1, 2. ¿Tuku «xatlan taskujut» tlawakgo lakgkgolotsin?

 KOMO lhuwata kata siervo ministerial litaxtuya, max makgatsiyata tuku talakaskin xlakata kgolotsin xalak congregación nalitaxtuya. ¿Tuku atanu militlawat xlakata natlawaya uma «xatlan taskujut»? (1 Tim. 3:1).

² ¿Tuku taskujut tlawa chatum kgolotsin? Xatapaxuwan lichuwinan Dios, lu liskuja xlakata nakamakgpuwantini chu nakamasiyani natalan chu kalimatliwakglha congregación tuku wan chu tuku tlawa. Wa xlakata Biblia wan pi lakgkgolotsin litaxtukgo «la akgtum tasikulunalin» (Efes. 4:8).

3. ¿Tuku talakaskin namakgatsi chatum tala xlakata kgolotsin nalitaxtu? (1 Timoteo 3:​1-7; Tito 1:​5-9).

³ ¿Tuku talakaskin xlakata kgolotsin nalitaxtuya? Namakgatsiya tuku talakaskin xlakata kgolotsin nalitaxtuya, ni xtachuna namakgatsiya tuku talakaskin kʼakgtum putaskujut. Kʼakgtum taskujut lakgachunin kajwatiya talakaskin nakatsiniya tuku maklakaskin tiku namaxkiyan taskujut. Pero komo kgolotsin litaxtuputuna, ni kajwatiya talakaskin nakatsiniya la nalichuwinana Dios chu namasiyaya. Na talakaskin namakgatsiya tuku wan 1 Timoteo 3:​1-7 chu Tito 1:​5-9 (kalikgalhtawakga). Kʼuma artículo nalichuwinanaw tuku talakaskin natlawa chatum tala xlakata natalan xalak congregación chu amakgapitsin latamanin tlan nalichuwinankgo, tlan napulalin xfamilia chu la xatapaxuwan nakamakgtaya natalan xalak congregación.

TLAN NALICHUWINANKAN

4. ¿Tuku wamputun pi chatum tala «tlan napulalin xlatamat xlakata latamanin ni natekgskgo tuku nitlan nalimawakakgo»?

⁴ Pulaktum tuku talakaskin namakgatsi chatum kgolotsin wa  pi «tlan napulalin xlatamat xlakata latamanin ni natekgskgo tuku nitlan nalimawakakgo». Uma wamputun pi ni naʼanan tuku natlawa pi natalan xalak congregación nitlan nalichuwinankgo. Nachuna, «xlilat pi tiku ni makgtapakgsikgo kcongregación tlan nalichuwinankgo». Tiku ni makgtapakgsikgo kcongregación, max nitlan katilichuwinankgolh tuku kanajla uma kgolotsin, pero ni xlitlawat tuku nitlan nema natlawa pi nitlan nalichuwinankan (Dan. 6:​4, 5). Kalakpuwanti: «¿Tlan kilichuwinankgo natalan chu tiku ni makgtapakgsikgo kcongregación?».

5. ¿Tuku wamputun pi tala “napaxki tuku tlan”?

⁵ “Napaxki tuku tlan” wamputun pi naʼakxilha tuku tlan tlawakgo amakgapitsin chu nakawani pi lu tlan pi kgalhikgo umakgolh tayat. Na kilhchanima pi xatapaxuwan natlawakgo tuku tlan xpalakatakan amakgapitsin, maski nitu kaskinimaka (1 Tes. 2:8). Lu xlakaskinka pi lakgkgolotsin nakgalhikgo umakgolh tayat, xlakata chuna xatapaxuwan nalimaxtukgo kilhtamaku nakamatliwakglhkgo natalan xalak congregación chu namakgantaxtikgo xtaskujutkan (1 Ped. 5:​1-3). Pero maski lhuwa taskujut xlitlawatkan, paxuwakgo xlakata tlawakgo tuku tlan xpalakatakan amakgapitsin (Hech. 20:35).

6. ¿La limasiya chatum tala pi «tlan kamakgamakglhtinan amakgapitsin»? (Hebreos 13:​2, 16; na kaʼakxilhti dibujo).

⁶ Chixku tiku «tlan kamakgamakglhtinan amakgapitsin», ni kajwatiya tlan kalikatsini tiku kalakgapasa (1 Ped. 4:9). Chuna la wan maktum libro, «nakamalakkini xchik chu tlan nakalikatsini tiku ni kalakgapasa». Kalilakpuwanti: «¿Kililakgapaskan xlakata tlan kkamakgamakglhtinan tiku kilakgminkgo?» (kalikgalhtawakga Hebreos 13:​2, 16). Chixku tiku tlan kamakgamakglhtinan amakgapitsin katawa o kamaxki tuku kgalhi tiku lakgapaxialhnankgo. Akgtum liʼakxilhtit, tiku ni lhuwa tuku kgalhikgo chu tiku palha skujkgo xpalakatakan natalan, chuna la superintendentes de circuito chu natalan tiku minkgo mastakgo taʼakgchuwin kcongregación (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿La limasiya chatum kgolotsin pi «ni xpaxkina tumin»?

⁷ «Ni xpaxkina tumin nawan». Uma wamputun pi ni tlakg xlakaskinka naʼakxilha tuku lhuwa xtapalh. Komo kgalhi tumin o ni, xlakaskinka pi pulana nawili xTamapakgsin Dios kxlatamat (Mat. 6:33). Nalimaklakaskin xkilhtamaku, xlitliwakga chu tuku kgalhi xlakata nakakninani Jehová, nakuentajtlawa xfamilia chu nakaskujnani natalan  xalak congregación (Mat. 6:24; 1 Juan 2:​15-17). Kalilakpuwanti: «¿La xlilakaskinka kakxilha tumin? ¿Klipaxuwa xlakata kkgalhi tuku kmaklakaskin? ¿O lu kliskujma xlakata tlakg nakkgalhi tumin chu atanu tuku lhuwa xtapalh?» (1 Tim. 6:​6, 17-19).

8. ¿La limasiya chatum tala pi «ni malakatsali tuku lismani tlawa» chu «machokgo akxni tlawaputun tuku nitlan»?

⁸ Chatum kgolotsin lilakgapaskan pi «ni namalakatsali tuku lismani tlawa» chu «machokgo akxni tlawaputun tuku nitlan», komo ni malakatsali xliputum tuku tlawa kxlatamat. Uma kilhchanima pi ni namalakatsali la wayan chu la xlilhuwa wa kuchu, ni namalakatsali la lhakganan chu la takaxtaya chu la maklakaskin xkilhtamaku. Ni nalatama chuna la tiku ni skujnanikgo Jehová (Luc. 21:34; Sant. 4:4). Na ni lakapala sitsi, asta maski makgasitsiputunkan. Chatum kgolotsin «ni kgotni xliwanat» chu ni nalilakgapaskan pi lhuwa wa kuchu. Kalilakpuwanti: «¿Klimasiya chuna la klima kilatamat pi ni kmalakatsali tuku ktlawa chu kmachokgo tuku ktlawaputun?».

9. ¿Tuku wamputun pi chatum tala “tlan lakapastaknan” chu “xaʼakgstitum lin xlatamat”?

⁹ Chatum kgolotsin limasiya pi “tlan lakapastaknan”, akxni lilakpuwan tuku wan Biblia komo wi tuku ama tlawa. Akxni lilakpuwan la namakgantaxti tuku wan Biblia, liwana akgatekgsa tuku xlitlawat chu laksaka tuku tlan. Ni kaj lakapala wi tuku laksaka, wata pulana liwana lakputsanani putum tuku xlitatlawat (Prov. 18:13). Akxni chuna tlawa, laksaka tuku tlan chu limasiya pi kgalhi xtapuwan Jehová. Na “xaʼakgstitum lin xlatamat”. Uma wamputun pi lakkaxwili tuku xlitatlawat chu sokg chan niku xliʼanat, o sokg makgantaxti tuku lakgayawakan. Putum katsikgo pi tlan lipawankan chu tlawa tuku lakgkgolotsin wanikgo akxni lakgayawakgo akgtum taskujut. Putum uma xalaktlan xtayat tlawa pi tlan nalichuwinankan. La uku nalichuwinanaw tayat nema xlikgalhit chatum chixku xlakata nalitasiya pi tlan kapulalin xfamilia chuna la wan Biblia.

NALIMASIYA PI TLAN PULALIN XFAMILIA

10. ¿Tuku kilhchanima pi chatum chixku «liwana pulalin xfamilia»?

¹⁰ Xlakata chatum tala tiku tamakgaxtokgnita kgolotsin nalitaxtu, talakaskin pi tlan nalichuwinankan xfamilia. Wa xlakata wanikan pi “liwana xlipulalit xfamilia”. Uma tala nalilakgapaskan pi kapaxki xfamilia chu kamaxki tuku maklakaskinkgo, chu kamakgtaya nakakninanikgo Jehová. ¿Tuku xlakata lu xlakaskinka uma? Apóstol Pablo wa: «Komo chatum chixku ni katsini chuna la napulalin xfamilia, ¿la nakuentajtlawa xcongregación Dios?» (1 Tim. 3:5).

11, 12. ¿La makgtayakgo xfamilia chatum tala xlakata kgolotsin nalimaxtukan? (Na kaʼakxilhti dibujo).

¹¹ Komo uma tala kgalhi xkamanan tiku laktsujku, talakaskin pi “xkamanan nakgalhakgaxmatkgo chu namaxkikgo kakni”. Akxni nakamasiyani chu nakastakyawa, nakalimasiyani tapaxkit. Xlikana pi putum kamanan litsinkgo chu kgamanankgo. Pero komo liwana nakamasiyanikan, xlakan ankgalhin nakgalhakgaxmatnankgo, nakamaxkikgo kakni amakgapitsin chu tlan nalikatsikgo. Nachuna, talakaskin pi xatlat nakamakgtaya xkamanan tlan natalalinkgo Jehová, nalilatamakgo xtastakyaw Biblia chu namatliwakglhkgo xtakanajlakan xlakata tlan natamunukgo.

¹² Talakaskin pi xkamanan uma chixku na kstalaninanin Cristo nalitaxtukgo tiku «ni kalimawakakan pi akglakgwa linkgo xlatamatkan» chu ni kalimawakakan pi «ni lakaskinkgo nakamapakgsikan». Pero ¿tuku la komo xkgawasa o xtsumat tiku wijku kxchik natlawa akgtum lanka talakgalhin? Komo xatlat ni liwana masiyaninit chu ni stakyawanit, max nialh makgatsi tuku talakaskin xlakata chuntiya kgolotsin nalitaxtu (kaʼakxilhti revista La Atalaya 15 xla octubre kata 1996, página 21, párrafos 6, 7).

 NAKUENTAJTLAWA CONGREGACIÓN

13. ¿La limasiya chatum tala pi «kgalhi tsatata naku» chu ni tlankajwa makgkatsikan?

¹³ Natalan tiku limasiyakgo laktlan tayat, akgtum tasikulunalin litaxtukgo kcongregación. Akgtum liʼakxilhtit, chatum tala «tiku kgalhi tsatata naku» tlawa pi naʼanan takaksni. Komo wix lakaskina pi nalilakgapaskana pi kgalhiya tsatata naku, talakaskin nakakgaxpatniya amakgapitsin chu nakaʼakgatekgsniya tuku lakpuwankgo o tuku makgkatsikgo. Kalilakpuwanti pi katawila kʼakgtum tamakxtumit lakgkgolotsin chu xlakan wi tuku nalaksakkgo nema ni lakatsala akgtum limapakgsin xalak Biblia, ¿natatayaya tuku nawankgo? Talakaskin pi chatum kgolotsin «ni tlankajwa namakgkatsikan». Uma wamputun pi ni kawani amakgapitsin pi katlawakgolh tuku xla lakaskin, wata katsi pi tlakg tlan kitaxtu nakakgaxmatni xtastakyawkan amakgapitsin (Gén. 13:​8, 9; Prov. 15:22). “Ni nalismani natalatlawanan” chu «ni lakapala nasitsi». Ni katataʼakglhuwi amakgapitsin, wata tlan kalikatsini chu kamaxki kakni. Xlakata uma tala xakakswa, wa tiku pulana wi tuku tlawa xlakata naʼanan takaksni akxni tawila akgtum taʼakglhuwit (Sant. 3:​17, 18). Maklakaskin laktsatata tachuwin xlakata natlawa pi amakgapitsin nialh nasitsikgo (Juec. 8:​1-3; Prov. 20:3; 25:15; Mat. 5:​23, 24).

14. ¿Tuku xlakata «tiku aku tsukunit kanajlani Cristo» nila kgolotsin nalitaxtu, chu la nalimasiya chatum tala pi «ni makgxtakga Dios»?

¹⁴ Tiku kgolotsin nalimaxtukan “ni wa tiku aku tsukunit kanajlani Cristo”. Uma ni wamputun pi akglhuwata kata xlikgalhit lata tamununit, wata wamputun pi kgalhinita kilhtamaku xlakata namatliwakglha chuna la talalin Jehová chu katsininit nalimaklakaskin Biblia akxni wi tuku nalaksaka. Akxni nina kgolotsin limaxtukan, talakaskin nastalani xliʼakxilhtit Jesús, nataktuju chu xatapaxuwan naskujnani Jehová chuna la xla lakaskin chu akxni chuna nalakaskin (Mat. 20:23; Filip. 2:​5-8). Nachuna, talakaskin nalilatama xlimapakgsin Jehová chu nakgalhakgaxmata tuku wan xkachikin, chu chuna nalimasiya pi «ni makgxtakga Dios» (1 Tim. 4:15).

15. ¿Lu xlakaskinka pi chatum kgolotsin lu nakatsini namasta laktlan taʼakgchuwin?

¹⁵ Biblia liwana limasiya pi chatum kgolotsin  talakaskin «nakatsini makgalhtawakgenan». ¿Wamputun uma pi talakaskin namasta laktlan taʼakgchuwin? Ni. Lhuwa lakgkgolotsin ni kalilakgapaskan xlakata lu tlan akgchuwinankgo, pero lu tlan masiyakgo akxni ankgo lichuwinankgo Dios chu akxni kamatliwakglhkgo natalan xalak congregación (katamalakxtupi 1 Corintios 12:​28, 29 tuku wan Efesios 4:11). Maski chuna, chatum tala tiku kgolotsin litaxtuputun talakaskin chuntiya lu naliskuja xlakata lu tlan namakgalhtawakgenan. ¿Tuku namakgtaya chuna natlawa?

16. ¿Tuku xlitlawat chatum tala xlakata tlakg tlan makgalhtawakgena nalitaxtu? (Na kaʼakxilhti dibujo).

¹⁶ «Liwana maklakaskin tachuwin nema lakgchan nakanajlakan». Xlakata chatum kgolotsin tlan makgalhtawakgena nalitaxtu, talakaskin pi ankgalhin nakilhtiya kxTachuwin Dios tuku namasiya kxlakatin amakgapitsin o akxni wi tiku nastakyawa. Xlakata tlan chuna natlawa, talakaskin nalikgalhtawakga Biblia chu nalakputsanani kilikgalhtawakgakan (Prov. 15:28; 16:23). Akxni kgalhtawakga, liwana lakputsanani la nalilatamakan versículos nema likgalhtawakgama. Chu akxni masiya, liskuja nakalakgchani kxnakujkan tiku kgaxmatnimakgo. Pulaktum tuku namakgtaya xlakata tlan makgalhtawakgena nalitaxtu, wa pi nakaskini tastakyaw lakgkgolotsin tiku tlakg katsinikgo chu natlawa tuku nawanikan (1 Tim. 5:17). Na talakaskin pi lakgkgolotsin nakatsinikgo “nakamatliwakglhkgo” natalan. Pero max namin kilhtamaku natalakaskin “nakastakyawakgo”. Pero akxni chuna natlawakgo, xlimasiyatkan tapaxkit. Komo tlan nalikatsikgo chu nalimasiyakgo tapaxkit chu kxTachuwin Dios nakikilhtiyakgo tuku namasiyakgo, tlakg tlan makgalhtawakgenanin nalitaxtukgo xlakata stalanimakgo nawan xliʼakxilhtit Jesús, tiku tlakg xaTlan Makgalhtawakgena (Mat. 11:​28-30; 2 Tim. 2:24).

CHUNTIYA KALISKUJTI

17. 1) ¿Tuku nakamakgtaya siervos ministeriales chuntiya naliskujkgo xlakata kgolotsin nalitaxtukgo? 2) ¿Tuku talakaskin nalakapastakkgo lakgkgolotsin akxni lilakpuwamakgo komo chatum tala makgatsi tuku talakaskin xlakata kgolotsin nalitaxtu? (Kaʼakxilhti recuadro « Lakgkgolotsin, ni kamalakatsalitit akxni kalakputsananiyatit amakgapitsin»).

¹⁷ Max wilakgo makgapitsin siervos ministeriales  tiku lakpuwankgo pi nikxnila katimakgatsikgolh tuku talakaskin nema lichuwinanitaw. Pero talakaskin nalakapastakkgo pi Jehová chu xkachikin ni kgalhkgalhikgo pi ankgalhin lu tlan nalimasiyakgo umakgolh tayat (1 Ped. 2:21). Nachuna, xʼespíritu Jehová nakamakgtaya namakgatsikgo tuku talakaskin (Filip. 2:13). ¿Anan akgtum tayat nema wix tlakg limasiyaputuna chu talakaskin tlakg naliskuja? Komo chuna, katlawani oración Jehová, kalakputsanani xlakata uma tayat kkilikgalhtawakgakan chu kakaskini tastakyaw lakgkgolotsin nema namakgtayayan.

18. ¿Tuku xlitlawatkan putum siervos ministeriales?

¹⁸ Putum natalan, asta tiku lakgkgolotsin litaxtukgoya, talakaskin chuntiya naliskujkgo xlakata nakgalhikgo tayat nema lichuwinanitaw kʼuma artículo (Filip. 3:16). Chu komo wix siervo ministerial, chuntiya kaliskujti xlakata kgolotsin nalitaxtuya. Kaskini Jehová pi chuntiya kamasiyanin chu kamakgtayan tlakg tlan naskujnaniya chu nakamakgtayaya natalan xalak congregación (Is. 64:8). Jehová nasikulunatlawa putum tuku liskujpat xlakata namakgatsiya tuku talakaskin xlakata kgolotsin nalitaxtuya.