana xtaʼakgatekgsa chu xlakaskinkgo nakkanajlayaw maski ni xʼanan tuku xlimasiya pi xlikana.

Anta niku xakkgalhtawakgama, ni xmasiyakan la nalipina tlan latamat, wata xmasiyakan pi tlan natlawaya tuku talakaskin xlakata tlan nakitaxtuniyan. Akxni xakkatapaskuanan kiʼamigos chu xakkatawa drogas uma xkimakgapaxuwa, pero uma tapaxuwan ni xmakgapala. Xaklilakpuwan komo wa uma xaxlikana latamat.

Uma kilhtamaku kkalh latama kkachikin Boston, niku ktalhkatanulh kʼakgtum universidad. Xlakata tlan xakxokgolh kintakgalhtawakga kskujli akxni xakkgalhi vacaciones, chu anta xlimakgtumku klakgapasli chatum xtatayana Jehová. Wa tiku xaktaskuja, kilitachuwinalh «pulaktujun kilhtamaku» nema lichuwinan capítulo 4 klibro xla Daniel, chu kiwanilh pi xlamawa kxlisputni kakilhtamaku (Dan. 4:13-17). Tunkun kʼakgatekgsli pi, komo chuntiya xaklitachuwinalh xlakata Biblia chu kuenta xaktlawalh tuku xkiwani, xtalakaskilh pi xaklakgpalilh kilatamat. Wa xlakata ktlawalh putum tuku talakaskilh xlakata ni xaktachuwinalh.

Anta kʼuniversidad, klaksakli makgapitsi clases nema xkimasiyanilh la tlan xaktlawalh makgapitsi taskujut xlakata tlan xatapaxuwan xakmakgtayanalh kʼAmérica del Sur. Xaklakpuwan pi komo xakkamakgtayalh latamanin xakkama paxuwa, pero chuntiyaku ni liwana xakkatsi la nakmakgantaxti. Wa xlakata xaklakputsama, chu kmakgxtakgli universidad akxni nina ksputa semestre.

Mayo kkata 1970, kkalh latama kʼÁmsterdam (Países Bajos) xlakata nakskuja kwatiya compañía aérea niku kskuja kintlat. Xlakata anta kskujli, tlan lakalhuwa niku kkilalh chu kkalakgapasli países xalak África, América del Norte chu América del Sur, Asia chu Europa. Pero ni makgas kilhtamaku titaxtulh kakxilhli pi umakgolh países xkgalhikgo laklanka taʼakglhuwit chu xtasiya pi ni xʼanan tiku tlan nalakkaxtlawa. Maski chuna, wi tuku chuntiya xaktlawaputun, ktaspitli kʼEstados Unidos chu ktalhkatanupa kwatiya universidad xalak Boston.

Akxni antiya xakwi, kakxilhli pi kʼuniversidad ni xakama tekgsa takgalhtin nema xakputsama. Xlakata ni xakkatsi tuku naktlawa, kskinilh tamakgtay kimakgalhtawakgena xla Antropología. Kaks klilakawa tuku kiwanilh: «¿Tuku xlakata chuntiya kgalhtawakgapat? Kamakgxtakgti». Ni talakaskilh makgtiy nakiwani: tunkun kmakgxtakgli universidad chu nialh ktaspitli.

Chuntiya xakmakgkatsi pi kilatamat ni xkgalhi tapaxuwan, wa xlakata kkamakgtanulh akgtum grupo tiku xlakgmakgankgo tuku xlismanikgo tlawakgo latamanin chu xtasiya pi xliskujkgo xlakata xʼanalh takaksni chu tapaxkit. Makgapitsi kiʼamigos chu akit akxtum kminchaw lata kʼEstados Unidos chu xakkaskiniyaw tiku xliminkgo xputlawkan pi kaj xachunata xkinkamawakakgon chu chuna kchaw kʼAcapulco (México). Xakkatalamaw latamanin tiku xlakatsalakgo limapakgsin xlakata latamat, xtasiyakgo pi ni xlakgaputsakgo chu ni xkgalhikgo taʼakglhuwit. Pero ni makgas kilhtamaku kʼakgatekgsli pi chuna la xlinkgo xlatamatkan ni xkalimini tapaxuwan nema xmakgapala. Wata kakxilhli pi umakgolh latamanin  ni putum kilhtamaku xwankgo tuku xaxlikana chu xmakgxtakgnankgo.

Uma kilhtamaku, ktsukulh lilakpuwan tuku xaktlawaputun akxni aktsujku xakwanit: xakpaxialhnamputun kpupunu kʼakgtum barco, chu ni kaj xakpaxialhnamputum kʼagtum barco, wata akit xakpulalimputun barco. Kajwatiya tlan xakmakgantaxtilh uma komo xakkgalhilh kibarco. Xlakata kiʼamigo Tom nachuna xtlawaputun, klakkaxwiliw akxtum nakanaw kpupunu kxlikalanka katiyatni. Xaktekgsputun akgtum isla tropical niku ni xʼanalh limapakgsin nema lakkaxwilikgo latamanin.

Tom chu akit kkaw kʼArenys de Mar, lakatsu kBarcelona (España), anta ktamawaw akgtum aktsu barco nema xkgalhi 9 metros xlilhman chu xwanikan Llygra. Klakkaxtlawaw xlakata tlan xakmaklakaskiw kpupunu. Xlakata ni xaklakpuwanitaw lakapala nakchanaw niku xakamaw ktamakxtuniw xmotor chu chuna tlakg lhuwa chuchut xakliw. Na ktamawaw kgantiy tuku tlan xaklimatsuwiw kibarcokan nema 5 metros xlilhman xkgalhikgo xlakata tlakg tlan xakmatsuwiw kibarcokan niku tlakg kalakgtsu xakchaw. Alistalh klakkaxwiliw nakkanaw kSeychelles, océano Índico. Xaklakkaxwilinitaw nakchanaw kcosta occidental de África chu kcabo de Buena Esperanza (Sudáfrica). Xlakata tlan xakchaw niku xakamaw kmaklakaskiw staku, mapas, libros chu makgapitsi tuku maklakaskinkgo tiku paxialhnankgo kbarco. Lu kaks xkimalakawani akxni xakchanaw niku xakchamputunaw.

Tunkun kkatsiw pi aktsu kibarcokan nema ni xasasti xwanit ni xʼama tayani kpupunu. Xlakata xtanuni chuchut max 22 litros akgatunu hora. Chuna la kkawanin xapulana, akxni milh lanka unisen kpupunu lu kimakgapekualh chu, xlimakgtumku, ktlawalh akgtum oración. Kmalaknunilh Dios, pi komo xaklakgtaxtuw, xakkama tlawa putum tuku talakaskin xlakata xaklakgapasli. Unisen takaksli chu kmakgantaxtilh kintachuwin.

Ktsukulh likgalhtawakga Biblia anta kpupunu. Kalilakpuwanti la lu lipaxuw xwanit akxni xakwi anta kkibarco kxlakitat pupunu Mediterráneo, xʼanan lhuwa skiti nema xkgoskgo, delfines chu niku xaklakachan ni xakakxilha niku xkitapakgta. Kkatsisni lu xaklakgati xakakxilha lhuwa staku chu tlakg xakkanajla pi anan chatum Dios tiku kalilakgaputsa latamanin.

Akxni xtitaxtunita makgapitsi semanas chuna la xakamaw kbarco, kchaw kxkilhtun pupunu xalak Alicante (España), niku klitsakgsaw nakstayaw kibarcokan xlakata xaktamawaw nema tlakg tlan. Tuwa kitaxtulh nakstayaw kibarcokan nema ni xasasti xwanit, ni xkgalhi motor chu xtanuni chuchut. Pero tuku tlakg tlan xwanit wa pi tlakg xakkgalhi kilhtamaku xlakata xaklikgalhtawakgalh Biblia.

Akxni tlakg xaklikgalhtawakga Biblia, tlakg liwana xakakxilha pi litaxtu chuna la makgtum libro nema limin tastakyaw nema kinkamakgtayayan napaxuwayaw. Lu kaks kimalakawanilh tastakyaw xalak Biblia nema ni tuwa akgatekgskan nema makgtayanan nalinkan xaskulunku latamat, chu akstu xaklilakpuwan tuku xlakata lhuwa latamanin tiku wankgo pi kstalaninanin Cristo, chuna la akit, ni stalanikgo xtamasiy.

Klakkaxwililh naktlawa lhuwa talakgpalit xlakata nakmatanksa kilatamat, wa xlakata nialh kmaklakaskilh drogas. Klakpuwa pi xʼanankgo latamanin tiku xlilatamakgo chuna la wan xlimapakgsin Biblia, chu akit xakkatekgsputun. Xlimakgtiy, ktlawanilh oración Dios xlakata xkililh niku xwilakgolh.

Xlakata xaktekgsli xaxlikana takanajla, klakpuwa pi xlilat xwanit xaklakkaxwililh tuku xakama lakgmakgan. Akxni xaktlawama kxkatijin Alicante, kakxilhli pulaklhuwa pusikulan. Pero xlakata atsinu ni putum xkgalhikgo imágenes, ni tuwa klakpuwa nakkalakgmakgan.

Akgtum domingo kakgotanun, xakwi kxpaxtun akgtum sipi chu xaklakachan anta niku xchankgo barcos, xaklikgalhtawakgama Santiago 2:1-5, niku wan pi nitlan kalaksakpaxkikan tiku kgalhikgo lhuwa tumin. Akxni xaktaspitma kbarco, ktitaxtulh kxlakatin niku xtasiya pi xtamakxtumikgo tiku xkakninanikgo Dios. Kmalakcha xtatsokgnit: «Pukgalhtawakga xla xtatayananin Jehová».

Chu klakpuwa: «Nakkaliʼakxilha umakgolh latamanin, nakakxilha la nakimakgamakglhtinankgo». Wa xlakata ni xaktatununanit akxni ktanulh kPukgalhtawakga, ni xaktakgalhswiknit chu xataxtitni xaklin kimpantalón. Tiku xkamakgamakglhtinan tiku aku xchimakgolh kintachuwinalh chu kiwanilh pi xakpaxtutawilalh chatum puskat tiku xlina kata, tiku tlan kilikatsinilh chu kimakgtayalh naktekgsa texto xalak Biblia nema xlichuwinama tiku xmastama taʼakgchuwin. Akxni sputli tamakxtumit, lu kaks kimalakawanilh pi putum tiku minkgolh kimakgachipakgo lu tlan kilikatsinikgolh. Chatum chixku kiwanilh pi xakkalh kxchik xlakata xaklichuwinaw Biblia. Pero xlakata nina xaklikgalhtawakga putuminika Biblia, kwanilh: «Nakwaniyan akxni klikgalhtawakgakgonita nawan». Pero lata uma kilhtamaku, ktsukulh kkan putum tamakxtumit.

Makgapitsi semanas alistalh, kkalh xchik uma chixku, chu kgalhtilh putum takgalhskinin nema xakkgalhi xlakata Biblia. Akgtum semana alistalh, kimaxkilh akgtum bolsa niku xtajuma lhuwa lhakgat nema lu stlan xwanit. Kilitachuwinalh pi uma lhakgat xtapakgsini chatum chixku tiku xtamaknukanit kpulachin xlakata xkgalhakgaxmatnit tuku limapakgsinan Biblia xlakata nalapaxkiyaw chu ni nakatsiniyaw natlawayaw guerra (Is. 2:4; Juan 13:34, 35). La uku xaktekgsnit tuku xakputsama: latamanin tiku kgalhakgaxmatkgo tastakyaw nema masta Biblia. Nialh xaktekgsputun akgtum lu xastlan isla, wata liwana xaklakputsananiputun Biblia. Wa xlakata, klakkaxwililh naktaspita kPaíses Bajos.

Akgtati kilhtamaku kkaskinilh tiku xliminkgo xputlawkan pi kaj xachunata xkimawakakgolh, chu chuna kchalh kkachikin Groninga (Países Bajos). Ktsukulh putsa akgtum taskujut xlakata xakkgalhilh tuku xakmaklakaskilh. Anta niku kxwaknankan niku kskilh taskujut kimaxkika maktum kapsnat niku xlimin makgapitsi takgalhskinin, chu na xkinkgalhskinkan xlakata kintakanajla. Ktsokgli: «Xtatayana Jehová». Akxni xmalana uma taskujut likgalhtawakgalh, kakxilhli pi ni lakgatilh. Kiwanilh: «Nakkilhaniyan». Pero nikxni chuna tlawalh.

 Alakatanu niku na kxwaknankan, kkgalhskilh xmalana komo xmaklakaskin tamakgtay. Kinkgalhskilh komo xakkgalhi kapsnat nema xlimasiyalh komo xakkatsininit uma taskujut o kapsnat nema xwa niku xakskujnit. Kkawanilh pi wi tuku xakkaxtlawaninit akgtum barco xapakglhat. Kaks klilakawa akxni kiwanilh: «Tlan natsukuya skuja uma kakgotanun, pero wi tuku kuenta militlawat: ni klakaskin namatsukiya akgtum taʼakglhuwit unu kputaskujut, xlakata akit xtatayana Jehová chu kliskuja xlakata nakmakgantaxti xtastakyaw Biblia». Lu kaks xaklakawanit akxni kkgalhtilh: «¡Akit nachuna!». Pero, akxni akxilhli pi lhman xwanit kinchixit chu ni xaktakgalhswiknit, kiwanilh: «Komo chuna, naklimakgalhtawakgeyan Biblia». Xatapaxuwan kwanilh pi tlan. Kʼakgatekgsli tuku xlakata ni xkintasanikanit kʼatanu taskujut: Jehová xkimaxkima tuku xakskininit kkioraciones (Sal. 37:4). Akglhuwa kata kskujli kxtaller uma tala. Uma kilhtamaku kilimakgalhtawakgelh Biblia, chu ktamunulh enero kkata 1974.

Akgtum papaʼ alistalh, wi tuku kmatsukilh nema lu kimakgapaxuwanit: precursor klitaxtulh. Akgtum papaʼ alistalh, kkalh latama kʼÁmsterdam xlakata xakmakgtayanalh kʼakgtum grupo xaʼespañol nema aku xlakkaxwilikanit. Lu klipaxuwalh chuna la xaklimakgalhtawakgenan Biblia kʼespañol chu kʼportugués. Mayo kkata 1975, kilakgayawaka precursor especial naklitaxtu. ¡Akgtum lanka talakgalhaman!

Akgtum kilhtamaku, chatum precursora especial tiku xwanikan Catharina alh kkintamakxtumitkan xaʼespañol xlakata xkinkamalakgapasnin chatum puskat xalak Bolivia tiku xlimakgalhtawakgemaka Biblia. Catharina chu akit klakkaxwiliw naklamalakgachaniyaw cartas xlakata tlakg tlan xaklalakgapaswi, chu tunkun kakxilhwi pi watiya tuku xaklakgchamputunaw chuna la xakskujnanimaw Dios. Ktamakgaxtokgwi kkata 1976, chu precursores especiales klitaxtuw asta kkata 1982, akxni kinkawanikan pi xakkaw kclase 73 xla Galaad. Lu kaks klilakawaw chu lu kinkamakgapaxuwan akxni kkatsiw pi xʼamaka kinkamalakgachakanan kʼÁfrica Oriental. Akgkitsis kata klichuwinaw Dios kMombasa (Kenia). Kkata 1987, kinkamalakgachakan kTanzania, niku mapakgsinanin aku xmastakgonit talakaskin nalichuwinankan Dios. Anta ktamakgxtakgwi 26 kata, chu alistalh ktaspitwi kKenia.

Xlakata kkamakgtayanitaw latamanin tiku ni laktlankajwa nalakgapaskgo tuku xaxlikana xlakata Biblia uma lu kinkamakgapaxuwanitan. Akgtum liʼakxilhtit, xapulana tiku klimakgalhtawakgelh Biblia anta kMombasa wa chatum chixku tiku ktatanokglhli akxni xaklichuwinama Dios. Kmalaknunilh maktiy revista, chu xla kiwanilh: «Akxni nakkalikgalhtawakgakgo, ¿tuku naktlawa?». Akgtum semana alistalh, ktsukulh limakgalhtawakge Biblia chu kmaklakaskilh libro Usted puede vivir para siempre en el paraíso en la Tierra, nema aku xmaxtukanit ktachuwin suajili. Akgtum kata alistalh tamunulh chu precursor regular litaxtulh. Lata uma kilhtamaku, xla chu xpuskat kamakgtayakgonit max 100 latamanin xlakata natamakamastanikgo Jehová chu natamunukgo.   

Akxni kʼakgatekgsli tuku xlakata lamaw, kmakgkatsilh chuna la stana tiku tekgsli akgtum lu xlakaskinka perla chu ni mastalh talakaskin pi wi tuku xmalaktlawilh natamawa (Mat. 13:45, 46). Xakkamakgtayaputun amakgapitsin naʼakgatekgskgo tuku xlakata lamaw. Kimpuskat tiku lu kpaxki chu akit, kakxilhnitaw la Jehová kasikulunatlawa xlakskujnin akxni kamaxki akgtum xatapaxuwan latamat.