1. ¿Tuku xlakata katsiyaw pi Jehová kinkatalakatsuwiniputunan?

 JEHOVÁ lakaskin pi kalakgtalakatsuwiw (Sant. 4:8). Xla kiDioskan, kinTlatkan chu kiʼamigojkan litaxtuputun. Xla kgalhti kiʼoracioneskan chu kinkamakgtayayan akxni kgalhiyaw taʼakglhuwit. Nachuna, maklakaskin xkachikin xlakata nakinkamasiyaniyan chu nakinkakuentajtlawayan. Pero ¿tuku kilitlawatkan xlakata nalakgtalakatsuwiyaw?

2. ¿La tlan nalakgtalakatsuwiyaw Jehová?

² Tlan nalakgtalakatsuwiyaw Jehová akxni tlawaniyaw oración, likgalhtawakgayaw xTachuwin chu lilakpuwanaw. Uma natlawa pi napaxkiyaw chu napaxtikatsiniyaw. Nakgalhakgaxmatputunaw chu namaxkiputunaw takaknin nema xla lakgchan (Apoc. 4:11). Akxni tlakg lakgapasaw, tlakg lipawanaw xla chu xkachikin nema lakkaxwilinit xlakata nakinkakuentajtlawayan.

3. 1) ¿Tuku tlawa Akgskgawini xlakata natamakgatliniyaw Jehová? 2) ¿Tuku talakaskin xlakata nikxni namakgxtakgaw kiDioskan chu xkachikin? (Salmo 31:13, 14).

³ Akgskgawini litsakgsa natamakgatliniyaw Jehová, liwaka akxni kgalhiyaw taʼakglhuwit. ¿La tlawa? Tsinu tsinu maxlajwaniputun la lipawanaw Jehová chu xkachikin. Pero tlan namakgatlajayaw. Komo nakgalhiyaw akgtum tliwakga takanajla  chu lu nalipawanaw Jehová, nikxni katimakgxtakgwi chu chuntiya nalipawanaw xkachikin (kalikgalhtawakga Salmo 31:13, 14).

4. ¿Tuku nalichuwinanaw kʼuma artículo?

⁴ Kʼuma artículo, nalichuwinanaw pulaktutu tuku titaxtuyaw kskujnin Jehová nema tlan xlaktlawalh la lipawanaw Jehová chu xkachikin. ¿La tlan xtlawalh pi xtamakgatliniw kiDioskan? Chu ¿tuku tlan natlawayaw xlakata ni nakinkamakgatlajayan Satanás?

5. Akxni titaxtuyaw taʼakglhuwit, ¿la xtlawalh pi nialh xlipawaw Jehová chu xkachikin?

⁵ Max namin kilhtamaku namakgatsankgayaw kintaskujutkan o kifamiliajkan nialh nalakaskinkgo naskujnaniyaw Jehová. Uma tuku nitlan titaxtuyaw, ¿la tlan xtlawalh pi nialh xlipawaw Jehová chu xkachikin chu xkatamakgatliniw? Akxni akgtum taʼakglhuwit lhuwa kilhtamaku makgapala, max nalakpuwanaw pi nialh katilakkaxlalh chu nataxlajwaniyaw. Satanás limaklakaskin uma xlakata nalakpuwanaw pi Jehová nialh kinkapaxkiyan. Lakaskin kalakpuwaw pi wa Jehová o xkachikin linkgo kuenta tuku titaxtumaw. Wa uma tuku kaʼakgspulalh makgapitsi israelitas tiku xwilakgo kʼEgipto. Xapulana xlakpuwankgo pi wa Jehová tiku xkalaksaknit Moisés chu Aarón xlakata nakalakgmaxtukgo (Éx. 4:29-31). Pero, akxni faraón tlakg tsukulh kamakgapatinan, kalimawakakgolh Moisés chu Aarón, chu wankgolh: «Wixin tlawanitantit pi faraón chu kskujnin ni nakinkaʼakxilhputunkgoyan chu kamaxkinitantit akgtum espada xlakata nakinkamakgnikgoyan» (Éx. 5:19-21). ¡Lu nitlan pi wa kalimawakakgolh kuenta xlakskujnin Dios! Komo wix lhuwata kilhtamaku titaxtupat tuku tuwa, ¿tuku tlan natlawaya xlakata chuntiya nalipawana Jehová chu xkachikin xliputum minaku?

6. ¿Tuku kinkamasiyaniyan xliʼakxilhtit Habacuc? (Habacuc 3:17-19).

⁶ Kawani Jehová tuku makgkatsiya chu kalipawanti. Palakachuwina Habacuc lhuwa tuku titaxtulh. Max milh kilhtamaku lakpuwa pi Jehová ni xlilakgaputsa. Wa xlakata wanilh putum tuku xmakgkatsi. Wa: «¿Asta tuku kilhtamaku Jehová naktasaskiniyan tamakgtay chu wix ni kgaxpata? [...] Chu ¿tuku xlakata mastaya talakaskin nakamapatinikan latamanin?» (Hab. 1:2, 3). Jehová kgalhtilh xʼoración uma chixku (Hab. 2:2, 3). Akxni xlilakpuwanita la Jehová xlakgmaxtunit xkachikin, Habacuc paxuwapa. Katsilh pi Jehová xlilakgaputsa chu xʼama makgtaya natayani kaxatukawa taputsan (kalikgalhtawakga Habacuc 3:17-19). ¿Tuku kinkamasiyaniyan uma? Akxni kgalhiya taʼakglhuwit, katlawani oración Jehová, kawani tuku makgkatsiya chu kalipawanti. Tlan nalipawana pi Jehová namaxkiyan litliwakga xlakata natayaniya. Chu, akxni naʼakxilha la Jehová namakgtayayan, mintakanajla natatliwakglha.

7. ¿Tuku xmatlawiputunkgo xfamilia Shirley, chu tuku makgtayalh chuntiya nalipawan Jehová?

⁷ Chuntiya kakuentajtlawa mintakanajla. Wa uma tuku makgtayalh chatum tala xalak Papúa Nueva Guinea tiku wanikan Shirley akxni xtitaxtuma taʼakglhuwit. b Xfamilia limaxkgen xwanit, chu xmin kilhtamaku ni xkgalhikgo tuku nawakgo. Chatum tiku xalak xfamilia xmaxlajwaniputun la xlipawan Jehová, chu wanilh: «Wix wana pi xʼespíritu santo Dios makgtayaman. Pero ¿niku wi uma tamakgtay? Lakglimaxkgen wixin. Kaj makgatsankgapat minkilhtamaku  akxni pina lichuwinana Dios». Shirley wan pi milh kilhtamaku lakpuwa pi max Jehová ni xkalilakgaputsa xla chu familia. Xla wan: «Ktlawanilh oración Jehová chu kwanilh putum tuku xakmakgkatsi. Chuntiya klikgalhtawakgalh Biblia chu kilikgalhtawakgakan, chu chuntiya klichuwinalh Dios chu xakkan ktamakxtumit». Shirley akxilhli pi Jehová ankgalhin xkuentajtlawama xfamilia, xlakata ni xtsinksnikgonit chu xpaxuwakgo. Xla wan: «Kakxilhli la Jehová kgalhtilh kiʼoraciones» (1 Tim. 6:6-8). Komo wix chuntiya namatliwakglha mintakanajla, nitu katitlawalh pi natamakgatliniya Jehová.

8. ¿Tuku max xkaʼakgspulalh natalan tiku pulalinkgo congregaciones?

⁸ Kintalamakgasitsinkan limaklakaskinkgo redes sociales o atanu tuku limakatsininankan xlakata namalakgatumikgo taʼakgsanin o tuku ni xaxlikana xlakata natalan tiku pulalinkgo xkachikin Jehová (Sal. 31:13). Makgapitsi natalan katamaknukanit kpulachin chu kaliyawakanit pi tlawakgonit tuku nitlan. Kxapulana siglo nachuna lalh. Apóstol Pablo limawakaka tuku nitlan chu tamaknuka kpulachin. ¿Tuku tlawakgolh kstalaninanin Cristo xala uma kilhtamaku?

9. ¿Tuku tlawakgolh makgapitsi kstalaninanin Cristo akxni Pablo tamaknuka kpulachin?

⁹ Akxni apóstol Pablo xtanuma kpulachin anta kRoma, makgapitsi kstalaninanin Cristo akgxtakgmakgankgolh (2 Tim. 1:8, 15). ¿Xlimaxanankgo Pablo xlakata xlimawakakanit tuku nitlan? (2 Tim. 2:8, 9). ¿O kaj xpekuankgo pi na xkaputsastalanika? Maski ni katsiyaw tuku xpalakata, Pablo lu nitlan limakgkatsilh. Xla lhuwa tuku xtayaninit chu asta kalipekua xwilinit xlatamat xpalakatakan (Hech. 20:18-21; 2 Cor. 1:8). Nikxni kalikatsiw chuna la umakgolh kstalaninanin Cristo tiku akgxtakgmakgankgolh Pablo akxni xla xmaklakaskima xtamakgtaykan. ¿Tuku kililakapastakatkan akxni kaputsastalanikan natalan tiku pulalinkgo congregaciones?

10. ¿Tuku kililakapastakatkan akxni kaputsastalanikan natalan tiku pulalinkgo congregaciones, chu tuku xlakata?

 ¹⁰ Kalakapastakti tuku xlakata kinkaputsastalanikanan chu tiku chuna tlawama. Anta ktatsokgni xla 2 Timoteo 3:12 wan: «Putum tiku kakninaniputunkgo Dios kxlatamatkan chuna la kstalaninanin Cristo Jesús, na nakaputsastalanikan». Wa xlakata ni kaks kinkamalakawaniyan pi Satanás kaputsastalani natalan tiku pulalinkgo congregaciones. Tuku tlawaputun wa pi umakgolh natalan kamakgxtakgkgolh Jehová chu akinin kapekuaw (1 Ped. 5:8).

11. ¿Tuku kinkamasiyaniyan xliʼakxilhtit Onesíforo? (2 Timoteo 1:16-18).

¹¹ Chuntiya kakamakgtaya natalan tiku wi tuku lakgayakgo (kalikgalhtawakga 2 Timoteo 1:16-18). Kxapulana siglo, xlama chatum kstalanina Cristo tiku tlawalh tuku tlan akxni Pablo xtanuma kpulachin. Xwanikan Onesíforo. Pablo wa xpalakata: «Ni kilimaxanalh xlakata ktanuma kpulachin». Onesíforo tlawalh putum tuku xmatlani xlakata xmakgtayalh apóstol Pablo. ¡Kalipekua wililh xlatamat xlakata namakgtaya! ¿Tuku kinkamasiyaniyan? Ni kamasta talakaskin pi tapekua natlawa nialh nakamakgtayaya natalan tiku kaputsastalanimaka. Katlawa putum tuku matlaniya xlakata nakakgalhmakgtayaya (Prov. 17:17). Xlakan maklakaskinkgo kakalimasiyaniw tapaxkit chu kakamakgtayaw.

12. ¿Tuku kinkamasiyaniyan xliʼakxilhtitkan natalan xalak Rusia?

¹² Kalilakpuwanti tuku tlawakgo kinatalankan xalak Rusia akxni chatum tala tamaknukan kpulachin. Akxni chatum tala linkan kxlakatin juez, lhuwa natalan ankgo ktribunal xlakata natatayakgo. ¿Tuku kinkamasiyaniyan uma? Komo chatum tala tiku pulalima congregación nalimawakakan tuku nitlan o natamaknukan kpulachin, ni kapekuanti. Katlawa oración xpalakata, kakuentajtlawa xfamilia chu kalakputsa la nakamakgtayaya (Hech. 12:5; 2 Cor. 1:10, 11).

13. ¿La max natlawa nialh nalipawanaw Jehová chu xkachikin akxni nakinkalikgalhkgamanankanan?

¹³ Max makgapitsi tiku xalak kifamiliajkan, tiku kataʼanaw kʼescuela o tiku kataskujaw nakinkalikgalhkgamanankgoyan xlakata lichuwinanaw Dios o xlakata kgalhakgaxmataw xlimapakgsin (1 Ped. 4:4). Max nakinkawanikgoyan: «Tlan likatsiya, pero malakatsaliya tuku kanajlaya chu mintakanajla nialh makgtayanan». Max nitlan nakinkalichuwinankgoyan xlakata la kalikatsiniyaw tiku katamakxtukanit kcongregación chu nakinkawanikgoyan: «Ni xlikana kapaxkiya latamanin». Putum uma max nakinkamaxlajwaniyan chu nakinkamalakpuwaniyan: «¿Xlilat tuku Jehová kiskini? Chu xkachikin, ¿ni malakatsali tuku wan?». Komo wix chuna titaxtupat, ¿tuku tlan natlawaya xlakata ni natamakgatliniya Jehová chu xkachikin?

14. ¿Tuku kilitlawatkan komo nakinkalikgalhkgamanankanan xlakata kgalhakgaxmataw xlimapakgsin Jehová? (Salmo 119:50-52).

¹⁴ Chuntiya xtapalh kaliʼakxilhti xlimapakgsin Jehová. Job chatum chixku tiku xtapalh liʼakxilhli xlimapakgsin Jehová maski amakgapitsin likgalhkgamanankgolh. Chatum tiku xwan pi xʼamigo xwanit xmakanajliputun pi Dios ni kuenta xtlawa komo Job xkgalhakgaxmata xlimapakgsin o ni (Job 4:17, 18; 22:3). Pero Job ni kanajlalh umakgolh taʼakgsanin. Xkatsi pi xlimapakgsin Jehová xlakata tuku tlan chu tuku nitlan xaʼakgstitum xwanit, chu kgalhakgaxmatli. Ni mastalh talakaskin pi amakgapitsin  xtlawakgolh pi xmakgatsankgananilh Dios (Job 27:5, 6). ¿Tuku kinkamasiyaniyan? Ni kamasta talakaskin pi tuku wankgo amakgapitsin natlawa pi nialh nakgalhakgaxpata xlimapakgsin Jehová. Kalilakpuwanti la kitaxtuninitan xlakata kgalhakgaxpata xlimapakgsin Jehová. ¿Ni xlikana pi ankgalhin tlan kitaxtuniyan? Katataya xkachikin Dios nema kgalhmakgtaya xlimapakgsin. Komo chuna natlawaya, maski latamanin nalikgalhkgamanankgoyan, ni katitlawalh pi natamakgatliniya Jehová (kalikgalhtawakga Salmo 119:50-52).

15. ¿Tuku xlakata xfamilia Brizit xlikgalhkgamanankgo?

¹⁵ Kalichuwinaw tuku titaxtulh Brizit, chatum tala xalak India. Xlakata xtatayana Jehová xwanit, xtalakaskin xtayanilh la xlikgalhkgamanankgo xfamilia. Tamunulh kkata 1997 chu ni makgas, xchixku tiku ni xtatayana Jehová xwanit, makgatsankgalh xtaskujut. Wa xlakata xchixku Brizit kawanilh xla chu xlaktsuman pi xʼamakgo makgtawilakgo kxchik xnatlatni, tiku xwilakgo kʼalakatanu kachikin. Pero xtaʼakglhuwit Brizit ni anta sputli. Xlakata xchixku chuntiya ni xkgalhi xtaskujut, Brizit tsukulh skuja putuminika semana xlakata nakamaxki xfamilia tuku xmaklakaskinkgo. Chu congregación nema tlakg lakatsu xwi, 350 kilómetros la xlilakgamakgat xwi. Lu nitlan, pero xfamilia xchixku tsukulh sitsinikgo xlakata xtatayana Jehová xwanit. Lu nitlan xkalikatsinikan, wa xlakata Brizit chu familia talakaskilh naʼankgo alakatanu. Pero wi tuku kaj xalakapala lalh: xchixku nilh. Alistalh, xtsumat tiku kajku 12 kata xkgalhi lakgnilh cáncer. Chu, tuku tlakg nitlan, xfamilia Brizit wanikgolh pi wa xlin kuenta. Wanikgolh pi, komo ni xtatayana Jehová xwa, nichuna xʼakgspulalh. Pero xla chuntiya lipawa Jehová chu ni tamakgatlinilh xkachikin.

16. ¿Tuku tasikulunalin makglhtinalh Brizit xlakata ni tamakgatlinilh Jehová chu xkachikin?

¹⁶ Xlakata Brizit lu lakgamakgat xwi lata niku xwi congregación, chatum superintendente de circuito wanilh pi xlichuwinalh Dios niku xlama chu xʼakstu xtlawalh tamakxtumit kxchik. Xapulana lakpuwa pi lu tuwa  xʼama wan. Pero tlawalh tuku wanilh superintendente, tsukulh lichuwinan Dios niku xlama, tsukulh tlawa tamakxtumit kxchik chu tsukulh katakakninani Dios kfamilia xlaktsuman. ¿La kitaxtunilh? Brizit chalhuwa tiku tsukulh kalimakgalhtawakge Biblia, chu lhuwa tiku tamunukgolh. Chu kkata 2005 precursora regular litaxtulh. Lu tlan kitaxtulh xlakata lipawa Jehová chu ni makgxtakgli xkachikin. La uku, xlaktsuman skujnimakgo Jehová chu anan akgtiy congregaciones niku lama. Brizit wan pi wa Jehová tiku maxkilh litliwakga xlakata natayani putum tuku titaxtulh chu la xlikgalhkgamanankgo xfamilia.

17. ¿Tuku kililakkaxwilitkan natlawayaw?

¹⁷ Satanás lakaskin kalakpuwaw pi akxni titaxtuyaw tuku tuwa, Jehová kinkaʼakgxtakgmakganan chu pi lu nitlan kinkakitaxtuniyan akxni kgalhakgaxmataw xkachikin. Na lakaskin kapekuaw akxni kalimawakakan taʼakgsanin, kaputsastalanikan o katamaknukan kpulachin natalan tiku pulalinkgo congregación. Nachuna, tlawa pi latamanin nakinkalikgalhkgamanankgoyan xlakata nialh nalipawanaw xlimapakgsin Jehová chu xkachikin. Pero akinin katsiyaw putum tuku xla limaklakaskin chu ni mastayaw talakaskin nakinkaʼakgskgawiyan (2 Cor. 2:11). Kalakgmakgaw putum xtaʼakgsanin Satanás chu ankgalhin kalipawaw Jehová chu xkachikin. Kalakapastakwi pi Jehová nikxni kintikamakgxtakgni (Sal. 28:7). Wa xlakata, ¡nitu katlawalh natamakgatliniyaw Jehová! (Rom. 8:35-39).

18. ¿Tuku naʼakxilhaw kʼatanu artículo?

¹⁸ Kʼuma artículo lichuwinaw tuku titaxtuyaw xlakskujnin Jehová nema natlawa pi max nialh nalipawanaw Jehová chu xkachikin. Pero kcongregación na max wi tuku tuwa natitaxtuyaw. ¿La tlan natayaniyaw? Wa uma tuku naʼakxilhaw kʼatanu artículo.