1. ¿Tuku kilhchanima liwana nalimaklakaskinaw kintalakapastaknikan? (2 Timoteo 4:5).

 AKXNI titaxtuyaw tuku tuwa max natlawa pi namakgxtakgaw Jehová chu xkachikin. ¿Tuku nakinkamakgtayayan natayaniyaw? Liwana nalimaklakaskinaw kintalakapastaknikan, skgalalh natawilayaw chu “tliwakga nakgalhiyaw kintakanajlakan” (kalikgalhtawakga 2 Timoteo 4:5). ¿La tlan liwana nalimaklakaskinaw kintalakapastaknikan? Ni lakapala nasitsiyaw, liwana nalilakpuwanaw tuku natlawayaw chu naʼakxilhaw tuku titaxtumaw chuna la Jehová akxilha. Komo chuna natlawayaw, tuku makgkatsiyaw ni katitlawalh pi nitlan nalakapastaknanaw.

2. ¿Tuku naʼakxilhaw kʼuma artículo?

² Kʼartículo nema titaxtulh lichuwinaw pulaktutu tuku titaxtuyaw kskujnin Dios. Kʼuma artículo naʼakxilhaw pulaktutu tuku tuwa titaxtuyaw kcongregación nema max xtlawalh pi xmakgxtakgwi Jehová: akxni lakpuwanaw pi chatum tala nitlan kinkalikatsinin, akxni kinkastakyawakanan chu akxni tuwa makgkatsiyaw nalismaniyaw tuku talakgpali kxkachikin Jehová. Komo chuna natitaxtuyaw, ¿tuku tlan natlawayaw xlakata liwana nalimaklakaskinaw kintalakapastaknikan chu ni namakgxtakgaw Jehová chu xkachikin?

3. ¿Tuku max xtlawaw komo xlakpuwaw pi chatum tala nitlan kinkalikatsinin?

³ ¿Minit kilhtamaku lakpuwanita pi chatum tala nitlan likatsinin, max chatum tiku kgalhi akgtum talakgatay? Xlikana pi uma tala max ni xtlawaniputunan tuku nitlan (Rom. 3:23; Sant. 3:2). Maski chuna, wix lu nitlan limakgkatsi. Max asta nila lhtataya xlakata chuntiya lilakpuwana chu asta miʼakstu kgalhskinkana: «Komo chatum tala chuna likatsi, ¿xlikana uma xkachikin  Dios?». Wa uma tuku Satanás lakaskin kalakpuwanti (2 Cor. 2:11). Uma ni xatlan talakpuwan tlan xtlawalh pi xtamakgatliniw Jehová chu xkachikin. Wa xlakata, komo lakpuwana pi chatum tala nitlan likatsinin, ¿tuku namakgtayayan liwana nalimaklakaskina mintalakapastakni chu ni nalakpuwana tuku nitlan?

4. 1) ¿Tuku tlawalh José xlakata liwana xlimaklakaskilh xtalakapastakni akxni nitlan likatsinika? (Génesis 50:19-21). 2) ¿Tuku kinkamasiyaniyan xliʼakxilhtit?

⁴ Ni kamaki tasitsi. Akxni José aku kstakma, xnatalan nitlan likatsinikgolh. Ksitsinikgo chu makgapitsin asta xmakgniputunkgo (Gén. 37:4, 18-22). Stakgolh chuna la chatum skujni. Chu xlakata uma, José titaxtulh tuku tuwa kxlatamat 13 kata. José max tlan xtilakpuwa pi Jehová nialh xpaxki chu pi xmakgxtakgnit akxni tlakg xmaklakaskin. Pero José ni makilh tasitsi, wata liwana limaklakaskilh xtalakapastakni. Chu akxni tlan xtikamalakgaxokgelh xnatalan nichuna tlawalh, wata kalimasiyanilh tapaxkit chu katapatilh (Gén. 45:4, 5). ¿Tuku xlakata chuna tlawalh? Xlakata liwana limaklakaskilh xtalakapastakni. Ni kajwatiya lilakpuwa xtaʼakglhuwit, wata lilakpuwa xtalakaskin Jehová (kalikgalhtawakga Génesis 50:19-21). ¿Tuku kinkamasiyaniyan? Komo wi tiku nitlan likatsiniyan, ni kalakpuwanti tuku nitlan xlakata Jehová chu ni kalakpuwanti pi patsankganitan. Wata kalilakpuwanti la makgtayanitan natayaniya. Nachuna, lu katapatinamputunti chu kalakapastakti pi «tiku paxkinan putum kilhtamaku tapatiputun achatum» (1 Ped. 4:8).

5. ¿Tuku tlawalh Miqueas xlakata liwana nalimaklakaskin xtalakapastakni akxni lakpuwa pi nitlan xlikatsinikanit?

⁵ Kalichuwinaw tuku titaxtulh chatum kgolotsin xalak Sudamérica tiku wanikan Miqueas. b Akgtum kilhtamaku xla makgkatsilh pi makgapitsi lakgkgolotsin xalak congregación lu nitlan likatsinikgolh. Xla lakapastaka: «Nikxni xaktitaxtunit uma tuku lu tuwa. Lu xaklilakgaputsama. Nila xaklhtata chu xaktasa xlakata ni xakkatsi tuku naktlawa». Maski chuna, Miqueas liwana limaklakaskilh xtalakapastakni chu ni mastalh talakaskin pi tuku xmakgkatsi xmakgatlajalh. Makglhuwa xtlawani oración Jehová xlakata xmaxkilh espíritu santo chu litliwakga xlakata natayani. Na xlakputsanani kilikgalhtawakgakan. ¿Tuku kinkamasiyaniyan? Komo wix lakpuwana pi chatum tala nitlan likatsinin, ni lakapala kasitsi chu ni kamasta talakaskin pi tuku nitlan makgkatsiya namakgatlajayan. Max wi tuku xtitaxtuma uma lataman nema wix ni katsiya chu wa xlakata nitlan tachuwinan o nitlan likatsinin. Wa xlakata kalitachuwinanti Jehová putum tuku makgkatsiya chu kaskini pi kamakgtayan naʼakxilha tuku titaxtupat chuna la uma tala akxilha. Uma namakgtayayan ni nalakpuwana pi mintala xtlawaniputunan tuku nitlan chu tlan natapatiya (Prov. 19:11). Kalakapastakti pi Jehová akxilhma tuku titaxtupat chu namaxkiyan litliwakga xlakata tlan natayaniya (2 Crón. 16:9; Ecl. 5:8).

6. ¿Tuku xlakata xlakaskinka nalakpuwana pi akxni Jehová stakyawayan kaj limasiyaniman xtapaxkit? (Hebreos 12:5, 6, 11).

⁶ Xlikana pi akxni nastakyawakana lu nitlan tamakgkatsi. Pero komo kajwatiya nalilakpuwanaw pi lu nitlan limakgkatsiyaw, max ni xlakaskinka katiʼakxilhwi tastakyaw chu nalakpuwanaw pi ni kinkamininiyan o pi lu malakatsalimaka. Na max napatsankgayaw tuku lu xlakaskinka: pi tastakyaw limasiya xtapaxkit Jehová (kalikgalhtawakga Hebreos 12:5, 6, 11). Komo mastayaw talakaskin pi tuku nitlan makgkatsiyaw nakinkamakgatlajayan, namaxkiyan talakaskin Satanás pi nakinkamatlawiyan tuku nitlan. Xla  lakaskin pi kalakgmakgaw tastakyaw, chu tuku tlakg nitlan, pi katamakgatliniw Jehová chu congregación. Komo wix maxkikanita akgtum tastakyaw, ¿tuku namakgtayayan liwana nalimaklakaskina mintalakapastakni?

7. 1) Chuna la tasiya kdibujo, ¿tuku taskujut lakgayawaka Pedro akxni makglhtinalh tastakyaw? 2) ¿Tuku kinkamasiyaniyan xliʼakxilhtit Pedro?

⁷ Kamakgamakglhtinanti tastakyaw chu katlawa talakgpalit nema talakaskin. Jesús makglhuwa stakyawalh Pedro kxlakatinkan amakgapitsin apóstoles (Mar. 8:33; Luc. 22:31-34). ¡Max Pedro lu maxanalh! Pero ni makgxtakgli Jesús, makgamakglhtinalh tastakyaw chu nialh tlawalh tuku nitlan xtlawanit. Wa xlakata, Jehová sikulunatlawalh chu lakgayawalh lhuwa taskujut kcongregación (Juan 21:15-17; Hech. 10:24-33; 1 Ped. 1:1). ¿Tuku kinkamasiyaniyan? Pi ni kajwatiya kuenta natlawayaw pi nitlan limakgkatsiyaw tastakyaw, wata namakgamakglhtinanaw chu nalakgpaliyaw tuku talakaskin. Komo wix chuna natlawaya, tlakg tlan nakaskujnaniya Jehová chu natalan.

8, 9. ¿La makgkatsilh Bernardo akxni stakyawaka, pero tuku makgtayalh nalakgpali xtapuwan?

⁸ Kalilakpuwaw tuku titaxtulh Bernardo, chatum tala xalak Mozambique. Xla kgolotsin xalak congregación xlitaxtu, pero alistalh nialh kgolotsin litaxtulh. ¿La makgkatsilh? Xla kinkawaniyan: «Lu nitlan klimakgkatsilh xlakata ni klakgatilh tastakyaw nema kimaxkika». Xlilakgaputsa pi natalan xalak congregación nitlan tuku xlakpuwanikgolh. Bernardo wan: «Akglhuwa papaʼ titaxtulh xlakata xakakxilhli tuku xlanit chuna la xlilat chu xaklipawampa Jehová chu xkachikin». ¿Tuku makgtayalh?

⁹ Bernardo lakgpalilh tuku xlakpuwan. Xla wan: «Akxni kgolotsin xaklitaxtu, xakmaklakaskin Hebreos 12:7 xlakata xakkamakgtayalh natalan naʼakxilhkgo xtastakyaw Jehová chuna la xlilat. Wa xlakata klakpuwa: “¿Tiku xlimakgantaxtitkan tuku wan uma versículo?”. Putum kskujnin Jehová, chu na anta kmakgtanuma». Bernardo wi atanu tuku tlawalh xlakata tlakg xlipawa Jehová chu xkachikin. Limaxtulh kilhtamaku nalikgalhtawakga Biblia chu nalilakpuwan. Chu maski chuntiya xlilakgaputsa tuku natalan xlakpuwankgolh xpalakata, akxtum xʼan katalichuwinan Dios chu xmasta xtakgalhtin ktamakxtumit. Titaxtulh kilhtamaku, Bernardo kgolotsin litaxtupa. Komo wix stakyawakanita chuna la Bernardo, ni kajwatiya  kuenta katlawa pi lu nitlan limakgkatsiya tuku titaxtupat, wata kamakgamakglhtinanti tastakyaw chu katlawa talakgpalit nema talakaskin (Prov. 8:33; 22:4). c Komo chuna natlawaya, liwana kakatsi pi Jehová nasikulunatlawayan xlakata ni makgxtakga xla chu xkachikin.

10. ¿Tuku talakgpalilh kxkachikin Jehová nema max tlawalh pi makgapitsi israelitas tuwa xmakgkatsikgolh ni namakgxtakgkgo Dios?

¹⁰ Akxni wi tuku talakgpali kxkachikin Jehová, max tuwa namakgkatsiyaw ni namakgxtakgaw. Komo ni kuenta natlawayaw max asta natamakgatliniyaw Jehová. Kalilakpuwaw tuku talakgpalilh kxlatamatkan makgapitsi israelitas akxni Moisés maxkika Limapakgsin. Akxni nina xlakkaxwilikan Limapakgsin, xʼakgxakga akgatunu familia wa sacerdotes xlitaxtukgo kxchikkan; xtlawakgo pumakamastan chu xtlawanikgo tamakamastan Jehová (Gén. 8:20, 21; 12:7; 26:25; 35:1, 6, 7; Job 1:5). Pero akxni lakkaxwilika Limapakgsin, xʼakgxakga familias nialhla chuna tlawakgolh. Jehová kalaksakli tiku xalak xfamilia Aarón xlakata sacerdotes xlitaxtukgolh chu xtlawakgolh tamakamastan. Lata ama kilhtamaku, komo chatum xʼakgxakga familia tiku ni xtapakgsi kxfamilia Aarón xtlawa xtaskujut chatum sacerdote, xlinit xwanit (Lev. 17:3-6, 8, 9). d ¿Wa uma tuku xlakata Coré, Datán, Abiram, chu 250 napuxkun xalak kachikin talalakatawakakgolh Moisés chu Aarón? (Núm. 16:1-3). Ni katsiyaw. Tuku katsiyaw wa pi Coré chu lakchixkuwin tiku tatayakgolh, makgxtakgkgolh Jehová. ¿Tuku natlawaya wix komo tuwa makgkatsiya akxni wi tuku talakgpali kxkachikin Jehová?

11. ¿Tuku kinkamasiyaniyan xliʼakxilhtitkan makgapitsi levitas cohatitas?

¹¹ Xatapaxuwan kamakgtayananti akxni anan talakgpalit kxkachikin Jehová. Akxni israelitas xlapulakgo kdesierto, levitas xalak xfamilia Cohat xkgalhikgo akgtum lu xlakaskinka taskujut. Makgatunu akxni xmalakxijkan campamento, cohatitas xlinkgo arca xla talakkaxlan kxlakatin putum kachikin (Núm. 3:29, 31; 10:33; Jos. 3:2-4). ¡Lu lanka talakgalhaman xkgalhikgo! Pero uma talakgpalilh akxni israelitas chankgolh kTiyat nema xKawanikanit pi Nakamaxkikan. Nialh xtalakaskin pi Arca xmalakxijka. Wa xlakata, akxni Salomón xmapakgsinama, makgapitsi cohatitas xkilhtlikgo ktemplo, amakgapitsi xkuentajtlawakgo malakcha chu amakgapitsi xkuentajtlawanankgo niku xmakikan tuku xlinkan ktemplo (1 Crón. 6:31-33; 26:1, 24). Biblia ni wan pi cohatitas litaʼakglhuwikgolh taskujut nema xkamaxkikanit o skinkgolh atanu nema tlakg xlakaskinka, maski xapulana xkgalhikgonit lu xlakaskinka taskujut. ¿Tuku kinkamasiyaniyan? Xatapaxuwan kamakgtayananti akxni wi tuku talakgpali kxkachikin Jehová, asta maski uma natlawa pi nialhla natlawaya taskujut nema xtlawaya pulana. Kalipaxuwa kaxatukawa taskujut nema namaxkikana. Kalakapastakti pi tuku xtapalh kinkatlawayan ni wa tuku kinkalakgayawakanan kxkachikin Jehová. Kxlakatin Jehová tlakg xlakaskinka nakgalhakgaxmataw nixawa taskujut nema lakgayaw (1 Sam. 15:22).

12. ¿Tuku makgkatsilh Zaira akxni nialh skujli kBetel?

¹² Kalichuwinaw tuku titaxtulh Zaira, chatum tala xalak Oriente Medio. Xla lu xtapalh xliʼakxilha naskuja kBetel, niku makgtayanalh  liwaka 23 kata. Pero alistalh taxtulh kBetel chu malakgachaka chuna la precursora especial. Xla kinkawaniyan: «Uma tuku talakgpalilh lu tuwa kmakgkatsilh. Xaklakpuwan pi nitu xaklitaxtu chu akstu xkinkgalhskinkan tuku nitlan xaktlawanit». Chu tuku tlakg nitlan wa pi makgapitsi natalan xalak congregación nitlan xmamakgkatsinikgo xlakata xwanikgo: «Komo tlakg tlan xtitlawa mintaskujut, ni xtitamakxtuka kBetel». Zaira lu nitlan xmakgkatsi chu chali chali xtasa katsisni. Pero xla wan: «Nikxni klakpuwa pi Jehová chu xkachikin nialh xkimpaxkikgo». ¿Tuku makgtayalh liwana nalimaklakaskin xtalakapastakni?

13. ¿Tuku tlawalh Zaira xlakata nialh nalilakpuwan tuku nitlan xlimakgkatsi?

¹³ Xlakata nialh nalilakpuwan tuku nitlan xlimakgkatsi, Zaira likgalhtawakgalh makgapitsi artículos nema xlichuwinankgo tuku xla xtitaxtuma. Pulaktum tuku makgtayalh wa artículo «Usted puede afrontar el desánimo» nema min krevista La Atalaya 1 xla febrero kata 2001. Uma artículo lichuwinan xliʼakxilhtit Marcos, chatum tiku tsokgli maktum libro xalak Biblia, tiku max nachuna xmakgkatsi la Zaira akxni wi tuku talakgpalilh la kskujnani Jehová. Zaira wan: «Xliʼakxilhtit Marcos lu kimakgtayalh». Zaira putsalh xtamakgtay xʼamigos, ni katamakgatlinilh natalan chu nialh lilakpuwa xtalipuwan. Akgatekgsli pi xʼespíritu Jehová pulalima xkachikin chu pi natalan tiku pulalinankgo xlikana xlilakgaputsakgo. Pero na akxilhli pi kxkachikin Jehová, tuku tlakg xlakaskinka wa pi namakgantaxtiyaw taskujut nema xla kinkalakgayawanitan.

14. ¿Tuku talakgpalilh kxkachikin Jehová nema talakaskilh pi Vlado xmakgamakglhtinalh, chu tuku makgtayalh chuna natlawa?

¹⁴ Chatum kgolotsin xalak congregación xla Eslovenia tiku wanikan Vlado chu kgalhi 73 kata, lu tuwa makgkatsilh akxni congregación akxtum tatlawaka atanu congregación chu nialh maklakaskinka Pukgalhtawakga niku xʼankgo. Xla wan: «Ni xakʼakgatekgsa tuku xlakata xtalakaskin xmalakchuwaka akgtum lu stlan Pukgalhtawakga. Ksitsilh xlakata nina makgas xaklakkaxtlawanitaw. Akit xwakna chu makgapitsi muebles nema xwilakgo anta akit xakkatlawanit. Nachuna, uma talakgpalit lhuwa tuku tuwa kinkaliminin tiku klinawa kata». ¿Tuku makgtayalh namakgamakglhtinan uma talakgpalit? Xla wan: «Akxni wi tuku talakgpali kxkachikin Jehová, ankgalhin tlan kitaxtu  komo namakgtayananaw. Uma kinkamamakgatawakgeyan xlakata natayaniyaw talakgpalit nema max nala kkilhtamaku nema aku mima». ¿Na tuwa makgkatsinita xlakata akxtum katlawaka congregaciones o xlakata talakgpalinit taskujut nema xlakgayat xapulana? Ni kalilakgaputsa, Jehová akgatekgsa la makgkatsiya. Komo wix namakgtayanana akxni wi tuku talakgpali chu ni namakgxtakga Jehová chu xkachikin nema xla maklakaskima, namakglhtinana lhuwa tasikulunalin (Sal. 18:25).

15. ¿Tuku tlan natlawaya xlakata chuntiya liwana nalimaklakaskina mintalakapastakni akxni la tuku tuwa kcongregación?

¹⁵ Chuna la talakatsuwima xlisputni uma kakilhtamaku, max kcongregación naʼanan tuku tuwa nema natlawa pi tuwa namakgkatsiyaw ni namakgxtakgaw Jehová. Wa xlakata talakaskin liwana nalimaklakaskinaw kintalakapastaknikan. Komo lakpuwanaw pi chatum tala nitlan kinkalikatsinin, ni kamakiw tasitsi. Komo kinkastakyawakanan, ni kajwatiya kalilakpuwaw pi nitlan limakgkatsiw, wata kamakgamakglhtinaw tastakyaw chu kalakgpaliw tuku talakaskin nalakgpaliyaw. Chu akxni kxkachikin Jehová wi tuku talakgpali nema na lakgpali kilatamatkan, xatapaxuwan katatayaw uma talakgpalit chu chuntiya kastalaniw xtapulalit xkachikin Jehová.

16. ¿Tuku tlan natlawaya xlakata chuntiya nalipawana Jehová chu xkachikin?

¹⁶ Wix tlan chuntiya nalipawana Jehová chu xkachikin komo ni namakgxtakga akxni natitaxtuya tuku tuwa. Pero xlakata tlan chuna natlawaya, talakaskin chuntiya liwana nalimaklakaskina mintalakapastakni, uma wamputun, ni lakapala nasitsiya, nalilakpuwana tuku natlawaya chu naʼakxilha tuku lama chuna la akxilha Jehová. Kalakkaxwili pi tlakg nalakputsananiya xlatamatkan tiku kalichuwinankan kBiblia tiku titaxtukgolh tuku xtachuna titaxtupat chu kalilakpuwanti xliʼakxilhtitkan. Kaskini Jehová pi kamakgtayan chu nikxni kakatamakgatlini natalan xalak congregación. Komo chuna natlawaya, Satanás nila katitlawalh pi natamakgatliniya Jehová chu xkachikin (Sant. 4:7).