1. ¿Tuku katsiyaw kstalaninanin Cristo, chu tuku liwana kanajlayaw?

 NI KAKS kinkamalakawaniyan pi makgapitsin latamanin ni lakgatikgo akxni lichuwinanaw Dios, chu kkilhtamaku nema aku mima max tlakg nakinkaliputsastalanikanan uma (Dan. 11:44; 2 Tim. 3:12; Apoc. 16:21). Pero liwana kanajlayaw pi Jehová nakinkamakgtayayan. ¿Tuku xlakata chuna wanaw? Xlakata xla ankgalhin kamakgtayanit kskujnin namakgantaxtikgo taskujut nema kalakgayawanit, maski lu tuwa tasiya. Pulaktum tuku limasiya pi chuna, wa tuku titaxtulh palakachuwina Ezequiel, tiku kalinilh tamakatsinin judíos tiku xkachilinkanit kBabilonia.

2. 1) ¿Tuku wa Jehová xpalakatakan judíos tiku Ezequiel xʼama kalini tamakatsinin? (Ezequiel 2:3-6). 2) ¿Tuku naʼakxilhaw kʼuma artículo?

² ¿La xlikatsikgo latamanin tiku Ezequiel xʼama kalini tamakatsinin? Jehová wa pi umakgolh judíos «xalaktsakat» xwankgonit, “xtalalakatawakanankgo” chu “xatsakat xnakujkan xkgalhikgo”. Lu nitlan xlikatsikgo xtachuna la lhtukun chu lu laklipekuanit xwankgonit chuna la escorpiones. Wa xlakata Jehová makglhuwa wanilh Ezequiel: «Ni kakapekuani» (kalikgalhtawakga Ezequiel 2:3-6). Ezequiel tlan makgantaxtilh xtaskujut 1) xlakata wa Jehová tiku malakgachalh, 2) espíritu santo maxkilh litliwakga 3) litatliwakglhli xtachuwin Dios. ¿La makgtayalh umakgolh pulaktutu, chu la nakinkamakgtayayan akinin la uku? Wa uma tuku naʼakxilhaw kʼuma artículo.

3. ¿Tuku tachuwin makgpuwantinilh Ezequiel, chu la limasiyanilh Jehová pi xmakgtayana xwanit?

³ Jehová wanilh Ezequiel: «Kmalakgachaman» (Ezeq. 2:3, 4). Uma max lu makgpuwantinilh. Max lakapastakli pi Jehová xmaklakaskinit watiya uma tachuwin akxni kalaksakli Moisés chu Isaías xlakata xpalakachuwinanin xlitaxtukgolh (Éx. 3:10; Is. 6:8). Ezequiel na xkatsi pi Jehová xkamakgtayanit umakgolh palakachuwinanin namakgantaxtikgo laktuwa taskujut. Wa xlakata, akxni Dios makgtiy wanilh «kmalakgachaman», Ezequiel katsilh pi Jehová xʼama makgtaya. Nachuna, klibro xla Ezequiel makglhuwa tekgsaw umakgolh tachuwin: «Jehová kimakatsinilh xtachuwin» (Ezeq. 14:2). Chu makglhuwa tekgsaw niku wan: «Amakgtum Jehová kimakatsinilh xtachuwin» (Ezeq. 6:1). Wa xlakata palakachuwina Ezequiel liwana xkatsi pi wa Jehová xmalakgachanit. Nachuna, xlakata xtlat sacerdote xwanit, max masiyanilh pi Jehová ankgalhin kawani xpalakachuwinanin pi nakamakgtaya. Jehová kawanilh Isaac, Jacob chu Jeremías: «Akit ktawilan» (Gén. 26:24; 28:15; Jer. 1:8).

4. ¿Tuku tachuwin lu tlan mamakgkatsinilh Ezequiel?

⁴ ¿La xʼamakgo makgamakglhtinankgo tamakatsinin israelitas? Jehová wanilh Ezequiel: «Tiku xalak xchik Israel ni katikgaxmatnikgon xlakata ni kinkgaxmatniputunkgo akit» (Ezeq. 3:7). Akxni lakgmakgankgolh palakachuwina, wa Jehová tiku xlakgmakgamakgo. Umakgolh tachuwin max lu tlan mamakgkatsinilh Ezequiel xlakata xkatsi pi maski latamanin xlakgmakgankgolh ni xwamputun pi xla nitlan palakachuwina xlitaxtu. Nachuna, Jehová liwana wanilh pi akxni xtamakatsinin xkgantaxtulh, umakgolh judíos xkatsikgolh pi «xʼanan chatum palakachuwina kxlakgstipankan» (Ezeq. 2:5; 33:33). Xlikana pi umakgolh  lu laktlan tachuwin makgpuwantinilh Ezequiel namakgantaxti tuku xlakgayawakanit.

5. ¿Tuku xlakata kinkamakgpuwantiniyan Isaías 44:8?

⁵ Akinin na lu tlan limakgkatsiyaw xlakata katsiyaw pi wa Jehová tiku kinkamalakgachayan. Kinkamaxkiyan talakgalhaman xtatayananin nalitaxtuyaw (Is. 43:10). Xtachuna la Jehová wanilh Ezequiel: «Ni kakapekuani», akinin na kinkawaniyan: «Ni kapekuantit». ¿Tuku xlakata ni kilipekuanitkan tiku kinkaputsastalanikgoyan? Xlakata xtachuna la Ezequiel, wa Jehová tiku kinkamalakgachayan chu kinkamakgtayayan (kalikgalhtawakga Isaías 44:8).

6. 1) ¿Tuku kinkalimasiyaniyan Jehová pi nakinkamakgtayayan? 2) ¿Tuku tlan kinkamamakgkatsiniyan chu kinkamakgpuwantiniyan?

⁶ Jehová kinkawaniyan pi nakinkamakgtayayan. Akgtum liʼakxilhtit, akxni nina xwan «wixin kintatayananin», xla wa: «Akxni natitaxtuya niku wi chuchut, akit kminpaxtun naktatayayan, chu akxni napatakuta kgalhtuchokgo ni katilakgtsankga. Akxni natitaxtuya niku wi lhkuyat, ni katilhku chu nipara tsinu katimachichin» (Is. 43:2). Min kilhtamaku, akxni lichuwinanaw Dios, titaxtuyaw tuku tuwa nema xtachuna la kgalhtuchokgo chu titaxtuyaw taputsan nema xtachuna la lhkuyat. Pero xlakata kgalhiyaw xtamakgtay Jehová, chuntiya lichuwinanaw (Is. 41:13). Akinin nachuna kinkaʼakgspulayan la Ezequiel: lhuwa latamanin ni makgamakglhtinankgo tamakatsinin nema kaliniyaw. Liwana katsiyaw pi maski kinkalakgmakgankgoyan ni wamputun pi ni xatlan xtatayananin Dios litaxtuyaw. Tlan kinkamamakgkatsiniyan chu kinkamakgpuwantiniyan xlakata katsiyaw pi Jehová paxuwa akxni akinin chuntiya lichuwinanaw. Apóstol Pablo wa: «Chatunu chatunu namakglhtinan xtatlaja chuna la skujli» (1 Cor. 3:8; 4:1, 2). Chatum tala tiku akglhuwata kata liskujma la precursora wan: «Lu klipaxuwa xlakata kkatsi pi Jehová sikulunatlawa kintaskujutkan».

7. ¿La xmakgkatsi Ezequiel akxni xlilakpuwan tuku xmakxilhnikanit? (Kaʼakxilhti xmakni revista).

⁷ Ezequiel akxilhli la xlitliwakga xwanit xʼespíritu santo Dios. Akxni maʼakxilhnika carro xalak akgapun, akxilhli la uma espíritu wi tuku xkamatlawi lakgtliwakgan ángeles chu xmatsuwi xllantas uma carro (Ezeq. 1:20, 21). Xla kinkawaniyan la makgkatsilh: «Akxni kakxilhli, ktakilhputalh». Lu kaks malakawanilh tuku akxilhli chu asta tamacha katutsu (Ezeq. 1:28). Max akxni xlilakpuwan tuku xmakxilhnikanit, tlakg xmakanajli pi xʼespíritu Dios xʼama makgtaya xlakata xmakgantaxtilh taskujut nema xlakgayawakanit.

8, 9. 1) ¿Tuku limapakgsilh Jehová Ezequiel? 2) ¿Tuku atanu tlawapa Jehová xlakata namatliwakglha Ezequiel?

⁸ Jehová limapakgsilh Ezequiel: «Xkgawasa chixku, kataya xlakata naktachuwinanan». Umakgolh tachuwin chu xʼespíritu santo Dios maxkilh Ezequiel litliwakga nema xmaklakaskin xlakata xtayalh. Xla tsokgwililh: «Klitatsamalh espíritu chu tlawalh pi xaktayalh» (Ezeq. 2:1, 2). Lata ama kilhtamaku chu putuminika xlatamat, xmakan Jehová, o xʼespíritu santo, pulalilh (Ezeq. 3:22; 8:1; 33:22; 37:1; 40:1). Uma espíritu maxkilh Ezequiel litliwakga nema xmaklakaskin xlakata tlan xkalinilh tamakatsinin judíos tiku “ni xlakapastaknankgo chu xatsakatwa xnakujkan” xkgalhikgo (Ezeq. 3:7). Jehová wanilh: «Ktlawanit pi ni nalakapekuana chuna la xlakan ni lakapekuankgo chu klawanit pi mimun xtachuna la xmunkan nawan. Ktlawanit pi mimun chuna la diamante nawan, tlakg palha nixawa chiwix. Ni kakapekuani chu ni kamakgapekuan xlakapunkan»  (Ezeq. 3:8, 9). Xtachuna pi Jehová xwanilh: «Ni kamasta talakaskin pi ni xatlan xtayatkan namaxlajwaniyan. Akit naktlawa pi tliwakga nawana».

⁹ Lata uma kilhtamaku, xʼespíritu Dios lilh Ezequiel niku xtalakaskin pi xlichuwinalh. Xla tsokgwililh: «Xmakan Jehová lu tliwakga xwanit kimpalakata». Talakaskilh akgtum semana xlakata palakachuwina xʼakgatekgsli tamakatsinin nema xʼama lichuwinan xlakata ni xkilhpekualh akxni xlichuwinalh (Ezeq. 3:14, 15). Alistalh, Jehová wanilh pi xʼalh niku xakaxtum, niku Jehová maxkilh xʼespíritu (Ezeq. 3:23, 24). Ezequiel tlantiya xʼalh lichuwinan Dios.

10. ¿Tuku tamakgtay maklakaskinaw xlakata tlan namakgantaxtiyaw kintaskujutkan, chu tuku xlakata?

¹⁰ ¿Tuku tamakgtay maklakaskinaw xlakata tlan namakgantaxtiyaw kintaskujutkan? Xlakata nakgalhtiyaw uma takgalhskinin, kalilakpuwaw Ezequiel. Akxni nina xtsuku lichuwinan Dios, espíritu santo maxkilh litliwakga nema xmaklakaskin. Chuna la Ezequiel, akinin nila xlichuwinaw Dios komo ni wa espíritu santo xkinkamakgtayan. ¿Tuku xlakata chuna wanaw? Xlakata Satanás kinkatalatlawayan xlakata nialh nalichuwinanaw Dios (Apoc. 12:17). Kxlakatin latamanin, Satanás max lu tliwakga tasiya nixawa la akinin. Pero akxni lichuwinanaw Dios makgatlajayaw (Apoc. 12:9-11). Akxni lichuwinanaw Dios, limasiyayaw pi putum tuku tlawa ni kinkamakgapekuanan. Akxni makgatunu lichuwinanaw Dios makgatlajamaw Satanás. Xlakata chuntiya lichuwinamaw Dios maski kinkaputsastalanikanan, limasiya pi espíritu santo kinkamaxkiyan litliwakga chu pi Jehová kinkamakgtayaman (Mat. 5:10-12; 1 Ped. 4:14).

11. ¿La nakinkamakgtayayan espíritu santo, chu tuku kilitlawatkan xlakata chuntiya namakglhtinanaw?

¹¹ Xlakata Jehová tlawalh pi Ezequiel “ni xlakapekualh chu tlawalh pi xmun lu palha xwa”, wi atanu tuku kinkamasiyaniyan: pi espíritu santo tlan nakinkamakgtayayan  natayaniyaw kaxatukawa tuku tuwa natitaxtuyaw akxni lichuwinanaw Dios (2 Cor. 4:7-9). Wa xlakata, ¿tuku kilitlawatkan xlakata chuntiya namakglhtinanaw xʼespíritu Dios? Naskinaw kʼoración chu nalipawanaw pi Jehová nakinkakgaxmatniyan. Jesús kawanilh xtamakgalhtawakgen: «chuntiya kaskintit», «chuntiya kaputsatit» chu «chuntiya kalakgatlakgtit malakcha». ¿Chu tuku natlawa Jehová? «Nakamaxki espíritu santo tiku skinikgo» (Luc. 11:9, 13; Hech. 1:14; 2:4).

12. Chuna la wan Ezequiel 2:9–3:3, ¿niku mincha rollo, chu tuku xlichuwinan?

¹² Ezequiel ni kajwatiya makglhtinalh xlitliwakga espíritu santo, na litatliwakglhli xtachuwin o xtamakatsinin Dios. Kʼakgtum talakawan, akxilhli akgtum makan nema xlima akgtum rollo (kalikgalhtawakga Ezequiel 2:9–3:3). ¿Niku mincha rollo? ¿Tuku xlichuwinan? ¿Chu la litamakgtayalh Ezequiel? Rollo mincha lata niku wi xlaktawilh Jehová. Kʼatanu talakawan Ezequiel xkaʼakxilhnit kgalhtati ángeles, max wa uma chatum ángel tiku Dios maklakaskilh xlakata maxkilh rollo (Ezeq. 1:8; 10:7, 20). Rollo xlimin xtachuwin Dios: wa uma tamakatsinin nema xtalakaskin pi Ezequiel xkalitachuwinalh tiku xkachilinkanit chu ni xkgalhakgaxmatkgo Dios (Ezeq. 2:7). Rollo lakgaputiy xtatsokgnit.

13. ¿Tuku wanilh Jehová Ezequiel pi xtlawanilh rollo, chu tuku xlakata sakgsi xwanit?

¹³ Jehová wanilh xpalakachuwina: «Kawat rollo […] chu kalitapatsama». Ezequiel kgalhakgaxmatnalh chu walh. ¿Tuku kilhchanima uma tuku makxilhnika? Pi Ezequiel liwana xliʼakgatekgsat xwanit tamakatsinin nema xlimastat xwanit. Xlimakgamakglhtinat xwanit uma tamakatsinin chu xlimakgpuwantinit xwanit nalichuwinan Dios. Pero wi tuku kaj xalan lalh. Ezequiel kgalhwanalh pi rollo «lu sakgsi xtakgalhwanan xtachuna la ksakgsi cera» (Ezeq. 3:3). ¿Tuku xlakata? Xlakata Ezequiel lu xmakgapaxuwa napalakachuwinan Jehová (Sal. 19:8-11). Lu xpaxtikatsini Jehová xlakata xlaksaknit xpalakachuwina nawan.

14. ¿Tuku makgtayalh Ezequiel namakgantaxti tuku xlakgayawakanit?

¹⁴ Alistalh, Jehová wanilh Ezequiel: «Kakgaxpatti chu kamaki kminaku putum tuku kwaniman» (Ezeq. 3:10). Jehová xwanima pi xlakapastakli tuku xtatsokgnit krollo chu xlilakpuwa. Uma xʼama matliwakglha xtakanajla Ezequiel chu xʼama malakapastaka lu xlakaskinka tamakatsinin nema xʼama kalini latamanin (Ezeq. 3:11). Akxni Ezequiel liwana akgatekgsli chu kanajlalh xtamakatsinin Dios, tlantiya xmakatsininalh chu xmakgantaxtilh tuku xlakgayawakanit (katamalakxtupi Salmo 19:14).

15. ¿Tuku kilimakgamakglhtinatkan kkinakujkan xlakata chuntiya nalichuwinanaw Dios?

¹⁵ Xlakata chuntiya nalichuwinanaw Dios, akinin na talakaskin chuntiya nalimatliwakglhaw kintakanajlakan xtachuwin Jehová. Kilimakgamakglhtinatkan kkinakujkan putum tuku Jehová kinkawaniyan. La uku Jehová maklakaskin xTachuwin, Biblia, xlakata nakinkatachuwinanan. ¿Tuku kilitlawatkan xlakata xTachuwin Dios chuntiya nalakgpali kintalakapastaknikan, tuku makgkatsiyaw chu tuku tlawaputunaw?

16. ¿La nalimatliwakglhaw kintakanajlakan xTachuwin Dios?

¹⁶ Kimaknikan tatliwakglha akxni wayanaw. Kintakanajlakan na tatliwakglha akxni likgalhtawakgayaw xTachuwin Dios chu lilakpuwanaw.  Wa uma tuku kinkamasiyaniyan akxni maʼakxilhnika rollo Ezequiel. Jehová lakaskin pi kalitatsamaw xTachuwin, pi kaʼakgatekgswi. Chu tlan tlawayaw uma akxni tlawaniyaw oración Jehová, akxni likgalhtawakgayaw xTachuwin chu lilakpuwanaw. Pulana tlawayaw oración xlakata nalakkaxwiliyaw kinakujkan xlakata namakgamakglhtinanaw xtalakapastakni Dios. Alistalh likgalhtawakgayaw Biblia chu lilakpuwanaw tuku likgalhtawakgaw. ¿Tuku nakitaxtu? Akxni tlakg lilakpuwanaw, tlakg tlan makgamakglhtinanaw kkinakujkan xTachuwin Dios.

17. ¿Tuku xlakata lu xlakaskinka nalilakpuwanaw tuku likgalhtawakgayaw kBiblia?

¹⁷ ¿Tuku xlakata lu xlakaskinka nalikgalhtawakgayaw Biblia chu nalilakpuwanaw? Xlakata kinkamaxkiyan litliwakga chuntiya nalichuwinanaw tamakatsinin xla Tamapakgsin la uku. Chu nakinkamaxkiyan litliwakga kkilhtamaku nema aku mima xlakata namakatsininanaw pi nakamasputukan latamanin tiku ni kgalhakgaxmatputunkgo Dios. Nachuna, akxni lilakpuwanaw lu xatlan tayat nema Jehová kgalhi, tlakg tlan talalinaw. Chu uma tlawa pi nakgalhiyaw takaksni chu tlan namakgkatsiyaw (Sal. 119:103).

18. ¿Tuku nakatsikgo latamanin tiku kalitachuwinanaw Dios, chu tuku xlakata?

¹⁸ Maski akinin ni palakachuwinanin chuna la Ezequiel, makatsininanaw tuku Jehová matsokgwilininanit kxTachuwin. Lakkaxwilinitaw chuntiya namakatsininanaw asta akxni Jehová nawan pi nialh nalichuwinanaw. Akxni Jehová nakamasputu tiku nitlan likatsikgo, latamanin nila katiwankgolh pi ni kamakatsinika o pi Jehová ni kalilakgaputsalh (Ezeq. 3:19; 18:23). Wata nakatsikgo pi tamakatsinin nema xkaliniyaw, wa xtamakatsinin Dios.

19. ¿Tuku nakinkamakgtayayan nakgalhiyaw litliwakga xlakata namakgantaxtiyaw kintaskujutkan?

¹⁹ ¿Tuku nakinkamakgtayayan nakgalhiyaw litliwakga xlakata namakgantaxtiyaw kintaskujutkan? Na nakinkamakgtayayan pulaktutu tuku matliwakglhli Ezequiel: chuntiya lichuwinanaw Jehová xlakata katsiyaw pi wa kinkamalakgachanitan, xlakata espíritu santo kinkamaxkiyan litliwakga chu xlakata limatliwakglhaw kintakanajlakan xTachuwin Dios. Xlakata Jehová kinkamakgtayayan, liwana lakkaxwilinitaw chuntiya natlawayaw kintaskujutkan chu natayaniyaw asta «akxni namin lisputni» (Mat. 24:13).